 |
|
|
Elm və Təhsil Nazirliyi və onun rəhbərliyi illərdir məktəblərdə korrupsiyanın qarşısını almaq üçün müxtəlif tədbirlər gördüyünü iddia edir. Lakin reallıq göstərir ki, rüşvətxorluq, məktəblərdə qeyri-rəsmi pul yığımlarının təşkil edilməsi və direktorların "reket" üslublu idarəetməsi hələ də geniş yayılmış problemlərdir.
Bəs niyə nazir və nazirlik bu problemlərlə bacarmır?
Bu barədə təhsil eksperti Kamran Əsədov Sonxeber.az -a açıqlama verib:
"Burada üç əsas səbəb var: sistemin köklü problemləri, nəzarətin zəifliyi və siyasi iradənin olmaması.
Azərbaycan təhsil sistemində direktorların əksəriyyəti hələ də köhnə sovet modelində fəaliyyət göstərir. Məktəb rəhbərləri məktəbləri öz şəxsi biznesləri kimi idarə edir. Təhsil Nazirliyi hər il məktəblərdə şəffaflığın təmin olunacağı ilə bağlı bəyanatlar versə də, məktəblərdə qanunsuz pul yığımları, müəllimlərdən qeyri-rəsmi "haqq" tələb edilməsi və valideynlərin müxtəlif adlar altında ödənişlərə məcbur edilməsi adi hala çevrilib.
Məktəb direktorları təyinat yolu ilə gəldiyi üçün onların çoxu siyasi və şəxsi əlaqələr vasitəsilə vəzifəyə gətirilir. Bəzi direktorlar Təhsil Nazirliyinə deyil, birbaşa daha yüksək siyasi dairələrə bağlıdır. Bu isə onların toxunulmazlığını təmin edir və nazirlik bu hallarla mübarizə aparmaq gücündə olmur. Əgər bir sistemdə rəhbər şəxslər siyasi dəstəklə işləyirsə, onlar hesabatlı olmaq məcburiyyətində deyil və rahat şəkildə rüşvət mexanizmini davam etdirə bilirlər.
Məktəb direktorlarının qeyri-rəsmi yollarla gəlir əldə etmələrinin əsas yollarından biri valideynlərdən və müəllimlərdən pul yığılmasıdır. Hər il məktəblərdə təmir pulu, kağız pulu, kamera pulu, fond pulu, "bayram hədiyyələri" və digər adlarla yığılan vəsaitlər artıq sistemləşmiş haldadır. Müəllimlərdən isə işə qəbul, sinif rəhbərliyi, dərs saatlarının artırılması və digər üstünlüklər üçün pul tələb edilməsi barədə çoxsaylı şikayətlər var.
Təhsil Nazirliyinin direktorlarla bacarmamasının əsas səbəblərindən biri məsuliyyət sisteminin işləməməsidir. Nazirlik məktəblərdə rüşvət və qanunsuzluqlar barədə çoxsaylı şikayətlər alsa da, bu şikayətlərin böyük əksəriyyəti nəticəsiz qalır. Niyə? Çünki həqiqi nəzarət mexanizmi yoxdur. Direktorlarla bağlı şikayət daxil olanda, ya formalaşdırılmış "komissiyalar" bu məsələləri araşdırır və nəticəsiz qalır, ya da direktor müəyyən qədər cərimələnib fəaliyyətini davam etdirir.
Məktəblərdə korrupsiya ilə bağlı şikayətlər ictimaiyyətə açıq təqdim edilmir, həqiqi nəzarət mexanizmi yoxdur və nazirlik yalnız bəzi simvolik tədbirlər görməklə kifayətlənir. Məsələn, zaman-zaman bəzi direktorlar işdən çıxarılır, amma onların yerinə gətirilən şəxslər eyni mexanizmlə işləməyə davam edir. Sistem dəyişmədikcə, adamların dəyişməsi heç nəyi həll etmir.
Daha bir problem nazirliyin direktorların fəaliyyətinə yetərli nəzarət mexanizminə malik olmamasıdır. Əgər direktorlar real şəkildə hesabat verməli olsaydı, məktəblərdə bu qədər qeyri-rəsmi pul yığımı, müəllimlərin incidilməsi, korrupsiya olmazdı. Nazirlik sadəcə göstəriciləri yaxşı göstərmək üçün bəzi formal tədbirlər görür, amma bu tədbirlər rüşvətxor və qeyri-etik idarəetmə tərzi ilə seçilən direktorların tamamilə sistemdən çıxarılmasına gətirib çıxarmır.
Təhsil Nazirliyinin korrupsiyaya qarşı effektiv mübarizə aparmamasının digər bir səbəbi isə ictimai nəzarətin zəifliyidir. Əgər valideynlər, müəllimlər və cəmiyyət məktəblərdə baş verən qanunsuzluqlara qarşı real şəkildə birgə mübarizə aparsa, vəziyyət dəyişə bilər. Amma cəmiyyətin böyük hissəsi bu məsələlərdə passiv qalır və hər kəs "sistem belə işləyir" deyərək rüşvətlə barışır.
Nazir və nazirlik bu məsələlərlə real mübarizə aparmaq istəyirsə, ilk növbədə təhsil sistemində şəffaflığı artırmalıdır. Direktorların təyinat prosesi tam şəffaf olmalı, məktəblərdə pul yığımı qəti şəkildə qadağan edilməli və bu qanunu pozanlar ciddi şəkildə cəzalandırılmalıdır. Bundan əlavə, hər bir məktəbdə anonim şikayət mexanizmi yaradılmalı və bu şikayətlər nazirlik tərəfindən operativ araşdırılmalıdır. Əgər bu sistem dəyişməsə, rüşvətxor direktorlar məktəbləri şəxsi biznesləri kimi idarə etməyə davam edəcək və Təhsil Nazirliyi bu hallarla bacarmayacaq"
Mərakeş Kralı VI Məhəmmədin vətəndaşlardan bu il Qurban bayramı üçün imkan daxilində heyvan kəsməməyi xahiş etməsi maraq doğurub. O bunu mal-qaranın sayının azalması ilə izah edib. Sözügedən addımın Azərbaycanda da atılması istiqamətində sosial şəbəkələrdə müəyyən fikirlər səsləndirilir. Bildirilir ki, son illər ölkədə qoyun və keçi sayında sürətlə azalma müşahidə olunur.
Qeyd edək ki, rəsmi məlumata əsasən, ölkəmizdə 2020-ci ildə 8,31 milyon baş qoyun və keçi olduğu halda, 2024-cü ilin oktyabrında onların sayı 7 milyon başa düşüb. Yəni son 5 ildə qoyun və keçi sayı 1 milyon başdan çox azalıb.
Azərbaycanda da oxşar qərarlar verilə bilərmi?
Globalinfo.az-a danışan deputat Fazil Mustafa deyib ki, ölkəmizdə heyvanların kütləvi kəsilməsi halları yoxdur:
“Türkiyədə, Səudiyyə Ərəbistanında, yaxud başqa ölkələrdə Qurban bayramında daha çox heyvan kəsilməsi müşahidə olunur. Ölkəmizdə isə böyük masştablı kəsimlərə rast gəlmirik. Problemlə bağlı statistik zərurət varsa, buna dini qurumların münasibət bildirməsi daha məqsədəuyğundur. Hər halda Mərakeş kralı belə bir çağırış edibsə, görünür, vəziyyət ciddidir və bu addıma ehtiyac var. Amma Azərbaycanda oxşar qərarların verilməsi müvafiq dini müəssisələrin tövsiyəsi ilə baş verə bilər. Lakin gərək bunun əsaslandırması olsun. Nəsə deməkdə bir az çətinlik çəkirəm. Bu, insanların inancı ilə bağlı olan məsələdir və hər hansı şəkildə müdaxilə etmək fikrindən uzağam. Doğrudan da narahatedici tərəflər olarsa, məsələyə baxmaq mümkündür. Hər şey insanların rifahı üçündür, eləcə də din. Bunu nəzərə alaraq hərəkət etmək olar”.
Kənd təsərrüfatı üzrə ekspert Allahverdi Mustafayev isə bildirib ki, prosesi süni şəkildə istiqamətləndirməklə effektiv nəticə əldə etmək olmur:
“Hər şeyin təbii yollarla həllinə nail olmaq lazımdır. “Qurban bayramında qoyun kəsməyək ki, sayları artsın” kimi fikirlər məqbul deyil. Onsuz da kəsilmək üçün seçilən heyvanlar damazlıq olmur, erkək heyvanlardır. Damazlıqlar artıma xidmət edir, kəsimə getmir. Digər tərəfdən təbii artımı təmin etməliyik. Bunun üçün stimul verən yolları araşdırmalıyıq. Başlıca yollardan biri yem bazalarının təşkilidir. Qurban bayramında heyvan kəsməmək isə sayı artıra bilər, amma heyvandarlığın inkişafına təminat verə bilməz”.
Son iki ilə yaxındır ki, “Vahid Məhkəmə Portalı”nda Azərbaycanda hakim korpusunda çalışan şəxslərin fotoları və tərcümeyi-halları yığışdırılıb.
Dəfələrlə bu məsələ ayrı-ayrı hüquqşünaslar tərəfindən gündəmə gətirilsə də, sanki Məhkəmə-Hüquq Şurası bunun üzərindən bir qədər sükutla keçib.
Belə ki, səbəbi öyrənmək üçün edilən müraciətimizə məsələ ilə Məhkəmə-Hüquq Şurası tərəfindən cavab verilib.
Gununsesi.info– xəbər verir ki, sorğuya cavab olaraq deyilib:
“Vətəndaşların məhkəmələrə əlçatanlığı və şəffaflığın təmin edilməsi məqsədilə yaradılan Vahid Məhkəmə Portalı istifadəyə verilərkən məhkəmə fəaliyyəti ilə bağlı digər çoxsaylı məlumatlarla yanaşı, hakimlərin təhsili, əvvəlki iş yerləri barədə məlumatlar və fotoşəkilləri də həmin informasiya resursuna daxil edilmişdir. Lakin təəssüf ki, həmin açıq məlumatlardan məhkəmə icraatının tərəfləri və bəzi şəxslər sui-istifadə edərək, hakimlərin peşə fəaliyyətinə, ümumilikdə isə ədalət mühakiməsinin həyata keçirilməsinə birbaşa subyektiv təsir göstərməyə cəhd edirlər. Bir çox hallarda isə məhkəmənin konkret iş üzrə qərarından narazı qalan tərəfin yuxarı instansiya məhkəməsinə şikayət etmək əvəzinə, media subyektlərində və sosial şəbəkə hesablarında hakimin fotoşəklini və fərdi məlumatlarını paylaşaraq, təhqiramiz ifadələrdən istifadə etməklə məhkəmənin obyektivliyinə, hakimin şərəf və ləyaqətinə, qanunla müəyyən edilmiş müstəqillik və toxunulmazlıq hüquqlarını pozan hərəkətlərə və müdaxilələrə yol verilir. Diqqətə çatdırmaq istəyirik ki, ölkəmizdə ədalət mühakiməsinin həyata keçirilməsinə hər hansı formada müdaxilə etmə və mane olma cinayət qanunvericiliyinə əsasən məsuliyyətə səbəb olan haldır. Qabaqcıl beynəlxalq təcrübədə də bu yanaşma geniş tətbiq edilir. Belə ki, əksər xarici ölkələrin cinayət qanunvericiliyində qeyd olunan hallar məsuliyyətə səbəb olur. Məhz bu səbəbdən Məhkəmə-Hüquq Şurası məhkəmələrin və hakimlərin fəaliyyətinə müdaxilənin qarşısını almaq məqsədilə hakimlər barədə yuxarıda qeyd edilən məlumatların açıq informasiya resursunda yayımlanmasının dayandırılmasını məqsədəmüvafiq hesab etmişdir. Qeyd olunmalıdır ki, hakimlər barədə məlumatların açıq internet resurslarında yayımlanmasının dayandırılması media subyektlərinin və bütövlükdə cəmiyyətin məhkəmə fəaliyyəti ilə bağlı informasiya əldə etmək imkanlarına hər hansı məhdudlaşdırıcı təsir göstərməmişdir. Belə ki, qeyd edilən portalda ölkəmizdə fəaliyyət göstərən bütün məhkəmələr, onların ərazi yurisdiksiyası, yerləşdiyi ünvan, əlaqə nömrələri, həmin məhkəmədə fəaliyyət göstərən hakimlərin siyahısı və sair geniş məlumatlar əks olunur. Portalda qeydiyyatdan keçərək şəxsi kabinet yaradan vətəndaşların isə onlara aid olan bütün məhkəmə işləri ilə bağlı operativ məlumat almaq imkanları vardır.”
“Hakimlər haqqında bu cür məlumatları bilmək həm də vətəndaşın hüququdur.”
Gununsesi.info xəbər verir ki, bu barədə tanınmış vəkil Fuad Ağayev saytımıza açıqlamasında bildirib.
Onun sözlərinə görə, bu cür məlumatlar portalda yerləşdirilməlidir.
“Vahid Məhkəmə Portalında hakimlərin tərcümeyi-hal və fotolarının götürülməsi doğru addım deyil. Əvvala, hakim vəzifəsi publik vəzifəsidir, onların çıxartdığı qərarlar da dövlətin adından elan olunur. Ona görə də həmin şəxslər barəsindəki məlumatlar dolğun şəkildə yerləşdirilməlidir: vətəndaş bilməlidir ki, ədalət mühakiməsini kimlər aparır. Bunu bilmək hər şeydən əvvəl insanların hüququdur. Ola bilsin ki, hakimlərin ünvanları, əlaqə nömrələri göstərilməsin. Bunu normal qarşılamaq olar. Ancaq həmin hakimlərin tərcümeyi-hal və fotoları mütləq şəkildə göstərilməlidir. Həm də vətəndaşlar onların tərcümeyi-halı ilə tanış olaraq, özlüyündə qiymətləndirmə də apara bilər.”
"Paytaxtdakı problemlərin başlıca səbəbi Bakının Baş planına uyğun olmayan xeyli sayda yeni binaların harada gəldi tikilməsidir".
Bu sözləri Gələcək Azərbaycan Partiyasının sədri Ağasif Şakiroğlu "Cebheinfo.az"-a açıqlamasında deyib.
O bildirib ki, Bakı həddindən artıq yüklənilib:
"Paytaxtın kanalizasiya xəttinin böyük əksəriyyəti Sovet dövründə çəkilib, yeni binaların isə kanalizasiya xəttində ciddi nöqsanlar mövcuddur. Artıq kanalizasiya və tullantı sularını daşıyan borular köhnədir, onlar yeniləri ilə əvəz olunmalıdır. Nəticədə kanalizasiya xətləri yaxşı işləmədiyi üçün Bakıya yağan qar əriyib getməyə yer tapmır və küçələr buz bağlayır. Əvvəlki dönəmlərdə vəzifə tutmuş məmurların tamahı Bakını bu günə qoyub".
Həmsöhbətimizin fikrincə, qarın yaratdığı fəsadlar da paytaxtın həddindən artıq yüklənməsi ilə bağlıdır:
"Hesab edirəm ki, köhnə binaların hamısı sökülməlidir. Ümid edirik ki, Bakının yeni Baş planına uyğun olaraq infrastruktur dəyişiklikləri həyata keçiriləcək. Ümumiyyətlə, qar yağanda paytaxtda yaşanan bütün problemlərə birbaşa Bakır Şəhər İcra Hakimiyyəti məsuliyyət daşıyır. Əgər onlar tərəfindən zamanında doğru addımlar atılsa, qar yağanda belə problemlər yaşanmaz".
Partiya sədri qar yağan günlərdə Bakıda avtobusların 21:00-dək fəaliyyət göstərməsi barədə də danışıb:
"Əslində, avtobuslar qara görə saat 21:00-dək xidmət göstərirsə, iş yerlərində də bununla bağlı qərar verməli idi. Yəni işçilər 20:00-da evə buraxmalı idilər. Düşünürəm ki, vətəndaşlar həmin özəl iş yerləri barəsində şikayət edə bilərlər.
Onlar dəymiş ziyanı məhkəmə qaydasında şirkət rəhbərlərindən tələb etməlidirlər. Məsələn, qar yağan gün universitetlər distant təhsilə keçdilər. Bu, çox doğru qərar idi.Digər iş yerləri də bu addımı atmalı idilər. Lakin görünən odur ki, bəzi iş qurumların tamahı buna əngəl oldu".
Xəbər verdiyimiz kimi, Ağ Evdə Ukrayna lideri Vladimir Zelenski ilə ABŞ Prezidenti Donald Tramp və vitse-prezident Ceyms Devid Vens arasında baş tutan görüşün açıq hissəsində - jurnalistlərin yanındaca ciddi mübahisə yaşanıb.
Ajans.az xəbər verir ki, jurnalistlərdən biri hətta Zelenskiyə kostyum geyinmədiyi üçün irad da bildirib.
Jurnalist: Sizin kostyumunuz var?
Zelenski: Bəli.
Jurnalist: Bəzi amerikalılar sizin rəsmi üsluba hörmət etmədiyinizdən narazıdırlar.
Tanınmış naşir Müşfiq Xanın oğlu Füzuli Fərziyev itkin düşüb.
Bu barədə naşir sosial şəbəkə hesabında paylaşım edib.
O bildirib ki, oğlu bu gün 16:15-də metronun "Avtovağzal" stansiyasında olub:
"Sonra haraya getdiyi haqqında məlumatımız yoxdur. Görənlərdən xahiş edirəm, məlumat versin. Əlaqə nömrəsi: 050 2431453, 055 7166373".
Daxili İşlər Nazirliyinin (DİN) Mətbuat Xidmətinin əməkdaşı, polis leytenantı Elbrus İbrahimov Oxu.Az-ın sorğusuna cavab olaraq bildirib ki, axtarış elan edilib. Yeniyetmənin tapılması istiqamətində polis əməkdaşları tərəfindən tədbirlər görülür.
Ağcabədi rayonunda ağır yol-nəqliyyat hadisəsi baş verib.
APA-nın yerli müxbirinin əldə etdiyi xəbərə görə, rayonun Xocavənd kəndi ərazisində “Mercedes”, “KIA” və “VAZ” markalı minik maşınları toqquşub.Reklamınızı SmartBee ilə effektiv edin.İlkin məlumata görə, qəzada 5 nəfər həyatın itirib, yaralılar var.
Hadisə nəticəsində xəsarət alanlar Ağcabədi rayon mərkəzi xəstəxanasına aparılır.
Xüsusi hazırlıq şəhadətnamələrinin yenilənməsi prosesinə başlanılır
Dövlət Dəniz və Liman Agentliyində (DDLA) aparılan islahatların tərkib hissəsi olaraq bu ilin 3 mart tarixindən etibarən xüsusi hazırlıq şəhadətnamələrinin kurslarda iştirak etmədən yenilənməsi ilə bağlı müraciətlərin qəbulu “Bakı KOB evi”ndə həyata keçiriləcək.
Sənədlərin qəbulundan dərhal sonra dənizçilərə xüsusi hazırlıq şəhadətnamələrinin yenilənməsi üzrə Dövlət Dəniz və Liman Agentliyində təşkil olunacaq imtahanların tarixi ilə bağlı məlumat veriləcək.
Məlumat üçün bildiririk ki, xüsusi hazırlıq şəhadətnamələri üzrə imtahan sualları və düzgün cavablar Agentliyin veb-saytında yerləşdirilib.
Fevralın 27-də “AzerGold” QSC-də ali və peşə təhsili müəssisələrinin tələbələri üçün elan edilən 4-cü Təqaüd proqramı müsabiqələrinin qaliblərinin
mükafatlandırılması, "Mədən topoqrafiyası" dərs kitabının təqdimat mərasimi keçirilib.
"DogruXeber.az" bildirir ki, tədbirdə “AzerGold” QSC-nin İdarə Heyətinin sədri Zakir İbrahimov, Elm və təhsil nazirinin müavini Kənan Kərimzadə, Peşə Təhsili üzrə Dövlət Agentliyinin direktoru Ceyhun Kərəmov, eləcə də ali təhsil müəssisələrinin rektorları və tələbələr iştirak ediblər.
Tədbiri giriş sözü ilə açan “AzerGold” QSC-nin İdarə Heyətinin sədri Zakir İbrahimov Təqaüd proqramlarının növbəti qaliblərini təbrik edib və onlara təhsil, gələcək karyera həyatlarında uğurlar arzulayıb. Zakir İbrahimov Təqaüd proqramları haqqında ətraflı bəhs edərək, layihənin QSC-nin inkişafi strategiyası əsasında müəyyən edilmiş kadr ehtiyacları üzrə resursların zamanında cəlb olunması planı çərçivəsində 2021-ci ildən həyata keçirildiyini qeyd edib. Bildirilib ki, sənaye və dağ-mədən istiqaməti üzrə təhsil alan tələbələri əhatə edən layihənin əsas məqsədi təhsilə marağın daha da artırılması, istedadlı tələbələrin potensial bilik və bacarıqlarının təcrübə şəraitində inkişaf etdirilməsidir.
Layihə çərçivəsində, bugünədək, ümumilikdə 38 nəfərin ali təhsil və 37 nəfər peşə təhsili üzrə tələbənin təqaüd qalibi olduğunu, QSC-də istehsalat təcrübəsinə cəlb edildiyini qeyd edən Zakir İbrahimov Səhmdar Cəmiyyətinin ixtisaslı kadr ehtiyacına uyğun olaraq həmin tələbələrin məzun olduqdan sonra peşə fəaliyyətinə başlamasına da dəstək göstərildiyini diqqətə çatdırıb. Təqaüd proqramlarını tələbələrin təhsil həyatına, onların bilik və bacarıqlarının artırılmasına mühüm töhfə hesab edən Elm və təhsil nazirinin müavini Kənan Kərimzadə “AzerGold” QSC-nin timsalında dövlət və özəl sahibkarlıq subyektlərinin korporativ sosial məsuliyyət fəaliyyəti çərçivəsində reallaşdırdığı bu cür təşəbbüslərin milli təhsilin inkişafı ilə bağlı dövlətimizin başçısı tərəfindən qarşıya qoyulmuş məqsədlərə xidmət etdiyini vurğulayıb.
Nazir müavini qalib tələbələri təbrik edərək, proqram müddəti ərzində tələbələrə istehsalat təcrübəsindən maksimum faydalanmağı, peşəkar hazırlıqlı mütəxəssis kimi yetişmələri üçün onlara təqdim olunan bütün imkanlardan yararlanmağı tövsiyyə edib.
Daha sonra peşə-ixtisas sahəsi üzrə təhsil alan tələbələr üçün nəşr olunan “Mədən topoqrafiyası” kitabı barədə məlumat verən Peşə Təhsili üzrə Dövlət Agentliyinin direktoru dərs vəsaitinin Elm və Təhsil Nazirliyinin təşəbbüsü, “AzerGold” QSC-nin dəstəyi ilə türk dilindən Azərbaycan dilinə tərcümə və nəşr etdirildiyini diqqətə çatdırıb. O, “Mədən topoqrafiyası” kitabının mədənçilikdə müasir topoqrafik ölçmə-hesablama növ və üsulları ilə bağlı peşə məktəbi tələbələrinin hazırlığına xidmət etdiyini qeyd edib. Bildirilib ki, 200 tirajla çap olunan kitab ölkəmizin əsas dağ-mədən sənaye
rayonları hesab olunan Daşkəsən və Gədəbəy, eləcə də Gəncə şəhərində yerləşən peşə təhsili müəssisələrinə göndərilib.
Sonda Təqaüd proqramı müsabiqələrinin qaliblərinə təltifnamə və xatirə hədiyyələri təqdim olunub.
Qeyd edək ki, 2024-2025-ci tədris ili üzrə ali təhsil müəssisələrindən “Geologiya”, “Dağ-mədən mühəndisliyi”, “Kimya mühəndisliyi”, ”Ekologiya” ixtisasları üzrə təhsil alan 10, peşə təhsili müəssisələrindən isə 2 tələbə “AzerGold” təqaüdünün qalibi olub.
Proqram çərçivəsində tələbələrin sosial müdafiəsinə dəstək məqsədi ilə qaliblərin hər biri üçün aylıq təqaüdün verilməsinə başlanılıb.
Layihə çərçivəsində Səhmdar Cəmiyyətinin ixtisaslı kadr ehtiyacına uyğun olaraq proqramda iştirak edən tələbələrin məzun olduqdan sonra peşə fəaliyyətinə başlamasına da dəstək göstərilməsi nəzərdə tutulub.
Rəqəmsal inkişaf və nəqliyyat naziri Rəşad Nəbiyev 4 mart 2025-ci il tarixində saat 12:00-da Samux şəhərində yerləşən Heydər Əliyev Mərkəzində Qazax, Ağstafa, Tovuz, Şəmkir, Gədəbəy, Daşkəsən, Samux, Göygöl rayonları və Gəncə şəhər sakinlərini qəbul edəcək.
Nazir bu bölgələrdə göstərilən nəqliyyat, telekommunikasiya, o cümlədən internet, teleradio yayımı və poçt xidmətləri sahəsində əhalini maraqlandıran məsələlərlə bağlı vətəndaşları dinləyəcək.
Qəbula 3 mart 2025-ci il tarixinə qədər Rəqəmsal İnkişaf və Nəqliyyat Nazirliyinin Çağrı mərkəzi (1655) və elektron poçtu (office@mincom.gov.az ), 010 250 48 48 və 012 598 58 58 (daxili 222 və 290) nömrəli telefonlar vasitəsilə yazılmaq mümkündür.
Qeyd edək ki, qəbul mərkəzi icra hakimiyyəti orqanları və digər idarəetmə qurumları rəhbərlərinin şəhər və rayonlarda mart ayı üzrə vətəndaşların qəbulu cədvəlinə əsasən həyata keçiriləcək.