Hazırlanmasına səkkiz yüz min manatdan çox vəsait ayrılmış portal niyə aktiv deyil, İnam Kərimov, Aqil Quliyev?
“Aqrar tədarük və təchizat” Açıq Səhmdar Cəmiyyəti Kənd Təsərrüfatı Nazirliyinin strukturuna daxil olmayan tabeli bir qurumdur. Rəsmi internet portalında özlərinin də qeyd etdikləri kimi əsas missiyaları dövlət sifarişi ilə ərzaq məhsullarının satın alınmasının mərkəzləşdirilmiş qaydada həyata keçirilməsini təmin etməkdir. Səhmdar Cəmiyyət hazırda Bakı və Abşeron ərazisində bayramlarda “Kənddən Şəhərə” yarmarkaları təşkil edir ki, güya burada birbaşa fermerlər tərəfindən təbii kənd və qida məhsullarının münasib qiymətlərlə satışı həyata keçirilir. Habuki burada da qiymətlər paytaxtın bazarlarındakı qiymətlərlə heç nə ilə fərqlənmir.

Apardığımız araşdırmalar zamanı əldə etdiymiz məlumata görə “Aqrar Tədarük və Təchizat” Açıq Səhmdar Cəmiyyəti bir də rayon xəstəxanalarının ərzaqla təchizat işini həyata keçirir. İl ərzində bu xəstəxanaların ərzaq məhsulları ilə təmin edilməsinə nə qədər vəsait ayrıldığı heç kimə bəlli deyil. Çünki Səhmdar Cəmiyyət bunu heç bir tender keçirmədən, gizlin şəkildə həyata keçirir və ərzaq məhsullarının hansı qiymətlərə alınması ictimaiyyətə bəlli olmur.

Dövlət satınalmalarının vahid internet portalı üzərindən apardığımız araşdırmada məlum oldu ki, “Aqrar tədarük və təchizat” Açıq Səhmdar Cəmiyyəti ərzaq məhsullarının dövlət sifarişi ilə satın alınmasını həyata keçirmək üçün portal yaratmaq niyyətinə düşüb. Qurumun 27.01.2022-ci il tarixdə sözügedən portalda yerləşdirdiyi bildirişdə göstərilir.

“Aqrar tədarük və təchizat” Açıq Səhmdar Cəmiyyəti tərəfindən 2021-ci il 22 dekabr tarixində “Ərzaq məhsullarının dövlət sifarişi ilə satın alınması” elektron portalının (bundan sonra – Portal) hazırlanması xidmətlərinin satınalınması üzrə keçirilmiş açıq tenderdə “Smart Solyuşns Group” MMC qalib gəlmiş və həmin şirkətlə 708 000,00 (yeddi yüz səkkiz min manat 00 qəpik) AZN məbləğində, “06” yanvar 2022-ci il tarixli 06/01-22 nömrəli satınalma müqaviləsi bağlanmışdır.

Tenderin 22.11.2021-ci il tarixdə yekunlaşmış şərtlər toplusunun çatdırılma müddətində isə göstərilir ki, 1-3,5,6,8,10 və 12-ci bəndlərdə qeyd edilən iş və xidmətlər 01 mart 2022-ci il tarixə qədər və daha tez müddət ərzində, digər bəndlərdə qeyd olunanlar 2022-ci ilin sonunadək təhvil verilməsi nəzərdə tutulmalıdır. Amma artıq 2023-cü ilin yanvar ayı olmasına baxmayaraq “Aqrar tədarük və təchizat” Açıq Səhmdar Cəmiyyətinin ərzaq məhsullarının dövlət sifarişi ilə satın alınması elektron portalı hələ də fəaliyyətə başlamayıb.

Apardığımız araşdırmalar zamanı məlum oldu ki, “Aqrar tədarük və təchizat” Açıq Səhmdar Cəmiyyəti portalın hazırlanmasına ayırdığı vəsaitdən əlavə iki dəfə də tender keçirib.

Ərzaq məhsullarının dövlət sifarişi ilə satın alınması məqsədilə yaradılan elektron portal ilə əlaqədar olaraq 2022-ci il may-iyun (30 gün) tarixlərində ərzaq məhsullarının dövlət sifarişi ilə satın alınması zamanı iştirak qaydaları, elektron portalda qeydiyyat, zəruri sənədlərin, məlumatların yerləşdirilməsi üzrə satınalan təşkilatların, satıcıların maarifləndirilməsi xidmətinin keçirilməsinin təşkilati işlərinin və promo məhsulları ilə təmin edilməsinin satın alınması məqsədi ilə 13.05.2022-ci il tarixdə açıqlanmış məlumata görə “Aqrar tədarük və təchizat” ASC “ADMEDİA.AZ” Məhdud Məsuliyyətli Cəmiyyəti ilə 46 191.1 manat məbləğində satınalma müqaviləsi bağlayıb.

11.11.2022-ci il tarixdə verilmiş məlumatda isə “Aqrar tədarük və təchizat” ASC ilə “XCO” Məhdud Məsuliyyətli Cəmiyyəti arasında 83 968.8 manat məbləğində satınalma müqaviləsinin bağlanıldığı göstərilir. Bu tenderdə isə “Aqrar tədarük və təchizat” ASC “Ərzaq məhsullarının dövlət sifarişi ilə satın alınması” məqsədilə yaradılan elektron portalın istifadəsi ilə bağlı olaraq 2022-ci il oktyabr-dekabr (30 gün) ayları ərzində növbəti modullar üzrə elektron portalda qeydiyyat, zəruri sənədlərin yerləşdirilməsi, tərəflər arasında müqavilələrin bağlanması və alqı-satqı əməliyyatlarının aparılması üzrə satınalan təşkilatların və satıcıların maarifləndirilməsi məqsədi ilə tədbirin təşkili xidmətlərinin təmin edilməsinin satın alıb.

Elan olunmuş məlumatlardan da görsəndiyi kimi, “Aqrar tədarük və təchizat” Açıq Səhmdar Cəmiyyəti ərzaq məhsullarının dövlət sifarişi ilə satın alınması elektron portalının hazırlanması xidmətlərinin satın alınması və təşkilatların və satıcıların maarifləndirilməsi məqsədi ilə tədbirin təşkili xidmətlərinin təmin edilməsinə ümumi olaraq 838 159 manat dövlət vəsaiti xərcləyib. Məlumatlardan da görsəndiyi kimi elektron portalda oktyabr-dekabr ayları ərzində zəruri sənədlərin yerləşdirilməsi və tərəflər arasında müqavilələrin bağlanması və alqı-satqı əməliyyatlarının aparılması nəzərdə tutulub.

Amma dövlət orqanlarının rəsmi internet resursları üzərindən apardığımız araşdırmalar zamanı “Aqrar tədarük və təchizat” Açıq Səhmdar Cəmiyyətinin səkkiz yüz min manatdan çox vəsait ayırdığı elektron portalın fəaliyyəti ilə bağlı heç bir məlumat əldə edə bilmədik. Qurumun tedaruk.gov.az portalının yaxın zamanda aktiv olacağı göstərilir.

Buradan suallar ortaya çıxır. Səkkiz yüz min manatdan çox dövlət vəsait ayrılmış elektron portal niyə fəaliyyət göstərmir? Bir elektron portalı bir il ərzində aktivləşdirmək bu qədərmi çətindir? “06” yanvar 2022-ci il tarixli 06/01-22 nömrəli satınalma müqaviləsinin şərtləri niyə vaxtında icra olunmayıb? Yoxsa əlavə vəsaitin ayrılmasına ehtiyac yaranıb?

Qeyd edək ki, “Aqrar tədarük və təchizat” Açıq Səhmdar Cəmiyyəti İdarə Heyətinin sədri Aqil Quliyevdir. Dövrü mətbuatda onun Kənd Təsərrüfatı naziri İnam Kərimovun ən yaxın adamlarından biri olduğu barədə çoxsaylı məlumatlar yayılıb. Artıq bir il keçməsinə baxmayaraq səkkiz yüz min manatdan çox dövlət vəsaitin ayrıldığı elektron portalın niyə fəaliyyət göstərməməsinin səbəbi də məhz onlardan sorulmalıdır.

Aktualinfo.org

“Bu belə olduğu halda Dövlət Gömrük Komitəsi əməkdaşlarının bizə qarşı irəli sürdükləri tələb heç cür yolverilməzdir, cinayət məsuliyyəti yaradan hallardır”

Məlumdur ki, respublikamız ikinci dəfə özünün müstəqil yaşamaq hüququnu bütün dünyaya bəyan etdikdən sonra, 30 yanvar 1992-ci il tarixdə Azərbaycan Respublikasının eks-prezidenti, mərhum Ayaz Mütəllibovun imzaladığı fərman əsasında Dövlət Gömrük Komitəsi yaradılır və bu dövlət qurumu illər keçdikcə formalaşır. Qeyd edək ki, ötən illər ərzində bu dövlət qurumuna rəsmən təsdiq olunmuş ayrı-ayrı şəxslər rəhbərlik etmişlər ki, onlardan sonuncusu gömrük xidməti general-polkovniki Səfər Məmməd oğlu Mehdiyev olmuşdur. Bu şəxs 23 aprel 2018-ci il tarixdən Dövlət Gömrük Komitəsinə rəhbərlik etsə də, Prezident İlham Əliyevin 16 iyul 2022-ci il tarixdə imzaladığı sərəncam əsasında Səfər Mehdiyev daşıdığı vəzifəsindən azad olundu. Qeyd edək ki, adı çəkilən bu dövlət qurumunda baş verənlər ölkə rəhbərini belə bir qərar verməyə vadar edir və çox keçmədi ki, DTX əməkdaşları tərəfindən Dövlət Gömrük Komitəsində ardıcıl əməliyyatlar keçirildi. Həyata keçirilən əməliyyatlar nəticəsində 2-si general olmaqla, bir neçə vəzifəli şəxslər həbs olundular və onlara qarşı vəzifə cinayətləri ittihamı irəli sürüldü. Bu cür olaylardan sonra hər kəs elə düşünürdü ki, Dövlət Gömrük Komitəsində vəzifə sahibi olanlar həbs olunmuş şəxslərdən ibrət dərsi götürəcəklər və qanunauyğun idarəçiliyi həyata keçirəcəklər. Belə olan halda ataların bir deyimi yada düşür, “Sən saydığını say, gör fələk nə sayır”. Bəli, əslində belə bir zərb-məsəl, bu gün də bu Komitədə özünü doğrultmaqdadır. Məsələn, bugünlərdə “AZMETAL” şirkətinin rəsmi meneceri Müşviq Əmirli Dövlət Gömrük Komitəsinin strukturlarında yaşanan biabırçılıqlarla və özbaşınalıqlarla bağlı, bəzi media qurumlarına açıqlamalar verib. Bu şəxs verdiyi açıqlamalarda qeyd edir ki, “Təmsil etdiyim şirkət istehsal etdiyi malların ixracı məqsədilə Dövlət Gömrük Komitəsinə müraciət etsə də, “AZMETAL” şirkətinə aid məhsulların uyğunluq sertifikatı, bu gün də gömrük orqanları tərəfindən tanınmır. Çünki, gömrük orqanı əməkdaşları bununla bağlı yuxarıdan göstərişin verildiyini dilə gətirirlər. Yəni, onlar verilmiş göstərişi əsas tutaraq uyğunluq sertifikatının yalnız “AZSTANDART”dan alınmasını tələb edirlər. Qeyd edim ki, gömrük əməkdaşları bir neçə gün bundan öncə mənə “vizitka” verib “gedin uyğunluq sertifikatını biz deyən qurumdan alın” dedilər. Təqribən üç ay bundan öncə onların dedikləri orqana müraciət etdim, o halda Metrologiya İnstitunun direktoru cənab İlham Bayramov mənə “Biz gömrük generalları ilə danışıqlar aparırıq, öz sertifikatımızı gömrükdə tətbiq edəcəyik, gömrük əməkdaşları yalnız bizim verdiyimiz sertifikatlarla işləyəcəklər. Azkreditasiya olunmuş heç bir MMC-nin verdiyi sertifikatlar gömrük orqanlarında tanınmayacaq” dedi. Bəli, təqribən üç ay bundan öncə müraciət etmişdim, hal-hazırda gömrük orqanlarında bu qayda tətbiq olunmaqdadır. Yəni, ixrac edəcəyimiz mallara görə Bakı Baş Gömrük İdarəsinin Mərkəzi ekspertiza idarəsində bizdən “AZSTANDART”ın, yəni antiinhisar adı altında İlham Bayramovun düzüb-qoşduğu sertifikatı tələb edirlər. Mən bunun bir oyun olduğunu gözəl və dəqiq bilirəm. Ona görə də nə onlara müraciət etməyə, nə də ki, bu qurumdan sertifikat almağa razı deyiləm. Qeyd edim ki, azkreditasiya olunmuş “SERTUS” MMC uyğunluq sertifikatı vermək səlahiyyətinə malik olan qurumdur və hüquqları “AZSTANDART”dan daha genişdir, eyni zamanda xidmət sahəsi onlardan daha böyükdür. Əslində, bütün bunların hamısı bir oyundur. Hal-hazırda gömrük əməkdaşları uyğunluq sertifikatını dedikləri qurumdan alınmasını tələb etsələr də, əslində bu cür yanaşma dövlət orqanlarının işinə müdaxilə etmək deməkdir. Mən dövlətimizə xidmət edən, vergi ödəyən bir şəxsəm. Bu belə olduğu halda Dövlət Gömrük Komitəsi əməkdaşlarının bizə qarşı irəli sürdükləri tələb heç cür yolverilməzdir, cinayət məsuliyyəti yaradan hallardır.

Bildirmək istəyirəm ki, biz 10 yanvar 2023-cü il tarixdə də Dövlət Gömrük Komitəsinə müraciət etmişdik. Ötən ilin sonlarında “SERTUS” MMC-dən aldığımız uyğunluq sertifikatı ilə mallarımızı gömrükdən buraxdılar. İstehsal etdiyimiz mallar latundan hazırlanan gəmi lövhələridir. Yəni, Türkiyə şirkəti ilə müqaviləmiz var və həmin müqavilə sənədi əsasında məhsulları hazırlayırıq. Digər tərəfdən, “AZSTANDART”ın rəsmi qaydada tapa bilmədiyi, heç cür verə bilmədiyi uyğunluq Türkiyədən rəsmi qaydada alınıb və bu rəsmi qaydada öz əksini də tapır. Gömrük əməkdaşları isə bu uyğunluğu qəbul etmirlər və onlar qeyri-rəsmi şəkildə bizdən tələb edirlər ki, uyğunluq sertifikatını biz deyən yerdən almalısınız. Hər kəs bilsin ki, gömrük əməkdaşları bunu istehsalatla məşğul olan hər kəsdən tələb edirlər. Qeyd edim ki, “SERTUS” MMC “hikmin” kodu verə bilir, bu kodu tətbiq edir, hətta gömrük sertifikatları da var. Bu məsələ ilə bağlı ötən ilin 10 dekabrından müzakirələr aparılıır. Əvvəl də “AZSTANDART”dan uyğunluq sertifikatı olmasını tələb edirdilər və 17 dekabr 2022-ci il tarixdə onlar bu qurumdan əldə etdiyimiz sertifikatla bir maşınımızı buraxdılar. Bu gün də eyni maşındır, eyni maldır və eyni sənəddir. Amma, indi “SERTUS” MMC-dən aldığımız sertifikatı heç cür qəbul etmirlər. Faciə odur ki, gömrük əməkdaşları 05 yanvar 2023-cü il tarixdən bütün istehsalçılardan uyğunluq sertifikatlarını yalnız “AZSTANDART”dan almağı tələb edirlər. Hər kəs gözəl və dəqiq bilir ki, bunu Metrologiya İnstitunun direktoru cənab İlham Bayramov tətbiq edib. Mən indiyə kimi bu oyunla heç cür barışmamışam və bundan sonra da barışmayacağam.

Hal-hazırda mallarımız yük maşınlarındadır və hər gecikən günə görə, hər maşın üçün gündəlik təqribən 100 dollar məbləğində pul itiririk. Ötən ay sertifikat məsələsinə görə maşınlarımızdan 20 gün, 17 gün, 10 gün gecikənləri oldu. Əgər maşınlarımızı vaxtlı-vaxtında buraxsaydılar, o halda biz boşboşuna pullar itirməzdik və itirdiyimiz pulları vergi borclarımızın ödənilməsinə yönldərdik. Hal-hazırda bir kimsə mənə rəsmi qaydada cavab vermir ki, nəyə görə uyğunluq sertifikatı gömrük əməkdaşlarının dedikləri qurumdan alınmalıdır. Yəni, bunu mənə bir kisə demir, yaxud da deyə bilmir.

Onu da qeyd edim ki, “SERTUS” MMC səlahiyyətləri “AZSTANDART”dan daha böyükdür və xidmət sahəsi daha genişdir. Bu kimi məsələlər ciddi problemlərdir ki, bütün bunları İlham Bayramovun özü düzüb-qoşur. Amma, onu da unutmaq olmaz ki, bu cür çirkli oyunların əsas oyunçusu Bakı Baş Gömrük Idarəsinin rəisi vəzifəsini müvəqqəti icra edən, Dövlət Gömrük Komitəsinìn sədrinin birinci müavini, gömrük general-leytenantı cənab İsmayıl Hüseynovdur. Belə ki, bu şəxsin gömrük işçilərinə və gömrük laboratoriyasında çalışanlara qanunsuz və əsassız göstərişlər verdiyi dilə gətirilir”.

Bəli, bütün bunları təhlil edib belə bir qənaətə gəlmək olar ki, hal-hazırda Dövlət Gömrük Komitəsinì rüşvətxorlar yuvasına çevirməyə çalışanların çirkin əməlləri ilə bağlı, DTX əməkdaşlarının bu dövlət qurumuna baş çəkmələrinə zərurət yaranıb. Yəqin ki, o halda “məhşər ayağı”na çəkilənlərdən birincisi İsmayıl Hüseynov olsa da, ikincisinin İlham Bayramov olması qaçılmaz olacaq. Odur ki, həm gözləyək, həm də izləyək. Yazıda adı çəkilən hər kəsin mövqeyini dinləməyə hazırıq.

Mövzu diqqətimizdədir.

Xeberfakt.az

Naxçıvanda Vasif Talıbovun dönəmində yol verilmiş daha bir ağır dövləti cinayətin üstünü açırıq!

“AzPolitika.info”-ya daxil olan məlumata görə, təxminən il yarım əvvəl Azərbaycan dövlətinin suveren ərazisinin təxminən 21 hektarı İran dövlətinə ya satılıb, ya da bağışlanıb! Belə ki, Naxçıvan Muxtar Respublikası (NMR) Şərur rayonunun Ərəbyengicə kəndi istiqamətində İran islam Respublikası (İİR) ilə Azərbaycan Respublikasının dövlət sərhəd xətti qanunsuz olaraq dəyişdirilib. Həmin istiqamətdə Araz çayının əsas yatağının önü kəsilərək çay suyu Azərbaycan tərəfdə olan çökəkliyə yönləndirilib. Nəticədə, 21 hektardan artıq torpaq sahəsi qonşu ölkənin ərazi hüdudlarına daxil edilib.

Ərazinin 2 il əvvəlki görüntüsü

Qeyd edək ki, “Dövlət sərhədi haqqında” Qanunun 3-cü maddəsinin 3-cü bəndinə görə, çaylarda dövlət sərhədi onların ortası və ya çayın əsas qolunun ortası üzrə müəyyən edilir. Azərbaycanla İran sərhəddi demarkasiya və delimitasiya edilərkən də bu prinsip əsas götürülüb – Araz çayının ortası dövlət sərhəd xətti kimi müəyyən olunub. Lakin təxminən il yarım əvvəl ağır texnikanın köməyi ilə barəsində danışdığımız istiqamətdə Araz çayının əsas yatağının dəyişdirilməsi işlərinə başlanılıb.

Sərhədyanı kəndlərdə yaşayan sakinlərin bildirdiyinə görə, həmin vaxt həm Naxçıvan rəhbərliyindən olan şəxslər, həm də İranın dövlət qurumlarının nümayəndələri əraziyə toplaşıblar. Bundan sonra əraziyə ağır texnikalar cəlb olunaraq Araz çayının əsas qolunun önü kəsilib, su Azərbaycan tərəfdə olan çökəkliyə yönləndirilib. Kənd sakinlərinə isə bildiriblər ki, məqsəd həmin hissədən körpü salmaq və beləliklə də qonşu ölkəyə gediş-gəlişi daha da rahatlaşdırmaqdır. Amma bir müddətdən sonra məlum olub ki, heç bir körpü tikintisi aparılmayıb və görülən işlər nəticəsində Azərbaycanın 21 hektardan artıq ərazisi İran tərəfə keçib. İran isə sözügedən ərazinin düz ortasından yük maşınları üçün avtomobil yolu çəkib. Beləliklə, Azərbaycan-İran dövlət sərhəd xətti dəyişdirilib.

Dövlət sərhədi geri çəkiləndən sonrakı görüntü

“AzPolitika.info” araşdırıb ki, internetdə rəsmi və qeyri-rəsmi bütün mənbələrdəki xəritələrdə sözügedən 21 hektar Azərbaycan dövlətinin ərazisi kimi görünür. Habelə, iki il əvvəl peykdən çəkilən fotolarda da həmin yerin Azərbaycan Respublikasının ərazi hüdudlarına daxil olduğu aydın görünür (Foto yazıda təqdim olunur). Naxçıvan rəhbərliyi ilə İran arasında il yarım əvvəl mahiyyəti qaranlıq olan sövdələşmədən sonra isə tamamilə fərqli mənzərə ortaya çıxıb. Belə ki, Google.map-dan çəkilən bu fotolarda 21 hektarlıq ərazinin artıq İran İR-a məxsus olduğu göstərilir.

Azərbaycan Respublikasının “Dövlət sərhədi haqqında” Qanunun 2-ci maddəsinə görə, dövlət sərhədi Azərbaycan Respublikası Milli Məclisinin qərarları ilə müəyyən edilir. Həmin maddənin 2-ci bəndində isə göstərilir ki, Azərbaycan Respublikası dövlət sərhədlərinin dəyişdirilməsi yalnız referendum yolu ilə həll oluna bilər.

Məlumdur ki, Azərbaycanda dövlət sərhədinin dəyişdirilməsi ilə bağlı Milli Məclisdə müzakirələr aparılmayıb, nə də ölkədə belə bir referendum keçirilməyib. Beləliklə, aydınlaşır ki, Respublikanın Şərur rayonunun Ərəbyenicə kəndi istiqamətindəki ərazisinin bir hissəsi (21 hektar) dövlətə qarşı ağır cinayət törədilməklə, İrana verilib. Naxçıvan rəhbərliyi bu addımı niyə atıb – ərazini satıb, bağışlayıb, yoxsa, hansısa başqa sövdələşmənin predmetinə çevirib, bu məlum deyil və təbii ki, buna Azərbaycanın müvafiq dövlət strukturları aydınlıq gətirməlidir.

“AzPolitika.info” saytı məsələ ilə bağlı Dövlət Sərhəd Xidmətinə sorğu ünvanlayıb. Lakin hələ ki, susqunluq nümayiş etdirilir.

“Dövlətə xəyanət maddəsi ilə ömürlük azadlıqdan məhrum edilməlidir!”

Bütöv Azərbaycan Xalq Cəbhəsi Partiyasının sədri, Milli Məclisin Dövlət quruculuğu və hüquq siyasəti komitəsinin sədr müavini Qüdrət Həsənquliyev Naxçıvan istiqamətində dövlət sərhədinin özbaşına dəyişdirilməsi faktını “AzPolitika.info”-ya belə şərh edib:

“Naxçıvan istiqamətində dövlət sərhəddini müəyyən edən Araz çayının yatağının dəyişdirilməsi yolu ilə 21 hektar torpağın İrana verilməsi barədə məlumat məni sarsıtdı. Sputnik vasitəsilə çəkilmiş şəkillərdə öz əksini tapmış bu faktlar dərhal araşdırılmalı və təsdiqini taparsa, bu cinayətdə iştirak etmiş hər kəs Cinayət Məcəlləsinin 274-cü maddəsi əsasında dövlətə xəyanət ittihamı ilə, yəni dövlətin ərazi toxunulmazlığına qarşı cinayətkar qəsdə görə təqsirləndirilib, ömürlük azadlıqdan mərhum edilməli və dövlət sərhədləri təxirəsalınmadan bərpa olunmalıdır!

Azərbaycan Respublikası Konstitusiyasının 11-ci maddəsinə əsasən, Azərbaycan Respublikasının ərazisi özgəninkiləşdirilə, heç bir hissəsi heç bir şəkildə kimsəyə verilə bilməz. Yalnız Milli Məclisin qərarı ilə Azərbaycanın bütün əhalisi arasında referendum keçirmək yolu ilə Azərbaycan xalqının iradəsi əsasında dövlət sərhədləri dəyişdirilə bilər. Ona görə, bir daha söyləyirəm, xalqımıza qarşı bu ağır cinayətin törədilməsi təsdiq olunarsa, dərhal deputat istintaq qrupu yaradılmalı, məsələ BMT Təhlükəsizlik Şurası səviyyəsində müzakirəyə şıxarılmalı, İran tərəfdən bu cinayətdə iştirak etmiş şəxslərin də cəzalandırılması tələb olunmalıdır”.

Bəli, Azərbaycanda mənzil dələduzluğunun tarixi 90-cı illərdən ortaya çıxdı, tutulan-tutuldu, mənzili əlindən alınan və əli hər yerdən üzülənlər ölüb getdi… Amma onların ah-naləsi yerdə qalmadı. İstintaq orqanlarının, məhkəmələrin… binəva vətəndaşları zəlil günə qoyan dələduz MTK və ya MMC rəhbərləri ilə əlbirliyinin sonu həm də bu oldu ki, dövlətimizin məhkəmə-istintaq və hüquq sisteminə qara ləkə oldular, Azərbaycanın adı bir dəstə dələduzun sayəsində Avropa Məhkəmələrindən gəldi…

Prezident İlham Əliyevin tövsiyyələrini, Baş Prokuror Kamran Əliyevin tapşırığını eşitməyən Baş Prokuror yanında Korrupsiyaya Qarşı Mübarizə İdarəsinin istintaq idarəsinin rəisi heç olmasa Allahdan da qorxmur???

«Təzadlar»a şikayətə gəlib özünü od vurub yandırmaq həddində hiss edən Bakı şəhəri, Binəqədi rayonu, 6-cı mikrorayon, M.Kazımovski küçəsi, ev 32/15, mənzil 22 ünvanında yaşayan Rüstəmov Seymur Qəzənfər oğlunu redaksiyanın hüquqşünası ilə birlikdə dinlədik. Sənədlərini öyrəndik. Təsəvvür edirsinizmi, vətəndaş qonum-qonşudan borc alıb həyatını Azərbaycan vətəndaşına yaraşan xoşbəxt formada qurmaq istəyi ilə üz tutub Xırdalandakı “AFŞARAN-A” MMC-nin (indi guya Amerika kəşf ediblər kimi bu MMC-nin adını dəyişib “FAM-88” qoyublar) direktoru, əslən Biləsuvardan olan Hüseynov Fəxrəddin Balaxan oğlunun ofisinə. Və tələb olunan məbləği verib mənzil alır. Bununla da həyatını zəhərə döndərirlər… «Kaş bu MMC dələduzuna rəast gəldiyim günə bir qara daş düşəydi», -deyən Rüstəmov Seymur Qəzənfər oğlu hirsindən ağlamaq dərəcinə gəlir. Deyir: «…Bir ildir Korrupsiyaya Qarşı Mübarizə Baş İdarəsi istintaq idarəsinin rəisi Fərid Nağıyev şikayətimə baxıb bu dələduzlara cinayət işi başlamır. Və müstəntiq Ələsgər Qocaman isə açıqca deyir ki, bu dələduzları həbs etmək bir saatlıq işdir, amma mən neyləyim, rəis dələduzların hüquqlarını qoruyur, mənə göstəriş vermir…».

Təsəvvür edin, məsuliyyətdən yayınmaq üçün “AFŞARAN-A” MMC-nin direktoru Hüseynov Fəxrəddin Balaxan oğlu bu MMC-ni ləğv etdirib əvəzində “FAM-88” MMC yaradıb və öz həmyerlisini və əməlinə şərik etdiyi Tağıyev Rafiq Nərçə oğlunu bu MMC-yə direktor təyin edir. İndi şikayətçilər qalıb iki direktorun dələduz əməlinin burulğanında.

Dələduzluğun qardaşlığı və 16 illik məhkəmə hökmü…

«…İstərdim Biləsuvar sakinləri bilsinlər ki, bu Hüseynov qardaşları bir mənzili 3-5 adama satmaqla qanunsuz və Allahsız əməl tutmaqdadırlar… Bu nəslin bir böyüyü, insaflısı, Allah adamı olanı yoxdur onlara başa salsın ki, başqasının göz yaşı, ah-naləsi üstündə necə xoşbəxt həyat yaşamaq olar? Dələduz ailənin oğlunu, qızını, həyat yoldaşını, atasını, anasını, qardaşını, qohum-əqrabasını necə müsbət xatırlamaq olar axı?! Hüseynov Fəxrəddin Balaxan oğlunun işi istintaqda, digər qardaşı Mehman Hüseynov eyni əməlin yolçusu, başqa bir qardaşı Elxan Hüsyenov isə bir mənzili bir neçə adama satdığı üçün məhkəmə hökmü ilə 16 il azadlıqdan məhrum edilib, hələ də cəza çəkir…», -deyir şikayətçi.

Şikayətçini dinlədikcə dələduzlara deyil, Baş Prokuror Kamran Əliyevin belə, tapşırığını eşitməyən, saya salmayan Korrupsiyaya Qarşı Mübarizə Baş İdarəsinin İstintaq idarəsinin rəisi Fərid Nağıyevin əməlinə və gələcək həyatına… acıyırıq.

***

Beləliklə, gəlin şikayətçi Rüstəmov Seymur Qəzənfər oğlunun Baş Prokuror Kamran Əliyevə göz yaşları içərisində yazdığı ərizəsini birlikdə oxuyaq:

Azərbaycan Respublikasının Baş Prokuroru cənab Kamran Əliyevə!

Çox hörmətli Kamran müəllim!

Mən, Rüstəmov Seymur Qəzənfər oğlu 2021-ci ildə Sizə şikayət edərək əvvəlki adı “AFŞARAN-A” MMC olan, indiki “FAM-88” MMC-nin keçmiş direktoru Hüseynov Fəxrəddin Balaxan oğlu və hazırkı direktoru Tağıyev Rafiq Nərçə oğlunun qanunsuz əməlləri nəticəsində mənə külli miqdarda maddi zərər dəyməsini bildirmişəm. Mənim şikayətim Baş Prokuror yanında Korrupsiyaya qarşı mübarizə Baş İdarəsinin İstintaq İdarəsində istintaqı aparılan digər bir işə birləşdirilmiş və istintaq idarəsinin rəis Fərid Nağıyev tərəfindən müstəntiq Ələsgər Qocamana həvalə edilmişdir. Lakin bir il ərzində İstintaq İdarəsi tərəfindən hər hansı bir tədbir görülmədiyindən 2022-ci ilin noyabr ayında Sumqayıt şəhərində vəkilim Mansur Osmanovla birlikdə Sizin qəbulunuzda olmuşam. Qəbulda olduğumuz vaxt bizə bildirdiniz ki, mənim işimi şəxsən nəzarətə götürəcəksiniz və bu barədə Korrupsiya İdarəsinin rəisinə tapşırıq verəcəksiniz, həmçinin mənə məlumat veriləcəkdir. Lakin hal-hazıra qədər İstintaq İdarəsinin rəisi Fərid Nağıyev bircə dəfə bizi qəbul edərək bildirdi ki, istintaq bütün tələb olunan hərəkətləri edəcəkdir, narahat olmayın. Və guya bununla bağlı Fərid Nağıyev müstəntiqə bütün göstərişlərini də vermişdir. Lakin “AFŞARAN-A” MMC-nin direktoru Hüseynov Fəxrəddin Balaxan oğlu açıq şəkildə bildirməkdədir ki, mən korrupsiyada «işimi görmüşəm» və s. Belə ki, şikayətimdə və sonradan verdiyim ifadəmdə göstərmişəm ki, “AFŞARAN-A” MMC-nin keçmiş direktoru Hüseynov Fəxrəddin Balaxan oğlu ilə aramızda bağlanmış 31.12.2016-cı il tarixli, 134 nömrəli müqavilə əsasında MMC Abşeron rayonu, Xırdalan şəhəri, M.Hüseynzadə küçəsi 1 ünvanında 4-cü blok, 7-ci mərtəbədə yerləşən 231 nömrəli mənzili izolə olunmuş 2 (iki) otaqdan ibarət pay kimi 54152 (əlli dörd min yüz əlli iki) manat əvəzində mənə verməyi öz öhdəsinə götürmüş, lakin təqdim olunmuş maliyyə arayışına əsasən pulunu alsa da öhdəliklərini icra etməmişdir. Məndə olan həmin mənzilə aid bütün sənədlərin əsilləri müstəntiqə təqdim edilmişdir. Həmçinin sonradan adı dəyişərək “FAM-88” MMC olan “AFŞARAN-A” MMC-nin yeni direktoru Tağıyev Rafiq Nərçə oğlu vəzifə səlahiyyətlərindən sui-istifadə edərək vəzifə saxtakarlığına yol vermiş və mənə məxsus mənzili dəyərindən çox aşağı qiymətə, yəni təqdim edilmiş maliyyə arayışına əsasən 30944 (otuz min doqquz yüz qırx dörd) manata Məmmədov Teymur İldırım oğluna qanunsuz olaraq satmışdır. Məlum olur ki, bu iki MMC-lərin əməllə və məqsədi bu imiş: əvvəlki ləğv edilir, sonra gələn direktor isə istədiyini edir, şikayətçiyə deyir ki, get mənzili keçmiş MMC-dən istə! Dələduzların qurduğu oyun belədir! Sözügedən mənzillə bağlı hər hansı bir başqa istintaq orqanında və ya məhkəmədə mübahisə getməsə də, müstəntiq bildirir ki, 231 nömrəli mənzilin başqa şəxsə satılması, mənim həmin mənzildən imtina etməyim və pulumu geri almağım barədə guya ortada sənədlər var və onların əsli “FAM-88” MMC tərəfindən ona təqdim edilmədiyindən o, yəni müstəntiq hər hansı bir tədbir görə bilmir.

Hörmətli Kamran müəllim! Yəni müstəntiqin sözündən belə çıxır ki, “FAM-88” MMC ona nə desə o da onu edəcək. Halbuki, Rüstəmov Seymurun və Hüseynov Fəxrəddinin və qeyrilərinin izahatları artıq alınmış, mövcud bütün sübutlar əsasında iş üzrə istintaq hərəkətləri davam etdirilə bilər və hətta mən zərərçəkmiş şəxs kimi tanına da bilərəm. Amma hansısa bilinməyən səbəbdən müstəntiq bu işi aparmaq istəmir, məni zərərçəkmiş kimi də tanımır.

Yuxarıda adı çəkilən mənzildən başqa “AFŞARAN-A” MMC-nin keçmiş direktoru Hüseynov Fəxrəddin Balaxan oğlu ilə mənim həyat yoldaşım Əlizadə Şəhla və anam Rüstəmova Raya arasında eynitipli müqavilələr bağlanmış, 339 və 261 nömrəli mənzillər onlara satılmışdır. Daha sonra Şəhla Əlizadənin adına olan 339 nömrəli mənzilin dəyəri Fəxrəddin Hüseynov tərəfindən məcbur olaraq mən-Rüstəmov Seymur Qəzənfər oğluna qaytarıldığından həmin mənzilin sənədlərini mən Fəxrəddin Hüseynova vermişəm. Rüstəmova Rayanın adına olan 261 nömrəli mənzilin sənədləri isə Fəxrəddin Hüseynov tərəfindən aldadılaraq, dəyərinin qaytarılacağı vədi edilərək məndən geri alınmış, lakin dəyəri qaytarılmamış və mənzil başqa şəxsə satılaraq pulu Fəxrəddin Hüseynov tərəfindən mənimsənilmişdir. Həmin mənzilin qaytarılması tələbi ilə anam Raya Rüstəmova tərəfindən Abşeron rayon Məhkəməsinə müraciət edilmişdir. Həmin məhkəmə gedişatında ekspert rəyi əsasında müəyyən edilmişdir ki, anam Raya Rüstəmovanın da imzasını saxtalaşdıraraq, guya mənzilindən imtina etməsi və dəyərini alması göstərilmişdir. Anama məxsus mənzil də qanunsuz olaraq başqasına satılmışdır.

Mən dəfələrlə Fəxrəddin Hüseynovun yanında, ofisində olmuş, ondan 73.808 manat, 32000 manat armaturlara görə olan digər borcunun və qanusuz olaraq başqa şəxslərə satılmış mənzillərimizin dəyərinin qaytarılmasını tələb etmişəm. Lakin Fəxrəddin Hüseynov öz havadarlarına çox arxayın olduğundan məni aldatmaqda davam edir, İstintaq İdarəsi isə buna göz yumur, açıq şəkildə onu müdafiə edir.

Artıq 1 ildən çoxdur ki, Korrupsiyaya qarşı Mübarizə Baş İdarəsinin İstintaq İdarəsində Azərbaycan Respublikası Cinayət Məcəlləsinin 178.2.3, 178.2.4, 178.3.2., 308.1, 313 və 314-2.1-ci maddələri ilə istintaqı aparılan 212026308 saylı cinayət işi üzrə mən yalnız şahid qismində bir dəfə 2021-ci ilin dekabr ayında və 2022-ci ilin oktyabr ayının 8-də dindirildikdən sonra barəmdə də zərərçəkmiş şəxs qismində cəlb etmə qərarı belə qəbul edilməmiş, həmçinin Fəxrəddin Hüseynov məsuliyyətə cəlb olunmamışdır.

Hörmətli cənab Baş Prokuror!

Onu da diqqətinizə çatdırıram ki, “FAM-88” MMC öz qanunsuz əməllərini ört-basdır etmək üçün mənə qarşı iddia tələbi ilə Abşeron rayon Məhkəməsinə müraciət edərək, yuxarıda adını çəkdiyim 231 saylı mənzilə aid olan 31.12.2016-cı il tarixli, 134 nömrəli müqavilənin etibarsız hesab edilməsini tələb etmiş, laki ifşa olunacağını dərk edərək, iddia tələbinin baxılmamış saxlanılmasını məhkəmədən xahiş etmişdir.

Abşeron rayon Məhkəməsinin 2(012)-751/2022 saylı, 08.04.2022-ci il tarixli qərardadı ilə “FAM-88” MMC-nin iddia ərizəsi baxılmamış saxlanılmışdır. Həmin qərardad vəkilim tərəfindən Cinayət işinə əlavə edilməsi üçün cinayət işini aparan müstəntiqə təqdim edilmişdir. Lakin yenə də hər hansı bir istintaq hərəkəti aparılmamışdır.

Cənab Baş Prokuror!

212026308 saylı cinayət işi üzrə şahid qismində cəlb edilmiş mən-Rüstəmov Seymur Qəzənfər oğlunun etibarından sui-istifadə edərək məni aldadan şəxslər “FAM-88” MMC-nin keçmiş direktoru Hüseynov Fəxrəddin Balaxan oğlu və hazırki direktoru Tağıyev Rafiq Nərçə oğludur. Mən həmin şəxslərdən şikayətçiyəm və onların CM-nin 178.3.2, 308.1 və 313-cü maddələri ilə cinayət məsuliyyətinə cəlb edilməsini, həmçinin mənə vurulmuş maddi zərərin qaytarılmasını tələb edirəm. Yuxarıda qeyd edilənlərə əsasən Sizdən xahiş edirəm ki, mənim şikayətim üzrə materialları 212026308 saylı cinayət işindən ayıraraq cinayət işinin başlanması üçün başqa istintaq orqanına göndərəsiniz.

Cənab Baş Prokuror!

İstintaq İdarəsinin rəisi Fərid Nağıyev və yuxarıda adı çəkilən dələduzlar artıq məni o həddə çatdırıblar ki, intihar edim. Mənim ölkədə hüquqi islahatların aparıldığı bir vaxtda hüquqlarımın bu şəkildə pozulmasına necə dözmək olar? İstintaq İdarəsinin rəisi Fərid Nağıyev Sizi eşitmir, qanunları saya salmır. Xahiş edirəm, tədbir görün. 500-1000 manat pul mənimsəyən məktəb direktorunun barəsində həbs qətimkan tədbiri seçən Fərid Nağıyev nədən bu mənzil dələduzlarına qarşı eyni addımı atmır??? Xahiş edirəm, tədbir görülməsi üçün aidiyyəti üzrə göstəriş verəsiniz.

Redaksiyadan: Bu dəqiqələrdə zərərçəkmiş-şikayətçi Seymur Rüstəmovun vəkilindən hüquqlarını müdafiə etdiyi şəxsin imzasının necə saxtalaşdırıldığını təsdiq edən ekspertiza rəyini bizə göndərdi. Sual yaranır: Baş Prokuror yanında Korrupsiyaya Qarşı Mübarizə Baş İdarəsi İstintaq İdarəsinin rəisi Fərid Nağıyev bu dəfə də dələduzlara qarşı tədbir görməyəcək???

(Davamı var)

«Təzadlar»ın Araşdırma Qrupu

Mən bəzilərindən fərqli olaraq, digər ölkədə qaranlıq işlərlə məşğul olub özümü alim kimi təqdim etməmişəm.
Səmimi etiraf edim ki, bir Azərbaycan ziyalısı, iqtisadçı professor, ekspert, analitik olaraq məni ölkənin ali iqtisadi təhsil sistemində, iqtisad elmində baş verən proseslər çox narahat edir.

Faktinfo.az xəbər verir ki,bu fikirlər İqtisad üzrə elmlər doktoru, professor Elşad Məmmədovun növbəti məqaləsindəndir.O,Azərbaycan Dövlət İqtisad Universiteti,orada həyata keçirilə bilməyən kadır hazırlığı və acınacaqlı durum barəsində növbəti məqaləsini yazıb.Məqalə ilə tanış olduqda professor Elşad Məmmədovun illər əvvəl ADİU-u rektoru Ədalət Muradov tərəfindən qısqanclıqla qəbul edildiyi açıq sezilir və professor Ədalət Muradova açıq,bəzən sətiraltı bildirir ki,biz elm sahəsində fərqli-fərqli şəxslərik.Sizlərdən Azərbaycanda çoxdur,bizlər barmaqla sayılacaq qədərik.

Professorun böyük həcmli, təhlili,paralellərlə zəngin,iqtisadi dairələrin bəzi suallara cavab axtardığı məqaləsini təqdim edirik:

Mənim iqtisadi təhsillə,iqtisad elmi ilə bağlı ardıcıl tənqidi analitik məqalələrimi yazmağıma təkanverici amillərdən biri ötən tədris ilinin sonu oldu. Mən UNEC-ə ölkədə tanınmış ekspert-analitik olaraq tədrisdə “yüksək göstəriciləri” olan yuxarı kurs tələbələri ilə görüşə dəvət edildim.Qeyd edim ki, uzun illər ali məktəbdə dərs deyirəm. Hansı inzibati vəzifədə olmağımdan asılı olmayaraq auditoriyadan, dərs prosesindən 1 il belə kənarda qalmamışam və tələbələrin gözlərindən onların biliyə, tədrisə, elmə marağının hansı səviyyədə olduğunu hiss edirəm. Həmin görüşdən çox ağır hisslərlə çıxdım! Tədrisdə “yüksək göstəriciləri” olan həmin tələbələr dövlət büdcəsinin xərcləri və gəlirlərinin necə formalaşması və bu kimi sadə suallara belə cavab verə bilmirdilər. Eyni zamanda onların əksəriyyətinin baxışlarından bilik əldə etmək istəyi hiss olunurdu. Həmin gün mən özüm üçün qərar verdim ki, bu kompromisslərin ola bilməyəcəyi məsələlərdəndir və mən bu məsələ ilə bağlı əlimdən gələni edəcəm! Gənc tələbələrə, min bir əziyyətlə övladlarına təhsil verməyə çalışan valideynlərə, ölkəmizin təhsil sisteminə belə münasibət cavabsız qalmamalıdır!

Bu yaxınlarda ölkədə fəaliyyət göstərən institutlarıdan birinin rəhbəri məni beynəlxalq iqtisdi münasibətlərlə bağlı seminarda çıxış etməyə dəvət etdi.Həmin adama izah etdim ki,fikrimcə, onun təklifi auditoriya o peşəkar hazırlıq səviyyəsində deyil ki, orada mühüm elmi müzakirələr aparılsın. Elmdən, real iqtisadiyyatdan uzaq, populist “tədqiqatlar” aparmaq, qruplaşmalar arasında vəzifə davaları çərçivəsində “elmi müzakirələr” həyata keçirmək yox, elmi inkişaf etdirmək lazımdır ki, peşəkarları tədbirlərə dəvət edəndə həmin tədbirlərdə onlarla heç olmasa fikir mübadiləsi apara biləcək mütəxəssis olsun.

Dünyada baş verən iqtisadi və geosiyasi proseslər kontekstində ölkəmizin ali iqtisadi təhsilindəki, elmindəki problemlərə bu gün göstərə biləcəyimiz biganəlik, qeyri-peşəkarlıq, sabah ölkədə böyük sosial, iqtisadi və siyasi problemlərə səbəb ola bilər. Ölkəmizin ali təhsil sistemində uzun illər ərzində müxtəlif vəzifələrdə çalışmışam(baş laborant, baş müəllim, dosent, professor, dekan müavini, dekan əvəzi, prorektor, kafedra müdiri) və çalışmaqda davam edirəm.Professor zirvəsinə kimi ucalmışam və bu gün Ölkə Prezidentinin və Ölkənin 1-ci Vitse-Prezidentinin rəhbərlikləri ilə respublikada həyata keçirilən sosial-iqtisadi siyasətin dövlət telekanallarında, digər media resurslarında işıqlandırılmasında, təhlilində, zənnimcə, ən çox iştirak edən analitiklərdən, iqtisadçı alimlərdənəm. Dövlətçiliyin nə olduğunu, Prezidentimizin ölkəmizi hansı bəlalardan xilas etdiyini yaxşı bilirəm, çünki gəncliyimdən ictimai həyatdayam.15 yaşımda qızıl medalla orta, 20 yaşımda fərqlənmə diplomu ilə ali məktəbi bitirmişəm, 38 yaşımda isə elmlər doktoru(!), professor olmuşam.

Heç bir xarici universitetdə təhsil almamışam, özümü kifayət qədər hazırlıqlı makroiqtisadçı-analitik hesab edirəm və bunu düşünürəm ki, təbəssüm doğuran reytinqlərlə deyil, çünki bu apriori həmin reytinqlərlə ölçülə bilməz, öz gündəlik ekspert, analitik fəaliyyətimlə sübut etmişəm (misal üçün aktual iqtisadi mövzular üzrə efirdən 2 dəqiqə əvvəl efirə dəvət alaraq canlı efirlərə qoşulmaqla).25 ilə yaxındır ki, Azərbaycan Dövlət İqtisad Universitetində elmi-pedaqoji fəaliiyyətlə məşğulam. Ondan öncə 5 il həmin universitetdə təhsil almışam.

Bunları qeyd etməyimin səbəbi odur ki, zənnimcə, Azərbaycan Dövlət İqtisad Universitetində(UNEC) baş verən proseslər barədə fikirlər bildirməyə haqqım var. Və həmin universitetin durumu məni incitməyə bilməz. Yeri gəlmişkən, zənnimcə, hər bir universitetdə özünun yetişdirdiyi və özünə bağlı, universitetdə karyerasını quran məzunları ilə fəxr edilməlidir. Bu baxımdan, universitet rəhbərinin nəzərinə çatdırıram ki, mən fəxr edirəm ki, Azərbaycan Dövlət İqtisad İnstitutunn( o vaxtkı adı ilə) məzunuyam. Əgər həmin ali məktəbə bu gün “Narxoz” deyərək kimsə müraciət edirsə, bu o adamların, fikrimcə, yaşadıqları dərin komplekslərlə və psixoloji zədələrlə bağlı ola bilər. Bəli, mən bəzilərindən fərqli olaraq, digər ölkədə qaranlıq işlərlə məşğul olub özümü alim kimi təqdim etməmişəm, baş laborantdan professorluq zirvəsinə qədər öz zəhmətim və intellektimlə ucalmışam və hansı kalibr mütəxəssis olmağımı bu gün cəmiyyət də, dövlət və qeyri-dövlət qurumları da, ölkə rəhbərliyi də dəyərləndirir ki, fürsətdən istifadə edib ölkə rəhbərliyinə öz təşəkkürümü bildirməyi özümə borc bilirəm.

Düşünürəm ki, mənə görkəmli alim deyərək dünyanın ən tanınmış alimləri müraciət edirsə, analitik məqalələrimin baxış sayı milyonlarla ölçülürsə ki, alimin mütəxəssis kimi qiyməti və dəyəri də elə budur, məzunu olduğum və 25 ilə yaxın müddət ərzində çalışdığım universitetin rəhbərliyi buna paxıllıq yox, bununla fəxr etməlidir!

Yaponiya hökümətinin yaratdığı Xarici Ticarətin İnkişafı üzrə Təşkilat(JETRO) Azərbaycana texnoloji tutumlu irihəcmli investisiya paketinin yerləşdirilməsi məsələsini müzakirə etmək üçün ölkəmizə 4-5 saatlıq missiya ilə rəsmi nümayəndəsini göndərəndə həmin rəsmi nümayəndə UNEC rektorunu, UNEC-in, zənnimcə, insanlarda təbəssüm doğuran reytinqinin liderlərini axtarmadı, mənimlə məsləhətləşmələr apardı. Fikrimcə, universitet öz fəxri məzunlarını təqdim edəndə, universitetdə reytinqlər tərtib olunanda heç olmasa təbəssümlərin, istehzaların olmaması üçün belə amillər nəzərə alınmalıdır!

Özünü mütərəqqi universitet rəhbəri kimi təqdim etməyə çalışan rəhbər öz universitetinin yetişdirdiyi güclü alimləri ilə fəxr etməlidir. Məmurların şəkillərini vurub onların məzun olmaqları ilə fəxr etmək isə, zənnimcə, növbəti çatışmazlıq kompleksinin, psixoloji zədələrin, özündən daha güclü iqtisadçılara, alimlərə, mütəxəssislərə olan patoloji münasibətin göstəricisi kimi dəyərləndirilə bilər. Düşünürəm ki, özünü çox ağıllı göstərməyə çalışan təhsil ocağının rəhbəri, zənnimcə tamamilə mənasız, tələbələrin, müəllimlərin, digər insanların gülüşünə səbəb olan statuslar deyil, öz professorları, alimləri barədə, onların tədqiqatları barədə fikirlər irəli sürməlidir. Xüsusi ilə, özünün elmdə, iqtisadiyyatda, təhsildə önəmli nailiyyəti, bir dənə də olsun ciddi elmi müzakirəyə səbəb olacaq elmi əsaəri, analitik materialı, ekspert yanaşması olmadığı halda!

Bir də ki, təkəbbür, xırda kin və küsəyənlik rəhbərə yaraşmaz.Zəif mütəxəssis, uğursuz rəhbər, yarıtmaz təşkilatçı, fikrimcə, çalışmalıdır öz üzərimdə işləsin, peşəkarlarla məsləhətləşsin, öyrənsin, onlardan qorxub qaçıb gizlənib, ətrafına ən zəifləri yığıb onların üstünə qışqıraraq, özünü təsdiq etməyə çalışıb özünü gülünc vəziyyətə salmasın. Çox təəssüflə qeyd etmək istəyirəm ki, ölkəmizin ali iqtisadi təhsil sisteminin flaqmanı olmalı olan UNEC, fikrimcə, bu günkü reallıqlara və çağırışlara cavab verməyən, olduqca primitiv üsullarla idarə edilir!

Hesab edirəm ki, Azərbaycanın ali iqtisadi təhsil sisteminin dünyada baş verən proseslərə nəinki effektiv reaksiyasını, qeyd etdiyimiz proseslərin təhlilinə belə yaxın düşməsinin şahidi ola bilmirik. Dünya iqtisadiyyatı son onilliklərin ən çətin və hələ çıxış nöqtəsi üzərində aparıcı "beyin mərkəzlərinin" "baş sındırdığı" struktur böhranını yaşadığı zaman UNEC-də dərslərin əvvəlində və sonunda zəngin çalınmaması qərarı verilir və geniş müzakirə edilir. 21-ci əsrdə... Bu acınacaqlıdır. Hesab edirəm ki, monetarizmin və ultraliberalizmin ən bəsit,primitiv, artıq heç bir mütərəqqi ali iqtisadi təhsil sistemlərində ciddi qəbul edilməyən tədris materialları ilə tədris vəsaitlərinin doldurulması, abstrakt, reallıqda müasir iqtisadiyyatla əlaqəsi olmayan Fişer düsturu ilə, dəfələrlə effektivsiz olması sübut edilmiş Fillips əyrisi ilə, real iqtisadiyyatda lazım olunan tətbiqi effekti olmayan abstrakt ekonometrik modellərlə 21-ci əsrdə iqtisadçı hazırlamaq primitivizm, qeyri-peşəkarlıq olmaqla yanaşı, çox zərərlidir! Zənnimcə, UNEC-də məsələni qəlizləşdirən həm də rəhbərliyin təkəbbürlü olması amilidir! Təkəbbürlük istənilən halda zərərlidir, amma tələb olunan peşəkarlıq olmayanda, onun zərərli olması dəfələrlə artır və onu nümayiş etdirən adam özü xoşagəlməz vəziyyətə düşür. Etiraf edim ki, son zamanlar UNEC rəhbərliyində təmsil olunan bir çox insan mənimlə əlaqə saxlayaraq, mənə bildirməkdə davam edirlər ki, UNEC-dəki vəziyyətlə bağlı fikirlərimi, təhlillərimi tam dəstəkləyirlər.

Yeri gəlmişkən, komanda daxili dərin fikir ayrılıqları menecment üçün pis haldı. Amma istənilən halda məni UNEC-in rəhbər işçiləri arasındakı münasibətlər deyil, ölkəmizin ali iqtisadi təhsil sistemində, iqtisad elmindəki vəziyyət maraqlandırır. O vəziyyət isə, zənnimcə, heç də ürəkaçan deyil! Və əminəm ki, UNEC rəhbərliyi buna görə müvafiq qaydada məsuliyyət daşımalıdır! Azərbaycan iqtisadiyyatı fənninin tədrisinin xeyli dərəcədə azalması(bu məqalənin müəllifinin israrlı təkidlərindən sonra bir sıra ixtisaslarda bərpa olundu, amma heç də bütün ixtisaslarda yox), bakalavriat səviyyəsində dünya iqtisadiyyatı ixtisasının ləğv edilməsi barədə yazmışdım. UNEC-də ən böyük problemlərdən biri odur ki, UNEC-də tətbiq edilən tədris prosesi çərçivəsində iqtisadiyyatın bir çox istiqamətləri, ümumiyyətlə, fikrimcə, tədris prosesindən kənarda qalmaqdadır! Bəhs edilən problemin bir qədər də dərinləşdirici məqamı odur ki, doktorantura, magistratura, bakalavriat arsında tarazlılıq, zənnimcə, yoxdur. Doktoranturada, magistraturada və yaxud MBA proqramında qəbulu olan ixtisas üzrə bakalavriatda uyğun ixtisasın olmaması tədris prosesini, fikrimcə, darmadağın edir!

Dünya iqtisadiyyatı ixtisası bu məsələdə bir misaldır! Sanki binanın üst mərtəbələri tikilir, alt mərtəbələri isə sökülür… UNEC rektorunun sosial şəbəkədə paylaşdığı "Çevrilmiş təhsil" budur bəlkə? Digər tərəfdən, beynəlxalq ticarət və loqistika ixtisası tədris prosesinə daxil edilib, amma ticarət ixtisası ləğv olunub. Sual edilir: ticarət olmadan beynəlxalq ticarət mövcud ola bilərmi? Əgər belə qərarlar qəbul edənlər düşünürlərsə ki, dünya iqtisadiyyatı elə beynəlxalq ticarətdən ibarətdir və müvafiq qaydada ixtisasın əvəz edilməsini reallaşdırmaq olar, bu onların, peşəkarlığı barədə, fikrimcə, böyük suallar ortaya qoyur, çünki dünya iqtisadiyyatında transsərhəd kapital hərəkətinin hansı rola malik olduğunu necə diqqətdən kənarda qoymaq olar?

Tədiyə balansının strukturundan o adamların xəbərləri var? Eyni zamanda, xarici ticarətin istər idxal, istər ixrac seqmentlərində olsun, məntiqi nəticəsi, məntiqi yekunu daxili ticarət olmurmu? Təkrar istehsalın istehlak mərhələsi barədə UNEC rəhbərliyində məlumat yoxdur? Məncə, bilmədiyinin göstəricisini həm də aydın şəkildə ona görə bilərik ki, istehlak bazarının idarə edilməsi fənni ümumiyyətlə müvafiq tədris planına salınmayıb(!). Bəlkə o səbəbdən ki, həmin fənn üzrə dərsliyin müəllifi Professor Elşad Məmmədovdur? UNEC-də Biznesin idarə edilməsi ixtisası üzrə mütəxəssis hazırlığı aparılmaqdadır. Lakin hansısa səbəbdən eyniadlı kafedra olduğu halda bu ixtisas tamamilə başqa kafedrada, Biznes və loqistika kafedrasında tədris edilir! Beynəlxalq ticarətin tədrisi isə hansısa, zənnimcə, Ginnesin rekordlar kitabına düşə biləcək sıçrayışla "Beynəlxalq iqtisadiyyat" adlanan kafedrada deyil, Biznes və logistika kafedrasında tədris edilir! UNEC-də bir kafedra da var, adı "İqtisadiyyatdır"! Bu adda kafedra olduğu halda başqa iqtisadi kafedraya ehtiyac varmı? UNEC-də eyniadlı fakultə də var! Bəs o biri fakultələrdən iqtisadiyyatla bağlı olanları yoxdur? Əlbəttə ki, var! Amma, düşünürəm ki, UNEC-in hazırkı halında buna təəcüblənməyə dəyməz! UNEC-də bir kafedra da var! Adı İqtisadiyyat və texnoloji elmlərdir! Yeri gəlmişkən,məncə, belə adı kütləvi oxucular üçün nəzərdə tutulan kitablara və yaxud sənədli filmlərə qoymaq olar, kafedraya deyil! Fikrimcə, kafedranın belə adlandırılması sadəcə diletantlıqdır! Çünki, tutaq ki, bu kafedradan bir alim iqtisadiyyat üzrə dissertasiya yazır! İqtisadiyyat üzrə dissertasiyanın, digər elmi işin müzakirəsində texnoloji elmlərin nümayəndələri necə rəy bildirə bilərlər?

Fikrimcə, acınacaqlı olmasa komik adlanmalı olan "müdrik" idarəetmə qərarları bununla qətiyyən bitmir! UNEC-də rus bölməsində eyni fənnləri, misal üçün, mikroiqtisadiyyatı götürək və yaxud makroiqtusadiyyatı, eyni ixtisasları, misal üçün iqtisadiyyat ixtisasını, bir adda kafedra tədris edir, konkret olaraq, Tətbiqi iqtisadiyyat, amma azərbaycan bölməsində həmin fənnləri başqa adda kafedra, konkret olaraq İqtisadiyyat kafedrası! Belə çıxır ki, rus dilində makroiqtisadiyyat və mikroiqtusadiyyat fənnləri iqtisadiyyatda tətbiqi effektə malik olur, azərbaycan dilinə tərcümə olunanda fənn tətbiqi effektini itirir? Digər misal: rus dilində menecment ixtisasını tədris edən kafedra Tətbiqi iqtisadiyyat adlanır , azərbaycan dilində Biiznes və loqistika! Rus dilində mühasibat uçotunun tədrisinii yenə də Tətbiqi İqtisadiyyat kafedrası aparır, azərbaycan dilində Maliyyə və mühasibatlıq kafedrası! UNEC-də, beləliklə, rus dili , fikrimcə, öz yeni üstünlüyünü əldə edib! Bir sıra ixtisaslar UNEC-də rus dilinə tərcümə ediləndə, fikrimcə, qəflətən, tətbiqi effektə malik olurlar! Məndə və eləcə də, zənnimcə, bir çox oxucularda belə sual yaranmaya bilməz: UNEC rəhbərliyi bilmir ki, rus dili çox zəngindir və rus dilində mühasibat və çoxlu sayda digər sözlərin tərcüməsi var! Umumiyyətlə, hesab edirəm ki, UNEC rektorunun idarəetmə fəllsəfəsini ölkədə geniş tətbiq etsək, ölkə təhsilində elə əsl inqilab etmək olar. Belə ki, təsəvvür edin ki, hər universitet özündə olan rus bölməsinin adını universitetin istiqamətinə görə Rus Məktəbi qoyur. Misal üçün, Tibb Universitetinin rus bölməsi Rus Tibb Məktəbi,Texniki Universitetinin rus bölməsi Rus Texniki məktəb, Memarlıq və İnşaat Universitetinin rus bölməsi Rus Memarlıq və İnşaat Məktəbi, Pedagoji Universitetin rus bölməsi isə Rus Pedagoji Məktəbi! Məncə, əlavə şərhə ehtiyac yoxdur..... Hələ mən UNEC-də türk və ingilis dilindəki tədrisdən yazmıram! Onu da nəzərə alaq ki, kafedranın işi yalnız tədris prosesi ilə bağlı deyil! Bəs kafedraların elmi fəaliyyəti? Elə çıxır ki, rus dilində tədris edən müəllim marketinq üzrə dissertasiya yazarsa həmin müəllimin dissertasiyasının müzakirəsində mühaisbat ixtisasından olan müəllimlər iştirak edəcək və onlar müvafiq qaydada qərarların qəbul edilməsində səsvermə hüququna malik olacaqlar! Bu məntiqlə tibb universitetində rus bölməsində tədris aparan kardiocərrahiyə üzrə alimin dissertasiyasının müzakirəsində rusdilli stomatoloqlar iştirak edərək dissertasiya barədə müvafiq qərarın qəbul edilməsi ilə bağlı səsvermə hüququna malik ola bilərlər?

Bu, zənnimcə, fəlakətdir! UNEC rəhbərliyi universiteti, ölkənin iqtisad elmini zarafat və lağ mövzularına çevirməməlidir! Bu uçurum deyilmi? UNEC rəhbərliyi bunun adını islahat qoyub? Bu ölkənin ali iqtisadi təhsilinin məhvi deyilmi? Bu cinayət deyilmi? Mən və digər iqtisadçı alimlər bunu dəstəkləməliyik? Bu qədər sadə suallara cavab tapmaq mümkün olmadığı halda hansısa beynəlxalq reytinqlərin arxasınca qaçmaq, hansısa xarici jurnallarda məqalələri reklam etmək, həmin məqalələri müəllimlik üçün vacib şərt etmək , ümumiyyətlə, ali iqtisadi təhsil sistemi üzərində çox təhlükəli eksperimentlər aparılması demək deyilmi? Həm də xarici jurnallarda məqalələri nəşr edilən bütün adamları "böyük alim" adlandırıb irəli çəkənlərə məsləhətim odur ki, çox pafoslu bəyanatlar verməsinlər! Həmin məqalə "müəlliflərinin" həmin məqalələrdən nə dərəcədə məlumatlı olduqlarını dəqiqləşdirmək pis olmazdı! Sosial şəbəkələrdə gedən "məqalə ticarəti" barədə yəqin ki iqtisadi təhsildə rəhbər vəzifələrdə olanlar xəbərsiz deyillər! Bir də unutmayaq ki, iqtisadiyyat ictimai elmdir və iqtisad elmində yazılan məqalələr, konfrans tezisləri ictimai inkişafa, ölkəmizin sosial-iqtisadi rifahına xidmət etməlidilər, Ölkə Prezidentinin rəhbərliyi ilə həyata keçirilən iqtisadi siyasətə müvafiq ekspert dəstəyi, elmi-nəzəri, metodoloji baza təqdim etməlidilər! Amma , fikrimcə, bunun biz şahidi olmuruq!

O məqalələrin, konfrans tezislərinin hansıları ölkə iqtisadiyyatının idarə edilməsində müsbət tətbiqi effekt verib? Daha bir ciddi boşluğu diqqətə çatdırmamaq olmur: ölkədə bank işi ixtisası bakalavr səviyyəsində ləğv edilmişdir! Ancaq MBA prorqramında bank və sığortanın idarə edilməsi ixtisası UNEC-də tədris edilir. Botaniklər, filoloqlar bank işi üzrə mütəxəssis olacaq? Bank işi ixtisasını bakalavriatda saxlamaqla magistraturada bank işi üzrə mütəxəssis hazırlamaq olmazdımı? Maliyyə ixtisasının bakalavr səviyyəsində qalmasına gəldikdə, məncə, UNEC rəhbərliyi dövlət maliyyəsi ilə korporativ maliyyə arasında fərqin olmasını belə bilmir. İxtisasın adını maliyyə qoymaqla, şaxələndirmə aparmamaqla maliyyə sektoru üçün, xüsusi ilə dövlət maliyyə sektoru üçün hansı problemin yaradılmasından iqtisadi təhsilin rəhbərlərinin məlumatları varmı? Dõvlət maliyyəsinin prioritetləri investisiya siyasəti, büdcə, fiskal siyasətdir, korporativ maliyyə bu məsələləri görmür axı! Sonra....Düşünürəm ki, UNEC rəhbərliyi sosial işlə sosial siyasəti bir birindən fərqləndirə bilmir! Sosial siyasəti, dövlət tərəfindən əhalinin geniş təbəqələrinin sosial rifahının yüksəldilməsinə istiqamətlənən makroprioriteti sosial cəhətdən həssas, fiziki imkanları məhdud insanlara göstərilən xidmətlərdə fokuslaşan sosial xidmətlərlə məhdudlaşdırmağa nə ad vermək olar? Bax belə, dərin, bir tərəfdən gülməli, digər tərəfdən isə kədərlənməli olan problemlər var ki, onların mövcudluğu ali iqtisadi təhsil sistemimizin milli iqtisadiyyatımızın inkişaf göstəricilərinə açıq-aşkar uyğun olmamasının, fikrimcə, bilavasitə göstəricisidir! Eyni zamanda, əgər ölkə başçısı ölkədə sənayeni, kənd təsərrüfatını prioritet inkişaf istiqamətləri görərək, respublikada sənaye ili, kənd təsərrüfatı ili elan edirsə, UNEC-də həmin kafedralar ləğv edilir! Kafedralarla bağlı məsələ UNEC-də xüsusilə ağrılı mövzulardandır!

İqtisadiyyat günü gündən mürəkkəbləşir, UNEC-də kafedralar birləşir! Misal üçün, xarici ticarət üzrə elmi iş yazılarsa, seminar keçirilərsə mühasibat üzrə alim müzakirəyə təqdim olan işin, məsələnin xarici ticarətə uyğun olub olmamasını müəyyən etmək kompetensiyasına necə malik ola bilər? Ümumiyyətlə, kafedraların formalaşması məsələsi, zənnimcə, UNEC-də böyük problemdir. Bir sıra nəticələrə nəzər salaq. İqtisad universitetində yaradılan kafedraların adları: İqtisadiyyat(rus dilində), sonra adı oldu Tətbiqi İqtisadiyyat. Suallar: dünyanın hansı ölkəsində kafedranın adı tədris dili ilə şərtlənir? Tətbiqi olmayan iqtisadiyyat var? Onda o məntiqlə Tətbiqi olmayan iqtisadiyyat, Abstrakt iqtisadiyyat və yaxud Sxolastik İqtisadiyyat kafedrası niyə yaradılmasın? Məndə belə fikir formalaşıb ki, UNEC-də aparılan islahatların ən mühüm nəticələrindən biri odur ki, investisiya prosesi, sənayeləşmə, büdcə-vergi siyasəti, pul-kredit siyasəti, enerji siyasəti(iqtisadiyyatın “bel sütunu”, xüsusən də milli iqtisadiyyatımızın xüsusiyyətlərini nəzərə aldıqda ölkəmizdə, amma UNEC-də enerji sektorunun iqtisadiyyatı üzrə kafedra belə yoxdur, halbuki ölkə ixracatının təxminən 95 faizini, büdcə daxilolmalarının isə təqribən 50 faizindən çoxunu məhz həmin sekor təmin edir), kənd təsərrüfatı, turizm kimi istiqamətlər UNEC-in "radarlarından" kənardadır. Düşünürəm ki, bu acınacaqlıdır.......

Bəs görək UNEC-də kafedraların formalaşması, professorların, dosentlərin işdə qalıb qalmaması harada, kimin tərəfindən və necə müəyyən edilir? Bu tip əksər qərarlar UNEC-in elmi şurasında müzakirəyə çıxarılır! O elmi şurada ki, UNEC-in saytında olan məlumata görə onun 41 üzvündən cəmi 2-i elmlər doktorudur! O şurada ki, universitetdə mövcudluğu belə fikrimcə, məntiqsiz olan bölmələrin rəhbərləri təmsil olunur, amma əksər professorlara yer tapılmadı! Həmin elmi şurada ki, kafedraların formalaşdırılması, professorların, dosentlərin UNEC-də işləyib, işləməməsi məsələlərinə baxılır, UNEC-in elmi istiqamətdə, tədrisin inkişafı istiqamətində fəaliyyəti müzakirə edilir! Elmi şurada daxili auditlə bağlı qurum kimi universitet üçün, fikrimcə, tamamilə lazımsız qurumların rəhbərlərinin təmsil edilməsinə təbəssümsüz yanaşmaq, düşünürəm ki, olmur! Fikrimcə, UNEC-də yerinə yetirilən və müdafiəyə təqdim edilən dissertasiyaların monitorinqi və təhlili aparılmalıdır və bu istiqamətlər üzrə yeni ictimai nəzarət və ekspert dəyərləndirilmələri mexanizmlərinin təşkili və tətbiqi barədə düşünürəm! Bir məqamı da qeyd edim! Hər bir alimin, xüsusilə elm və təhsil ocağının rəhbərinin elmi dərəcəsi və elmi adı ilə bağlı, həmin elmi dərəcə və adın necə alınması ilə bağlı aydınlıq, dəqiqlik, zənnimcə, mütləq olmalıdır! Bu məsələ ilə bağlı müvafiq araşdırmalar aparmaq niyyətindəyəm! Eyni zamanda, daha bir çox ciddi məsələyə də toxunmaya bilmərəm!

Düşünürəm ki, xaricdə oturub, Azərbaycan barədə, ölkəmizin Müzəffər Ali Baş Komandanı barədə, Azərbaycan iqtisadiyyatı barədə yolverilməz fikirlər bildirən "ekspertlərə" qarşı UNEC rəhbərliyi tərəfindən müşahidə edilən, fikrimcə, loyal və çox tolerant adlandıra biləcəyimiz münasibətdə aidiyyatı olaraq araşdırılmalıdır! Hesab edirəm ki, işıqlandırdığım problemlər ölkədə ali iqtisadi təhsillə, iqtisad elmi ilə bağlı olan problemlərin yalnız bir hissəsidir! Eyni zamanda, qeyd etmək istəyirəm ki, son zamanlar bu problemlərlə bağlı bildirdiyim fikirlər cəmiyyətdə müsbət qarşılanıb! Mənə edilən çoxsaylı təşəkkürlər bunun konkret göstəricisidir! Əminliklə bildirirəm ki, həm ictimai müstəvidə, həm də dövlət qurumları səviyyəsində belə məsələlər qaldırılmalıdır, müvafiq müzakirələr təşkil edilməli, qərarlar qəbul edilməlidir! Mən bir mütəxəssis kimi bu problemlərin ciddiliyini nəzərə alaraq onların müvafiq müstəvilərdə müzakirələrinin təşkilində bilavasitə iştirak erməyə hazıram. Çünki ali iqtisadi təhsil sistemindəki, iqtisad elmindəki problemlər olduqca dərinləşib və düşünürəm ki, həmin məsələlərlə bağlı məsuliyyət daşımalı olan insanlar mütləq məsuliyyətlərini daşımalıdılar və daşıyacaqlar!

Ancaq bir reallıqda, hesab edirəm, mövcuddur ki, ölkənin ali iqtisadi təhsil sisteminin, iqtisad elminin hazırkı vəziyyətdən çıxarılması mürəkkəb, çətin proses olacaq! Yeri gəlmişkən, bu məqaləni hazırladığm zaman UNEC-dən mənə məlumat çatdırıldı ki, UNEC rektoru elm və təhsil naziri vəzifəsinə təyin olunacağını gözləyir. Mən bu məlumatlara istehza ilə yanaşıram, çünki İqtisad Universitetinin 9 ilə yaxın müddət ərzində çəkdiyi ölkə təhsilinə, məncə, kifayət edər. Yoxsa, zənnimcə, UNEC-in hazırkı rektoru elm və təhsil naziri olarsa, Azərbaycan univeristetlərində kimyaçıların fiziklərlə, zooloqların politoloqlarla, iqtisadçıların botaniklərlə, heyvandarlıq üzrə mütəxəssislərin tarixçilərlə bir kafedralara yiğılacağı, ölkədə tədrisin hansı dildə aparılmağından asılı olaraq rus, ingilis, türk, fransız tibb, texniki, memarlıq, inşaat, pedagoji, neft məktəbləri və bu tip digər fantastik məsələlər reallığa çevrilə bilər.

Fikrimcə, bununla təhsil və elmimizi Ginnesin Rekordlar Kitabına daxil etmək mümkün olar və rus, ingilis, türk, fransız və digər milləttləri təmsil edən alimləri dəhşətli duruma və şoka gətirə bilərik. Amma hər halda nazir təyinatı ilə bağlı məsələlər Ölkə Prezidentinin səlahiyyətindədir və düşünürəm ki, ölkə başçısı nəyin nə vaxt və necə edəcəyini yaxşı bilir! Eyni zamanda bildirmək istəyirəm ki, qeyd etdiyim fikirlər qəti şəkildə UNEC-də mənə qarşı olan hansısa təzyiqlə və yaxud UNEC rektorundan hansısa vəzifə istəməyimlə bağlı deyil!

Qətiyyətlə bildirirəm ki, UNEC- dən kiminsə mənə təzyiq etməsi mümkünsüzdür! O ki qaldı vəzifə məsələsinə, mənim hazırda mövcud olan statusum çərçivəsində, UNEC rektorunun mənə verə biləcəyi heç bir vəzifə, sözsüz ki, mənim üçün maraq kəsb edə bilməz! Problemləri işıqlandırmağımda, qaldırmağımda məqsəd ölkədə iqtisad elminin, iqtisadi təhsilin səviyyəsinin yüksəldilməsindən, milli iqtisadiyyatımıza lazım olan dəstəyin verilməsinə nail olunmasından ibarətdir!

FAKTİNFO.AZ