Türkiyə kapitallı “Asilsoy” MMC-yə Ağdam Sənaye Parkının rezidenti statusu verilib. İqtisadi Zonaların İnkişafı Agentliyindən Marja-ya verilən məlumata görə, müəssisədə tava və qazan istehsalı həyata keçiriləcək.
İnvestisiya dəyəri 10 milyon manat olan müəssisədə 100 nəfər işlə təmin ediləcək. İstehsal olunan məhsulların daxili bazara satılması ilə yanaşı, ixracı da nəzərdə tutulur. Qeyd edək ki, "Asilsoy" Tükiyədə metal mətbəx əşyalarının istehsalı sahəsində aparıcı şirkətlərdən biridir. Şirkət tərəfindən istehsal edilən məhsullar müxtəlif sifarişçi marka (Karaca, Schafer) adları ilə 15-dən çox ölkəyə ixrac edilir.
Maraqlıdır, işğaldan azad olunan hansı rayonlar daha çox sənaye zonası üçün münasibdir? Hansı rayonda ağır və yüngül sənaye müəssisələri qurula bilər?
Məsələ ilə bağlı iqtisadçı-eskpert Fuad İbrahimov “Cebheinfo.az”-a şərhində qeyd edib ki, müasir dörvdə bütün rayonların sənaye zonasına çevrilməsi mümkündür:
“İlk növbədə qeyd edim ki, Sovet dövründə Ağdam rayonu Füzuli və Cəbrayıla nisbətən sənaye cəhətdən daha çox inkişaf etmişdi. Amma buna baxmayaraq, Qarabağın bütün ərazilərində sənaye müəssisələri var idi.
İndiki, yəni müasir texnologiyanın inkişaf etdiyi dövrdə istənilən ərazidə sənaye xarakterli infrastruktur qurmaq mümkündür. Ona görə də işğaldan azad edilən istənilən rayonda sənaye müəssisələrinin qurulması üçün heç bir problem yoxdur. Hesab edirəm ki, yaxın gələcəkdə Ağdamla yanaşı, Füzuli, Cəbrayıl və Zəngilan da sənaye cəhətdən inkişaf edəcək.
Bu rayonlarda şəhərlər yenidən qurulur, şəhər tipli qəsəbələr salınır və xüsusi müəssisələr tikilir. Eyni zamanda, həm Qarabağ, həm Şərqi Zəngəzur iqtisadi rayonlarına daxil olan elə ərazilər var ki, təbii sərvətlərlə zəngindir. Qarabağ və Şərqi Zəngəzurda kənd təsərrüfatı və bir çox istehsal sektorlarının inkişafı üçün münbit şərait var”.
Ekspert bildirib ki, artıq Ağdamda sənaye parkının salınması istiqamətində mühüm işlər görülür:
“Bu zonada rezident və qeyri-rezident müəssisələr qeydiyyatdan keçir.
Aydın məsələdir ki, Ağdam sənaye mərkəzi nöqtəyi-nəzərdən ölkənin əhəmiyyətli rayonuna çevriləcək. Həmçinin Arazətrafı rayonlar – Füzuli, Cəbrayıl və Zəngilanda da sənaye zonaları yaradılır. Həmin rayonlarda zəngin təbii sərvətlərin iqtisadi dövriyyəyə cəlb edilməsini nəzərdə tutan layihələr tərtib olunur. Kənd təsərrüfatı sektoruna daha çox diqqət yetirilir. İşğaldan azad olunan bütün rayonlar paralel şəkildə yenidən qurulacaq və inkişaf edəcək”.