Rusiyanın Sankt-Peterburq şəhərində polis əməkdaşları “taksi sürücüsü” rolunda cibgirlik edənləri saxlayıblar. Onların sərnişini olan zərərçəkənlər telefonlarını və bankdakı pullarını itiriblər.

Lent.az yerli mediaya istinadla bildirir ki, anoloji şikayətlər 2023-cü ilin dekabrında şəhərin mərkəzi hissəsində polisə daxil olmağa başlayıb. Müstəntiqlərin fikrincə, qrupa 43 yaşlı “taksi sürücüsü”, eləcə də onun 19 və 22 yaşlı iki ortağı daxildir. Onların ən böyüyü, həm də qrupun təşkilatçısı olub. O, sərnişinlər arasında sərxoş olanını axtarıb seçib. Daha sonra sürücü kömək bəhanəsi ilə sərnişindən mobil telefon istəyib və ehtiyatlı davranaraq şərikinə təhvil verib. O, başqa maşına keçib və zərərçəkənin hesabından pul çıxarıb.

Bu üsulla təkcə telefonunu deyil, hesabından 5 milyon rublunu da itirən başqa bir zərərçəkənin sayəsində qrupun izinə düşmək mümkün olub. Gediş zamanı sərnişinin mobil bankı vasitəsilə kreditlər götürülüb və onlayn mağazadan satınalmaların bütün siyahısı ödənilib. Zərərçəkmiş xatırladıb ki, telefonun kilidini özü açıb və arvadına zəng etmək üçün taksi sürücüsünə verib. Geolokasiya analizinə əsasən, taksi marşrutu ilə üst-üstə düşməyən şəhərin müxtəlif yerlərində alış-veriş edilib ki, bu da sürücünün əlaltılarının olmasından xəbər verib.

Məlum olub ki, şübhəlilərin ən böyüyü hədə-qorxu ilə tələb etmək və bankomatdan pul oğurlamaqda təqsirli bilinib. Məlumata görə, o, azərbaycanlıdır. Faktla bağlı “oğurluq” maddəsi ilə cinayət işi açılıb, şübhəlilər saxlanılıb. Hazırda polis qruplaşmanın qalan zərərçəkənlərinin şəxsiyyətini müəyyənləşdirir.

Ötən ilin iyul ayının 25-də Baş Prokuror yanında Korrupsiyaya qarşı Mübarizə Baş İdarəsi Bakı Nəqliyyat Agentliyində (BNA) əməliyyat keçirib. Əməliyyat zamanı kimlərin məsuliyyətə cəlb edilməsi məlum olmasa da, BNA haqda yazılanlardan, deyilənlərdən aydın idi ki, ortada olduqca ciddi qanun pozuntuları var. Lakin bu əməliyyat çərçivəsində xüsusən BNA-nın mətbuat xidmətinin rəhbəri Mais Ağayevin adı hallanırdı.

TEREF Globalinfo.az-a istinadən xəbər verir ki, M.Ağayev həmin əməliyyat zamanı saxlanılıb. Bundan iki ay sonra onun sərbəst buraxıldığı deyilir.

Sabiq mətbuat katibinin azadlığa buraxıldıqdan sonra ölkəni tərk etdiyi bildirilir. Daha sonra isə Mais Ağayevin Türkiyəyə getdiyi məlum olub.

Qeyd edək ki, sonuncu dəfə o, 7 fevral 2024-cü il tarixində prezident seçkisində iştirak edib və səs verən zaman görüntülənib.

Paytaxtın Yasamal rayonunda istismar müddəti bitmiş fərdi yaşayış evləri sökülür.

News24.az-ın məlumatına görə, söküntü işləri Bakı şəhərinin Yasamal rayonunda Hüseyn Cavid və Mətbuat prospektlərinə paralel Əhməd Cəmil küçəsində həyata keçirilir.

Redaksiyamızın əldə etdiyi məlumata görə, sözügedən ərazidəki söküntü işlərini “De luxe Palace” tikinti şirkəti həyata keçirir. Lakin vətəndaşların əksəriyyəti söküntü işlərini həyata keçirən şirkətlə razılaşa bilmirlər.

Ətraflı RTV-nin sujetində:

"Xəzər dənizinin sahil zonasının infrastrukturunun layihələşdirilməsində yeni konsepsiyanın tətbiqi məqsədəuyğundur".

APA xəbər verir ki, bunu AMEA-nın müxbir üzvü Rauf Qardaşov bu gün Coğrafiya İnstitutunda keçirilən “Azərbaycanda müasir iqlim dəyişmələrinin təbii komplekslərə və təsərrüfat sisteminə təsiri” adlı beynəlxalq elmi-praktiki konfransda çıxışı zamanı deyib.

O bildirib ki, Xəzər dənizinin səviyyə dəyişmələri Xəzəryanı ölkələrin sosial-iqtisadi həyatına ciddi təsir edən amildir və bu təsir əhalinin və sənayenin böyük ölçüdə cəmləşdiyi Xəzərin Azərbaycan sahili zonasında özünü daha qabarıq şəkildə göstərir:

"Sahil zonası infrastrukturunun (dəniz limanlarının, şose və dəmir yollarının, turizm-rekreasiya obyektlərinin, neft-qaz platformalarının və nəql xətlərinin, bərpa olunan külək, Günəş, dalğa enerji qurğularının) layihələndirilməsi mərhələsində səviyyə dəyişmələrinin nəzərə alınması vacib olan ən əsas amillərdən biridir. Bu layihələrin çoxu gələcək onilliklər üçün səviyyənin kifayət qədər dəqiq, 0.5 metri aşmayan xəta ilə proqnozunu tələb edir".

O, həmçinin əlavə edib ki, Xəzərdən fərqli olaraq okeanlarda səviyyə dəyişmələri əsasən (ebb and flow) qabarma və çəkilmə nəticəsində baş verir və bu dəyişmələrin vaxtı dəqiq təyin edildiyi üçün dəniz nəqliyyatının fəaliyyətinə demək olar ki, təsir etmir. Belə ki, gəmilər öz hərəkətlərini öncədən tənzim edirlər və limana səviyyə sabit olduğu zaman yaxınlaşırlar:

"Xəzər dənizində uzunmüddətli səviyyə dəyişmələrinin yetərincə dəqiq təyini mümkün olmadığı üçün sahil zonası infrastrukturunun layihələndirilməsində yeganə doğru strateji səviyyə dəyişmələrə adaptasiya oluna bilən inşaat texnologiyalarının tətbiqinin olduğu görülür".

Alimin sözlərinə görə, belə bir strategiyanın işlənməsinin iqtisadi nöqteyi-nəzərdən səmərəli olacağı öncədən görülə bilər:

“Buna əsas olaraq bu faktı göstərə bilərik - dünyanın ən cəlbedici çimərliklərinə malik olan İndoneziya, Filippin və Mayaminin sahil zonalarını zaman-zaman sunami və tornado tamami ilə məhv edir. Buna rəğmən, qısa müddətə (bir sonraki turizm mövsümünə qədər) bu turistik obyektlər bərpa edilir. Bu ona görə mümkün olur ki, bu infrastruktur obyektləri yüngül konstruksiyalı materiallardan estetik gözəllik nəzərə alınmaqla tikilir. Xəzər dənizində səviyyə dəyişmələri tədricən gedən proses olduğu üçün infrastruktur obyektlərinin gözlənilmədən məhvi riski demək olar ki, yoxdur. Yetər ki, onlar səviyyə dəyişmələrinə adaptasiya oluna biləcək şəkildə, yəni sürüşdürülə və qaldırılıb-endirilə bilən texnologiyalar əsasında inşa edilsin".

“Oba” marketdən aldığımız istənilən məhsul ya köhnə olur, ya da paketi açıq olur. marketin havalandırma sistemi olmadığına görə də də satılan hər şeydən, çörəkdən belə pis qoxu gəlir.

Tribunainfo.az xəbər verir ki, bu barədə jurnalist Həbibə Abdulla yazıb. O bildirib ki, “Oba”da satılan heç nə alınacaq səviyyədə deyil:

“Məhəlləmizdə təxminən 500 metr radiusda 4 OBA Market var. Hamısında zay məhsullar satılır. O gün olmur ki, aldığımız nəsə ya köhnə, ya açıq paket olmasın. O qədər sıx düzülüblər ki, xırda məhəllə marketləri məcbur olub bağlanıblar, sakinlər OBA-lara üz tutmağa məhkum ediliblər. Ən yaxınımızdakı OBA-da isə bir qoxu var ki, baş çatladır. İş o yerə çatıb, artıq ordan çörək və s. açıq məhsul almırıq, qoxu dadına çökür məhsulların. Paketlərini də gələn kimi açır zibilə atırıq ki, qoxusu evə dağılmasın. Səbəb odur ki, MARKETDƏ HAVALANDIRMA SİSTEMİ YOXDUR! Bir neçə ay əvvəl diqqətlərinə çatdırmışam, amma nəticə də yoxdur. Yazanda, deyirlər bizə inhisarçı deyirsiz, inhisarçılığın buynuzumu olur? Antiinhisar və İstehlak Bazarına Nəzarət Dövlət Xidməti isə hələ malalamaqla məşğuldur. Onlara verdiyimiz sorğunu və aldığımız cavabı təqdim edəcəm, özünüz baxıb görəcəksiz necə mahir malaçı olduqlarını…”

Marketin mövqeyini işıqlandırmağa hazırıq.

Ləğv edilmiş Milli Təhlükəsizlik Nazirliyinin (MTN) idarə rəisi olmuş Akif Çovdarovu həyat yoldaşı məhkəməyə verib.

Çovdarovla bağlı iddianı məhkəmədə Çovdarova İbadət Rza qızı qaldırıb. İşin mahiyyəti ailə münasibətləri üzrə mübahisədir. Ər-arvad arasında əmlak mübahisəsi tərəfləri məhkəməlik edib.
İş Bakı Apellyasiya Məhkəməsindədir. Tərəflər arasında növbəti proses 2 iyul tarixində baş tutacaq. Işə hakim Məmməd Məmmədovun sədrliyi ilə baxılacaq.
Xatırladaq ki, aprel ayında da A.Çovdarovu ailə üzvləri – həyat yoldaşı, qızları və oğlu ilə yanaşı əlavə 60 nəfər zərərçəkən məhkəməyə vermişdi.

Bu gün saat 17:00 radələrində ASCO-nun "Zığ" Gəmi Təmiri və Tikintisi Zavodunun 61 saylı üzən tərsanəsində təmir işləri aparılarkən zavodun 5 əməkdaşı qazdan zəhərlənib.

TEREF qafqazinfo-ya istinadən xəbər verir ki, üzən tərsanədə işləyən 4 işçidən səs gəlmədiyini görən növbədə duran Yolçuyev Namik Əli oğlu həmkarlarının arxasınca tərsanənin ballastının nasos bölməsinə daxil olub, lakin o da qazdan zəhərlənib.

Əraziyə FHN-nin xüsusi briqadası cəlb olunub. Hadisənin baş verdiyi yerdən 5 nəfərin - Səfərəliyev Tural Şabəddin oğlu, Şahbazov Orxan Zaur oğlu, Yolçuyev Namik Əli oğlu, Ağayev Teyyub Eyyub oğlu, Məmmədov Samid Abdulvahab oğlunun meyiti çıxarılıb.

Hadisənin baş vermə səbəbləri haqqında araşdırmalardan sonra daha ətraflı məlumat veriləcək.

Bu gün günorta saatlarından etibarən “28 Mall” ticarət mərkəzinin parkinq çıxışında böyük tıxac yaranıb.
Bu barədə sürücülər sosial şəbəkədə paylaşım ediblər.
Qeyd olunur ki, təxminən 3 saata yaxın müddətdə ticarət mərkəzinin dayanacağından çıxmaq mümkün olmayıb: “Saat 14:45-dən davam edən tıxac. Havasız parkinq. Hamilə qadından tutmuş yaşlı insanlara qədər hamı dayanıb, “28 Mall”dan çıxış etmək mümkün deyil”.
Vətəndaşlar tıxacın alış-veriş mərkəzinin yaxınlığında su borusunun partlaması ilə əlaqələndirirlər.
Yaranmış problemlə bağlı “28 Mall”la əlaqə saxladıq. Ticarət Mərkəzindən bildirildi ki, sözügedən problem daxili deyil, küçədə yaranan tıxacla əlaqədardır: “Ona görə də biz heç bir tənzimləmə apara bilmirik”.
“Azərsu ASC”nin mətbuat xidmətinin rəhbəri Anar Cəbrayıllı “Qafqazinfo”ya açıqlamasında bildirib ki, həmin saatlarında ticarət mərkəzinin yerləşdiyi küçədən keçən su borusunda qəza olub. Qurum əməkdaşları qəzanın fəsadlarının aradan qaldırılması üçün texnikalarla əraziyə cəlb olunub. Sıxlığın bundan qaynaqlandığı bildirilir.

Şəmkir rayonunda toyda bıçaq xəsarəti alan şəxsin kimliyi məlum olub.

"Report"un məlumatına görə, mübahisə zəminində bıçaq xəsarəti alan, 1968-ci il təvəllüdlü M.Zeynalovdur.

Onun vəziyyəti kafi qiymətləndirilir.

Daxili İşlər Nazirliyinin Mətbuat Xidmətinin Gəncə regional qrupunun baş inspektoru Eşqin Qasımov bildirib ki, Şəmkir Rayon Polis Şöbəsinə rayonun Səməd Vurğun kənd sakini, 1968-ci il təvəllüdlü Mustafa Zeynalovun kəsici deşici alətlə çiyin nahiyəsindən daxilə keçməyən xəsarət alması barədə məlumat daxil olub.

Araşdırmalarla M. Zeynalova toy mərasimində həmkəndlisi 2005-ci il təvəllüdlü Qafar Abbasovun xəsarət yetirməsi məlum olub. Şübhəli şəxs saxlanılıb, araşdırmalar davam etdirilir.