Redaksiyamıza bir ADAU-nun bir qrup professor-müəllim heyəti adından müraciət daxil olub. Bəzi şəxsi məsələlərə toxunulan hissələri çıəxardaraq
şikayətin birinci hissəsini oxuculara təqdim edirik:
Bir neçə gündür ki, sosial şəbəkələrdə Şəlalə Zeynalovanın Azərbaycan
Dövlət Aqrar Universitetində ilk xanım dekan təyin olunması haqqında xəbərlər
tirajlanır.
Məlumat üçün bildirmək istəyirik ki, Ali təhsil müəssisələrində dekan
vəzifəsinə seçkilərin keçirilməsi qaydalarına görə, ali məktəblərdə fakültə
dekanı vəzifəsinə həmin fakültədə kadr hazırlığı aparılan ixtisaslara uyğun, ən
azı 5 il elmi-pedaqoji təcrübəyə və peşə-ixtisas hazırlığına, elmi ad və elmi
dərəcəyə malik həmin ali məktəbin ştatında olan professor və ya dosentlər
arasından seçilməlidir. Şəlalə Zeynalova isə 2006-cı ildə Kənd Təsərrüfatı
Nazirliyi yanında Respublika Baytarlıq Laboratoriyasının virusologiya şöbəsində
aparıcı baytar həkim kimi işə qəbul olunmuş, daha sonra isə Bakteriologiya və
Virusologiya şöbələrinin müdiri işləmiş və 2016-cı ildən isə Bakıda yerləşən
həmin laboratoriyada direktor müavini vəzifəsində işləyir. Göründüyü kimi Şəlalə
Zeynalova universitetdə ştatda olmadığından, bu xanımın dekan təyin olunmağı
(dekan seçilir, təyin olunmur) təlimata tamamilə ziddir.

Digər tərəfdən dekan seçki prosesində seçilməlidir, daha rektor Zəfər
Qurbanovla hələ Bakıda işləyərkən tanış olduğuna görə təyin olunmur.
Bu nə biabırçılıqdır???
Kim hansı rəhbər vəzifəyə təyin olunursa, dərhal oranı talamağa, ağlına
gələn qərarları verməyə və oranı ata mülki kimi istədiyi formada idarə etməyə
başlayır. Maraqlıdır ki, Zəfər Qurbanov Şəlalə Zeynalovanı bir gündə 4 kafedranın
hər birində bir saatdan bir müzakirə etdirib dekan kimi əmrini verdi. Həm də bu
xanımı Zahir Ələsgərovun müdir olduğu kafedraya 0,5 ştat müəllim vəzifəsinə də
götürdü.
Zəfər Qurbanov öz maraqları xatirinə bir-birinə uyğun gəlməsə belə
müxtəlif kafedraları birləşdirir. Məlumdur ki, "Meşəçilik" kafedrası çox spesifik
bir kafedradır. Bu gün bütün dünyada qlobal istiləşmə prosesi gedir. Onun
qarşısının alınması, ekoloji tarazlığın qorunması, torpaq sürüşmələri, yağıntıların
miqdarının artması, sel, daşqın və s-in qarşısının alınmsı üçün meşələr çox
vacibdir. Bu kafedraya isə ulu öndər Heydər Əliyevin göndərişi ilə Rusiyada təhsil
almış, keçmiş İttifaq miqyasında tanınmış insan Vidadi Səmədov rəhbərlik edirdi.
Vidadi Səmədov tələbələr ttərəfindən sevilən, savadlı və həddindən artıq tələbkar
müəllimdir. Zəfər Qurbanovun özbaşınalıqlarına etiraz etdiyi üçün rektor onun
rəhbərlik etdiyi kafedranı ləğv edərək korrupsioner, adı saxta diplom satışı və saxta
tələbə qəbullarında hallandırılan Musa Bayramovun kafedrasına birləşdirdi.
Eləcə də "Texniki mexanika" və "Maşın mühəndisliyi və standartlaşdırma"
kafedraları da bir-birinə uyğun gəlməsə də Zəfər Qutbanov tərəfindən
birləşdirilməyə məruz qalıb. Habelə, "Elektroenergetika" və "Elektrik
mühəndisliyi" kafedraları da birləşdirilib. Birləşdirilən kafedralar üçün müdirlik
vəzifəsi auksiona çıxarılb.
Rektor Zəfər Qurbanov son iki ayda universitetdə cəmi 8 dəfə olub. Həmişə
xarici ölkələrdə gəzməkdədir. Türkiyədən vurur Avstriyadan çıxır. Hal-hazırda isə
on gündən artıqdır ki, Portuqaliyadadır. Universitet əməkdaşları iyul ayının 15-dən
məzuniyyətə çıxır. Zəfər Qurbanov isə Portuqaliyadan məlumat göndərib ki, heç
kim məzuniyyətə çıxmasın, ayın 15-də Portuqaliyadan qayıdıb Uçxozda Elmi Şura
keçirəcəm. Universitetin kifayət qədər iclas zalları olduğu halda, uzaq bir yerdə
Günəşin altda, çölün ortasında Elmi şura keçirməyin görəsən mənası nədir?
Aydındır ki, tibb təhsili olmayan, tibbdən xəbərsiz bir adamı Tibb
Universitetinə rektor qoymaq olmaz. Eləcə də aqrar təhsili olmayan, bu sahəyə tam
yabancı adamın Azərbaycan Dövlət Aqrar Universitetində rektor işləməyi ADAU-
nu məhvə aparır. Faciəli cəhət ondan ibarətdir ki, Zəfər Qurbanovun idarəetmə
işində ətrafına yığdığı şəxslərin əksəriyyəti aqrar sahədən heç bir məlumatı
olmayan insanlardan ibarətdir.
Ardı var.
Hörmətlə, ADAU-nun bir qrup
professor-müəllim heyəti
Adları çəkilən şəxslərin mövqeyini dərc etməyə hazırıq!
TEREF

“Hüquqları Pozulmuş Məhkumların Müdafiəsi və Maarifləndirilməsi” İctimai Birliyi tərəfindən redaksiyamıza daxil olan məktubda, Prezident İlham Əliyevə və surəti Birinci-Vitse Prezidentə, Məhkəmə Hüquq Şurasının sədri İnam Kərimova, Baki şəhəri Xəzər Rayon Məhkəməsinin sədri Şeyda Məhərrəmovaya və hakim Ramilə Xəzriyə olmaqla müraciət edən İctimai Birlik, bəzi Firon hakim və sədrlərin qanunsuz hərəkətlərinə nə vaxtsa son qoyulacaqmı, bu zaman nə vaxt çatacaqdır, bunun üçün nə etməliyik, deyə bilgi almaq istəyən şikayətçi, eyni zamanda, Xəzər Rayon Məhkəməsinin hakim və sədrinin Fironluğundan, qanunsuz hərəkətlərindən məlumat verir. Müraciəti olduğu kimi dərc edirik.

Hörmətli cənab Prezident! ​​​​

30 il Azərbaycan dövlətinin ərazi bütövlüyünün pozuldugunu, 20% torpaqlarının işğal altında olduğunu, milyonlarla dinc vətəndaşlarımızın qaçqın düşdüyünü, minlərlə vətəndaşlarımızın girov götürüldüyünü, itgin düşdüklərini, öldürüldüklərini bildik. Bilirdik ki, bütün bunların hamısının baiskarı ermənilər və onlara dəstək verən ermənipərəst qüvvələrdir. Nəhayət, dövlətimizin və igid-qəhrəman oğullarımızın səyi nəticəsində, düşmənlər məhv edildi. Beləcə də, 30 ildən sonra torpaqlarımız işğaldan azad olundu. Allahımıza şükürlər etdik.

Hörmətli cənab Prezident!

Ən dəhşətlisi odur ki, son vaxtlar daxildə baş verənləri başa düşə və anlaya bilmirik.Belə ki, bəzi rayonlara təyin olunmuş məhkəmələrin hakim və sədri bir müddətdən sonra, qısa zaman kəsiyində ​ özlərini təyin olunduqları rayonun Fironu hesab edirlər. Açıq-aşkar bildirirlər ki, hakim və sədr təyin edilməmişdən öncə, həmin rayonun yuridiksiyasında yaşayan hüquqi və fiziki şəxslərin Dövlət tərəfindən qanunla qorunan hüquqlarını-haqqlarını pul verib almışlar. Amma, məhkəmənin hakimi və sədri, bütün qərarları Azərbaycan Respublikasının adından çıxarmalarına baxmayaraq, birmənalı pulu qanunun aliliyindən üstün tuturlar. Demək bəzi məhkəmələrin hakim və sədrləri dövlətin də adında sipirkuliyasiya edirlər. Torpaqlarımızı işğal eliyən, 1.500.000 vətəndaşımıza qaçqın həyatı və sairə və ilaxirə yaşadan ermənistan dövləti ilə, 170 min əhalisi olan Xəzər Rayon Məhkəməsinə hakim və sədr təyin edilmiş məhkəmə sədrini müqayisə edəndə görürsən ki, məhkəmə sədri ermənidən 10 çömçə artıqdır. Verdiyi qərarlarla 10-larla ; 100-lərlə ; 1000-lərlə vətəndaşlarımızın evlərini yıxıblar. Ermənilərin qaçqın saldığı vətəndaşlarımızın durumundan, həmin vətəndaşlarımızın durumu 10-dəfə pisdir.

Hörmətli cənab Prezident! ​​​​​

Birləşdik bir olduq, erməni kimi alçaq, şərəfsizləri qovduq, torpaqlarımızı işğaldan azad etdik, 30 illik həsrətə son qoyduq.

Bəs bəzi Firon hakim və sədrlərin qanunsuz hərəkətlərinə nə vaxtsa son qoyulacaqmı? Bu zaman nə vaxt çatacaqdır? Bunun üçün nə etməliyik?

Hörmətli cənab Prezident! ​​​​​

Pulu qanunun aliliyindən üstün tutan, sədri olduğu Rayonun yuridiksiyasında yaşayan vətəndaşların hüquqlarını-haqqlarını, sədr təyin edilməmişdən öncə pulla aldığını iddia edən məhkəmə sədrlərindən biri də Bakı şəhəri Xəzər Rayon Məhkəməsinin hakimi və sədri Şeyda Məhərrəmovadır.

Belə ki, Xəzər Rayonu ərazisində yerləşən, Ədliyyə Nazirliyi Penitensiar Xidməti 17-Saylı Cəzaçəkmə Müəssisəsində cəza çəkən məhkum F.Abdullayev 28 mart 2024-cü ildə AR.CM-nin 60.1-ci maddəsinin barəsində tətbiq edilməsini Xəzər Rayon Məhkəməsindən xahiş edir.

Məhkumun ərizəsi 01 aprel 2024-cü il tarixdə icraata götürülmüş və hakim tərəfindən bir neçə dəfə 08 Aprel 2024-cü il və 26 aprel 2024-cü il tarixlərdə məhkəmə iclasları keçirilmişdir. Nəhayət, hakimin pulu qanunun aliliyindən üstün tutduğuna görən məhkum 26 aprel 2024-cü il tarixdə ərizəsinin baxılmamış saxlanmasını və geriyə qaytarılmasını məhkəmədən xahiş edir. Beləcə də məhkəmə məhkumun ərizəsini baxılmamış saxlamışdır.

Hörmətli cənab Prezident! ​

Məhkum Xəzər Rayon Məhkəməsinə təkrar müraciət edir. Məhkumun ərizəsi növbəti dəfə Xəzər Rayon Məhkəməsində 31.05.2024-cü il tarixdə 821 nömrə ilə qeydiyyata alınmış və icraata götürülmüşdür. Hakim tərəfindən 07.06.2024-cü il tarixə təyin edilmiş birinci məhkəmə iclasında, növbəti məhkəmə iclasının vaxtı 14.07.2024-cü il tarixə keçrilmişdir.

Hörmətli cənab Prezident! ​​​​

12.06.2024-cü il tarixdə Xəzər Rayon Məhkəməsində olmuşam. Araşdırmamızın nəticəsində məlum olmuşdur ki, məhkəmənin hakim və sədri məhkumun ərizəsini istər 01 aprel 2024-cü ildə (01 aprel 2024-cü il qeydiyyat №- 475) icraata götrdüyü vaxtdan- 26 aprel 2024-cü il tarixə -ərizənin baxılmamış saxlanması gününə kimi,
İstərsə də ikinci dəfə ərizəsinin 821 №-ə ilə qeydə alındığı 31.05.2024-cü il tarixdən 12.06.2024-cü il tarixə kimi, 4 dəfə məhkəmə iclası keçirməsinə baxmayaraq məhkumun şəxsi işini tələb edib götürməmişdir. 17-Saylı Cəzaçəkmə Müəssisəsinnin rəisinə 12.06.2024-cü il tarixdə təqdim etdiyim 15A №-li məktub (Məhkumun şəxsi işi Xəzər Rayon Məhkəməsinin hakimi tərəfindən nə vaxtı (hansı gündə, hansı ayda, neçənci ildə) tələb edilmişdir və hansı vaxtda göndərməyiniz barədə rəsmi məlumat verəsiniz) buna subutdur.

İndi Xəzər Rayon Məhkəməsinin hakim və sədri Şeyda Məhərrəmovadan soruşun görək hakim məhkumun şəxsi işini tələb etmədən, məhkumun şəxsi işini araşdırmadan təyin etdiyi məhkəmə iclaslarında nədən danışırmış? Hakimin əlində məhkumun şəxsi işi yoxdursa bu hakim nəyə baxırmış? Prosessual qanunvericilik, şəxsi işi tələb edib götürmədən və şəxsi işi araşdırmadan məhkəmə iclası keçirməyə, işi məhkəmə baxışına təyin etməyə, icazə verirmi?

Yenə düşünmək məcburiyyətində qalırıq, görəsən bəzi Firon hakim və sədirlərin qanunsuz hərəkətlərinə nə vaxtsa son qoyulacaqdırmı? Bu zaman nə vaxt çatacaqdır? Bunun üçün nə etməliyik?

Məhkəmənin hakim və sədri nə qədər harınlaşmışdır, demək, məhkəmənin hakim və sədri o işdən pul almamışdırsa, o vətəndaşın şəxsi işini belə tələb etmir.

Hörmətli cənab Prezident! ​​​​​

Bakı şəhəri Xəzər Rayon Məhkəməsini hakim və sədri Şeyda Məhərrəmovanın barəsində qanunvericiliyin tələblərinə müvafiq xidməti araşdırmalar aparılmasına və barəsində ölçü götrülməsi ilə bağlı aidiyyəti qurumlara göstəriş verməyinizi Sizdən xahiş edirik.

azmedia.info.az

Bakıda son günlər adı qalmaqallarla hallanan 25 saylı musiqi məktəbinin gənc direktoru Becan Hüseynov haqqında yeni iddialar gündəmə gəlib. Belə ki, ötən gün direktorun məktəbin iki şöbə müdirini vəzifəsindən kənarlaşdırdığı və ardınca bu günə, 5 iyul tarixində hər kəsin işdə olmasını tapşırdığı bildirilib. İddialara əsasən, vəzifəsindən kənarlaşdırılanlardan birinin halı pisləşib və axşam saatlarında üstünə təcili tibbi yardım çağırılıb. Hətta bu gün səhər saatlarında şöbə müdirinin atası məktəbə gələrək, B.Hüseynovdan baş verənlərin səbəbini öyrənməyə çalışıb. Ancaq direktor bu gün işə gəlməyib.

TEREF xəbər verir ki, məsələ ilə bağlı demokrat.az-a açıqlamasında Becan Hüseynov günlərlə mediada barəsində yayılan ittihamlara aydınlıq gətirib.

Becan Hüseynov bildirib ki, bunun hamısı təxribat xarakterli xəbərlərdir.

"İşdən çıxartma söhbəti yoxdur. Yalan məlumatdır. Orada bizim şahidlərimiz var. Məktəbdə belə bir hal baş verməyib. Mənim orada 20-30 şahidim var. Bu iclas vaxtı olub. İclas vaxtıda orada hansısa bir anlaşılmazlıq olmayıb. Təcili tibbi yardım iş saatından sonra axşam evinə gəlibsə, onunla bizim nə əlaqəmiz var? Hamının evinə təcili yardım gələ bilər, bunun mənə və ya işdəkilərə nə aidiyyatı var?

İstəsəz mən 20-30 şahidlə bunu sübut edə bilərəm. Məktəbdə belə bir hal baş verməyib. Iclas bitib, hamı evinə gedib. Artıq bundan sonra kiminsə üstünə təcili tibbi yardım gəlibsə, bu mənim problemim deyil. Sizə yalan məlumat veriblər. Bunun hamısı təxribat xarakterlidir. Neçə vaxtdır mənə qarşı təxribat aparılır. Mən artıq buna öyrənmişəm. Hansı zəmanədir kimisə işdən çıxarmaq nə deməkdir? İşdən çıxartsam gedib məhkəməyə müraciət etsin ki, mən onu işdən çıxartmışam”.

Səbail Rayon İcra Hakimiyyətinin Bibiheybət qəsəbə inzibati ərazi dairəsi üzrə nümayəndəsi Elməddin Mahmudov Sputnik Azərbaycan-a açıqlamasında bildirib ki, sözügedən ərazidə Xəzərin hasarlanan hissələrinin çoxu şəxsi mülkiyyətdir.
"Xəzər dənizinin sahilini hasarlayanları məhkəməyə vermək lazımdır. Dənizin qarşısında istisna hallarda tikinti işləri aparmaq etmək olar". Bu sözləri Sputnik Azərbaycan-a açıqlamasında deputat Rüfət Quliyev söyləyib. Millət vəkili deyib ki, əlac, bir qrup insanın birləşib dənizin sahilini hasarlayanları məhkəməyə verməsinə qalıb.
Millət vəkili deyib ki, dənizin sahilinin hasarlanması ilə bağlı çoxsaylı şikayətlər var.
"Xəzər dənizinin sahilinin hasarlanması ilə bağlı KİV-də də reportajlar yer alıb. Deputatlar da Milli Məclisdə bu problemi dəfələrlə qaldıraraq çıxışlar edilib. Əlac ona qalıb ki, dənizdən məhrum qalan insanlar yığışıb, 200-300 nəfər insan sahili hasarlayanları məhkəməyə versinlər. Hələki bunun yolunu belə görürəm", - Rüfət Quliyev bildirib.

Qeyd edək ki, Xəzər dənizinin sahilinin hasarlanması problemi illərdir ki, qalmaqdadır. Hər çimərlik mövsümündə bu məsələ aktuallaşsa da, əhalinin dənizə yolunu kəsən hasarlar sökülmür. Paytaxtın əksər rayonlarında dənizin sahilin hasarlanması hallarına rast gəlinir. Bəzi ərazilərdə Xəzərin sahili hasarlanaraq şlaqbaum qoyulub. Bu günlərdə sosial şəbəkələrdə Bilgəh ərazisində dənizə girişə şlaqbam qoyulmasını əks etdirən görüntülər paylaşılmışdı. Anoloji hala paytaxtın digər ərazilərində də rast gəlinir.

Bakının Səbail rayonu, Şıx ərazisində Bibiheybət qəsəbəsindən Qaradağ rayonu istiqamətində Xəzər dənizinin sahili demək olar ki, blokadaya alınıb. Bu ərazidə dənizin sahili hündür hasarlara alınaraq görünməz olub. Bəzi hissələrində isə dənizin sahili dəmir barmaqlıqlarla hasarlanıb. Şıx ərazisinə yaxın yerləşən Bibiheybət, Baвamdar və Bayıl qəsəbələrdə yaşayan sakinlər illərdir ki, dənizin sahilinə, çimərliklərə gedə bilmədiklərindən şikayətlənirlər.

Bibiheybət qəsəbə sakini Adil Qurbanov Sputnik Azərbaycan-a açıqlamasında bildirib ki, illərdir Xəzərin sahili istirahət mərkəzləri, restoranlar tərəfindən zəbt olunub.
"Şıx ərazisində Xəzərin sahilini balıq evləri, restoranlar zəbt edib. Biz dənizin sahilinə yaxın düşə bilmirik. Bircə hasara alınmamış ərazi ictimai çimərlikdir. Paytaxt sakinləri Xəzərin sahilinə həsrət qalıb. Xalq ilahi nemət olan dənizi görmək üçün, sahilində istirahət etmək üçün pul ödəməlidir. Halbuki, Xəzər bu xalqın sərvətidir. Ona belə camaatı həsrət qoyublar. Ələtdən Şıxova qədər dəniz hasarlanıb", - Bakı sakini şikayətlənib.

Sputnik Azərbaycan-ın araşdırması zamanı məlum olub ki, paytaxtın müxtəlif yerlərində, eləcə də, Səbail rayonunda dənizin sahil əraziləri restoran və istirahət mərkəzlərinə Bakı Şəhər İcra Hakimiyyəti tərəfindən icarəyə verilib. Artıq dənizin sahillərində böyük istirahət mərkəzləri, restoranlar inşa olunub. Baxmayaraq ki, qəbul edilmiş qanunvericiliyə görə isə, dənizin 20-50 metr sahili tutula bilməz və İnzibati Xətalar Məcəlləsi də dəniz kənarının hasarlanmasını qadağan edir.

Dənizin sahilini zəbt etmiş restoran rəhbərləri isə icarə müqavilələrinin olduğunu əsas gətirərək ərazinin hasara alındığını bildirdilər. Digər istirahət mərkəzlərindən isə ərazinin şəxsi mülkiyyət olduğunu bildirdilər.
Səbail Rayon İcra Hakimiyyətinin Bibiheybət qəsəbə inzibati ərazi dairəsi üzrə nümayəndəsi Elməddin Mahmudov Sputnik Azərbaycan-a açıqlamasında bildirib ki, sözügedən ərazidə Xəzərin hasarlanan hissələrinin çoxu şəxsi mülkiyyətdir. Ona görə də, bu ərazilərin hasarının sökülməsi mümkün deyil. Amma o, bəzi ərazilərdə artıq dənizin sahilinə girişi məhdudlaşdıran şlaqbaumların söküldüyünü bildirdi. Dedi ki, "Qağayı" İstirahət Mərkəzinin girişə qoyduğu şlaqbaum artıq sökülüb.
Xatırladaq ki, hələ 2003-cü il yanvarın 13-də mərhum Prezident Heydər Əliyev tərəfindən məsələ ilə bağlı sərəncam imzalanıb. Sənəddə deyilirdi ki, əhalinin çoxsaylı şikayətlərini, Xəzər dənizinin xalqa məxsus olduğunu əsas götürərək, dənizin 130 metrlik sahil sahəsində tikilmiş, fiziki və ya hüquqi şəxslərə qanunsuz olaraq verilmiş sahələr ya inzibati, ya məhkəmə qaydasında alınsın və insanların dəniz çimərliklərinə sərbəst giriş-çıxışı təmin edilsin.

Ağstafanın icra başçısı Seymur Orucov rayonun Xılxına kəndində görüş keçirib. Tribunainfo.az-ın verdiyi xəbərə görə, görüşə dair yayılan məlumat, fotolar bir sıra suallar doğurub. Əvvəla, İH-nin rəsmi saytında görüş haqda yayılan informasiyanın başlığında primitiv korrektə səhvinə yol verilib. Bunu oxuyan ən savadsız adam da görə bilər. Amma Ağstafa İH-nin diplomlu əməkdaşları səhvi düzəltmək belə istəməyiblər.

İkinci nüans görüşdən olan fotolardı. Adı kənd camaatı ilə görüş olsa, da, sakinlər arxada oturublar, ön sırada qalstuklu İH əməkdaşları əyləşiblər. Nəhayət, üçüncü məqam ondan, ibarətdir ki, görüş haqda verilən xəbərdə dövlət başçısının uğurlarından bəhs olunsa da, icra başçısının Ağstafa sakinləri üçün hansı, işlər gördüyü, sözügedən kənd əhlinin nədən şikayətçi olduğu qeyd olunmayıb.

Bundan bir qədər öncə isə, Aqstafa rayonu, Sadıqlı kənd sakini, Qarabağ qazisi Əfəndiyev Ramin Mübariz oğlunun yerli icra hakimiyyətindən gileyi mediada dərc olunmuşdu. Şikayətçi iddia edir ki, dəfələrlə rayon İcra Hakimiyyətində qəbulda olsa da, işlə təmin olunmasına kömək etmirlər: “Mən, Əfəndiyev Ramin Mübariz oğlu, yazaraq bildirirəm ki, İkinci Qarabağ Müharibəsinin iştirakşısı olmuşam. 2-ci qrup əliləm. Qardaşım Əfəndiyev Amil də veterandır. İşlə bağlı icra başçısının qəbulunda olmuşuq. Bizə bildirirlər ki, iş yoxdur. Bəs, biz nə edək, nə ilə məşğul olaq? Bu qədər işsizlik olar? Deyirlər ki, gedin gözləyin, iş olanda sizə məlumat verəcəyik. Amma heç bir məlumat vermirlər. Bu gedişlə heç vaxt da iş olmayacaq”.


Ağstafa rayon icra başçısı Seymur Orucovu da özünü doğrultmayan gənc kadrlar sırasına salmaq olar. Seymur Vaqif oğlu Orucov 1984-cü il oktyabrın 27-də Naxçıvan Muxtar Respublikasının Naxçıvan şəhərində anadan olub. 2001-ci ildə Əli Bayramlı şəhərində orta təhsilini bitirərək, Azərbaycan Dövlət İqtisad Universitetinin Maliyyə-kredit fakültəsinə daxil olub. 2005-ci ildə İqtisad Universitetinin bakalavr pilləsini bitirib, maliyyə-kredit ixtisası üzrə magistratura pilləsinə daxil olub. Seymur Orucovun qaynatasının keçmiş millət vəkili, “Narxoz”un sabiq rektoru Şəmsəddin Hacıyev olması onun bu ali məktəb karyerasında böyük rol oynayıb. O, 2007-ci ildən Maliyyə-kredit kafedranın aspirantı və müəllimi, 2006-2009-cu illərdə İqtisad Universitetinin Tələbə Həmkarlar İttifaqı Komitəsinin sədri kimi çalışıb. 2010-cu ildə “Dövlət büdcəsinin gəlir və xərclərinin tənzimlənməsi istiqamətləri” mövzusunda dissertasiya işini müdafiə edərək iqtisad elmləri üzrə fəlsəfə doktoru adı alıb. Ən maraqlısı da odur ki, 24 yaşında Şəmsəddin müəllimin himayəsi altında dekan, saha sonra Tərbiyə işləri üzrə prorektor vəzifəsində olmağa qədər yüksəlib. Şəmsəddin Hacıyevin maliyyə fırldaqları və rüşvət məsələsi ilə bağlı vəzifədən uzaqlaşdırılması ilə Seymur Orucovun da Universitetdəki fəaliyyəti sona çatıb. Daha sonra sabiq rektorun qızı ilə evliliyə rəsmən son verilib. Növbəti karyera yüksəlişində onun dayısı Azərbaycan Həmkarlar İttifaqı Konfederasiyasının əbədi, əzəli sədri, millət vəkili Səttar Möhbalıyev rol oynayıb. S.Hacıyev 4 aprel 2011-ci ildə Rabitə İşçiləri Müstəqil Həmkarlar İttifaqı Respublika Komitəsinin sədri vəzifəsinə seçilib. 21 may 2020-ci il tarixdə Ağstafa Rayon İcra Hakimiyyətinin başçısı təyin edilən S.Orucov rayonun sabiq icra başçısı Nizaməddin Quliyevin şəxsi ev əşyalarını geri qaytarmaqdan imtina etməsi və başqasına məxsus olan inventarları mənimsəməkdən də çəkməməsi ilə qalmaqal yaratmışdı. Azərbaycan reallığında ilk dəfə belə hal yaşanırdı və gənc icra başçısına yazılmamış qanunları izah etməklə bu situasiya ört basdır edildi. Bir müddət öncə isə Seymur Orucov ikinci evliliyi ilə gündəmə gəlib. Əlbəttə bəziləri hesab edə bilər ki, hər kəsin evlənmək haqqı var, burda qəribə heç nə yoxdur və bu, icra başçısını vurmaq üçün heç də yaxşı mövzu deyil; bəziləri sanır ki, media tiraj üçün şou tapıb və s…
Əlbəttə, mövzunun şou hissəsi də yox deyil. Ancaq bu toyun gündəmə çevrilməsini şərtləndirən səbəblər də çoxdur. Əvvəla, Seymur Orucov bu ölkənin iri rayonlarından birinin başçısıdır, dövlətin siyasi-inzibati iradəsini yerdə təmsil edir. Onun özəl həyat anlayışı ola bilməz – bütün addımları ictimaidir. Azərbaycanda ikinci yox, 8-ci dəfə də evlənən şəxslər var, onlar haqda kimsə nəsə yazmır. S.Orucovun toy məsələsi buna görə ciddi medianın da diqqətini çəkdi.
İkincisi, dövlətin siyasi iradəsini yerdə həyata keçirən şəxs olaraq S.Orucovun milli dəyərləri mütləq şəkildə qoruması artıq bir seçim deyil, vacibdir: sən bu ölkənin məmurusansa, ənənələri yaşatmağa borclusan. Azərbaycanda isə kişi 10 dəfə də evlənə bilər, ancaq yalnız bir dəfə “bəy” olur, özünə bir dəfə toy edir. Çox nadir istisnalar yalnız gənclərə aid ola bilər – o da əgər hansısa səbəbdən ayrıldıqdan sonra övladı yoxdursa. Bu baxımdan 4 uşaq atası olan bir şəxsin bu qədər irimiqyaslı toy-dügün keçirməsi diqqətləri özünə çəkməyə bilməzdi.
Hər kəsin doğrudan da ailə qurmaq, evlənmək, ərə getmək kimi təbii haqqı var. S.Orucov da birinin qolundan yapışıb, evinə aparsaydı, səssiz-küysüz – yəni musiqinin səsi bütün Bakını başına götürmədən – ciddi media bu olayı işıqlandırmayacaqdı. Anadolu türklərinin gözəl bir sözü var: “makamına sayğı göstərmək”. Özün istədiyin düşüncədə ola bilərsən, istədiyin həyatı yaşamaq haqqın da var, ancaq dövlət məqamındasansa, dövlət ərkanına, xalq ənənəsinə uyğun davranmaq öhdəliyini o vəzifəni qəbul edərkən götürmüsən demək.
İndi isə Ağstafa Rayon İcra Hakimiyyətinin başçısının adı 194 min manatlıq mənimsəmə işində hallanır. Belə ki, Bakı Telefon Rabitəsi İstehsalat Birliyinin Birləşmiş Həmkarlar İttifaqının sədri İsrafil Bəkirovla baş mühasib Rəşad Babayev 194 min manat mənimsəməkdə ittiham edilib. Rəşad Babayev məhkəmədə deyib ki, Rabitə İşçiləri Müstəqil Həmkarlar İttifaqı Respublika Komitəsinin sabiq sədri Seymur Orucovun vasitəsilə Bakı Telefon Rabitəsi İstehsalat Birliyinin Birləşmiş Həmkarlar İttifaqına baş mühasib vəzifəsinə təyinat alıb. Rəşad Babayev məhkəmədə Seymur Orucovun adını çəkməklə mənimsəməyə məcbur edildiyini deyib. Sabiq baş mühasib qurumda Seymur Orucovun tapşırıqlarını da yerinə yetirdiyini bildirib. Onun sözlərinə görə ittifaqda müqavilə əsasında xidmət göstərən Gülbəniz adlı qadının oğlu Fərid Bayramovun Rəqəmsal İnkişaf və Nəqliyyat (Rabitə) Nazirliyinin Dövlət Radiotezliklər İdarəsinə işə bərpa olunmasına köməklik göstərəcəyini, lakin qarşılığında 20 min manat alınacağını deyib. Bu barədə Seymur Orucovla danışıb və sonuncu Fəridi işə götürə biləcəyini bildirib. Rəşad Babayev məhkəmədə Fəridin işə düzəlməyinə görə ailəsindən aldığı 20 min manatı Seymur Orucova verdiyini də iddia edib. Seymur Orucov icra başçısı təyin olunduqdan sonra Fəridin işə düzəlməsi ilə bağlı məsələ dayandırılıb. Rəşad Babayev deyib ki, 194 min manatdan 135 min manatını Seymur Orucova şəxsən verib, 15 min manatı Gülbənizə qaytarıb, qalan 44 min manatı isə öz ehtiyaclarına sərf edib. Məhkəmənin qərarı ilə Rəşad Babayev Cinayət Məcəlləsinin külli miqdarda dələduzluq, mənimsəmə, vəzifə saxtakarlığı, vəzifə səlahiyyətlərindən sui-istifadə etmədə təqsirli bilinib və 7 il müddətə azadlıqdan məhrum edilib. İsrafil Bəkirov isə Cinayət Məcəlləsinin səhlənkarlıq maddəsi ilə təqsirli bilinib. Məhkəmə Rəşad Babayevin ifadəsi əsasında Seymur Orucov barəsində xüsusi qərardad çıxarmayıb.

AZƏRBAYCAN RESPUBLİKASININ PREZİDENTİ İLHAM ƏLİYEV CƏNABINA

Surəti: prezident Administirasiyasının aparatının rəhbəri Samir Nuriyev cənabına
Surəti: Baş prokuror Kamran Əliyevə
Surəti: daxili işlər naziri Vilayət Eyvazova
Surəti: DTX nın rəisi Əli Nağıyevə
Surəti: elm və təhsil naziri Emin Əmrullayevə
Surəti: Quba rayon icra hakimiyyətinin başçısı İlqar Mahmudova
Surəti:
Surəti: Azərbaycan mediasına

MÜRACİƏT - ƏRİZƏ

Möhtərəm Prezident, mən bu müraciətimlə bir Azərbaycan müəlliminin başına gələnləri diqqətinizə çatdırmaq və onun üzləşdiyi problemin həlli üçün köməklik göstərməyinizi xahiş edirəm. Bildiyimiz kimi, ölkədə müəllimlərin sertifikasiya imtahanları keçirilib. Bu imtahanlarda 4 minə yaxın müəllim imtahandan kəsilib. Ancaq imtahandan kəsilənlərin heç də hamısının səbəbi eyni deyil. Belə ki, ailəvi dostluğumuz olan bir müəllimə səhhəti ilə əlaqədar birinci sertifikasiya imtahanında iştirak edə bilməyib. Bununla bağlı ərizə yazıb və məlumat verib ki, xəstəliyi səbəbindən imtahanda iştirak edə bilmir. Birinci imtahanda iştirak imkanından xəstəliyinə görə məhrum olduğu üçün ona sağaldıqdan sonra şərait yaradılacağını deyilib. Lakin müəllimlərin sertifikasiyasının ikinci imtahanında iştirak etdikdən sonra onun birinci imtahanda xəstəliyinə görə olmaması nəzərə alınmayıb. Belə ki, xəstəlik sənədi olduğu halda müəllimin birinci imtahanda iştirak etməməməsi nəzərə alınmayıb və əlində xəstəlik sənədi olmasına baxmayaraq heç bir güzəşt olunmayıb. Təbii ki, bu da düzgün qərar deyil və müəllimənin birinci imtahanı verməsi təmin olunmalı idi. Təəssüf ki, ona bu imkan yaradılmadı...
Möhtərəm Prezident və cənab nazir!
Bildirirəm ki, dostlar üzərindən ,ailəvi yaxınlığımız olan həmin müəllimənin üzləşdiyi bu problemlə tanış olduqda və dostumun məndən xahişini nəzərə alaraq onun pərişan, məyusluğunu gördükdə laqeyd qala bilməzdim. Bir təhsil adamının, bir müəllimin, bir qadının və bir insanın işsiz qalmasını təsəvvür etmək çətindir. Xüsusən də belə ədalətsiz bir halla qarşılaşması və çarəsiz bir vəziyyətə düşməsi mənə təsir etdi. Çünki həyatını təhsilə, elmə həsr etmiş müəllimin sertifikasiya imtahanından kəsilməsi üzücü haldır. Ona görə də bu insana əlimdən gələn yardımı etmək qərarına gəldim. Bu niyyətlə Təhsil Nazirliyindən tanıdığım, əvvəllər nazirlikdə Daxili Nəzarət şöbəsininrəisi vəzifəsində işləmiş , hazırda Quba rayonunun icra başçısı olan İlqar Mahmudovla telfon vasitəsilə təmas qurdum. Fikirləşdim ki, nazirlikdə müxtəlif vəzifələr tutmuş İlqar Mahmudovu əvvəldən tanıyıram və bu problemin həllində bəlkə kömək edə bilər. Odur ki, Quba rayonuna getdim və icra başçısı İlqar Mahmudovla görüşdüm...

Cənab Prezident və hörmətli Baş Prokuror! Qeyd edim ki, icra başçısı ilə müzakirəmiz zamanı o mənə çalışıb köməklik göstərəcəyinə söz verdi və əmin etdi ki, müəllimənin imtahandan keçməsi üçün bütün əlaqələrindən istifadə edəcək. Yenə də məsələni çalışıb müsbət həll edəcək. Bizim onunla söhbətimiz əsasında razılaşmamız oldu ki, Bakıda bir nəfərlə görüşəcəm və tələb olunan məbləği ona çatdıracağam, sonra məsələ yoluna qoyulacaq. Başçı ilə görüşdən sonra geri qayıtdım və bir gün sonra başçının mənə vatsapla göndərdiyi nömrəyə zəng etdim. Bakıda iş üzrə yönləndirilən Vüsalə adlı şəxslə görüşüb ona tələb olunan pulu verdim. Məlumat üçün bildirirəm ki, bu şəxslə ilk dəfə görüşürdüm. İş prosesinə gorə bu minvalla bir neçə dəfə görüşməli oldum. O yüz faiz həll ediləcəyini Quba regionunun təhsil şöbəsinin müdürü Coşğun müəllimin yaxın adamı olmasını və bu işdə ona qohumu Günay adlı şəxsin adını çəkirdi. Məsələ pul, rüşvət olduğu üçün ehtiyyat edərək hər şeyi qeydə almışam. Məlumat üçün bildirirəm ki verilən pul şəxsən özümə məxsus olub
İcra başçısı görüşdə məni arxayın edərək , bu iş heç bir problem yaşanmadan həllini tapması üçün var qüvvəsi ilə çalışacağına söz vermişdi. Bu razılaşmanı intizarda olan müəlliməyə xəbər verəndə çox sevinmişdi, bir ümid yaranmışdı. Amma Qubanın icra başçısı İlqar Mahmudov məni çox pis vəziyyətə saldı və müəllimin son şansını dəfn etdi.
Belə ki, bizi bu qədər arxayın etmələrinə baxmayaraq, məsələ həllini tapmadı. İmtahanların nəticələri ilə bağlı verilən apelyasiya şikayətləri yekunlaşdıqdan sonra pulu məndən alan şəxs əlaqə saxlayaraq bildirdi ki, iş düzəlmədi, heç cür alınmadı və o vəsaiti geri qaytardı. Bu işdə ən pis hal odur ki, artıq apelyasiya şikayəti verilməsi prosesi geridə qalmışdı və ondan sonra mənimlə əlaqə saxlanaraq məsələnin həll olunmadığı bildirilmişdi. Əgər icra başçısı İlqar Mahmudov bizi əmin etməsəydi, ən azından bu məsuliyyəti üzərimə götürməzdim . Bu məsələdə Qubanın icra başçısının bizi arxayın etməsi səbəbindən müəllimin sonuncu şansı, sonuncu ümidi də dəfn olundu. Yəni məsələ verilən pul, sonra onun bizə geri qaytarılması deyil, müəllimin olan-qalan axırıncı şansının da basdırılması, apelyasiya şikayəti ilə bağlı prosedurlar yekunlaşdıqdan sonra bizə məlumat verilməsidir. Madam ki, bu iş alınmayacaqdı, niyə başçı bu məsələyə qol qoydu, vasitəçi tapdı, nə üçün bizi arxayın elədi?
Mən İlqar Mahmudova narazıqlarımı bildirməklə, ondan və bu işlə əlaqəli olan hər kəsdən şikayət edəcəyimi bildirdim.
Bu zaman mənə ,Quba regional təhsilinin müdürü Coşğun müəllimdən zəng gəldi. Məni mövcud durumu müzakirə etmək üçün Badamdardakı Badam Hotelinə dəvət etdi. Elə həmin gün axşam Vüsalə adlı həmin şəxs mənə yenidən zəng vuraraq 29 iyun tarixə kimi yüz faiz işi həll edəcəklərini söz verdi. Yalnız təcili bülletenə çıxmaq lazımdır ki, müəllimənin işinə xitam verilməsin. Zatən pisxaloji trama alan müəllimə bülletenə çıxdı. İndi mən bu ailənin, o müəllimənin qarşısında xəcalət çəkirəm və çıxılmaz vəziyyətə düşmüşəm. İcra başçısı işi həll edəcəyinə söz vermişdi və mən də onu nazirlikdən tanıdığım üçün problemi aşıracağına inanmışdım. Bilsəydim ki, sonu belə olacaq, heç qəbuluna getməzdim. Həmin ailə və müəllimə mənim onları arxayın etməyim, başçının da məni arxayın salması ucbatından indi bütün şanslarını itirib, heç cür işə bərpa ola bilmir.
Cənab Prezident və bu aidiyyatı strukturların hörmətli rəhbərləri!
Mən Nicat Mahmudov yaranmış bu vəziyyətlə əlaqədar olaraq dövlətimə güvəndiyimi bildirir, dövlətimin başçısının bu məsələnin həlli ilə bağlı müvafiq tapşırıq verməsini xahiş edirəm. Möhtərəm Prezident, burada bir müəllimənin taleyindən, onun karyerasından, gələcək fəaliyyətindən söhbət gedir. Mən bu niyyətlə Qubanın icra başçısı ilə görüşdüm ki, müəllimənin probleminə köməyim dəysin. Gördüyünüz kimi, heç bir iş görməyən, bizi boş-boşuna arxayın salan, əvəzində sonuncu şansı da məhv edən İlqar Mahmudovun ucbatından ümidsiz bir vəziyyət yaranıb. Bu işdə müəllimənin tək ümidi Prezidentdir və ədalətli qanundur. Bu baxımdan müəllimə xəstə olduğu tarixdə olan birinci sertifikasiya imtahanının bərpa edilərək yenidən imtahanda içtirak etməsini tələb edir. Eyni zamanda, Elm və Təhsil nazirindən müəllimənin üzləşdiyi problemlə əlaqədar yardım göstərməsi, dəstək verməsini xahiş edirik.

Nicat Mahmudov
rublika.az

Dövlət qurumlarının, daha çox da Azərbaycan Avtomobil Yolları Dövlət Agentliyinin (AAYDA-da) tenderlərində “həmişəqalib” olan ATF MMC əl dəyişdirib.
AFN.az yerli mediada yayılan xəbərlərə istinadən məlumat verir ki, şirkətin qanuni təmsilçisi Təbriz Muradov bu vəzifədən ayrılıb. İndiyə qədər çoxlu sayda milyonluq tenderlərin qalibi olmuş şirkətdə onu Azad Muradov əvəzləyib. Görünən odur ki, təkcə ad dəyişib, soyad eynidir. Çünki ATF MMC-nin Muradov qardaşlarına mənsub olması haqda internet resurslarında kifayət qədər məlumat var. Bildirilir ki, “ATF” adı da Muradov qardaşlarının qısaldılmış abreviaturudur: Azad, Təbriz və Fəxrəddin.

Qanuni təmsilçinin adının dəyişməsi ilə bağlı bəzi versiyalar səslənsə də, doğruluğu şübhəli olduğu üçün onlara toxunmadan, ilk baxışda adi bir MMC kimi görünən ATF-in hər zaman gündəmdə olma səbəbləri haqda bir neçə cümləlik məlumat maraqlı olar. Azərbaycanda asfalt yollarının inşaası ilə məşğul olan ATF MMC-nin adı AAYDA-nın rəhbəri Saleh Məmmədovla çəkilir. Əsasən bölgələrdə yol tikintisi layihələrini reallaşdıran MMC AAYDA-nın və yerli yol istismar idarələrinin saysız-hesabsız tenderlərinin qalibi olub. Bu tenderlərdə yüz milyonlarla vəsait “udan” şirkətin rəhbərliyinin yolu hüquq-mühafizə orqanlarından da keçib. Belə ki, ATF-in sahiblərindən olan Fəxrədin Muradov 2018-ci ildə hüquq-mühafizə orqanları tərəfindən saxlanılıb. Həmin vaxt Baş Prokurorluğun yaydığı məlumatda bildirilib ki, Fəxrəddin Muradova Cinayət Məcəlləsinin 192-ci (qanunsuz sahibkarlıq), 247-ci (işlərin yerinə yetirilməsi zamanı ətraf mühitin mühafizəsi (qorunması) qaydalarını pozma), 308-ci (vəzifə səlahiyyətlərindən sui-istifadə) və digər maddələrlə ittiham irəli sürülüb. Bu işlə bağlı araşdırmalar zamanı məlum olub ki, ATF şirkəti dövlətə 361 000 manat ziyan vurub. Bütün bu əməllərdə ittiham olunmasına baxmayaraq, F.Muradov sonradan azadlığa çıxmağı bacarıb. Deyilənlərə görə, həmin vaxtlar bu işdə də ona S.Məmmədov dəstək olub. S.Məmmədov həmçinin ATF MMC-nin təsisçisi olan qardaşlardan biri Azad Muradovun oğlu Tehran Muradovu 17 saylı Yol İstismar İdarəsinə təyin etmişdi. Hazırda T.Muradovun həmin vəzifədə işləyib-işləmədiyini aydınlaşdıra bilməsək də, internet resurslarında onun və sözügedən idarənin fəaliyyəti ilə bağlı elə də ürəkaçan məlumatlara rast gəlmədik. Bu ad qarşımıza ya rayonlarda keçirilən çoxlu sayda tenderin qalibi kimi, ya da korrupsiya və keyfiyyətsiz yol istismarı ilə bağlı çıxdı. Nə yazıq ki, haqqında bu qədər neqativ informasiya yayılan bir şirkət hələ də S.Məmmədov üçün dəyərlidir.

Lakin ATF MMC-yə onun bu etimadı müavini Əvəz Qocayevlə arasında problemlərin yaranmasına səbəb olub. Bildirilir ki, S.Məmmədov hətta Qocayevi və onun AAYDA-da vəzifəyə gətirdiyi mütəxəssisləri sıxışdırır. Səbəblər arasında Ə.Qocayevin AADA-rəisi olmaq istəyi və həvəsi, eyni zamanda əsas tenderlərin bir MMC-yə verilməsi məsələsi öndədir.
Məsələ ondadır ki, hər iki rəhbər şəxs dövlət qurumunda kifayət qədər kök salıb. S.Məmmədov rayon yol istismar idarələrində öz adamlarını yerləşdiribsə, Ə.Qocayevin də mərkəzi aparatda xeyli sayda adamı vəzifədədir. Elə bu səbəbdən də S.Məmmədov Ə.Qocayevi “vurmağın” yollarını axtarır. “Artıq müəyyən çevrələrdə Saleh Məmmədovla Əvəz Qocayevin yollarının ayrıldığı da söylənilir. Saleh Məmmədovun öz müavinini vəzifəsindən uzaqlaşdırması yolunda onun əsas dəstəkçisi isə qudası, AAYDA Yolların Təmiri və İstismarı İdarəsinin rəisi Əflatun Qasımovdur. Hətta onun özünün bu vəzifəyə gətirilməsinə cəhdlər də var” – deyə məlumatlı mənbə bildirib.
Yeri gəlmişkən, bir müddət əvvəl Ə.Qasımovun adı S.Məmmədova olduqca bahalı villa tikməsi ilə bağlı hallanırdı. Belə ki, qudasının villa həvəskarı olan AAYDA rəhbəri üçün Bakıda tikdirdiyi villa haqda məlumatlar internet resurslarında yer alıb.
Ə.Qocayevin təmsil etdiyi sahədə uzun illərin təcrübəsinə malik olması onun S.Məmmədov üçün “asan yem” olmadığını deməyə əsas verir. Belə ki, Ə.Qocayev 2015- 2017-ci illərdə “Azəravtoyol” Açıq Səhmdar Cəmiyyətinin sədr müavini vəzifəsini müvvəqqəti icra edib. 21 dekabr 2017-ci il tarixindən isə Azərbaycan Avtomobil Yolları Dövlət Agentliyinin İdarə Heyətinin sədr müavini vəzifəsində çalışır. Məhz bu səbəbdən də onun strukturda kifayət qədər “qol-budaq”lı olması S.Məmmədovun işini çətinləşdirir.

Qeyd edək ki, Ə.Qocayev S.Məmmədovla aralarında problem yaşanması haqda məlumatlara münasibət bildirib. “Biz öz işlərimizlə məşğuluq, dovlət işləri ilə məşğuluq. Belə şeylərə fikir vermirik” – deyə o qeyd edib.

Yazıda adı çəkilən hər kəsin mövqeyini dərc etməyə hazırıq.