“Rusiya bir zamanlar dünyanın ən böyük imperiyalarından olub. Dünyaya sahib olmağın dadı hələ də damağındadır. Bu gün əlindəkilərlə kifayətlənməyən Rusiya əvvəlki əraziləri geri arzulamaya bilməz”.

Bu fikirlər İctimai televiziyanın hazırladığı materialda yer alıb.

“Bu səbəbdəndir ki, bir neçə dövlətin ərazisini zəbt edib. Hətta Ukraynadan əl çəkmək üçün ona təslim olmağı təklif edir. Azərbaycandan isə səssiz-səmirsiz çıxır. İlham Əliyev başqa liderlər kimi Putinə nə təzyiq göstərdi, nə hədələr yağdırdı.

Rus hərbçilərinin öz xoşuna getməsi üçün sadəcə şərait yaratdı. 1920-ci aprelin 28-də Azərbaycanı işğal etməsi ilə tarixə düşmüşdü Rusiya ordusu. O ordunun varislərini 2024-cü il iyunun 12-də tam çıxarmaqla tarixə düşən Azərbaycan oldu. Düzdür, Moskva Xankəndidə konsulluq açmaq niyyətini gizlətmir. Amma arzulamaq heç zaman zərərli deyil. İndi sizə Xocalı aeroportunun gizlinlərini göstərəcəyik. Rus hərbçilərdən geriyə qalanları. Sülhmərmalılar burda əsl istirahət zonası salıblarmış. Yəqin ki, əbədi qalacaqlarını düşündüklərinə görə. İndi onlardan geriyə boş konteynerlər və hovuz qalıb. Xocalı aeroportu heç vaxt sıradan hava limanı olmayıb. Ermənilərin atəşi altında qalan azərbaycanlılar Qarabağı burdakı helikopterlərlə tərk ediblər. Helikopteri ilə Xocalı aeroportunu son tərk edən pilot isə o olub - Edison Həsənov. Çarəsiz insanları necə daşıdığını bu gün də kədərlə xatırlayır. Beləliklə, dünəndən bu günə Xocalı hava limanı”, süjetdə deyilir.

Ermənistanın Baş naziri Nikol Paşinyan sülh müqaviləsi imzalanmazdan əvvəl Azərbaycanla kommunikasiyaların açılmasını tamamilə mümkün hesab etdiyini bildirib.

"AzPolitika" xatırladır ki, Paşinyan ilk dəfədir ki, belə açıqlama verir.

“Praktiki addımlarla real dünyanı formalaşdırmaq, ondan sonra müqavilə imzalamaq mümkündür”, – deyən Nikol Paşinyan, rəsmi Bakının maneəsiz keçid şərtini qəbul etməyə hazırdırmı?

Politoloq Elxan Şahinoğlu bildirir ki, Paşinyan bu açıqlamaları ilə dəhlizlə bağlı əvvəlki fikirlərini korrektə etməyə hazır olduğunu göstərir: “Amerikalı diplomatlar Paşinyana deyiblər ki, Zəngəzur dəhlizinin açılmasını ləngitməkdə davam etsə, Azərbaycan İran ərazisindən keçən Araz dəhlizinə üstünlük verəcək. Bu, həm ABŞ-nin maraqlarına ziddir, həm də Ermənistanı Orta Dəhliz layihəsindən kənarda qoyacaq”.

Ekspert xatırladır ki, Paşinyanın məlum açıqlamasından bir gün əvvəl Ermənistan parlamentinin sədri Alen Simonyan da dəhlizin açılması üçün neytral ölkələrin və beynəlxalq təşkilatlardan birinin bu prosesə cəlb edilə biləcəyini söyləmişdi.

İranın XİN başçısı vəzifəsini müvəqqəti icra edən Əli Baqeri Kaani Türkiyədə səfərdə olarkən Zəngəzur Dəhlizi məsələsinə toxunub. Tribunainfo.az xəbər verir ki, nazir səlahiyyətlərinin icraçısı CNN Türkə açıqlamasında deyib ki, onlar sərhədlərin dəyişdirilməsinə qarşıdırlar. Baqeri vurğulayıb: “Tehran regionun demoqrafik göstəricilərini və sərhədlərini dəyişdirə biləcək istənilən təşəbbüsün əleyhinədir. Biz regionun inkişafına kömək edəcək hər hansı təşəbbüsü dəstəkləyirik. Lakin regionun demoqrafik göstəricilərini və sərhədlərini dəyişdirəcək heç bir təşəbbüsü qəbul etmirik”.

Bu açıqlama ilə bağlı siyasi ekspert Fikrət Fəraməzoğlu Tribunainfo.az-a bildirib ki, Baqeri bu açıqlamasında İranın bir neçə məsələyə qarşı olduğunu nümayiş etdirib və onların arasında indiyə qədər deyilməyən məsələlər də var.

Onun sözlərinə görə, birinci məsələ, Zəngəzur Dəhlizinin açılmasına qarşı olmalarıdır. “Bu yeni fikir deyil. Hələ II Qarabağ savaşından sonra İranın davamlı olaraq işlətdiyi fikirdir. Tehran heç bir şəkildə Zəngəzur Dəhlizinin açılmasında maraqlı deyil. Bunun çoxlu səbəbləri var. Lakin başlıca səbəbi dəhliz açılarsa, İran çox önəmli mövqe və təsir imkanlarından birini itirmiş olacaq”.

Fəraməzoğlu maraqlı olan iki vacib məqamın ortaya çıxdığını da qeyd edib. O deyib ki, İran XİN başçısının səlahiyyətlərini icra edən şəxs son zamanlar müzakirə olunan Qərbi Azərbaycandan olan insanlarımızın Ermənistana köçürülməsi fikrinə də qarşı olduqlarını dilə gətirib. “Baqeri deyir ki, İran demoqrafik dəyişikliyə də qarşıdır. Bu o deməkdir ki, Tehran gələcəkdə azərbaycanlıların öz ata-baba yurdlarına köçməsi ilə bağlı Azərbaycanın təşəbbüsünə qarşıdır. Çünki azərbaycanlılar Ermənistandakı doğma yurdlarına köçsələr, bu, İranla Ermənistan arasında bütün gizli işlərin üzə çıxmasına səbəb olmaqla yanaşı, həm də İranın Ermənistana açıq dəstək imkanlarını əlindən alacaq. Yəni sözügedən proses baş verərsə, azərbaycanlılar əsasən İranla sərhəddə yerləşən Zəngəzura yerləşəcəklər. Təbii ki, Göycə məsələsi də öz yerindədir. Bu o deməkdir ki, İran Ermənistanla sərhəddə istədiyi kimi davranmaq imkanlarından məhrum olacaq. Buraya logistikadan tutmuş, məxfi yüklərin daşınmasına qədər hər şey daxildir”.

Ekspert ikinci məsələ kimi, Qarabağdan ermənilərin Ermənistana köçməsinə qarşı olmasını göstərir. “Baqerinin açıqlamasında demoqrafik dəyişiklik məsələsinin bir qolu da Qarabağdan köçən ermənilərlə bağlıdır. Iran onların geri qayıtmasında maraqlıdır. Çünki ermənilər Qarabağda olduqları müddətcə, İran Azərbaycana təsir imkanlarını daha da artırmağa nail ola bilər. Necə ki, işğal dövründə və müharibədən sonra bu istiqamətdə xeyli addımlar atmışdı. Eyni zamanda, ermənilərin Qarabağa köçmələri Azərbaycanda separatçılıq meyilləri üçün zəmin yaradacaq ki, bu da İrana sərf edir. Ona görə ki, sabah ermənilər Qarabağda separatçılıqla məşğul olduqda, onlara dəstək verə biləcək”.

"Helikopter binamızın üzərində fırlananda artıq bilirdik ki, atamız getməlidir. O, itburnu mürəbbəsini çox sevirdi. Son görüşümüz də itburnu mürəbbəsi ilə çay içərkən oldu. Hətta sağollaşdı mənimlə. Atama çox bağlı olmuşam (ağlayır). Sonuncu dəfə dedi ki, gələcəyəm, tezliklə gələcəyəm. Və o, mürəbbə qabını stəkanın üzərinə qoyub, getdi..."

Muallim.edu.az bildirir ki, bu sözləri Şuşanın sabiq icra başçısı, şəhid Mikayıl Gözəlovun qızı Şuşa şəhər 1 nömrəli məktəbin direktoru Səbinə Gözəlova deyir.

Söhbət onun Şuşadakı evində baş tutur.

Səbinə xanımın atası Mikayıl Gözəlov Azərbaycan Milli Ordusunun ilk rəsmi hərbi hissələrindən olan 816 saylı Şuşa ərazi özünümüdafiə taborunu yaradanlardan biridir. Şuşanın Qala dərəsi, Böyük Qala dərəsi, Salatınkənd kəndlərinin azad edilməsi əməliyyatına rəhbərlik edib.

Laçın-Şuşa yolunun təhlükəsizliyini təmin edib. Mikayıl Gözəlov 1991-ci ildə ermənilərin sui-qəsdi nəticəsində qətlə yetirilib:

"Biz hər zaman evimizdə Şuşa adı eşitmişik. Atamın da doğma Şuşamıza olan sevgisi onun canını Şuşa üçün fəda etməsinə gətirib çıxardı. O dövrlərdə atama digər rayonlardan təkliflər gəlib və o, Şuşamızı qoyub getməyib. Həmçinin ona deyiblər ki, övladlarınızı da Şuşadan çıxarmalısınız, vəziyyət çətinləşir. Atam bildirib ki, mən öz övladlarımı Şuşadan çıxararamsa, bəs əhali nə edəcək?! Ona görə övladlarım da burada qalacaq, özüm də. Və sona qədər biz mübarizəni davam etdirəcəyik".

O, Şuşanın işğaldan azad olunma xəbərini belə alıb:

"Deməli, Bakıda iştirak etdiyim iclasdan Qəbələyə qayıdırdım, yolda polis vəsiqəmə baxıb Şuşalı olduğumu görəndə dedi ki, "Bilirsiniz Şuşa azad olunub?" Mən bir anlıq donub qaldım və düşündüm ki, polisdir, yəqin ki, düz deyər. Amma yenə də əmin olmaq üçün prezidentin çıxışını gözlədim. Atamın Şuşa sevgisi məni bura daha çox bağladı. Düşünürəm ki, insandakı vətənpərvərlik hissi, torpağa bağlılıq onu gətirib öz torpağına çıxarır. Budur, illər ötüb və biz yenidən qayıtmışıq".

8 dekabr 2023-cü ildə Mikayıl Gözəlovun qızı Səbinə Gözəlova Şuşa şəhər 1 nömrəli məktəbin direktoru təyin olunub:

"Şuşa şəhər 1 nömrəli tam orta məktəbə təyinat aldığımda sadəcə bunu deyə bildim: Ruhun şad olsun, atam! İnşallah ki, sənin yolunu Şuşada davam etdirəcəyəm (ağlayır). Çox sevinirəm ki, gözəl, müasir şəkildə inşa edilmiş Şuşa şəhər 1 nömrəli tam orta məktəb ən gözəl akademikləri, elm xadimlərini yetişdirib. Və bu amal uğrunda biz və müəllim kollektivimiz də daim çalışacağıq".

Ətraflı süjetdə: