Dövlət Neft Şirkətinin (SOCAR) sosial məsələlər üzrə sabiq vitse-prezidenti Bədəl Bədəlovun şəxsi maraqlara xidmət edən fəaliyyəti mediaya yaxşı məlumdur. Vəzifədə olduğu müddətdə özünə topdağıtmaz səltənət yaradan Bədəl Bədəlovun adı mətbuatda tez-tez büdcə vəsaitini şəxsi maraqları üçün sərf edən məmurlar sırasında çəkilib.

Bədəl Bədəlovun təkcə Bakıda onlarla bahalı əmlakı, Paytaxtın "Varovski” deyilən və varlılar məhəlləsi kimi tanınan ərazidə dəyəri milyonlarla ölçülən bir neçə villası, ticarət obyektləri barədə mediada çoxsaylı məqalələr yayımlanıb. Aydındır ki, yoldaş Bədəlov sadalanan əmlakları əmək haqqı ilə əldə etməyib. Bədəl Bədəlovun müxtəlif şəxslərin adına olan çoxsaylı şirkətlərinin də olduğu bildirilir. Onun vəzifədən çıxarılacağı, hətta əməllərinə görə həbsə atılacağı real ehtimal kimi səsləndirilirdi. Nəhayət, 2023-cü ildə B. Bədəlov yeni siyasi konfiqurasiya ilə uzlaşmayan məmur kimi vəzifəsindən uzaqlaşdırıldı. Onun vəzifədən atılması mediada Prezident İlham Əliyevin siyasətinə zidd olaraq özfəaliyyətlə məşğul olan büdcə vəsaitini şəxsi maraqları üçün sərf edən daha bir məmur yola salındı” kimi başlıqlı yazılarla müşayiət olundu. Lakin görünən odur ki, Bədəlov həbsdən qurtulmağını hələ də doğru- düzgün dəyərləndirə bilməyib. Belə ki, o, bu gün də Bakıda öz şəxsi biznesini genişləndirməklə məşğuldur , lakin bunu leqal yolla deyil, başqalarına problem yaratmaq, qoçu dəstələri ilə özgəsinin əmlakına zərər vurmaq yolu ilə reallaşdırmağa çalışır.

Əldə etdiyimiz məlumata görə B.Bədəlov bir müddət əvvəl Nizami rayonu, Qara Qarayev prospektində yeni bir ticarət obyekti inşa etdirmək üçün torpaq sahəsi əldə edib. Həmin ərazidə Bədəlovun adamları yaşıllığı məhv edib, ağacları kəsiblər. Bu azmış kimi, indi də həmin torpaq sahəsinin ərazisini qanunsuz şəkildə və zorakı üsullarla genişləndirməyə çalışır. Bədəlovun qoçu dəstələri ətrafda başqalarına məxsus olan əmlaka zərər vurur , insanlara narahatlıq yaradırlar. Bunun səbəbini soruşduqda , açıq şəkildə “Bədəl müəllimdən tapşırıq almışıq” deyə, bildirirlər. Maraqlıdır ki, bu qanunsuz davranışlara Nizami rayonu İcra Hakimiyyəti də göz yumur. İcra Hakimiyyətinin təmsilçiləri isə “korluğu” və “ karlığı” belə izah edirlər: “ Yuxarıdan göstəriş belədir”. Lakin “yuxarı” deyilərkən konkret olaraq kimlərin nəzərdə tutulduğunu açıqlamırlar. Belə çıxır ki, məlum olmayan “yuxarılar” Nizami rayonu İcra Hakimiyyətini qanunsuzluğa sövq edir, özgəsinin əmlakına zərər vurmaq kimi cinayət əməlini dəstəkləməyi tapşırırlar. Hər halda İcra Hakimiyyətinin izahından bu qənaət hasil olur. Bizim bildiyimiz bir həqiqət var ki, bu ölkədə mülkiyyət hüququ ən ali səviyyədə qorunur! Bizim tanıdığımız bir “yuxarı” var ki, o da harın məmurun, özbaşınalıq edən sabiq məmurun deyil, vətəndaşın, sahibkarın, vergi ödəyicisinin yanındadır! Özü də bizim tanıdığımız “ yuxarı” hamıdan yuxarıdadır! Gərəkdir ki, Nizami İcra Hakimiyyəti də bu həqiqəti dərk etsin! Onların “yuxarı” dediyi haradır? Kimdir? Bədəl Bədəlov hansı haqla Nizami rayonunda vətəndaşların əmlakına zərər vurur, əlavə ərazi zəbt etməyə çalışır ki, İcra Hakimiyyəti onun qarşısında acizlik nümayiş etdirir? Bədəl Bədəlov kimi korrupsionerlikdə ad çıxarmış sabiq məmurun Nizami İcra Hakimiyyəti üzərindəki hökmranlığı nəyə söykənir? Bütün bu suallara növbəti yazımızda cavab verəcəyik. Yəqin bundan sonra vurulmuş məmurun -hələ də Bakıda, xüsusən Nizami rayonunda at oynatmasından “yuxarılar da” xəbər tutacaq…

Missiya.Az

Göyçay rayon Ləkçılpaq kəndinin bir qrup sakini rayon icra hakimiyyəti başçısının keçmiş birinci müavini İkram Vəliyevin onlara külli miqdarda zərər vurduğunu iddia edirlər.
Yeniavaz.com-a müraciət edən sözügedən şəxslər – Kərimov Afiq Ağamusa oğlu, Kərimov Orxan Əhəd oğlu və Xəlilov Şahid Ziyəddin oğlu bildirirlər ki, onlar şərik olublar və 10 noyabr 2023-cü il tarixində hər biri 12-13 kiloqram olan 3 min 880 yeşik xurmanı İkram Vəliyevin direktoru olduğu İsmayıllı rayonunun Qubaxəlilli kəndində yerləşən soyuducu anbara təhvil veriblər.
“Razılaşmaya əsasən, 2024-cü ilin 15 yanvar tarixinə kimi məhsulumuzun soyuducu anbarda saxlanılması üçün əvvəlcədən 8 min manat pulu ödədik. Dekabırın sonuna kimi meyvənin müəyyən hissəsini soyuducu anbardan götürüb satdıq. Ancaq 2024-cü il yanvarın 3-də bizə məlum oldu ki, 34 min manat dəyərində məhsulumuz soyuducu anbarda baş vermiş nasazlığa görə xarab olub. İkram Vəliyev bizə vurduğu ziyanı ödəmək istəmir. Bunu da İsmayıllı Rayon Polis Şöbəsində işləyən oğlu Nicat Vəliyevə arxayın olaraq edir. Bizi hədələyir. Deyir, istədiyiniz yerə şikayət edin”.
Sakinlər iddia edirlər ki, məsələ ilə bağlı polisə müraciət etsələr də, şikayətlərinə baxan olmayıb.
“Biz həmin meyvələri sakinlərdən almışdıq ki, sataq, gəlir əldə edib onların pulunu ödəyək. İndi isə İkram Vəliyevin özbaşınalığına görə kənd sakinlərinə borclu qalmışıq. Pulu ödəyə bilmirik, hər gün evimizə borc sahibləri gəlir. Artıq həyatımızdan bezmişik”.
İkram Vəliyev isə Yeniavaz.com-a bildirib ki, haqqındakı iddialar həqiqəti əks etdirmir:
“Həmin soyuducu anbar direktoru olduğum “Kənd” MMC-yə məxsusdur. Bu il istifadəyə verilib. Sözügedən şəxslər məhsullarını götürüb Rusiyaya aparıblar. O məhsulun sərhəddən keçməsinə dair müvafiq sənədlər də var. Deyirlər ki, gedib Rusiyada ziyan eləmişik. Mən kiminsə malını Rusiyada satan deyiləm. Hazırda soyuducuda nə qədər yararsız məhsulu varsa dəyərini ödəməyə hazırıq. Onlar iddia edirlər ki, mənimlə tanışdırlar və məhsulu mənimlə razılaşaraq anbara yerləşdiriblər. Amma bu belə deyil. Onlar anbarın müdiri ilə razılaşıb məhsullarını oraya qoyublar, sonra da gəlib götürüblər. Anbarda cəmi 90 yeşik malları qalıb. Müddət də başa çatıb. İndi gəlib götürmürlər ki, guya bizə görə zərər ediblər”.

İkram Vəliyev

Məsələ ilə bağlı DİN-in mətbuat xidmətinin Şəki regional qrupuna ünvanladığımız sorğuya belə cavab verilib:
“Yanvarın 25-də Afiq Kərimov polisə müraciət edərək 34 min manat dəyərində xurmanı İsmayıllı rayonunun Qubaxəlilli kəndində yerləşən soyuducu anbara yığdığını, qarşılığında Mahmud adlı şəxsə 7 min manat pul verdiyini, ancaq həmin xurmanın anbarda tələf olduğunu bildirərək ona dəymiş maddi ziyanın ödənilməsində köməklik göstərilməsini xahiş edib.
Həmin anbarda işləyən Mahmud Namazov isə izahatında xurma yeşiklərini yanvar ayının 15-nə qədər anbarda saxlamasına dair A.Kərimovla əvvəlcədən razılaşdığını, ancaq sonuncunun anbara yığdığı 3 min 780 yeşik xurmadan 96-nı qeyd olunan tarixdə aparmadığını və sonrakı müddətdə soyuducu işləmədiyi üçün həmin xurmaların tələf olduğunu bildirib.
Hazırda məsələ ilə bağlı araşdırmalar davam etdirilir. Araşdırmanın nəticəsindən asılı olaraq əmələ hüquqi qiymət veriləcək”.

Azərbaycanda 7 fevral tarixində keçirilən Prezident sseçkisindən sonra hökumət yenilənəcək.

Ölkədə formalaşacaq yeni hökumətdə, icraedici orqanlarda rəhbər vəzifələrə dinamik, əhali ilə daim təmasda olan, təşkilatçı şəxslər gətiriləcək.

AzFakt.com saytının əldə etdiyi məlumata görə vəzifələrindən uzaqlaşdırılacaq məmur kateqoriyası əsasən rayon icra hakimiyyətlərinin başçılarını əhatə edəcək.

Uzun illərdir vəzifədə olan, səlahiyyətlərindən istifadə edib özlərinə varidat toplayan, əhali ilə təmas qurmayan, onların qayğı və problemlərini dinləməyən icra hakimiyyəti başçıları vəzifələrindən çıxarılmaları ilə yanaşı, eyni zamanda bu şəxslərə qarşı hüquqi addımlar da atılacaq.

Mötəbər mənbədən əldə etdiyimiz məlumata görə vəzifəsindən çıxarılacaq icra başçılarından biri də Zaqatala rayon İcra Hakimiyyətinin başçısı Mübariz Əhmədzadədir.

On beş ildir Zaqatalaya rəhbərlik edən Mübariz Əhmədzadənin özünə böyük biznes imperiyası qurduğu barədə mediada faktlarla təqdim olunmuş məlumatlar yer almaqdadır.

Eyni zamanda Zaqatala rayon İcra Hakimiyyətinin başçısı Mübariz Əhmədzadənin adı Prezident Administrasiyasına ən çox şikayət ünvanlananan məmurların da siyahısında yer almaqdadır.

Hələ bir müddət öncə Zaqatalanın Bəhmətli kəndində Vətən müharibəsi qazilərinə aid torpağın Mübariz Əhmədzadə tərəfindən satıldığı iddia edilirdi.

Qeyd edək ki, Mübariz Əhmədzadə vəzifədə olduğu illərdə topladığı sərmayələr heç də rayon icra hakimiyyətlərinin başçılarına uyğun deyil. Belə ki, ona aid olan mülklərin siyahısında Birləşmiş Krallıqda xeyli sayda mülklərin olduğu qeyd edilir.

Zaqatalada icra başçısının xeyir-duası ilə torpaq sahələrinin kütləvi şəkildə satıldığı yuxarıda qeyd etdiyimiz fakla yekunlaşmır.

Rayonunun Əliabad kəndinin də ümumi istifadədə və bələdiyyə fondunda olan torpaq sahələrinin 49 illiyinə məmurlara satıldığı bildirilir.

Əldə etdiyimiz məlumata görə daha bir narazılıq dövlət başçısının tapşırığına əsasən Zaqatala rayon icra Hakimiyyətinin başçısının yerlərdə əhali ilə səyyar qəbul keçirməməsidir.

Ötən 2023-cü ilin statistikasına nəzər yetirdikdə Mübariz Əhmədzadənin rayonun 5-6 kəndinə səfər etdiyi görünür. Bu səfərlər isə müəyyən tədbirlərlə əlaqəli olduğundan sakinlərlə səyyar qəbul-görüş keçirilməyib.

Daha acınacaqlı məqam isə ölkənin post-neft dövrünə hazırlaşdığı, qeyri-neft sektorunun, xüsusən də turizmin inkişafını sürətləndirdiyi bir zamanda böyük potesialı olan Zaqatalanın ümumi inkiafdan geri qalmasıdır.

Bu gün Zaqatala rayonu abadlıq və quruculuğa görə dövlət büdcəsindən milyonlarla vəsait ayrılmasına baxmayaraq, sözün əsl mənasında nimdaş gündədir. Rayonun mərkəzi hissəsi istisna olmaqla demək olar ki, hər yerdə yarımçıq, yamaqlı işlər aparılıb.

Dövlət satınalmaları vasitəsilə büdcədən ayrılan vəsaitlərin də rayon İcra Hakimiyyətinin başçısına aid olan MMC-lər tərəfindən silindiyi iddia edilir.

Prezident İlham Əliyev isə iclasların birində bəzi məmurların büdcə vəsaii hesabına görüləcək işləri dəfələrlə şişirtdiklərini, işləri özlərinə yaxın şəxslərin adlarına rəsmiləşdirdikləri şirkətlərə ötürdüklərini vurğulayır, bu cür məmurlara qarşı amansız mübarizə aparılacağını vurğulayırdı.
TEREF: Xocanin Blogu bütün maraqlı tərəflərin fikrini dərc etməyə hazırdır.

Dövlət Tibbi-Sosial Ekspertiza və Reabilitasiya Agentliyinin qeyri-yaşayış sahəsinin icarəsi üzrə keçirmiş olduğu açıq tenderin nəticələri bir neçə gündür ki, elektron medianın gündəmini zəbt edib. Hamı dövlət qurumuna 320 min manata icarəyə yer verən Emil Vidadi oğlu Orucovu axtarır. Hamı onun hansısa yüksək çinli bir dövlət məmurunun yaxını olduğunu iddia edir. Həqiqətən də, oturduğu yerdə ildə bu qədər qazanc əldə edən şəxs kimdir?

Qeyd edək ki, dövlət satınalmalarının vahid internet portalına yerləşdirilmiş məlumata görə Dövlət Tibbi-Sosial Ekspertiza və Reabilitasiya Agentliyi qeyri-yaşayış sahəsinin icarəsi üzrə 19.10.2023-cü il tarixdə başladığı açıq tenderə yekun vurub və fiziki şəxs Emil Vidadi Oğlu Orucovla 320.067 manat məbləğində satınalma müqaviləsi bağlayıb. Elektron medida yayılan məlumatlarda Emil Vidadi oğlu Orucov heç bir məlumatın olmadığı bildirilir.

Aktualinfo.org-un dövlət satınalmalarının vahid internet portalına yerləşdirilmiş məlumatlar üzərindən apardığı araşdırmada məlum oldu ki, bu Dövlət Tibbi-Sosial Ekspertiza və Reabilitasiya Agentliyinin fiziki şəxs Emil Vidadi oğlu Orucovla bağladığı ilk satınalma müqaviləsi deyil.

Belə ki, Agentlik fiziki şəxs Emil Vidadi oğlu Orucovla icarə xidmətinin satın alınması üzrə 14.11.2020-ci ildə 289.872 manat, 20.12.2022-ci ildə 318.622,07 manat məbləğində satınalma müqavilələri bağlayıb. Göründüyü kimi Dövlət Agentliyi son üç il ərzində icarə xidmətinin satınalmasına 928 561 manat dövlət vəsaiti xərcləyib.

Maraqlı burasıdır ki, Dövlət Tibbi-Sosial Ekspertiza və Reabilitasiya Agentliyi tenderin şərtlər toplusunda icarəyə götürülən obyektin ünvanını açıq şəkildə göstərməyib. Halbuki, “Dövlət Satınalmaları Haqqında” Qanuna görə bunlar açıq şəkildə qeyd olunmalıdır. Şərtlər toplusunda satınalan təşkilatın ünvanı 2022- 2024-cü illərdə Bakı şəhəri, Yasamal rayonu, Nazim Hikmət 27, 3-cü mərtəbə, 2020-ci ildə isə Bakı şəhəri, Binəqədi rayonu 6-ci mkr., Mirmahmud Kazımovski küçəsi 134 göstərilir.

Qeyd edək ki, Dövlət Tibbi-Sosial Ekspertiza və Reabilitasiya Agentliyinin rəsmi portalında Tibbi-Sosial Ekspert Komissiyalarının ayrı ayrı ünvanlarda inzibatı binalarının olduğu göstərilir. Dövlət Tibbi-Sosial Ekspertiza və Reabilitasiya Agentliyinin inzibatı binası isə Bakı şəhəri, 6-cı mkr-n, Mirmahmud Kazımovski küç. 134 ünvanda yerləşir və ən müasir tibbi avadanlıqlarla tam təchiz olunub.

Buradan suallar yaranır. Dövlət Tibbi-Sosial Ekspertiza və Reabilitasiya Agentliyinə son üç il ərzində bir milyon manat civarında icarəyə yer götürməsi hansı zərurətdən yaranıb? İcarəyə götürülən bu bu yerdə Agentlik əhaliyə nə kimi xidmətlər göstərir? Bu icarə obyekti əhaliyə xidmət üçündürsə nə üçün ünvanı göstərilməyib?

Digər sual isə fiziki şəxs Emil Vidadi oğlu Orucovla bağlıdır. Kimdir bir dövlət qurumundan üç il ərzində bir milyon manata yaxın icarə haqqı alan Emil Orucov?

İnternet axtarış sistemləri üzərində əldə etdiyimiz məlumatlarda Emil Vidadi oğlu Orucovun 2018-ci ildə “Milli ərzaq təhlükəsizliyi sisteminin inkişafının iqtisadi aspektləri” mövzusunda Kənd Təsərrüfatı Nazirliyinin Kənd Təsərrüfatının İqtisadiyyatı Elmi-Tədqiqat İnstitutunda iqtisadiyyat üzrə fəlsəfə doktoru elmi dərəcəsi almaq üçün dissertasiyasının avtoreferatı təqdim olunub. Onun bu elmi adı alıb, almaması, iş yeri barədə əlavə heç bir məlumat yoxdu.

Aktualinfo.org-un əldə etdiyi məlumata görə o, uzun müddətdir təhsil sistemində çalışan, 1997–2016-cı illərdə Bakı Sənaye-Pedaqoji Kollecinin direktoru olmuş, 2016-cı ildən isə Azərbaycan Dövlət İqtisad Universitetinin nəzdində Sosial-İqtisadi Kollecin direktoru vəzifəsində çalışan Vidadi Orucovun oğludur.

Dövlət Vergi Xidmətinin reyestr məlumatlarında Emil Vidadi oğlu Orucovun fiziki şəxs kimi 08.14. 2020-ci il tarixdə dövlət qeydiyyatına alındığı göstərilir. Reyestr məlumatlarında fiziki şəxs Emil Vidadi oğlu Orucovun hüquqi ünvanı BAKI ŞƏHƏRİ NİZAMİ RAYONU, RÜSTƏM RÜSTƏMOV, ev 34, mənzil 65 göstərilib.

Mərkəzi Seçki Komissiyasının seçicilərin siyahısında 25 saylı Nizami II seçki dairəsindəki 29 saylı məntəqənin yerləşdiyi ərazidə, RÜSTƏM RÜSTƏMOV, ev 34 ünvanında Orucov Emil Vidadi oğlunun 1987-ci il təvəllüdlü olduğu göstərilir. Həmin ünvanda, yəni RÜSTƏM RÜSTƏMOV, ev 34-də həm də 1990-cı il təvəllüdlü Orucov Tural Vidadi oğlu və 1956-cı il təvəllüdlü Orucov Vidadi Ömər oğlu da daimi pasport qeydiyyatındadırlar.

Rəsmi dövlət qurumlarının portalından əldə etdiyimiz məlumatlardan da göründüyü kimi Dövlət Agentliyinə son üç il ərzində bir milyon manata yaxın icarəyə yer vermiş fiziki şəxs Emil Vidadi oğlu Orucov dövlət məmuru, Dövlət İqtisad Universitetinin nəzdində Sosial-İqtisadi Kollecin direktoru, 1956-cı il təvəllüdlü Vidadi Ömər oğlu Orucovun oğludur.

Bəs Vidadi Orucov ünvanı gizlədilən və yaxud da açıqlanmayan belə bir obyekti hansı vəsaitlər hesabına ərsəyə gətirib çıxarıb? Təbii ki, aylıq maaşla bunu heç kim edə bilməz. Yuxarıda vurğuladığımız kimi Vidadi Orucov uzun müddətdir təhsil sistemində çalışır. Elektron medianın iddia etdiyi kimi o qədər də yüksək çinli məmur deyil, sadə bir Kollec direktorudur. Azı 26 ildir kollec direktoru vəzifəsində oturmuş Vidadi Orucovun yığdığı pullar da təbii ki, qanunsuz şagird qəbullarından, imtahanlardan toplanan rüşvət və dövlət vəsaitlərinin mənimsənilməsi hesabına başa gəlib.

Məlumatlara görə Vidadi Orucov uzun müddət sabiq Baş prokuror Zakir Qaralova arxalanaraq tutduğu vəzifələrdə istədiyini edib. Hazırda 68 yaşı olmasına baxmayaraq Vidadi Orucov Sosial-İqtisadi Kollecin direktoru vəzifəsini əldən vermək istəmir. Necə deyərlər, həm icarəyə verdiyi obyektlərdən, həm də dövlət vəsaitlərini talamaqla qazanır. Kim bilir, onun üzdə olmayan və icarəyə verdiyi belə obyektlərin sayı nə qədərdir?
Aktualinfo.org

Azərbaycan Respublikasının Konstitusiyasına və “İnformasiya əldə etmək haqqında” Azərbaycan Respublikasının Qanununa əsasən 15.01.2024-cü il tarixində Kürdəmir rayon İcra Hakimiyyəti başçısının Kürdəmir şəhər İnzibati Ərazi Dairəsi üzrə nümayəndəsi Abuşov Rauf Səfər oğluna 9 sualdan ibarət informasiya sorğusu ünvanlamışam. Nümayəndə Rauf Abuşov mənim sorğuma cavab verməmək üçün əlindən gələni etməklə bərabər həm Azərbaycan Respublikası Prezidenti Cənab İlham Əliyevin 2012-ci il 6 iyun tarixli 648 nömrəli Fərmanı ilə təsdiq edilmiş Yerli icra hakimiyyətləri haqqında əsasnamənin tələblərini pozmuş həm də vəzifəsini icra etməkdən yayınmışdır.

Mənim ünvanladığım həmin informasiya sorğusunun ilk sualı belə olub: 2023-cü ildə Kürdəmir şəhər əhalisinin sosial əhəmiyyətli sifarişlərini öyrənərək icra hakimiyyətinin başçısına hansı təklifləri vermisiniz? Kürdəmir şəhər İnzibati Ərazi Dairəsi üzrə nümayəndə Rauf Abuşov isə 19.01.2024-cü il tarixli 5-56·12/2-07 saylı cavab məktubunda qeyd edib ki: Kürdəmir RİHB-nin şəhər İnzibati Ərazi Dairəsi üzrə nümayəndəliyi tərəfindən 2023-cü ildə Kürdəmir şəhər əhalisinin sosial əhəmiyyətli sifarişlərinin öyrənilməsinə dair rayon İcra Hakimiyyəti Başçısına təklif verməmişdir.

Azərbaycan Respublikası Prezidenti Cənab İlham Əliyevin 2012-ci il 6 iyun tarixli 648 nömrəli Fərmanı ilə təsdiq edilmiş Yerli icra hakimiyyətləri haqqında əsasnamə:

5. İnzibati ərazi dairələri üzrə və sahə inzibati ərazi dairələri üzrə yerli icra hakimiyyəti başçısı nümayəndələrinin vəzifə və səlahiyyətləri

5.1.2. əhalinin sosial əhəmiyyətli sifarişlərini öyrənərək, yerli icra hakimiyyətinin başçısına təkliflər vermək;

Deməli belə aydın olur ki, Kürdəmir RİHB-nın Kürdəmir şəhər İƏD üzrə nümayəndəsi Rauf Abuşov 2023-cü il ərzində Kürdəmir şəhər əhalisinin sosial əhəmiyyətli sifarişlərinin öyrənilməsi istiqamətində heç bir iş görməyib! Sual yaranır ki, Rauf Abuşov o vəzifəyə Dövlətdən müftə maaş almaq üçünmü təyin edilib? Cənab Prezident çıxışlarında qeyd edir ki, məmurlar xalqa xidmət etməlidir və Rauf Abuşov da deyir ki, Kürdəmir şəhər əhalisinin sosial əhəmiyyətli sifarişlərinin öyrənilməsi istiqamətində heç bir iş görməmişəm. Kürdəmir Rayon İcra Hakimiyyətinin Başçısı cənab Elxan İbrahimova bu məsələ ilə əlaqədar 22 yanvar 2024-cü il tarixində ərizə ilə müraciət etsəm də heç bir cavab ala bilməmişəm. Görünən odur ki, canab başçı da icra nümayəndəsinin səhvindən xəbərdardır lakin hələ ki, tədbir görmür. Kürdəmir RİHB-nın Kürdəmir şəhər İƏD-i üzrə nümayəndəsi Rauf Abuşov nə məqsədlə o vəzifəyə təyin edilib? Bir halda ki, bu şəxs öz vəzifəsini icra etmirsə o vəzifədə niyə olmalıdır? Çox xahiş edirəm bu sualıma media nümayəndələri cavab tapsın.

Azərbaycan Respublikası Prezidenti Cənab İlham Əliyevin fərmanı ilə təsdiq edilmiş Yerli icra hakimiyyətləri haqqında əsasnamənin tələblərinə nəyə görə Kürdəmir RİHB-nın Kürdəmir şəhər İƏD-i üzrə nümayəndəsi Rauf Abuşov əməl etmir? Əsasnamənin 5.1.2-ci bəndinə əsasən yerli icra hakimiyyəti başçısı nümayəndələrinin vəzifəsidir ki, əhalinin sosial əhəmiyyətli sifarişlərini öyrənərək, yerli icra hakimiyyətinin başçısına təkliflər versin. Lakin Kürdəmir RİHB-nın Kürdəmir şəhər İƏD-i üzrə nümayəndəsi Rauf Abuşov cavabda deyir ki, Kürdəmir şəhər əhalisinin sosial əhəmiyyətli sifarişlərinin öyrənilməsi istiqamətində 2023-cü ildə heç bir iş görməmişəm. Bəlkə bu şəxs vəzifə səlahiyyətlərindən sui-istifadə edərək başqa qanunsuz işlərlə məşğuldur? Bəlkə heç vəzifəsinin nədən ibarət olduğunu hələ də bilmir? Xahiş edirəm aidiyyatı qurumlar bu məsələ ilə əlaqədar ciddi araşdırma aparsın. Əgər icra nümayəndəsi Rauf Abuşov öz vəzifəsini düzgün icra etsəydi, sorğuma cavabda da Kürdəmir şəhər əhalisinin sosial əhəmiyyətli sifarişlərinin öyrənilməsi istiqamətində 2023-cü ildə hansı işləri gördüyünü fəxrlə cavabda qeyd edərdi. Ona görə də hesab edirəm ki, Kürdəmir RİHB-nin Kürdəmir şəhər İƏD-i üzrə nümayəndəsi Rauf Abuşovun fəaliyyəti ciddi şəkildə araşdırılmalı və əgər vəzifəsini icra edə bilmirsə vəzifəsindən azad edilməlidir. Ümüd edirəm ki, müraciətimdən sonra həmin vəzifəyə layiqli, dövlətinə və xalqına düzgün xidmət edən bir şəxs təyin ediləcəkdir.

Kürdəmir rayon İcra Hakimiyyəti başçısının Kürdəmir şəhər İnzibati Ərazi Dairəsi üzrə nümayəndəsi Rauf Abuşovun mənə göndərdiyi 19.01.2024-cü il tarixli 5-56·12/2-07 saylı cavab məktubunu əlavə edirəm və xahiş edirəm ki, həmin məktubu qətiyyən saytlarda paylaşmayasınız. Sadəcə olaraq media nümayəndələrinin mənim yazdıqlarımın həqiqət olmasını bilmələri üçün həmin məktubu müraciətimə əlavə edirəm. Öncədən təşəkkür edirəm.

Asim Əvəz oğlu Əliyev
TEREF: Xocanin Blogu
Səhifəmiz cavab vermək üçün hamının üzünə açıqdır!

Bir neçə gün əvvəl Bərdə rayon 53 saylı məktəbinin hərbi rəhbəri ona qarşı olan haqsızlıq və qanunsuzluqlar barədə bildirib. Əmir Aslanovun sözlərinə görə, 2023-cü ildə ona bildiriblər ki, o ixtisara düşüb və daha məktəbdə işləyə bilməyəcək. Nəticədə 21 il iş stajı olan müəllim işsiz qalıb. Başqa məktəblərdə işləmək üçün müxtəlif qurumlara müraciət etsə də, qəribədir ki, bütün müraciətləri cavabsız qalıb.

Və bu yaxınlarda Aslanova təsadüfən məlum olub ki, işdən çıxarıldığına dair sözlərinə baxmayaraq, o, hərbi rəbər kimi reyestrdə qeydiyyatda qalmaqda davam edir və hətta sənədlərlə işinə görə maaş da alır. Burada bir sual yaranır. Əgər Aslanov sənədlərlə işdən azad olunmursa, onun maaşı hara gedir və bu qanunsuzluqların arxasında kimlər dayanır.
Bütün bunları hələ də aydınlaşdırmaq lazımdır, amma bir şey bəllidir. Belə fəaliyyətlər cinayət qanunu ilə cəzandırılır, ona görə də Bərdə rayon rəhbərliyinin xəbəri olmadan kimsənin orada bu cür fəaliyyətə risk etməsi ehtimalı azdır. Və əgər burada yüksək vəzifəli məmurların əli varsa, ola bilər bu yeganə hal deyil ki, ayrı-ayrı şəxslərin adına saxta təyinatlar edirlər və dövlət vəsaitlərini bu şəkildə mənimsəyirlər.
Palitra

Azərbaycanda bir çox sahələrin monopoliyada olması uzun illərdir cəmiyyətin ən çox müzakirə etdiyi məsələlərdəndir. İnhisarlaşma xərçəng xəstəliyi kimi ölkənin həm iqtisadi, həm də elm və təhsil sahəsini sarmaqdadır. Dəhşətli olan isə hökumətin struktur islahatları prosesində yaratdığı yeni qurumlar da monopoliya sisteminə alınır.

Hurriyyet.az AzFakt.com-a istinadən xəbər verir ki, hökumətin apardığı struktur islahatları dalğasında yeni yaranan qurumlardan biri də Elm və Təhsil nazirliyinin nəzdində fəaliyyət gösətərən Təhsil Tələbə Krediti Fondudur.

Təhsil Tələbə Krediti Fondu 2021-ci ildə təsis edilib. Qanunvericiliyə görə Fondun idarəetmə orqanları Himayəçilər Şurası və İdarə Heyətinin sədridir. Hazıda Fondun Himayəçilik Şurasının üzvləri İdris İsayev, Elnur Əliyev, Anar Əliyev, Əliyar Məmmədyarov, Firsənd Qurbanov, Yaqub Piriyev, Fatimə Babayeva, İdarə Heyətinin sədri isə Araz Paşayevdir.

Lakin mediada zaman-zaman dərc edilən xəbərlərin analizləri Təhsil Tələbə Krediti Fondunun idarəetməsinin arxasında "gizli qüvvələrin" olduğunu göstərir. Bu barədə bir az sonra.

İndi isə bir neçə gün öncə yerli mediada Təhsil Tələbə Krediti Fondunun keçirdiyi tenderlər barədə dərc edilən məqaləyə diqqət yetirək. Yeniçağ.az saytı araşdırma yazısında Təhsil Tələbə Krediti Fondunun 2023-cü ilin noyabr ayının 22-də keçirdiyi satınalma barədə yazaraq Fondun “Təhsil Tələbə Krediti Fondunun fəaliyyəti ilə bağlı ictimai sorğunun keçirilməsi xidmətinin satın alınması” lotu üzrə keçirdiyi 53 min 100 manatlıq satınalmada qalib seçilən “PRİMA CONSALTİNG” Məhdud Məsuliyyətli Cəmiyyətinin Təhsil Tələbə Krediti Fondunun sədrinə məxsus olduğunu, Təhsil Tələbə Krediti Fondunun sədrinin vaxtilə özəl sektorda fəaliyyət göstərdiyi zaman bu təşkilatın dövlət satınalmalarında iştirakına və qalib gəlməsinə dəstək verdiyini yazırdı.

Saytımızın araşdırması zamanı məlum oldu ki, doğrudan da Təhsil Tələbə Krediti Fondunun sədri Araz Paşayev bu təyinatından əvvəl özəl sektorda çalışıb.

Araz Paşayev

Belə ki, o 2017-ci ildə dövlət qeydiyyatına alınan "UNİVERSİTAS-İNTERNATİONAL" Məhdud Məsuliyyətli Cəmiyyətinin qanuni təmsilçi və direktoru olub.

"UNİVERSİTAS-İNTERNATİONAL" MMC bir çox dövlət qurumlarının dəyəri yüz minlərlə ölçülən tenderlərində zaman-zaman qalib edilib.

Əlbəttə, yeni yaradılan bir təşkilatın qısa zaman kəsiyində dövlət tenderlərində "at oynatması" səbəbsiz ola bilməz.

"UNİVERSİTAS-İNTERNATİONAL" MMC-nin az qala hər ay yüzminlik, hətta konsorsium çərçivəsində milyonluq layihənin qalibi olması bu şirkətin arxasında daha böyük əlaqəyə malik şəxsin və yaxud şəxslərin olmasından xəbər verirdi.

Bəs kim idi fövqəlqüvvə?

"UNİVERSİTAS-İNTERNATİONAL" Məhdud Məsuliyyətli Cəmiyyəti qeydiyyata alınarkən hüquqi ünvanı bu şirkətin arxasında kimlərin dayandığına az da olsa işıq salırdı.

Belə ki, şirkət qeydiyyata alınarkən hüquqi ünvanı MMC-nin hüquqi ünvanı Nərimanov rayonu, Koroğlu Rəhimov küçəsi ev 13A, mənzil 125 göstərilirdi. O zaman medianda bu ünvanın Şəhərsalma və Arxitektura Komitəsinin sədrinin keçmiş müşaviri Rüfət Mahmuda məxsus olduğu yazılmışdı.

Rüfət Mahmud

Qeyd edək ki, Rüfət Mahmud o vaxt həm də Təhsil Nazirliyində Maarifçi Tələbə Kredit Fondunun icraçı direktoru olub.

Bu barədə mediada məlumatlar dərc edildikdən bir müddət sonra "UNİVERSİTAS-İNTERNATİONAL" Məhdud Məsuliyyətli Cəmiyyətinin hüquqi ünvanı dəyişdirildi.

Bir müddət sonra isə - Maarifçi Tələbə Kredit Fondunun icraçı direktorunun mənzilində ilk hüquqi ünvanı olan "UNİVERSİTAS-İNTERNATİONAL" MMC-nin qanuni təmsilçisi Araz Paşayev 2021-ci il iyunun 17-də dövlət başçısının imzaladığı Fərman əsasında Elm və Təhsil Nazirliyinin tabeliyində yaradılan Təhsil Tələbə Krediti Fondunun İdarə Heyətinə sədr gətirildi.

Bu isə hazırda Təhsil Tələbə Krediti Fondunun idarəetməsinin arxasında Təhsil Nazirliyində Maarifçi Tələbə Kredit Fondunun icraçı direktorunun olması ehtimallarını yaradır.

Xatırladaq ki, Fondun yaradılmasında əsas məqsəd Təhsil tələbə krediti sistemini tətbiq etməklə təhsilə əlçatanlığı təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirməkdir.

Təhsil Tələbə Krediti Fondunun ötən il dövlət büdcəsi hesabına formalaşan resurs zərfi 110 milyon manata çatdırılıb.

Məsələ ilə bağlı Təhsil Tələbə Krediti Fonduna göndərdiyimiz sorğu cavablandırılmadı.

Uzun müddətdir müzakirə olunan, vətəndaşları və müvafiq qurumları narahat edən problem, deyəsən, artıq həllini tapır. Söhbət sənədsiz evlərə çıxarışların, müvafiq digər sənədlərin verilməsi məsələsindən gedir. Bununla bağlı İqtisadiyyat Nazirliyi yanında Əmlak Məsələləri Dövlət Xidmətinin rəisi Mətin Eynullayevin açıqlaması ictimaiyyətdə böyük ümidlər yaradıb. Amma sözügedən qurumun bu işin öhdəsindən gələ biləcəyini düşünmək çətindir.

Bir zamanlar bu sahədə Kərəm Həsənov kimi odioz oliqarxın tam hökmranlığı olduğu halda indi Mətn Eynullayevin eyni idarəçilik güçünə sahib olduğunu demək olmaz.. Qurum daxilindən cumhuriyyet.az-a daxil olan məlumata görə, burda xidmət rəisindən daha çox digər fiqurlar söz sahibinə çevrilib. Məsələn 2020-ci ilin mayında Əmlak Məsələləri üzrə Dövlət Xidmətinin rəis müavini vəzifəsinə təyin edilən Yusubov Elçin Mustafa oğlu xidmət daxilində böyük bir şəbəkə yaradıb və yeri gəldikdə cənab Eynullayevə də güc göstərə bilir. Elçin Yusubov iqtisadçıdır, əmək fəaliyyəti dövrünün böyük hissəsini dövlət qulluğunda xidmət edib. Son təyinata qədər Vergilər Nazirliyi yanında Bakı şəhər Lokal Gəlirlər Baş İdarəsinin rəisi vəzifəsində çalışıb, 44 yaşı var. Tutduğu postun imkanlarından istifadə edərək özünə oliqarxlardan ibarət çoxsaylı dost qazanan Elçin Yusubov hesab edir ki, artıq Əmlak Məsələləri Dövlət Xidmətində birinci adam olmağın vaxtıdır və buna onun ağlı da, əlaqələri də imkan verir. Xidmət daxilində bir çox aparıcı mütəxəssisi və şöbə müdirini öz tərəfinə çəkməyə nail olan Elçin Yusubov, Mətin Eynullayevi həm siyasi, həm də pxixoloji baxımdan təkləməyə çalışır. Mənbənin cumhuriyyet.az-a bildirdiyinə görə , rəis müavininin bu məsələdə ən çox güvəndiyi şəxs isə Dövlət əmlakının icarəyə verilməsi və dövlət ehtiyacları şöbəsinin müdiri vəzifəsini icra edən Taleh Arif oğlu Bəşirovdur. Elçin Yusubovun himayəsi ilə Taleh Bəşirov da milyonçuya çevrilib. Taleh Bəşirovun dövlət torpaqlarını məmurlara peşkəş etməsi qarşılığında aldığı Range Rover zamanla özü nəhəngliyində problemə çevrilməkdədir. Şöbə müdiri lovğalıq edərək ona tam məxfi ortamda təqdim edilən avtomobillə bağlı yaxın çevrəsinə açıq məlumat verməsi onunla yanaşı, ona həmin avtomobili hədiyyə edən şəxsi də çətin vəziyyətə salıb. Belə ki, Taleh Bəşirova məlum avtomobil general rütbəli məmurlardan birinin qardaşı tərəfindən bağışlanılıb ki, həmin şəxs adının bu məsələdə hallanmasını istəmir. Bu isə o deməkir ki, Taleh Bəşirov fərqinə varmadan özü ilə yanaşı, kölgədəkli milyoneri də çətin vəziyyətə salıb. Taleh Bəşirova avtomobil bağışlayan şəxsin kimliyi bəlli olarsa, o zaman həmin şəxs bu suallara cavab verməli olacaq.

Xidmətdə öz hökmranlığını yaradan digər bir şəxs Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinin strateji planlaşdırma şöbəsinin rəisi İlqar Həbiyevdir. Bu qurumda çoxdan çalışması səbəbi ilə özünü Əmlak Məsələləri Dövlət Xidmətinin ən qocaman əməkdaşı sayan İlqar Həbiyev hesab edir ki, bu qeyri-rəsmi status onun rəsmi qaydaları pozması, qanunun tələblərinə arxa çevirməsi üçün yetərlidir. Maraqlıdır ki, gecə-gündüz fərdi maraqları üçün çalışan İlqar Həbiyev həm də siyasi intriqa ustası və daha yüksək vəzifələrə hədsiz iddialı şəxs kimi tanınmaqdadır. Bununla bağlı cumhuriyyet.az-a daxil olan məlumata görə, şöbə rəisi hesab edir ki, onun bu qurumdakı “çoxillik zəhmətləri” lazımınca qiymətləndirilməyib, onun “daha ciddi vəzifələrdə təmsil olunmaq haqqı” tapdanıb. Bu səbəbdən də Əmlak Məsələləri Dövlət Xidmətində özü üçün potensial təhlükə hesab etdiyi şəxsləri ləkəmə, gözdən salma kampaniyası həyata keçirən şöbə rəisi, bununla “yüksək vəzifəyə layiq yeganə namizəd” statusu formalaşdırmağa çalışır. Həbiyevin sağ əli isə Dövlət Xidmətinin Torpaqların dövlət idarəetməsinin təşkili və geodeziya şöbəsinin müdir müavini, şöbə müdiri vəzifəsini icra edən Eldəniz Qafarovdur. Eldəniz Qafarov haqqında onu deyə bilərik ki, o əslən Şəmkirin Zəhim kəndindəndir, o, nə qədər torpaq sahəsinin məmurlara satılmasına imza atıb və rüşvətlə qazandığı milyonların hesabına oliqarxa çevrilib.

Belə bir mühitdə isə sənədsiz evlərin sənədləşdirilməsi prosesinin şəffaflığı inandırıcı görünmür. Nəzərə alsaq ki, bu məsələ ölkə rəhbərliyinin vətəndaşlara vədlri sırasındadır, demək, Mikayıl Cabbarovun idarəsində prezidentə qarşı sabotaj mafiyası fəaliyyət göstərir.