 |
|
|
Fransa Milli Kəşfiyyat Xidmətinin keçmiş rəhbəri Bernar Skvarçini Paris məhkəməsi tərəfindən nüfuz alveri və vəzifə səlahiyyətlərindən sui-istifadə ittihamı ilə 4 il müddətinə azadlıqdan məhrum edilib.
TNS Fransa KİV-ə istinadən xəbər verir ki, Skvarçini təhlükəsizlik sektorundakı əlaqələrindən şəxsi məqsədləri, o cümlədən nəhəng LVMH şirkətinin maraqları naminə məxfi məlumatların əldə edilməsi üçün istifadə edib.
Məhkəmə keçmiş kəşfiyyat rəhbərini 200 min avro cərimə ödəməyə məcbur edib və ona 5 il müddətinə kəşfiyyat və ya məsləhətçilik fəaliyyəti ilə məşğul olmağı qadağan edib.
Fransanın ən varlı adamı olan LVMH şirkətinin rəhbəri Bernar Arno məhkəmədə ifadə verib, lakin ona qarşı ittiham irəli sürülməyib. O, şirkətinin qorunması ilə bağlı hansısa sxemdən xəbəri olmadığını bildirib.
Həmçinin, Skvarçininin hazırda tanınmış solçu siyasətçi olan keçmiş jurnalist Fransua Raffenin təqib edilməsində əli ola biləcəyi vurğulanır.
Üstü açılan həqiqət, kütləvi məzarlıqlar, böyük yalanın ifşası
Sovet siyasi rəhbərliyinin 1940-cı il martın 5-də qəbul etdiyi qərara görə, Polşanın işğalından sonra həbs düşərgələrində və həbsxanalarda saxlanılan 25700 polyakın - hərbi əsirlərin, məmurların, “əks-inqilabçıların” və başqalarının işinə NKVD üçlüyü tərəfindən xüsusi qaydada baxılmalı və hökm çıxarılmalı idi. “Katın qətliamı” adını alacaq cinayətə belə start verildi: işləri araşdırılanlardan 21857 nəfəri edam edildi.
Polşanın “Katyn Pro Memoria” saytında yerləşdirilmiş məqalənin tərcüməsini təqdim edirik.
Əvvəli: BURDA
Yalan. Və həqiqət uğrunda mübarizə
Birləşmiş Ştatlar və Böyük Britaniya hökumətləri Polşa zabitlərinə qarşı Katında törədilən cinayətdən xəbərdar idilər, amma bu işin geniş rezonans doğurmasında maraqlı deyildilər. Hitlerə qarşı müharibədə Stalinlə hərbi-siyasi ittifaq onlar üçün əsir düşən müttəfiq ordu zabitlərinin taleyindən daha önəmli idi.
Smolensk vilayəti sovet qoşunları tərəfindən azad ediləndən sonra Katın meşəsində NKQB-NKVD-nin komissiyası işə başladı. Komissiya, cinayətdə almanların məsuliyyət daşıması barədə yalançı sovet versiyasına uyğun olaraq, maddi sübutları saxtalaşdırdı və şahidlər “hazırladı”. Həmin şahidlər Nikolay Burdenkonun rəhbərlik etdiyi, Katın cinayətinin təfərrüatlarını müəyyənləşdirən və araşdıran xüsusi sovet komissiyası və əcnəbi jurnalistlər qarşısında 1944-cü ilin yanvarında ifadə verdilər.
Daha əvvəl yaradılmış anım yerində iki simvolik məzar inşa edilmişdi. Həmin məzarların qarşısında 1944-ci il yanvarın 30-da general Ziqmunt Berlinqin (SSRİ ilə əməkdaşlığa razılıq verən Starobelsk düşərgəsi əsiri) komandanlığı altındakı 1-ci polyak korpusu döyüşçülərinin iştirakı ilə matəm mərasimi keçirildi: guya faşistlər tərəfindən öldürülmüş polşalı zabitlərin xatirəsi üçün. Hərbi kapellan Vilhelm Kubş də dəfn ayini yerini yetirdi.
Katın meşəsinin ərazisi hündür taxta hasarla əhatələnmişdi, cinayət yerində isə rus və polyak dillərində “Burada alman-faşist işğalçıları tərəfindən 1941-ci ilin payızında vəhşicəsinə öldürülmüş əsir Polşa zabitləri dəfn olunub” yazılmış xırda obelisk qurulmuşdu. 1970-ci illərdə obeliskdəki yazı dəyişdirildi və “1941-ci ildə hitlerçilər tərəfindən güllələnən faşizm qurbanlarına - Polşa zabitlərinə” yazıldı.
Sovet İttifaqı başlıca alman hərbi cinayətkarlar üzərində Nürnberq məhkəməsinin ittiham aktına polyak zabitlərin Katında güllələnməsi ittihamının da əlavə olunmasında israr edirdi. Amma şahidlərin qeyri-inandırıcı ifadələri, sovet ittihamındakı çoxsaylı səhvlər və qeyri-dəqiqliklər üzündən Katın cinayətində almanların günahlandırılması Nürnberq beynəlxalq hərbi tribunalının hökmündə yer almadı.
Cinayət mövzusuna soyuq müharibə dövründə yenidən qayıdıldı. 1951-ci ildə ABŞ Konqresinin nümayəndələr palatası Katın işinin araşdırılması üçün Rey Con Meddenin rəhbərliyi altında komissiya (Medden komissiyası) yaratdı. 1952-ci ildə yayılan yekun sənəddə komissiya SSRİ-ni günahkar bildi.
1970-ci illərdə SSRİ-də almanların 1943-cü ildə Belarusiyanın Xatın kəndində yerli əhaliyə qarşı törətdikləri cinayətlər haqda məqalələr peyda oldu. Çoxlu sayda oxşar faciəvi hadisələr arasında məhz Xatının seçilməsini ad oxşarlığı ilə izah etmək lazımdır. Yandırılmış kəndin yerində xatirə kompleksi yaradıldı, SSRİ-yə gələn xarici nümayəndələr və dövlət başçıları, ABŞ prezidenti Riçard Nikson da daxil, buraya əklil qoyurdular. Belə manipulyasiya Katın xatirəsini yaddaşlardan silməli və cinayəti faşistlərə bağlamalı idi.
Katın cinayəti qurbanlarının xatirəsi siyasi mühacirət və sürgündəki Polşa hakimiyyəti tərəfindən yaşadılırdı. ABŞ-dakı polyak diasporunun səyi nəticəsində Detroytda müqəddəs Adalbert kilsəsində Katın cinayətinə dünyada ilk abidə qoyuldu. Sonralar belə abidələr və xatirə lövhələri Londonda, Parisdə, Torontoda, Romada, Melburnda və Yohannesburqda qoyuldu.
Öldürülən hərbi əsirlərin taleyi və həqiqətin bərpasının zərurəti barədə Qərbdə əsərlər yazılırdı. Kozelskdəki hərbi əsirlərin həyatı haqda mühüm məlumat mənbəyi almanların Katın meşəsində ekshumasiya zamanı tapdıqları gündəliklər və yazılar idi. Bütün yazılar 1940-cı ilin aprel və may hüdudunda kəsilirdi, bu da cinayəti sovet tərəfinin törətməsinin sübutlarından biridir. Kozelsk düşərgəsinin sağ qalan əsirlərinin, məsələn, Katın cinayəti haqda həqiqətin bərpası üçün çox işlər görmüş Stanislav Svyaneviçin və katolik prelat Zdzislav Peşkovskinin xatirələri heç də daha az qiymətli deyillər.
Cinayətin almanlar tərəfindən törədilməsi yalanı uzun illər sovet hakimiyyətinin və onların nəzarətindəki Polşa Xalq Respublikası (PXR) hökumətinin rəsmi doktrinası oldu. Katın qurbanlarının ailələrinə verilən arayışlarda saxta tarixlər göstərilirdi, məsələn, İkinci dünya müharibəsinin bitdiyi gün. Hakimiyyət həqiqət uğrunda mübarizə aparanları hüquqi təqib edirdi. Onların arasında bir neçə il həbsə məhkum edilən keşiş Tadeuş Rusek və Kozelsk məhbusu Leon Muselyak vardı.
Amma “rəsmi”dən əlavə, “qeyri-rəsmi” xatirə də vardı. Katın cinayəti qurbanlarının xatirə lövhələri katolik kilsələrində quraşdırılır, öldürülənlərin adları ailəvi başdaşlarında yazılırdı.
Katın qurbanları xatirəsini PXR-dakı demokratik müxalifətin nümayəndələri də qoruyurdular. Təhlükəsizlik orqanlarının təqibinə və repressiyalarına baxmayaraq, kitablar, təqvimlər, vərəqələr, broşürlər, plakatlar, markalar, açıqcalar qeyri-leqal çap olunur və yayılırdı. 1978-ci ildə bir qrup müstəqil tədqiqatçı Krakovda gizli Katın institutunu yaratdı. Onlar qeyri-leqal “Katın bülleteni” və mövzuya dair əsərlər nəşr edirdilər.
1980-ci il martın 21-də Krakovun bazar meydanında faciəvi hadisə baş verdi: keçmiş “Armia Krajowa” əsgəri, təqaüdçü Valenti Badılyak kommunist hakimiyyətinin Katın qətliamı haqda informasiyanı gizlətməsinə etiraz olaraq özünü yandırdı.
Keşiş Stefan Nedzelyakın, Katın işi üzrə görkəmli mütəxəssis Yeji Loyek və başqalarının təşəbbüsü ilə 1981-ci il iyulun 31-də Varşavadakı Povonzki hərbi məzarlığında “Katın xaçı” quraşdırıldı və üzərində gerçək tarix yazıldı: 1940. Dəfələrlə götürülən və yenidən quraşdırılan xaç həqiqət uğrunda mübarizənin simvoluna çevrildi. Stefan Nedzelyak 1989-cu il yanvarın 20-ə keçən gecə öldürüldü. Onun qatilləri hələ də tapılmayıb.
1989-cu ilin oktyabrında Katın işinin görkəmli tədqiqatçılarının bir qrupu Polşada Katın cinayətinin istintaqı üzrə tarixi komitə yaratdılar. Komitə Polşa Katın fondu ilə birlikdə dövrü “Katın dəftərləri” nəşrini buraxır. Nəşrdə sözügedən cinayətdən bəhs edən elmi məqalələr və orijinal materiallar yer alır.
Həqiqətin açılması
Siyasi dəyişikliklər və Sovet İttifaqının dağılması Katın cinayəti haqqında həqiqətin açılmasına yardım etdi. 1990-cı il aprelin 13-də Moskvada baş tutan görüşdə SSRİ prezidenti Mixail Qorbaçov cinayət haqqında seçilmiş sənədləri Polşa prezidenti Voytsex Yaruzelskiyə təqdim etdi.
Həmin gün TASS agentliyi “Katın meşəsindəki cinayətə görə Beriya, Merkulov və əlaltılarının bilavasitə məsuliyyət daşıdığını” bildirdi və “stalinizmin ən ağır cinayətlərindən biri olan Katın faciəsinə görə sovet tərəfinin dərin təəssüf”ünü ifadə etdi. SSRİ Baş hərbi prokurorluğunun başladığı istintaq nəticəsində Starobelsk düşərgəsi əsirlərinin Xarkovda və Ostaşkov düşərgəsi əsirlərinin Mednoyedə basdırıldıqları yerlər aşkar edildi. 1991-ci ildə istintaq hərəkətləri çərçivəsində polyak ekspertlərin də iştirakı ilə aparılan ekshumasiya işləri zamanı 1940-cı ildə NKVD-nin öldürdüyü polşalı zabitlərin və polislərin qalıqları tapıldı.
Polşa tərəfi Katına aid bütün sənədlərdən məxfiliyin götürülməsini və onların ictimailəşməsini istəməkdə davam edirdi. 1992-ci il oktyabrın 14-də prezident Boris Yeltsinin xüsusi nümayəndəsi, RF-nın Dövlət arxiv xidmətinin rəisi professor Rudolf Pixoya Varşavada prezident Lex Valensaya Xüsusi qovluğun 1 saylı qapalı paketinin kserosurətlərini təqdim etdi. Həmin sənədlərdə Katın cinayətinə formal təkan verən Beriya müraciəti, Siyasi Büronun 5 mart 1940-cı il qərarı və bu cinayətkar qərarın yerinə yetirilməsinə aid bir sıra seçilmiş sənədlər vardı.
1993-cü ildə Polşaya səfər edən Boris Yeltsin Povonzki hərbi məzarlığında “Katın xaçı” abidəsinə gül qoydu. 1994-cü il mayın 5-də Ukrayna Təhlükəsizlik xidmətinin rəis müavini Andrey Xomiç Katın cinayəti çərçivəsində Ukrayna ərazisində öldürülənlərin siyahısını Polşa tərəfinə təqdim etdi.
Polyak hərbi məzarlıqlarının yaradılması haqda qərar əsasında Varşavanın Moskva və Kiyevlə imzaladığı razılaşma polşalılara Katın və Mednoyedə (1994-1995), eləcə də Xarkovda (1994-1996) miqyaslı ekshumasiya işləri aparmağa imkan verdi. Katındakı qrupa arxeoloq prof. Maryan Qlosek, Mednoyedə antropoloq prof. Bronislav Mlodzeyovski, Xarkovda arxeoloq prof. Ancey Kolya rəhbərlik edirdi.
Katın meşəsində bütün ölüm çalaları açıldı (almanlar hamısını açmağa macal tapmamışdılar - Press klub). Görülən işlər sayəsində dəqiqliklə müəyyən olundu ki, Katın memorialının ərazisində 1940-cı ilin yazında NKVD tərəfindən öldürülən polyak zabitlərin cəsədləri yatır. Məzarlardan çıxarılan və polyak hərbi əsirlərə aid əşyaların bir hissəsini Varşavadakı Katın muzeyində görmək olar.
Katın cinayəti haqqında həqiqət ictimailəşəndən, demək olar, dərhal sonra Polşa qurbanların anım konsepsiyasını hazırlamağa başladı. Ölənlərin qohumlarının iradəsini rəhbər tutan Varşava cinayət yerində hərbi məzarlıqların yaranması və qurbanların lazımi qaydada yenidən dəfni üçün bütün səyləri göstərdi.
Katın, Mednoye və Xarkovda fərdi məzarlıqlar düzəltmək imkanı olmayan Polşa hakimiyyəti kütləvi məzarlardan ibarət hərbi məzarlıqların inşasına qərar verdi. Yalnız Katındakı iki generalın - Meçislav Smoravinskinin və Bronislav Boqatereviçin məzarları istisnadır.
2000-ci ildə, cinayətdən 60 il sonra Katın faciəsi ilə birləşmiş üç yerdə - Katında, Xarkovda və Mednoyedə üç hərbi məzarlıq açıldı və təqdis olundu.
Dördüncü polyak hərbi məzarlığı 2012-ci il sentyabrın 21-də Kiyev vilayəti sərhədləri içindəki Bıkovnya qəsəbəsi yaxınlığında açıldı. Aparılan arxeoloji və ekshumasiya işləri nəticəsində müəyyən olundu ki, həbsxanalarda öldürülən və “Ukrayna siyahısı”na daxil olan Katın qurbanlarının bir hissəsi məhz burada dəfn olunub.
Polşa hakimiyyətinin cəhdlərinə baxmayaraq, “Belarus siyahısı”nda olan, “Katın qərarı”na əsasən, böyük ehtimalla, Minskdə güllələnən və Kuropatıda basdırılan qurbanların xatirəsinə ehtiram göstərmək hələ də mümkün olmayıb...
Hazırladı: Yadigar Sadıqlı
Mənbə:
Knessetin üzvü Simon Moşiaşvili çıxışında deyib:
“Azərbaycan İslam dünyasında İsrail dövlətini və yəhudi xalqının müstəqillik hüququnu tanıyan ilk ölkədir.
Oktyabrın 7-də biz Azərbaycan vətəndaşlarının İsrailin Bakıdakı səfirliyinə gələrək xatirə şamları yandıraraq İsraili necə dəstəklədiklərini gördük.
Biz xalqlar arasında ittifaqı gücləndirəcəyik və İranın ittifaqa zərər vurmasına imkan verməyəcəyik. İran hesab edir ki, ABŞ və İsrail düşməndir və Azərbaycan onlara kömək edir. İran Azərbaycana hücum etmək istəsə, biz onu müdafiə edəcəyik”.
https://t.me/tebriz_turan/70764
Bu barədə ABŞ Ədliyyə Nazirliyinin saytında deyilir. Bildirilir ki, İŞİD-Xorasan terror təşkilatının üzvü, “Cəfər” kimi tanınan Məhəmməd Şərifullah həbs edilib.
Martın 2-də o, bir sıra terror aktları - 2021-ci ildə Əfqanıstanın Kabil hava limanında baş verən partlayış və ötən il Moskva vilayətində "Crocus City Hall"a silahlı hücum - hazırlamaqda ittiham olunub.
Şərifullah dindirmə zamanı etiraf edib ki, o, İŞİD-Xorasan adından "Crocus"da terror aktı hazırlayan silahlılara təlim keçib. O, Rusiyada həbs edilən terror aktını törədənlərdən ikisini tanıdığını, onlara pulemyot və digər silahlardan necə istifadə edilməsi barədə göstərişlər verdiyini deyib.
ABŞ prezidenti Donald Tramp Cənubi Afrika Respublikasına (CAR) ayrılan maliyyə yardımını dayandırmaq qərarına gəlib.
O, bu barədə "Truth Social" platformasında yazıb.
Trampın sözlərinə görə, bu addımın atılmasının əsas səbəbi təhlükəsizlik məsələləri olub. O, ölkəni tərk etmək istəyən CAR fermerlərinə ABŞ-yə köçmək imkanı yaradılacağını bildirib.
Tramp qeyd edib ki, fermerlər ailələri ilə birlikdə ABŞ-yə dəvət olunacaq və onlara sürətləndirilmiş vətəndaşlıq prosesi tətbiq ediləcək. Proqramın dərhal qüvvəyə minəcəyi və müraciətlərin tez bir zamanda qəbul ediləcəyi bildirilib.
Bu qərarın CAR-da torpaq islahatları və təhlükəsizlik problemləri ilə bağlı olduğu ehtimal edilir.
Rusiya Təhlükəsizlik Şurasının sədr müavini Dmitri Medvedev sosial şəbəkədə Fransa prezidenti Emmanuel Makronu tənqid edib.
TEREF xəbər verir ki, Makronun Rusiyanı Avropa üçün təhdid kimi təsvir etməsinə gəlincə , Medvedev, “O, ən geci 14 may 2027-ci ildə əbədi olaraq yoxa çıxacaq və əldən verilməyəcək” dedi.
Makronun adını “Mikron” olaraq yazan Medvedev “Mikronun özü təhlükə yaratmır” deyib.
Fransa lideri dünən xalqa müraciətində bildirib ki, Rusiya 2030-cu ilə qədər ordusunu 3000 tank və 300 döyüş təyyarəsi ilə daha da genişləndirməyi, 40 milyard avrodan çox xərcləməyi planlaşdırır.
Makron bəyan edib ki, Moskva Avropanın təhlükəsizliyinə təhdid olaraq qalır.
Gununsesi.info
“İran hakimiyyətində ardıcıl yaşanan istefalar sistem daxilində bir neçə il əvvəl başlanmış böhranın dərinləşdiyini göstərir”.
Bu sözləri Güney Azərbaycan üzrə araşdırmaçı jurnalist Elman Cəfərli “Cebheinfo.az”-a açıqlamasında deyib.
O bildirib ki, İran beynəlxalq təcrid vəziyyətindən çıxa bilməsə, Məsud Pezeşkianın aqibəti yaxşı olmayacaq:
“Əslində azərbaycanlı Məsud Pezeşkianın prezidentliyə yolunun açılması ilə molla rejimi bir neçə hədəfə çatmaq istəyirdi. Əvvəla, Pezeşkian islahatçı qanada mənsubdur. Onun komandasının “boz kardinalı” isə ABŞ ilə münasibətləri qaydaya salmağa nail olmuş Həsən Ruhani hökumətinin xarici işlər naziri olmuş Məhəmməd Cavad Zərifdir.
Bu komandanın ABŞ ilə münasibətləri qaydaya salacağına ümidlər vardı. Lakin ABŞ-də ötən prezidentliyi dönəmində İrana qarşı sərt tutm sərgiləmiş Donald Tramp yenidən hakimiyyətə gəldi”.
Həmsöhbətimiz diqqətə çatdırıb ki, türk dilində danışan azərbaycanlı Prezident Azərbaycan və Türkiyə ilə münasibətləri qaydasına qoymalı idi:
“Pezeşkianın prezident seçilməsindən 7 ay keçib, hələ də qoyulan hədəflərə nail olunmayıb. Yalnız türk dövlətlərinə münasibətdə yumşalma hiss olunur. Amma hələ də türk dilində və digər qeyri-fars dillərində məktəblər açılmayıb.
Arada türk dilində şeirlər söyləsə də, Pezeşkianın bu problemin həlli istiqamətində ciddi addımlar atacağı real deyil. Azərbaycan türklərinin başını dil məsələsi ilə aldadıb səs toplayıb, reytinq də yığıb, amma İran təkcə türklərdən ibarət deyil. Ölkədə iqtisadi böhran dərinləşir. Əhalinin alıcılıq qabiliyyəti aşağı düşüb, yoxsulluq artıb. Kasıb əhalinin başını milli şüarlarla qatmaq olar, amma bu, limit bir gün bitəcək”.
Ekspert hesab edir ki, ABŞ-nin təzyiqləri güclənərsə, İranda siyasi böhran qaçılmaz olacaq:
“Donald Tramp İrana və onun Yaxın Şərqdəki proksi qüvvələrinə qarşı hər zaman sərt olub. Onun İrana qarşı iqtisadi sanksiyaları daha gücləndirəcəyi ehtimal edilir.
Bu halda İranın adekvat davranmaqdan başqa yolu qalmayacaq. Sülhpərvər və humanist prezident imicli Pezeşkianın iqtidarda möhkəmlənməsi də real görünmür. Mühafizəkarlar onu hakimiyyətdən kənarlaşdırmağa və ABŞ-yə qarşı daha sərt bir şəxsi gətirməyə çalışacaqlar”.
Onun sözlərinə görə, Pezeşkian yalnız bir halda uğursuzluqdan yaxa qurtara bilər:
“O, seçkidən öncə söylədiyi islahatları davam etdirsə, qeyri-fars millətlərinin ana dili hüququnu bərpa etsə, “vilayəti-fəqih” sistemini sıradan çıxarmağa nail olsa, özünü də, İran xalqını da xilas etmiş olacaq. İranın etnik yapısı ilə bağlı ən ədalətli status-kvo 3 dilin: fars, türk və ərəb dillərinin rəsmi dil elan olunmasıdır.
Hazırda SEPAH daxilində də narazı generallar var. Onlar da bu sistemin ömrünü bitirdiyini görürlər. Pezeşkian onların dəstəyini alaraq hazırkı rəhbər sistemini aradan qaldırmalıdır. Yəni xomeynizmin ömrü bitmək üzrədir. Qanlı inqilablardan yan keçmək üçün yuxarıdan dinc islahatlar vacibdir”.
Ağ Evdə ABŞ Prezidenti Donald Tramp və vitse-prezident Ceyms Devid Vens ilə Ukrayna Prezidenti Volodimir Zelenski arasında baş vermiş məlum qalmaqala aid yeni epizodlar üzə çıxır. Əslində diplomatiya tarixində bu səviyyədə rüsvayçı görüş olmamışdı. ABŞ-dən dəstək alan, bölgədə onun siyasətini həyata keçirən Ukrayna liderinin Oval sarayda belə bir vəziyyətə düşməsi təəcüblü idi.
Bu sözləri Teleqraf-a “Bakı” politoloqlar klubunun rəhbəri, siyasi ekspert Zaur Məmmədov Oval saraydakı məlum qalmaqalı şərh edərkən deyib.
“Bu Tramp və Vens tərəfindən Zelenskiyə qarşı olan hiddət və qəzəbin nəticəsi idi. Vens Ukrayna prezidenti və Avropa liderlərinə qarşı qəzəblidir. O hətta senatda Rusiya əleyhinə olan qərarlara qarşı çıxırdı. İndi isə özünü sanki Rusiya prezidenti Vladimir Putin kimi aparır. Belə davranışlar ABŞ-in mövqeyinə zərbədir. Zelenskiyə, Ukraynaya münasibətdən asılı olmayaraq Amerikanın növbəti dəfə partnyorunu meydanda tək qoyması yaxşı əlamət deyil”, - o qeyd edib.
Politoloq Zelenskinin Ağ Evdə bir neçə dəfə təhlükəsizlik zəmanəti kimi ifadələrdən istifadə etməsinə diqqət çəkib: “ABŞ ilə Ukrayna arasında razılaşma imzalansa, bu, birbaşa təhlükəsizlik zəmanəti olardı. Amerika Ukraynada mineral yataqlarda həyata keçirəcəyi işlər fonunda ərazidə sabitliyin olmasına çalışacaqdı. Ola bilsin ki, Zelenski Oval sarayda ABŞ-lə həmin sazişi imzalamaqda maraqlı olmayıb”.
“Ukrayna ciddi böhranla üz-üzədir. Avropa ölkələri, Britaniya Kiyevə hərbi kontingent göndərməyəcəksə və ABŞ ilə həmrəylik olmayacaqsa, ölkənin vəziyyəti çətinləşəcək. Hətta qərb rayonlarına da təhlükə yarana bilər. Sözsüz ki, Trampla Zelenski arasında olanlar Amerika ətrafında dövlətlərin sayının azalması, Avropanın Rusiya ilə yaxınlaşmasına səbəb olacaq. MDB məkanında olan dövlətlərin Rusiya ilə bağlı yeni qərarlar qəbul etməsi ilə nəticələnəcək”, - Zaur Məmmədov bildirib.
Qeyd edək ki, fevralın 28-də Ağ Evdə ABŞ Prezidenti Donald Tramp və vitse-prezident Ceyms Devid Vens ilə Ukrayna dövlət başçısı Volodimir Zelenski arasında diplomatik qalmaqala səbəb olan mübahisə baş verib. Nəticədə, Zelenski ABŞ səfərini yarımçıq qoyaraq Londona gedib.
Erməni bloger İşxan Verdyan Azərbaycan Prezidenti İlham Əliyevə müraciət edərək, siyasi sığınacaq istəyib.
Axar.az xəbər verir ki, o, bu barədə Teleqram kanalında məlumat yayıb.
“Hörmətli cənab Prezident, nəzərinizə çatdırım ki, Qarabağı Azərbaycan ərazisi olaraq açıq şəkildə tanıdığım üçün Ermənistanda mənə qarşı cinayət işi açılıb. İrəvan Azərbaycan və Ermənistanın suverenliyinin qarşılıqlı tanınması lehinə çıxış etdiyimə, həmçinin “artsax” kvazi-dövlət qurumu və onunla bağlı hər şey haqqında tənqidi bəyanatlarıma görə mənə ömürlük həbs cəzası vermək istəyir. Onu da nəzərinizə çatdırım ki, Ermənistana qayıtmağım istər-istəməz həbsimə gətirib çıxaracaq və barəmdə elan olunmuş beynəlxalq axtarış Ermənistanda həbsxanadan başqa istənilən yerdə mənə qapıları bağlayır.
Hörmətli cənab Prezident, mövcud reallıqları nəzərə alaraq və qaçılmaz repressiyalarla bağlı səbəblərə görə vətəndaşlığım olduğu ölkəmə qayıtmağımın mümkünsüzlüyünü nəzərə alaraq, Azərbaycanda siyasi sığınacaq vermənizi xahiş edirəm. Hörmətlə, İşxan Verdyan”, - o qeyd edib.
PKK terror təşkilatının bu ilin aprel ayında özünü buraxmaq üçün qurultay keçirəcəyi gözlənilir.
Məlumatı “Haber Global” yayıb.
Bildirilib ki, ötən həftə qruplaşmanın başçısı Abdulla Öcalan təşkilata özünü buraxıb tərksilah olunmaqla bağlı müraciət etmişdi. Məlumata görə, Öcalanın da qurultayda iştirak edəcəyi ehtimal olunur.