…Allah min rəhmət eləsin, Səməd Vurğunun «26-lar» poemasında Bakının dərd-sərinə şairin siyasi baxışları belə ifadə edilirdi:

«Bakının dərdi var, Bakı xəstədir,

Könül intizarda, göz yol üstədir...

Soyuq divarlarda güllə nişanı.

Didir, parçalayır, insan insanı.

Burda döngələrin yeri darısqal.

Oturmuş palanın üstündə hambal,

Dərin fikirlərə qərq olmuş yazıq,

Dincəlmək istəyir o da azacıq…».

Bu şeiri müasirləşdirib günümüzə uyğunlaşdırsaq, görün nə alınar:

«Bakının dərdi var, Bakı xəstədir,

Hamı intizarda, qulaq səsdədir...

Ensiz küçələrdə AYNA nişanı.

Didir, parçalayır, fikir insanı!

Hamı pul yığandır, yoxdur bir həyan!

Dayanıb yollarda AYNA-lı cavan!

Dərin fikirlərə qərq olub hamı,

Çıxış yolunasa yox bir gümanı…».

Bəli, Bakını xəstə salanlar, küçələrini iflic edənlər indi özləri bu bəladan xilas olmağa çalışırlar. Amma çarə tapılmır ki, tapılmır.

Tikinti mədəniyyətinin pozulduğu, MTK-lı məmurların vur-tut iki əsas giriş-çıxışı olan Abşeron yarımadalı Bakının boş ərazilərini zəbt edərək göydələnlər ucaltması bu günümüzün tıxaclarının əsas səbəbidir. Bunu hamı bilir. Amma bilmək istəməyənlər hələ də var. Axı Bakı elə bir ərazidə yerləşmir ki, onun quru yollarının səmti dəyişsin, dəyişdirilsin, paytaxta giriş-çıxış yollarının sayı artırılsın. Yarımada üzərində tikilmiş şəhərin gələcək aqibətini düşünməmək bu günümüzün problemlərinə yol açıb…

AYNA-nın küçə parkovkasının ardınca həyətlərin şlaqbaumlaşdırılma siyasətsizliyi…

Bu tərəfdən də Azərbaycan Yerüstü Nəqliyyat Ağentliyinin (AYNA) parkovka problemi Bakıya ikinci daha ciddi problem yaşatmaqdadır. «Təzadlar» dəfələrlə yazıb, paytaxtın küçə və meydanları ilə bağlı plan cızanda yüz ölçüb-bir biçməli olanlar, canki harasa tələsir və ağlagəlməz addımlar atırlar. Sonra isə «yüz ağıllı fikirləşib bir dəlinin» «quyuya» atdığı «daşı» çıxarmaqla məşğul olur…


Beləliklə, vəziyyət kritikdir. Çünki Bakının demək olar elə bir küçələri yoxdur ki, sürücülər üçün qapalı olmasın. Əsas yollarda avtomobil saxlamaq olmaz, izn verilən yerlərdə isə AYNA-nın «pul ver!» lövhələri və onların da yanında bir nəfər təhkimçi dayanıb! Təsəvvür edin, hər il DYP-yə məcburən kifayət qədər cərimə ödəyən, texniki baxışa, Yol fonduna və s. büdcə rüsumlarını verən, Gömrük Komitəsinə isə maşının dəyəri qədərində dövlət rusumu ödəyən sürücü iş yerinin qarşısında və ya ətrafında avtomobilini saxlamaq istəyəndə isə günə 7-10 manat pul verməmək üçün ətrafdakı həyətlərə girməyə məcburdur. Sakinlər isə öz həyətlərində şəxsi avtomobillərinə, yaxud uşaqların oynamasına-gəzişməsinə yer tapa bilmədiklərindən hazırda Bakının bütün həyətləri şlaqbaumlaşdırır. «Təzadlar»a Nizami rayonu, 8 KM ərazisində yaşayan şikayətçi Samir Rüstəmov deyir ki, problem nəzarətdən çıxmaqdadır: «…Binamızın həyətinə 4 yerdən giriş var. Deməli, sakinlər məcburdur ki, öz hesablarına 4 yerə şlaqbaum quraşdırsınlar. Bizdən hər şlaqbauma görə 1500 manat pul tələb olunur. Məcburuq adambaşı 70-100 manatdan pul yığılsın. Bu hesabla Bakıda indi hansısa gözəgörünməz işbazlar, sanki AYNA ilə əlbir olub Bakı küçələrini şlaqbaumla doldurmaqla məşğuldurlar. Xarici qonaqlar, turistlər Bakını belə vəziyyətdə görsələr, nə düşünərlər???».


Ölkəyə gələn turistlərə küçə və həyətləri şlaqbaumlu Bakını göstərmək istəyənlər kimlərdir?

Həqiqətən də ciddi problemdir. Ölkə rəhbərliyi və aidiyyəti qurumlar Bakını dünyaya turizm şəhəri kimi reklam edir. Bu tərəfdən isə AYNA-nın parkovka siyasətsizliyi bu dövləti siyasətini alt-üst edir. Paytaxt sakininin söylədiyi kimi, Bakıya gələn turistlər və qonaqlar yəqinki şəhəri gəzmək istəyəcək. Onlar Bakı küçələrini, həyətləri… kütləvi şlaqbaumlu görəndə, özlərini təcrid halda hiss edəndə, məsələn, Bakı şəhər İcra Hakimiyyətinin başçısı Eldar Əzizovun merliyi haqqında nə düşünəcəklər? Mer Bakının bu halına niyə və necə dözür???

Vəziyyət isə həqiqətən də narahatlıq doğurur. Əməkdaşlarımız da paytaxtın bir neçə rayonunda, həmçinin özlərinin yaşadıqları ərazilərdə sakinlərdən pul yığılaraq həyətlərin kütləvi surətdə şlaqbaumlaşdırılmasının şahididirlər.

Problem həm də ondadır ki, şlaqbaumlu həyətlərə təcili yardım, yaxud polis, FHN-nin yanğından mühafizə, yaxud təcili kömək təyinatlı (xilasedici) avtomobillərinin daxil olmasına süni çətinliklər yaradılmış olur. Eləcə də qapısına taksi sifariş verənlər üçün… Çünki şlaqbaum pultları yalnız avtomobili olanlar üçündür.

Bizcə, FHN rəsmiləri də bu məsələyə reaksiya verməlidirlər.

Odur ki, nə qədər gec deyil, bu problem ən azı Nazirlər Kabineti səviyyəsində həllini tapmalıdır. İnsanlar AYNA ilə şlaqbaum biznesinə girişənlərin müştərək əməkdaşlığı haqqında şübhələrə düşməkdə haqlı deyillərmi? Belə süni problemlər yarananda isə insanlar adətən «Hökumət hara baxır?» deməyə məcbur olurlar. Belə yersiz suallara yer qalmaması üçün gəlin elə hökumət səviyyəsində də bu problemə əncam çəkilsin…
Asif MƏRZİLİ
tezadlar

2021-ci il mayın 31-də Bakının Sabunçu rayonu Bakıxanov qəsəbəsində 1990-cı il təvəllüdlü Turanə Cəfərova qətlə yetirilib.

Lent.az qətl hadisəsinin istintaq materiallarını əldə edib.

Qeyd edək ki, Hadisəni törədən Eynur Əlizadə 1993-cü ildə Naxçıvan Muxtar Respublikasında anadan olub, əvvəllər məhkum olunmayıb. Faktla bağlı Sabunçu rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

İstintaqla müəyyən edilib ki, mayın 31-i gecə saat bir radələrində Eynur Əlizadə cinsi əlaqədə olmaq üçün tanışı Turanə Cəfərovanın Bakıxanov qəsəbəsində, kirayədə yaşadığı mənzilə gəlib. Aralarında olan səmimi münasibətə görə qadın çarpayının döşəyinin altına, avtomobil almaq üçün yığdığı 14 700 manat məbləğində pulu göstərdikdən sonra, Eynur onu öldürmək qərarına gəlib. E.Əlizadə səhər saatlarında T.Cəfərovanın boğazını sıxaraq onu boğmağa başlayıb. Müqavimətini qırmaqdan ötrü Cəfərovanı çarpayıdan döşəməyə yıxıb, yumruqla başına, üzünə və digər nahiyyələrinə çoxsaylı zərbələr vurub. Nəhayət, çarpayının yanında olan naqili qadının boynuna dolayıb, boğmaqla qadını öldürüb və onun pulunu ələ keçirib.

İş üzrə dindirilmiş Eynur Əlizadə bildirib ki, “Türkan” kimi tanıdığı Turanə Cəfərova ilə hadisədən beş ay əvvəl “Instagram” sosial şəbəkəsində tanış olub. Onun profil şəklini görüb, bəyənib:

“Turanə pul müqabilində görüşdüyünü yazdıqda, ona görüşmək istədiyimi bildirdim. Turanə ilə Bakıxanov qəsəbəsində, kirayədə yaşadığı mənzildə intim əlaqədə olmuşuq. Mütəmadi telefonla danışıb, onun evində görüşürdük. Mayın 30-da ona zəng edərək gecə saat 12-dən sonra yanına gəlmək istədiyimi bildirdim. Ayın 31-i gecə saat birin yarısında marketdən iki şüşə pivə və siqaret alaraq, onun mənzilinə qalxdım. Pivə içərkən, Turanə yatağın döşəyini qaldırıb orda olan pullarını göstərərək, həmin məbləğə özünə avtomobil alacağını dedi. Nə qədər pulun olduğunu söyləmədi. Bundan sonra cinsi əlaqədə olduq. Səhər saat doqquzda yuxudan oyananda qadının bacısı ilə telefonla danışdığını gördüm. Turanəni öldürməyi və yatağın altında saxladığı pulları götürməyi qərarlaşdırdım. Qadın yanımda uzanıb telefonla danışmaqda davam edərkən, üstünə atıldım və əllərimlə boğazından tutub onu boğmağa başladım. Bu zaman onun əlindəki telefon yerə düşdü. Turanə mənə müqavimət göstərirdi. Hər ikimiz sürüşərək yataqdan döşəməyə yıxıldıq. Boğazından tutaraq, onu boğmağa davam etdim. Turanə sol əli ilə mətbəx bıçağını götürdükdə, onun əlindən dişlədim və bıçaq yerə düşdü. Qadın döşəmədə dizləri üstə arxaya doğru əyildi və həmin vəziyyətdə müqavimət göstərərək dırnaqları ilə sağ qolumu və burnumu cırmaqladı. Sərinkeşin naqilini götürüb boğazına keçirərək, onu boğdum. Nəfəsinin kəsildiyini görüb artıq onun öldüyünü anladım. Döşəyin altından pulları götürdüm. Hamama keçib üzərimdəki qan ləkələrini yudum. Turanəyə məxsus “iPhone” markalı qara rəngli mobil telefonu götürdüm ki, istintaqda baxış zamanı yazışmalarımız aşkar edilməsin. Evin giriş qapısını çöl tərəfdən bağlayıb mənzili tərk etdim.

Evdən bir az aralanandan sonra yaxın münasibətdə olduğum Aytən adlı qadına zəng edərək, mənimlə birlikdə rayona gedə bilib-bilməyəcəyini soruşdum. Aytən etiraz etmədi. Aytənlə görüşə getməzdən öncə özümə şalvar, ayaqqabı, köynək və idman geyimi aldım. Pulu saydıqda 13 500 manat olduğunu gördüm. Yolun kənarında olan zibil qutusuna torbadakı paltarları və Turanənin telefonunu atdım. Daha sonra taksi ilə Aytənlə görüşəcəyim yerə yollandım. Görüşəcəyimiz yerə çatdıqda taksidən düşüb, Aytənin maşınına əyləşdim. Aytən avtomobili Şamaxı rayonuna qədər idarə etdi. Ona Turanəni öldürdüyümü dedim. Şamaxıda bir qaldıq. Rayonda yerləşən univermaqdan Aytənə 660 manata qızıl-zinət əşyaları aldım. Növbəti gün İsmayıllı rayonuna gedərək, bir gün də orada qaldıq. Səhərisi gün Bakıya qayıtdıq. Aytənin kirayə götürdüyü avtomobili Əhmədli qəsəbəsindəki şirkətə təhvil verdik. Daha sonra özümə 500 manata telefon alıb çayxanaya yollandım. Həmin çayxanada polis əməkdaşları tərəfindən saxlanıldım. Bölmədə törətdiyim cinayəti etiraf etdim”.
Zərərçəkmiş şəxsin hüquqi varisi Şəhadət Cəfərov ifadəsində göstərib ki, doğma bacısı Turanə Cəfərova 10 il əvvəl Mahir adlı şəxslə ailə həyatı qurub və nikahlarından iki övladları dünyaya gəlib:

“Bakıda kirayədə yaşayırdılar. Təxminən üç-dörd il əvvəl Turanə ilə Mahir ayrılıblar. Bacımın sözlərinə görə, o, gözəllik salonunda işləyərək, pul qazanırdı. Ölümündən bir həftə əvvəl telefonla danışanda Turanə hər şeyin qaydasında olduğunu demişdi. Mayın 31-də bacım Nuranə Cəfərova Turanə ilə mobil telefonla danışan zaman qışqırıq səsi gəldiyini və ona nəsə olduğunu bildirdi. Buna görə, avtobusla Ucardan Bakıya gəldim. Bakıxanov qəsəbəsinə çatıb evə qalxdıqda polis əməkdaşları mənə bacımın öldürülməsi barədə məlumat verdilər”.

Ş.Cəfərov qeyd edib ki, Eynur Əlizadəni heç vaxt görməyib və bacısı da həmin şəxs barəsində ona danışmayıb.

Şahid Nuranə Mikayılova bildirib ki, mayın 31-i saat 10 radələrində Turanə ona zəng edərək, söhbət edib:

“Danışarkən, gözlənilmədən bacımın qışqırdığını eşitdim. Sanki kimsə onu boğurdu. Sonra bacımın səsi kəsildi. Qışqırıq səsindən anladım ki, Turanənin başına pis hadisə gəlib. Dərhal telefonu söndürüb, polisə, ardınca da qardaşım Şəhadətə zəng edərək bu barədə məlumat verdim. Həmin gün Bakıya yollanan qardaşım mənə xəbər verdi ki, bacımı öldürüblər”.

Şahid əlavə edib ki, Turanənin tez-tez ünsiyyətdə olduğu şəxslərdən yalnız Asimanı tanıyıb. Bacısı ona Eynur Əlizadə barədə heç vaxt danışmayıb.

Şahid Asiman Qənbərli bildirib ki, pandemiya olduğuna və Suraxanı rayonunda özünə məxsus kafe işləmədiyinə görə, idarə etdiyi “Daewoo Сentra” markalı avtomobillə Turanə Cəfərovanı Bakı şəhərinin müxtəlif yerlərində yerləşən hotellərə aparıb:

“Hər dəfə qadın bunun müqabilində mənə 20 manat pul verirdi. Axırıncı dəfə onu mayın 30-da günorta görmüşəm. Onun evinə gedərək, ondan 80 manat pul almışdım. Ayın 31-də Turanənin nömrəsinə zəng etsəm də, qadın cavab vermədi. Axşam kafedə olanda, polis əməkdaşları ora gələrək, məni bölməyə dəvət etdilər”.

Şahid Aytən Quliyeva ifadəsində göstərib ki, son vaxtlara kimi Nizami küçəsində yerləşən gecə klubunda menecer işləyib:

“Eynur Əlizadə ilə orda tanış olmuşuq. Onunla bir neçə dəfə müxtəlf hotellərdə cinsi əlaqədə olmuşuq. Mayın 31-i saat 10 radələrində Eynur zəng edərək taksi ilə 1 000 manat pul göndərdiyini söyləyərək, gedib şirkətdən kirayə avtomobil götürməyimi tapşırdı.
20 dəqiqədən sonra bir kişi zəng edərək, Eynurun göndərdiyi əmanəti mənə çatdırdı. Bundan sonra Xətai rayonunda yerləşən firmadan “Hyundai Elantra” markalı avtomobili götürüb, “Koroğlu” metrosunun yanına getdim. Yarım saatdan sonra Eynur ora gəldi və birlikdə Şamaxı rayonuna yollandıq. Qolunda və alnında xəsarət izləri görüb nə baş verdiyini soruşduqda, o, kiminləsə mübahisə etdiyini bildirdi. Şamaxıda Eynur zərgər dükanından mənim üçün bir ədəd qolbağ və boyunbağı aldı. İyunun ikisində Bakıya qayıdıb maşını təhvil verdik. Daha sonra polis əməkdaşları məni saxlayıb bölməyə apardılar. Bölmədə bildim ki, ölüm hadisəsi ilə əlaqədar polislər Eynuru axtarırlar”.

Məhkəmə iclasında Eynur Əlizadə ittiham üzrə özünü qismən təqsirli bilib. Zərərçəkmiş şəxsin hüquqi varisi təqsirləndirilən şəxsə ən ağır cəza verilməsini xahiş edib.

Məhkəmə hesab edib ki, Eynur Əlizadə Cinayət Məcəlləsinin 120.2.5-ci ( tamah məqsədi ilə qəsdən adam öldürmə) maddəsi ilə təqsirli bilinməli və ona həmin maddənin sanksiyası həddində cəza təyin edilməlidir.

Bakı Ağır Cinayətlər Məhkəməsinin hökmü ilə Eynur Əlizadə cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum olunub.

Metrodan istifadə edənlərə şad xəbər - Video
Bundan sonra metroda “Bakıkart”la yanaşı, QR biletlərdən də istifadə etmək mümkün olacaq.

Bakı metropoliteni QR ödəniş üsulunun tətbiqinə başlayıb.

QSC-nin mətbuat katibi Bəxtiyar Məmmədov deyib ki, ilin sonuna kimi tətbiq metro stansiyalarının 90%-də istifadədə olacaq. Sərnişin “Bakıkart” mobil tətbiqində QR bileti yaratmalı və turniketə yaxınlaşdırmalıdır. Bu üsulla da gediş haqqı 40 qəpikdir.

Bəxtiyar Məmmədovun sözlərinə görə, hazırda bu sistem 2 stansiyada fəaliyyət göstərir. Bunlar "Xocəsən" və "8 Noyabr"dır. Digər stansiyalarda isə bəzi turniketlərdə lazımi avadanlıqlar quraşdırılıb və texniki məsələlər tamamlanmaq üzrədir.

QR bilet yalnız bir gediş üçün etibarlı olacaq. Sərnişinlər qarşılaşdıqları çətinliklərlə bağlı *4343 və ya 141 çağrı mərkəzlərinə müraciət edə bilərlər.

Salyanda dəm qazından boğularaq ölən iki nəfər hərbçi imiş.

Belə ki, onlar rayon ərazisindəki hərbi hissələrin birində xidmət edibmiş.

Dünyasını dəyişənlər eyni evdə kirayədə yaşayıb.

Qonşunun sözlərinə görə, onlar yaşadıqları evə yeni köçübmüş.

Filippində baş verən 2 güclü zəlzələdən sonra Yaponiya sunami təhlükəsi ilə bağlı xəbərdarlıq edib.

APA-nın xəbərinə görə, bu barədə Yaponiya Meteorologiya İdarəsi məlumat yayıb.

Sunami təhlükəsi və sahilyanı evakuasiya ilə bağlı xəbərdarlıqlara Okinava prefekturasındakı Miyako adalarıŞikoku Sakit okean sahili və Yaponiyanın əsas adası Honsyu (Tokionun şərqindəki Çiba prefekturasına qədər) daxildir.

Departamentin məlumatına görə, dekabrın 3-də Honsyu adasının Sakit okean sahillərini vura biləcək dalğanın hündürlüyü bir metr olacaq.

Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın görüşü keçirildi. İndiki məqamda əsas aktual sual görüşün nəticəsinin necə olması və sülh prosesinə təsiridir.

Maraqlıdır, keçirilən görüş sülhün əldə edilməsinə təkan verəcək?

Mövzunu Globalinfo.az-a şərh edən Ümid Partiyasının sədri İqbal Ağazadə deyib ki, iki ölkənin şərti dövlət sərhədində baş tutan görüş delimitasiya və demarkasiya komissiyalarının görüşü kimi xarakterizə olunur:

İqbal Ağazadə

“Delimitasiya və demarkasiya məsələləri ölkələr arasında sürətlə həll edilən bir məsələ deyil. Misal üçün, Gürcüstan ilə Azərbaycan arasında bu məsələ hələ də tam həll edilməyib. Bu istiqamətdə işlər davam edir.

Buna görə də sərhəddə baş tutan sayca beşinci görüşdən böyük nə isə gözləmək sadəlövhlük olardı. Lakin proses başlaması müsbət məqamdır. Belə ki, bu, yeni bir platformadır və tərəflər faktiki olaraq ikili danışıqlar aparır. Həm də münasibətlərin yeni mərhələyə qədəm qoyması deməkdir. Çünki ikili danışıqlar problemlərin həll edilməsi və dialoqun qurulmasına səbəb olacaq. Lakin sülh müqaviləsindən danışmaq üçün hələ çox tezdir.

Sülh müqaviləsi imzalanmadan kommunikasiyalar açıla, münasibətlər qurula bilər. Hətta tərəflər bir-biri ilə fərqli sahələrdə ilkin münasibətlər qura bilər. Misal üçün, hava şəraiti ilə bağlı hazırda Ermənistandan Gürcüstana gedən quru yolu işləmir. Azərbaycan alternativ yol təklif edə bilər. Ermənistan da yaxşı olardı buna cavab kimi Zəngəzurdan Naxçıvana nəqliyyat vasitələrinin keçidinə icazə versin.

Yəni tərəflər sülh müqaviləsindən öncə bu prosesə hazırlaşmalı, qarşılıqlı etimad mühiti yaratmalıdır. Təcrübə göstərir ki, sülh müqaviləsi imzalansa belə ölkələr arasında müharibələr baş verir”.

Milli Məclisin deputatı Hikmət Babaoğlu isə deyib ki, heç bir vasitəçi olmadan Ermənistan ilə Azərbaycan arasında sərhədlərin delimitasiya komissiyasının birbaşa görüşünün keçirilməsi özlüyündə müsbət addımdır:

Hikmət Babaoğlu

“Bütün hallarda vasitəçilik ilə keçirilən görüşlərin qarşılıqlı etimad və etibarlılıq dərəcəsi az olur. Ermənistan bu gün həqiqətən də sülh istəyirsə, birbaşa görüşləri ənənə halına çevirməlidir.

Azərbaycan bu təşəbbüsü özü irəli sürüb və dəstəkləyir. Ermənistanın da buna dəstək verməsi vacibdir. Təkcə delimitasiya komissiyalarının deyil, həm də həmin rəsmilərin görüşünün keçirilməsi lazımdır. Yalnız bu halda sülh və yekun nəticə əldə edilə bilər”.

Politoloq Elçin Mirzəbəyli isə deyib ki, delimitasiya prosesi ilə sülh prosesini əlaqələndirmək bir qədər doğru deyil:

Elçin Mirzəbəyli

“Çünki delimitasiya prosesi uzunmüddətli bir prosesdir. Yəni sülh müqaviləsi imzalanandan sonrakı dövrdə belə delimitasiya prosesi aylarla, illərlə davam etməsi mümkündür.

SSRİ süqut edəndən sonra keçmiş sərhədlər istisna olmaqla respublikaların sərhədlərində problemlər tam öz həllini tapmayıb. Bu gün İranla Azərbaycan arasında sərhəd problemi olmasa da Rusiya ilə delimitasiya prosesinin uzun zaman ərzində həll edildiyinin şahidi olduq. Gürcüstanla münasibətlərimizin yüksək səviyyədə olmasına baxmayaraq hələ də sərhədlərin delimitasiya prosesi tam şəkildə başa çatdırılmayıb. Yəni bu misal belə özlüyündə prosesin nə qədər uzun müddət çəkdiyini izah edir.

Azərbaycan sərhədləri uzun illər Ermənistanın işğalında olub. Məhz bu fakt özlüyündə iki ölkə arasında delimitasya və demarkasiya prosesinin uzun müddət çəkəcəyini deməyə əsas verir. Digər tərəfdən, biz görüş öncəsi parlamentin spikeri Alen Simonyanın verdiyi açıqlamaları da nəzərə almalıyıq. Çünki o, faktiki olaraq hansısa mifə, əfsanəyə söykənərək Azərbaycanın nəzarətində olduğunu iddia etdi. Göründüyü kimi, Ermənistan tərəfi bu prosesin konstruktiv keçməsinə mane olur.

Sülh prosesinə gəldikdə isə rəsmi İrəvanın sərgilədiyi son mövqe Mirzoyan və Simonyanın açıqlamalarından bəllidir. Xüsusilə Mirzoyan son olaraq Azərbaycanı təcavüzdə, etnik təmizləmədə ittiham etdi. Bu, normallaşma prosesinin qısa zamanda baş tutmayacağını deməyə əsas verir. Ermənistan bundan başqa müstəqil xarici siyasət yeritmir və Qərbdən gələn tezisləri icra edir”.

Yasamal rayonu ərazisində piyada səkilərinin zəbt edilməsi davam edir. Müvafiq qaydalarda əsasən malların bilavasitə səkilərə, torpağın, yaşıllıqların, ağacların, yeşiklərin və s. üzərinə qoyularaq satışı qadağan olsa da, Yasamal rayonu ərazisində bu qayda gözlənilmir və ya müvafiq qurumlar bu qanunpozuntusuna şərait yaradır.
Tribunainfo.az xəbər verir ki, məhz rayon icra hakimiyyətlərinin verdiyi icazəyə əsasən mağazalar səkiləri asanlıqla zəbt edib, gediş-gəlişi çətinləşdirirlər.
Yasamal rayon sakinləri bildirib ki, Həsən bəy Zərdabi küçəsində (“20 Yanvar” metrostansiyasının yaxınlığı) malların səkiyə qoyularaq satılması və piyadaların hərəkətinə çətinlik yaradılması barədə dəfələrlə aidiyyəti qurumlara bildiriblər.
Bir müddət bununla bağlı tədbir görülür, ancaq sonra vəziyyət yenə əvvəlki kimi olur.