“1 İyun – Uşaqların Beynəlxalq Müdafiəsi Günü hamı övladlarını gəzməyə apardı. Mən də serial çəkilişindən çıxdım və üz tutdum Sumqayıt bulvarına. Sumqayıtdakı attraksionlar Bakı ilə müqayisədə ucuz olur. Bir manatdan baha olmur, bəzən əlli qəpik də olur. Amma dünən bilmədim ki, uşaqların, yoxsa cibinizin müdafiəsi günü idi”.

TEREF Yenicag.az-a istinadən xəbər verir ki, bu sözləri aparıcı Mətanət Əliverdiyeva “Xəzər axşamı” verilişində deyib.

O, Uşaqların Beynəlxalq Müdafiəsi Günündə attraksionların 1 manatdan 3-5 manata qaldırılmasından şikayət edib:

“Ayıb olsun, kiminsə adından istifadə etməyin! Hamısına da şamil etmirəm. Elə işbazlar var idi ki, uşaqların sıxlığını yox, ciblərinin sıxlığını tənzimləmək istəyirdi. Bir evdən 4-5 uşaq gəlir, qiyməti 1 manatdan 3-5 manata qaldırmaq nə deməkdir?! Ayıb olsun! Soruşuram ki, sizə kim ixtiyar verib qiyməti qaldırasınız?! Cavab verirlər ki, yuxarıdan. Kiminsə adından istifadə etməyin. İnanmıram ki, Sumqayıt şəhər İcra Hakimiyyəti sizə belə göstəriş versin. Əgər belə şey olsaydı, hamısının qiyməti qalxardı. Uşaqlardan istifadə etməyin! Bakıda ən yaxşı attraksionlar pulsuz olub. Ayıb olsun sizə! Heç gözləməzdim!”

“Yeni Çağ” bildirir ki, attraksionların uşaqlar günündə qiymətlərinin qaldırılması sosial şəbəkədə etirazla qarşılanıb. Bir çox vətəndaşlar qiymətlərin qaldırılmasında şəhər icra başçısı Zakir Fərəcovu günahlandırıblar.

Qeyd olunur ki, Uşaqların Beynəlxalq Müdafiəsi Günündə attraksionların qiymətlərinin qaldırılmasında günahkarlardan birincisi məhz Sumqayıt Bulvar İdarəsinin direktoru Seymur Məmmədovdur. Sosial şəbəkədə yazılan şərhlərdə iddia edilir ki, attraksionların qiymətlərinin qaldırılması məhz Seymur Məmmədovun nəzarətsizliyindən, yaxud da sahibkarlarla gizlin “razılığı”ndan sonra baş verib. İddialara görə, uşaqlar günündə qiymətləri endirmək, pulsuz etmək əvəzinə bəzi dəllallar baş direktorun onlara göz yummasından istifadə edərək daha çox qazanc əldə etmək qərarına gəliblər.

Sumqayıt Bulvarında baş verən bu xoşagəlməz hadisə isə şəhər icra başçısı Zakir Fərəcovu yenidən hədəfə gətirib. Dələduzluq maddəsi ilə təqsirləndiriliən və haqqında 5 il şərti cəza verilən Seymur Məmmədovun səriştəsizliyi, səhvləri ucbatından Sumqayıt icra başçısı Zakir Fərəcov hədəfə çevrilib.

Sumqayıt şəhər İcra Hakimiyyətinin mətbuat katibi Eyvaz Qocayev mətbuata açıqlamasında bildirib ki, Sumqayıt bulvarında fəaliyyət göstərən attraksionlar və əyləncə mərkəzləri fərdi sahibkarlar tərəfindən idarə olunur:

“Bu səbəbdən qiymət siyasəti Sumqayıt Şəhər İcra Hakimiyyəti tərəfindən müəyyən edilmir və tənzimlənmir. Bu cür halların İcra Hakimiyyətinin göstərişi ilə həyata keçirilməsi haqda bildirilənlər reallığı əks etdirmir”.