“Əfqan əsgərləri Əfqanıstan ordusuna qarşı hava hücumuna cavab olaraq Pakistanın bir neçə bölgəsinə hücum edib”.

“Qafqazinfo” xəbər verir ki, bu barədə Əfqanıstan Müdafiə Nazirliyi özünün “X” səhifəsində məlumat yayıb.

Qeyd olunur ki, əfqan hərbçiləri “düşmən qüvvələrin və onların havadarlarının mərkəz və sığınacaqlarına” hücum ediblər. Zərbələrin Pakistanla sərhəddən kənarda da həyata keçirildiyi vurğulanır.

“Tasnim” agentliyi Əfqanıstanın Xost və Paktiya əyalətlərinin sərhəd bölgələrində dekabrın 27-dən bəri Taliban tərəfdarları ilə Pakistan hərbçiləri arasında döyüşlərin getdiyini bildirib.

“Financial Times” qəzeti, Rusiya tərəfindən Orta Mənzilli Ballistik Raketin (“Oreşnik”) istehsalında istifadə olunan Qərb şirkətlərinin avadanlıqlarını araşdırıb.

Məqaləyə görə, Putin tərəfindən hazırlanmış “Oreşnik” raketinin ötən ay Ukraynaya qarşı buraxılması, Rusiya şirkətlərinin müasir Qərb istehsalı olan avadanlıqlardan istifadə etməklə istehsal etdiyi raketdir.

Xüsusilə, bu araşdırma göstərir ki, Rusiya silah inkişafı üzrə iki iri mühəndislik institutu – Ukrayna kəşfiyyatı tərəfindən “Oreşnik” raketinin hazırlayıcıları kimi tanınan qurumlar alman və yapon şirkətlərinin metal işləmə avadanlıqları ilə tanış olan işçilər axtarır.

Bunlar arasında Moskva istilik mühəndisliyi institutu (MIT) və “Sozvezdie” şirkətinin iş elanlarında xüsusilə Fanuc, Siemens, Heidenhain şirkətləri ilə işləmək təcrübəsi tələb edilib. Bu şirkətlərin hər biri yüksək dəqiqlikli CNC maşınlarının idarəedilməsi sistemlərini istehsal edir.

Məqalədə qeyd edilir ki, Rusiya hər zaman xarici istehsal avadanlıqlarına etibar edib, əksər hallarda Çin istehsalı yüksək dəqiqlikli metal işləmə maşınlarını əldə edərək onların idarəetmə sistemləri Qərbdən gəlməyə davam edir.

2024-cü ildə böyük bir Rusiya sərgisində 8 Çin şirkəti 12 müxtəlif CNC cihazını təqdim edib. Həmçinin qeyd edilir ki, həmin avadanlıqların 11 modelində yapon və alman istehsalı olan idarəetmə sistemləri var.

Hətta, “Stan” şirkətinin, Rusiya CNC sənayesini inkişaf etdirmək üçün öz yerli alternativlərini yaratmağa çalışsa da, bu şirkətin də Heidenhain şirkətinin avadanlıqlarından istifadə etdiyi qeyd edilib.

Qərb ölkələri Rusiya hərbi istehsalına dəstək verən yüksək dəqiqlikli CNC avadanlıqlarının tədarükünü qarşısını almağa çalışır. Məqalədə əlavə edilir ki, bu cür avadanlıqların düzgün izlənməsi və sanksiyaların yerinə yetirilməsini təmin etmək üçün ABŞ və müttəfiqləri xüsusilə nəzarət tədbirlərini gücləndirməyə çalışır.

Heidenhain, Siemens və Fanuc şirkətləri, komponentlərinin Rusiyaya qanunsuz olaraq tədarük edilməsini qarşısını almaq üçün, daha ciddi monitorinq və qaydalara uyğunluq tədbirləri tətbiq etdiklərini bəyan ediblər. Ancaq Rusiya hələ də Qərb ölkələrinin tətbiq etdiyi iqtisadi sanksiyalara baxmayaraq, bu cür komponentlərin tədarükünü əldə etməyə davam edir. \\Viral.az

Colan təpələri, yaxud digər adı ilə Qövlan təpələri, Orta Şərqin ən gərgin münaqişə zonalarından biridir. Suriyada hakimiyyət dəyişikliyindən sonra İsrail ordusunun hərbi fəaliyyətini artırdığı bu ərazilər, Suriyadakı üsyançıların lideri Əbu Məhəmməd əl-Colani tərəfindən təxəllüs olaraq seçilib. Bəs, tez-tez gündəmə gələn və Orta Şərqdə münasibətləri kəskinləşdirən Colan təpələrinin tarixi və önəmi nədir?

Birinci Dünya Müharibəsi nəticəsində Osmanlı İmperiyasının parçalanması Orta Şərqdə yeni dövlətlərin yaranmasına yol açdı. Suriya və İsrail də bu dövlətlərdən idi. 1948-ci ildə İsrail müstəqillik qazandıqdan sonra, hər iki ölkə arasında müharibə vəziyyəti yaranıb. Zaman-zaman sülh prosesləri başlasa da, 1948-ci ildəki İsrail İstiqlal müharibəsi, 1967-ci ildəki Altı Günlük müharibə və 1973-cü ildəki Yom Kippur müharibələrində tərəflər bir-birilərinə qarşı döyüşüb. Bundan əlavə, Livanda vətəndaş müharibəsi zamanı tərəflərin maraqları toqquşduğundan yeni qarşıdurmalar ortaya çıxdı. Tarixən Suriya torpaqları olan Colan təpələri 1967-ci ildə Altı Günlük müharibə zamanı strateji əhəmiyyətinə görə İsrail tərəfindən işğal olundu. Ərazi yüksək coğrafi mövqeyinə görə həm müdafiə, həm də hücum baxımından olduqca əlverişlidir. Bu səbəbdən, münaqişə sonrası BMT Təhlükəsizlik Şurası 242 saylı qətnamə qəbul edərək İsraildən ərazini tərk etməyi tələb etdi, lakin bu çağırış yerinə yetirilmədi. İsrail, ərazidəki yerli əhalini köçə məcbur etdi.

1973-cü ildə Ərəb ölkələri, xüsusən Suriya və Misir itirdikləri əraziləri geri almaq məqsədilə İsrailə müharibə elan etdilər. Suriya müharibə zamanı Colan təpələrinin bir hissəsini geri alsa da, müharibənin sonunda İsrail ərazini yenidən nəzarətinə götürdü. Müharibə bitdikdən sonra BMT münaqişənin həlli üçün müşahidə missiyası yaratdı, amma yalnız Colan təpələrinin kiçik bir hissəsi Suriyaya qaytarıldı. Colan təpələri yalnız hərbi əhəmiyyətə malik deyil, həm də zəngin su ehtiyatlarına sahibdir və İsrailin əsas su mənbələrindən biri hesab olunur. 1981-ci ildə İsrail parlamenti Colan təpələrini İsrailin suveren ərazisi elan edən qərar qəbul etdi. Beynəlxalq ictimaiyyət, o cümlədən BMT Təhlükəsizlik Şurası, bu ilhaq qərarını qeyri-legitim hesab etsə də, İsrail təzyiqlərə məhəl qoymadı. Zaman-zaman Suriya və İsrail arasında Colan təpələrinin qaytarılması ilə bağlı danışıqlar aparılsa da, heç bir nəticə vermədi. 2019-cu ildə ABŞ Prezidenti Donald Tramp, Colan təpələrini İsrailin ərazisi kimi tanıyan ilk dövlət başçısı oldu. Trampın yaxın zamanda ikinci dəfə prezident seçilməsi və Suriyadakı hakimiyyət dəyişikliyindən sonra İsrailin həmin ərazidə hərbi fəaliyyətini artırması bəzi ekspertlər tərəfindən Colan təpələri münaqişəsinin yenidən qızışacağı proqnozunu irəli sürür. Digər tərəfdən, bəzi analitiklər isə bu münaqişənin həllə qovuşacığını bildirir.

Orta Şərqdə illərdir onminlərlə insanın ölümünə səbəb olan bu münaqişədən kimin qazanclı çıxacağını demək çətin olsa da, insanlığın çox şey itirəcəyi dəqiqdir.

Berlin Kiyevə təhvil verilən silahların siyahısını yeniləyib.
Bu barədə Almaniya hökumətinin saytında məlumat verilib.

Qeyd olunub ki, Almaniya Danimarka ilə birgə layihə çərçivəsində 15 Leopard 1A5 tankı və ehtiyat hissələrini Ukraynaya tədarük edib.

Yeni paketə həmçinin 30 ədəd “Mine Resistant Ambush Protected” (MRAP) zirehli personal daşıyıcısı, “Leopard 2” tankları üçün döyüş sursatı və sənaye ehtiyatları, həmçinin “Leopard 1” tankları üçün sursatlar daxildir.

Bundan əlavə, pakedə “Gepard” özüyeriyən silahlar üçün 65 min sursat və 2 TRML-4D radar stansiyası yer alıb.

İsrail və HƏMAS atəşkəs haqqında razılığa gəlməyə çalışırlar, lakin İsrail qoşunlarının Qəzza zolağı ilə Misir sərhədində yerləşən Filadelfiya dəhlizindən çıxarılması və girovların azad edilməsi planının təfərrüatları barədə razılığa gələ bilmirlər.
Bizimyol.info xəbər verir ki, bu barədə Əmirliyin “The National” qəzeti mənbələrə istinadən məlumat yayıb.

Nəşrin məlumatına görə, İsrail İsrail həbsxanalarında uzun müddət cəza çəkən 200 fələstinlidən 70-ni azad etməyə hazır deyil. Ümumilikdə hərəkat 1 min fələstinlinin azad edilməsinə nail olmaq niyyətindədir. İsrail, HƏMAS-ın 60 günlük potensial atəşkəs zamanı Qəzza zolağında hərəkatın yaraqlıları tərəfindən saxlanılan qadın əsgərlər və amerikalılar da daxil olmaqla 100-ə yaxın girovu azad edəcəyini gözləyir.

Həmas yəhudi dövləti ilə “hərtərəfli razılaşma” əldə etmək istəyir. Belə bir razılaşma İsrail qoşunlarının Qəzzadan çıxarılmasını və atəşkəs rejiminin tətbiqini əhatə etməlidir. Nəşr iddia edir ki, İsrail Misir və Qəzza zolağının sərhədində yerləşən Filadelfiya dəhlizindən qoşunlarını mərhələli şəkildə çıxarmaqdan imtina edir.

Keçən həftə İsrailin "Ynet" portalı yüksək rütbəli məmura istinadən yazıb ki, mümkün sövdələşmənin təfərrüatlarının çoxu artıq razılaşdırılıb, lakin əsas mübahisə onun ilk mərhələsində azad edilməli olan girovların sayı olub. Rəsmi əlavə edib ki, danışıqlar hazırda “girovların sayı və şəxsiyyəti üzərində cəmlənib”.

Son bir ildə Həmas məhbuslarının azad edilməsi üçün aparılan danışıqların bir neçə raundu dalana dirənib. Tərəflər 2023-cü ilin noyabr ayının sonlarında əldə edilmiş razılaşmanın uzadılmasına nail ola bilməyiblər, buna əsasən bir həftəlik atəşkəsdən sonra 105 girov azad edilib. İsrail ötən il oktyabrın 7-də oğurlanan 251 girovdan 96-nın hələ də Qəzzada olduğuna inanır. Son 14 ay ərzində İsrail hərbçiləri 8 girovu xilas edib, 38 nəfərin cəsədini çıxarıb.

Hazırda dünyada əsasən üç qarşıdurma, üç gərginlik nöqtəsi var: Rusiya-Ukrayna, HƏMAS-İsrail və Suriya.

2022-ci ilin fevral ayında başlayan Rusiya-Ukrayna müharibəsi hələ də davam edir. Hər iki tərəf öz maraqları kontekstində prosesin başa çatmasını istəyir. ABŞ-da keçirilən prezident seçkilərinin nəticəsində Donald Trampın qələbə qazanması ilə Ukrayna müharibəsinin başa çatacağına ümidlər artdı. Belə ki, o, təbliğat ərəfəsində prezident seçilərsə, müharibəni bir günün içərisində dayandıracağını bildirmişdi.

Digər tərəfdən HƏMAS-İsrail qarşıdurmasında da sakitlik müşahidə edilir.

Son proses isə Suriyadakı məlum vəziyyətlə əlaqədardır. 53 illik Bəşər Əsəd rejiminin devrilməsi, yeni hökumətin qurulması üçün görülən işlər və s.

2025-ci ildə sözügedən gərginlik nöqtələrinin hansının daha erkən bitəcəyi maraq doğurur.

Bu münaqişələr səngiyəcək? Yoxsa yeni ildə daha da şiddətlənə bilər?

Globalinfo.az-a danışan politoloq İlyas Hüseynov deyib ki, 2025-ci ilə sayılı günlər qalıb və artıq yeni il üçün müxtəlif proqnozlar verilməyə başlayıb:

“Dünyada gedən üç gərginlik, müharibə və qarşıdurma nəticəsində bizi nələrin gözləyəcəyi barədə müxtəlif fikirlər səsləndirilir. 2025-ci il daha çox gərginliklərlə yadda qala bilər. Sözügedən müharibələr dünya iqtisadiyyatına neqativ təsir göstərir. Yaxın Şərqdəki gərginliklər, Rusiya-Ukrayna müharibəsi bütünlükdə iqtisadi problemlərin yaranmasına səbəb olur. ABŞ-ın yeni seçilmiş Prezidenti Donald Trampın andiçmədən sonra müharibələri dayandıracağına böyük ümid var. Lakin bu arzu, istək olaraq qalacaq. Çünki müharibənin bitməsi rəsmi Vaşinqtonun maraqları çərçivəsində nəzərdən keçirilir. Ukrayna müharibəsində Rusiya öz ambisiyalarından geri çəkilmir.

Ukrayna da öz ərazi bütövlüyünü təmin etmək niyyətindədir. Bu da vəziyyəti çıxılmaza doğru aparır. Hər iki tərəf təkidlə öz maraqlarını təmin etməyi istəyəcəksə, bu müharibəni daha şiddətli mərhələyə aparacaq. Hətta NATO ilə Rusiyanın hər hansı formada toqquşmasının yaranacağı ehtimalı da var. Digər məsələlərə gəlincə, yeni ildə ümumilikdə bütün istiqamətlərdə hərəkətlilik müşahidə edilə bilər”.