Mənzil bazarından söz düşəndə diqqət daha çox Bakıya yönəlir. Çünki yeni binalar xüsusilə paytaxtda səhnəyə çıxır. Bölgələrdə mənzil imkanları olduqca məhduddur. Digər yandan ölkə əhalisinin yarıdan çoxunun Abşeron yarımadasında toplaşmasını, məskunlaşmasını da nəzərə almaq lazımdır. Buna görə də daha çox Bakının mənzil bazarından söz açmaq lazım gəlir.
Bizimyol.info xəbər verir ki, mənzil bazarında ciddi durğunluq müşahidə edilir. Amma qiymətlərin yalnız artdığını da qeyd etmək gərəkdir. Bakının mikrorayonlarında sovet dövründə tikilmiş doqquzmərtəbəli binalarda ikiotaqlı mənzillər 145-160 min manata təklif olunur. Halbuki keçən ilin eyni dövründə təsadüfi hallarda hansısa mənzilin 150 min manatdan baha satışa çıxarıldığını görə bilərdik. Birotaqlı mənzillər heç bir halda 100 min manatdan ucuz deyil.

Nəsimi rayonunun şəhərin mərkəzinə doğru uzanan hissələrində qiymətlər bir az da bahadır. Sovet binalarında birotaqlı mənzillərin qiyməti bəzən 115-120 min manata çatır. İkiotaqlı mənzilləri 160-170 min manata yalnız bir halda əldə etmək mümkündür ki, axırıncı mərtəbədə yerləşmək imkanı olsun.

Yeni tikililərdə məsələ bir az da mürəkkəbdir. Bu binalarda ikiotaqlı mənzil almaq üçün azı 190 min manatdan keçməlisən. Mənzilin vəziyyətindən asılı olaraq qiymət 220-230 min manata da çata bilər. 150-160 min manata yalnız birotaqlı mənzil düşür. Bir otaq iki otağa çevrilibsə, onda qiymət 10-15 min manat da artır.

Gördüyünüz kimi, qiymətlər çox yüksəkdir. Bakıda məvaciblə ev sahibi olmaq mümkünsüzə çevrilib. Mənzillər aylarla satış saytlarında gözə dəyir. Buna baxmayaraq, qiymətlər nəinki aşağl düşmür, hətta yüksəldiyi göz qabağındadır. Ekspertlər hesab edir ki, şəhərin ayrı-ayrı yerlərindəki söküntülər qiymətin aşağı düşməsinə imkan vermir. Yeni yol qovşaqlarının salınması planı mənzil bazarında yenə əlçatmaz qiymətləri aktual saxlayacaq.

Aytən, Bizimyol.info

“Yelo Bank” evimi əlimdən almaq istəyir. Bank 2008-ci ildə manatla verdiyi krediti indi dollarla tələb edir.

Pravda.az-ın xəbərinə görə, bunu Müsavat Partiyasının sabiq başqanı Arif Hacılının qardaşı Mustafa Hacıbəyli bildirib.

Mustafa Hacıbəyli

M.Hacıbəyli qeyd edib ki, vaxtıyla “Nikoyl Bank” kimi fəaliyyət göstərən bu bank öz korlanmış reputasiyasından yaxa qurtarmaq üçün 3 dəfə adını dəyişib, amma əməlləri, müştərilərinə soyğunçu münasibəti dəyişməyib: “Bankın sahibi rusiyalı oliqarx Vahid Ələkbərov olub. 2022-ci ildə Rusiyanın bir sıra oliqarxları ilə yanaşı, Vahid Ələkbərova qarşı da sanksiyalar tətbiq edildikdən sonra bankın səhmləri Marina Kulişova adlı bir bank işçisinin adına rəsmiləşib. 2005-ci ildən 2017-ci ilə qədər “Nikoil Bank”ın İdarə Heyətinin sədri olmuş Vasili Xamaza bankdan 20 milyon manatdan çox vəsaiti mənimsəməkdə ittiham olunub və bu səbəbdən Azərbaycan tərəfindən beynəlxalq axtarışa verilib. 2018-ci ilin sentyabr ayında o, Moskva şəhərində həbs edilib. 2008-ci ildə yaxın dostum və tələbə yoldaşım Azər Səlimov çətin problemlərlə üzləşmişdi və bu problemləri həll etmək üçün kredit götürməli oldu. O vaxt məndən xahiş etdi ki, onun evinin kupçası olmadığı üçün mənim evimin girov qoyulmasına razılıq verim. “Nikoyl Bank”ın öz təklifi ilə formal ipoteka rəsmiləşdirildi və mən dostumu vəziyyətdən çıxarmaq üçün evimin girov qoyulmasına razılıq verdim. Dostum bankdan 33 540 manat kredit götürüb, faizlər də daxil olmaqla ümumilikdə 58 355 manat qaytarıb. Ödənilən məbləğ, götürülən məbləğdən 24 815 AZN artıqdır. Amma bank bir saxta cədvəl tərtib edərək yenə 40 min dollar tələb edir. İpoteka müqaviləsi manatladır. Bankın tərtib etdiyi ödəniş tapşırığı manatladır. Pul manatla verilib. Pul verilərkən yazılan qəbz də manatladır. Amma bank “40 min dollar” deyir. Halbuki, ipoteka müqaviləsindən qabaq dollar ilə kredit müqaviləsi imzalansa da, həmin müqavilə icra olunmayıb. O zaman bank məzənnə hansı tərəfə də dəyişsə, bundan bəhrələnmək üçün iki müqavilə tərtib edib. Amma dollar ilə müqavilənin icrasına dair məhkəməyə heç bir sənəd təqdim edə bilməyib. “Yelo bank” bu tələblə Suraxanı Rayon Məhkəməsinə müraciət edib. Suraxanı Rayon Məhkəməsi iş üzrə üç dəfə məhkəmə-mühasibatlıq ekspertizası təyin edib. Ekspertiza rəyləri borcun manatla olduğunu təsdiqləsə də, bank “dirəniş” göstərərək işin yenidən ekspertizaya qaytarılmasına, sonda iddianın təmin edilməsinə nail olub. Müştərilərinin qanına susamış bankın “dirənişi” o qədər güclü olmuşdu ki, hakim Leyla Talıbova apelyasiya şikayətinin verilməsinə məhəl qoymadan mənzilimin açıq hərraca çıxarılması haqda qətnaməni icraya yönəltmişdi. Böyük bir stress yaşadım və vəkilin ərizələrindən sonra hərrac dayandırıldı. Fevralın 19-da Bakı Apelyasiya Məhkəməsində hakim Sabit Bəhramzadənin sədrliyi ilə bizim apelyasiya şikayətimizə baxılacaq. Apelyasiya məhkəməsi mərhələsində yenə “Yelo Bankın” vəsatəti əsasında iş Azərbaycan Respublikası Auditorlar Palatasına göndərilib. Auditor Palatasının keçirdiyi ekspertiza və verdiyi auditor rəyi, kreditin bank tərəfindən manatla verildiyini və artıqlaması ilə ödənildiyini təsdiqləyib. Əslində bundan sonra məhkəmənin bankın xeyrinə qərar çıxarması mümkünsüz görünür. Amma yenə də çox narahatam, çünki bankın “dirənişi” çox güclüdür. Mən Qarabağ qazisi, 3-cü qrup əliləm. Dövlətdən nə ev, nə maşın almışam. Öz halal pulumla 21 il əvvəl aldığım, təmirini hələ də tam başa çatdıra bilmədiyim evi əlimdən almaq istəyirlər. Ona görə hər kəsdən bu məsələdə ictimai dəstək istəyirəm”.

Səhhəti ilə əlaqədar işçi ilə bağlanmış əmək müqaviləsi ləğv edilə bilərmi? Bu hallarda işçilərin hansı hüquq və təminatları vardlr?
1. Səhhətinə görə daha yüngül işdə işləməyə ehtiyacı olan işçiləri işəgötürən: onun razılığı və tibbi rəyə uyğun olaraq daha yüngül işə müvəqqəti və ya daimi keçirməyə borcludur.
2. Daha uzun müddət müəyyən edilən hallar istisna olmaqla, əmək qabiliyyətinin fasiləsiz olaraq altı aydan çox müddətə tam itirilməsi ilə əlaqədar işçilər-əmək funksiyasını yerinə yetirə bilmədikdə onlarla bağlanmış Əmək müqaviləsi ləğv edilə bilər.
3. Bu əsasla Əmək müqaviləsi ləğv edilmiş İşçiyə İşəgötürən - orta aylıq əmək haqqının ən azı iki misli miqdarında müavinət ödəyir.
4. Səhhətinı görə daha yüngül işə keçirmə və əmək qabiliyyətinin tam itirilməsi,Tibbisosial Ekspert Komissiyasın Rəyi ilə müəyyən edilir. Əmək qabiliyyətinin tam itirilməsi dedikdə isə bu qurumun qərarı ilə işçiyə tam əmək qabiliyyətinin olmaması kimi başa düşülür. Səhhəti ilə əlaqədar işçi: öz razılıq və tibbi rəyə uyğun yüngül və ya oturaq işlərlə təmin edilməlidir.
5. Əmək qabiliyyətinin 6 aydan az müddətə müvəqqəti itirilməsi, işçi ilə bağlanmış əmək müqaviləsinin ləğv edilməsi üçün əsas ola bilməz.
6. İşçinun sağlamlığının mühafizəsinin təmin olunması məqsədi ilə səhhətinə mənfi təsir göstərməyən yüngül və əvvəlkinə nisbətən aşağı maaşlı işə keçirilə bilər.Bu halda işçinin bir ay ərzində əvvəlki işi (vəzifəsi) üzrə orta əmək haqqı saxlanılır.
7.Xroniki ağır xəstəliyə tutulmuş və az maaşlı işə müvəqqəti keçirilmiş işçilərə keçirildikləri vaxtdan dörd aydan çox olmayaraq əvvəlki iş yerində aldığı əmək haqqı saxlanılır.
8. İş yerində bədbəxt hadisə ilə bağlı əmək qabiliyyətini itirmiş və ya peşə xəstəliyinə tutulmuş: həkim məsləhət komissiyası və ya tibbi sosial ekspert komissiyasının rəyi ilə yüngül işə müvəqqəti keçirilmiş işçilərə bu halda əvvəlki əmək haqqı ilə yeni iş yerində əmək haqqı arasındakı fərq ödənilir.
Azər Quliyev.
TEREF

Dövlət Statistika Komitəsinin məlumatına görə, 2023-cü ildə nikahdankənar 15 622 uşaq dünyaya gəlib. Bu say 2022-ci ildə 18 814, 2020-ci ildə 17 714 nəfər olub. Son 10 il ərzində rekord göstərici isə 2016-cı ildə müşahidə olunub. Həmin ildə 26 288 uşaq nikahdankənar doğulan kimi qeydə alınıb. Bu rəqəmlər sual yaradır.

Diqqət ediləsi bir neçə məqam var: atanın kimliyi bəlli olduğu halda rəsmiləşdirilməyən və atanın kimliyinin qeyri-müəyyən olduğu hal. Əgər ananın özü də uşağın atasının kimliyini bilmirsə, sənədləşmə prosesi və atalıq necə müəyyən olunur?

Hüquqşünas Hikmət Əliyevin sözlərinə görə, uşağın mənşəyi 2 şəkildə müəyyən oluna bilər:

“Bu, könüllülük və ya məhkəmə qaydasında mümkündür. Uşaq nikahdankənar dünyaya gəldikdə atalığın müəyyən olunması ilə bağlı valideynlərin birgə ərizəsi və ya məhkəmə qətnaməsi tələb olunur. Əgər bunlar yoxdursa, Ailə Məcəlləsinə əsasən, uşağın doğum haqqında şəhadətnaməsində soyadı ananın soyadı olaraq qeyd edilir. Ata və baba adları isə ananın göstərişinə əsasən əlavə edilir”.

Daha ətraflı Baku TV-nin videomaterialında:

Azərbaycanda vətəndaşların ən çox narazı olduğu, eynilə ən çox şikayət olunan rəsmi qurumun Əmək və Əhalinin Sosial Müdafiəsi Nazirliyi olduğu şübhəsizdir. Buna hardasa normal yanaşmaq olar, çünki əhalinin xüsusilə imkansız təbəqəsi ilə məhz bu qurum məşğul olur. Bu zaman isə haqlı və yaxud haqsız şikayətlərin ortaya çıxması anlaşılandır. Çünki bu quruma müraciət edən onminlərlə, bəlkə də yüzminlərlə vətəndaşın hamısını razı salmaq mümkün deyil.

Amma çox təəssüflə qeyd edirik ki, Sahil Babayev Əmək və Əhalinin Sosial Müdafiəsi naziri təyin edilən gündən bu qurumdan haqlı şikayətlərin sayı surətlə artmağa başladı. Büdcəni doldurmaq, daha dəqiq desək xalqın pulunu onun özünə xərcləməmək üçün bütün yollara əl atıldı. Çarəsiz, bir qarın çörəyə möhtac insanlar ölümə tərk edildi. Ümumiyyətlə, vətəndaşlara insan gözü ilə yanaşılmadı, müxtəlif bəhanələrlə minlərlə, onminlərlə insan açlığa, səfalətə sürükləndi.

Sahil Babayev bu “xidmətləri”nin qarşılığında daha yüksək vəzifə ilə mükafatlandırılsa da, yeni “sosnazir”in sələfindən daha rəhmli olacağı güman edilirdi. Ən azı ona görə ki, onun qanında erməni qarışığı yoxdur, millətimizin bir fərdidir. Amma necə deyərlər, “sən saydığını say, gör fələk nə sayır”.

Belə ki, son günlər Əmək və Əhalinin Sosial Müdafiəsi Nazirliyindən şikayətlərin artması, ən əsası isə insanların haqsız yerə süründürməçiliyə məruz qoyulması faktları artdığından, istər-istəməz belə düşünməyə məcbur oluruq ki, deyəsən, Anar Əliyev sələfinin ölənlərinə rəhmət oxutdurmağa gəlib. Belə getsə, xalqımız Sahil Babayevi gün işığında “əli çıraqlı” axtaracaq.

Hörmətli oxucularımızın diqqətinə çatdıraq ki, bir neçə ay əvvəl Azərbaycan Respublikasının vətəndaşı Əliyeva Nuranə Azad qızı redaksiyamıza müraciət edərək, Əmək və Əhalinin Sosial Nazirliyindən olan şikayətini dilə gətirmişdi. Xarici ölkə vətəndaşı olan həyat yoldaşının günəmuzd fəhləlik etdiyini bildirən N.Əliyeva qeyd etmişdi ki, iki azyaşlı uşaqları ilə yataqxanada çox acınacaqlı vəziyyətdə yaşayırlar. Onun sözlərinə görə, həyat yoldaşının aylıq gəliri təxminən 350 manat olur ki, bununla da 4 nəfərin dolanması olduqca çətindir.

Bu səbəbdən o, 2023-cü ilin ikinci yarısında ünvanlı sosial yardım almaq üçün Əmək və Əhalinin Sosial Müdafiəsi Nazirliyinə müraciət edib. Müraciəti araşdırıldıqdan sonra ona 1 illik ünvanlı sosial yardım ayrılması ilə bağlı qərar qəbul edilib. Bu müddət başa çatdıqdan sonra N.Əliyeva yenidən müvafiq sənədləri toplayaraq, nazirliyə təqdim edib. Təxminən 2 ay sonra qurumun “qaynar xətti” ilə əlaqə saxladıqda ona bildirilib ki, həyat yoldaşı xarici vətəndaş olduğu, ən əsası rəsmi iş yeri olmadığı üçün ona ünvanlı sosial yardım verilə bilməz. Bu zaman N. Əliyeva haqqlı olaraq sual verib ki, əgər həyat yoldaşının rəsmi gəliri olmadığı üçün ona ünvanlı sosial yardım düşmürsə, bəs 2023-cu ildə nə üçün müraciətinə müsbət cavab verilib? Təəssüf ki, qurumun məsul əməkdaşı bu sualı cavablandırmaqda aciz qalıb.

Qeyd edək ki, N.Əliyevanın “Hüriyyət”ə müraciəti ilə əlaqədar Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun İctimaiyyətlə əlaqələr departamentinin müdiri Rəşad Mehdiliyə sorğu ünvanladıq. O, əməkdaşımıza yazılı cavabında qeyd etdi ki, N.Əliyevaya imtina verilməsi nazirliyə təqdim olunan sənədlərdə həyat yoldaşının xarici vətəndaş olduğunu qeyd etməməsi ilə bağlıdır, təkrar müraciət etsin:

“Əliyeva Nuranə Azat qızının ünvanlı dövlət sosial yardımla bağlı elektron sistemə sonuncu müraciəti 6 noyabr 2024-cü il tarixində olub. Müraciətə əsasən ailənin maddi-məişət şəraitinin müayinəsi həyata keçirilsə də, imtina qərarı sistem tərəfindən verilib. İmtinaya səbəb əmək qabiliyyətli üzv olan Ramil Alıevin orta aylıq gəlirinin özündən asılı olan səbəblərə görə sıfıra bərabər olması olub. Belə ki, həmin şəxs ərizə-bəyannamədə əcnəbi olaraq qeyd edilmədiyindən sistem tərəfindən ailə üzvündə nəzərə alınaraq məşğulluğunun olmaması səbəbi ilə imtina qərarı verilib.

Qeyd edək ki, ailənin yardımla bağlı 2023-cü ildə olan təyinat statuslu müraciətində R.Alıevin əcnəbi olması barədə məlumat ərizə-bəyannamədə qeyd edilmişdir. Bu səbəblə həmin şəxs ailə tərkibində nəzərə alınmadığından məşğulluğu yoxlanılmamış və təyinat qərarı verilmişdir.

Ailə yardımla bağlı yenidən müraciət edərkən R.Alıevin əcnəbi olması barədə məlumatı ərizə-bəyannamədə qeyd edərsə, ailənin hüququna yenidən baxılacaq və bu səbəbdən çətinlik yaranmayacaq”.

Maraqlıdır ki, R. Mehdilinin məlum açıqlamasından sonra yenidən DOST mərkəzinə müraciət edən N.Əliyevaya bu dəfə də imtina cavabı verilib. Üstəlik, qurumun əməkdaşı onu təhdid edərcəsinə bildirib ki, 2023-cu ildə ona ayrılan sosial yardım “qanunsuz olub”, bu səbəbdən geri alına bilər.

Təbii ki, Əmək və Əhalinin Sosial Müdafiəsi Nazirliyinin yetkili əməkdaşının vətəndaşla bu cür davranışı onu narahat etməyə bilməzdi. Görəsən, o, kimdən cəsarət alıb, vətəndaşla bu cür danışır?!

Ən dəhşətlisi isə odur ki, bu qurumun vəzifəli şəxsi olan Rəşad Mehdilinin mətbuata rəsmi açıqlamasında vətəndaşın haqlı olduğu dolayısı ilə öz təsdiqini tapsa da, nazirliyin müvafiq qurumu çarəsiz xanımı təhdid edir, onunla şantaj dilində danışır. Bütün bunlar isə bir daha onu deməyə əsas verir ki, Əmək və Əhalinin Sosial Müdafiəsi Nazirliyindən vətəndaşlarımız hələ “çox çəkəcək”. Görünür, yeni “sosnazir”in sələfinin erməni qohumlarına belə, rəhmət oxudacağı haqda şübhələrimiz heç də əsassız deyil.

2023-cü ilin yanvar ayından keçmiş məcburi köçkünlər üçün tikilmiş və istifadəsiz mənzillərin onlayn satışına başlanılıb. Mənzillər Bakının Ramana, Ümid, Kürdəxanı qəsəbələrində, Abşeron və Samux rayonlarındakı yeni yaşayış binalarındadır. Əmək və Əhalinin Sosial Müdafiəsi Nazirliyi tərəfindən həyata keçirilən satış prosesi ümumilikdə 5 kompleks üzrə 1662 mənzili əhatə edir. Satış prosesinin 2023-cü il iyulun 1-dək davam edəcəyi gözlənilsə də, hazırda nazirliyin müvafiq portalında satılmayan mənzillərə rast gəlinir. Eyni zamanda, xeyli sayda bron edilən mənzillər də var.

Bu vaxta qədər neçə mənzil satılıb? Satışa yeni mənzillərin də əlavə edilməsi gözlənilirmi?

TEREF xəbər verir ki, məsələ ilə bağlı Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyindən Bizim.Media-nın sorğusuna cavab olaraq bildirilib ki, keçmiş məcburi köçkünlər üçün tikilmiş, ancaq istifadəsiz qalan mənzillərin nazirlik tərəfindən satış prosesi davam edir.

Bildirilib ki, nazirlik tərəfindən satışı həyata keçirilən mənzillərlə bağlı məlumat (ünvanı, binanın mərtəbə sayı, mənzilin nömrəsi və qiyməti, sahəsi, yerləşdiyi mərtəbə, otaqlarının sayı, təmir vəziyyəti və s.) ms.sosial.gov.az portalında təqdim olunur:

"Mənzillərdən maksimum 3 mənzili bron etmək mümkündür. Mənzil almaq istəyənlər öz şəxsi kabinetinə daxil olmaq və mənzilləri bron etmək üçün əvvəlcədən "ASAN Login"in autentifikasiya vasitələrindən (identifikasiya nömrəsi, SİMA rəqəmsal imza, "ASAN imza", "SİMA Token" (elektron imza), BSXM Elektron imza) birinə malik olmalıdır. Bron prosesinin ardından isə vətəndaşlar mənzilə baxış keçirmək və qərarlarına əsasən alqı-satqı prosesini yekunlaşdırmaq üçün dəvət olunurlar. Mənzilləri alan şəxslər tərəfindən mənzillərin dəyəri tam ödənilməklə onlarla notariat qaydasında təsdiq edilmiş alqı-satqı müqaviləsi bağlanır və mənzillər sahiblərinə təqdim olunur".

Qeyd edilib ki, hazırda ümumilikdə 1194 mənzil satışdadır:

"Yeni binalarda yerləşən həmin mənzillər tam təmirlidir, istifadə olunmayıb. Hazırda Qaradağ rayonundakı Ümid qəsəbəsindəki kompleksdə 44 ədədi üçotaqlı, 14 ədədi dördotaqlı olmaqla ümumi 58 mənzil, Abşeron rayonundakı kompleksdə 821 ədədi üçotaqlı, 197 ədədi dördotaqlı olmaqla ümumi 1018 mənzil, Sabunçu rayonu, Ramana qəsəbəsindəki kompleksdə 102 ədəd dördotaqlı, Samux rayonunda yerləşən kompleksdə isə 16 ədəd dördotaqlı mənzil satışdadır. Mənzillər çıxarışla təmin olunduğu üçün ipoteka və kredit predmeti hesab oluna bilər. Bunun üçün vətəndaşlarımız müvafiq banklara müraciət edə bilərlər".

Məlumat üçün bildirək ki, satışdan əldə olunan vəsait ölkəmizin digər bölgələrində şəhid ailələri və müharibə ilə əlaqədar əlilliyi olan şəxslərin mənzil və fərdi evlə təminatına yönəldiləcək.

İctimaiyyətdə tez-tez müzakirə olunan məsələlərdən biri də soyad sonluqlarında dəyişiklik edilməsidir. Bir qisim insan xüsusən soyadlardakı “ov, yev” hissəsinin ləğvini və əvəzlənməsini tələb edirlər. Bildirirlər ki, sözügedən sonluqlar rusmənşəlidir və milliləşdirilməyə ehtiyac var.

Məsələ ilə bağlı Globalinfo.az-a danışan Milli Məclisin deputatı Fazil Mustafa deyib ki, insanlar könüllü şəkildə soyadlarında dəyişiklik edə bilərlər:

“Bununla bağlı heç bir məcburiyyət yoxdur. Qanun imkan verir ki, kim özünü milli soyadında görmək istəyirsə, bunu etsin. Lakin bunun da müəyyən öhdəlikləri var. Xüsusən sənədlərin dəyişdirilməsi baxımdan. Bəzi insanlar sənədləşmə, yaxud da başqa səbəbdən belə dəyişikliyə müsbət baxmırlar. Amma soyadın dəyişdirilməsi ilə bağlı Azərbaycanda hər hansı kəskin qadağa yoxdur”.

Deputat Razi Nurullayev isə bildirib ki, “ov”, “yev” kimi soyadların yavaş-yavaş sıradan çıxarılması məqsədəuyğun olar:

“Amma insanları buna məcbur etmək olmaz. Bununla bağlı müəyyən qaydalar təsbit olunub. Hər bir şəxs soyadını könüllü dəyişə bilir. Yeni doğulan uşaqlarda bu halların tez-tez baş verdiyinin şahidi oluruq. Görünür, zamanla təbii yollarla bu məsələ həllini tapacaq.

Soyadında “ov”, “yev” hissəsi qalan nəslin nümayəndələri də istəsələr, bununla bağlı addım ata bilərlər. Mənim soyadımda da həmin hissə var. Dəyişdirməklə bağlı çox düşünmüşəm. Lakin Nurullayev soyadında necə rahat, diləyatımlı formada dəyişiklik edəcəyimi bilmirəm. Yaxın aylarda uyğun bir variant tapıb soyadımın sonluq hissəsindən azad olacam.

Türk adlarında çox halda ad və soyad arasında fərq hiss olunmur. İnsanı adı yerinə soyadı ilə çağırırlar. Çünki ikisi də ad formasında olur. Ona görə də soyad sonluğu fərqli olmalıdır ki, addan seçilsin. Bir çox insanlarda bu problem var”.

Deputat qeyd edib ki, bəzi şəxslər cəmiyyətdə hazırkı soyadları ilə tanınırlar:

“Dəyişiklik onlar üçün psixoloji baxımdan çətin olur. Bu səbəbdən məcburiyyətin tərəfdarı deyiləm. Könüllü şəkildə təbliğat aparıla bilər ki, insanlar bir yol tapıb soyadlarını dəyişsinlər

Son günlər Azərbaycanla Rusiya arasında gərginlik müşahidə olunur.
Yeniavaz.com xəbər verir ki, hər iki ölkənin mətbuatında qarşılıqlı ittihamlar səsləndirilir.
Yaranmış gərgin vəziyyət indiki mərhələdə iki ölkənin iqtisadi münasibətlərinə təsir etməsə də, bu gərginliyin gələcəkdə iqtisadi əlaqələrə də təsir edəcəyi gözlənilir.
Bəs görəsən, iki ölkə arasında iqtisadi münasibətlər pisləşərsə, bundan hansı ölkə daha çox zərər görəcək?
Məsələ ilə bağlı Yeniavaz.com-a açıqlama verən iqtisadçı-ekspert Allahverdi Aydın bildirir ki, Rusiya İtaliya və Türkiyədən sonra Azərbaycanın ən böyük ticarət tərəfdaşıdır:
“Qeyri-neft məhsullarının ixracında isə Rusiya ilk sırada yer alır. Rusiya Azərbaycan üçün əsas kənd təsərrüfatı bazarıdır. Xüsusilə pomidor, xiyar, nar, üzüm və digər meyvə-tərəvəz məhsulları Rusiyaya ixrac edilir. Rusiyanın bu məhsulların idxalına qadağa və ya məhdudiyyət qoyması Azərbaycanın fermerlərinə təsir edə bilər. Rusiya Azərbaycan məhsullarına qadağa qoyarsa, bunun Rusiya üçün də mənfi təsirləri ola bilər. Belə vəziyyət Rusiya bazarında bu məhsulların azalmasına, nəticədə qiymət artımına səbəb ola bilər”.
Ekspert bildirir ki, iki ölkə arasında münasibətlərin pozulması ölkələrdən hər hansı birinə ciddi təsir etməyəcək:
“Rusiya iqtisadiyyatı Azərbaycanla müqayisədə çox böyükdür. Rusiya iqtisadiyyatında Azərbaycanın payı elə də mühüm yer tutmur. Eyni zamanda, Rusiya da Azərbaycan üçün strateji əhəmiyyətli ölkə deyil. Azərbaycan iqtisadiyyatı daha çox enerji sektoru üzərində qurulub ki, burada da Rusiyadan asılılıq demək olar ki, sıfıra bərabərdir. Azərbaycanın əsas enerji bazarları Avropa ölkələridir. Rusiya Azərbaycanın neft və qaz ixracında heç bir rol oynamır.
Rusiya-Azərbaycan münasibətlərindən təsirlənəcək əsas sektor kənd təsərrüfatı hesab olunur ki, bu da yəqin ki, müvəqqəti xarakter daşıyacaq. Əgər Rusiya Azərbaycanın kənd təsərrüfatı məhsullarına qadağa qoyarsa, yeni bazarların tapılması çox uzun çəkməz. Hesab edirəm ki, Azərbaycanın kənd təsərrüfatı məhsullarına həm Avropada, həm də Yaxın Şərqdə tələbat yüksəkdir”.
“İndiki halda, Rusiya-Azərbaycan münasibətlərinin pozulmasından ən çox əziyyət çəkənlər Rusiyada yaşayan azərbaycanlılar olacaq. Hazırda Rusiyada milyondan çox azərbaycanlının yaşadığı və işlədiyi bildirilir. Onlar Azərbaycana da hər il yüz minlərlə vəsait göndərirlər. Yəni, Rusiya hazırda Azərbaycanda bir çox ailə üçün mühüm gəlir mənbəyidir”, - ekspert bildirib.

“Kontakt Home” və “İrşad Electronics” mağazalar şəbəkəsinin qazilərə və şəhid ailələrinə kreditə məhsul vermədiyi ilə bağlı redaksiyamıza şikayət daxil olub.

Yenicag.az-a şikayətlərini səsləndirən ittihamçılar sözügedən şəbəkələrdə problemlə qarşılaşdıqlarını və onlara kredit ayrılmadıqlarını iddia edirlər.

Məsələ ətrafında sözügedən şəbəkələrlə əlaqə saxlayıb ətraflı məlumatı oxuculara təqdim edəcəyik.

***

Yenicag.az sözügedən iddialarla bağlı “İrşad Electronics” və “Kontak Home”la əlaqə saxlayıb.

Belə ki, “Kontakt Home” mağazalar şəbəkəsinin mətbuat xidmətinin rəhbəri Vəfa Rüstəmova həmin ittihama cavab olaraq bildirib ki, qazilər də daxil olmaqla, hər bir Azərbaycan vətəndaşına illərdir kredit ayrılır.

“Bu kimi ayrı-seçkiliyimiz yoxdur. “Kontakt Home” Azərbaycanda çox asan və rahat şərtlərlə, tək şəxsiyyət vəsiqəsi ilə kredit verən təşkilatdır. Belə ittihamların heç bir əsası yoxdur”, – deyə o bildirib.

“İrşad Electronics” mağazalar şəbəkəsinin mətbuat xidmətinin rəhbəri Şəbnəm Hümbətova isə sorğumuza cavab olaraq qeyd edib ki, bu kimi məsələdə qadağa ilə bağlı söhbət ola bilməz:

“Sistemə baxıldıqdan sonra mütəxəssislər tərəfindən gəlir səviyyəsini nəzərə alaraq kreditin kimə verilib-veilməyəcəyi təyin olunur. Bunun əsasında kredit düşməməyi mümkündür. Belə olan halda “qaziyə kredit verilmədi” deyilməsi düzgün deyil. Nə üçün xüsusi olaraq qazilərə belə bir qadağa tətbiq edək? Bu çox ağır ittihamdır. Əksinə olaraq, biz özümüz qaziləri işlə təmin etməyə, onlara daim köməyimizi göstərməyə çalışırıq”.