Bir neçə gün öncə “Prestij-V” MTK-nın rəhbəri İdris Əliyev və onun qardaşı Şəmsi Əliyevin fəaliyyəti haqda “İdris və Şəmsi Əliyev qardaşlarının “Ağ şəhər”dən Biləcəriyədək uzanan əməlləri:generala güvənirlər?” başlıqlı yazı dərc etmişdik. Yazıda “Ağ şəhər”də böyük tikinti işləri görən İ.Əliyevin hər yerdə nüfuzlu bir generalın adını çəkərək onun himayəsində olduğunu bildirdiyini, qardaşı Şəmsi Əliyevin də adının tikinti biznesində və torpaq biznesində hallandığını qeyd etmişdik. Təhsil Nazirliyi yaxınlığında hündürmərtəbəli binanın tikintisini həyata keçirən Ş.Əliyevin Biləcəri qəsəbəsində 48 sot torpaq sahəsini hissə hissə olmaqla bir payı bir neçə əfərə satması haqda məlumatlar var. İcra hakimiyyəti torpağın vətəndaşa məxsus olduğunu bildirsə, əldə alqı-satqı sənədləri olsa da Şəmsi Əliyev bu günədək vətəndaşa dəymiş ziyanı ödəməkdən imtina edir və məsuliyyətdən yayınıb. Bununla bağlı cumhuriyyet.az-a daxil olan məlumata görə zərərçəkmişlər artıq hüquq mühafizə orqanlarına müraciət ediblər.
Məsələnin təfərrüatı isə ondan ibarətdir ki,2006-cı ildə Quliyeva Şölə Kamil qızı və qardaşı Quliyev Elnur Kamil oğlu Binəqədi rayonu, Binəqədi şossesi, Dəyirman yolu deyilən yerin yaxınlığında bələdiyyə sənədi əsasında Əliyev Şəmsi Səməd oğlundan hər birinin adına ayrılıqda 6 sot, ümumilikdə isə 12 sot torpaq sahəsi alır. Bunun müqabilində Əliyev Şəmsi Səməd oğluna 72000 (yetmiş iki min) manat məbləğində pul ödənilir. Həmçinin Bakı şəhəri Binəqədi rayonu Binəqədi qəsəbə bələdiyyəsinin 38 və 39 saylı 14 aprel 2010-cu il tarixli qərarları ilə torpaq sahələrinin alıcıların adına olması və onların istifadə hüququnda olduğunu təsdiq edilir.
Torpaq alqı satqısı zamanı Əliyev Şəmsi sata biləcəyi ümumi hasarlanmış 48 sot torpaq sahəsi olduğunu, həmin torpaq sahəsini hissə-hissə, yəni hər hissəsi 6 sot olmaqla satacağını bildirib. Ötən illər ərzində Quliyevlər həmin torpaq sahəsində ev tikmək və abadlıq işləri görmək imkanında olmadığından torpaq sahəsində heç bir iş aparmayıblar. Lakin 2021-ci ilin ortalarında həmin torpaq sahəsinin olduğu yerə baxış keçirdikdə onların aldığı ərazilərdə yaşayış sahələrinin, evlərin olduğu müşahidə edilir. Bununla bağlı şikayətçilərin cumhuriyyet.az-a ünvanladığı məktubda deyilir:”İlk öncə öz torpağımızı hasarlamadığımıza görə başqa şəxslərin bu torpaqları sahibsiz sanaraq qanunsuz şəkildə məskunlaşdığını düşündük. Sonra isə Əliyev Şəmsinin satdığı 48 sot torpaq sahəsinin içərisində yaşayan hər kəsin öz torpaqlarını Əliyev Şəmsidən aldığını, burada qanuni şəkildə məskunlaşdığını öyrəndik. Belə ki, burada yaşayış sahəsi olan hər kəsin torpaq sahələrinin sənədi var. Bizim adımıza olan torpaq sahələrinin də yerində yaşayış sahələri tikib məskunlaşan şəxslər də bu torpaqları bizim kimi Əliyev Şəmsidən aldıqlarını bildirdilər və öz sənədlərini də bizə göstərdilər. Bu isə Əliyev Şəmsinin bir torpaq sahəsinin birdən çox şəxsə satması deməkdir.
Bu açıqcasına bizim öz torpağımızdan, mülkiyyətimizdən istifadə hüququmuzun pozulması deməkdir. Bu da mülkiyyət hüququnun özünün kobudcasına pozulmasıdır. Əliyev Şəmsi bizim etibarımızdan sui-istifadə edərək dələduzluq yolu ilə bizi və digər şəxsləri aldatmış, bir torpaq sahəsini birdən çox şəxsə satmışdır. Bu isə Azərbaycan Respublikasının Cinayət Məcəlləsinin 178-ci maddəsi ilə dələduzluq cinayət əməlinin hallarına aid edilir. Əliyev Şəmsi Səməd oğlu bizə aid olan əmlak hüquqlarını ələ keçirmiş və bizi aldadaraq bizə məxsus olan torpaq sahəsini başqa şəxslərə də satmışdır”
Şikayətçilərin sözlərinə görə baş verənlərlə bağlı Əliyev Şəmsi Səməd oğluna dedikdə isə o güya bunlardan xəbərdar olmadığını və bütün bunları başqasının etdiyini demişdir. Bununla da ona torpaq sahəsinə görə ödənilən pulu qaytarmaqdan boyun qaçırmışdır. Ş.Əliyevin bu vaxta qədər cəzasız qalmasının səbəbi kimi “Ağ şəhər”də ciddi tikinti işləri aparan qardaşı İdris Əliyev və onun himayədarı olan generalın adı hallanır. Bu barədə növbəti yazımızda

Bu cür müəllim heyəti ilə yüksək ixtisaslı mütəxəssis necə hazırlamaq olar?
“Dünyanın heç bir yerində təhsil adı ilə imitasiyalara yol verilmir. Təəssüflər olsun ki, bu, bizdə adi hal alıb. Məsələn, Qərbi Kaspi Universitetinin adı yaxşı ali təhsil verən universitet kimi hallanır. Universitetin elektron resurslarından bəzi məlumatlar diqqətimi çəkdi. Sən demə, bu ali məktəbdə 8 məktəb fəaliyyət göstərir. Universitetlərin reytinqinin əsas kriteriyalarından biri professor-müəllim heyətinin tərkibidir. Bu məktəblərin akademik heyətinə baxanda, məni təəcüb bürüdü. Bu cür akademik heyətlə necə keyfiyyətli təhsil vermək olar?”

TEREF.AZ-ın pravda.az-a istinadən xəbərinə görə, bunu deputat Etibar Əliyev bildirib.

“Universitetin Tətbiqi və Təbiət Elmləri Məktəbi və İqtisadiyyat məktəbinə diqqət edək: Yazırlar ki, Tətbiqi və Təbiət Elmləri Məktəbi Qərbi Kaspi Universitetinin qabaqcıl məktəblərindən biridir. Məktəbin nəzdində Təbiət Elmləri kafedrası, Ekologiya və ətraf mühit kürsüləri fəaliyyət göstərir. Məktəb fizika, tətbiqi riyaziyyat, biologiya, kimya və fizika sahələrində yüksək səviyyəli mütəxəssislər hazırlayır. Məktəb ən son laboratoriya avadanlığından istifadə edərək fiziki, fizikokimyəvi profillərinin müvafiq fənləri üzrə dərslər keçirir. Məktəbin intellektual, maddi və texnoloji resurslarının hazırki vəziyyəti, tətqiqatların aparılması və elmi inkişafına imkan yaradır. Akademik heyətdə 13 müəllim təmsil olunur, bunların 4 nəfəri kimyü üzrə fəlsəfə doktoru, 4 nəfəri biologiya üzrə fəlsəfə doktoru, 4 nəfərin elmi dərəcəsi yoxdur, 1 nəfərin adının qarşısına professor elmi adı yazılıb, lakin elm sahəsi göstərilməyib. İqtisadiyyat Məktəbi haqqında yazılır: Qərbi Kaspi Universiteti yarandığı gündən fəaliyyət göstərir. Məktəbimiz tələbələrə yüksək səviyyəli təhsil verməklə, respublikamızın maraqlarını təmin edə biləcək mütəxəssislər yetişdirməklə Azərbaycanın iqtisadi, sosial və siyasi inkişafına dəstək məqsədi güdür. Tələbələr üçün yüksək keyfiyyətli tədris və təlim mühiti yaradır. İqtisadiyyat məktəbi-universitetin ən aparıcı fakültəsi kimi mövqeyini hər keçən gün gücləndirir və ölkədə nüfuzunu artırır. Şəxsi və peşəkar sahədə yüksək standartlara nail olmaq üçün tam təminatlı iş qabiliyyətinə malik məzunlar yetişdirir. Akademik heyətə cəmi 4 müəllim daxildir, 1 nəfər-riyaziyyat üzrə fəlsəfə doktoru, 1 nəfər-doktorant, 2 nəfərin isə elmi dərəcəsi yoxdur. Bu cür müəllim heyəti və aşağı bal toplayan tələbə ordusu ilə necə yüksək ixtisaslı mütəxəssis hazırlamaq olar? Bu universitetdə fəaliyyət göstərən digər məktəblərdə də müəllim heyəti analoji xarakter daşıyır. Əlindəki imkanlardan istifadə edib öz universitetini təbliğ etmək, gözə kül üfürmək, varlanmaq məqsədilə tələbə toplamaq, oliqarx olmaq üçün cəmiyyəti ələ salmaq lazım deyil. Bu universitetin də ailə, qohum-əqrəba universiteti olması məsələsinə toxunmadım. Danışanda dünyəvi dəyərlərdən danışırlar, təfəkkür isə feodallıqdan kənara çıxmayıb” – E.Əliyev qeyd edib.

Bakı şəhəri, Yasamal rayonu ərazisindəki 38 saylı məktəbin 3 hektarlıq ərazisi narkomanların məskən saldığı məkana çevrilib. Məktəbin həyətində istifadə olunmuş şprislər var və şagirdlər burada hər gün təhlükə ilə üz-üzədirlər. Mövcud vəziyyət şagirdləri, onların valideynlərini və məktəbin pedaqoji kollektivini narahat edir. Maraqlıdır ki, şagirdlərin təhlükəsizliyi necə qorunur? Ümumiyyətlə, əlaqədar qurumlar bununla bağlı hansı addımları atırlar?

Yeniavaz.com Xezerxeber.az-a istinadla xəbər verir ki, həm məktəb kollektivi, həm də ətrafda yaşayan sakinlər bu şprislərin narkomanların istifadəsindən sonra bura atıldığını güman edirlər.

Məktəbin direktoru Yaqut Əfəndiyeva deyib ki, 3 hektar ərazisi olan təhsil ocağında 960 şagird təhsil alır. Şagirdlərin təhlükəsizliyini təmin etmək məqsədilə iki giriş qapısı olan bu təhsil müəssisəsinin yalnız ön qapısı istifadə olunur. Zirzəmilərin qapısı isə dəmir çərçivələrlə qapadılıb.

Məktəbin kollektivi vəziyyətlə bağlı həm Elm və Təhsil Nazirliyinə, Yasamal Rayon İcra Hakimiyyətinə və ərazidəki 29-cu polis bölməsinə müraciət edib.

Məsələ ilə bağlı DİN-in şöbə rəisi Elşad Hacıyev qeyd edib ki, həmin əraziyə fasiləsiz xidmət aparan naryad qrupları təhkim olunub. Polisin keçirdiyi tədbirlər nəticəsində narkotik vasitələrin qanunsuz dövriyyəsində şübhəli bilinən 7 nəfər müəyyən olunaraq cinayət məsuliyyətinə cəlb olunub. Hazırda cinayət işi üzrə istintaq hərəkətləri davam etdirilir.

Ətraflı videomaterialı təqdim edirik:

Sosial Xidmətlər Agentliyinin Qarabağ qazilərinə xidmətdən imtina etməsi özbaşınalığına heç kim hüquqi qiymət verilməsini təmin etmir, ya da etmək istəmir. Özbaşınalıq o həddə çatıb ki, qazilərin sanatoriya-kurort müalicəsinin təşkil edilməsindən də imtina edilir. İmtinanın əsası kimi Nazirlər Kabinetinin 12.08.2002 tarixli qərarı ilə əlilliyə görə pensiya alan hərbi qulluqçuların sanatoriya-kurort putyovkaları ilə təmin edilməsinin ƏƏSMN -in səlahiyyətləri xaricində olması göstərilir. Bəs kimin səlahiyyətləri daxilindədir? Buna isə aydınlıq gətirilmir.
Sosial Xidmətlər Agentliyinin açıq-aşkar qanuna, Konstitusiyaya hörmətsizliyi üzə çıxır. Məsələ bundadır ki, NK qərarı Prezident fərmanından, fərman isə qanundan üstün ola bilməz. Prezidentin 30.06.2020 tarixli “ Əmək və Əhalinin Sosial Müdafiəsi Nazirliyinin fəaliyyətinin təmin edilməsi ilə bağlı bir sıra tədbirlər haqqında” 1077 saylı fərmanı ilə təsdiq edilmiş Sosial Xidmətlər Agentliyinin Nizamnaməsinin 3.1.11 və 3.1.12 maddələrində əlilliyi olan şəxslərin reabilitasiyası ilə bağlı tədbirlər görmək; vətəndaşların sanatoriya – kurort putyovkaları ilə təmin olunmasını TƏŞKİL ETMƏK Sosial Xidmətlər Agentliyinin vəzifələrinə aid edilib . Agentlik isə Prezidentin fərmanını saymır. Eyni zamanda, “Vətəndaşların müraciətləri haqqında” qanunun tələbinə görə, müraciətə baxan subyektlər və ya onların vəzifəli şəxsləri müraciətdə irəli sürülən məsələlərin həlli onların səlahiyyətinə aid olmadıqda, müraciəti üç iş günündən gec olmayaraq aidiyyatı üzrə göndərməli və bu barədə müraciət edənə məlumat verməlidir . Sosial Xidmətlər Agentliyinin qanuna hörmətsizliyi ilə Konstitusiyaya , Konstitusiyanın qarantı olan Prezidentə də sayğısızlığı üzə çıxır.
Konstitusiyanın 129-cu maddəsinə görə, məhkəmə qərarları dövlətin adından çıxarılır və icrası məcburidir. Məhkəmə qərarlarının icra olunmaması qanunla müəyyən edilmiş qaydada məsuliyyətə səbəb olur. ƏƏSMN tabeliyində Sosial Xidmətlər Agentliyi isə dövlətin adından çıxarılan məhkəmə qərarını 7-ci ildir icra etməkdən qərəzlə imtina edir. Bakı İnzibati Məhkəməsinin 20.06.2016 tarixli , 2-1 (81)-1095/16 saylı qərarı ilə 1-ci dərəcəli Qarabağ qazisinin iki əlil elmi işçisi olan dörd ayrı ailədən ibarət on nəfərlik ailəsi yeddinci ildir dövlətin adından çıxarılan məhkəmə qərarının icrasına nail olub mənzillə təmin oluna bilmir. Nə Ombudsman qanunla üzərinə qoyulan məhkəmə qərarlarının VAXTINDA icra olunmamasına görə pozulmuş insan hüquqlarını bərpa edir, nə məhkəmə İnzibati Prosessual Məcəllənin 216-220 maddələrinin tələblərinə uyğun olaraq borclu inzibati orqana icranın məcbur edilməsi üçün sanksiyalar tətbiq edir; Bakı İnzibati Məhkəməsi heç tələbkar 1-ci dərəcəli Qarabağ qazisinin ərizələrinə belə qeyri-prosessuallıqla baxmır. Baş prokuror yanında korrupsiyaya qarşı mübarizə baş idarəsinin özbaşınalığa özbaşınalıqla qiymət vermə(mə)si də barəsində şikayət edilən qurumla qeyri-prosessual münasibətə girməsindən qaynaqlanır. Təsəvvür edin, tələbkarın borclu Sosial Xidmətlər Agentliyinin Bakı şəhəri, Nizami rayonu, Çobanzadə küçəsində əlil və şəhid ailələrinə tikilən evin rüşvətlə gizlin bölünməsindən 161-ə şikayətinə Ombudsmanın işə qarışmasının sonucu olaraq 2 ildən sonra (?) 09.09.2021-ci ildə izahatı alınmaqla “baxılıb” və 13 aydır özünü Rəşad Məmmədov kimi təqdim edən prokurorluq əməkdaşının nə özü tapılır, nə də qərarı. Belə bəlli olur ki, korrupsiyaya qarşı mübarizə idarəsinin əməkdaşı rüşvətlə cinayəti ört- basdır edir. Ədliyyə Nazirliyinin icra məmurlarından heç danışmaq mümkün olmur , rüşvətlə tələbkarı borclu çıxarıb, həbslə tələbindən imtina etdirirlər. Qalır dövlətin birinci şəxslərinin dövlət adından qarantiyası.
2022-ci ilin 10 iyununda 1-ci vitse-prezidentin katibliyinin rəisi Altay Həsənovun qəbulunda olan 1-ci dərəcəli Qarabağ qazisi ailəsinin şikayəti Ədliyyə Nazirliyinə və ƏƏSMN -ə göndərilib . Bu günlərdə - 4 aydan sonra (?) Sosial Xidmətlər Agentliyinin sədri Vüqar Behbudov hətta şərəfinə sığışdırıb cavabı imzalamaqdan da imtina edib, müavini Zaur İbrahimov bir sicilləmə cavabla 1-ci vitse-prezidentə hörmətsizliyini elə ortaya qoyub ki, dövlətə də, onun başçılarına da Konstitusiyaya da inam ölüb. (ƏƏSMN RƏHBƏRLİYİNƏ XATIRLADIRIQ ki, ALİ DÖVLƏT HAKİMİYYƏTİ ORQANLARINDAN DAXİL OLAN MÜRACİƏTLƏRƏ CAVABI qanunun tələbinə görə QURUMUN BAŞÇISI İMZALAMALIDIR). Təsəvvür edin, Sosial Xidmətlər Agentliyi 2016-cı il tarixli məhkəmə qərarının 7 il qabaq (?) icra olunduğunu bildirib, Naxçıvan “Duzdağ” fizioterapiya mərkəzində reabilitasiyanın isə Bakı İnzibati Məhkəməsinin qərardadı ilə mümkün olmadığını vurğulayıb. Buna da şükür, 7 il qabaq müalicə olunmağı əsas tutmayıb.
ƏƏSMN tabeliyində Sosial Xidmətlər Agentliyinin xidmətdən imtinasının məhkəmə bazarlığına son qoyan olacaqmı? Ümumiyyətlə, xidmətdən imtina edən, qaziləri intihara sürükləyən Sosial Xidmətlər Agentliyinə ehtiyac varmı? Ondansa, “sosial intiharlar xidməti” daha məqsədəuyğun olardı. .
Məğrur Bədəlsoy

Bu ilin iyul ayının 16-da Dövlət Gömrük Komitəsinin sədri Səfər Mehdiyev işdən çıxarıldı. Avqustun 8-də isə ölkə mediasında S.Mehdiyevin idarə etdiyi avtomobilin yol polisi tərəfindən saxlanılmasını əks etdirən görüntülər yayıld. 90-AA-978 dövlət qeydiyyat nişanlı “Mercedes Gelandewagen” markalı avtomobili saxlanılması zamanı sabiq gömrük generalının yol polisləri ilə kobud davrandığı görünürdü.

Maraqlıdır ki, 90AA978 dövlət qeydiyyat nişanlı avtomobil nə DGK-ya, nə də Səfər Mehdiyevə məxsus deyildi. Gundeminfo.az-a daxil olan məlumata əsasən sabiq sədr adətən özünə məxsus olan və ölkə gömrüyündə böyük imtiyazlara sahib olan şirkətlərə məxsus bahalı, lüks avtomobillərdən istifadə edir.

Elə 90AA978 qeydiyyat nişanlı avtomobil də S.Mehdiyevə məxsus, lakin rəsmi sənədlərdə başqa bir iş adamının adına olan həmin lüks avtomobillərdən biri idi.
Mənbə iddia edir ki, “Vadi MMC”yə məxsus olan bu avtomobil, əslində elə Səfər Mehdiyev tərəfindən yaradılmış və gömrükdə xüsusi imtiyazlara malik şirkətə məxsus olub.

Araşdırmalar zamanı məlum olub ki, həmin bahalı avtomobil "Vadi-4" MMC adlı şirkətin üzərinə qeydiyyatdadır. MMC-nin qanuni təmsilçisi Nəsir Məhərrəm oğlu Cəfərovdur. O isə Dövlət Gömrük Komitəsinin sabiq sədri, gömrük xidməti general-polkovniki Səfər Mehdiyevin həmkəndlisi, Naxçıvanın Babək rayonu Nehrəm kəndinin sakini və S.Mehdiyevin qohumudur.

Gömrük Komitəsinin sədri olduğu dönəmdə məhz vadi.az karqo daşımaçılıq şirkətinə böyük imtiyazlar verilibmiş. Məlumatlara əsasən bəyan edilən məhsullar digər karqo şirkətlərinin məhsullarından daha sürətlə gömrükdən keçə bilirmi. “Vadi” çuvalları (bir çuvalda 70 bağlama olur) heç bir maneə olmadan daxili anbarlara çata və bir gün sonra müştəriyə verilirmiş. Rəqabət mühitində “Vadi” daha sürətlə çalışır və digər karqo şirkətləri ilə müqayisədə tarifləri çox aşağı olaraq təklif edib. “Qrama-qram” kampaniyası ilə bazarda aldığı xüsusi imtiyazlar hesabına bui karqo şirkəti ciddi uğurlar əldə edib.
Səfər Mehdiyev öz “Vadisi”ndə pusuya düşdü
Lakin Səfər Mehdiyevin vəzifəsindən azad edilməsindən dərhal sonra adıçəkilən şirkətə verilmiş “imtiyazlar” ləğv edilib. Redaksiyamıza danışan “Vadi” müştəriləri bildirir ki, artıq onlar həmin şirkətin qiymətləri kəskin bahalaşdırması səbəbindən imtina edirlər. Artıq bir aydan da çoxdur ki, qeyd etdiyimiz və Səfər Mehdiyevə məxsus olduğu iddia edilən “Vadi”də karqo qiymətləri bahalaşıb. “Standrt tarif” olaraq tətbiq edilən qiymətlər isə kütləvi olaraq narazılıqlara, müştərilərin isə həmin şirkətdən üz döndərməsinə səbəb olub.

Bundan başqa saytımıza daxil olan informasiyaya əsasən qeyd edilən şirkətdə artıq gömrükdə bəyan etmə, çuvallara baxış keçirilməsi də ləngiyib. Bildirilir ki, son bir ayda bir neçə dəfə daxili anbarlara təslim alma prossedurunda problem olduğuna görə, həmin karqo şirkətinin işçilərinə gömrük məntəqələrinə dəvət ediblər.
Onu da əlavə edək ki, karqo bazarında inhisarçılıq olmasına dair yerli mediada dəfələrlə məlumatlar yayılıb. Əsasən də Səfər Mehdiyevin yaxın qohumları, dostları və həmkəndliləri tərəfindən bu sektorun inhisara alınması narazılıqlara səbəb olurdu. Hazırda DGK-nın yeni sədri Şahin Bağırovun bu sektorda hansı yenilikləri edəcəyi, bu sahədə normal rəqabət yaradıb-yaratmayacağı da bəlli deyil. Çünki DGK hər zaman olduğu kimi media üçün qapılarını bərk-bərk qıfıllayır.
Mövzu ilə bağlı araşdırmalarımız davam edəcək. Qarşı tərəfin də mövqeyini dinləməyə hazırıq. //Gundeminfo.az//