“Bakının Nizami rayonu, Qara Qarayev 25 ünvanındakı binalarda 5-6 gündür istilik yoxdur”.

Bu barədə “Qafqazinfo”ya sözügedən ərazidə yaşayan bir qrup sakin müraciət edib.

Vətəndaşlar bildirib ki, tez-tez yaşanan bu problem kökündən həll edilmir: “Artıq bir həftədir ki, evimizdə istilik yoxdur. Keçən il də bu cür problemlərlə üzləşirdik. Uşaqlar evdə soyuqdan donur. Hər dəfə aidiyyəti quruma müraciət edirik, həll olunacağını desələr də, nəticə yoxdur. Bəzən isə bir gün olur, beş gün yox”.

Sakinlərə verilən məlumata görə, problemə səbəb istilik borularının partlamasıdır: “Hər dəfə gəlirlər ki, düzəldəcəyik, lakin heç bir həlli olmur. Bütün sakinlər binanın istilik problemindən bezib. Axı bu soyuqda istilik olmadan necə yaşamaq olar?!”

Məsələ ilə bağlı “Azəristiliktəchizat” ASC-yə sorğu ünvanladıq. Qurumun mətbuat katibi Elvin Basqallı sorğumuza cavab olaraq bildirdi ki, sözügedən binanı istiliklə təmin edən məhəllədaxili xətdə axıntı qeydə alınıb: “Həmin qəza hadisəsini aradan qaldırmaq üçün qazıntı işləri aparmaq lazımdır. Bunun üçün müvafiq dövlət qurumuna müraciət ünvanlanıb. Müraciət qeydə alınan kimi dərhal işə başlanılacaq. Qara Qarayev 25 ünvanındakı binanın istiliyi ilə təminatı ən qısa müddətdə bərpa ediləcək”.