Ermənistanın Aşağı Axta (Razdan) şəhərində mayın 18-də atışma baş verib.

TNS xəbər verir ki, bu barədə erməni mediası məlumat yayıb.

Bildirilib ki, hadisə yerində bir kişi meyiti, silah, qan izləri və avtomobil aşkar edilib. İki yaralı tibb məntəqəsinə çatdırılıb, onlardan biri xəstəxanada ölüb.

Faktla bağlı cinayət işi başlanıb. Mənbənin sözlərinə görə, öldürülənlərdən biri kriminal avtoritetdir.

Zəngəzur dəhlizinin Kalininqrad statusu ilə açılması məsələsi Ermənistanda gündəmə gətirilib. Ermənilər iddia ediblər ki, hər şey dəhlizin bu statusla açılmasına doğru gedir və bu rəsmi Bakının tələb etdiyi “Azərbaycandan Azərbaycana prinsipi”ni ehtiva edən bir modeldir.

Qeyd edək ki, Kalininqrad modelinə əsasən sərnişin və malların daşınmalarında güzəştlər tətbiq olunur, bəzi mallarla bağlı ümumiyyətlə rüsum alınmır. Bu modelin tətbiqindən sonra Naxçıvan əhalisinə tələbat malları göndəriləcəksə, bu zaman rüsum alınmayacaq. Sərnişinlərin daşınmada isə Azərbaycandan Azərbaycana olacağı üçün Naxçıvana getmək istəyən və ya bura gəlmək istəyən vətəndaşlardan viza tələb olunmayacaq.

Hurriyyet.az bildirir ki, məsələ ilə bağlı Referans.az-a millət vəkili Elman Nəsirov danışıb:

"Zəngəzur dəhlizi ilə bağlı məsələ bilirsiniz ki, 2020-ci ilin 10 noyabr bəyanatında öz əksini tapıb. Burada Zəngəzur sözü işlənməsə belə, üç ölkə arasında nəqliyyat- kommunikasiya əlaqələrinin açılmasından bəhs olunur. Bu da o deməkdir ki, söhbət Zəngəzur dəhlizindən gedir. Təxminən 43-45 km ərazi Erkənistan ərazisinə düşür. Bəzən bunu Kalininqrad və s. variantlarla izah edirlər. Mənə elə gəlir ki, əsas problem budur ki, həmin sənəddə yazılıb ki, dəhliz boyunca təhlükəsizlik məsələlərini Rusiyanın Təhlükəsizlik xidmətinin sərhəd qoşunları həyata keçirəcək. Bu sənədə Nikol Paşinyan imza atıb. Paşinyan deyir ki, kommunikasiya əlaqələri bərpa olunsun, amma, təhlükəsizlik məsələlərini üçüncü tərəf deyil, Ermənistan özü həyata keçirsin. Rusiya da hesab edir ki, bu Paşinyanın özünün imzaladığı 10 noyabr sənədinə ziddir. Paşinyan deyir ki, 10 noyabr sənədindəki reallıq bir reallıq idi, yəni Qarabağla bağlı status fərqli idi. Orada erməni silahlı qüvvələri var idi, indi isə Qarabağda erməni silahlı birləşməsi yoxdur və bu təmamilə yeni reallıqdır. Azərbaycan ərazisinin bütövlüyünü 1991- ci il Alma-ata bəyannəməsinə görə tanımışıq və s. Paşinyan hesab edir ki, fərqli reallıqda 10 noyabr sənədi öz qüvvəsini itirib".

Deputat hesab edir ki, Rusiya bununla razılaşmır, gərginliyin fundamental kökündə dayanan əsas səbəb budur:

"Azərbaycan Zəngəzur dəhlizinin açılmasında maraqlıdır. Çünki dəhliz vasitəsilə Naxçıvanla birbaşa əlaqəmiz olacaq. Türk dünyasını süni şəkildə necə parçalamışdılarsa, bu məsələlər həll olacaq. Dəhliz Ermənistan üçün də çox faydalıdır. Burada uduzan tərəf yoxdur".

Elman Nəsirov deyir ki, Azərbaycana qarşı viza məsələsindən söhbət gedə bilməz: "Belə olan halda dəhliz aktuallığını itirir. Azərbaycan tərəfi dəfələrlə Ermənistana deyib ki, əgər siz razı olmasanız, bizim alternativ variantlarımız da var. İranla bu sahədə müəyyən sənədlər imzalanıb. Yəni İrandan keçməklə Naxçıvana quru yolun təminatı ilə bağlı. Zəngəzur dəhlizi işə salınmasa, bu addımı atmasanız, daimi blokada şəraitində qalacaqsınız. Belə olan halda, fəsadları ən yaxşı Ermənistan və onun siyasi rəhbərliyi bilir. Ona görə də hesab edirəm ki, Zəngəzur dəhlizinin işə düşməsi labüddür".

Rusiya ilə savaşda məğlub olarsa, Ukraynanın bərpası və NATO üzvlüyünə hazırlanması onilliklər boyu davam edə bilər, digər tərəfdən, müharibədə qalib gələcəyi təqdirdə, Rusiya buna heç bir halda, imkan verməz... Əslində, Rusiyanın Ukraynaya hərbi müdaxiləsində də NATO-ya üzvlük cəhdlərinə Kremlin radikal reaksiya faktoru birbaşa rol oynamışdı, bu baxımdan, ABŞ-ın dövlət katibi yeni şərtli vədi ilə rəsmi Kiyevin bütün ümidlərini “dəfn” etmiş oldu...

ABŞ və Qərbin MBD məkanı üzərində qurduğu bütün planlar bir-birinin ardınca iflasa uğramağa başlayıb. Belə ki, Qərb siyasi dairələri Rusiya ilə qlobal qarşıdurmada MDB məkanına yerləşmək, postsovet dövlətlərini Kremldən uzaqlaşdırıb, əks düşərgənin təsiri altına salmaq ssenariləri üzrə hərəkət edirdilər. Son illərdə bu istiqamətdə müəyyən uğurlar da qazanılmışdı. Və Qərbin Rusiya ilə qarşıdurmada daha radikal davranması, MDB məkanına hərbi-siyasi cəhətdən yerləşmək qərarı verməsi bumeranq effekti vermiş oldu.

Hazırda ABŞ və Qərbin Rusiya ilə açıq toqquşma platsdarmları kimi, ilk növbədə Ukrayna və Cənubi Qafqaz diqqəti çəkir. Belə ki, Qərb siyasi dairələri MDB məkanına məhz Ukrayna üzərindən yerləşməyin vaxtı çatdığını düşünməklə, əslində, strateji səhvə yol vermiş oldular. Çünki NATO-nun hərbi-siyasi dəstəyi ilə Ukraynanın Rusiyaya qarşı savaşa sövq edilməsindən sonra Qərbi məyus edən əsas faktorlar üzə çıxmağa başladı. Məlum oldu ki, Rusiya Qərbdə düşünüldüyü kimi zəif deyilmiş, uzunmüddətli savaş ssenarilərinə qarşılıq vermək potensialına malikmiş. Və indi Rusiya Ukrayna savaşında hərbi təşəbbüsü ələ keçirmiş kimi görünür.

Ən əsasısa, belə davam edərsə, Ukraynanın hərbi məğlubiyyəti qaçılmaz olacaq. Üstəlik, Rusiyaya hərbi-siyasi məğlubiyyətə paralel olaraq, ABŞ və Qərb dağıdılmış Ukraynanın timsalında yeni ağır problemlə qarşı-qarşıya qalacaq. Çünki məğlub Ukraynanın gələcək taleyini müəyyən etmək o qədər də asan məsələ deyil. İlk növbədə Rusiyanın hərbi qələbə sayəsində qabaran iştahını təmin etmək lazım gələcək. Bunun ardıncasa, indiki Ukraynadan geri qalan hissənin yenidən dövlət statusu qazanmasına, böyük ölçüdə dağıdılmış bu ölkənin bərpasına yüzmilyardlarla maliyyə vəsatinin xərclənməsi üçün qaynaqlar da tapılmalıdır.

Digər tərəfdən, savaşdan sonra fərqli sərhədlərə malik olacaq Ukraynanın təhlükəsizliyi barədə də düşünməyə ehtiyac yaranacaq. Halbuki, Qərb siyasi dairələrində də artıq etiraf olunmağa başlandığı kimi, güclənmiş Rusiyanın iddialarına paralel olaraq, Ukraynaya təhlükəsizlik təminatı vermək də qəliz məsələdir. Hər halda, Kremlin bu məsələdə Rusiyanın qlobal və geopolitik maraqları çərçivəsində Qərbə şərtləri diqtə etməyə çalışacağı artıq indidən qətiyyən şübhə doğurmur.

Xüsusilə də, onu nəzərə almaq lazımdır ki, Kreml Ukrayna savaşından sonra Avropa məkanında hərbi-siyasi və maliyyə-iqtisadi proseslərə daha kobud müdaxilədən çəkinməyə bilər. Bu haldasa, ABŞ və Qərbin yalnız Ukraynanın deyil, həm də Avropa Birliyi məkanının gələcək taleyi barədə düşünmək məcburiyyətində qala biləcəyini iddia etmək mümkündür. Halbuki, ABŞ və Qərbin bu qədər ağır hərbi-siyasi və maliyyə-iqtisadi ziddiyyətlərin yaradacağı problemləri daşımaq imkanları ümidverici təsir bağışlamır. Və bu baxımdan, Qərbin qarşısında Ukraynaya Rusiya üzərində hərbi qələbə qazandırmağın yollarını tapmaq kimi önəmli mərhələ dayanır.

Təbii ki, Rusiya üzərində hərbi qələbəni sadəcə, ABŞ dövlət katibi Entoni Blinkenin Ukrayna paytaxtı Kiyevin gecə barlarında gitara ilə “konsert” verməsi hesabına təmin etmək qətiyyən mümkün deyil. ABŞ dövlət katibinin bu davranışı Ukrayna əhalisinin yalnız əhval-ruhiyyəsini bir qədər yüksəldə bilər. Ancaq savaş meydanında konkret hərbi uğurlar qazanmaq üçün daha fərqli variantların sınaqdan keçirilməsi olduqca vacibdir. Və Qərbin belə ehtiyat variantlarının olub-olmadığı isə hələlik müəmmalı xarakter daşıyır.

Məsələ ondadır ki, ABŞ və Qərbin son vaxtlar Ukraynaya ayırdığı maliyyə dəstəyi Rusiya üzərində hərbi qələbəni təmin etmək üçün yetərli görünmür. Üstəlik, Qərbdə bəzi ölkələr Ukrayna savaşının maliyyələşdirilməsi ilə bağlı yükü daşımağa daha o qədər də həvəsli olmadıqlarını da qətiyyən gizlətmirlər. Halbuki, Qərbdə bu məsələ ilə bağlı Ukraynanın üzərinə minnət qoyulması da rəsmi Kiyev tərəfindən açıq-aşkar qıcıqla qarşılanır. Və prezident Volodimir Zelenskinin buna verdiyi reaksiya da əslində, Qərbə narazılıq mesajı kimi qəbul oluna bilər.

Prezident Volodimir Zelenski açıq mətnlə bildirib ki, ABŞ və digər Qərb ölkələrinin ayırdığı maliyyə dəstəyi qətiyyən Ukraynaya verilmir. Belə ki, həmin maliyyə vəsaitləri onu ayıran ölkələrin daxilində xərclənir, yeni müəssisələr və iş yerləri açılır. Yəni, maliyyə vəsaiti ayıran ölkələrin əslində, elə bir ciddi itkiləri olmur. Əksinə, Ukraynaya ayrılmış maliyyə vəsaitləri ABŞ və Qərb ölkələrinə gəlir gətirir. Ayrılmış maliyyə vəsitinin məbləği isə Ukraynanın hesabına borc kimi yazılır. Və bu, Ukraynanın gələcək taleyini daha da qəlizləşdirir.

Göründüyü kimi, Ukraynanı heç də vəd olunan “parlaq gələcək” gözləmir. Bu ölkənin gələcək sərhədləri elə indidən qeyri-müəyyən xarakter daşıyır. Savaşdan sonra belə bir dövlətin olub-olmayacağı, Qərb ölkələrinin onun bərpasına xərc çəkməyə həvəs göstərəcəkləri də müəmmalı olaraq qalır. Üstəlik, son vaxtlar ABŞ və Qərbin Ukraynaya verdiyi vədlərin məzmunu da situasiyanın olduqca qəliz olduğuna əminlik yaradır.

NATO-nun baş katibi Yens Stoltenberq Ukrayna məğlub olarsa, bu ölkənin bərpasına xərc çəkməyə ehtiyac olmayacağını artıq indidən açıq mətnlə bəyan edib. ABŞ-ın dövlət katibi Entoni Blinken isə Kiyev səfəri zamanı Qərbin Ukraynanı əvvəlcə NATO-ya üzvlüyə yaxınlaşdıracağını, yalnız bundan sonra bu qurumun sıralarına qatacağını biıdirib. Və bu, əslində, Ukraynanın NATO-ya heç vaxt üzv ola bilməyəcəyinə yumşaq eyhamdır.

Hər halda, Rusiya ilə savaşda məğlub olmuş Ukraynanın bərpa edilməsi və NATO üzvlüyünə hazırlanması onilliklər boyu davam edə bilər. Digər tərəfdən, savaşda qalib gələcəyi təqdirdə, Rusiya Ukraynanın NATO üzvlüyünə heç bir halda, imkan verməz. Əslində, Rusiyanın Ukraynaya hərbi müdaxiləsində də NATO-ya üzvlük cəhdlərinə Kremlin radikal reaksiya faktoru birbaşa rol oynayır. Və bu baxımdan, ABŞ dövlət katibinin şərtli vədləri Ukraynanın bütün ümidlərinin üzərindən çarpaz xətlərin çəkilməsi anlamı daşıyır. \\Yeni Müsavat

Qazaxıstan prezidenti Kasım-Jomart Tokayev pedofillərin, ekstremizm və terrorizmlə məşğul olan şəxslərin respublikaya girişini qadağan edən qanunu imzalayıb.
Bu barədə dövlət başçısının mətbuat xidməti məlumat yayıb.

“Ekstremist və ya terror təşkilatında iştirak edən, təkrar cinayət törətmiş, mütəşəkkil dəstədə (cinayət təşkilatında) aparıcı mövqe tutan, yetkinlik yaşına çatmayanların cinsi toxunulmazlığı əleyhinə cinayətlər törətmiş şəxslərin ölkəmizə girişinə qadağa qoyulub”, – mətndə deyilir.

Bundan əlavə, Qazaxıstan vətəndaşlığına qəbuldan imtina və bərpa üçün yeni əsaslar nəzərdə tutulur. Bunlara, xüsusən də yetkinlik yaşına çatmayanların cinsi toxunulmazlığı əleyhinə cinayətlərin törədilməsi, dövlət dilini ibtidai səviyyədə bilməməsi, respublika konstitusiyasının əsaslarını, habelə qanunvericiliklə müəyyən edilmiş həddə ölkə tarixini bilməməsi daxildir.

“İranın ali dini lideri Əli Xameneinin ofisinin mətbu orqanı sayılan “Keyhan” qəzetinin Azərbaycanı hədələyən məqalə yayınlaması qonşu ölkənin anti-Azərbaycan siyasətindən imtina etməyəcəyinin növbəti sübutudur”.

“AzPolitika” xəbər verir ki, bunu politoloq Elxan Şahinoğlu deyib.

Onun sözlərinə görə, Qəzza ilə bağlı yayımlanan məqalədə Azərbaycan İsrailə neft satmaqda ittiham olunur: “Əgər etinasızlıq etsəniz, İsraildən sonra növbə sizdədir!” başlıqlı və şantaj xarakterli məqalədə Azərbaycandan İsrailə neft nəqlini dayandırması tələb olunub. Məqalə müəllifi iddia edib ki, Azərbaycan Bakı-Tbilisi-Ceyhan boru xəttiylə İsrailə neft satışını dayandırsa, guya İsrail iqtisadiyyatı çökəcək. Ancaq məqalə müəllifinin “Bakı-Tbilisi-Ceyhan dəhlizin pozulması sionist rejimin bütün iqtisadiyyatında böhrana səbəb ola bilər” cümləsindəki “dəhlizin pozulması” ifadəsi Bakıya çağırışdan çox İrana bağlı terrorçu və silahlı qruplara çağırışdır ki, kənar qüvvələr nəqlə mane olsunlar. İran husilər vasitəsilə Qırmızı dənizdəki dağıdıcı fəaliyyətini indi də Azərbaycan və Türkiyə üzərindən reallaşdırmaq istəyir. Alınmayacaq”.

Ekspert xatırladır ki, Bakı-Tbilisi-Ceyhan boru xəttindən neft alan yalnız İsrail deyil. “İsrailə nefti biz satmasaq, başqaları satacaq. Azərbaycan BMT-dəki səsvermədə Fələstinin müstəqilliyinə səs verib, Qəzzadakı müharibənin dayandırlmasına tərəfdardır, gələcəkdə bölgənin yenidən qurulmasında maliyyə dəstəyi də verməyə hazırdır. Tehran bunları kənara qoyaraq “Azərbaycana necə pislik edə bilərəm” düşüncəsindədir”, - E.Şahinoğlu vurğulayıb.

Türkiyədə “Kobani hadisələri”ndə təqsirləndirilən Xalqların Demokratik Partiyasının (HDP) sabiq həmsədri, PKK sempatizanı Səlahəddin Dəmirtaşa hökm oxunub.

Ankara 22-ci Ağır Cəza Məhkəməsində yekun hökm 43 il 8 ay olub.

HDP-nin digər sabiq həmsədri Figen Yüksekdağ 30 il, Mardin Şəhər Bələdiyyəsinin sabiq sədri Ahmet Türk 10 il müddətinə azadlıqdan məhrum ediliblər.

Altan Tan, Ayhan Bilgen və Aysel Tuğluk isə bəraət alıblar.

Qeyd edək ki, 2014-cü ildə Kobani hadisələri zamanı Diyarbəkirdə 31 nəfər, o cümlədən iki polis əməkdaşı ölüb, 460 insan yaralanıb. Bu işlə əlaqədar 2019-cu ildə Xalqların Demokratik Partiyasının (HDP) keçmiş həmsədri Səlahəddin Dəmirtaş həbs edilib.

Qeyd edək ki, HDP-nin 2014-cü il oktyabrın 6-da "İŞİD"in Kobaniyə (Eyn əl-Ərəb) qarşı həyata keçirdiyi hücumların bəhanə edərək 35 rayonda icazəsiz mitinqlər keçirilmişdi. Hadisələr zamanı 33 nəfər ölmüş, 2 polis şəhid olmuş, 221 mülki vətəndaş və 139 polis isə yaralanmışdı. Mitinqlərdə 25-i icra hakimiyyəti, 67-si hüquq-mühafizə, 29-u siyasi partiya, 212-si məktəb olmaqla ümumilikdə 1 113 binaya zərər dəymişdi. Aksiyalarda özəl, bələdiyyə, təcili tibbi yardım və polis avtobilləri yandırılmış və ümumilikdə 1 177 nəqliyyat vasitəsi istifadəyə yararsız vəziyyətə düşmüşdü.

"İslama Slovakiyada yer yoxdur" - Robert Fitso ölümlə-həyat arasındadır

"Aljazeera.com" yazır ki, Slovakiyanın baş naziri Robert Fitso (1964) ölümlə həyat arasındadır. Yaxın 1-2 saat həlledici olacaq...

Robert Fitso 2023-cü ilin oktyabrından Baş nazir vəzifəsindədir. O, 2006—2010 və 2012—2018-ci illərdə də Baş nazir olub. 1992-ci ildə isə Çexslovakiya parlamentinə deputat seçilib. Ölkəni Avropa Şurasında təmsil edib.

O, ardıcıl anti-Qərb mövqeyindən çıxış edir. Rusiyaya simpatiyası var. Eyni cinsdən olan şəxslərin evlənməsinə qarşı açıq mübarizə aparır...

Müsəlman mühacirlərin Avropaya axınına qəti etiraz edib: "İndi nəsə desəm, bəlkə də qəribə görünəcək, amma üzr istəyirəm, ancaq İslama Slovakiyada yer yoxdur. Düşünürəm ki, siyasətçilərin vəzifəsi bu barədə çox aydın və açıq danışmaqdır. İstəməzdim ki, on minlərlə müsəlman buralarda yaşasın”.

O, HƏMAS-ın İsrailə hücumunu da qınayıb. Avropa İttifaqını bu məsələdə tərəddüd etdiyinə görə ittiham edib. Gürcüstan-Rusiya müharibəsində Gürcüstanı Rusiyaya qarşı provokativ davranışda suçlayıb. Avropa İttifaqının Rusiyaya sanksiya tətbiq etməsinə qarşı açıq çıxış edib. Ukrayna məsələsində də Qərbin mövqeyinə dəstək verməyib. Tam əksinə, Ukraynanın NATO-ya daxil olmasına imkan verməyəcəyini bildirib...

Ermənistan-Azərbaycan münaqişəsində miyanə mövqedə olub. Elə bugünlərdə Bakıda rəsmi səfərdə olmuşdu.

1988-ci ildə evlənib. Bir oğlu var. Ateistdir. Ancaq "siz katoliksiz, yoxsa ateist" kimi suallara heç vaxt cavab verməyib...

2013-cü ilin avqustunda jurnalistlər onu yeni katibəsini öpərkən yaxalayıb. Həmin foto uzun müddət müzakirələrə səbəb olub. O, katibəsini şəxsi zəmində restorana aparırmış.

2020-ci ildə isə yerli mətbuat onun yeni sevgilisi haqqında geniş məlumat verib. Katarína Szalayová adlı həmin xanım 600 avro maaş alsa da 40 min avroluq maşın sürürmüş. Sonra Katarína Szalayová Robert Fitsonun partiyasında yaxşı vəzifə aldı.

Avropa Komissiyasının sədri Ursula fon der Leyen siyasətçiyə qarşı silahlı hücumu kəskin şəkildə pisləyib.

Hazırda isə o, ölümlə-həyat arasındadır. Həkimlər onu xilas edə biləcəkmi?

Rusiya hələ Ukraynaya təcavüzünün ilk günündən Kiyevi və Xarkovu ələ keçirməyi qarşıya məqsəd qoysa da, rus generallarının planı baş tutmamışdı. Lakin buna baxmayaraq, Rusiya mövcud şərtlərə uyğun davranaraq tədricən uzunmüddətli və üzücü müharibə taktikasını seçməyə məcbur oldu.

İndi görünən odur ki, Vladimir Putin müharibəni qələbə ilə başa vurmaq üçün Rusiyanın “sıxıb suyunu çıxarmağa” hazırdır və o, buna doğru gedir. Bəs “qələbə” deyəndə, ruslar nəyi nəzərdə tuturlar - Ukraynanın siyasi xəritədən tamamilə silinməsinimi? Onlar məmnuniyyətlə bunu istəyərlər, amma başa düşürlər ki, Ukraynanı bütövlükdə işğal etməyə Qərb imkan verməz. Ona görə də Moskva müharibədə elə strateji mövqe üstünlüyü qazanmaq niyyətindədir ki, hamı sülhü yalnız onun şərtləri daxilində qəbul etməyə məcbur olsun. Yəni, Rusiya düşünür ki, Dnepr çayına kimi əraziləri işğal edib, hər yanı viran qoyduqdan sonra, dayanıb, sülh təkliflərini irəli sürə bilər və əgər Ukrayna buna razılaşmasa, o zaman sadəcə, işğal etdiyi yerlərdə möhkəmlənməlidir. Kreml rəhbəri bunun həyata keçirilməsi üçün vaxt və resursa ehtiyac olduğunu dərk etməmiş deyil. Yeri gəlmişkən, ABŞ və Avropanın ikibaşlı davranışları da Vladimir Putinə geniş manevr imkanları yaradır.

Hazırda rusların Xarkov ətrafında başlatdıqları hücum əməliyyatı sözügedən strateji planın tərkib hissəsidir. Artıq xeyli müddətdir ki, hərbi ekspertlərin əksəriyyəti Rusiyanın Xarkova doğru hücuma keçəcəyi barədə xəbərdarlıq edirdilər. Bununla yanaşı, hələ də bu hücumun strateji əhəmiyyət kəsb etmədiyini söyləyənlər var və onların arqumentinə görə, Xarkovun alınması üçün Rusiyaya ən azından 300 min əsgər lazımdır. Lakin əgər Rusiya qarşısına uzunmüddətli müharibə aparmağı məqsəd qoyubsa, onda zamanla 300 min, hətta 500 min əsgər yığacaq. İndiki hücumlar da məhz həmin dönəmə hazırlıq mərhələsidir.

Rusiya Xarkov ilə sərhəd rayonuna təxminən 50 min nəfərlik hərbi birləşmə cəmləyib. Hələlik döyüşlərdə bunun yarısı iştirak edir. Təbii ki, bu qüvvə Xarkov şəhərinin alınması üçün yetərli deyil, lakin rusların bu hücumlarını ilkin sınaq və kəşfiyyat döyüşləri də hesab etmək olar. Rusiya ordusu Xarkova artilleriya atəş məsafəsinə kimi yaxınlaşmağa çalışır.

KİV-lərin məlumatına görə, hazırda Rusiyanın bütün cəbhə boyu aktiv döyüşlərdə iştirak edə biləcək 650 min əsgəri var və bunun da 150 mini ehtiyat qüvvədir. Ola bilər ki, Rusiya hərbi komandanlığı rotasiya yoluyla daha yüksək döyüş qabiliyyətinə malik 50 min əsgəri digər cəbhələrdən Xarkov istiqamətinə yollayıb.

Xarkovun əhəmiyyəti

Xarkov strateji əhəmiyyətli şəhərdir. Onu işğal etmək üçün Rusiya həqiqətən də böyük itkilər verməlidir. Kreml rəhbərliyi nə qədər itki verəcəklərini hesablayaraq Xarkova iri miqyaslı hücuma başlaya bilər. Onlar hər şeyi nəzərə almağa çalışacaqlar. Zirehli texnika, artilleriya qurğuları, Yaylım Atəş Sistemləri və əsasən də 1-1,5 tonluq ağır “KAB” aviasya bombaları ata bilən “Su-34”, ”Su-35” təyyarələrinin hansı sayda itiriləcəyi də təxmini hesablanacaq.

Rusiya ordusu üçün paytaxt Kiyev çox uzaqdır, əlçatmazdır, oranı almaq üçün bir dəfə uğursuz cəhd edilib. Kiyevə yalnız Belarusdan hücum etmək olar. Belarus ilə Ukrayna arasındakı sərhədyanı sahə isə meşəlik və bataqlıq ərazilərdən ibarətdir. Digər tərəfdən, bu, Belarusun müharibəyə qoşulması deməkdir. Ukraynanın ikinci ən böyük şəhəri Xarkova hücum coğrafı baxımdan Rusiya ordusu üçün əksər parametrlərinə görə daha əlverişlıdir. Ruslar operativ-taktiki vəziyyətdən asılı olaraq ukraynalıları yayındırmaq məqsədilə də Xarkova hücum edə bilərlər.

Avdeyevkanın işğalı zamanı Rusiya 30 min əsgər itirib, bunu Xarkovla müqayisə etsək, gərək Rusiya ordusu 200-250 min itki versin. Əlbəttə, istənilən müqayisə və anologiya qüsurludur, ancaq məgər ruslar bunu bilmirlər və ya buna getməzlər? Rusiya böyük itkilərə hazırdır, çünki orada cəmiyyət institutu yoxdur, onu ortadan qaldırıblar. Rusiyada yalnız əhali kütləsi var və onunla da hələlik mülayim rəftar edirlər və bu rəftarı müharibənin gedişində getdikcə sərtləşdirirlər.

Rusiyada böyük pulların “qırıntıları”ndan əhalinin yalnız 20-25 faizi yararlanır, yerdə qalan hissə isə çətinlik və yoxsulluq içərisində yaşayır. Bu adamları pulla şirnikləndirib müharibənin ən qaynar alovuna atmaq Rusiya hakimiyyəti üçün müşkül iş deyil. Bu, praktikada da sübuta yetirilir.

Rusiya Xarkovu ələ keçirərsə, bunu ümumi məqsədə gedən yolda strateji nailiyyət adlandırmaq olar. Ona görə ki, bu, ən azından böyük mənəvi-psixolji üstünlük deməkdir. Həm də ki, ölkənin ikinci şəhərinin yıxılması mental olaraq Ukrayna əhalisini ciddi sarsıdacaq.

Ukraynanın səhvləri

İndidən yekun nəticə çıxarmaq hələ çox tezdir, ancaq hər halda maraqlıdır, görəsən, ukraynalılar Rusiya sərhədi boyunca yerləşən ərazilərdə iki il ərzində nəyə görə möhkəmləndirlmiş istehkamlar qurmayıblar və ya bu iş hansı səbəb üzündən bu cür zəif aparılıb? Nə üçün “boz zona” deyilən sahələr minalanmayıb? 2022-ci ilin fevralın 24-də rus qoşunları Krım ilə sərhədi heç bir maneə ilə rastlaşmadan keçib Xerson şəhərinə qədər yürümüşdülər. Bundan nəticə çıxarmaq lazım deyildimi? Axı, müharibə gedir. Məsələn, Volçansk şəhəri hərbi administrasiyasının rəhbəri deyir ki, biz şəhərin müdafiəsi üçün keyfiyyətli müdafiə istehkamları tikirik. Bəs bu vaxta kimi nə işlə məşgul idiniz? Onlar bu iki il ərzində istekamlar qurmaq əvəzinə Volçanskdan Xarkova yeni asfalt yol çəkiblər.

Bunun iki səbəbi var. Birincisi, səhlənkarlıq, məsuliyyətsizlik, büdcənin talanması və səriştəsizlikdirsə, ikincisi sabotajdır.

Ümumiyyətlə, Rusiya ordusunun indiyədk həyata keçirdiyi taktiki əməliyyatlardan düzgün nəticə çıxarılmalıdır.

Birincisi, Rusiya müharibənin hələ bir neçə il davam etməsi ssenarisini hazırlayır. Ona görə də müharibədəki bütün hərbi əməliyyatlar bu paradiqmaya söykənəcək.

İkincisi, ruslar Baxmut və Avdeyevka variantlarını özləri üçün səmərəli hesab edirlər. Rusiya Ukraynanı ərazilərdən tədricən, qarış-qarış sıxışdırıb çıxarmaq taktikasından istifdadə etməyi düşünür.

Üçüncüsü, Rusiya gələcək illər üçün silah-sursat ehtiyatı toplayır və əlavə canlı qüvvə cəlb etmək planını işə salıb. Rusiya böyük sayda əsgər itkisindən çəkinməyəcək.

Ukrayna anlamalıdır ki, Rusiya uzunmüddətli müharibəyə hazırlaşır. Ona görə də rusların əsas strateji xətti Ukraynanı taqətdən salmaq, hücum üstünlüyünü əldən verməmək və qarış-qarış ərazi qamarlamaqdan ibarət olacaq. Ukrayna onu da bilməlidir ki, Vladimir Putin üçün qalib gəlmək Dneprə qədər irəliləməkdir və o, bu yolda əlavə 1 milyon və bəlkə də daha çox əsgər itirməyə hazırdır. Sadəcə, bunu tədricən, zamana yaymaqla etmək istəyir, əks halda çox pis vəziyyətə düşər.

Bundan sonra Ukrayna təlaşa qapılmadan bütün sərhəd və cəbhə xətti boyunca böyük və keyfiyyətli istehkam xətləri yaratmalı, dərin müdafiəyə hazırlaşmalıdır.

Vaqif Nəsibov

“AzPolitika.info”

Xəbər verdiyimiz kimi, Gürcüstan parlamenti "Xarici agentlər haqqında" qalmaqallı qanun layihəsini üçüncü və sonuncu oxunuşunu qəbul edib.

Qanun layihəsini qəti şəkildə rədd edən Gürcüstan xalqının etirazları 3 həftəyə yaxındır ki, davam edir.

Hazırda sözügedən qanun layihəsi prezident Salome Zurabişvilinin təsdiqini gözləyir. Zurabişvili isə açıq şəkildə qanun layihəsinə veto qoyacağını bildirib. Lakin onun qərarı hakim “Gürcü arzusu” partiyası və onun müttəfiqlərinin nəzarətində olan parlamentdə növbəti səsvermə ilə ləğv edilə bilər.

Beləliklə, 150 deputatdan 84-nün lehinə səs verdiyi qanun layihəsi qəbul edilib. Qanun layihəsinin qəbuluna az qalmış parlamentdə olan müxalif “Vahid Milli Hərəkat” və hakim “Gürcü Arzusu” partiyalarından olan deputatlar arasında qarşıdurma yaranıb.

Etirazçılar isə Tbilisi küçələrində həftələrdir davam edən aksiyalarda “Xarici agentlər haqqında” qanun layihəsinin Rusiya qanunu olduğunu bildiriblər. Onlar bununla ölkənin NATO və Avropa İttifaqına namizədliyini riskə atdığını iddia edirlər. \\BakuPost