Samux Rayon icra Hakimiyyətinin başçısı Firdövsi Əliyevin oğlu Orxan Əliyev 78 saylı Lerik seçki dairəsindəndən deputat mandatı almaq arzusundadır.

Bu barədə Azsiyaset.az saytı məlumat yayıb.

Qeyd olunur ki, F.Əliyev oğlu Orxana deputat mandatı verdirmək üçün bütün gücünü səfərbər edib. Hətta Orxanın deputat olmaq arzusunu reallaşdırmaq ailəsinin sahib olduğu biznes imkanlarını əsas gətirib.

Qeyd edək ki, 78 saylı Lerik seçki dairəsinin deputatı İqbal Məmmədovdur.

İş adamı Qalib Məmmədov deputat olmaq üçün əl-ayağa düşüb.

Yenicag.az-ın əldə etdiyi məlumata görə, daha bir məmur sentyabrın 1-də keçiriləcək parlament seçkilərində mandat qazanmaq istəyir.
Bu şəxs “KDY Logistics” şirkətinin Azərbaycan qrupunun Direktorlar Şurasının sədri Qalib Məmmədovdur.

Qalib Məmmədov iş adamıdır, əvvəllər Rusiyada fəaliyyət göstərib. Daha sonra o, Azərbaycana gəlib və burada özünə şirkət qurub.

Qalib Məmmədov bir zamanlar işğaldan azad edilmiş Qubadlıda qurduğu dövlətə meydan oxuyan təmtəraqlı məclislə diqqət mərkəzinə düşmüşdü.

Hal-hazırda Kəlbəcərdən deputat olmaq üçün əl-ayağa düşən iş adamı bəzi dairələrlə iş aparır. Onun namizədliyi Rusiya və İrandakı bəzi qüvvələr tərəfindən dəstəklənir.

Dövlət başçısının xəbərdarlıqlarına məhəl qoymayaraq, azad edilmiş bölgələrimizdəki füsunkar yerləri özününkü hesab edən Qalib Məmmədov məhz toxunulmazlıq statusu ala bilmək üçün parlamentə can atır.

Onu da qeyd edək ki, Qalib Məmmədov Azərbaycanda fəlaliyyət göstərən iş adamlarından birinin “sağ əli” hesab olunur. Ona görə də onun Kəlbəcərin deputatı olmaq şansı bir qədər də artır.

www.yenicag.az

ABŞ prezidentliyinə namizəd Donald Tramp sui-qəsd cəhdi zamanı başını yüngülcə böyük televiziya ekranına doğru əyib və bu, onun həyatını xilas edib.

Axar.az xəbər verir ki, bu barədə Trampın müşaviri Den Skavino X sosial şəbəkəsində yazıb.

“Allaha şükür, dünən axşam keçirilən mitinq zamanı Prezident Tramp böyük ekrana baxmaq istəyib. Bu, atış zamanı onun başını bir az əyməsinə səbəb olub. O, bütün dualar, sevgi və dəstəyə görə minnətdardır”, - Scavino yazıb.

Xatırladaq ki, ABŞ-ın Pensilvaniya ştatında tərəfdarları ilə keçirilən aksiyada Respublikaçılar Partiyasından prezidentliyə namizəd Donald Trampa qarşı sui-qəsd cəhdi edilib. Tramp yüngül xəsarətlə xilas olub.

FTB-nin məlumatına görə, atəş açan 20 yaşlı Tomas Metyu Kruks zərərsizləşdirilib.

Sentyabrın 1-də Azərbaycanda keçiriləcək növbədənkənar parlament seçkilərində Milli Məclisin 1, 2, 3, 4, 5 və 6-cı çağırış deputatı olmuş İmamverdi İsmayılov yenidən seçkilərə qatılmaq istəyir.

AzFakt.com-un əldə etdiyi məlumata görə, İmamverdi İsmayılov yenidən 125 saylı Zəngilan-Qubadlı seçki dairəsindən deputat seçilmək niyyətindədir.
Onun hazırda iqtidarın yuxarı dairələri və YAP rəhbərliyi ilə danışıqlar apardığı bildirilir. Məlumata görə, iqtidar yetkililəri İmaverdi İsmayılovun yenidən deputat olmasına hələ ki, müsbət yanaşmırlar.

Bildirək ki, İmamverdi İsmayılov 24 ildir Milli Məclisdə deputat kimi fəaliyyət göstərir. Parlamentin lal deputatlar siyahısına düşən İsmayılov daha çox müxtəlif qalmaqalları ilə mətbuatın gündəminə düşüb.

Onuda qeyd edək ki, İmamverdi İsmayılov Milli Məclisin varlı deputatları siyahısndadır. Onun Sumqayıt şəhərində restoranları, şadlıq evləri, internet-klubları və dükanlarının olduğu deyilir. Həmçinin Sumqayıtda tikinti mallarının biznesində, Sumqayıt maşın bazarında payının olduğu bildirilir. Həmçinin ölkənin müxtəlif bölgələrində müxtəlif biznes sahələrinə sahibdir.

Qarşı tərəfin mövqeyini dərc etməyə hazırıq.

ünən - iyulun 12-də Azərbaycanın paytaxtı müasir, gözəl, yarlı-yaraşıqlı Bakıda daha bir binada lift qırıldı. Ağır xəsarətlər alanlar olsa da, xoşbəxtlikdən hələ ki, dünyasını dəyişən olmayıb. Bu artıq son iki ayda 3-cü hadisədir. İlin əvvəlindən isə səhv etmirəmsə, artıq 5-ci lift qəzasıdır. Bəzi cavabdeh məmurlar, tikinti şirkətinin rəsmilər deyə bilərlər ki, əşşi, qəzadır da, liftdə nasazlıq olub, qırılıb. Cənablar, bəlkə deyəsiz ki, lift qəzaları da bir qəzadır, təsadüfdür, ona görə də, avtomobil qəzalarıyla eyni tezlikdə, yəni hər gün olmalıdır? Axı texnikanın, texnologiyanın indiki inkişaf vaxtında liftləri vaxtlı-vaxtında sazlamaq, təmir etmək mümkündür. Bu, mümkün olmursa, il ərzində bir şəhərdə 1-2-dən artıq lift qəzası baş verirsə, deməli, burada subyektiv faktor, başqa sözlə, insan faktoru var. İnsan isə... İnsan isə çiy süd əmib... İnsan rüşvətlə, tanış-bilişlə, day-dayla özünə dəxli olmayan işə düzəlir, boynuna götürüb dövlət büdcəsindən maaş aldığı işi bilmir, savadsız olur, məsuliyyətsiz olur, səhlənkar olur, iş başında əyyaşlıq edir, ya da ümumiyyətlə, iş yerində tapılmır, insan saxta diplom verir, sənəd yazır, insan yerlibazlıq, qohumbazlıq edir, “şirinlik” alır, rüşvət alır, ağına-bozuna, savadına, təhsilinə, ixtisasına baxmadan, kimi gəldi, necə gəldi, işə götürür, təyin edir, insan oğurluq edir, təzə detalları oğurlayıb satıb yerinə köhnə detallar bağlayır, insan binaları tikəndə qumdan sementdən tutmuş, daşa, dəmirədək hər cür materialı ləzzətlə “yeyir”, binaların guya texniki təhlükəsizlik standartlarına cavab verməsi haqda saxta sənəd verir, insan xaricdən digər texnika və avadanlıqları alıb ölkəyə gətirəndə korrupsiyaya yol verir, işlənmiş liftləri təzə, ən müasir lift adıyla şirkətlərə satır, insan mütəmadi təmir adıyla maaş yazdırır, vəsait sildirir, ancaq heç bir təmir işi aparmır...

Bəs çiy süd əmən insanların vəzifə başında məsuliyyətsizliyinin, səhlənkarlığının, oğurluğunun, rüşvətxorluğunun, korrupsionerliyinin, saxtakarlığının və s. qarşını kim almalı idarə, müəssisə, şirkətlərin və s. işlərini kim tənzimləməlidir. Əlbəttə ki, dövlətin, hökumətin müvafiq mərkəzi icra qurumları...

Hökumət demiş, yaxşı yadıma düşdü. Bu yaxınlarda hökumətimizin hörmətli qurumlarından biri olan Tarif Şurası növbəti dəfə yanacağın, nəqliyyatın, dərmanların, zibil atmanın və s. qiymətini qaldırdı. Və həmişə olduğu kimi, bir gün keçməmiş ərzaqların da, bir çox xidmətlərin də qiyməti yavaş-yavaş qalxdı... Yəqin ki, digər kommunal xidmətlər, o cümlədən liftlər üçün qiymətlər də qalxıb. Həmçinin bina komendantlarının qeyri-qanuni aldığı haqqlar da... Hər şeyin qiymətləri kimi liftlərin də qiyməti qalxır, amma nədənsə özləri qalxa bilmir, yarı yolda qırılıb onlar üçün pul ödəyən insanların həyatını təhlükəyə atır...

Ölkədəki, şəhərlərimizdəki, binalarımızdakı digər ciddi problemlər kimi lift probleminin də dəqiq araşdırılması, liftlərdə mütəmadi nasazlıqlara, qəzalara görə məsul olan şəxslərin qanunla cəzalandırılması da və s. müvafiq dövlət hökumət qurumlarının işidir. Yaxşı yadınızda olar, mətbuatda qızına 400 min dollarlıq toy edən, 400 milyon manatı “yeyən” liftlə bağlı qurumlardan birinin rəisi haqda cinayət işi qaldırıldı, amma sonda o, həbs olunmadı. Başqa bir lift idarəsinin rəisi isə 1,8 milyonluq işə görə tutuldu, ancaq tezliklə bəraət alıb həbsdən buraxıldı... Amma lift problemi düzəlmədi, əksinə, daha da artdı...

İndi, hörmətli baş nazir, nazirlər, təəssüf ki, sizə əlimiz çatmır, ünümüz yetmir. Odur ki, yazılarımız vasitəsilə, özü də dövlət başçısının dəfələrlə “köməkçilərim” adlandırdığı jurnalistlərdən, yazarlardan biri kimi sual edirəm; bu subyektiv amillərdən, yəni çiy süd əmən insanlardan asılı olan problemlər, o cümlədən lift problemi nə vaxt həllini tapacaq? Niyə hörmətli Tarif Şurası qiymətləri qaldırır, amma liftlərimiz əməlli-başlı qalxa bimir, ya beqafıl yolda dayanır, günümüzün bir hissəsini orada keçiririk, ya da qəflətən qırılıb bizi zirzəmiyə çırpır? Niyə yanacaq qiymətləri qalxır, amma onların keyfiyyətindən hələ də şikayətlər var? Nədən avtobus, metroda gediş haqqları qalxır, ancaq bir çox avtobuslarda, eləcə də metro vaqonlarında kondisioner, havalandırma sistemləri işləmir? Hətta paytaxtın mərkəzində elə avtobuslar var ki, at arabasından betər cırıldayır... Niyə kəndlərdə su qiymətinə olan bir çox tərəvəzlər, meyvələr və s. Bakıda və digər şəhər və rayon mərkəzlərində od qiymətinə satılır? Hansı səbəblərdən bəzi dərmanlar Azərbaycanda Türkiyədəkindən, bəziləri hətta Rusiyadakından dəfələrlə baha qiymətə satılır? Niyə özəl liseylərdə, eləcə də özəl, həm də dövlət ali məktəblərində təhsil haqqları ildən-ilə artır, amma universitetlərimiz beynəlxalq reytinqdə hamıdan dala qalır? Diplomlarımız bir çox xarici dövlətlərdə işləmir?.. Və diplomlu cavanlarımız işsiz qalır? Niyə qiymətlər ilbəil qalxır, amma qazlı-neftli, qara qızıllı, sarı qızıllı, ağ qızıllı milyarderlər ölkəsi Azərbaycanda orta aylıq minimal əmək haqqı hələ Baltikyanı ölkələri demirəm, bəzən “qazsız, neftsiz”, “kasıb” dediyimiz qonşu Ermənistan və Gürcüstandan da aşağı qalır... Və s. və i.a.

Problemlər, suallar bitmir. Amma elə deyilənləri araşdırıb nöqsanların maksimum aradan qalxmasına nail olsanız, böyük işdi... Özü də bu problemlər layiqincə həll etmək yüksək vəzifə sahibləri kimi sizin borcunuzdur... Elə jurnalistlərin- Prezidentin köməkçilərinin suallarına obyektiv, dürüst cavab vermək də borcunuzdur...
Siz müəyyənləşdirməlisiz ki, bu problemlər əsas səbəbləri nədir; korrupsiyamı, monopoliyamı, saxtakarlıqmı?..

İndi bəzilərinin dilinə yaxşı söz düşüb; “Əşşi, Qarabağı aldıq, torpaqlarımızı qaytardıq, o biri problemlər, korrupsiya-filan da yavaş-yavaş düzələr, həllini tapar”. Nə vaxt, cənablar, ağalar, yoldaşlar, bəylər, xanımlar? İnsan ömrü gündən-günə qısalır e? Ani ölümlər gündən-günə artır! Axı biz Stalin kimi demirik ki, insan yoxdursa, problem də yoxdur... Qarabağ məsələsi daha çox xarici amillərdən asılıydı; deyirdik ki, Rusiya imkan vermir, Amerika, Frnasa qoymur... Bəs ölkədəki adi məişət problemlərini: lift, nəqliyyat, ölkədə yetişən, istehsal olunan, meyvə, tərəvəz, ərzaq qiyməti, eləcə də elm, təhsil, səhiyyə və s. problemlərini... Bunları da Qərb, ya Rusiya, yoxsa Fransa imkan vermir həll etməyə, düzəltməyə?..

Xülasə, özümüzdən, ölkəmizdən, insan amilindən asılı olan problemləri mümkün qədər tez, vaxtında, insanlar bezib çərləməmiş, dünyadan köçməmiş həll etmək gərəkdir... Özü də sözdə, rəqəmlərdə yox. Əməldə... Vicdanla, namusla, qeyrətlə...
İnsan amilindən asılı olan problemləri həll etmək üçün isə yanacaq, enerji, su, xidmət, ərzaq və s. qiymətlərindən öncə insanın qiymətini qaldırmaq lazımdır, insanın...

Sultan Laçın - moderator.az

Azərbaycanda artıq sistemli hala gələn kadr və struktur islahatları öz tempi ilə davam edir. Xüsusən sentyabrın 1-i keçiriləcək parlament seçkilərindən əvvəl dəyişikliklərin geniş vüsət alacağı, əsasən icra hakimiyyəti orqanlarını əhatə edəcəyi bildirilir. Yenilənmə çərçivəsində bəzi icra başçılarının postunu tərk edəcəyi vurğulanır.

TEREF Globalinfo.az-a istinadən bildirir ki, vəzifəsindən getməsi gözlənilən məmurlardan biri də Qaradağ rayonunun icra başçısı Süleyman Mikayılovdur.

Qeyd edilir ki, onun işdən çıxarılmasının əsas səbəbi bu vəzifədə çoxdan fəaliyyət göstərməsidir. Deyilənə görə, onu bir başqa rayona icra başçısı göndərə bilərlər. S.Mikayılovun deputat kimi Milli Məclisdə təmsil olunacağı barədə də iddialar var. Nəsimi Rayon İcra hakimiyyətinin başçısı Asif Əsgərovun da bugünlərdə işdən çıxarılacağı, parlament seçkilərində mandat almaq uğrunda mübarizəyə qoşulacağı qeyd edilir.

Mənbə bildirir ki, S.Mikayılovun fəaliyyətindən xüsusi narazılıq yoxdur. Dövlətin ona tapşırdığı işlərin öhdəsindən müəyyən qədər gəldiyi deyilir. Vətən müharibəsindən sonra qazilərlə və şəhid ailələri ilə işi də qənaətbəxş sayılır. Onun eyni rayonda uzun müddət vəzifədə qalması istər-istəməz fəaliyyətində durğunluq yaradıb. Bu səbəbdən başçının yenisi ilə əvəzlənəcəyi deyilir.

Uzun müddətdir vəzifədə olan və artıq dövlətin yürütdüyü genişmiqyaslı daxili siyasətlə ayaqlaşa bilməyən icra başçılarının vəzifəsindən uzaqlaşdırılacağı haqda deyilənlər xeyli məntiqli görünür.

O da vurğulanır ki, dövlət bu qəbildən olan icra başçılarının illərlə müxtəlif yollarla mənimsədiyi milyonların şəhid ailələri və qazilərin qayğılarına yönəldilməsinə nail olub. İndiki mərhələdə praktiki olaraq “fəaliyyətini dayandırmış” bu başçıların daha savadlı, dövlətin siyasətini icra etmək gücündə olan uğurlu kadrlarla əvəz edilməsi nəzərdə tutulur.

Prosesləri ümumiləşdirəndə belə qənaətə gəlmək olar ki, ölkənin daxili siyasətində yeni və mühüm mərhələyə qədəm qoyulur.

Parlament seçkisi ilə əlaqədar nаmizədin qeydə alınması üçün zəruri olan seçki sənədlərinin dairə seçki komissiyasına (DSK) təqdim edilməsinə başlanılır.

"Report"un xəbərinə görə, bu, Mərkəzi Seçki Komissiyasının "Milli Məclisə növbədənkənar seçkinin keçirilməsi üzrə əsas hərəkət və tədbirlərin Təqvim Planı"nda öz əksini tapıb.

Sənəddə qeyd edilib ki, bu proses iyulun 13-dən başlayır və avqustun 2-si saat 18:00-dək davam edir.

Qeyd edək ki, Seçki Məcəlləsinə əsasən, irəli sürülmüş namizədlərin qeydə alınması üçün namizəd və ya siyasi partiyanın, siyasi partiyalar blokunun səlahiyyətli nümayəndəsi səsvermə gününə ən çoxu 50 və ən azı 30 gün qalmış saat 18.00-dək müvafiq seçki komissiyasına aşağıdakı seçki sənədlərini təqdim etməlidir:

1. irəli sürülmüş namizədin müdafiəsi üçün toplanmış seçici imzaları olan imza vərəqələri;

2. seçici imzaları toplanmasının yekunu haqqında Mərkəzi Seçki Komissiyasının müəyyənləşdirdiyi formada tərtib edilmiş protokolun 2 nüsxəsi;

3. Məcəllənin 53.3-cü və 54.8-ci maddələrinə uyğun olaraq namizəd haqqında təqdim edilmiş məlumatlarda dəyişikliklər barədə bildiriş;

4. namizədin gəlirlərinin miqdarı və mənbələri barədə məlumat;

5. mülkiyyət hüququ əsasında namizədə məxsus əmlak barədə məlumat;

6. namizədin ilkin maliyyə hesabatı (seçici imzaları toplanmasının təşkilinə sərf edilən vəsait haqqında məlumatlar göstərilməklə).

Xatırladaq ki, Prezident İlham Əliyev iyunun 28-də altıncı çağırış Milli Məclisin buraxılması və Milli Məclisə növbədənkənar seçkinin təyin edilməsi haqqında Sərəncam imzalayıb. Sərəncamla altıncı çağırış Milli Məclis buraxılıb və sentyabrın 1-nə növbədənkənar seçki təyin edilib.

Yaşı 70-i ötmüş deputatların yenidən namizəd olub-olmayacağı son günlər ən çox müzakirə olunan mövzulardandır.

Qocaman millət vəkillərinin yerlərini gənc və savadlı kadrlara verməsi ilə bağlı çağırış edənlərin sayının artması bu məsələni gündəmdən düşməyə qoymur.

Yenisabah.az xəbər verir ki, yaşlı deputatlarla bağlı problem son günlər ciddi xarakter almağa başlayıb. Yaşı 70-i haqlamış və ömrünün 8-ci onilliyinə qədəm qoymuş əksər parlament üzvlərinin yenidən namizəd olması şübhə altına düşüb.

Qeyd edək ki, Milli Məclisin yaşlı deputatları hər vəchlə bu mövzuda danışmaqdan yayınırlar.

Parlament seçkilərinə rəsmi qaydada start veriləndən sonra jurnalistlərin suallarını cavablandıran İsa Həbibbəyli, Sabir Rüstəmxanlı, Aqil Abbas, Asim Mollazadə, Eldar İbrahimov, Tahir Kərimli kimi qocaman deputatlar konkret mövqe bildirməkdən çəkiniblər. Hətta Milli Məclisin vitse-spikeri, tarixçi-professor Fəzail İbrahimli də seçki marafonuna qoşulub-qoşulmayacağını hələ dəqiqləşdirmədiyini deyib. Bu siyahının daha da genişlənəcəyinə, mübarizədən kənarda qalacaq millət vəkillərinin siyahısına yeni adların əlavə olunacağına şübhə yoxdur.

“Yeni Sabah”ın əldə etdiyi məlumata görə, tərəddüd içərisində olan deputatların bəziləri hakim Yeni Azərbaycan Partiyasının (YAP) qərarını gözləyir. Bəzilərinə isə birmənalı olaraq seçkiyə qatılmamaq tövsiyə olunub.

Görünən odur ki, Milli Məclisin budəfəki tərkibi təkcə yeni simalar deyil, həm də gənc deputatlarsın sayının çoxluğuna görə əvvəlkindən xeyli fərqlənəcək.