Almaniya hökuməti məmurların futbol üzrə Avropa çempionatının oyunlarına qatılmaq üçün 500 min avrodan çox pul xərcləyib.

Alman məmurların Avropa çempionatının oyunlarına girişi ilə bağlı xərclər 531 min avro təşkil edib.

Qaynarinfo xəbər verir ki, bu barədə “Bild” yazıb.

Bildirilir ki, dövlət qulluqçuları üçün biletlər pulsuz olub. Buna rəğmən onlar əsasən stadiona gedən yollarda 531 min avro xərcləyib.

Belə böyük məbləğin olmasının səbəbi kansler Olaf Şolts, səhiyyə naziri Karl Lauterbax, daxili işlər naziri Nensi Feser və başqalarının Müdafiə Nazirliyinin verdiyi eksklüziv transferdən istifadə etməsi olub.

Xüsusilə, Almaniya və İspaniya millilərinin qarşılaşdığı 1/4 finalda Şolts, Lauterbax və Feser iştirak edib. Bu matça görə, xarici işlər naziri Annalena Berbok gecə uçuşlarına qadağa qoyulmasına baxmayaraq, hətta Frankfurt hava limanından Lüksemburqa gecə uçub. Nazirlər Kabineti üzvləri Münhen, Frankfurt və Dortmundda milli komandaların oyunlarına da qatılıb.

Almaniya yığmasının iştirakı ilə keçirilən hər oyuna görə hökumət UEFA-dan 30, Almaniyanın iştirakı olmadan keçirilən oyunlar üçün isə 10 bilet alıb.

“Altı işgüzar səfər üçün yarım milyon avrodan çox xərc çəkən hər kəs tamamilə məsuliyyətsizdir. Hərbi hava qüvvələri federal hökumətin axşam əyləncə proqramı üçün səyahət variantı olmamalıdır”, deyə Bundestaqdakı Sol fraksiyasının lideri Soeren Poelmann bildirib.

Bundan əlavə, solçular kansler Olaf Şoltsun həyat yoldaşı Britta Ernstin matçlarda olmasını tənqid ediblər. UEFA-nın qaydalarına görə, fəxri biletlər yüksək vəzifəli dövlət məmurlarına – hökumət başçısına, nazirlərə və parlament nümayəndələrinə verilməlidir. 2023-cü ilə qədər Brandenburqun təhsil naziri vəzifəsində çalışmış Ernst bu kateqoriyaların heç birinə aid deyil.

Paris Olimpiya Oyunlarında iştirak edəcək bir sıra idmançılar Olimpiya kəndindəki yaşayış şəraitindən narazılıqlarını bildiriblər.

TNS xəbər verir ki, bu barədə “Le Figaro” qəzeti məlumat yayıb.

Qeyd olunub ki, idmançılar sosial şəbəkələrdə karton çarpayılardan, yeməklərdən, televizorun olmamasından şikayətlənirlər.

“Bu, zarafat deyil, gördüyünüz kimi, olimpiya çarpayısı kartondandır”, - fransalı cüdoçu Jülyen Bryular deyib. Nəşrin yazdığına görə, onun sözlərini avstraliyalı su poloçusu Matilda Körns də təsdiqləyib.

Vurğulanıb ki, karton çarpayılar idmançılar üçün sürpriz olmayıb, çünki 2021-ci ildə Tokioda keçirilən Olimpiya Oyunlarında onlardan artıq istifadə olunub. Amma o zaman da bu addım tənqid olunmuşdu. Builki olimpiada üçün isə təşkilatçılar Yaponiyanın “Airweave” şirkətindən 16 min belə çarpayı sifariş ediblər.

Məlumata görə, idmançılar yeməklərdən, qonaq otaqlarında televizorun olmamasından və digər məqamlardan da narazıdırlar. Təsdiq olaraq nəşr amerikalı gimnast Aleya Finneqan, onun belçikalı həmkarı Mellis Brassart və yeni zelandiyalı üzgüçü Lyuis Klerbertin yazdıqlarını göstərir.

Xatırladaq ki, Paris Olimpiadası iyulun 26-dan avqustun 11-dək keçiriləcək.

Son araşdırmaya əsasən, dünyada 4 milyarda yaxın insan sosial mediadan istifadə edir. Sosial şəbəkələr yeni internet erası yaradıb. Onlar həm də futbol dünyasını dəyişib.

Kriştiano Ronaldonun “Yuventus”a keçidi
2018-ci ildə Ronaldo “Real Madrid”lə müqaviləsinin bitməsinə 1 il qalmış komandadan ayrılmaq qərarı alır. O, “kral klubu” ilə hər şeyə nail olub, yeni idman üfüqləri axtarır və bunu “Yuventus”da görür. Onun futbol kolleksiyasında İtaliyanın A seriyası titulu hələ yoxdur. Ronaldo 33 yaşındadır, amma 17 yaşındakı kimi iddialıdır. O, italyanların qəlbini fəth etmək istəyir.

CR7 qlobal brenddir. Bütün sosial media platformalarında Ronaldonun izləyicilərini toplasaq, onu təxminən 400 milyon insan izləyir.
2018-ci ilin yayında Kriştianonun transfer elanından əvvəl “Yuventus”un izləyicilərinin sayı CR7-nin izləyici sayının yeddidə biri qədər idi.
Kriştiano Ronaldonun transferi rəqəmlərlə
Ronaldonun transferindən sonra ilk dörd həftə ərzində “Yuventus” “Tvitter”də 350 min, “Yutubda” 500 min, “Feysbuk”da 1.7 milyon, “İnstaqram”da 3.5 milyon yeni izləyici qazandı. Növbəti 1 ay ərzində klub bütün şəbəkələrdə milyonlarla yeni izləyici qazandı.

Təkcə “Feysbuk”da “Yuventus”un paylaşımları 437 milyon istifadəçiyə çatırdı. “Tvitter”də 280 milyon retvit var idi. “İnstaqram”da isə 65 milyon bəyənmə və 630 min şərh yazılmışdı.

Transfer elan edildikdən sonra 24 saat ərzində 520 min Ronaldo forması satıldı. Onların böyük hissəsi Asiyada satılıb. Cəmi 15 ay sonra isə transfer öz xərcini tam ödədi. İnanılmaz nəticədir.

Kriştiano Ronaldo sosial media fenomeni kimi
Rəqəmsal platformalarda insanların artıq sadəcə klubları izləməməsi yeni fenomendir. İzləyicilər fərdləri izləməyi üstün tuturlar. Kriştino Ronaldo uzun müddətdir ki, özü brenddir. O, gördüyü işdə son dərəcə orijinal və iddialıdır. Portuqaliyalı ulduz sosial medianı ən yaxşı şəkildə başa düşən futbolçulardan biridir.

Mario Leo bundan bəhs edərkən yazır:

“Frenk Riberinin Dubaydakı qızıl biftek ilə etdiyi saxtakarlıqdan sonra başına gələnlər heç vaxt Ronaldonun başına gəlmir. Əlbəttə, bu onunla bağlıdır ki, Kriştianonun kontent hazırlığında ona kömək edən üç işçisi var”.

CR7 2009-cu ildən sosial şəbəkələrdə aktivdir. İndiyədək o, “İnstaqram”da minlərlə şəkil və video yerləşdirib. “Yuventus”a keçidini elan etdiyi şəkil 12 milyon bəyənmə alıb.

Ronaldonun əziyyətinə baxmayaraq, “qoca senyora” 2018-2019-cu illər mövsümündə Çempionlar Liqasında qalib ola bilmədi. Şübhəsiz ki, ulduz futbolçu qısamüddətli deyil, uzunmüddətli perspektiv üçün nəzərdə tutulmuşdu.

Geriyə baxanda Neymar və Ronaldonun 2017 və 2018-ci illərdə klub dəyişikliklərini peşəkar futbolda ilk böyük sosial media transferləri hesab etmək olar.

Kriştiano Ronaldo sosial medianın zirvəsində
Portuqaliyalı ulduz ötən ili də sosial medianın zirvəsində başa vurdu. Futbol karyerasına Səudiyyə Ərəbistanı təmsilçisi “Əl Nəssr”də davam edən Kriştiano 900 milyona yaxın izləyici kütləsi ilə sosial medianın ən populyar adları arasında ilk pillədədir.

Portuqaliyalı ulduzun “İnstaqram”da 635 milyon, “Feysbuk”da 170 milyon, “X” platformasında isə 113 milyon izləyicisi var. Keçən ilin yekunu ilə müqayisədə bu göstərici müvafiq olaraq platformalar üzrə 20 milyon, 2 milyon və 3 milyon daha çoxdur.

Ötən ilin yekununda Ronaldo izləyici sayına görə bir çox məşhuru geridə qoyub. “Feysbuk”da kolumbiyalı müğənni Şakira, “İnstaqram”da ABŞ-li aktyor Dveyn Conson, “X”də isə ABŞ-li müğənni Teylof Svift portuqaliyalı futbolçudan aşağı sıralarda yer alıblar.

Sosial mediadakı ümumi izləyici sayı 500 milyonu keçən ilk şəxs olan Ronaldonu yaşıl meydanlardakı əzəli rəqibi Lionel Messi izləyir.

Kriştiano Ronaldo və Lionel Messinin sosial media rəqabəti
2022-ci il FİFA Dünya Çempionatında 36 il sonra Argentinanı zəfərə daşıyan və transfer edildiyi ABŞ-nin “İnter Mayami” komandasına ilk kubokunu qazandıran Messi də son dövrlərdə azarkeş sayında sürətli yüksəliş yaşadı.

Futbolun ABŞ-də populyarlaşması prosesinə böyük töhfə verən ulduz futbolçunu “İnstaqram”da 504, “Feysbuk”da isə 117 milyon insan izləyir. Argentinalı ulduzun “X” hesabı yoxdur.

Kriştiano Ronaldo nə qədər qazanır?
Ötən ilin yekun statistikasına əsasən, “İnstaqram”dan ən yüksək gəlir əldə edən məşhur Kriştiano Ronaldodur. O, Kayli Cenneri geridə qoyaraq bu ünvana sahib olub. Portuqaliyalı ulduz ötən il hər sponsorlu paylaşım üçün 1.87 milyon sterlinq qazanıb. Kaylidə isə bu göstərici 1.47 milyon sterlinqə bərabər olub.

Siyahıda üçüncü yeri digər ulduz futbolçu Lionel Messi tutub. Dördüncü Selena Qomez, beşinci Dveyn Consondur.

Sosial media fenomenləri izləyiciləri ilə qurduqları güclü bağ sayəsində markalarla əməkdaşlıq edərək əhəmiyyətli gəlir qaynaqları əldə edirlər.

Rəqəmsal marketinqin gücü
“RESULT Sports”un icraçı direktoru Mario Leonun müştəriləri arasında UEFA da daxil olmaqla, 60-dan çox futbol klubu, liqa və assosiasiya var. Mario yazır:

“Stadion bukletində, ana səhifədə, lövhələrdə və ya ekranlarda özünüzü reklam etmək mümkün deyil. Bu, köhnə məktəbdir. Gələcək onlayndır. Rəqəmsal sponsorluq tezliklə ənənəvi marketinq üsullarından daha çox gəlir əldə edəcək. Rəqəmsal marketinq getdikcə daha innovativ olur və davamlı ölçülə bilmək sayəsində bütün idman klubları üçün daha vacib, daha davamlı sponsorluq sahəsinə çevrilir. Hədəf kütləsinə uyğunlaşdırılmış mesajlar onlayn olaraq daha effektiv şəkildə yerləşə bilər. İndi insanların istehlakçı davranışını ölçmək xeyli asanlaşıb”.

Bu gün Mayamidə argentinalı hücumçu Lionel Messinin 45-ci titulunu qazanması münasibəti ilə mərasim təşkil edilib.

Fanat.az xəbər verir ki, milli komanda ilə Amerika Kubokunun qalibi olan superulduz publika önünə sağ ayağındakı xüsusi fiksatorla çıxıb.

Xatırladaq ki, Messi Kolumbiyanı 1:0 hesabı ilə yendikləri final qarşılaşmasında sağ topuğundan xəsarət alıb. O, əvəzlənəndən sonra ehtiyat oyunçular skamyasında ağlayıb.

“Arsenal”ın hücumçusu Eddi Nketia İngiltərə klubunu tərk edə bilər.

Fanat.az xəbər verir ki, məlumatı şəxsi “X” hesabı üzərindən tanınmış insayder Fabritsio Romano yayıb.

Xəbərə görə, onun xidmətində maraqlı olan “Olimpik Marsel” “topçular”a təklif göndərib və tərəflər hazırda danışıq aparırlar.

Nketia 8 yaşından – 2015-ci ildən “Arsenal”ın strukturundadır. Son mövsümdə London təmsilçisinin forması ilə bütün turnirlərdə 37 matça çıxan forvard 6 qol və 3 məhsuldar ötürmə ilə yadda qalıb. Onun klubu ilə müqaviləsinin müddəti 2027-ci ilin yayına qədər nəzərdə tutulub. “Transfermarkt” portalı Eddinin transfer qiymətini 30 milyon avro ilə dəyərləndirir.

"Milan" 16 yaşlı hücumçu Françesko Kamarda ilə ilk peşəkar müqavilə imzalayıb.

Oxu.Az xəbər verir ki, bu barədə "rossoneri"nin rəsmi saytı məlumat yayıb.

Müqavilə 2027-ci ilin iyun ayının sonuna qədər qüvvədə olacaq.

Yeniyetmələr səviyyəsində Kamarda 89 matçda 485 qol vurub. Forvard bu yay "Milan" U19-a keçib.

Əsas komandada gənc oğlan ötən mövsüm iki matçda forma geyinərək, A Seriyasında meydana çıxan ən gənc oyunçu olub (15 yaş 260 gün). Hücumçu hələ böyüklərin komandasında fərqlənə bilməyib. Transfermarkt internet portalı onun bazar dəyərini 10 milyon avro olaraq qiymətləndirir.

Almaniyanın "Ayntraxt" klubu Danimarka millisinin sağ cinah müdafiəçisi Rasmus Kristenseni heyətinə cəlb edib.

Oxu.Az klubun mətbuat xidmətinə istinadən xəbər verir ki, 27 yaşlı futbolçu 1 il müddətinə İngiltərənin "Lids" klubundan icarəyə götürülüb.

O, 2023-2024 mövsümünü icarə əsasında İtaliya təmsilçisi "Roma"da keçirib.

Qeyd edək ki, R.Krisensen Danimarka millisinin heyətində Almaniyada keçirilən Avropa çempionatında çıxış edib.

Avropanın yaşıl meydanlarında növbəti mövsümə hazırlıqlar davam edir.

Oxu.Az xəbər verir ki, Türkiyənin iki aparıcı klubu - son çempion "Qalatasaray" və vitse-çempion "Fənərbağça" yoldaşlıq görüşləri çərçivəsində qüvvələrini sınayıblar.

Slovakiyanın "Trençin" klubu ilə qarşılaşan "cim-bom" rəqibini 4:1 hesabı ilə darmadağın edib.

“Real Madrid”in yeni hücumçusu Kilian Mbappe təqdimat mərasimində İspaniya nəhənginin sabiq forvardı Kriştianu Ronaldusayağı “Hala, Madrid” ifadəsindən istifadə etməsinə aydınlıq gətirib.

Fanat.az xəbər verir ki, fransalı futbolçunun sözlərini

“Hala, Madrid” deməyim uşaqlıq kumirim Ronalduya hörmətimdən irəli gəlir. O, indi dostumdur. Mənə məsləhətlərini verir. Biz onunla həmişə əlaqədəyik”.

Xatırladaq ki, Mbappenin təqdimat mərasimi bu gün “Santyaqo Bernabeu” stadionunda keçirilib. Onun “Real”a keçidi iyunun 3-də elan edilib.