Sosial şəbəkələrin yaratdığı şəraitdən yararlanaraq, hər kəs bloqerlik edə bilər. Özünü bloqer fəaliyyəti ilə məşğul olan yetərincə adam var. Amma hamı özünü bu sahədə sınamalıdırmı? Bu sahədə hər kəsin pul qazana bilməsi mümkündürmü?

Yenisabah.az-a danışan Azərbaycan İnformasiya və Kommunikasiya Texnologiyaları Sənayesi Assosiasiyası (AİKTSA) İdarə Heyətinin sədri Elvin Abbasov bildirib ki, bu sahədə uğurlu olmaq üçün təcrübə mütləqdir:

“Hər hansı sahədə ekspert olmaq, bu adı qazanmaq üçün təcrübə lazımdır. Təcrübə müəyyən meyara əsaslanmalıdır.

Azərbaycanda bloqerlik anlayışı səhv başa düşülür. İnsanlar çıxır özünü göstərir, gəzir, səyahət edir, çəkir, paylaşır. Amma sosial şəbəkədə bu gün hər kəs əlinə telefon alıb çəkilişlər edə bilər. Bu, bloqerlik deyil.

Bu ancaq tiktokerlik, yutuberlik də ola bilər. Bloqer əslində, hər hansı sahə üzrə maarifləndirici şəxsdir. Məsələn, bəzi insanlar fizika üzrə, riyaziyyat üzrə və ya hər hansı digər elmi sahə üzrə araşdırma aparır. Sonra onu sadə dilində oxucularına, izləyicilərinə çatdırır. Bu, faydalı kontent formalaşdırma istiqamətində çox əhəmiyyətli sahədir”.

E.Abbasovun sözlərinə görə, Azərbaycanda faydalı kontent formalaşdıran çox az bloqer var:

“Məsələn, Fərid Pərdəşünas texnobloqerdir. Öz sahəsində dünyada baş verənləri Azərbaycana çatdırır. Vüsal Yusifli peyk texnologiyaları, səma, kosmik sahələrdə baş verənləri elmi dildə öz oxucularına çatdırır. Elə jurnalistlərimiz var ki, frilanserdir və bloqerlik edirlər. Onlar siyasət, sosial sahələr üzrə bloqlar düzəldib paylaşırlar.

Azərbaycanda bloqerlik adı altında fəaliyyəti, istiqaməti bəlli olmayan, ümumi sahələri götürüb paylaşan, amma özünü “bloqer” adlandıran şəxslər çoxdur. Restorana gedib oranı çəkmək və buna bənzər ümumi, sadə mövzuları paylaşanlar çoxdur. Belə insanlara bloqer adı vermək nə dərəcədə doğrudur? Bunun ölkə üzrə heç bir ümumi faydası, əhəmiyyəti yoxdur. Sadəcə asan pul qazanmaq üçün edirlər”.

Ekspert bildirib ki, dünya təcrübəsində bloqerlər bir materialı ərsəyə gətirmək üçün həftələrlə çalışır, araşdırma aparırlar:

“Dünya təcrübəsində bloqerlər bir bloq üçün 1-2 həftə işləyir, tərcümələr edir, elmi məqalələr oxuyurlar. Sonra da əldə etdikləri faydalı məlumatlardan 15 dəqiqəlik bloq emal edirlər. Yəniu bloqerlik əziyyətli işdir. Hətta bir nəfər yox, bir neçə nəfər bir bloqu düzəldə bilir. Onun çəkilişi, yanaşması peşəkar olur.

Ölkəmizdə də bu cür blogerlik etmək olar, bunun üçün maraqlı mövzular kifayət qədərdir. Məsələn, Azərbaycada 350-ə yaxın plov növü var. Bir məşhur aşpazımız bu plov növlərini tək-tək çəkməyə başlasın. Milli adətlərimizdə qalan, amma unudulmuş dadları kəşf etdirsinlər, üzə çıxsınlar”.

İctimai nəqliyyat sistemi insanların gündəlik həyatında böyük rol oynayır.

Bu sistemlər nəinki ətraf mühitin qorunmasına kömək edir, həm də şəhər sakinlərinin həyatını asanlaşdırır. Bəzi şəhərlərdə bu sistemlər tamamilə pulsuzdur. Belə şəhərlər həm yerli sakinlər, həm də turistlər üçün cazibəlidir. Məsələn, Estoniyanın paytaxtı Tallin 2013-cü ildə dünya miqyasında ilk dəfə bütün şəhər daxilində ictimai nəqliyyatı pulsuz edən şəhər olub. Bu addım şəhər rəhbərliyinin daha çox insanı avtomobillərdən uzaqlaşdırmaq və ictimai nəqliyyatdan istifadə etməyə təşviq etmək məqsədi ilə atıldı.

Nəticədə, Tallində yaşayanlar artıq şəhər daxilində avtobus, tramvay və troleybuslardan pulsuz istifadə edə bilirlər.

Maraqlıdır, ölkəmizdə ictimai nəqliyyatın pulsuz olması mümkündür?

Mövzu ilə bağlı nəqliyyat məsələləri üzrə ekspert Elməddin Muradlı “Cebhe.info”-ya açıqlamasında deyib ki, ölkəmizdə ictimai nəqliyyatın pulsuz olması yuxu kimi görünür:

“Çünki ölkəmizdə ictimai nəqliyyatda olan məsələlər hələ həll olunma mərhələsindədir.

Kifayət qədər çox nöqsanlar var ki, onların üzərində çalışılır. Hələ o problemlər həll olunmayıb. Düşünmürəm ki, ictimai nəqliyyat ölkəmizdə pulsuz olsun”.

Ekspert vurğulayıb ki, daşıma şirkətləri, o cümlədən metronun gəlirləri ilə bağlı açıqladığı rəqəmlər ziyanla işlədiklərini göstərib:

“Hazırda bir çox daşıyıcı şirkətlər, əsasən də metronun fəaliyyətində kifayət qədər kəsirlər var. O baxımdan onların pulsuz işləyicəyini demək sadəcə bir xəyal olardı. O qurumlarda olan nöqsanlar, problemlər aradan qaldırılarsa, yaxın zamanda olmasa da, uzaq zamanda bu barədə danışmaq olar”.

Milli Məclisin deputatı Fəzail Ağamalı isə bildirib ki, avtobuslar özəl şirkətlərə məxsusdur:

“Dövlət həmin şirkətlərdən pulsuz işləməyi tələb edə bilməz. Belə olduğu təqdirdə dövlət həmin şirkətə pul ödəməlidir. Metro isə dövlətdən aldığı dotasiya hesabına maliyyələşir. Öz gəlirləri kifayət etmir, tam müstəqil fəaliyyət göstərə bilmir. Lakin başqa ölkələrdəki təcrübəni öyrənib təhlil edəndən sonra bu məsələni müzakirəyə çıxarmaq olar. Lakin indiki durumda bu məsələ haqda nəsə demək bir qədər çətindir”.

Buğda ununa dair sanitariya norma və qaydaları təsdiqlənib.

TEREF xəbər verir ki, bununla bağlı Azərbaycan Qida Təhlükəsizliyi Agentliyinin Kollegiyası qərar qəbul edib.

Buğda ununun cavab verməli olduğu tələblərə əsasən, bu unda kənar qoxu və dad olmamalı, tərkibində kənar maddə olmamalı, özünəməxsus rəngə və görünüşə malik olmalı, kimyəvi xüsusiyyətləri qaydaların müvafiq əlavəsində göstərilən tələblərə uyğun olmalı, tam buğda unu istisna olmaqla, buğda ununun ən az 98%-i 212 mikronluq ələkdən keçməlidir.

Bundan başqa, texnoloji məqsədlərə nail olmaq üçün buğda ununa buğda, çovdar və ya arpadan hazırlanmış, ferment aktivliyi yüksək olan cücərmiş taxıl dəni unu və ya cücərmiş taxıl dənindən hazırlanmış digər məhsullar, təbii buğda qlüteni, soya unu, paxlalılardan hazırlanmış un və fermentlər (“Aspergillus oryzae” mikroorqanizmindən əldə olunan göbələk amilazası və proteolitik fermentlər) əlavə edilə bilər.

Buğda ununun istehsalı və dövriyyəsi “Qida məhsulları üzrə gigiyena tələblərinə dair qaydalar”a uyğun həyata keçirilməlidir.

Yeni qaydaların tətbiqindən sonra taksi fəailiyyətini dayandırmaq məcburiyyətində qalan sürücü İlkin Həsənovun yeni işinə də qadağa qoyulub.

"Xəzər Xəbər"in qaynar xəttinə müraciət edən sürücü deyir ki, avtomobilinin ili ilə əlaqədar yeni qaydalara əsasən, taksi fəaliyyəti göstərə bilmir. Bu səbəbdən də işini kuryer olaraq davam etdirmək qərarına gəlib. Lakin bir müddət sonra işlədiyi taksi şirkəti tərəfindən hesabına blok qoyulub. Buna səbəb kimi isə avtomobilin ilinin köhnə olması göstərilib.

Şikayətçinin sözlərinə görə, kuryer xidməti göstərən sürücülərin avtomobillərinə il tələbi onlar üçün gözlənilməz olub.

Səslənən iddialarla bağlı Azərbaycan Yerüstü Nəqliyyat Agentliyi (AYNA) bildirilib ki, sözügedən məsələ taksi şirkətlərinin daxili işidir. Agentlikdən o da qeyd edilib ki, bəzi şəxslər tərəfindən çatdırılma xidməti adı altında sərnişin daşınmasının həyata keçirildiyi müşahidə edilir. Belə hallara qarşı reydlər aparılır və qarşısı alınır.

Ətraflı süjetdə:

“Qazağa gedirik” deyirik minillərdir.
Kim “Qazaxa” deyirsə bilin ki, bilmədən deyir.
Bilərək deyənlər isə…
Yazılı ədəbiyyatın Qazaxda doğulmuş ən böyük nümayəndələri – Vidadi, Vaqif, Kazım ağa Salik, Əbdürrəhman ağa Dilbazi oğlu, Hacırəhim ağa Vahidi, Abbas ağa Nazir, Şahniyar ağa Rançur, Hacıkərim Sanılı, Abdulla bəy Divanbəyoğlu, Mədinə xanım Qiyasbəyli, Əhməd Seyidov, Mehdixan Vəkilov, Osman Sarıvəlli, Səməd Vurğun, Mehdi Hüseyn, Mirvarid Dilbazi, İsmayıl Şıxlı, Teymur Bunyatov, İsa Hüseynov, Yusif Səmədoğlu, Vaqif Səmədoğlu və bu mahaldan çıxmış yüzlərlə alim, həkim və aydınlar ordusu son zamanlar anlamsız polemikalara səbəbiyyət verən dilçilərdən azmı bilirdilər?
Onlar orfoqrafiya qaydası bilməzdilər, çoxlarının zamanında heç elə anlayış belə yox idi. Amma onlar analarının dilində, eşidikləri, duyduqları, hiss etdikləri kimi danışırdılar…
Bəzi dilci alimlər özlərindən “velosiped ixtira edərək” qulağımıza yad gələn variantlar, minillik danışıq və alışqanlıqları zorlayan təkliflərdə bulunurlar. Və istinad edəcəkləri mənbə də illərdir elə onların özləri tərəfindən təcavüzə məruz qalan, üstündə min cür hoqqalar çıxarılan Azərbaycan dilinin orfoqrafiya normalarıdır.
Alimlərdən biri mənbəyə müraciət edərkən belə deyir: “Lakin Azərbaycan dilinin orfoqrafiya normalarında “x” samiti ilə bitən çoxhecalı yer adlarının yazılışı ilə bağlı ayrıca bənd yoxdur”. Əgər təkhecalı toponimlərdə, məsələn, Qax adında “x” hərfi “ğ”yə keçmirsə və əgər çoxhecalı adlar üçün ayrıca bir bənd yoxdursa, onda niyə Qazax və ya Yevlax kimi yer adları üçün yenidən “Amerika kəşf edib” eksperiment aparırsız? Bunun üçün o bölgənin tələffüzzünə niyə hörmət etmirsiz, siz yuxarıda adını çəkdiyim münəvvər və aydın ordusunu ciddiyə almır, niyə Qazax və Yevlax camaatına saymamazlıq edirsiz?...
Halbuki dilci alimin edəcəyi tək bir şey var: Oturub çoxhecalı yer adları üçün ayrıca bir bənd yazmalı, sonra o bəndi Azərbaycan dilinin orfoqrafiya normalarına salmağa nail olmalı və nöqtəni qoymalıdır. Alimin işi də bu olmalıdır – hazırladığını tətbiq etməli, dilimizin xüsusiyyətlərini, zənginliklərini qoruyaraq onu normalarla möhkəmləndirməlidir. Və əsası da dilin ənənələrinə sayğı göstərməlidir…
Əks təqdirdə, bir gün Qazağın aydınları toplanıb petisiya imzalayacaqlar…
İbrahim Nebioğlu

Hazırda Bakı və Abşeron yarımadasında havada tozun konsentrasiyası artaraq normadan 1,5-1,7 dəfə artıq müəyyən edilib.

Bu barədə "Cebhe.info"ya Ətraf Mühitin Çirklənməsinin Monitorinq Qrupunun baş mühəndisi Rəna Allahverdiyeva bildirib.

Onun sözlərinə görə, peyk görüntülərinə əsasən havada müşahidə olunan toz meteoroloji şəraitlə əlaqədar transsərhəd xarakterlidir.

“Tozlu hava şəraitinin sabah gündüz saatlarına qədər davam edəcəyi gözlənilir”, – baş mühəndis vurğulayıb.

Xatırladaq ki, səhər saatlarında havada tozun miqdarı normadan 1,3 dəfə artıq olub.

Sovet işğalına qarşı 1920-ci il mayın 26-31-də Gəncədə baş vermiş xalq üsyanı. Azərbaycanın işğal edilməsinə, onun dövlət müstəqilliyinə son qoyulmasına qarşı xalqın ən kütləvi və mütəşəkkil müqavimət .
Ceyhun Hacıbəyli 1952-ci ildə çapdan çıxmış "Azərbaycan" dərgisində Gəncə üsyanı haqqında belə yazırdı:
" Gəncə üsyanı millətimizin şərəf və namusunun yenidən kəsbi-etibar qazandığı bir dastandır. Gəncədə may ayında tökülən türk qanı 27 aprel hadisəsi hərəkatında millətimizə atılan ləkəni silib-götürdü ''

Lənkəranda nəzarətsiz qalan körpə evin pəncərəsindən yıxılıb.

Rayonun Siyavar kənd sakini, 2022-ci il təvəllüdlü A.A evin ikinci mərtəbəsində pəncərədən yıxılıb.

A.A Lənkəran Rayon Mərkəzi Xəstəxanasının təcili yardım şöbəsinə çatdırılıb.

İki yaşlı uşağa ilkin tibbi yardım göstərilib, kompüter tomoqrafiyası müayinəsinə göndərilib.

Ümid Partiyasının sədri İqbal Ağazadə sosial media hesabında məqalə ilə çıxış edib. Anaxeber.info həmin yazını təqdim edir:

1988-ci ildən (bu görünən tərəf idi, əslində isə 200 il) xalqımızı Qarabağ və onun ətrafında cərəyan edən hadisələr çox sarsıtdı.

Göyçə, Zəngəzur, İrəvan, Zəngibasar da növbəti dəfə itirildi - bu dəfə son həmvətənlərimiz dədə-baba yurda "əlvida" deməyə məcbur oldu.

Borçalıda mövqelərimiz zəiflədi, toponimləri ucdantutma gürcüləşdirdilər, onminlərlə soydaşımız Bakıya köçdü, aqrar islahatlarda payını alayarımçıq aldı.

Bəlkə Güney Azərbaycan davamız da Qarabağ itkisinə görə uzun müddət yerində saydı, tutarlı təşkilatlar yarada bilmədik, dünyanın hər yerində erməni işğalına qarşı mübarizə aparmağa məcbur olduq.

Təkcə bunlarmı? Yox, təəssüf ki...

Məğlub toplum kimi acizləşdik, hirsli-hikkəli olduq, düşmənə gücümüz çatmayanda özümüzü əzdik, bir-birimizi yamanladıq.

Məişətimiz yoxsullaşdı, cılızlaşdı, imarətlərdən çadırlara endik, milyona yaxın insanın günü-güzaranı dilənçilik səviyyəsinə qədər düşdü. Bir çadırda ərgən qızla oğul yanaşı yatdı, insanların bütün müqəddəs dəyərlərinin üstündəki örtüklər söküldü.

Cəmiyyət "qaçqın", "məcburi köçkün" sözünü bəzən aşağılayıcı anlamda işlətdi.

Hamı günahkar, satqın oldu, siyasətçilər, ordu mənsubları, hakimiyyət, müxalifət, bir sözlə başı tərpənən kim var idisə, bir dövrün qəhrəmanı olmaqla, sonra xain, yumşaq desəm, bacarıqsız elan olundu.

İqtisadiyyatımız çökdü, münbit torpaqlar işğal olundu, böyük işçi qüvvəsi işsiz qaldı, ilk illərdə humanitar fəlakətlə üz-üzə qaldıq. Yeni iş yerlərinin açılması qeyri-mümkün göründü, hökumət məcburən sosial yardım siyasətinə üstünlük verdi. Ələbaxımlılıq insanları işdən soyutdu, böyük insan kütləsi işləmək vərdişlərini itirdi.

Sağlam və təhsilli insan yetişdirməyin indeksi aşağı düşdü, genofondumuz əhəmiyyətli dərəcədə zədələndi.

Müharibənin və qaçqınçılığın ağır şərtləri yüzminlərlə insanın psixologiyasını korladı. Ritorikamız kəskinləşdi, sevgimiz tükəndi, bir qrup barışmaz, digəri mütiyə çevrildi.

Milli təfəkkür və düşüncə əhəmiyyətli dərəcədə zədələndi, xalqın, toplumun alışmadığı yaşam şərtləri və məğlubiyyət, itkilər fərqli cəmiyyət qanunları yaratdı.

Biz təkcə torpaq itirmədik, bizim təkcə yurd yerlərimiz işğal olunmadı.

Azərbaycan olaraq, bu savaşda itirdiklərimizin bir qismini sadaladım, çox az qismini. Yaza bilmədiyim, demədiyim nə qədər tərəflər var hələ.

Şükürlər olsun ki, biz geri dönüş edə bildik, toparlandıq, itirdiklərimizi - həm də son 30 ildə yox, 200 ildə - geri qaytara bildik.

Bir daha məqamı uca Şəhidlərimizin ruhları qarşısında baş əyirəm!

Qaziləmizə sağlıq və hüzur arzulayıram!

Ali Baş Komandana təşəkkür edirəm!

Xalqımıza minnətdaram!

Amma və lakin...

Qarşımızda çox böyük vəzifələr dayanır.

Təhsildən, səhiyyədən tutmuş, iqtisadiyyata, kənd təsərrüfatına kimi hər şey yenilənməlidir.

Böyük Qayıdış uğurla yekunlaşmalıdır.

Ən böyük problem isə düşüncə və təfəkkürü yeniləşən vətəndaş formalaşdırmalıylq.

Ən çətin işimiz budur.

Qarabağ və onun doğurduğu problemlər Azərbaycan insanını təbii halından çıxarıb.

Nə əyər-əskiyimiz varsa, ondan törəndi, ondan doğdu.

İndi hamısını bir-bir geri qaytarmalıyıq, həm də müasir dünyanın tələblərinə uyğun insan obrazı, düşüncəsi, təfəkkürü, yaşam tərzi ilə...

Siyasi təşkilatlar uzun illərdir, demokratiya uğrunda mübarizə aparır. Elə hakimiyyət də demokratik cəmiyyət qurduğunu, ya quracağını vəd edir.

Kiminlə qurmalıyıq bu cəmiyyəti? Hansı insan potensialından istifadə etməliyik?

Xaricdən yeni adamlar gətirməliyikmi?

Demokratiyanın materialı insan və onun düşüncəsi, yaşam tərzidir.

İnsanımızın yaşamı yurdsuzluq, çadır, vaqon, qaçqın şəhərcikləri, fin evləri, qazmalardırsa, (yaxın dövrə kimi) yaşam tərzi bundan fərqli deyil.

Şəhər mühitində fərqli həyat sürsələr də, toplumun ümumi halı sonda hamını öz ağuşuna alır.

Müharibə, qan-qada, ölüm-itim, şəhidlik, kasıblıq, sosial və digər problemlərlə demokratik düşüncə ziddiyyət təşkil edir.

Adətən, hamı demokratiya deyəndə seçkini nəzərdə tutur. Seçki demokratik cəmiyyət quruculuğunda prosedurdur. Seçkinin azad və demokratikliyi demokratik cəmiyyət quruculuğuna vəsilə ola bilir, lakin demokratiya gətirməz.

Demokratiyanın olması, təşəkkül tapması üçün mütləq demokratik yaşamı, düşüncəsi olan insan, toplum lazımdır.

Ətrafınıza diqqət edin, görün, məişətində, yaşamında, siyasi, iş həyatında demokratik olan nə qədər insan tanıyırsınız?

Ailə institumuzun demokratikliyinin şərtləri bilirsinizmi nə qədər ağırdır? Biz azərbaycanlıların baxdığı pəncərədən ailə dəyərləri tamam fərqli görünür. Axı cəmiyyət özü ailənin böyük formasıdır.

Necə ola bilər ki, ailədə demokratik olmayan bizlər, cəmiyyəti demokratikləşdiririk?

Bu gün Azərbaycan ailəsi ya olduqca mühafizəkar, ya aşırı liberaldır. Bizim tipli cəmiyyətlərdə sonuc bilirsinizmi necə olur?

İnqilab...

Həm də milli və dini xüsusiyyətlərə əsaslansaq, İslam inqilabı. Eynən İranda olduğu kimi.

1979-cu il İran inqilabı nə qədər xaricdən ölkəyə ixrac olunsa da, onun daxildə kifayət qədər əsasları var idi.

Həddən artıq liberal kəsimlə - onların sayı ölkə əhalisinin 1/5 -ni əhatə edirdi - kasıb, mühafizəkar, sosial cəhətdən güvənsiz, təhsilsiz, xürafata və məzhəbə söykənən böyük çoxluğun uzun illər gizli savaşı gedirdi. İlk fürsətdə inqilabçılar bu təbəqəni arxalarına aldılar və teokratik rejim qurdular.

Necə də bizə oxşayır, eləmi?

Xaricdən ölkəmizə ixrac olunan ideoloji ilə yanaşı, daxildəki problemlər bizi eyni vəziyyətlə üzləşdirə bilər.

Biz liberallığımızın sərhədlərini çoxdan aşmışıq, geyimimiz, yaşam tərzimiz, hərəkətlərimiz, cəmiyyətin mühafizəkar hissəsini liberalizmə qarşı köklənməyə əsas verən səviyyədədir.

Mühafizəkarlığımız isə Azərbaycan adət-ənənələrindən daha çox, ərəb-fars ideolojisinə söykənir.

Döyüşən Azərbaycan liberalizmi ilə mühafizəkarı deyil, fars-ərəb ideolojisi ilə ultra-qərb liberalizmidir.

Bu bizim davamız deyil.

Sovet şinelini soyunandan bizi özümüz olmağa qoymadılar, Qarabağın işğalı ilə bizi özümüzdən etdilər.

Ədəbiyyatımız, şeirimiz, sənətimiz, kinomuz, teatrımız, rəsm əsərlərimiz mərsiyələşdi və ya bundan azad olmaq istəyənlər əndrəbadi mədəniyyət gətirməyə çalışdılar.

Hər kəs özü ilə baş-başa qalanda azərbaycanlıdır. Təəssüf ki, cəmiyyətə çıxanda özümüz ola bilmirik.

Belə mühitdə demokratik cəmiyyət qurmaq çox çətindir, deyərdim ki, mümkünsüzdür. Əvvəlcə, insan yetişdirməliyik. Elə insanlar ki, cəmiyyətin qəlibini düzgün müəyyən etsinlər.

Demokratik ölkələrdə heç də hamı düşüncə və yaşam tərzinə görə demokratik deyil. Lakin cəmiyyətin öncülləri bir qəlib müəyyən ediblər, insanlar o qəlibdə özlərini azad, sərbəst hiss edirlər.

Ən başlıcası, qəlibi müəyyən edənlər özləri qüsurlu düşüncə tərzinə malik olmayıblar.

Demokratik cəmiyyət qurmaq istəyənlərin böyük əksəriyyətinin demokratiyadan xəbəri yoxdur.

Ünvanına deyilən tənqidə görə əllərindəki imkan çərçivəsində ən pis işləri görürlər.

Demokratik cəmiyyət quruculuğu təkcə iqtidarın məsuliyyəti deyil. Doğrudur, iqtidar bu istiqamətdə əsas yükün daşıyıcısıdır, lakin hakim qüvvənin tərəf-müqabili də gərək demokratik olsun. Hətta iqtidar demokratik olmasa belə, tərəf-müqabil demokratik davranış və düşüncə ilə prosesləri dəyişə bilir. Nə qədər desəniz, örnək verə bilərəm, bir şərtlə ki, müxalifət bu sahədə prinsiplərində vahid və ardıcıl olsun. Daha Vətən savaşında pusquda durmasın, əli kiminsə cibindən çıxmasın, başqa ölkələrin mənafeyini cəmiyyətə demokratiya adı ilə sırımasın.

Onda cəmiyyətin siyasətə laqeyd kəsimi azalacaq, güvən artacaq, insanlar mövqe ifadə etməkdən çəkinməyəcək. Yox əgər sən həqiqəti deyil, maraqları, - həm də başqalarının, - qoruyacaqsansa, seçici də öz maraqlarını gündəlik qayğılarının həll olunmasında axtaracaq.

Torpaqlarımızın işğaldan azad olunması və suveren hüquqlarımızın bütün ölkə boyu bərpa olunması Azərbaycanın yenidən doğuluşudur.

Bu Azərbaycan yeni insan dünyaya gətirməlidir.
Təhsili, tərbiyəsi, yaşamı, təfəkkür və düşüncəsi ilə seçilən yeni vətəndaş formalaşdırmalıyıq.

Ailəmizdən, övladlarımızdan, təşkilatlarımızdan, bir birimizə münasibətdən, özümüzdən başlamalıyıq.

Azad cəmiyyət arzulayırıqsa, əvvəlcə özümüz azad olmalıyıq - fars-ərəb mühafizəkarlığından, ultra-qərb liberalizmindən, rus yançılığından əl çəkməliyik.

Ədalətli quruluş istəyiriksə, ədalətin tərəzisini içimizdə qurmalıyıq, bizi sevənlərə də, tənqid edənlərə də doğru yerdən yanaşmalıyıq.

Azad olan sosial şəbəkələrdə ritorikamızı, üslubumuzu dəyişməliyik. İmkan, fürsət var deyə kimə necə gəlir və ya kim necə düşünürsə, yazmamalıdır, danışmamalıdır.

Efirlərimizdə səliqə-sahman yaratmalıyıq, cəmiyyətimizə fayda verən, onun zövqünü yaxşılaşdıran, maarifləndirən verilişlər və insanlar tv-lərə dəvət edilməlidir.

Geyimimizə, davranışlarımıza əl gəzdirməliyik. Ailə geyimi ilə cəmiyyət geyiminin arasında xətt müəyyən etməyi bacarmalıyıq.

Təhsilimizi artırmalıyıq, övladlarımızın təhsildən yayınmasına imkan verməməliyik, özəlliklə qız uşaqlarını təhsildən uzaqlaşdırıb, vaxtından əvvəl nikaha daxil olmasına şərait yaratmamalıyıq. Sabah Vətənimiz onların tərbiyə etdiyi övladların çiynində dayanacaq.

Saxtakarlıq etməməliyik, başqasının haqqına girməməliyik, seçkiyə getməli, doğru bildiyimiz namizədə səs verməliyik.

Qalib Azərbaycanda nə Vətənini satan olmalı, nə haqsız yerə həbsxanada olan.

Ən başlıcası, sevgimiz tükənməməlidir.

Bu Vətəni, Azərbaycanımızı, onun vətəndaşlarını, insanları, sülhü, barışı sevməliyik.

Sevə-sevə Qarabağı aldıq, Azərbaycanı qoruduq. Bütöv Azərbaycan da sevgilərimizdən doğulacaq. Bir gün bu sevgimizdən Təbrizli, Göyçəli, Borçalılı, Dərbəndli, İrəvanlı Azərbaycan doğulacaq.

Bir gün bu sevgidən demokratik, azad, bütöv Azərbaycan yaranacaq.

İşin başlanğıcındayıq.

Müstəqillikdən bu yana ilk ildir ki, biz yeni Azərbaycandayıq.

Müharibəsiz, işğalsız, təhdidsiz bir ölkəmiz var.
Hər şey indi başlayır.

Ümidli olun, Ümidlə olun...
Ümid sizsiniz...