 |
|
|
VI çağırış Milli Məclisin deputatı Hicran Hüseynova və bacısı Fransada dəniz sahilində 5 milyon avroluq villanı buldozerin qabağına verib yerində kompleks tikdirir.
Bu barədə araşdırmaçı jurnalist Cavanşir Həsənli məlumat yayıb.
O bildirib ki, tikinti ilə bağlı bələdiyyə sənədinə görə kompleksdə iki villa, iki hovuz, yeraltı qaraj və qonaqlar üçün evin inşası nəzərdə tutulur.
Ağcabədi Pedaqoji Kollecində tələbəyə diplom bir ildir ki, verilmir.
Redaktor.az bu barədə elektron poçtuna baş verən neqativ halla bağlı şikayət məktubu daxil olduğunu xəbər verib. Həmin xəbərə görə, Xəlilova Aysu Vüqar qızı 2019-cu ildə həmin kollecin məktəbəqədər təhsil ixtisasına qəbul olub, 2023-cü ildə isə başa vurub. Lakin üstündən 1 ildən çox keçməsinə baxmayaraq, diplomunu ala bilmir.
Şikayətçinin atası Vüqar Xəlilov dəfələrlə kollecin rəhbərliyinə müraciət etsə də, diplomun aqibəti barədə məlumat yoxdur.
O bildirib ki, kollecin direktor köməkçisi Könül xanıma, dekan Aynur Babayevaya, təlim-tərbiyə rəhbəri Rövşən Bayramova müraciət edib. Ancaq onlar Vüqar Xəlilova hər dəfə “tezliklə veriləcək” deyərək onu geri qaytarıblar. Odur ki, şikayətçi qızının diplomunun verilməsi üçün mətbuatdan kömək istəməyə məcbur olub.
Məsələ ilə bağlı Redaktor.az-ın əməkdaşı Ağcabədi Pedaqoji Kollecinin məsul şəxslərindən biri Şahin Nəbili ilə bir neçə dəfə əlaqə saxlayıb və o, hər dəfə bildirib ki, diplomda kod səhvliyi olduğuna görə yeni diplomun verilməsi üçün nazirliyə müraciət olunub. Sonuncu zəngimizdə isə Şahin Nəbili bizə səs tonunu qaldıraraq, “kimə istəyirsiniz, hətta nazirliyə şikayət edin. Məsələ məni maraqlandırmır”, – deyərək telefonu söndürüb.
Məsələ ilə bağlı Elm və Təhsil Nazirliyinin mətbuat xidməti ilə əlaqə saxladıqda isə oradan bizi Elm və Ali Təhsil üzrə Dövlət Agentliyinin Sənədlərlə və müraciətlərlə iş sektorunun baş məsləhətçisi Osman Əşrəfova yönəltdilər.
İlk vaxtlarda Osman Əşrəfov problemin həlli ilə maraqlanacağını desə də, daha sonra o da məsələdən qaçıb. Bizim müraciətimizə cavab olaraq, əvvəlcə kollecdən sənədlərin gəlmədiyi üçün diplomun gecikdiyini bildirdi, daha sonra isə təzadlı olaraq, diplomda əslində mətbəə səhvlərinin olduğunu qeyd etdi. Hazırda isə o, bizim nə zənglərimizə, nə də mesajlarımıza cavab verir.
Göründüyü kimi elm və təhsil naziri Emin Əmrullayevin gənc kadrları nəinki adi vətəndaşların, hətta jurnalistlərin belə müraciətlərinə etinasız yanaşırlar.
Əvvəla axı niyə bir dövlət sənədində səhvə yol verilib? Əgər bu səhv varsa, onu aradan qaldırmaq, yeni diplom vermək niyə bu qədər uzanır? Kiçik bir məsələ bir ildir niyə həllini tapmır? Bəlkə diplomda mətbəə səhvliyi yox, başqa bir müəmma var? Osman Əşrəfovu Ağcabədi Pedaqoji Kolleci ilə nə bağlayır ki, onların səhvini ört-basdır edir, suallarımızdan yayınır?
Axı həmin kollecin məzununun hardasa işə qəbulu üçün ona diplom lazımdır. İndi Aysu Xəlilova daha nə qədər gözləməlidir ki, onun diplomu hazır olsun?
Qusar rayon İcra Hakimiyyəti Başçısının Qusar şəhər İnzibati Ərazi üzrə Nümayəndəliyi tenderinin nəticələrini elan edib. XALQ.AZ xəbər verir ki, tenderin qalibi “Topxana Layihə İnşaat” MMC olub.
Şirkətlə 8.850 manat məbləğində müqavilə imzalanıb. Qusar Rayon İcra Hakimiyyəti Qusar şəhər İnzibati Ərazi üzrə Nümayəndəliyi sifarişi ilə Qusar MİM-nin balansında olan H.Əliyev pr 146 saylı binanın təmir işlərinin layihə smeta sənədlərinin hazırlayacaq.
Şübhəli məqam budur ki, adicə layihə smeta sənədlərinin hazırlanması üçün 8.850 manat fantastik rəqəm deyil mi?
“Topxana Layihə İnşaat” MMC elmi araşdırma apararaq layihə smeta hazırlayacaq. Bunula bağlı adı çəkilən qurumların mövqeyini öyrənmək mümkün olmadı.
Yenə Azərbaycanda daha bir həkim səhvi daha bir insanı ömürlük şikəst etdi.
Belə ki, Məlhəm klinikasının həkimi, aktyor Əlvan Fərmanoğlunun dərdinə məlhəm etmək əvəzinə, onun ayağının ampitasiya olunmasına səbəb olub. Hər halda özünün aktyorun iddiası belədir.
Doğrusu, inanılmayacaq kimi də deyil.
Çünki, son illər ağ xalatlıların pul hərisliyi, daha çox gəlir əldə etmək ehtirası çox insanların bədbəxtliyinə səbəb olur.
Bir çox həkimlərin apteklərlə, başqa özəl klinikalarla və eləcə də dərman firmaları ilə əlbir olmaqları da bir çox ailələrə faciə yaşadır.
Eynilə Modern Hospitalın həkimi Elvina Səlimova ilə Memorial Hospitalının "iş birliyinin, redaksiyamıza müraciət edən Vüsalə Əliyevanın yeniyetmə qız övladına və ümumilikdə bütün ailəsinə yaşatdığı faciə kimi.
Maraqlıdır ki, edirlər, sonra da başlayırlar vətəndaşa hədə-qorxu gəlməyə ki, "Mənim həkim nüfuzuma xələl gətirdiyinə görə məhkəməyə verəcəm" filan...
Necə ki, Modern Hospitalın "həm suçlu, həm güclü" həkimi Elvina Səlimova bunu edirdi. O, Elvina Səlimova ki, təcili yardım otağında bir dənə xala görə əməliyyat etdiyi yeniyetmə Leyla Məhərrəmlini xalının altında aşkar edilmiş kütləyə görə məhz Memorial hospitala göndərmişdi. Memorial hospital da yanlışlıqla "xərçəng" diaqnozu qoyaraq, yeniyetmənin həm yanlış müalicələr almasına səbəb oldu, həm də ailəsinə külli miqdarda maddi və əvəzi ödənilməyəcək qədər mənəvi ziyan vurdu.
Leylanın anasının sözlərinə görə, bu iki hospitalın "şərikli" yaşatdıqları stresin təsirindən çıxa bilmək üçün bir ildir mərhələli şəkildə ailənin bütün üzvləri müalicə alır.
Artıq, ikinci dəfədir belə halın yaşandığını özü etiraf edən Memorial klinik isə ümumiyyətlə cavab verməkdən də, məsuliyyətdən də yayınır.
Mənəvi ziyanın ödənilməsinin mümkünsüzlüyünü bu qədər ağrı-acı yaşamasına rəğmən qəbul edən anlayışlı ana - Vüsalə Əliyeva heçolmasa maddi ziyanı geri tələb etmək üçün Memorial hospital rəhbərliyi ilə görüşüb. Özünü direktor kimi təqdim edən Füzuli Məmmədov, bu qədər əzab yaşatdıqları anaya anlayışı üçün təşəkkür etmək yerinə, biraz da həddini aşaraq, "Belə çıxır ki, sən uşağını satırsan" cavabını verərib və elə bununla da növbəti mənəvi zərbəni endirib.
Halbuki, Vüsalə xanım haqlı olaraq, sadəcə ona dəymiş maddi ziyanı tələb edirdi.
Görünür, Füzuli Məmmədov ilə Elvina Səlimovanın məqsədləri - eləcə də diaqnozları kimi yanlış olan davranışları, xanımı hər iki hər iki hospital barəsində məhkəmə iddiası qaldırmağa vadar etməkdir.
Vüsalə xanım artıq məhkəməyə müraciət etmək fikrindədir.
Madam ki, "güvəndiyi dağa da qar yağdı"- daha dəqiq desək, aidiyyatı qurum olan Səhiyyə Nazirliyi özü də özəl hospitallara. "tam sərbəst"lik verib, şikayət edənə" hüquqi məsləhət" verib, hüquq-mühafizə orqanlarına müraciət etməyi tövsiyyə edir, demək ki, başqa variant yoxdur.
Mövzunu davam etdirəcəyik.
Redaksiamız hər kəsin söz haqqını tanıyır.
DogruXeber.az
Sentyabrın 1-də ölkədə növbədənkənar parlament seçkiləri keçirildi. Etiraf edək ki istər siyasi aktivlik,istərsə də seçici fəallığı baxımından əvvəlki seçkilərdən zəif təsir bağışlayan bu marafonda bu adı haqq edən,yaxud etməyən 125 şəxs deputat oldu. Onların böyük əksəriyyəti demək olar ki, seçki kompaniyası keçirmədi,ya da buna bənzər sönük bir tədbirlə baş qatdılar. Nə deyək, cənab deputatların yəqin bir bildikləri vardır. Amma təbliğat-təşviqat kompaniyasında aid oldu-olmadı onların əvəzinə canfəşanlıq edənlər tapıldı.
Əlqərəz,keçək söhbətin mustafasına. Deputat adı qazananlardan biri də adı Azərbaycan təhsil sistemində hələ uzun illər xatırlanacaq Mehriban Vəliyevadır. Onun təhsil sahəsində hansı "uğurlara" imza atdığını görmək üçün medya üzərindən qısa bir araşdırma aparmaq kifayətdir. Nə isə,bunu da buraxaq əlahəzrət zamanın ixtiyarına. Amma deputat olmazdan öncə təjsil sektorunda onun adına hələ ki sonuncu qanunsuzluğa imza atıldı. Belə ki, Təhsil nazirinin müşaviri Elnur Nəsibov seçki məcəlləsinin, əmək məcəlləsinin tələblərini pozaraq,vəzifə səlahiyyətlərini aşaraq M. Vəliyevanın seçki təbliğatını aparıb.
Özünün rəsmi Facebook hesabında Sumqayıtda olan bütün dostlarını və "həmkarlarını" Mehriban xanıma səs verməyə çağıran E.Nəsibov ya özünü dövlət qulluqçusu hesab eləmir,ya dövləti ozünün qulluqçusu sanır,ya da qanunları adicə kağız parçası bilir.
Vəzifəli şəxsin açıq-aşkar tabeliyində olan şəxsləri,yəni "həmkarlarını" kiməsə səs verməyə çağırması təkcə qanun pozuntusu deyil,həm də dövlətin imicinə zərbə vuran əməldir.
74.4. Seçkiqabağı təşviqatın aparılması, seçkiqabağı hər hansı təşviqat materiallarının yayılması aşağıdakılara qadağan edilir:
74.4.1. bu Məcəllənin 90.2-ci maddəsində göstərilən subyektlərə (bu Məcəllənin 12.2-ci və 12.3-cü maddələri nəzərə alınmaqla);
74.4.2. öz vəzifələrini və ya xidməti vəzifələrini yerinə yetirərkən, həm də vəzifəsindən və ya xidməti üstünlüyündən istifadə etməklə dövlət orqanlarında, idarələrində, təşkilatlarında və ya bələdiyyə orqanlarında və təşkilatlarında vəzifədə olan şəxslərə, dövlət və bələdiyyə qulluqçularına, hərbi qulluqçulara;
Qanunverici orqanda əyləşən xanım hələ "bismillah" eləməmiş bu qanun pozuntusuna göz yumursa sonrasından Allah saxlasın. Ən utancvericisi də budur ki o boyda müşavirin hay harayından sonra dairələr üzrə ən az səs toplayaraq Mehriban Vəliyeva deputat ola bilib
Mehribanlıq səadətdir,əziz seçicilər,bilirsiniz də...
Nicat Mahmudov - Rubrika.Az
Məlum qatarın aşması hadisəsindən sonra, bunun kimi və ya daha təhlükəli halların qarşısını almaq üçün, daha bir təhükəli halı aşkara çıxarmaq məqsədəuyğun olardı.
Belə ki, hal-hazırda dəmir yollarında əsaslı yenidənqurma işləri gedir və bunun üçün dövlət tərəfindən külli miqdarda maddi vəsait ayrlıb. Lakin bu vəsaitin hara sərf olunduğu məlum deyil.
TEREF yazır ki, bunları bloqumuza göndərilən məktubda müəllif yazır. Daha sonra müəllif yazır:
Misal üçün, məlum qatarın aşması hadisəsinin baş verdiyi Sumqayıt-Yalama sahəsidə işarəvermə xəttinin çəkilməsi məqsədi ilə kabelin alınması üçün külli miqadarda maddi vəsait ayrılıb. Lakin bu vəsait müəmmalı şəkildə yoxa çıxıb. İnfrastruktur Departamentinin rəhbərliyi bu yeyintini örtbasdır etmək üçün görün necə üsul fikirləşiblər. Yeraltı kabel əvəzinə işarəvermə xəttini yerüstü kustar üsulla quraşdırılmış yüksək gərginlikli dirəklərə birləşdirək köhnə məftillə çəkiblər. Nəticədə çox təhükəli bir vəziyyət yaranıb. Amma görünür ki, Dəmir Yollarının rəhbərliyi insanların həyatını, ölkənin mənafeni öz şəxsi maraqlarına və tamahlarına qurban verirlər. Eləcədə digər qurğular və cihazalrda yenilənməli olduğu halda, köhnə cihazların üzəridə müxtəlif kosmetik prosedurlar aparılaraq yeniləri kimi təqdim olunur. Belə olduğu halda qatarın aşması hadisəsinin təkaralanacağı və ondanda təhlükəli hadisələrin baş verəcəyi qaçılmazdır.
QEYD: Adları çəkilən şəxs və qurumların mövqeyini dərc etməyə hazırıq!
TEREF
Lerik Rayon İcra Hakimiyyəti daxili avtomobil yollarının əsaslı təmir işləri bağlı elan etdiyi tenderə yekun vurub.
Qaynarinfo xəbər verir ki, tenderin qalibi "Elnur-2" İstehsalat Kommersiya Şirkəti seçilib. Təmir işlərinə görə şirkətə 608 159,49 manat ödəniləcək.
"Elnur-2" İstehsalat Kommersiya Şirkəti 11 fevral 1994-cü ildə qeydiyyata alınıb. Nizamnamə kapitalı 1.60 AZN şirkətin hüquqi ünvanı Bakı şəhəri Binəqədi rayonu, Süleyman Sani Axundov küçəsi, ev 11/35, mənzil 57-də yerləşir. "Elnur-2”nin qanuni təmsilçisi isə Abıyev Zaur Niyaz oğludur.
"Elnur-2" şirkəti "tender kralı" kimi tanınır. Şirkətin sifarişçiləri əsasən yerli icra hakimiyyətləridir.
Zaur Abıyevə gəlincə, onun adı "MTN işi"ndə zərərçəkən kimi keçir. Onun ifadəsinə görə, "Texnikabank"dan 620 min manat pul götürüb çıxarkən MTN əməkdaşları tərəfindən saxlanılıb. Sərəbəst buraxıldıqda isə məlum olub ki, pulun üzərindən 200 min manat əskikdir.
"Elnur-2" şirkəti 2023 və 2022-ci illərdə də Lerik Rayon İcra Hakimiyyətinin avtomobil yollarının əsaslı təmiri ilə bağlı elan etdiyi tenderlərin qalibi seçilib. Bu tenderlər üzrə satınalma müqavilələrinin ümumi maliyyə dəyəri 1 170 561,47 manatdır. Tenderlərdən belə məlum olur ki, Lerik Rayon İcra Hakimiyyəti hər il avtomobil yollarını əsaslı təmir edir.
Lerik Rayon İcra Hakimiyyətinin başçısı Əkbər Abbasovdur. O, 2022-ci ildən rayona rəhbərlik edir.
Mərkəzi Seçki Komissiyasının (MSK) ilkin nəticələrinə görə 97 saylı Tərtər-Ağdərə-Goranboy Seçki Dairəsindən deputatlığa namizəd Anar Məmmədov qalibdir. Tribunainfo.az bildirir ki, bu dairədən onun rəqibləri Qələndər Muxtarlı və Şəhriyar Məcidzadə isə seçki günü məntəqələrdə baş vermiş qanun pozuntularına, “karusel”llərə dair video görüntülər paylaşmaqdadır.
MSK sədri Məzahir Pənahov son iclasda bildirib ki, edilən şikayətlərin hamısı araşdırılacaq. İstisna deyil ki, bəzi dairələrdə nəticələr ləğv olunsun. Sözügedən 97 saylı Tərtər-Ağdərə-Goranboy Seçki Dairəsinin ayrı-ayrı seçki məntəqələrində qeydə alınan saxtakarlıq faktları ilə bağlı MSK-ya olunan şikayətlər əsasında nəticələrin ləğvi istisna edilmir. Həmin kadrlarda təsdiq olunur ki, məntəqələrə maşınlarla adam daşınır, “karusel” təşkil edilir, qutulara topa bülletenlər atılır, seçki yaşı çatmayan uşaqlar belə səsverməyə cəlb edilir, ayrı otaqda gizli formada səsvermənin nəticələri sayılır və hesablanır… İndisə 97 saylı Tərtər-Ağdərə-Goranboy Seçki Dairəsi üzrə məntəqələrdə baş verən aşkar qanun pozuntularını təqdim edirik:
Bakı şəhər sakini Tərlan Məmmədov tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, tanışı Paşayev İlqar Yadulla oğlu (Paşayev İlham Yadulla oğlu) özünü Təhsil Nazirliyinin əməkdaşı kimi təqdim edərək, 8 min manat pulunu mənimsəyib
“Hörmətli redaksiya!
Yazaraq sizdən xahiş edirəm ki, problemimi işıqlandırasınız.
Deməli, MİQ imtahanları başlayan vaxt, qohumluğumda olan şəxs məndən Təhsil Nazirliyində tanışımın olub-olmadığını soruşdu. Qohumum istəyirdi ki, istədiyi yerə düşsün, bu səbəbdən də nazirlikdə ona kömək edəcək şəxs axtarırdı. Bu vaxt mən adını İlqar bildiyim tanışımla əlaqə saxladım. O, mənə özünü Səməd Seyidovun qaynı kimi təqdim edərək, bildirdi ki, narahat olma, həll olunası məsələdir. Bu işin icrası üçün bizdən 8 min manat tələb etdi. Biz də həmin məbləği ona verib, problemin həll olunmasını gözlədik.
Lakin cavablar çıxdı, qohumum imtahandan keçərək, başqa bir yerə düşdü. Qohumum bu işin baş tutmadığı üçün verdiyi pulu tələb etdi. Mən də İlqar adlı şəxsə zəng vurub pulu geri istədim. “Mənə bildirdi ki, mən Səməd Seyidovun (Xarici Dillər Universitetinin keçmiş rektoru – müəl.) qohumuyam, get əlindən gələni et”. Həmin vaxtdan etibarən biz ondan pulu ala bilmirik”.
Məsələ ilə bağlı Paşayev İlqar Yadulla oğlu (Paşayev İlham Yadulla oğlu) ilə əlaqə saxlamağa çalışdıq. Telefon zənglərimiz cavabsız qaldı, daha sonra isə telefonuna zəng çatmadı.
Jalə FAMİLQIZI
Redaksiyadan: Qarşı tərəfin mövqeyini dərc etməyə hazırıq.