Abdin Fərzəliyevin milyon yarımlıq sifariş şübhəli şirkət – Yol təmir edən “Proqress İnşaat En” həm bayram tədbiri keçirir

Abşeron Rayon İcra Hakimiyyətinin keçirdiyi satınalma müsabiqələrində tez-tez qalib seçilən şirkətlərdən biri də “Proqress İnşaat En” MMC-dir.
Reportyor.info xəbər verir ki, bir il ərzində şirkət icra hakimiyyətinin 7 satınalma müsabiqəsinin qalibi seçilib.
Müsabiqələr əsasən təmir işlərinin satın alınması ilə bağlı keçirlib. Lakin “Proqress İnşaat En” şirkətinin qalib seçildiyi iki müsabiqə inşaat sahəsinə aid deyil. Bunlardan biri Qurtuluş Günü, digəri isə Zəfər Günü ilə bağlı tədbirlərin keçirilməsi ilə əlaqədardır.
Beləliklə, məlum olur ki, təmir-tikinti işləri ilə məşğul olan “Proqress İnşaat En” MMC həm də bayram tədbirləri təşkil etməklə məşğul olur.
“Proqress İnşaat En” MMC-nin qalib gəldiyi satınalma müsabiqələri üzrə satınalma müqavilələrin ümumi maliyyə dəyəri 1 143 241,99 manatdır.
“Proqress İnşaat En” şirkətinin adına Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında rast gəlinmir. Böyük ehtimalla bu, Dövlət Vergi Xidmətinin saytının yenilənməsi ilə ilə əlaqədardır. Çünki bəzi hallarda axtarış zamanı başqa şirkətlərin də adı çıxmır.
Lakin internet resurslarında apardığımız araşdırmalar zamanı məlum olur ki, “Proqress İnşaat En” MMC Bakı şəhəri Lokal Gəlirlər Baş İdarəsində 29 noyabr 2021-ci il tarixdə dövlət qeydiyyatına alınıb. Nizamnamə kapitalı 1000 manat olan şirkətin hüquqi ünvanı Bakı şəhəri Xətai rayonu, Pivə Zavodu, ev 24/6-da yerləşir. MMC-nin qanuni təmsilçisi İslamov Nazim Əli oğludur.
Məlumatlara görə, Nazim İslamov şirkətin sahibi deyil. “Proqress İnşaat En” MMC Şirinov Eldar Bəhlul oğlu tərəfindən təsis edilib.
Yerli mətbuat yazır ki, Eldar Şirinov Bakı şəhər İcra Hakimiyyətinin Mənzil-Kommunal Təsərrüfatı Departamentinin sədri Rəfail Mehralıyevin yeznəsidir.
Görünür, şirkətin Abşeron Rayon İcra Hakimiyyətinin tenderlərində qalib gəlməsinin sirri budur.
Açıq mənbələrdə barəsində heç bir məlumata rast gəlinməyən, maddi-texniki bazasının hansı vəziyyətdə olduğu bəlli olmayan bir şirkətin dövlət satınalmalarında qalib gəlməsini başqa cür izah etmək mümkün deyil.
Bir məqamı qeyd etmək yerinə düşər. “Proqress İnşaat En” MMC Abşeron Rayon İcra Hakimiyyətinin Saray qəsəbəsi Səttar Bəhlulzadə və Çingiz Qurbanov küçələrində yolun əsaslı təmiri işlərinin satın alınması ilə bağlı keçirdiyi kotirovka sorğusunun qalibi olub. Bu sorğu üzrə satınalma müqaviləsinin maliyyə dəyəri 33 775,55 manatdır.
Bu məbləğə hansısa yolun əsaslı təmir ediləcəyi şübhəli görünür. Biz hələ onu demirik ki, hazırda Sarayda yollar bərbad vəziyyətdədir. Saray yollarına diqqət etdikdə burada hansısa əsaslı təmirdən söhbət getmədiyini aydın şəkildə görmək mümkündür.
Abşeron Rayon İcra Hakimiyyətinin başçısı Abdin Fərzəliyevdir. O, 2022-ci ildən rayona rəhbərlik edir.
Ümumiyyətlə isə Abdin Fərzəliyevin icra başçısı kimi karyerası 2003-cü ildən başlayır. O, Abşerondan əvvəl Nərimanov və Nizami rayonların icra başçısı vəzifəsində işləyib.

Azərbaycan Həmkarlar İttifaqları Konfederasiyasının sədri Səttar Möhbalıyevin AHİK-in bu ayın sonunda keçiriləcək növbədənkənar qurultayda istefa verəcəyi deyilir.
Çünki fəaliyyətinə göz qoyulub, ciddi araşdırılır. Bu da üzüsulu aradan çıxmaq istəyir. İllərlə milyonları həzm et, indi də heç nə olmamış kimi aradan çıx.
Yaxşıdı vallah. Hələ iş Səttar müəllimlə yekunlaşsa idi dərd yarı idi. Yerlərdəki "meskom"ları da "at oynadırlar". Nə hikmətdirsə, onlara da "gözünün üstə qaşın var" deyən tapılmır.
Bəlkə cənab Möhbalıyevin mövqeyi laxlayandan sonra kimsə cürət edə biləcək. Hələki kefləri istədikləri kimi gəzib dolanırlar. Məsələn, Sabirabad rayonunu misal çəkim. Bir neçə dəfə də yazmışam.
Yenə təkrar edirəm. Sabirabad Rayon Mərkəzi Xəstəxanasında hansı ölkənin qayda-qanununun işlədiyi məlum deyil. RMX həmkarlar təşkilatının rəhbəri Elnur Əzizov xəstəxanada Səttar Möhbalıyevin balaca bir obrazını yaradıb.
Elnur Əzizov "dərə xəlvət, tülkü bəy" deyərək özünə əməllicə güzəran yaradıb. Qiyməti üçrəqəmli məbləğdə olan avtomobil, Sabirabadda daşınmaz əmlakları, rayonda və Bakıda evlər, mənzillər, villalar, obyektlər, balıq gölləri və s.
Əgər Səttar müəllim milyonlar yeyirdisə, bu da minlər, yüz minlər yeyir. Hələ milyonlara əli çatmayıb. Möhbalıyev kimi oliqarxların yanında balacadı axı. Hələ böyüməlidi. Böyümək üçün də deyilənlərə görə 50 min manatını ayırıb ki, Sabirabad RMX-nin baş həkimi kreslosunu alsın.
Baş həkim vəzifəsi sanki hərraca çıxarılıb. Saxta əlillik təyinatı ilə məşğul olan onkoloq Elnur Əzizov Sabirabad RMX-nin direktoru Həsən Hüseynovun vasitəsilə razılıqları alıb.
Keçmiş baş həkim İkram Allahverdiyevin işdən azad edilmək haqqında ərizə verməsə də TƏBİB-in icraçı direktoru Vüqar Qurbanovun əmri ilə Birinci Qarabağ müharibəsi iştirakçısı olmuş İkram doktorun işinə xitam verilib.
Bir daha qeyd edirəm. Məsələ ilə əlaqədar TƏBİB-in ictimaiyyətlə əlaqələr və kommunikasiya departamentinin rəhbəri Zamirə Adilova mənimlə əlaqə saxlayıb bildirdi ki, Sabirabad RMX baş həkimi işdən çıxarılmayıb.
Amma İkram müəllimin rəsmi şəkildə işdən azad edildiyi və bununla bağlı müvafiq əmrin verildiyi məlum oldu. Bundan sonra Zamirə xanım məzuniyyətə çıxdığına görə açıqlama ala bilməmişəm.
Məsələnin həmkarlar tərəfini bir tərəfə qoyaq. İndi orada nələr baş verdiyini heç özləri də bilmirlər. Qurultaydan sonra bəlkə nəsə dəyişər.
Amma TƏBİB də öhdəsinə düşəni etmir. Ay TƏBİBİ-in hörmətli böyüyü Vüqar müəllim, xahiş edirəm, hərdən mediada rəhbərlik etdiyiniz təşkilat haqqında yazılanları oxuyun, deyilənlərə qulaq asın.
Dövlət başçımız hər zaman deyir ki, media cəmiyyətin güzgüsüdür, neqativ hadisələr barədə siqnal vermələri çox vacibdir.
Cənab Prezident belə dediyi halda məmurların öz əməllərində faktiki olaraq onun tövsiyələrinin, tapşırıqlarının əksinə getməsini necə başa düşək?
Sima Babayeva
TEREF

Göyçay rayonu Cəyirli kənd sakini Abışov Aqil Camal oğlu tərəfindən

ŞİKAYƏT

Göyçay rayonu Cəyirli Bələdiyyəsinin sabiq sədri Fuad Nəbiyev vəzifədə olduğu müddətdə kənd ərazisində bir çox alqı- satqı işləri ilə məşğul olub. Hektarlarla torpaq sahəsini mənimsəyərək yaxın qohumlarının adına rəsmiləşdirib və sonradan digər şəxslərə satmış, o, cümlədən hazırda bir neçə meyvə bağları və fermaları mövcuddur. Fuad Nəbiyevin vəzifə səlahiyyətlərindən sui-istifadə etmə halları və özbaşınalığı ondan qaynaqlanır ki, onun yaxın qohumu Milli Məclisin deputatı Sabir Hacıyevin olmasıdır. Buda ona arxalanaraq kənd ərazisində özbaşınalıqlar edib, bir neçə ağacları qanunsuz şəkildə kəsərək məhv edib. Cəyirli kəndində torpaqğın 1 sotu 3000 manat təşkil edir. Təkcə Fuad Nəbiyevin öz adına notariusda 35 alqı-satqı müqaviləsi var. Bir o qədəri də qohumların adı ilə etmişdir.Hətda öz yerinə qohumu Şəfa Nəsirovanı bələdiyyə sədri vəzifəsinə gətirib kənardan kəndi idarə edir.
Sabir Hacıyevə arxalanan Fuad Nəbiyevin barəsində heç bir tədbir görülmür.
Prezident cənab İlham Əliyevdən, Baş Prokuror cənab Kamran Əliyevdən, Baş Prokurorluq yanında Korrupsiyaya qarşı Mübarizə Baş İdarəsinin rəisi cənab Nazim Rəcəbovdan xahiş edirəm ki, Fuad Nəbiyevin bu qanunsuz əməlləri operativ şəkildə araşdırılsın və qanuna müvafiq tədbirlər görülsün.
Redaksiyadan: Qarşı tərəfində möqeyini dərc etməyə hazırıq!
TEREF

Naxçıvan Dövlət Universiteti Kembriclik etmək sevdasına düşüb.

Azinforum.az-ın əldə etdiyo məlumata görə, NDU ötən təhsil ilinin əvvəlində 1-ci və 6-cı sinif şagirdlərinin universitetin nəzdində fəaliyyət göstərən Beynəlxalq Məktəbinə Kembric proqramı üzrə hazırlanması təşəbbüsünə start verib.

Bir neçə gün əvvəl keçirilən “Kembric imtahanları”na Universitetin rektoru Elbrus İsayevin şəxsən özü nəzarət edib. Rektorun 4 avqust 2024-cü ilə aid paylaşımında bildirilir:

“Bu gün Naxçıvan Dövlət Universitetinin Kembric Məktəbinə (Cambridge school)şagird qəbulu imtahanı keçirildi.
Qəbul imtahanında 1-ci və 6-cı sinif şagirdləri iştirak edirdi;
Namizədlərə ingilis dili qrammatikasından 10, riyazi biliklər 30, ingilis dilində oxu materialları 30, dinləmədən isə 20 sual olmaqla ümumilikdə 90 sual təqdim edildi;
Qeyd edək ki, NDU Beynəlxalq Məktəbində Kembric proqramı ilə 2024-cü ilin sentyabr ayından etibarən tədrisə başlanılacaq. Tədris tamamilə ingilis dilində həyata keçiriləcək;
Böyük Britaniyadan müəllimlərin cəlb ediləcəyi tədris üçün yerli müəllimlərin də lazımi tələblərə cavab verməsi məqsədilə müxtəlif təlimlər təşkil olunur.
Vətənimiz, millətimiz üçün xeyirli olsun!”.

Maraqlıdır ki, NDU-nun “Kembric məktəbi”nə hazırlıq kursları da açılıb və bir çox şagirdlər imtahanlara NDU müəllimləri tərəfindən hazırlanıb.

Bəs, rektorun təbirilə desək, “Vətənimiz, millətimiz üçün xeyirli olan” bu hazırlıq kursları necə təşkil edilib?

Valideynlərdən birinin iddialarına görə, ondan övladının bu imtahanlara hazırlaşdırılması üçün ayda 120 manat ödəniş alınıb. Övladı imtahanlara hazırlaşarkən dəfələrlə onun hazırlıq vəziyyəti yoxlanılıb və yüksək bal toplayacağına zəmanət verilib. Hətta “Kembric məktəbi”nin şagirdliyinə namizədi (abituriyent də demək olar) ən yüksək səviyyəli qrupa: “Bayram müəllimin sinifi”nə keçiriblər. Və nəticə:

İmtahan sonra valideynə deyiblər: “Təəssüf ki, övladın bir balla imtahandan kəsildi”. Beləcə, ən yaxşı qrup sayılan “Bayram müəllimin sinifi”nin yetirməsi belə, NDU Beynəlxalq Məktəbində Kembric proqramı ilə tədris almaq imkanından məhrum olub.

Valideyn indi aldadıldığını və ailəsinin boğazından kəsib NDU Beynəlxalq Məktəbinə ödədiyi pullardan çox, övladının aylarla çəkdiyi əziyyəti heç kimə, yəqin ki, (həm də Elbrus müəllimə) halal etməyəcəyini vurğulayır.

Bizi maraqlandıran ən mühüm sual isə budur: Bir universitet öz nəzdində hansısa orta məktəb aça bilərmi? Bu, təhsildə monopoliya yaradılması demək deyilmi?

Suallarımıza cavab almaq üçün Elm və Təhsil Nazirliyinin ali məktəblərlə iş üzrə müvafiq şöbəsinə müraciət etdik. Zəngimizə cavab verən şöbə əməkdaşı suallarımızı eşidərkən bir anlıq susdu və bizdən bir qədər gözləməyi xahiş etdi. 5 dəqiqədən sonra isə geri dönüb əlimizdə bu iddiaları təsdiqləyən hansısa sənədin olub-olmaması ilə maraqlandı. “Var”, – dedim: – “Şəxsən rektorun özü imtahanın elanını və özünün imthanda iştirak etdiyini təsdiqləyən fotolar paylaşıb”.

Nazirliyin əməkdaşı xahiş etdi ki, suallarımı və əlimdəki dəlilləri onlara göndərim. Onlar da mənə rəsmi qaydada və yazılı şəkildə cavab versinlər. Mən də göndərdim. İndi də Novruzəli kişi kimi oturub post qutusunun qabağında, Elm və Təhsil Nazirliyindən gələcək cavab məktubunu gözləyirəm. Məktub gəlib çıxan kimi, paylaşacağam, siz də tanış olasınız.

Mütəmadi olaraq qalmaqallı xəbərlərlə medianın gündəminə gələn "Pilot-16" MMC-nin inşa etdiyi "Elevan Park" yaşayış kompleksinin tikinti meydançasından dəhşətli görüntülər yayılıb.
Yaşayış kompleksinin tikildiyi Novruzov qardaşları küçəsinin sakinləri Editor.az-a bildiriblər ki, şirkətin tikinti təhlükəsizliyi qaydalarına əməl etməməsi və ərazidə müvafiq normalara uyğun tikinti meydançası yaratmaması səbəbindən onlarla ailənin həyatı təhlükə altındadır: "Havanın qeyri-sabit, küləkli olduğu zamanlarda şirkətin tikdiyi binadan böyük ölçülü tikinti materialları, ağır daşlar vətəndaşların və avtomobillərin hərəkət etdiyi yola, eyni zamanda sakinlərin birbaşa evlərinin həyətinə tökülür. Binadan tökülən tikinti materialları və ağır daşlar dəfələrlə maşınlara, insanların evlərinə zərər verib. Bəzi sakinlər sadəcə xoşbəxtlikdən başlarına düşən daşların qurbanı olmayıblar".

Nəsimi rayon sakinləri qeyd edirlər ki, onlar yaranmış vəziyyətlə bağlı Fövqəladə Hallar Nazirliyinə dəfələrlə müraciət ediblər: "Nazirliyin əməkdaşları əraziyə bir neçə dəfə baxış keçirib şirkət rəhbərliyinə xəbərdarlıq etsələr də, "Pilot-16″ MMC-nin rəhbəri Aslan Quliyev buna məhəl qoymayıb. Müxtəlif qurumların çoxsaylı tələblərinə baxmayaraq ağır tikinti işləri sakinlərin yaşadığı evlərin 5-10 metrliyində aparılır və heç bir qoruyucu sədlər təşkil olunmayıb. Burada insanların həyatını itirməsi an məsələsidir. Gecəmiz-gündüzümüz yoxdur. Təəssüflə qeyd etməliyik ki, Nəsimi rayon İcra Hakimiyyəti sakinlərin probleminə tam biganə yanaşır".

Neftçala rayonu, Mürsəqulu kəndinin bir qrup sakini tərəfindən Hurriyyet.az saytının redaksiyasına şikayət məktubu daxil olub. Şikayətçilər saytımız vasitəsilə Baş prokuror Kamran Əliyevə müraciət edirlər:

“Cənab Baş prokuror!

Bildiririk ki, SSRİ Ali Sovetinin deputatı, Respublika Kolxozlar Şurasının sədri, 20 il kənd sədri, 18 il bələdiyyə sədri işləmiş, korrupsionerlikdə və rüşvətxorluqda tayı-bərabəri olmayan Xol Qaraqaşlı bələdiyyəsinin sədri Səlimov Əlibala Xanəhməd oğlunun qanunsuz əməllərindən 2022-ci ildən bu günə qədər kollektiv olaraq 420 ədəd məktub və teleqramlarla dövlətin bütün orqanlarına müraciət etmişik.

Prezident Administrasiyasına 4 dəfə, DTX-ya 4 dəfə, DİN-ə 2 dəfə, Respublika Baş Prokurorluğuna 5 dəfə müraciət etmişik. Baş Prokuror Kamran Əliyevin (yəni Sizin) Biləsuvar, Salyan və Neftcalada qəbulunuzda olmuşuq. Amma bu günə kimi şikayətimizlə bir nəfər də gəlib maraqlanmayıb.

Qəbulunuzda olan zaman insanlar çox olduğundan, bizi tam dinləyə bilmədiyiniz. Ona görə Sizdən xahiş etdik ki, bizə əlaqə nömrəsi verəsiniz. Siz də həmin vaxt bizə Səməd adlı əməkdaşın əlaqə nömrəsini verdiniz. Həmin vaxtdan Səməd zənglərimizi açmır.

Cənab Baş Prokuror!

Siz bir şikayətçi ilə 2-3 dəqiqəlik görüşüb, onun dərdini bilə bilməzsiniz. Bu səbəbdən də nə özünüzün vaxtınızı almayın, nə də bizə ümid verməyin. Sizinlə gələn orqan nümayəndələri tapşırıqlarınızı icra etmirlər. Burdan da belə qənaətə gəlirik ki, “kimin pulu, malı var, o, yalan danışıb, qanunsuzluq etsə də haqlıdır”.

Əlibala Səlimov 47 il kənddə müxtəlif vəzifələrdə işlədi, kəndin varını-yoxunu, torpaqlarını satdı. 150 hektar torpağımızı heç bir hərrac keçirmədən, saxta sənədlərlə Salyan sakini olan Elşad adlı şəxsə satıb. Oğlu Səlimov Ozalın adına 3 yerdə torpaq götürüb. Belə ki, bələdiyyə sədri olanda oğlu Ozalın adına saxta sənəd hazırlayıb, 12 ha torpağı 9 ha kimi saxta yol ilə sənədləşdirib.

Sakinlərə məxsus 63 hektar ərazini 20 il əkib-becərdi, əldə etdiyi gəlirdən heç kəsə vermədi.

2019-20-ci illərdə telekanalları dəvət edib, biz kəndlilərin torpağında əkdiyi pambığı reklam etdirirdi. Adını da qoydular ki, guya Əlibala Səlimov respublikada qabaqcıl fermerdir.

Bu qədər qurumlara şikayət etməyimizə baxmayaraq, yenə də həmin yerləri qeyri-qanuni əkir. Əlibaba Səlimovun qanunları Azərbaycan Respublikasının qanunlarından öndədir. Arxasında kimlər durursa, gördükləri bütün qanunsuzluğa göz yumurlar.

İyulun 29-da, yəni iki ay əvvəl 161 qaynar xəttinə etdiyimiz şikayətə Təhqiqat İdarəsinin rəis müavini Kazım Həmzətov cavab verdi ki, “sizin şikayətinizə baxılmış, göstərdiyiniz xüsusiyyətlər öz təsdiqini tapmamışdır”.

Cənab Baş Prokuror!

Kazım Həmzətov bizim şikayətimizi harda, kimin iştirakı ilə yoxlayıb ki, belə cavab verir?! Onun kimilərin sayı-hesabı yoxdur, haqsızlığa göz yummaq dəb halına düşüb.

3 dəfə Sizin qəbulunuzda olmuşuq. Amma bir tapşırıq vermədiniz ki, bu iş ətraflı araşdırılsın. Özünüz fikirləşin, dövlətdən pul alan məmur torpağa möhtacdırsa, “qara camaat” neynəsin bəs?! Məmur doyana kimi bizim ömrümüz sona yetəcək.

Sizdən yenə xahiş edirik, adını çəkdiyimiz məmurlar barəsində araşdırılma aprılıb, ədalətli qərar çıxarılmasına göstəriş verəsiniz.

Bilirik ki, Sizə göndərdiyimiz məktublar ünvanına çatmır, elə bu səbəbdən də sayt vasitəsilə müraciət edirik ki, bəlkə bu dəfə səsimizə səs verəsiniz”.

Hazırladı: Jalə FAMİLQIZI

Redaksiyadan: Yazıda adları qeyd olunan qurumların və şəxslərin mövqeyini dərc etməyə hazırıq.

Hakim partiyanın 71 saylı Cəlilabad şəhər seçki dairəsindən deputatlığa namizədi Malik Həsənovdur. Tribunainfo.az xatırladır ki, o, Administrasiyasının Dövlət nəzarəti məsələləri şöbəsinin müdiri Kərəm Həsənovun qardaşıdır. Əslən cəlilabadlı olan Həsənovları yerli camaat yaxşı tanıyır. Onların rayonda və ölkə üzrə böyük biznes imkanları var. Malik Həsənov IV, V, VI çağırış deputat olub. Yəni 15 ildir ki, parlamentdədir. Onun yenidən mandat sahibi olacağı ehtimalı yüksəkdir. Amma Cəlilabad camaatı deputatın üzünü seçkidən-seçkiyə görür. Onlar qeyd edirlər ki, Malik Həsənov 9 avqustdan 31-dək görünəcək, sonra yenə 5 il onu tapmaq mümkün olmayacaq. Yeri gəlmişkən, Malik Həsənov parlamentin susqun deputatlarından biridir. Onun hər hansı çıxışını və ya mətbuata açıqlamasını görmək mümkün deyil.
O da deyilir ki, “Baku Mall”, “X-Petrol” yanacaqdoldurma məntəqələri,”Bağçasaray” restoranlar şəbəkəsi məhz Malik Həsənova məxsusdur. O, 2007–2010-cu illərdə “Azinko holdinq” tikinti şirkətinə rəhbərlik edib. İndi də şirkət onun nəzarətindədir.

Azərbaycanda tayı bərabəri olmayan bir parklardan hesab edilən Ağstafada "Miniatür Azərbaycan Parkı" bərbad hala düşüb.

32gun.az xəbər verir ki, buu gözəl park baxsızlıqdan bərbad vəziyyətə düşüb. Parkın əsaslı təmirə ehtiyacı var.

Yay aylarında istirahətə gələn qonaqların ən çox üz tutduğu parkın bu vəziyyətə düşməsi təəssüf doğurur.

Araşdırmalarımız zamanı əldə etdik ki, parkda sonuncu dəfə 2020-ci ildə təmizlik və yüngül təmir işləri görülüb.

Ağstafa Rayon İcra Hakimiyyətinin başçısı Seymur Orucov isə sözügedən parka getməyə tənəzzül də etməyib.

Xatırladaq ki, 2013-cü ildə Prezident İlham Əliyev Ağstafada açıq səma altında salınan Tarixi və Müasir Abidələr Parkının açılışında olub. O zaman cənba prezidentə məruzə edilmişdi ki, parkın tikintisinə 2012-ci ilin noyabrında başlanılmışdır. İnşaat işləri rayonun imkanları hesabına aparılmışdır.