“Azərlotereya” ASC 2023-cü il üçün hesabatını açıqlamır. Şirkətin maliyyə gəlirləri ilbəil fantastik şəkildə artır. Bu, deyək ki, yaxşı haldır. Məsələn, 2022-ci ildə “Azərlotereya” ASC-nin ümumi gəlirləri 258 milyon 163 min manat olub. Həmin il üçün xalis gəlir 41 milyon manat hesablanır. 2021-ci il üçün ASC-nin ümumi gəlirləri 43 milyon 969 milyon manat olub. ASC-nin idarəetməsi Türkiyənin “Demirören Holdinq”in törəmə müəssisəsi olan “YMT Sans B.V.” şirkətinə veriləndən sonra təxminən 6 dəfə artım əldə olunub.
Xalqın talan edilməsi hesabına əldə olunan yüz milyonlarla gəliri bir tərəfə qoyaq, deyək ki, bu, qumar deyil, sadəcə mərc oyunudur və bütün bunlar yaxşı haldır, büdcəyə milyonlarla vergi ödənilir.
Amma “Azərlotereya” ASC ümumi gəlirlərini açıqlasa da, Azərbaycanda media orqanlarına ayırdığı pulların məbləğini açıqlamır. Maraqlıdır, nə üçün?
Düzdür, ASC-nin 2022-ci il hesabatında “reklam və marketinq xərcləri”nin 11 milyon 865 min manat olduğu qeyd olunub.
Bəs, Medianın İnkişafı Agentliyindən qeydiyyatdan keçən (eləcə də qeydiyyatda olmayan bəzi media orqanları ilə) əksər sayt və qəzetlərlə əməkdaşlıq müqaviləsi bağlayan “Azərlotereya” ASC həmin media orqanlarına ayda nə qədər pul köçürür? 11 milyon 865 min manat vəsaitin neçə faizi saytların və qəzetlərin payına düşür? “Azərlotereya” ASC-nin idarəetməsi Türkiyə şirkətlərinə həvalə olunsa da, nəticədə dövlət qurumudur.
Yaxşı olar ki, həmin media qurumlarının rəhbərləri “Azərlotereya” ASC-dən ayda nə qədər pul aldıqlarını bu postun altında qeyd etsinlər. Bu, şəffaflıq nümunəsi sayıla bilər. Gizli və qara iş görmürsünüsə, o zaman bunu açıqlamaqda da problem görmürəm.
Samir Feyruzov
TEREF: Xocanın Blogu
Səhifəmiz hamının üzünə açıqdır!

Klarnet ifaçısı Hüseyn Məhəmmədoğlu tələbəsi olduğu Azərbaycan Milli Konservatoriyasının önünün ödənişli parklanma ərazisinə çevrilməsindən şikayət edib.

KONKRET.az xəbər verir ki, bu barədə sənətçi sosial şəbəkədə paylaşım edib.

O, tələbələrin təhsil aldığı yerin qarşısında ödənişli dayanacağın olmasını düzgün hesab etmədiyini bildirib:

“Bura bulvar, restoran, nə də ki, şadlıq sarayıdır. Tələbələr burada təhsil alırlar. Tutaq ki, biri qazanır, digəri isə qazanmır. Hamı o pulu ödəyə bilmir. Bir saat üçün ödəmək olar, amma səkkiz-doqquz saat burada dərsdə olan tələbələr var. Çox xahiş edirəm ki, bu məsələyə bir əncam qılasınız və kökündən həll edəsiniz. Belə olmaz axı, düşünmək lazımdır”.

Prezidentə məktub
Hörmətli Prezidentimz İlham Əliyev! Mən 2015-ci ildə həyat yoldaşım Həsənli Dilşad Məmmədrza qızının adına iki otaqlı mənzil almaq üçün özünü Xırdalanda yerləşən “Abşeron A1” MTK-nın sədri kimi təqdim edən və şirkətin blankından, möhüründən istifadə edən Ağayev Ağamoğlan Duman oğluna 36.000 manat (əlavə1500 manat sayğac pulu) ödəmişəm. (Çeklərin surətlərin və səs yazılarını saxlamışam.) 2020-ci ildə bilmişəm ki, əslində yoldaşımın adına heç bir mənzil yoxdur, Ağamoğlan saxta sənədlərlə məni aldadıb. Bu haqda Korrupsiya İdarəsinə müraciət etmişəm. Şikayətdən sonra, həmin şirkətdə onunla əlbir olan sözdə prorab, həqiqətdə şirkətə yiyəlik edən Babayev Bakir “Abşeron A1”-də mənzil qalmadığı üçün əvəz olaraq Xırdalandakı digər MTK-da, “Proqres 2016”-da iki otaqlı mənzillə təmin ediləcəyimizi bildirdi. Babayev Bakir dedi ki, “Proqres 2016”-nın sədri Emil Səməndərova 35.000 min manatı biz ödəcəyik, əlavə 5000 manat da gərək sən ödəyəsən ki, müqavilə bağlansın.
27 avqust 2021-ci ildə Babayevin Bakirin zəngi, Ağayev Ağamoğlanın iştirakı ilə müqavilə bağlananda Emil Səməndərov daha 2500 manat tələb etdi. 16 oktyabr 2021-ci ildə “çəkdiyim qola başımla cavabdehəm” deyən Emil Səməndərov son 2500 manatı da alıb, borcun qalmaması haqqında maaliyyə arayışını, 42783 manatın maliyyə qəbzini imzalayıb mənə təqdim etdi ki, 5-ci blokun 89-cu mənzili sizindir. Söhbət zamanı aydın oldu ki, bina Korrupsiya İdarəsinin nəzarətində, “krışalığındadır”, narahat olmayın, 5-ci blokda mənzillərin bir neçə adama satılması mümkün deyil.
O zaman 89-cu mənzilin yerləşdiyi 14-cü mərtəbə hələ tikilməmişdi. Üstündən bir il keçdi, məlum oldu ki, həmin mənzil məndən əvvəl üç adama satılıb. 2022-ci ilin dekabrında Emil Səməndərov həbs edildi. 14 fevral 2023-cü ildə mən zərərçəkmiş kimi Korrupsiya İdarəsində müstəntiq Kənan Süleymanlıya ifadə vermişəm. Onbir aydır müstəntiq məni əmin etmişdi ki, siz zərərçəkmişlərin siyahısındasız, “Proqres 2016” şirkətinin zərərini ödəməyi boynuna götürən “Şərur” MTK-dan şərtlərə uyğun zərərinizin qarşılığını alacaqsız.
24.01.2024-cü ildə isə, müstəntiq Kənan Süleymanlı zərərçəkmişin əvəzinə dələduzu müdafiə edərək bildirdi ki, Emil Səməndərov nə olsun ki, müqaviləyə, arayışa qol çəkib, qəbz verib, onun sizə 7500 borcu var. Sənədləriniz Sumqayıt Ağır Cinayətlər Məhkəməsindədir. Qalan 35283 manatı gedin məhkəmədən istəyin Ağayev Ağamoğlandan, Babayev Bakirdən alın. Hara da istəyirsiz şikayət edin.
Hörmətli Prezident, istintaq tərəfindən bu necə yanaşmadır, necə münasibətdir, heyrətlənirəm, guya ədalətli iş görürlər. Səkkiz yüzədək insanın yüz minlərlə pulunu mənimsəyən Emil Səməndərovun etdiyi zərəri 35 min azaltmaqla cəzasımı yüngülləşəcək, nə dəyişəcək?.. İndi mən qalmışam üç dələduzun arasında. Bir parça sənəd almağa görə illərlə maaşımdan kəsib, bankdan kredit götürüb (bankın borcunu hələ də qurtarmamışam) ödədiyim pulun əvəzini bu üç dələduzdan hansı qaytaracaq mənə? Hələ bu uzun illər ərzində çəkdiyim əsəb, stress, qazandığım sinir xəstəliyim bir yana...
Hörmətli Prezident! Açığı məhkəmənin doğru qərar çıxaracağına heç inamım yoxdur. Sizdən xahiş edirəm, şikayətimə düzgün baxılmasına, mənə dəyən zərərin hər hansı bir formada qaytarılmasına kömək edəsiniz. Ümidim ancaq Sizə və vitse-prezident Mehriban xanımadır.
Bu ölkədə haqqın-ədalətin qarantı Sizsiz, elə bu səbəbdən 7 fevralda mən sizə səs verəcəyəm.
Nasir-publisist Rövşən (Yerfi) Həsənli, Dövlət Tarix Arxivinin məsul əməkdaşı

Azərbaycanda vətəndaşların ən çox şikayət etdiyi qurumun Əmək və Əhalinin Sosial Müdafiəsi Nazirliyi olduğu heç kimə sirr deyil. Son vaxtlar xüsusən də vətəndaşların pensiyalarının qanunsuz olaraq kəsilməsi, əlillik dərəcəsinin verilməməsi, yaxud da düzgün təyin olunmaması və s. məsələlər ilə bağlı şikayətlərin sayı durmadan artmaqdadır. Eynilə sosial müavinətlərin, ünvanlı sosial yardımın ayrılması zamanı da adıçəkilən nazirliyin çoxsaylı ədalətsizliklərə və qanunsuzluqlara yol verdiyi haqda şikayətlərin ardı-arası kəsilmir.

Hətta bir sıra vətəndaşlar iddia edirlər ki, Əmək və Əhalinin Sosial Müdafiəsi Nazirliyinin əməkdaşları rüşvət qarşılığında imkanlı şəxslərə ünvanlı sosial yardım ayırsa da, bu müavinətə ehtiyacı olan insanlara müxtəlif bəhanələrlə rədd cavabı verilir. Qeyd edək ki, bugünlərdə redaksiyamıza daxil olan məlumat əslində sözügedən nazirlikdən şikayətçi olan, vətəndaşların heç də haqqsız olmadığını ortaya qoyur. Belə ki, etibarlı qaynaqlardan redaksiyamıza daxil olan məlumata görə, Dövlət Sosial Müdafiə Fondunun (DSMF) Ağdam rayon şöbəsində bu kimi qanunsuzluqların sayı-hesabı yoxdur. Mənbənin sözlərinə görə, şöbə rəhbərliyi müəyyən sövdələşmə qarşılığında “sağlam şəxsləri əlil”, imkanlı sakinləri isə “kasıb” kimi təqdim etməklə, külli miqdarda dövlət əmlakını talan etməkdədir. Mənbə dövlətdən qanunsuz olaraq sosisal müavinat alan bir neçə vətəndaşında siyahısını təqdim edib. Bunlar Ağdam rayonunun 3 oğlan kənd sakinləri Əhmədov Qədir Sədi oğlu, Cəfərov Rüstəm Əhməd oğlu və Hətəmov Rafil Saday oğludur. Onun sözlərinə görə hər 3 şəxs sağlam olsalarda 2-ci qrup əlil kimi illərdir dövlətdən müavinat alırlar. Mənbə iddia edir ki, DSF-nin Ağdam rayon şöbəsində qanunsuz olaraq dövlətdən sosial yardım alan şəxslərin sayı yüzlərlədir. Bununla belə həqiqətəndə yardıma ehtiyacı olan vətəndaşlara əksər hallarda rəhbərlik tərəfindən yox cavabı verilir. Bu isə Ağdam sakinlərinin haqlı narazılıqlarına səbəb olur.

hurriyyet.az

54 saylı Xocalı Yol İstismar İdarəsinin rəisi Məzahir Səlimov Yevlax şəhər Heydər Əliyev prospekti 52 ünvanında yerləşən 2 mərtəbəli ticarət mərkəzi tikdirir...

Əslində bu Azərbaycan reallığı üçün sıradan bir xəbərdir. Çünki Bakıdakı yüksək ranqlı məmurların ölkə daxilində və xaricində çoxlu bizneslərinin olduğu kimi, rayonlardakı orta və kiçik çinli məmurların da yerlərdə və Bakıda çox saylı mülk və biznes obyektlərinin olması heç kimə sirr deyil. Hətta bəzi xırda məmurların belə xaricdə mülkləri və biznes obyektlərinin olması da məlumdur. Onların bu mülklər və biznes obyektləri üçün pullarını hardan qazandıqları da heç kimə sirr deyil. Bu pulların hamısı dövlət büdcəsindən korrupsiya yolu ilə mənimsənilib. Halbuki o pullar sosial layihələrə sərf edilməli və həmin layihələr daha keyfiyyətli şəkildə həyata keçirilməliydi.

Açığı desək bu məsələ bizim, yəni bütün Azərbaycanın yaralı yeridir. Ona görə də 54 saylı Xocalı Yol İstismar İdarəsinin rəisi Məzahir Səlimov Yevlaxda Ticarət Mərkəzi tikdirməsi də sıradan bir xəbərdir və bununla bağlı Məzahir Səlimovla korrupsiyaya qarşı mübarizə aparan qurumların maraqlanmayacağını hamı bilir. Lakin Məzahir Səlimovun məsələsində diqqət çəkən bir neçə məqam var. Onlardan birincisi 54 saylı Xocalı Yol İstismar İdarəsinin rəisinin Yevlaxda tikdirdiyi Ticarət Mərkəzinin öz adına sənədləşdirməsidir. Çoxları öz biznes strukturlarını yaxın qohumlarının, mülklərini isə ailə üzvlərinin adına sənədləşdirirlər. Amma Məzahir Səlimov belə davranmayıb.
Diqqət çəkən başqa bir məqam isə odur ki. dünənə qədər işğal altında olan Xocalının Yol İstismar İdarəsinin rəisi bu qədər pulu hardan qazanıb. Xocalının Yol İdarəsinin rəisi haralarda yol çəkib ki, bu qədər varlana bilib? Məlumata görə son 3 ildə Məzahir Səlimov işğaldan azad olunan ərazilərdə yol çəkir. Demək ki, Məzahir müəllim “müqəddəs tikəyə” əl uzadıb...

Bu arada görəsən Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov bu barədə nə düşünür? İşğaldan azad olunan ərazilərin bərpası üçün ayrılan pullarla Yevlaxda Ticarət Mərkəzinin tikilməsi cənab Məmmədova necə təsir göstərir? Saleh Məmmədovun bu barədə xəbəri olmaya bilərdi. Halbuki bu az inandırıcı görünür. Çünki hələ Cavid Qurbanovun vaxtından bütün rayonların yol idarələrinin müdirləri “şah balası” kimi yaşayırlar və onların hamısı hardasa milyonçulardı.

Yəni uzun illərdir ki, bu sistemdə çalışan Saleh Məmmədovun bu Agentlikdə baş verən korrupsiyalardan xəbərsiz olması imkansızdır. Digər tərəfdən isə yerli mətbuatda gedən yazılardan çıxış edərsək, uzun illər boyu Azərbaycanda yol çəkməklə məşğul olan Saleh Məmmədov özü də “süddən çıxmış ağ qaşıq deyil” və yazılanlara inanarsaq cənab Məmmədovun oğlunun adına xarici ölkələrdə dəyəri on milyonlarla ölçülən mülklər və biznes obyektləri var. O üzdən də Saleh Məmmədovun Məzahir Səlimovun korrupsiyasından bixəbər olması az inandırıcı görünür...

Belə çıxır ki, Saleh Məmmədov işğaldan azad olunan ərazilərə ayrılan vəsaitlərin mənimsənilməsinə göz yumur. Ya da bu vəsaitlərin mənimsənilməsində iştirakçı olur. Biz arzu edərdik ki. bu ehtimalalrın heç biri doğru olmasın. Lakin məsələ ondadır ki, Saleh Məmmədovun yol idarələrində baş alıb gedən korrupsiyadan bixəbər olmasını qəbul etsək belə, onun bundan sonrakı davranışları çox şeydən xəbər verəcək. Çünki cənab Məmmədov artıq Məzahir Səlimovun korrupsiyasından xəbərdardır.

Şekspirin təbiri ilə desək, indi bütün məsələ “olum, ya da ölüm” məsləsidir. Yəni Saleh Məmmədov məsuliyyətini dərk edərək “müqəddəs tikəyə” uzanan haram əli kəsəcəkmi, yoxsa yox?..

Poliqon.info