 |
|
|
Dövlət Təhlükəsizliyi Xidmətinin (DTX) Mədəniyyət Nazirliyində əməliyyat keçirməsi bu nazirlikdə baş verənləri, daha doğrusu, ciddi korrupsiya hallarına yol verilməsi, eləcə də nazir Anar Kərimovun postuna adekvat olmayan fəaliyyətini gündəmə gətirdi.
Mədəniyyət adına daha çox “maneken qızlarla” foto çəkdirməsi ilə yadda qalan Anar Kərimov sələfi Əbülfəz Qarayevdən heç də geri qalmır. Əbülfəz Qarayevin postundan getməsinə səbəb də korrupsiya halları və DTX-nın keçirdiyi əməliyyat nəticəsində ortaya çıxan faktlar idi. Əslində Anar Kərimov sələfindən dərs çıxarmalı, fəaliyyətini şəffaf qurmalı, mədəniyyət adına işləməli idi. Lakin o nazir postuna keçən kimi Əbülfəz Qarayevin izi ilə getməyi seçdi.
Ortaya çıxan faktlar da bunu açıq şəkildə göstərir. Məlumdur ki, Anar Kərimovun nazirliyi dövründə dövlət büdcəsindən Mədəniyyət Nazirliyinə milyonlarla vəsait ayrılıb. Məqsəd mədəniyyətimizin, incəsənətimizin inkişafına nail olmaqdır. Lakin Anar Kərimov bu vəsaiti doğru istiqamətdə xərcləmək əvəzinə, mənimsəmək, oğurlamaq yolunu seçdi. Sanki onu nazir ona görə qoyublar ki, dövlət vəsaitini “yeyib talasın”.
Şuşa və Hacıkənd festivallarındakı biabırçılıqlar hər kəsin yadındadır, bu tədbirlərin keçirilməsi üçün ayrılan milyonlarla vəsaitin necə “yoxa çıxdığı”nı da hamı xatırlayır. Bu bir yana, sən demə Anar Kərimov Vətən müharibəsi haqda filmin çəkilməsinə ayrılan vəsaiti də mənimsəyibmiş.
Mədəniyyət Nazirliyinin 44 günlük Vətən müharibəsi haqqında 8 seriyalı bədii filmin çəkilməsi üçün elan etdiyi tenderin qalibi Türkiyənin “Bozdağ Film Yapım Prod. Rek. İnş. Tur. San. Tic. AŞ” şirkəti olmuşdu. Seriyalın çəkilişi üçün dövlət büdcəsindən 3 milyon vəsait ayrılmışdı. Bəs bu pullar haradadır? Bəlli deyil. Çünki bu filmin ilk seriyasının nümayişi bu il noyabrın 8-də Zəfər Günündə nəzərdə tutulsa da, ancaq Türkiyəli çəkiliş qrupu filmi yarımçıq qoyaraq, Azərbaycandan gedib.
Məlumatlara görə, buna səbəb Mədəniyyət Nazirliyindəki korrupsiya hallarıdır. Nazirlik filmin çəkilməsi üçün ayrılan 3 milyon vəsaitin 2,2 milyonunu Türkiyə şirkətinə hələ də ödəməyib.
Mədəniyyət Nazirliyinin dövlət büdcəsini talaması barədə yazılanlar ilk hal deyil, bu yaxınlarda baş tutan Azərbaycan Yazıçılar Birliyinin Qurultayından Mədəniyyət Nazirliyinin “pul silməsi” iddia olunur. Məlum 203 min söhbəti də hər şeyin açıq etirafı kimi qəbul edilə bilər.
Əldə etdiyimiz məlumata görə, dövlət büdcəsindən ayrılan milyonlarla vəsait Anar Kərimovun yaxın çevrəsinin adına təsis etdiyi və həyat yoldaşı Mehriban Kərimova tərəfindən idarə olunan “Cultral Network House” və digər şirkətlər üzərindən mənimsənilir.
Təsadüfi deyil ki, Anar Kərimov həyat yoldaşı Mehriban Kərimova üçün paytaxtın mərkəzi küçələrindən birində son bir ildə əldə etdiyi, ümumi sahəsi 400 kvadrat, dəyəri təqribən 3 milyondan çox olan ofis alıb. Bu pulların mənbəyi haradır? Əlavə şərhə ehtiyac yoxdur...
Hazırda Mədəniyyət Nazirliyinin üzərinə düşən işləri Anar Kərimovun yerinə Heydər Əliyev Fondu həyata keçirir. Özü də tam şəffaf və narazılıq yaratmadan. Elədirsə, bəs illik büdcəsi 600 milyona yaxın olan Mədəniyyət Nazirliyi, o cümlədən Anar Kərimov nə işlə məşğuldur? Dövlət büdcəsindən ayrılan milyonlarla vəsait hara xərclənir? Niyə Anar Kərimov çıxıb bunun hesabatını vermir? Mədəniyyət Nazirliyində mütəmadi olaraq baş verən həbslər və bu qurumun yarıtmaz fəaliyyəti bir daha sübut etdi ki, Anar Kərimov nazir postunda özünü doğrultmadı!
Demokrat.az
Milli Məclisin deputatı Ülvi Quliyevin oğlu Orxan Quluzadə ilə bağlı problem yenidən gündəmi zəbt etmək üzrədir. Bir sözlə, oliqarx həyatı yaşayan Orxan Qulizadə heç də böyük sahibkar və yaxud sahibkar övladı deyil. Sadəcə Millət vəkilinin övladıdır. GundemXeber.Az bildirir ki, Ülvi Quliyev zaman-zaman mətbuatın gündəmində heç də xoş xatirələrlə qalmayıb. Təbii ki, deputatın aldığı əmək haqqı imkan vermir ki, ölkə xaricində övladı at oynatsın. Ən maraqlısı isə əldə etdiyi mülklər, bahalı avtomobillər və digər obiyektlərə sahib çıxmasıdır. Sadaladıqlarımızla bağlı dərin araşdırmalarımızdan sonra aydınlıq gətiriləcək. Eyni zamanda iddialı məlumatlar arasında Ülvi Quliyevin gənc oğlu Orxan Quluzadənin Avropadakı həyatında da mühacir şəxsin ciddi dəstəyinin olduğu yer alır. Atası Ülvi Quliyev dərman biznesi ilə məşğuldur, “LOĞMAN FARM” tibb şirkəti də Orxan Quluzadənin adına qeydiyyatdan keçib. Ü. Quliyevin adı bu vaxta qədər bir çox qalmaqallarda hallanıb. Belə ki, onunla bağlı media üzərindən apardığımız araşdırmalarda ölkədən qanunsuz kürü çıxartmaqdan tutmuş, biznes fəaliyyətinə, MTN-lə ilişkilərə qədər müxtəlif məlumatlara rast gəlindi. Ancaq təqdim edəcəyimiz iddia Ülvi Quliyevin nəinki deputat kimi karyerasına son qoya bilər, hətta onun azadlqda olmasını şübhə altına salar.
Belə ki, söhbət Deputat Ülvi Quliyevin dostu, Avropa mühacir müxalifətinin fəallarından biri olan Laçın Məmişovla hazırkı əlaqələrindən gedir. Çünki Ülvi Quliyevlə Laçın Məmişovun arasındakı əlaqələr depuatatın hakimiyyət komandası yanında daha da gözdən düşməsinə səbəb olub. GundemXeber.Az olaraq mövzünü diqqətdə saxlayırıq. Onu da diqqətinizə çatdırırıq ki, iddialarla bağlı Millət vəkili Ülvi Quliyevin mövqeyini dərc etməyə də hazırıq. Bizi izləməyi unutmayın.
GundemXeber.Az
Naxçıvanda uşaq bağçasında işləyən müəllimlərin aylıq maaşından 40-80 manat pul tutulur. DİA,AZ bildirir ki, bu haqda "Gündəlik Naxçıvan"a bur qrup müəllim məlumat verib. Onlar deyir ki, buna səbəb kimi onların ixtisasca bağça müəllimi olmamaları göstərilir. Naxçıvanda bağçaların birində müəllim işləyən Z. Babayeva deyir ki, qoyulan şərt, maaşların kəsilməsi üçün bəhanədir:
“İxtisasca filoloqam, səkkiz ilə yaxındır bağça müəlliməsi işləyirəm. Hamı kimi mənim də maaşımdan kəsdilər. Deyirlər ki, ixtisasca Baxça müəllimi olmalısan. Bəs, indiyə kimi niyə demirdilər? Bilmirlər ki, hansı bəhanəyə pul yığsınlar. Eşitdiyimizı görə, Bakıdan gələn yoxlamaya verdikləri pulu bizdən çıxarırlar. Bu ay 50 manat az aldım. Mənim bu işdə kifayət qədər təcrübəm var. Özüm də pedaqoji təhsil almışam. Deyirlər ki, xoşun gəlmir işləmə. İşləməyim bəs nə edim?”
Digər şikayətçi Qəmər Seyidov deyib ki, oktyabr ayında onun maaşından 60 manat tutulub:
“Pedaqoji universitet bitirmişəm. 15 ildir bağçada işləyirəm. Artıq 55 yaşım var. Deyirlər ki, ixtisasın bağça müəllimliyi deyil. Bəs pedaqoq harda işləməlidir? Etiraz edəndə də deyirlər ərizəni yaz get. Haraya gedim? Bu yaşdan sonra nə işlə məşğul olum. O zaman ixtisasım üzrə iş versinlər”
DİA.AZ qeyd edir ki, Naxçıvan təhsilindəki eybəcərliklər təkcə bu faktla yekunlaşmır. Elə dünən sosial şəbəkələrdə bununla bağlı daha bir giley paylaşılıb.
Beləliklə Naxçıvandan yazırlar: "Qahab kənd məktəbində qadın 10 müəllimələrdən 10 manat iməcilik pulu yığılır... Bu xəbərlər mətbuatda paylaşıldığı üçün dünən Naxçıvan MR təhsil nazirliyi bir avtobus yoxlama tökmüşdü məktəbə..."
Dia.az olaraq məsələ ilə bağlı qarşı tərəfin də mövqeyini işıqlandırmağa hazırıq...
Naxçıvanın Ədliyyə naziri Daşqın Rəhimov Muxtar Respublikadakı ASAN Xidməti hərraca çıxarıb.
Qara Pişiyin dediyinə görə, Daşqın müəllim Naxçıvandakı Nigah evlərinin müdirlərinə xəbər yollayıb ki, bəs kim 10 min versə ASAN Xidmətin Nigah evi şöbəsinə onu təyin edəcək.
Bildirilir ki, bu vəzifəyə ən şanslı namizəd Naxçıvan şəhər 1 saylı Nigah evinin müdiri Leyla Camalbəyovadır.
Naxçıvan MR DİN-nin Kadrlar şöbəsinin rəisi Rahin Əmirovun həyat yoldaşı olan Leyla xanım həmkarları arasında ən varlısı sayılır.
Heydər Oğuyz
Teref.az olaraq xəbərdə toxunulan iddialarla bağlı qarşı tərəfin mövqeyini dərc edə bilərik!
Teref.az
Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) qlobal ərzaq qiymətlərinin oktyabr ayında əvvəlki ayla müqayisədə 0,1 faiz bəndi azalaraq 135,9 bənd təşkil etdiyini açıqlayıb.
TEREF.AZ statistik məlumatlara istinadən qeyd edir ki, indeks pik həddə çatdığı 2022-ci ilin mart ayı ilə müqayisədə 14,9% azalıb, 2021-ci ilin oktyabr ayı ilə müqayisədə isə 2% artıb. Oktyabrda taxılın qiyməti artıb, digər əsas məhsullar isə ucuzlaşıb. Taxıl Qiymət İndeksi oktyabr ayında bir əvvəlki aya görə 3 faiz artıb. Bitki yağı qiymət indeksi oktyabrda aylıq 1,6 faiz azalaraq 150,1 bənd olub. Bu dövrdə xüsusilə xurma, soya və kolza yağı qiymətləri azalıb.
Yağ iindeksi bir il əvvəllə müqayisədə 20 faiz azalıb. Süd məhsulları qiymət indeksi oktyabr ayında sentyabr ayına nisbətən 1,7 faiz azalaraq 140,1 bənd geriləyib. İndeks ötən ilin eyni dövrü ilə müqayisədə 15,4 faiz artıb. Ət qiymət indeksi aylıq bazda 1,4 faiz azalaraq 118,4 bənd olub və bir əvvəlki ilin eyni dövrünə görə 5,8 faiz artıb. Şəkər qiymət İndeksi də aylıq bazda 0,6 faiz azalaraq 109 bənd olub. Ötən ilin müvafiq dövrü ilə müqayisədə şəkərin qiyməti 8,5 faiz ucuzlaşıb.
Göründüyü kimi, FAO-nun ərzaq qiymətləri barədə ötən ay yayılan hesabatında dünya ərzaq qiymətlərində azalmanı müşahidə etmək mümkündür. Ancaq hazırda ölkədə ərzaq qiymətlərində azalma deyil, əksinə, artım özünü göstərir.
Qarşıdan Yeni ilin gəldiyini nəzərə alsaq, bazarda qiymətlər necə dəyişəcək?
İqtisadçı-ekspert Asif İbrahimli Cebhe.info-ya bildirdi ki, bahalaşma son aylarda dayanmadan baş verir və Azərbaycanda cütrəqəmli iflyasiya müşahidə edirik:
“Bunun da bir neçə daxili və xarici səbəbləri var. Bəzi məhsullar var ki, ölkədə istehsal olunur, ancaq maya dəyəri artıb. Ümumiyyətlə, həmin məhsulun və ya xidmətin ərsiyə gəlməsində çəkilən xərclər, məsələn, işçilik, əmək haqqı, xammal, daşınma, logistika, sertifikatlaşdırma, sənədlərin, lisenziya və icazələrin alınmasında çəkilən xərclər toplanılır, vergi xərcləri onun üzərinə gəlir və o cümlədən, mənfəət qoyulur və beləliklə qiymət əmələgəlmə prosesi həyata keçirilir.
Bu, daxildə istehsal olunan məhsullara da aiddir, yəni həmin məhsulun xammalında bahalaşma varsa, mütləq onun qiymətinə təsir edəcək. Azərbaycanda qiymət əmələ gəlmə prosesində təbii faktorlar var. Eləcə də bəzi strateji məhsulların qiymətlərini tənzimləyən Tarif Şurası var. Həmin Tarif Şurası da təbii faktorlara əsasən bəzən müəyyən məhsullarının qiymətinin qalxması və enməsi ilə bağlı qərarlar verir. Bu günə kimi biz praktikamızda hansısa bir məhsulun ucuzlaşması haqqında qərar verdiklərini görməmişik”.
Ekspertin sözlərinə görə, dünyanın bir çox ölkələri xüsusilə də xammalı, qidanı, məsələn, dənli bitkiləri, taxılı Rusiya və Ukraynadan alırdı:
“Rusiya və Ukrayna dünyanın 25-30 faiz taxıl təminatını həyata keçirən ölkədir. Bu sahədə problem yarandı və çörəyin, un məmulatlarının qiymətində artım müşahidə etdik. Biz Ukrayna, Rusiya, Belarusdan yağ, şəkər çuğunduru, qarabaşaq kimi məhsulları idxal edirdik. Adıçəkilən məhsulların bir qismi Azərbaycanda da istehsal edilsə də, daxili tələbatı ödəmədiyindən idxal edirik. Eyni zamanda, həmin ucuz məhsulların idxal edilməsi bəzi daxildə istehsal olunan məhsullarla nisbətdə balansı qoruyurdu, tənzimləyirdi və rəqabət mühiti yaradırdı.
Bu məhsulların da qiymətlərində bahalaşma müşahidə olunmağa başladı. Məsələn, sərnişindaşıma fəaliyyəti ilə bağlı eşidirik ki, şirkətlər bahalaşma ilə bağlı Tarif Şurasına müraciət edirlər. Bu da təbii faktorlardır. Sərnişindaşımada ən çox xərc yaradan amillər ehtiyat hissələri və yanacaqdır. Ötən il yanacağın qiymətində iki dəfə artım oldu və bu da maya dəyərinə öz təsirini göstərdi. Eləcə də ehtiyat hissələrinin bahalaşması müşahidə olundu. Bu da təbii ki, qiymətlərə təsirsiz ötüşməyə bilməzdi”.
Yeni illə bağlı qiymətlərə gəldikdə, ekspert deyir ki, Azərbaycanda onsuz da inflyasiya gündən-günə artır:
“Məsələn, yağ məhsullarının qiymətində 2 dəfəyə yaxın artım müşahidə olunur. Belə ki, 9, 11 manata olan yağı artıq 16-20 manata görmək mümkündür. Azərbaycan vətəndaşının ailə büdcəsinə ciddi təsir göstərir. Yeni ildə hamı bayramı qeyd edir və xüsusilə də qida məhsullarının alışını həyata keçirir. Həmin ərəfədə biz kütləvi tələbatın yarandığını görürük.
Kütləvi tələbat nəyə varsa, bahalaşma müşahidə olunur. Onsuz da inflyasiya, eyni zamanda, tələbatla bağlı artım olarsa vətəndaşlar üçün çətinliklər yaranır. Bunun qarşısının alınması məqsədilə müəyyən dövlət mexanizmləri həyata keçirilməlidir. Bəzi məhsulların ölkəyə gətirilməsi, istehsalında, bəzi vergilərdən azal edilməsində, kommunal ödənişlərdə müəyyən güzəştlərə gedilməlidir. Dövlət bəzi sahələrə subsidiyaların ayrılmasını və eyni zamanda qida təhlükəsizliyi məsələsi nəzərə alınmalıdır”.
Bakıdakı dayanacaq pavilyonlarındakı çatışmazlıqların aradan qaldırılacağı, bəzi dayanacaqların sökülməsi və yenilərinin alınıb quraşdırılması planlaşdırılır.Bakı Nəqliyyat Agentliyi balansında olan dayanacaq pavilyonlarında mövcud olan çatışmazlıqların aradan qaldırılması məqsədilə lazım olan mal, iş və xidmətlərin satın alınması; mövcud bəzi dayanacaqların sökülməsi və quraşdırılması işlərinin satın alınması; habelə, yeni dayanacaq pavilyonlarının satın alınması və quraşdırılması ilə bağlı keçirdiyi tenderi yekunlaşdırıb.
Bununla bağlı cumhuriyyet.az olaraq əldə etdiyimiz məlumata görə tenderin qalibi “SM Construction Supplies” MMC-dir. Bakı Nəqliyyat Agentliyi qalib şirkət ilə məbləği 2 milyon 340 min 394 manat olan müqavilə imzalayıb. 2018-ci ildə dövlət qeydiyyatına alınmış və 88,5 min manat nizamnamə kapitalı olan “SM Construction Supplies” MMC-nin qanuni təmsilçisi Ehtiram Heydərlidir.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən “SM Construction Supplies” MMC 20 avqust 2018-ci ildə dövlət qeydiyyatına alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nəsimi rayonu, Cavadxan küçəsi, ev 70, mənzil 19-da yerləşir. MMC-nin qanuni təmsilçisi isə Heydərli Ehtiram Etibar oğludur.
Məsələ ilə bağlı cumhuriyyet.az olaraq apardığımız araşdırmalar zamanı MMC-ilə bağlı yalnız Koronavirusla Mübarizə Fonduna 500 AZN köçürməsi barədə məlumata rast gəldik. Şirkətin qanuni təmsilçisi Ehtiram Heydərliyə gəlincə, onun adı iki məhkəmə çəkişməsində keçir. Bunlardan biri Novruzov Azad Pərviz oğlunun avtomobilin geri alınması, digəri isə “Bank Standart”ın kredit müqaviləsi üzrə yaranmış borcun ödənilməsi tələbi əsasında baş tutan məhkəmə işidir. Ehtiram Heydərli hər iki işdə cavabdeh qismində çıxış edir. Birinci işdə iddia təmin edilsə də, ikincidə baxılmamış saxlanılıb. //cumhuriyyet.az//
Azərbaycan və Türkiyə əleyhinə sərt açıqlamaları və daha çox prezident Rəcəb Tayyib Ərdoğanı tənqid etməsi ilə tanınan ABŞ senatoru Bob Menendez ilə onun erməni milliyyətindən olan həyat yoldaşı Nadin Arslanyan federal istintaq altındadır.
Noyabrın 8-də ABŞ-da keçirilən aralıq seçkilərdə demokratlar Senatda, respublikaçılar isə Nümayəndələr Palatasında qalib gəliblər. Səsvermədən sonra bəzi yunanıstanyönlü ABŞ siyasətçiləri Türkiyə əleyhinə bəyanatlarının sayını artırmağa başlayıblar. Bunlardan ən fəalı yenidən seçilmiş Amerika siyasətçisi Kris Pappasın başçılıq etdiyi bir qrup Amerika xadimidir. Pappas və 20-dən çox amerikalıdan ibarət qrup Türkiyəyə “F-16” təyyarələrinin satışının qarşısını almaq üçün Bayden administrasiyasına sərt ifadələrin yer aldığı məktub yazıblar. Məktubda “F-16” və modernizasiya dəstələrinin Türkiyəyə satılmaması tələb edilib və səbəblər göstərilib.
Məktub üzə çıxdıqdan sonra ABŞ senatoru Bob Menendez yeni açıqlamalar verib. Onlayn proqrama qatılan və Kipr Rum tərəfinin adları ilə bağlı çıxış edən ABŞ Senatının Xarici Əlaqələr Komitəsinin sədri Menendez bütün türk əsgərlərinin Kiprdən çıxmasının lazım olduğunu bildirib və “F-16” məsələsini gündəmə gətirib.
Uzun müddətdir Kipr problemi mövzusunda yunanlara açıq dəstək verən Menendez deyib: “Mən Kipr probleminin uzun müddətdir tərəfdarı olmağımla fəxr edirəm. Bildiyiniz kimi, mən Cənubi Kiprin ərazi bütövlüyünə tam sadiqəm”.
Cənubi Kiprə silah embarqosunu qaldırdığını xatırladan Menendez əlavə edib ki, bu, əhəmiyyətli bir inkişafdır, amma hələ görüləsi işlər çoxdur. Onun sözlərinə görə, ABŞ Türkiyəyə “F-16” qırıcıları verməməlidir.
B. Menendez bir-birinin ardınca Türkiyəyə qarşı sərt açıqlamalar verərkən ABŞ-ın tanınmış qəzetlərindən olan “Wall Street Journal” senatorun istintaq altında olduğunu yazıb. Federal prokurorlar Menendezin həyat yoldaşının Nyu-Cersi siyasətçisindən xeyir-dua istəyən insanlardan hədiyyələr və ya xidmətlər alıb-almadığını araşdırır.
Mənbələr ABŞ-ın Nyu-Yorkun Cənub bölgə prokurorluğunun Menendezin 2020-ci ildə evləndiyi həyat yoldaşı Nadin Arslanyanın iş ortaqlarının da məhkəməyə cəlb olunduğunu bildirir. Son aylarda verilən çağırış vərəqələrində həm Arslanyan, həm də Menendez haqqında məlumat istənilib. Prokurorların Arslanyanla bağlı hansı bilgilərlə maraqlandığını açıqlanmır.
İstintaqın 2015-ci ildə Menendezə qarşı qanunsuz məhkəməyə səbəb olan ictimai korrupsiya işi ilə əlaqəsi yoxdur.
Qeyd edək ki, Menendez 2006-cı ildən ABŞ senatoru və Senatın Xarici Əlaqələr Komitəsinin sədri vəzifəsində çalışır.
ABŞ prokurorluğunun sözçüsü məsələ ilə bağlı şərh verməkdən imtina edib. Arslanyan və Menendezin vəkilləri şərh tələblərinə cavab verməyiblər.
Menendezin nümayəndəsi senatorun araşdırmadan xəbərdar olduğunu bildirib və əvvəlki açıqlamaya istinad edib.
Menendezin müşaviri Maykl Soliman deyib: “Həmişə olduğu kimi, senator hər hansı rəsmi təhqiqat zamanı ondan və ya ofisindən tələb olunan istənilən yardımı göstərməyə hazırdır”.
İstintaq çərçivəsində Nyu-Cersi ştatından olan vəkil Andranik Aslanyan da məhkəməyə çağırılıb. Andranik Aslanyanın Nadin Arslanyanın çoxdankı dostudur və hər ikisi erməni əsillidirlər. Aslanyan ABŞ mediasına deyib ki, o, prokurorların nə axtardığını bilmir.
Prokurorlar 2015-ci ildə Menendezə qarşı açdığı davada Florida ştatından olan oftalmoloq Salomon Melgen Vinin xarici qız yoldaşları üçün viza qarşılığında şəxsi təyyarə uçuşları, tətillər və digər hədiyyələr üçün həkimdən təxminən 1 milyon dollar aldığını iddia edir. Müstəntiqlər həmçinin düşünürlər ki, Menendez Melgenə gəlirli hökumət müqavilələrini təmin etməkdə köməklik müqabilində ağır siyasi ianələr alıb.
Onu da qeyd edək ki, N. Arslanyan Konqresdə qəbul edilən “Erməni Soyqırımının” Tanınması Qanununun memarı B. Menendezin xarici siyasət qərarlarına təsir edən şəxs kimi tanınır.
Reyting.az
Azərbaycan ticarət seqmentində hələ də çaşqınlıq yaşanır. Bu dəfəki səbəb “Qara Cümə” naməlumluğudur. Həmin günə bir həftə qalmağına baxmayaraq, tanınmış brendlərin mağazaları hələ nə edəcəklərini bilmirlər.
TEREF.AZ bildirir ki, Bizim.Media-nın əməkdaşı mağazalara müştəri kimi zəng edərək “Qara Cümə”yə hazırlıqları ilə maraqlanıb.
Beləliklə:
“FLO” mağazalar şəbəkəsi: “Endirim olacağı gözlənilsə də hansı məhsullara, neçə faiz endirim olacağı hələ dəqiq deyil”.
“New Yorker” mağazalar şəbəkəsi: “Bir ay əvvəl müştərilərimizə endirim kuponları paylanılıb. “Qara Cümə” endirimindən də yalnız həmin kupona sahib müştərilərimiz faydalana biləcəklər. Hazırda təəssüf ki, endirim kuponu yoxdur, bir ay əvvəl bitib”.
“Bershka” mağazalar şəbəkəsi: “Bu haqda hələ dəqiq məlumat yoxdur”.
“Kontak Home” mağazalar şəbəkəsi: “Bizdə endirimlər “Böyük Cümə” adı altında noyabrın 18-dən başlayıb. Televizor, noutbuk, telefon, paltaryuyan, soyuducu, mebel, ev tekstilinə 70%-dək endirim var”.
“Lacoste” mağazalar şəbəkəsi: “Hələ ki bu haqda məlumat yoxdur. Endirim olacaqsa, bunu ancaq həmin gün məlum olur”.
“LC Waikiki” mağazalar şəbəkəsi: “Endirim olması nəzərdə tutulub, lakin neçə faiz olacağı, hansı günləri əhatə edəcəyi hələ dəqiq məlum deyil”.
“İrşad Elektronics”: “Cümə endirimlərinə hazırlaşırıq, lakin kampaniya gününədək nə qədər endirim olacağı və hansı günləri əhatə edəcəyi barədə məlumat verə bilmirik”.
Əlaqə saxladığımız bəzi market və ticarət mərkəzləri bizə belə maraqlı fikir də söylədilər:
“Bizdə “Qara Cümə” gömrükdən başlayır. Bəyəm imkan verirlər ki, endirim etməyə də halımız olsun?”.
Kənd Təsərrüfatı Nazirliyi tərəfindən 19 -20 noyabr tarixlərində “Kənddən Şəhərə” həftəsonu yarmarkaları təşkil olunacaq.
TEREF.AZ bildirir ki, nazirlikdən verilən məlumata görə, Bakı və Abşeron ərazisində keçiriləcək yarmarkaların təşkilində əsas məqsəd fermer təsərrüfatları üçün alternativ satış kanalı yaratmaq, eyni zamanda şəhər sakinlərini yerli, təbii və mövsümi kənd məhsulları ilə dolğun şəkildə təmin etməkdir. Yarmarkalarda məhsullar birbaşa fermerlər tərəfindən satışa çıxarılacaq.
Budəfəki “Kənddən Şəhərə” həftəsonu yarmarkalarında ümumilikdə 80-ə yaxın fermer 50-ə yaxın regionu təmsil edəcək. Fermerlər 90-a yaxın çeşiddə kənd təsərrüfatı və qida məhsullarını satışa çıxaracaqlar.
Fermerlər yarmarkalarda tamamilə ödənişsiz şəkildə iştirak edəcəklər. Onlar piştaxta, tərəzi, soyuducu və digər lazımi ləvazimat və avadanlıqlarla təmin olunacaqlar. Həmçinin məhsullarının daşınmasında çətinlik çəkən fermerlərə loqistik dəstək göstərilərək məhsulları təsərrüfatlarından birbaşa yarmarka keçirilən ünvanlara daşınacaq.
Yarmarkalarda satışa çıxarılan məhsulların keyfiyyətinə Azərbaycan Qida Təhlükəsizliyi Agentliyi nəzarət edəcək. Belə ki, yarmarkada Səyyar Qida Laboratoriyası fəaliyyət göstərəcək. Vətəndaşlar satışa çıxarılan hər hansı bir məhsulun keyfiyyət göstəricilərini öyrənmək üçün laboratoriyanın xidmətlərindən faydalana bilərlər.
“Kənddən şəhərə” həftəsonu yarmarkaları aşağıdakı ünvanlarda fəaliyyət göstərəcək:
- Nərimanov rayonu, Fətəli xan Xoyski küçəsi, 5 (“Gənclik” metro stansiyasının çıxışı)
- Xırdalan şəhəri, Heydər Əliyev prospekti, 41A
Satışa çıxarılan hər məhsulun keyfiyyətinin önəminə diqqət çəkən iqtisadçı-ekspert Vahid Məhərrəmovun fikrincə, keyfiyyətlə bağlı konkret standartlar təyin edilməlidir. Keyfiyyət əsl alıcılıq qabiliyyətini müəyyənləşdirir: "Keçmişdə kifayət qədər avadanlığın, texnoloji inkişafın olmaması üzündən məhsulları sağlam yetişdirmək olduqca çətin idi. Ancaq indiki şərait imkan verir ki, sağlam, təbii, uzunömürlü, hər cəhətdən keyfiyyətli məhsullar becərilsin və toplanılıb satışa çıxarılsın. Ancaq nə üçünsə bu cür yarmarkalarda içi çürük məhsulların satışı müşahidə edilir".
Ekspertin sözlərinə görə, yarmarkaları KTN yox, icra hakimiyyəti orqanları təşkil etməlidirlər: "Nazirlik bu cür mövsümi işlərlə məşğul olmamalıdır. Hazırda onlar iş görüntüsü yaratmaq üçün yarmarkarların təşkilini həyata keçirirlər. Ancaq dünyada yarmarkaları icra hakimiyyəti və bələdiyyə orqanları təşkil edir, bu məsələdən qaynaqlanan problemləri də onlar həll edirlər. Kənd Təsərrüfatı Nazirliyi kəndlinin problemlərinin həlli ilə məşğul olmalıdır. Yarmarkaların təşkili stimul xarakteri daşısa da, ancaq bir çox hallarda kəndli fermerlərin əsas problemləri kölgədə qalır və ya həll edilmir".
İqtisadçı hesab edir ki, “Kənddən Şəhərə” yarmarkaları effektli təşkil olunsaydı alıcıların maraqları baxımından çox cəlbedici ola bilərdi. Amma əksər vətəndaşlar tərəzilərin düz işləməməsi, artıq qiymətdən narazıdır. Bir çox ölkələrdə yarmarkalar görmüşəm. Bu, əhalinin razı qaldığı bir yarmarka olur, lakin Azərbaycanda bunun istehlakçıları qane etməyən bir variantda təşkil edilir.
V.Məhərrəmovun sözlərinə görə, bir çox inkişaf etmiş ölkələrdə fermer bazara və ya yarmarkaya çıxıb satış etmir. O, əkin sahəsində daha məhsuldar işləməlidir. Buna görə də fermerə əsas stimul verəcək məsələ onun əməyinin doğru dəyərlə qiymətləndirilməsidir. Yarmarkalara isə onların istehsal etdiklərini çıxaracaq müəyyən edilmiş nümayəndələr olmalıdır. Kəndlidən ədalətli qiymətə alınan məhsul yarmarkada istehlakçıya uyğun qiymətə satılmalıdır. Onu da deyim ki, yarmarkalarda satılan məhsullar bir çox hallarda fermerlərdən ziyanına alınan mallardır. Fermerlər istehsal etdikləri məhsulları qalıb çürüməsin deyə, bir növ onlardan qurtulmaq üçün dəyər-dəyməzinə möhtəkirlərə satmağa məcbur olur. Həmin məhsullar da yarmarkalarda satışa çıxarılır. Bu isə stimul yaratmaq əvəzinə kəndlini gördüyü işdən küsdürür".
Kənd təsərrüfatı yarmarkalarının təşkili ilə bağlı “Şərq”ə danışan iqtisadçı-ekspert Rauf Qarayev isə bu layihənin müsbət hal olduğunu, lakin bəzi məsələlərə diqqət edilməsinin vacibliyini vurğulayıb: “Kənddən Şəhərə” yarmarkalarının keçirilməsində əsas məqsəd paytaxtda kənd təsərrüfatı məhsullarının bolluğunu yaratmaq və qiymətlərin ucuzlaşmasına nail olmaqdır. Bundan əlavə, yarmarka təşkilatçılarının əsas vəzifəsi məhsulun satışının fermerin özünün təşkil etməsinə çalışmaqdır. Yarmarkanın əsas qayəsi budur ki, yarmarkalarda sahibkarlar, fermerlər piştaxta arxasında dayansın, alverçilər yox.
Yarmarkaların müsbət tərəflərindən biri də budur ki, fermerlər üçün tamamilə ödənişsiz şəkildə təşkil olunacaq. Yəni yarmarkada iştirak edəcək fermerlər heç bir ödəniş etmədən piştaxta, tərəzi və digər avadanlıqlarla təmin olunurlar. Hətta məhsullarını yarmarka ünvanlarına çatdırmaqda çətinlik çəkən fermerlərə logistik dəstəyin də göstərilməsi pis olmazdı".
İqtisadçının fikrincə, bu cür yarmarkalarda dəllalların, məhsulları fermerlərdən ucuz qiymətə alıb Bakıda baha qiymətə satan alverçilərin iştirakına icazə verilməməlidir: “Hər kəndli iri şəhərlərin bazarlarına çıxmaq, öz yetişdirdiyi məhsulun satışını təşkil etmək iqtidarında olmadığı üçün alverçilər bundan istifadə edir. Halbuki, kəndli becərdiyi məhsulu özü yarmarkaya gətirib satışa çıxarsa tutarlı qazanc əldə edər. Zəhmətinin bəhrəsini həm özü görər, həm də vətəndaşlar ucuz və keyfiyyətli məhsul əldə edər. Kəndli əziyyət çəkərək əkib-becərdiyi məhsulun satışını özü etməlidir. Bu, kəndliyə - fermerə qazanc əldə etmək, becərdiyi məhsuldan gəlir götürmək imkanı yaradır, məhsul becərməyə həvəsini, həm də marağını artırır, əlavə stimul verir”.
R.Qarayevin sözlərinə görə, kənd təsərrüfatı məhsullarının rayonlarda ucuz, Bakıda baha olmasının əsas səbəbi də məhz sahibkarlıq fəaliyyəti ilə məşğul olan insanların əməlidir. Kəndli nə qədər çox əziyyət çəksə də, məhsulu əhali üçün əlçatan qiymətə satır. İşbazlar, alverçilər isə daha çox qazanmaq üçün insanların “cib”inə, kəndlilərin haqqına girir.
İqtisadçı onu da deyib ki, kənar şəxslərin bu cür yarmarkalara müdaxiləsinə məhz Kənd Təsərrüfatı Nazirliyi tərəfindən nəzarət olunmalıdır.
Bu cür yarmarkaların təkcə paytaxtda deyil, digər şəhər mərkəzlərində də təşkil edildiyini vurğulayan ekspert qeyd edib ki, bəzi sahibkarlar erkəndən bazarda öz yerini tutur ki, fermerlərin gətirdiyi məhsulların hamısını ucuz qiymətə alıb, gün ərzində bazarlıq edən alıcılara daha baha qiymətə satsınlar: “Çünki kəndlərdən şəhər bazarlarına məhsul gətirən şəxslərin axşama qədər piştaxta arxasında dayanıb məhsullarını satmaq imkanı olmur. Onlar 2-3 saat ərzində gətirdikləri məhsulu satıb qayıtmağa çalışır. Ona görə də bəzi hallarda fermerlər gətirdikləri məhsulu bir əldən başqa birisinə satıb rayona, kəndə qayıdır. Belədə yarmarkanın mahiyyəti pozulmuş olur. Məhsul ikinci, üçüncü ələ keçir. Qiymət də artır. Bu mənada yarmarkaların təşkili zamanı qarşıya qoyulan məqsədə nail olunması üçün fermerlərə hərtərəfli şərait yaradılmasının tərəfdarıyam”.
Azərbaycan əsilli, rusiyalı milyarder Fərhad Əhmədovun evində və obyektlərində axtarışlar aparılır.
APA-nın əldə etdiyi məlumata görə, Dövlət Təhlükəsizliyi Xidməti (DTX) tərəfindən milyarderin Göyçayda yerləşən villasında və ona məxsus obyektlərdə axtarışlar keçirilib.
Lakin onun saxlanılması ilə bağlı yayılan xəbərlər həqiqəti əks etdirmir.