 |
|
|
Rusiyanın Təhlükəsizlik Şurasının sədr müavini Dmitri Medvedev Qərbə qarşı nüvə ritorikasını, belə demək mümkündürsə, ikiqat artırıb.
Medvedev NATO-nun Ukraynaya qoşun göndərəcəyi təqdirdə, Rusiyanın ABŞ, Böyük Britaniya və Fransaya nüvə zərbəsi endirəcəyini bəyan edib.
Medvedevin bəyanatı Rusiyanın qeyri-strateji nüvə silahları (taktiki) üzrə təlimlərinin keçirilməsinin perspektiv hərbi hədəfini izah edir.
Lakin Medvedevin istinad etdiyi tip strateji nüvə silahlarının deyil, taktiki nüvə silahlarının tətbiqini nəzərdə tutur. Yəni Medvedev bildirir ki, Rusiya taktiki nüvə silahları ilə belə Vaşinqtonu, Parisi və Londonu vura bilər.
Bu, Moskvanın hələ strateji nüvə silahlarından istifadə edəcəyi təqdirdə yarana biləcək bəşəri fəlakətə inandırma əməliyyatının tərkib hissəsidir.
Lakin Rusiyada da bilirlər ki, Moskvada nüvə düyməsinə basılsa, NATO-nun, o cümlədən ABŞ, Britaniya və Fransanın bunun qisasını almaq üçün cavabı daha ağır ola bilər.
Bu baxımdan hazırda Moskvanın şiddətlənən nüvə təhdidləri daha çox:
- Ukraynanı dəstəkləyən ölkələrə qarşı Kremlin duruş gətirməsi üçün seçdiyi leksikondur,
- Moskvanın müəyyən “qırmızı xət”ləri keçildiyi təqdirdə, qeyri-strateji nüvə silahlarından istifadəyə qərar verəcəyinə Qərbi inandırmaqdır.
Cənab Medvedevin qorxu yaratmaq aktı həm də o zamana təsadüf edir ki, ABŞ Ukraynaya 61 milyard dollarlıq yardım paketini təsdiqləyib.
Üstəlik, Qərbdə Ukraynaya “F-16” qırıcılarının göndərilməsini öhdəliyinə götürən dövlətlərə qarşı xəbərdarlıqdır.
Deməli, Kreml Medvedevin dili ilə çatdırır ki:
- Əsasən ABŞ, Böyük Britaniya və Fransanı Ukraynaya hər hansı sensasiyalı dəstək aktından geri çəkilməyə məcbur etmək niyyətindədir,
- Rusiyanın taktiki nüvə silahları üzrə təlimləri Qərbdə Ukraynaya dəstək üçün qərar verənlərə qarşı çəkindirmədir.
Amma məntiqlə indiki vəziyyətdə Rusiyanın nüvə silahını müharibə meydanında və ya ondan kənarda tətbiq etmək ehtimalı olduqca zəif versiya kimi səslənir.
Həm də ona görə ki, Rusiya Ukrayna geniş nəzarət zolağı yarada bilib və onun yeni irəliləyişləri qeydə alınır. Bu vəziyyətdə nüvə silahlarının atılması bir o qədər real səslənmir.
Aqşin Kərimov
Ukrayna Silahlı Qüvvələrinin Baş komandanı, general Aleksandr Sırski ölkənin şərq cəbhəsində yaranmış ağır vəziyyətlə əlaqədar son iki günü ən qaynar bölgələrdə, Ukrayna hərbçiləri arasında keçirib.
“AzPolitika” xəbər verir ki, Sırski bu barədə özünün sosial şəbəkə səhifəsində məlumat verib.
General qeyd edib ki, Rusiya işğalçı qoşunalrı hazırda əsas hücum qüvvələrini Pokrovsk və Kuraxovo istiqamətlərində cəmləyiblər: "Şərqdəki ağır vəziyyətlə əlaqədar iki gün Pokrovsk və Kuraxovo istiqamətlərində, yəni düşmənin əsas hücumu istiqamətində müdafiə əməliyyatları aparan bölmələrdə işlədim".
Onun sözlərinə görə, Ukrayna qoşunlarının müdafiəsini yarmağa və öz uğurlarını möhkəmləndirərək, Kuraxovo və Pokrovsk iri yaşayış məntəqələrinə çatmağa çalışan düşmənin əsas zərbə qüvvələri məhz bu istiqamətlərdə cəmləşib: “Şəxsi heyət, silah və hərbi texnika baxımından sayca üstünlüyə malik olan düşmən hər gün qoşunlarımızın mövqelərinə hücum edir. Bu şəraitdə bizim vəzifəmiz işğal olunmuş xətlərə və mövqelərə artilleriya atəşi, PUA-larla və bütün digər silahlarla zərbələr endirməkdən ibarətdir. Məqsəd düşmənə maksimum itki vermək, onu tükəndirmək, bununla da düşmənin planlarını pozmaq və ehtiyatlarımızın formalaşması, hazırlanması üçün vaxt qazanmaqdır. Komandirin onun tabeliyində olanların arasında olması yüksək mənəvi-psixoloji vəziyyətin, sabitliyin, onların taleyin ümidinə buraxılmadıqlarına inamının qorunmasında həlledici rol oynayır”.
Mayın 5-də Pasxa bayramında Rusiya ordusu Xarkovun mərkəzini atəşə tutub, yaralılar var.
Axar.az xəbər verir ki, bu barədə Xarkov vilayət administrasiyasının rəhbəri Oleq Sinequbov bildirib.
Xarkov şəhər meri İqor Terexov Teleqram səhifəsində yazıb ki, partlayış yaşayış massivində baş verib.
“İlkin olaraq beş yaralı ilə bağlı məlumat var. Yaralıların sayı artmaqdadır”, - Terexov vurğulayıb.
Xarkovun mərkəzinin atəşə tutulmasından əlavə, fərdi yaşayış evi də vurulub.
Daha iki nəfər xəsarət alıb.
NATO-Rusiya gərginliyi durmadan artır, Qərbdə zaman qazanılması üçün Ukrayna savaşının uzadılmasına qərar verilib... Rusiyanı hərbi mühasirəyə alan NATO sərhəd bölgəsinə nüvə silahı yerləşdirilmək niyyətindədir, amerikalı general isə savaşın qaçılmaz olduğuna eyham vurur...
Dünyanın gələcək taleyi qeyri-müəyyən xarakter daşıyır. Hazırda Ukrayna savaşı bütün dünyanı öz təsiri altına almış durumdadır. Bu savaşın nə vaxt sona çatacağı isə ciddi müzakirə və mübahisə mövzusudur. Çünki əksər Qərb ekspertləri bu ilin payızında Rusiya və Ukraynanın sülh masası arxasına keçə biləcəyini proqnozlaşdırsa da, bu ehtimal artıq öz aktuallığını itirməyə başlayıb. Və Ukrayna savaşının uzanacağı indi daha inandırıcı görünür.
Məsələ ondadır ki, ABŞ Konqresində Ukraynaya 61 milyard dollarlıq yeni dəstək paketi artıq təsdiqlənib. Bu, o deməkdir ki, Ukrayna savaşının ssenari müəllifləri müharibənin uzadılması barədə yekun qərar veriblər. Halbuki, bu hərbi dəstək paketinin təsdiqlənməsindən qısa müddət öncə silah-sursatı tükənmək üzrə olan Ukraynanın bu ilin avqust ayında tam məğlubiyyətə uğrayacağı iddia olunurdu. Üstəlik, bu iddialara yalnız Qərb mütəxəssisləri deyil, elə Ukrayna hərbi ekspertləri də müəlliflik edirdilər.
Ancaq ABŞ siyasi dairələri artıq tamamilə fərqli ssenariləri gündəmə gətirməyə başlayıblar. Onların fikrincə, Ukrayna savaşı hələ bir neçə il də davam edəcək. Yəni, Ukrayna hələ bir neçə il canlı itkilər verməkdə davam edəcək. Ukrayna dövlətçiliyi mövcudluğunu itirmək təhlükəsi ilə üzləşəcək. Halbuki, Qərbdə bundan qətiyyən narahat deyillər. Əsas məsələ odur ki, Qərb öz maraqları çərçivəsində Rusiyanın "savaş bataqlığı"nda tutularaq, daha da zəifləməsi planları işlək qalsın.
Digər tərəfdən, ABŞ və Qərb Ukrayna savaşı sayəsində daha önəmli mənfəətlərinə də yaxınlaşmış kimi görünür. Belə ki, dünya iqtisadiyyatı böyük sürətlə hərbiləşdirilməkdə davam edir. İndi dünya iqtisadiyyatının önəmli bir hissəsi Ukrayna savaşının davam etdirilməsinə yönəldilib. Belə ki, NATO ölkələri öz anbarlarında illərlə yığılmış köhnə hərbi texnikanı Ukrayna ordusuna göndərib. Və indi həm həmin anbarların yenidən müasir silahlarla doldurulması, həm də Ukrayna ordusu üçün hərbi texnika istehsal etmək ehtiyacı yaranıb.
Təbii ki, bu, dünyanın nəhəng silah şirkətlərinin maraqlarına tamamilə cavab verir. Çünki ABŞ və Qərb ölkələrinin Ukraynaya dəstək üçün ayırdığı onmilyardlarla dollarlıq maliyyə vəsaiti məhz onların hesablarına yatırılmış olacaq. Nəhəng silah şirkətləri yeni hərbi texnika sifarişləri ilə daha da gəlirlırini fantastik həddə çatdıraraq, varlanmaq şansı qazanıblar. Və bu baxımdan, Ukrayna savaşının arxasında həm də dünyanın ən nəhəng silah şirkətlərinin dayanmış ola biləcəyi qətiyyən istisna deyil.
"The New York Times"ın hesablamalarına görə,2023-cü ildə dünya ölkələri hərbi sahəyə son 35 ildə olduğundan daha çox maliyyə vəsaiti xərcləyiblər. Ötən il qlobal hərbi xərclər 2,4 trilyon dollar həcmində olub. Bu, ilk növbədə Ukrayna savaşının silah-sursata olan ehtiyacları maksimum səviyyədə artırmasından qaynaqlanır. Eyni zamanda, Asiya qitəsində və Yaxın Şərq regionunda hərbi-siyasi gərginliyin artması da bu xərcləri yüksəldir. Yalnız ABŞ hərbi ehtiyaclara ötən il 920 milyard dollar xərcləyib. Və bu fantastik maliyyə vəsaitləri isə ilk növbədə nəhəng silah şirkətlərinin büdcələrini doldurur.
Ancaq Qərbdə, xüsusilə də, NATO-da bu quruma üzv dövlətlərin hərbi xərclərinin indiki səviyyəsindən qətiyyən məmnun deyillər. NATO rəhbərliyi quruma üzv dövlətləri öz hərbi xərclərini tərəddüdsüz artırmağa çalışır. Bu çağırışların arqumentləşdirilməsi üçün isə yaxın gələcəkdə Rusiyanın Avropaya hücum planlarının olması ilə bağlı iddialar ön plana çəkilir.
NATO baş katibi Yens Stoltenberq bildirib ki, gələcək təhlükələri nəzərə alaraq, üzv ölkələr həm hərbi xərclərini artırmalıdırlar, həm də Ukraynaya dəstəyi davam etdirməlidirlər. Onun fikrincə, NATO ölkələri Ukraynaya bütün vəd olunan dəstəyi verməyib. Və ona görə də, Qərb ölkələri mütləq Ukraynaya dəstək məqsədilə 100 milyard dollarlıq dəstək fondu yaratmalıdırlar.
Bəzi məlumatlara görə, indi Ukrayna savaşı NATO üçün "zamanı dayandırma aləti" rolunu oynayır. Belə ki, NATO-nun Rusiyanın sərhədləri ətrafında güclü hərbi çənbərin yaradılması üçün hələ bir müddət zaman qazanmağa ehtiyacı var. Bu hərbi-siyasi alyansda hesab edirlər ki, indi NATO-ya lazım olan zamanı yalnız Ukrayna savaşının uzanması qazandıra bilər. Halbuki, son məlumatlara görə, hazırda Rusiyanın sərhədlərində NATO-nun 35 minlik canlı qüvvəsi, 300 tankı və 800 zirehli döyüş texnikası artıq mövcuddur. Və NATO-nun Rusiya ilə gələcək savaş ssenarisi üzrə keçirilən hərbi təlimlərə 90 min nəfərlik canlı qüvvə cəlb olunub.
Maraqlıdır ki, ABŞ-ın Avropadakı quru qoşunları komandanı Derril Uilyams NATO-nun bu nəhəng hərbi təlimlərinin məhz Rusiyaya qarşı yönəldiyini açıq mətnlə etiraf edib. Rusiya siyasi dairələri isə bu hərbi təlimlərin provokasiya xarakteri daşıdığını vurğulayıb. Kremldə hesab edirlər ki, belə irimiqyaslı hərbi təlimlər üzərindən Rusiyaya qarşı güc nümayiş etdirməklə, təzyiq göstərmək niyyəti güdülür. Və bu baxımdan, Rusiyaya qarşı hibrid savaşın başlanıldığı qətiyyən şübhə doğurmur.
Digər tərəfdən, NATO Rusiyanın sərhədləri boyunca nüvə silahı yerləşdirmək planını da reallaşdırmağa başlayıb. Böyük ehtimalla öz ərazisində NATO-nun nüvə başlıqlı raketlərinin yerləşdirilməsinə icazə verəcək ölkə Polşa olacaq. Hər halda, rəsmi Varşava NATO-nun belə bir niyyəti olarsa, Polşa ərazisində nüvə silahının yerləşdirilməsi təklifinə müsbət yanaşılacağını artıq indidən bəyan edib. Və Kreml buna cavab olaraq, Polşada yerləşdiriləcək nüvə bazalarının Rusiya üçün legitim hərbi hədəfə çevriləcəyini vurğulayıb.
Göründüyü kimi, NATO və Rusiya arasında gərginlik durmadan artır. Bir tərəfdən, Ukrayna savaşının uzadılması istiqamətində israrlı addımlar atılır. Digər tərəfdən isə NATO Rusiyanı hərbi mühasirəyə alır. Son mərhələdə Rusiya sərhədlərində nüvə başlıqlı raketlərin yerləşdirilməsi planlaşdırılır. Yəni, amerikalı generalın da eyham vurduğu kimi, NATO Rusiyaya qarşı gələcək müharibəyə artıq hazırlaşmağa başlayıb. Və belə bir savaş olarsa, nüvə silahının tətbiq ediləcəyi də elə indidən qətiyyən şübhə doğurmur.(Yeni Müsavat)
ABŞ qüvvələri çobanı Əl-Qaidənin yüksək rütbəli məmuru ilə səhv salaraq, pilotsuz təyyarənin endirdiyi zərbə nəticəsində öldürüb.
Mediatv.az Publika.az-a istinadla xəbər verir ki, bu barədə “Vaşinqton Post”un araşdırmasında deyilib.
ABŞ Mərkəzi Komandanlığının insidentdən təxminən bir il sonra verdiyi açıqlamada, "3 may 2023-cü ildə ABŞ Suriyanın şimal-qərbində Əl-Qaidənin yüksək rütbəli liderini hədəf alan birtərəfli antiterror hava hücumu həyata keçirdi" deyilib.
İstintaq ABŞ ordusunun Əl-Qaidə hədəfini səhv müəyyən etdiyini və onun əvəzinə mülki vətəndaşın, Lüfti Həsən Mastonun vurularaq öldürüldüyünü təsdiqləyib.
Öldürülən çoban 56 yaşında olub və Suriyanın Qorkanya şəhərində yaşayırmış. Öldüyü gün ABŞ-ın “Predator” pilotsuz təyyarəsi onu izləyib və evinin arxasına düşən “Hellfire” raketi ilə vurub.
“Vaşinqton Post” yazıb ki, hədəfin kim olduğu və ya yanlış istiqamətləndirilmiş zərbəyə görə kiminsə cavabdeh olub-olmayacağı hələ də bəlli deyil.
Azərbaycan Ordusu Qazax istiqamətində yüksəklikdə mövqe tutub.
"Cebhe.info" xəbər verir ki, bu barədə hərbi ekspert Ədalət Verdiyev məlumat verib.
Qazax istiqamətində mühüm əhəmiyyət kəsb edən yüksəklik Azərbaycan Silahlı Qüvvələrinin nəzarətinə keçib.
Bununla bağlı görüntülər teleqram kanalında yayımlanıb.
“Neçə vaxtdır ki, Müdafiə Nazirliyində 143 milyon manatlıq mənimsəmə ilə bağlı məhkəmə gedirdi. Eləcə də proseslərdə həbs edilənlər, məhkəmədə adıçəkilən şəxslər də olub ki, onlardan biri də Nəcməddin Sadıkovdur”.
Bu sözləri Yenicag.az-a açıqlamasında araşdırmaçı jurnalist Rey Kərimoğlu deyib.
Həmsöhbətimiz Müdafiə Nazirliyindəki 143 milyonluq mənimsəmə faktı ilə bağlı başladılan prosesdə oxların sabiq Baş Qərargah rəisinə tuşlanması faktından söz açıb.
R. Kərimoğlunun fikrincə, Nəcməddin Sadıkov uzun illərdir ki, Azərbaycan ordusunda rüşvətə, korrupsiyaya bulaşıb, milli ordunun formalaşmasına mane olub.
“Məhkəmənin qərarı yoxdur deyə, Nəcməddin Sadıkovun bu məsələdə cinayətkar olduğunu deyə bilmərəm, lakin onunla bağlı illərdir ki, yazılır və onların böyük əksəriyyəti faktlara əsaslanan informasiyalardır”, – jurnalist əlavə edib.
Onun sözlərinə görə, məhkəmə orqanları bu faktları araşdırsa, Nəcməddin Sadıkova ömürlük həbs düşür:
“Məhkəmənin qərarlarını qabaqlamayıb, nə isə demək istəmirəm, lakin Nəcməddin Sadıkovun bütün bu cinayətlərdə əli var, proseslərdə başda duran adam olub. Bu adam cəzalandırılmalıdır. Arzum budur ki, Azərbaycan ordusunu dağıdan, onu ələ salan, dövlətin ayırdığı milyardları mənimsəyən Nəcməddin Sadıkov başda olmaqla bu işlərlə məşğul olan adamlar həbs edilsin”.
R.Kərimoğlu qeyd edib ki, bu məsələdə yüzlərlə faktlar yazılıb, əsgər və zabitlərdən rüşvətlər alınıb, yerdəyişmələr olub, zabitlərin başına nə oyunlar açılıb, milli kadrlarımızı ləkələyib şərləyiblər.
“Nəcməddin Sadıkov, bax, belə bir insandır. Ümid edirəm ki, o, nə vaxtsa cəzasını alacaq. Ona görə də məhkəmə proseslərini gözləməliyik. Hətta mənə elə gəlir ki, başqa məhkəmə prosesləri də olacaq”, – o, fikirlərini yekunlaşdırıb.
Qeyd edək ki, 143 milyonluq mənimsəmə ilə bağlı məhkəmə prosesi davam edir. APA-nın məlumatına görə, bu gün Müdafiə Nazirliyinin müxtəlif hərbi hissələrində maliyyə xidmətin rəisi vəzifəsində işləmiş Elvin Cəfərov 4 ay müddətinə həbs edilib.
Rusiyada yaşayan Əzizov Qabil Sabir oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi iddia edir ki, oğlu Gəncə şəhərində N saylı hərbi xidmətdə qulluq edərkən, dəhşətli hadisələrlə üzləşib:
“Mən, Azərbaycan Respublikasının vətəndaşı Əzizov Qabil Sabir oğlu, yazaraq bildirirəm ki, oğlum Əzizov Ruslan Gəncə şəhərində yerləşən N saylı hərbi hissədə xidmət edir. Ruslan Bərdə çağırış və səfərbərlik üzrə dövlət idarəsi tərəfindən ciddi şəkildə yoxlanılmadan, hərbi xidmətə göndərilmişdir. Halbuki Ruslanın səhhətində problemlər var. Bununla bağlı Gəncə Hərbi Klinik Hospitalında 3-cü dərəcəli ayaqaltı düzlüyü müayinəsiylə, Bakı Mərkəzi hərbi klinik hospitala göndərilmişdir. Bundan əlavə, hal-hazırda oğlumun bədənində dəri yaraları əmələ gəlib.
Ruslan sağlamlıq cəhətdən çatışmazlıqlarına və gücsüz olmasına baxmayaraq, heç vaxt hərbi xidmətdən yayınmamışdır.
Mənim sizə müraciətim ondan ibarətdir ki, oğlum Ruslan son iki ayda hərbi xidmətdə dəhşətli hadisələr yaşayıb. Belə ki, “karantin” vaxtı bitməsinə baxmayaraq, o, hələ də hərbi hissədə saxlanılır və heç bir psixoloji problemi olmasa da, hərbi hissənin 27-ci bölüyündə otuz dörd nəfər psixoloji problemli əsgərin içərisində saxlanılır.
Son iki aydır oğluma komandir və əsgər heyəti tərəfindən yüksək təzyiq olunur. Komandir heyəti və əsgərlər arasında qruplaşma yaradılıb. Ruslana qarşı nalayiq, təhqiramiz sözlər işlədilir. Həmçinin, psixoloji problemli əsgərlərin hər biri böyük qruplaşma yaradaraq, tənhalıqda Ruslana qarşı yüksək şiddət göstərmişlər.
Sözügedən qruplaşma iyirmi nəfərdən ibarətdir. Hətta şiddət zamanı soyuq silahdan belə istifadə olunmuşdur. Bundan əlavə, bir neçə nalayiq və iyrənc hərəkətlər olunmuşdur.
Bir aydır ki, duş qəbul etməsinə imkan verilmir. Duş qəbul etmək istədiyi zaman əsgərlər tərəfindən iyrənc hərəkətlərə məruz qalır. Bu əsgərlərin içərisində “heteroseksuallar” mövcuddur.
Ruslan ona göstərilən təzyiqi, şiddəti komandirlərinə bildirsə də, heç bir tədbir görülməmişdir. Əksinə, komandirlər tərəfindən ona qarşı pis sözlərdən isdifadə olunmuşdur.
Sözügedən qruplaşmaları yaradan ən başlıca şəxs hərbi hissədə xidmət göstərən Baş leytenant Nadir Quliyevdir.
Qısası, Ruslana hərbi hissədə fiziki və psixoloji işgəncə verilir. Son telefon danışığında oğlum intihar edəcəyini və vəziyyətin belə olmasından artıq cana gəldiyini dedi.
Mən altı oğul atasıyam. Bu dövlətə altı əsgər, altı igid böyüdürəm. Böyük oğlum ali təhsil alır. Cəmiyyətə, millətə xeyirli bir fərd olmaq üçün səy göstərir. Digər oğlum hərbi xidmətini müvəffəqiyyətlə yeni başa vurdu. Övladlarımı bu dövlətə layiq insanlar olması üçün böyüdürəm.
Oğlum Ruslan hərbi hissədə fiziki, psixoloji işgəncələr yaşayır. Bu, bir ata, bir valideyn üçün dözülməz haldır. Mən övlad böyütmürəm ki, ona işgəncə, əzab verilsin. Oğlumu dövlətə xidmət etməsi üçün yola salmışam. Mən dövlətimizin ədalətinə, hökmünə tam güvənirəm. Oğlum hal-hazırda Bakı Mərkəzi hərbi klinik hospitaldadır.
Bu yazını oxuyan bütün səlahiyyətli şəxslərdən xahiş edirəm ki, mənə kömək etsinlər. Bu hal təkcə mənim oğlumun başına açılmır. Mən bilirəm ki, bir çox uşaqların başına bu oyunlar açılır”.
Son 20 ildə ölkələrin hərbi xərcləri nə qədər artıb? – SİYAHI
2004-2024-cü illər arasında hərbi xərclərin ən çox artdığı ölkə Çindir.
İndex.az xəbər verir ki, “Global İndex”in araşdırmasına görə, Çinin hərbi xərcləri son 20 ildə 380% artıb.
İndex.az ölkələrin hərbi xərclərində olan artımı sizə təqdim edir:
Rusiyanın hücumları nəticəsində cəbhədə vəziyyət daha da pisləşə bilər.
“Report” xəbər verir ki, bunu Ukraynanın xarici işlər naziri Dmitro Kuleba “Foreign Policy” nəşrinə müsahibəsində deyib.
Onun sözlərinə görə, Qərbin hərbi yardımının gecikdirilməsi fonunda Rusiya hərbi əməliyyatlarının effektivliyi artıb:
“Biz həqiqətlərlə üz-üzə gəlməli, Rusiyanın hərbi əməliyyatlarının effektivliyinin artdığını etiraf etməliyik”.
Nazir qeyd edib ki, Qərbin göndərdiyi yardımlar arasında fasilə müddəti çox uzundur: “Ukrayna əsgərləri artilleriya sursatının çatışmazlığından əziyyət çəkirlər”.
Xatırladaq ki, Rusiya ilə Ukrayna arasında genişmiqyaslı müharibə 2022-ci il fevralın 24-də başlayıb.