Ucarda ağır yol-nəqliyyat hadisəsi olub.

APA-nın xəbərinə görə, hadisə rayonun Heydər Əliyev prospektində baş verib.

“Mercedes-Benz” markalı 99-LK-537 dövlət nömrə nişanlı avtomobil yolu keçmək istəyən piyada, Ucar rayon sakini - 1956-cı il təvəllüdlü Nəriman Həmzə oğlu Abdulrəhmanovu vurub.

Ağır xəsarət alan zərərçəkəni sürücü öz avtomobili ilə Ucar Rayon Mərkəzi Xəstəxanasına aparıb.

Həkimlərin zəruri tibbi yardımlarına baxmayaraq o, xəstəxanada ölüb.
İlkin ehtimala görə, hadisəyə əsas səbəb prospektin işıqlandırılmaması olub.

Qeyd edək ki, prospektin qaranlıq olması səbəbindən analoji hadisələr ərazidə tez-tez baş verir.

Hadisəni törədən şəxs polis əməkdaşıdır.

Faktla bağlı araşdırma aparılır.

Bu gün sərhəddə əsirlərin dəyişdirilməsindən sonra Azərbaycanın təhvil verdiyi 32 erməni xəstəxanaya yerləşdirilib.

Axar.az xəbər verir ki, bu barədə erməni mediası yazıb.

Alman çoban iti Moskvada uşaq arabasında yatan körpəni öldürməyə cəhd edib.

it uşağa hücum edərək uşaq arabasından çıxarıb və onu dişləyərək öldürməyə çalışıb.

Fövqəladə hadisə Sosenskoye yaşayış ərazisində baş verib. 33 yaşlı sakin üç aylıq oğlunu iti ilə evinin yaxınlığındakı küçədə uşaq arabasında qoyub və o, evə gedib. Qayıdanda itinin qarda uşağı parçaladığını görüb.

Qarın, kürək və ayaqların çoxsaylı yaraları olan uşaq reanimasiyadadır. Körpənin kəllə-beyin travması və qansızma ilə beyin əzilməsi də var.

İtin taleyi ilə bağlı məlumat yoxdur.

Təfərrüatlar dəqiqləşdirilir.
Mənbə: lent.az

Azərbaycanla Ermənistan arasında sülh sənədinin imzalanması inandırıcı deyil. Burada platformalar arasında açıq rəqabət var. Digər bir müstəvidə hansısa bir razılıq əldə ediləndə bu, qısqanclıqla qarşılanır. Amma bunun fonunda Qərb platforması yenidən gündəmdədir. Məhz bu kontekstdə Azərbaycanla Ermənistan arasında növbəti görüşün Brüsseldə olması gözlənilir. Vaşinqtonda da belə bir görüşün olması ehtimalı var.

Bunu Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib.

“Şərtlərlə bağlı tərəflər arasında fikir ayrılığı var. Azərbaycan Prezidenti ADA Universitetindəki Forumda bu barədə danışdı. Qərbi azərbaycanlıların və Qarabağdan getmiş ermənilərin geri dönüşü məsələsinə toxunuldu. Azərbaycan tərəfinin yanaşması bu cürdür. Ermənistan parlamentinin spikeri Alen Simonyan isə açıqlamasında Qərbi azərbaycanlıların geri qayıtmasını qeyri-konstruktiv adlandırıb. Onlar hətta ermənilər üçün hansısa bir “özəl statusdan” danışır”, – deyə o qeyd edib.

Mərkəz sədri hesab edir ki, sülh sazişində qarşılıqlı olaraq Qərbi azərbaycanlıların və ermənilərin geri dönüşü məsələsi əksini tapmayacaq:

“Çünki Azərbaycan buna heç vaxt birtərəfli şəkildə razı olmayacaq. Yəni, Qarabağda yaşamış ermənilərlə bağlı məsələnin sülh sazişində yer almasına Azərbaycan imkan verməyəcək. Erməni tərəfi də Qərbi azərbaycanlıların Ermənistana qayıdışına razı olmayacağı ehtimalı var”.

Fərid Şəfiyevə görə, məhz bu kontekstdə sülh müstəvisində irəliləyişin olması mümkündür:

“Son bir iki ayda tərəflər arasında gərginlik var idi. Hətta pessimist proqnozlar da eşidilirdi. İndiki halda da ümumilikdə sülh sazişi ilə bağlı bəzi maddələr üzrə konkret razılaşma yoxdur. Sözsüz ki, artıq tərəflər arasında saxlanılan şəxslərin qarşılıqlı mübadiləsi və digər məsələlər prosesdə irəliləyişə dair ümidləri gücləndirir. Azərbaycanla Ermənistan bunu vasitəçi olmadan edib. Sərhəddə delimitasiya və demarkasiya ilə bağlı da görüşü heç bir vasitəçi olmadan baş tutub”.

Bakının Sabunçu rayonunda ağır yol-nəqliyyat hadisəsi baş verib.

APA xəbər verir ki, hadisə Maştağa-Kürdəxanı şosesində qeydə alınıb.

1971-ci il təvəllüdlü Abbas İsrail oğlu Həsənov idarə etdiyi “VAZ-2107” markalı maşını işıq dirəyinə çırpıb.

Avtomobilə yüngül zərər dəyib. Sürücü isə sükan arxasında ölü aşkarlanıb.
Əraziyə cəlb olunan Sabunçu Rayon Polis İdarəsinin əməkdaşları sürücünün meyidini müayinə olunması üçün Məhkəmə Tibbi Ekspertiza və Patoloji Anatomiya Birliyinin Sabunçu Rayon şöbəsinə təhvil verib.

Ekspertlər müəyyən edib ki, sürücü qəza keçirmədən öncə infarkt keçirərək ölüb.

Fakt araşdırılır.

“Nikah dövründə əldə olunmuş əmlak ər-arvadın ümumi birgə mülkiyyəti hesab olunduğundan nikahdan sonra alınmış avtomobilin qeydiyyat şəhadətnaməsində kimin adının yazılmasının əhəmiyyəti yoxdur. Bu, mənim subyektiv fikrimdir. Yəni avtomobilin qeydiyyat şəhadətnaməsində ər-arvaddan birinin adı varsa, belə hesab olunur ki, həmin avtomobili digəri də idarə edə bilər. Belə halda, nikah şəhadətnaməsi mütləq ər-arvadın üzərində olmalıdır ki, nikahın qeydiyyat tarixi ilə avtomobilin qeydiyyat tarixi tutuşdurula bilsin. Bu hüquq yalnız ər-arvada şamil olunur. Digər ailə üzvlərinin belə bir hüququ yoxdur”.

Bu sözləri Pravda.az-a açıqlamasında tanınmış vəkil Turan Abdullazadə deyib.

Vəkil düşünür ki, nikah şəhadətnaməsi üzərində olduğu halda vətəndaşın cərimələnməsi qanunsuz və əsassızdır: “2023-cü ilin iyul ayının 24-də Konstitusiya Məhkəməsi qərar qəbul edərək, belə bir qənaətə gəlib ki, mövcud qanunvericilikdə etibarnamə məhz əqdlərin bağlanması üçün təmsilçiliklə bağlı münasibətlərin hüquqi tənzimlənməsi vasitəsi kimi nəzərdə tutulduğundan, daşınan əşya olaraq nəqliyyat vasitəsinin mülkiyyətçi olmayan şəxs tərəfindən idarə edilməsi üçün etibarnamənin olması ilə bağlı tələb qanunvericilik qaydasında aradan qaldırılmalıdır. Eyni zamanda Azərbaycan Respublikası İnzibati Xətalar Məcəlləsinin və “Yol hərəkəti haqqında” qanununun normaları qanunverici orqan tərəfindən təkmilləşdirilənədək nəqliyyat vasitəsinə sahiblik hüququ olan şəxsin özü nəqliyyat vasitəsində olmadığı hallarda nəqliyyat vasitəsinin etibarnaməsiz idarə edilməsi (ər-arvadın ümumi mülkiyyət hüququna dair şəhadətnaməsinin olduğu hallar istisna olmaqla) həmin Məcəllənin 332.1-ci maddəsi ilə müəyyən edilən inzibati məsuliyyətə səbəb olur. Nəqliyyat vasitəsinin etibarnaməsiz idarə edilməsi hüququ yalnız ər-arvadın ümumi mülkiyyət hüququna dair şəhadətnaməsinin olduğu hallarda ər-arvada şamil olunacaq. Konstitusiya Məhkəməsi qeyd edib ki, göstərilənlər nəqliyyat vasitəsinin ər-arvadın birgə mülkiyyətində olmasını təsdiqləmək üçün onların ümumi mülkiyyət hüququ haqqında şəhadətnamənin sürücünün yanında olmasını tələb edir. Milli Məclis bununla bağlı müsbət qərar qəbul etsə, nikah şəhadətnaməsi deyil, ümumi mülkiyyət hüququ haqqında şəhadətnamə şəxslərin yanında olduğu təqdirdə etibarnaməsiz maşın idarə etdiyinə görə ər-arvaddan hər hansı birinin cərimələnməsi artıq tam qanunsuz olacaq. Nəqliyyat vasitəsinə sahiblik hüququ olan şəxsin özünün şəxsən nəqliyyat vasitəsində olmadığı hallarda maşını idarə edənlərin yanında mütləq etibarnamə olmalıdır. Əks halda, bu, inzibati məsuliyyətə səbəb olacaq. Yəni etibarnamə tələbi tamamilə ləğv olunmur, ər-arvada münasibətdə bu tələbin zəruriliyi aradan qaldırılır”.

Vətən müharibəsinin iştirakçısı, çoxsaylı medallarla təltif olunan, ikinci qrup əlil, Salyan rayonunun Kərimbəyli kənd sakini, ADPU -nun Psixologiya ixtisası üzrə məzun İbrahim Hüseynov Salyan-Şirvan Regional İdarəsinin rəisi Sənan Məsimlinin əmri ilə Qarabağlı kənd 1 saylı tam orta məktəbinə təmizlikçi "vəzifə"sinə təyin olunub.

Bu barədə Milli Məclisin deputatı Etibar Əliyev məlumat verib.

“Bəs Vətən müharibəsi iştirakçısını bu vəzifəyə təyin edən Sənan Mənsimlinin ixtisası nədir? Sənan Məsimli Azərbaycan Texniki Universitetini bitirib və Salyan-Şirvan Regional Təhsil İdarəsinin rəisi vəzifəsinə təyinatdan əvvəl Təhsil Nazirliyinin 13 saylı Ərazi Maliyyə Hesablaşma Mərkəzinin rəisi vəzifəsində işləyib. Günümüzün reallığı budur...” – deputat qeyd edib.\\Pravda.az

“Bankımızda yaxşı müştəri olmusunuz. Yenidən kredit götürmək istəyərdinizmi?”

Azərbaycanda banklardan kredit götürmüş və müsbət kredit tarixçəsinə malik olan vətəndaşlar bu sözləri ayda azı bir dəfə eşidirlər.

Bank işçiləri nəinki keçmişdə kredit borcu olmuş, hətta aktiv krediti olan müştərilərinə belə tez-tez zəng edərək onları növbəti dəfə borclandırmağa çalışırlar. Bəs bu nə dərəcədə düzgündür? Bank işçilərinin vətəndaşlara tez-tez zəng etməyə ixtiyarı varmı? “Report” mövzunu ekspertlərlə müzakirə edib.

“Azərbaycan Banklar Assosiasiyası” (ABA) İctimai Birliyinin hüquqi məsələlər üzrə ekspert qrupunun rəhbəri Qorxmaz Ağayev deyib ki, bankların müştərilərinə aktiv şəkildə pul təklif etməsində qəbahətli heç nə yoxdur və bu məsələ ilə bağlı vətəndaşların ciddi narazılığı müşahidə olunmur:

“Bu günə qədər ABA-ya məsələ ilə bağlı hər hansı şikayət daxil olmayıb. Belə bir statistika yoxdur. Ola bilsin hər hansı bank müştərini narahat edir. Belə bir problem ola bilər. Ancaq müştərilərə təkcə banklardan zəng gəlmir, başqa biznes strukturları da zəng edirlər. Müştəri istəsə, bankla əlaqə qurub iradını bildirə bilər”.
İqtisadçı-ekspert Rəşad Həsənov isə deyir ki, müştərilərə vaxtaşırı zəng edilməsi banklar arasında sayı az olan yaxşı müştərilər uğrunda rəqabətlə əlaqədardır və buna təbii yanaşmaq lazımdır:

“Banklarda izafi likvidlik var, onlar vəsaitlərini yerləşdirməkdə çətinlik çəkir, buna görə də marketinq siyasətlərini bacardıqca təkmilləşdirir. Burada ciddi problem olduğunu düşünmürəm. Vətəndaş zəng gələn bankın xidmətindən imtina edə bilər. Amma bu zənglərin məlumatlandırma baxımından faydalı olduğunu düşünürəm. Çünki bir çox vətəndaşlar bankların kredit şərtləri barədə məlumatları bu kimi zənglər vasitəsilə alırlar. Bu kimi zənglər hansısa formada bank və müştəri arasında birbaşa ünsiyyətin ortaya çıxmasına, ünsiyyət platformasının formalaşmasına müsbət təsir göstərir”.

Hüquqşünas Əkrəm Həsənov isə düşünür ki, bankların vətəndaşları bezdirməsi bir növ hüquq pozuntusudur və bu məsələ ilə bağlı nəinki banka irad bildirmək, hətta məhkəməyə şikayət etmək də olar:

“Məsələn, vətəndaş bank əməkdaşlarının onu uzun müddət telefonla narahat etdiyini, mənəvi zərər gördüyünü əsas gətirərək bankı məhkəməyə verə bilər. Amma bunu məhkəmədə sübut etmək xeyli vaxt aparacaq”.

Bakı və Naxçıvan şəhərlərində Dövlət İmtahan Mərkəzi tərəfindən doktorantura, dissertantura və adyunkturada təhsil alan və ya təhsilini bitirmiş iddiaçıların xarici dillər üzrə fəlsəfə doktoru imtahanı keçirilib.

Bu barədə “sayta Dövlət İmtahan Mərkəzindən bildirilib.

İmtahanın keçirilməsi üçün ümumilikdə 3 imtahan binası, 6 imtahan rəhbəri, 3 ümumi imtahan rəhbəri, 42 nəzarətçi-müəllim, 6 buraxılış rejimi əməkdaşı (mühafizə) ayrılıb.
İmtahan dinləyib-anlama, oxuyub-anlama, dildən istifadə (leksik-qrammatik tapşırıqlar) və yazı bloklarından ibarət olub. Bu imtahanda iştirak etməyən iddiaçılar danışıq bloku üzrə imtahana buraxılmırlar. Danışıq bloku üzrə imtahanın dekabrın 17-də (əcnəbilər üçün Azərbaycan dili imtahanı dekabrın 11-də) keçiriləcək. Danışıq bloku üzrə imtahanda iştirak etməyən iddiaçılar ilk 4 blok üzrə 30 bal və daha yüksək nəticə göstərsələr belə, şəhadətnamə ilə təmin olunmayacaqlar. Danışıq bloku imtahanına buraxılış vərəqəsi növbəti həftənin əvvəlində DİM-in saytına yerləşdiriləcək.

Həm xarici dil üzrə fəlsəfə doktoru imtahanlarında, həm də əcnəbi və vətəndaşlığı olmayan iddiaçılar üçün Azərbaycan dili üzrə fəlsəfə doktoru imtahanında namizədlərin və iddiaçıların hər bir test tapşırığına düzgün cavabı bir balla qiymətləndirilir, səhv cavablar düzgün cavabların nəticəsinə təsir göstərmir. Vizual məlumatın təsviri və danışıq bloku üzrə tapşırıqlar 10 ballıq şkala üzrə qiymətləndirilir. Beləliklə, imtahanda toplanıla biləcək maksimal bal 50-yə bərabərdir. Dinləyib-anlama, oxuyub-anlama, dildən istifadə (leksik-qrammatik tapşırıqlar), yazı və danışıq blokları üzrə balların minimum 20 faizini, ümumilikdə isə xarici dil üzrə fəlsəfə doktoru imtahanından azı 30 bal toplamış iddiaçılar və əcnəbilər üçün Azərbaycan dili üzrə fəlsəfə doktoru imtahanından azı 25 bal toplamış iddiaçılar imtahanın nəticəsinə qoyulan tələbi ödəmiş hesab edilirlər.

İmtahanların nəticələri Danışıq bloku imtahanı keçiriləndən sonra 2 həftə ərzində elan olunacaq.
Qeyd: Əcnəbi və vətəndaşlığı olmayan iddiaçıların Azərbaycan dili üzrə fəlsəfə doktoru imtahanı (o cümlədən danışıq bloku) dekabrın 11-də keçiriləcək.