 |
|
|
İyun ayında yay fəslinin ilk ayı üçün xarakterik olan hava şəraiti və temperatur rejimi səciyyəvidir. Lakin bəzi günlərdə əsasən şimal və qərb ərazlərindən daxil olan siklonların təsiri nəticəsində hava şəraiti qeyri-sabit keçir. Bu təsir temperatur şəraitində də özünü göstərir. Həmçinin əsasən dağlıq və dağətəyi rayonlarda yüksək temperatur fonunda formalaşan güclü konvektiv hava axınları qısamüddətli leysan yağışlara, ildırım-dolu prossesinin yaranmasına şərait yaradır.
Bu ilin iyun ayında ölkə ərazisində havanın orta aylıq temperaturunun və aylıq yağıntının iqlim normasına yaxın, bəzi yerlərdə isə bir qədər yüksək olacağı gözlənilir. Aylıq yağıntının miqdarında da bu tendensiyanın olacağı, yağıntının miqdarının iqlim normasına yaxın, bəzi ərazilərdə isə bir qədər çox olacağı ehtimal olunur.
Birinci ongünlüyün ilk günlərində şimal-qərb küləyinin güclənəcəyi, əsasən dağlıq və dağətəyi rayonlarda arabir yağıntılı keçəcəyi gözlənilir.
Bakıda və Abşeron yarımadasında havanın orta aylıq temperaturunun 23-25 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr havanın temperaturu 19-24 dərəcə isti, gündüzlər 28-33 dərəcə isti, bəzi günlərdə isə 35-38 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (norma 9-12 mm).
Naxçıvan şəhəri, Culfa, Ordubad, Sədərək, Şahbuz və Şərur rayonlarında havanın orta aylıq temperaturu 22-25 dərəcə isti olacağı gözlənilir ki, bu da iqlim norması daxilindədir. Gecələr havanın temperaturu 18-23 dərəcə isti, gündüzlər 28-33 dərəcə isti, bəzi günlərdə isə 35-38 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (norma 21-35 mm).
Xankəndi, Şuşa, Goranboy, Xocalı, Xocavənd, Ağdam, həmçinin Daşkəsən-Gədəbəy rayonlarında havanın orta aylıq temperaturunun 18-20 dərəcə isti olacağı gözlənilir ki, bu da iqlim normasına yaxındır. Gecələr havanın temperaturu 12-17 dərəcə isti, gündüzlər 18-23 dərəcə isti, bəzi günlərdə isə 29-34 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (63-130 mm).
Şərqi Zəngəzur: Cəbrayıl, Kəlbəcər, Qubadlı, Laçın, Zəngilan rayonlarında havanın orta aylıq temperaturunun 18-20 dərəcə isti olacağı gözlənilir ki, bu da iqlim normasına yaxındır. Gecələr havanın temperaturu 12-17 dərəcə isti, gündüzlər 18-23 dərəcə isti, bəzi günlərdə isə 28-33 dərəcə isti olacağı gözlənilir. Aylıq yağıntının miqdarının da iqlim normasına yaxın olacağı gözlənilir (norma 38-86 mm).
Qazax, Gəncə, Ağstafa, Şəmkir, Tovuz, Ceyrançöl, Tərtər, Füzuli rayonlarında havanın orta aylıq temperaturunun 22-25 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr havanın temperaturu 18-23 dərəcə isti, gündüzlər 27-32 dərəcə isti, bəzi günlərdə 35-38 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (46-58mm).
Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Siyəzən, Şabran, Xızı, Quba, Xaçmaz, Qusar rayonlarında havanın orta aylıq temperaturunun 21-23 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr havanın temperaturu 17-22 dərəcə isti, gündüzlər 23-28 dərəcə isti, bəzi günlərdə 30-35 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (norma 18-179 mm).
Yevlax, Göyçay, Ağdaş, Kürdəmir, İmişli, Ağcabədi, Mingəçevir, Beyləqan, Sabirabad, Saatlı, Şirvan, Hacıqabul, Zərdab, Salyan, Neftçala rayonlarında havanın orta aylıq temperaturunun 24-27 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr havanın temperaturu gecə 18-23 dərəcə isti, gündüzlər 29-34 dərəcə isti, bəzi günlərdə 36-39 dərəcə isti olacağı gözlənilir. Aylıq yağıntının miqdarının iqlim normasına yaxın, bəzi yerlərdə isə bir qədər çox olacağı gözlənilir (norma 12-49 mm).
Masallı, Yardımlı, Lerik, Lənkəran, Biləsuvar, Astara, Cəlilabad rayonlarında havanın orta aylıq temperaturunun 18-23 dərəcə isti olacağı gözlənilir ki, bu da iqlim normasına yaxındır. Gecələr havanın temperaturu 17-22 dərəcə isti, gündüzlər 27-32 dərəcə isti, bəzi günlərdə 34-36 dərəcə isti olacağı gözlənilir. Aylıq yağıntının miqdarının iqlim normasına yaxın olacağı gözlənilir (norma 29-47 mm).
“Nar” 1 iyun-Uşaqların Beynəlxalq Müdafiəsi Günündə “YAŞAT” Fondunun təşkilatçılığı ilə keçirilən “Hədiyyə Karvanı” layihəsinin gerçəkləşdirilməsinə dəstək olub.
Bu çərçivədə mobil operator Fondla birgə ölkə boyunca bütün şəhid ailələrindən olan 1700-dən çox uşağa bayram münasibətilə müxtəlif hədiyyələr təqdim etməklə onların bayramını təbrik edib. Vətən qarşısındakı mənəvi borcunu daim yerinə yetirən “Nar”ın bu layihədə başlıca məqsədi vətən üçün canlarından keçmiş qəhrəman şəhidlərimizin əmanətlərini sevindirmək və onların inkişafına dəstək olmaqdır. Layihə haqqında qısa hesabat videosunu buradan izləyə bilərsiniz.
Qeyd edək ki, “Nar”ın korporativ sosial məsuliyyət istiqamətinin əsas hissələrindən birini milli mənəvi irsin qorunması təşkil edir. Bu istiqamətdə “Nar” şəhid və qazi ailələrinə xüsusi diqqətin göstərilməsi və işğaldan azad edilmiş ərazilərdə uğurlu layihələrin həyata keçirilməsini daim diqqət mərkəzində saxlayır. Mobil operatorun dəstək olduğu sosial layihələr haqqında buradan ətraflı məlumat əldə edə bilərsiniz.
Hazırda 2,2 milyon abunəçiyə yüksək keyfiyyətli rabitə xidmətləri göstərən “Nar” son 5 ildə Müştəri Loyallığı İndeksinə görə ölkədə lider mobil operatordur. Mobil operator müştəriyönümlülük strategiyasına sadiq qalaraq sərfəli qiymət qarşılığında üstün xidmət təqdim edir.
İğdır bələdiyyəsi Azərbaycan məhsullarının satışına qadağa qoydu
Son 30 ildə hər mövsüm Naxçıvandan gətirilən turp, tərxun, üzüm yarpağı, cəfəri, reyhan kimi təzə göyərtilərin İğdırda satışına qadağa qoyulub.
Hurriyyet.az xəbər verir ki, bu barədə İğdırın yeni bələdiyyə sədri qərar qəbul edib.
Qəfil verilən qadağa qərarı İğdırlıların da ciddi narazılığına səbəb olub.
Hər mövsüm təzə göyərti alan Türkiyə vətəndaşları indi kənardan gətirilən oxşar məhsulları xeyli baha qiymətə almaq məcburiyyətində qalacaqlarını deyirlər.
İllərdir bu məhsulları sərfəli qiymətə satan Naxçıvandan olan satıcılar isə sözügedən qərardan sonra qazancını itirib.
İğdır sakinləri Türkiyənin müvafiq dövlət qurumlarına müraciət edərək, problemi təcili həll etməyə çağırıb.
Sakinlərin sözlərinə görə, Naxçıvandan gətirilən göyərtiləri satan şəxslər üçün münasib yerin ayrılması həm vətəndaşların narazılığını aradan qaldıracaq, həm də satıcıların işinə qayıtmasına şərait yaradacaq.
"Səlahiyyətli şəxslər bu problemi diqqətdən kənarda qoymamalıdır və ən qısa zamanda həll etməlidirlər", - deyə İğdır sakinləri bildirib.
Mehmet Nuri Güneş
Qeyd edək ki, bu il Türkiyədə keçirilən bələdiyyə seçkilərində kürd əsilli Mehmet Nuri Güneş İğdırın yeni bələdiyyə sədri seçilib. O, HEP, DEP, ÖZDEP, HADEP və DEHAP kimi erməni-kürd əsilli partiyalarda fəal rol alıb.
Mehmet Nuri Günəş 21 yanvar 2010-cu ildə Türkiyə Jandarması tərəfindən keçirilən əməliyyat çərçivəsində saxlanılıb. O, Ərzurum 2-ci Ağır Cəza Məhkəməsinin qərarı ilə 8 il 9 ay həbs cəzası alıb.
Xəbər verdiyimiz kimi, Qusar Rayon İcra Hakimiyyətinin başçısı Şair Balaşərif oğlu Alxasov bu gün vəzifəsindən azad edilib.
TEREF xəbər verir ki, Şair Alxasov 1958-ci ildə Qusarın Çətkün kəndində anadan olub. 1985-ci ildə Azərbaycan İnşaat Mühəndisləri İnstitutunu inşaat mühəndisi ixtisası üzrə bitirib. Əmək fəaliyyəti dövründə "Azərelektroterm" İstehsalat Birliyində tikinti işləri üzrə müdir müavini, tikinti trestinin müdiri, Bərpaçı-A MMC-nin prezidenti, bir sıra tikinti şirkətlərinin rəhbəri vəzifələrində çalışıb.
Digər məlumata əsasən, Şair Alxasov Prezident Administrasiyasının sabiq rəhbəri Ramiz Mehdiyevin kadrı idi.
Ramiz Mehdiyevin istefaya göndərilməsindən sonra onun digər kadrları kimi, Şair Alxasovun da yola salınacağı barədə xəbərlər yayılırdı. Maraqlı bir məqam da odur ki, Şair Alxasov 2007-ci ildə Qusar Rayon İcra Hakimiyyətinin icra başçısı postuna təyinat alandan sonra onu kollektivə Ramiz Mehdiyevin kürəkəni İlham Əliyev təqdim edib. Şair Alxasov icra başçısı olduğu illərdə Ramiz Mehdiyevin özünün və ailə üzvlərinin Qusarın Çiləgir kəndində dəbdəbəli malikanələri tikilib. Belə iddialar var ki, malikanələrin tikintisinə Şair Alxasov şəxsən rəhbərlik edib.
Həmin malikanələrdən biri Qusar-Laza yolunun kənarında, meşənin içinə qədər uzanan 40 sotluq ərazidə tikilib. 3 mərtəbəli malikanə Ramiz Mehdiyevin kürəkəni İlham Əliyevə məxsusdur.
Malikanənin fotolarını 2020-ci ildə Ramiz Mehdiyevin qızı Kamilə Əliyeva sosial şəbəkə hesabından paylaşmışdı. Bloger Həbib Müntəzir isə Kamilə Əliyevanın paylaşdığı fotoları ictimailəşdirmişdi.
Həmçinin eyni kənddə Ramiz Mehdiyevin özünün də ayrıca hovuzlu böyük malikanəsi var. Mehdiyevlərin şimal zonasında 100 hektarlarla ölçülən torpaq sahələri də var. Ümumiyyətlə, şimal zonası uzun illər Mehdiyevlərin nəzarəti altında olub və orada torpaqların qanunsuzluqla ələ keçirilməsi həyata keçirilib.
musavat.com
Bəs şagirdlər 20-25 gün məktəbə nəyə gedirlər?
Dərs ilinin başa çatmasına iki həftə qalıb. Lakin müşahidələrdən belə məlum olur ki, artıq may ayının 3-cü həftəsindən başlayaraq əksər məktəblərdə bir sıra dərsliklər yığılıb. Qeyd edək ki, ötən illərdə də bu cür hal müşahidə olunurdu, baxmayaraq ki, ölkədə tədris ili iyunun 15-də başa çatır.
Beləliklə, suallar yaranır ki, may ayının 3-cü həftəsindən başlayaraq, məktəblərdə dərsliklər yığılırsa, şagirdlər 20-25 gün məktəbə nəyə gedirlər? Dərsliyi olmayan şagird məktəbdə nə öyrənir, ümumiyyətlə, öyrənə bilərmi? Həmçinin bu müddət ərzində müəllimlərin fəaliyyəti nədən ibarət olur?
Məsələnin bu tərəfini nəzərə alaraq, bir çox valideynlər, hətta müəllimlər tədris ilinin 1 sentyabr - 31 may tarixləri arasında keçirilməsinə çağırış edirlər.
Xatırladaq ki, Azərbaycanda 2004-cü ilə qədər dərslər sentyabrın 1-i başlayıb, may ayının sonu başa çatırdı. 2004-cü ildən isə Azərbaycanın bütün təhsil müəssisələrində dərslərin sentyabrın 15-dən başlayıb, iyunun 15-nə qədər davam etdirilməsi qərara alındı.
Bəs tədris ilinin hansı vaxt başlayıb, hansı vaxtda bitməsi daha optimaldır?
Təhsil eksperti Elşən Qafarov mövzu ilə bağlı “Yeni Müsavat”a danışıb:
“Öncə onu qeyd etmək istərdim ki, ümumiyyətlə, təhsilin bütün pillələrində, xüsusilə də məktəbəqədər ümumtəhsildə hüquqi normativ sənədlər çatışmır, olanlar da reallığı əks etdirmir. 2024-cü ildir, amma hələ də dövlət məktəblərinin nizamnaməsi yoxdur. Bəs nizamnamə nədir? Nizamnamə odur ki, məktəbin fəaliyyətinə əsaslanır. Bu gün qarşımıza çıxan bütün problemlər nizamnamədə göstərilir və məktəb məhz həmin nizamnamə əsasında idarə edilir.
O ki qaldı dərsliklərin hansı vaxtda yığılmasına, şagirdlərin sinifdən-sinfə keçməsi ilə bağlı 1 may 2014-cü ildə 522 saylı əmr təsdiq edilib. Həmin əmrdə göstərilir ki, qiymətləndirmə tədris ilinə 2 gün qalmış başa çatmalıdır. Yəni Böyük Summativ Qiymətləndirmə (BSQ) iyunun 11-də keçirilməlidir. Bu məntiqlə dərsliklər iyunun 12-13-də yığılmalıdır. Amma ənənəvi olaraq dərsliklər artıq 3-cü həftədən başlayaraq yığılmağa başlayır.
Burada problemin kökü ondan ibarətdir ki, Dövlət İmtahan Mərkəzi bütün məktəblərdə aparıcı sinif olan buraxılış siniflərinin imtahanlarını heç bir səbəb olmadan tədris ilinin başa çatmasına 10-12 həftə qalmış həyata keçirir. İmtahanlardan sonra da buraxılış siniflərinin şagirdləri məktəbə gəlmir, bu da digər siniflərin də davamiyyətinə təsir edir.
Beləliklə də mart ayından başlayaraq məktəblərdə davamiyyət axsamağa başlayır. İntizam səviyyəsi aşağı olan məktəblərdə davamiyyətlə bağlı heç bir tədbir görülə bilmir, gəlməyən uşaqlar da bəzən dərslikləri məktəbə təhvil vermir, dərsliklər arada itib-batır, ona görə də məktəb may ayının 2-ci həftəsindən başlayaraq dərslikləri yığmağa başlayır. Lakin nizam-intizamı güclü olan məktəblərdə dərsliklər tədris ilinin son günlərində yığılır.
Dərsliyin yığılması da o deməkdir ki, artıq həmin fənlər tədris olunmur. Bəzən deyilir ki, guya dərslər təkrarlanır, bu yalandır. Ümumiləşdirici, yekunlaşdırıcı təkrar iyunun 12-13-dən olur. Tədris proqramlarında konkret olaraq iyunun 11-nə qədər mövzular var və həmin mövzular tədris olunmalıdır. Beləliklə, əgər dərsliklər yığılırsa, formal olaraq dərslərin tədrisi dayandırılır. Bu çox ciddi məsələdir. Çox təəssüf ki, bu gün təhsil idarəsi orqanları tədris prosesinə tam nəzarət edə bilmirlər".
Təhsil eksperti tədris ilinin hansı vaxt başlayıb, hansı vaxtda bitməsinin daha optimal olması ilə bağlı da şərh verib:
“Burada məsələ tədris müddətində deyil. Belə ki, beynəlxalq təcrübəyə baxanda əksər ölkələrdə tədris müddəti 36 həftədir, bizdə isə 34 həftədir. Bu nöqteyi-nəzərdən hətta beynəlxalq təcrübədən geri qalırıq. Ötən il nazir da qeyd etdi ki, təhsil sentyabrın 1-dən başlayıb mayın 31-də bitsə, imtahanlar dövrünü də, eləcə də BSQ-ləri iyunun birinci iki həftəsinə keçirmək olar. Biz ekspertlər də hər zaman bunu təklif edirik. Sözün doğrusu, hələ də başa düşə bilmirəm ki, kim və hansı səbəbdən tədrisin sentyabrın 15-dən başlayıb, 15 iyunda bitməsini təklif etdi. Bunu anlamaq olmur”
Dövlət qeydiyyat şəhadətnaməsində göstərilən buraxılış tarixindən 15 ildən artıq müddət keçən avtomobil nəqliyyatı vasitələri taksi minik avtomobilləri ilə sərnişin daşımalarında istifadə oluna bilməz.
Bu barədə Nazirlər Kabinetinin təsdiq etdiyi “Müntəzəm və taksi minik avtomobili ilə sərnişin daşımalarında istifadə olunan avtonəqliyyat vasitələrinin texniki göstəriciləri, daxili və xarici tərtibatına dair tələblər”də öz əksini tapıb.
Sənəddə qeyd olunub ki, taksi minik avtomobilləri ən azı “Avro-5” ekoloji standartına uyğun olmalıdır. Bundan başqa, dövlət qeydiyyat şəhadətnaməsində göstərilən buraxılış tarixindən 8 ildən artıq müddət keçmiş avtonəqliyyat vasitəsinə “Avtomobil nəqliyyatı haqqında” Qanunla müəyyən edilən buraxılış kartı verilməyəcək.
Qanunda edilmiş dəyişikliklər 2024-cü il iyulun 1-dən qüvvəyə minir. Taksilərə bu cür tələblərin qoyulmasının qiymət artımına səbəb olacağı da deyilir. Maraqlıdır, Bakıətrafı qəsəbələrdən mərkəzə hərəkət edən və paytaxt daxilində fəaliyyət göstərən el arasında dediyimiz “1 manatlıq” taksilərin aqibəti necə olacaq?
Məsələ ilə bağlı nəqliyyat məsələri üzrə ekspert Elməddin Muradlı “Cebhe.info”-ya açıqlamasında deyib ki, taksi haqqında qəbul edilmiş qərar çərçivəsində taksi fəaliyyəti ilə məşğul olmaq mümkündür:
“Taksilərin keyfiyyətini artırmaq, taksidə olan nöqsanları aradan qaldırmaq üçün taksi haqqında müntəzam qanunlar qəbul olunur. Bu, məhz taksidə olan nöqsanları aradan qaldırmaqdan dolayı zəruridir. Taksi fəaliyyəti ilə məşğul olmaq üçün sürücülər qeydiyyatdan keçməlidirlər. Ancaq bu halda qanunun tələbinə uyğun şəkildə taksi kimi fəaliyyət göstərə bilərlər. Başqa cür məşğul olarlarsa, cərimələnəcəklər”.
Ekspert vurğulayıb ki, “1 manatlıq” taksilərin sürücüləri sırf taksi fəaliyyəti ilə məşğul olan sürücülər deyillər:
“Onlar adətən işə gedərkən yolüstü piyadanı götürüb öz gündəlik xərclərinin müəyyən hissəsini qarşılamağa çalışırlar. Ona görə onlar lisenziya almaqda və ya avtomobilinə taksometr quraşdırmaqda maraqlı deyillər. Lakin qanun qüvvəyə minəndə həmin sürücülərə İnzibatı Xətalar Məcəlləsinin müvafiq bəndlərinə uyğun olaraq protokol və cərimə tətbiq ediləcək”.
Bakı şəhərində ictimai yerlərdə xanımların fotoşəkillərini çəkib sosial şəbəkələrdə yayan şəxs polis əməkdaşları tərəfindən müəyyən olunaraq saxlanılıb.
DİN-in Mətbuat Xidmətindən bildirilib ki, 1995-ci il təvəllüdlü Yusifli Nurlan Teyyub oğlu “Tik-Tok” sosial media platformasında hesabların birində ayrı-ayrı qadınların foto-videolarını yerləşdirməklə kütləvi yayımını təşkil edib.
Polis əməkdaşları tərəfindən keçirilən tədbirlərlə tutulan N.Yusifli 30 sutka inzibati qaydada həbs edilib.
“10 gün əvvəl evin tavanı çökdü, avadanlıqlarımız, yorğan-döşəyimiz, stol-stulumuzun hamısı dağıntının altında qaldı. Yağışlı günlərdə də çöldə bir yer tapıb yatırıq. Evə girməyə qorxuruq. Nə zəlzələ vaxtı sahib çıxan oldu, nə də indi gəlib baxan var. Allah ümidinə yaşayırıq”.
Bunu Meydan TV-yə Şamaxı sakini Həqiqət Bədəlova deyir.
5 il əvvəl Şamaxıda baş vermiş zəlzələ nəticəsində bəzi evlər tamamilə dağılıb, bəziləri ciddi zədələnib.
Fövqəladə Hallar Nazirliyinin hesabatlarına görə, zərər çəkmiş ailələr yeni tikilmiş evlərə yerləşdirilib, təmir-bərpaya ehtiyacı olan evlər əsaslı təmir olunub. Ancaq ötən 5 il ərzində Meydan TV-yə dəfələrlə zəlzələ zərərçəkmişləri tərəfindən xeyli şikayət daxil olub.
Həmin şikayətlər araşdırılaraq, işıqlandırılıb və nəticədə məlum olub ki, dövlət qurumlarının açıqlama və hesabatları həqiqətəuyğun deyil.
Budəfəki şikayətçi də Şamaxının Niyazi Nəcəfov küçəsindəki 15 saylı evdə yaşayan Həqiqət Bədəlovadır.
Onun sözlərinə görə, 5 il əvvəl baş vermiş zəlzələ nəticəsində evi qəzalı vəziyyətə düşsə də, hər hansı tədbir görülməyib.
“Hər şey dağıntının altında qaldı”
10 gün əvvəlsə Həqiqət xanımın evinin tavanı çöküb:
“Bu il mayın 18-də otaqdan həyətə çıxmağımla otaqlardan birinin tavanının çökməsi bir oldu. Toz-tozanaqdan göz-gözü görmürdü. Bütün avadanlığım, yorğan-döşəyim, pal-paltar olan dolab, digər ev əşyaları – hamısı dağıntının altında qaldı. Elə gəzirdik, ayağımızın altında döşəmə, başımızın üstündə tavan titrəyirdi, bilirdim ki, bir gün başımıza çökəcək”.
“Düşündük ki, Prezident nəzarət edir, məsuliyyətli olarlar”
Həqiqət Bədəlovanın sözlərinə görə, 2019-cu ilin fevralında zəlzələ baş verəndən dərhal sonra digər evlər kimi bu evə də komissiya tərəfindən baxış keçirilib.
Komissiya üzvləri ailəyə evdə yaşamağın təhlükəli olduğunu, hər an uça biləcəyini deyib, evi siyahıya daxil edib.
Komissiya üzvləri tərəfindən ailəyə tövsiyə olunub ki, yeni ev tikilənədək müvəqqəti başqa yerə sığınsın. Ancaq ailənin getməyə yeri olmadığına görə elə qəzalı evdə yaşamağa davam edib:
“Dedilər ki, çıxın buradan, çox təhlükəlidir. Düşündük ki, yeni ev tikilənədək elə birtəhər burada yaşayaq, onsuz da müvəqqətidir. Çünki getməyə yerimiz də yox idi. Prezident də Şamaxıya gəlib-gedirdi, tapşırıqlarını verirdi, düşünürdük ki, hər şey onun nəzarətindədir, işə məsuliyyətli yanaşarlar, bu işlər tezliklə yekunlaşar, biz də bu təhlükəli evdən çıxarıq. Ancaq belə olmadı”.
“Kim pul verdi, yeni tikdikləri binaya köçürüldü. Kimisini yaxın kəndlərdə tikilən evlərə köçürtdülər. Hətta evi az zərər çəkənlər də köçürüldü. Halbuki yüngülvari bərkitmə, təmir işi ilə evlərində qala bilərdilər. Ancaq pul verib, tikilən binalardakı təzə evlərə köçdülər”, – deyə o qeyd edib.
Yarıq divarlar, çökməyə hazır ev, çarəsiz ailə…
Həqiqət Bədəlova deyir, indiyədək evinin tikiləcəyinə ümid etdiyi üçün heç bir quruma rəsmi məktubla müraciət etməyib.
Yalnız Şamaxı Rayon İcra Hakimiyyətinə gedib-gəlir və şifahi müraciətlər edib. Çarəsizlikdən gözlərini digər otaqların yarıq divarlarına və çürümüş taxta dayaqların hələlik saxlaya bildiyi tavana dikib.
Şamaxı Rayon İcra Hakimiyyətindən bildirilib ki, zəlzələdən zərər çəkmiş evlərlə bağlı yalnız təmir işləri bu qurum tərəfindən həyata keçirilir.
Həqiqət Bədəlovanın evi təmir siyahısında olmayıb.
Qurumdan deyilib ki, bərpa və yenidən bina tikintisi Fövqəladə Hallar Nazirliyinin səlahiyyətində olub:
“Təmir kateqoriyasına verilən evlərin təmiri bizim tərəfimizdən həyata keçirilir. Bərpa və qəzalı vəziyyətdə olan evlərlə bağlı vəsaiti FHN köçürür. Vətəndaş məsələni həmin qurumla aydınlaşdırmalıdır”.
5 fevral 2019-cu ildə gecə saatlarında Şamaxı-İsmayıllı bölgəsində zəlzələ baş verib.
Baş verən təbii fəlakət Şamaxıda bir sıra fəsadlar törədib.
Zəlzələ bir çox evlərin dağılmasına səbəb olub.
Qərbi Azərbaycan Xronikası layihəsi çərçivəsində jurnalist Əsgər İbrahimovun müəllifliyi ilə kəndlərinin əksəriyyəti ermənilərin və havadarlarının təsir və təzyiqinə məruz qalan Talin rayonu haqqında süjet hazırlanıb.
"Əhalisi sərt dağlarla Türkiyəyə qaçmaga məcbur edilən rayon" adlı süjetdə hayların indiki Ermənistanın əhatə etdiyi, əsrlər boyu oğuz-türklərinin yığcam yaşadığı məkanları müxtəlif məkrli üsullarla unutdurmağa çalışmasından bəhs olunub.
Bildirilib ki, Qərbi Azərbaycanın Talın mahalı ərazisində yerləşən Talin rayonu dəyişdirilmiş adı Araqats, yəni Alagoz dağ silsiləsinin cənub-qərb yamaclarını əhatə edir. Bu ərazi 14-16-cı əsrlərdə Monqol, daha sonra Qaraqoyunlu və Ağqoyunlu dövlətlərinin tərkibinə daxil olub. Səfəvilərin hakimiyyəti dövründə Talın bölgəsi İrəvan quberniyasının, sonra İrəvan xanlığının ərazisinə verilib.
XIX əsrin 40-50-ci illərindən XX əsrin 30-cu ilinə kimi rayon ərazisinin bir hissəsi İrəvan quberniyasının Eçmiədzin qəzasının, digər hissəsi isə İrəvan quberniyasının Aleksandropol qəzasının tərkibinə daxil olub. Bu ərazidə mövcud olan 5-7-ci əsrlərə aid memarlıq abidələri, 13-14-cü əsrlərə aid Talın karvansarası və Talın qalası bu məkanın qədim türklərə məxsus olduğunu sübut edən tarixi nümunələrdir.
Qeyd olunub ki, inzibati rayon kimi 1930-cu il sentyabrın 9-da yaradılan Talin rayonu kəndlərinin çoxunda yaşayan minlərlə oğuz türkü 1918-ci ildə daşnaklar tərəfindən işgəncə verilərək öldürülüb, kəndlər tamamilə dağıdılıb, əhalinin sağ qalan hissəsi dağlarla Türkiyənin müxtəlif yerlərinə qaçmaga məcbur edilib. Qaçqın düşənlər yolda böyük tələfat verib, itkilərə məruz qalıblar. Boşaldılan həmin kəndlərə dərhal gəlmə ermənilər doldurulub, kəndin azərbaycanlı əhalisi haqqında məlumatlar yox edilib.
Diqqətə çatdırılıb ki, 1935-ci ildən 1978-ci ilədək rayon üzrə tarixi yer adları tamamilə saxtalaşdırılıb. Talın mahalı ərazisi əvvəl Talin rayonu, sonra Araqatsotn rayonu adlandırılıb. Talin rayonu üzrə 45 tarixi yer adları dəyişdirilib. Nəhayət, 1995-ci ildə mərkəzi Əştərək olan Araqatsotn mərzliyi yaradılıb. Türkiyə ilə həmsərhəddə yerləşən mərzliyə Əştərək, yəni Aştarak, Abaran, yəni Aparan və Talin rayonlarının əraziləri daxil edilib.
Sonda vurğulanıb ki, 43 il ərzində bütün tarixi yer adları dəyişdirilən Talin rayonu da ermənilərin məkrli planlarının qurbanı olub: "Lakin əminik ki, əsrarəngiz təbiətə, hündür silsilə dağlara malik olan bu məkan yenidən əzəli sahiblərinin yurd yerinə çevriləcək".
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Ətraflı Baku TV-nin süjetində:
Ötən gün 39 yaşlı kişi ov silahı ilə ehtiyatsız davranaraq xəsarət alıb. “Qafqazinfo”nun əldə etdiyi məlumata görə, hadisə Şamaxının Nağaraxana kəndində qeydə alınıb.
Belə ki, hadisə 1985-ci il təvəllüdlü Səyahət Əsgərovun evdə silahdan ehtiyatsız davranması zamanı baş verib.
Faktla bağlı Şamaxı Rayon Prokurorluğunda araşdırma aparılır.
Qeyd edək ki, S.Əsgərov rayonun Dəmirçi kəndinin icra nümayəndəsidir.