Abşeron rayonunun sürətli məskunlaşma səbəbindən əvvəlcə qəsəbəyə çevrilən, sonra da şəhər statusu alan Xırdalan kəndi ərazisində qanunsuz tikintilər davam etməkdədir. Redaksiyamıza verilən məlumata görə bir qrup dəllal (maklerlər) tərəfindən qanunsuz olaraq tikilən çoxmərtəbəli apartman binalarının sayı son vaxtlar yağışdan sonra çıxan göbələklər kimi artmaqdadır. Maklerlər əvvəlcə ayrı-ayrı vətəndaşlardan fərdi yaşayış təyinatlı 5-6 sot, bəzən daha çox torpaq sahələri satın alırlar. Sonra da həmin torpaq sahələrinin üzərində binaların tikintisində qanunla yol verilən tikinti əmsalları pozularaq özüllər qazılır, necə gəldi layihələndirilən inşaat işləri Dövlət Şəhərsalma və Arxitektura Komitəsi ilə razılaşdırılmadan həyata keçirilir. İnşa olunan apartmanların hündürlüyü 12 metri aşır, özülləri qazılanda qonşu evlərin bünövrələri laxlayır, həmçinin sakinlər narahat olurlar.

“Kimlərsə bəlli yollarla normal yaşayış evinin inşası üçün icazə alır, bir müddət sonra isə həmin yerdə 80-100 ailənin yaşayacağı, 7-8 mərtəbəli binalar peyda olur. Bu binaların ətrafı yaşayış evlərindən ibarətdir. İş o həddə çatıb ki, insanlar öz evlərinin həyətində dincələ, istirahət edə bilmirlər. Çünki apartmanlar birbaşa bu həyətlərə baxır” – deyə şikayətlərdə vurğulanır. Həmin torpaq sahələrində tikinti işlərinin dayandırılması və müvafiq tədbirlərin görülməsi üçün Abşeron Rayon İcra Hakimiyyətinə və FHN-nin Tikintidə Təhlükəsizliyə Nəzarət Dövlət Agentliyinə müraciətlər ünvanlansa da, baxan yoxdur.

Bakının 14 kilometrliyində yerləşən Xırdalan şəhərində bu cür xaotik şəkildə məskunlaşmanın artmasına rəvac verilməsi yerli sosial infrastrukturu da həddən ziyadə yükləyir: Uşaq bağçaları, məktəblər, poliklinikalar sayı sürətlə artan əhaliyə xidməti çatdırmır, hərəkət intensivliyi yüksələn yolları böyütmək mümkün olmur, kanalizasiya problemi dərinləşir. Həmçinin, ekoloji tarazlıq pozulur. Öz şəxsi, qrup maraqlarına xidmət edən işbazlar aldıqları torpaq sahələrində olan meyvə ağaclarını da kökündən qoparıb atırlar. Xırdalan bələdiyyəsi və Rayon İcra Hakimiyyəti baş verən bu xaosa göz yumur.

Dəryaz qəzetinə daxil olan məlumata görə, hazırda Bəhruz adlı şəxs “Kristal – 2” massivi ilə üzbəüz nahiyədə, “Araz-Market”in qarşısında, ondan 100 metr aralıda (köhnə təcili yardım stansiyasının yanında) İlham Yaşar oğlu Əliyev adlı digər şəxs, ondan 100 metr arxada (uşaq bağçasının qarşısında) Mənsur adlı üçüncü şəxs tikintiyə hazırlıq işləri aparırlar. Bildirilir ki, indiyədək Xırdalanda 100-ə yaxın belə evlər tikmiş bu adamlar hazırda qeyd olunan ünvanlarda ağacları kəsməklə məşğuldurlar. Yəqin ki, tikinti işlərinə yaxın bir ay ərzində, ya da dekabrın sonunda başlanacaq. Hal-hazırda həmin ünvanlarda katlavanlar qazılır. Həmçinin qeyd olunur ki, adları çəkilən şəxslər heç bir tikinti şirkətini təmsil etmirlər. İşlətdiyi işçilərlə heç bir əmək müqaviləsi bağlamayıblar və heç bir təhlüsizlik qaydaların riayyət olunmur.

Xatırladaq ki, keçən il Xırdalan şəhərinin Şıxəli Qurbanov küçəsi -38 ünvanda qanunsuz olaraq çoxmənzilli apartman binasının tikintisinin aparılması ciddi narazılığa səbəb olmuş, onlarla sakin etiraz əlaməti olaraq qanunsuz tikintinin dayandırılmayacağı təqdirdə Bakı-Sumqayıt magistral yolunu bağlayacaqlarını, daha sonra Prezident Administrasiyası önündə etiraz aksiyası keçirəcəklərini bildirmişdilər. Bu cür qanunsuz əməllərə görə, Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsi Abşeron Rayon İcra Hakimiyyətinin vəzifəli şəxslərinə qarşı əməliyyat keçirmişdi. İcra hakimiyyəti Memarlıq və tikinti şöbəsinin müdiri (baş memar) Akif Əliyev, sabiq başçı İ.Gülməmmədovanın bacısı oğlu Babək Alıyev və Tural Ağaməmmədov həbs olunmuşdular.
Mövzuya qayıdacağıq.

Deryaz.az

“Sumqayıtda yaşayış evində ticarət obyekt açırlar. Ağacları artıq yarıya kimi kəsiblər”.

AzToday.az xəbər verir ki, Sumqayıt şəhəri, 2-ci məhəllə. Polad Həşimov küçəsi, bina 11/12 ünvanından bu barədə “Ecofront”-a məlumat veriblər.

“Ecofront” müvafiq qurumlardan ağacları bu cürə kəsən və zədələyənlərin ağır cəzalandırılmasını tələb edib.

Görüntüləri təqdim edirik:

Kənd Təsərrüfatı Nazirliyinin Heyvandarlıq Elmi Tədqiqat İnstitutunun Arıçılıq Mərkəzi 2022-ci ilin noyabr ayının 25-də yekun vurduğu satınalma ilə bağlı məlumat vermişdik.

Həmin məlumatda Arıçılıq Mərkəzinin eyni gündə yekun vurğudu "Bitki və toxumların" və "Elmi-Tədqiqat işləri”nin satın alınması lotları üzrə sifarişçi olduğu satınalmada qalib elan edilən təşkilatların hüquqi ünvanlarının qonşu ünvanlarda olması, həmçinin bu təşkilatların fəaliyyət profilləri barədə açıq internet resurslarında heç bir məlumatların olmamasının şübhəli məqamlara yol açdığı deyilirdi.

Arıçılıq Mərkəzi Qlobal.az məsələ ilə bağlı verdiyi açıqlamada eyni gündə qalib elan etdikləri təşkilatların hüquqi ünvanlarının qonşu ünvanda yerləşməsini təsadüf olduğunu qeyd edirdi.

Mahir Hacıyev, Heyvandarlıq Elmi-Tədqiqat İnstitutunun direktoru

Məsələ ilə bağlı Arıçılıq Mərkəzinin nəzdində fəaliyyət göstərdiyi Heyvandarlıq Elmi Tədqiqat İnstitutundan mövqe almaq istəsə də, İnstitutut rəhbərliyi bu barədə susmağa üstünlük verdi.

Elnur Bağırov, Antiinhisar və İstehlak Bazarına Nəzarət Dövlət Xidmətinin rəis müavini

Qlobal.az satınalmada olan şübhəli məqamlara aydınlıq gətirilməsi üçün İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət ünvanlayıb. Xidmətin rəis müavini Elnur Bağırovun müraciətimizə verdiyi cavabda deyilir:

""Dövlət Satınalmaları Haqqında" Azərbaycan Respublikası Qanununun 8.1-ci maddəsinə əsasən dövlət satınalmalarını tənzimləyən normativ hüquqi sənədlərdə göstərilən hallar istisna olmaqla, istənilən rezident və qeyri-rezident hüquqi və ya fiziki şəxslər yaxud hüquqi şəxslər birliyi dövlət mənsubiyyətindən asılı olmayaraq, Azərbaycan Respublikasında keçirilən dövlət satınalma prosedurlarında iddiaçı kimi iştirak edə bilərlər.

Əlavə olaraq bildiririk ki, ayrı-ayrı müsabiqələrdə iştirak edən malgöndərənlərin (podratçıların) hüquqi ünvanlarının yaxın ərazilərdə yerləşməsi dövlət satınalmalarını tənzimləyən hər hansı normanın pozuntusu hesab edilmir. Həmçinin Qanunun 10.2-ci maddəsinə əsasən satınalma prosedurları haqqında hesabatın bu Qanunun 10.1.1 və 10.1.2-ci maddələrində göstərilən hissəsi, şəraitdən asılı olaraq tender təklifi, oferta və ya kotirovka aksept edildikdən, yaxud satınalma müqaviləsinin bağlanması ilə nəticələnməyən satınalma prosedurları qurtardıqdan sonra sorğu əsasında marağı olan şəxsə satınalan təşkilat tərəfindən verilə bilər. Göstərilənləri nəzərə alaraq, Arıçılıq Mərkəzi tərəfindən keçirilmiş müsabiqələrdə iddiaçı olaraq qeydə alınmış malgöndərənlər (podratçılar) barədə məlumatın əldə olunması üçün satınalan təşkilata müraciət etməyiniz tövsiyə olunur".

Qeyd edək ki, Arıçılıq Mərkəzinin 2022-ci ilin noyabr ayının 25-də "Bitki və toxumların" və "Elmi-Tədqiqat işləri”nin satın alınması lotları üzrə yekun vurduğu satınalmanın ümumi məbləği 23.985 manat təşkil edir.

Bu satınalmada "COSMOS-RA" və "KƏNAN KM" Məhdud Məsuliyyətli Cəmiyyətləri qalib elan edilib.

"COSMOS-RA" Məhdud Məsuliyyətli Cəmiyyəti 2019-cu ilin noyabr ayında dövlət qeydiyyatına alınıb. Bu MMC-nin nizamnamə kapitalı 5 manat, qanuni təmsilçisi isə Allahverdiyev Ruhin Səxavət oğludur. "COSMOS-RA" MMC-nin hüquqi ünvanı Bakı şəhəri Qaradağ rayonu, Müşfiqabad qəsəbəsi ev 9, mənzil 56 ünvanıdır. "COSMOS-RA" MMC-nin fəaliyyət profili, lisenziyaları barədə açıq internet resurslarında heç bir məlumata rast gəlinmir.

Arıçılıq Mərkəzinə Elmi-Tədqiqat işləri üzrə xidmət edəcək "KƏNAN KM" Məhdud Məsuliyyətli Cəmiyyəti 2021-ci ilin mart ayında dövlət qeydiyyatına alınıb. Bu MMC-nin nizamnamə kapitalı 10 manat, qanuni təmsilçisi isə Eyvazov Kamil Mirələm oğludur. "KƏNAN KM" MMC-nin hüquqi ünvanı Arıçılıq Mərkəzinin sifarişçi olduğu digər satınalmada qalib elan edilən "COSMOS-RA" MMC-nin hüquqi ünvanı ilə qonşuluqda - Bakı şəhəri Qaradağ rayonu, Müşfiqabad qəsəbəsi ev 12, mənzil 72 ünvanında yerləşir.

Bu MMC-lərin qanuni təmsilçilərinin əslən Cəbrayıl rayonundan olduğu, Biləsuvar rayonu ərazisində məcburi köçkünlər üçün inşa edilmiş qəsəbələrdə yaşadıqları, MMC-lərin daha çox şübhəli satınalmalarda iştirak etdiyi barədə mətbuatda bir sıra məlumatlar dərc edilib.

Tamerlan Yusif-zadə, Hesablama Palatasının İnformasiya azadlığı üzrə məsul şəxsi

Qlobal.az Arıçılıq Mərkəzinin 2021-2022-ci illər üzrə fəaliyyəti ilə bağlı Hesablama Palatasında münasibət öyrənib. Hesablama Palatasının İnformasiya azadlığı üzrə məsul şəxsi Tamerlan Yusif-zadənin açıqlamasında deyilir: "Bildiririk ki, Hesablama Palatası tərəfindən Kənd Təsərrüfatı Nazirliyinin Heyvandarlıq Elmi-Tədqiqat İnstitutunun Arıçılıq Mərkəzində 2021-2022-ci illər üzrə audit aparılmamışdır".

Samir Mahmudov, Arıçılıq Mərkəzinin rəisi vəzifəsinin müvəqqəti icraçısı

Xatırladaq ki, Arıçılıq Mərkəzi Gəncə şəhərində fəaliyyət göstərir. Mərkəzin tabeliyində təsərrüfat şöbəsi, balverən özül və eksperimental-istehsalat Faxralı Təcrübə şöbəsi, damazlıq işinin təşkili laboratoriyası və arıçılıq məhsullarının tədarükü və analizi laboratoriyası var.

Arıçılıq Mərkəzinin rəisi vəzifəsini 2020-ci ilin mart ayından müvəqqəti icra edən Samir Mahmudovdur.

Qlobal.az

Öncə onu qeyd edək ki, uzun illər ölkəmizdə səhiyyə sisteminə Səhiyyə Nazirliyi rəhbərlik edib. Bir neçə il öncə İcbari Tibbi Sığorta Dövlət Agentliyinin nəzdində “Tibbi Ərazi Bölmələrini İdarəetmə Birliyi” (TƏBİB) yaradıldı. Və beləcə ara qarışdı...
Bir neçə ay öncə redaksiyamıza müraciət edən xəstələr deyirdi ki, qalmışıq Səhiyyə Nazirliyi ilə TƏBİB-in arasında... Bütün bunlar azmış kimi, TƏBİB-dən sonra, Allah qoymasa, rayonlarda Tibb Mərkəzləri yaradıldı.
Təsəvvür edirsiniz, rayon ərazisindəki doğum evi, diş poliklinikası, uşaq xəstəxanası, nə bilim ginekologiya-filan hamısını birləşdirib bir nəfərə, yəni Fazil Alməmmədov kimi Tibb Mərkəzlərinin direktorlarına tabe etdilər.
Görəsən, Fazil Alməmmədovun ginekologiyadan, yaxud stomatologiyadan başı çıxırmı..?
Söhbət təkcə Fazil Alməmmədovdan, yaxud hansısa Verməmmədovdan getmir ee...söhbət problemdən gedir. Yadıma maraqlı bir olay düşür.
Sovet dövründə Bayıldakı Doğum Evini V.İ.Leninin adına vermişdilər. Sonra kimlərsə bunlara başa saldı ki, ay gerizəkalılar, Lenin hara, Doğum evi hara..? Sonra səhvlərini düzəldib, Doğum evini Leninin arvadı Hadejda Krupskayanın adına verdilər. Yenə onlara başa saldılar ki, Nadya ömrü boyu doğmayıb. Müstəqillik dönəmində isə, səhv etmirəmsə Doğum evini Məşədi Əzizbəyovun adına verdilər. Sonrasını bilmirəm...
Bax, bu gün Səhiyyə Nazirliyi, İcbari Tibb Sığorta Agentliyi, TƏBİB məsələsi həmin olayı yada salır. Vallah, bir dənə də HƏBİB yaradıb başına da Verməmmədovu qoysalar, səhiyyəmiz göylə gedər. Sözün qısası, rayonlarda Tibb Mərkəzlərinin yaradılmasının bircə adı var: Rüşvəti bir əldə cəmləşdirmək. Vəssəlam. Yoxsa, bir rayon ərazisindəki əksər MÜSTƏQİL tibbi müəssisələrini bir nəfərə tabe etməyin adı nə ola bilər..?
Nə isə, indi keçək konkret olaraq TƏBİB-in yaratdığı Nərimanov Tibb Mərkəzinin direktoru Fazil Alməmmədovun qanunsuz əməllərinə. Təkrarçılıq olsa da, Fazil Alməmmədov haqqında qısa məlumat verək. Deməli, Fazil Alməmmədov Oğuz rayon Mərkəzi Xəstəxanasında baş həkimi olub. 2017-ci ildə səhiyyə naziri Oqtay Şirəliyevin əmri ilə Bakı şəhəri 5 saylı Kliniki Xəstəxanaya baş həkim təyin edilib. O zaman 35 yaşı olan Fazil Alməmmədovun Bakının ən böyük xəstəxanalarından birinə baş həkim təyin olunması xeyli suallar yaradıb. Sonradan isə Fazil Alməmmədov TƏBİB-in yaratdığı Nərimanov Tibb Mərkəzinə direktor təyin olunub.
Məlumat üçün qeyd edək ki, Mərkəzin direktoru olan Fazil Alməmmədov artıq təkcə 5 saylı xəstəxanaya deyil, həm də keçmiş 6, 7, 8, 18 saylı poliklinikalara da rəhbərlik edir. Sözümüzün canı odur ki, TƏBİB-in “səxavəti” nəticəsində Fazil Alməmmədovun “səhiyyə biznesi” birdən birə 5-6 dəfə böyüyüb. Fazil Alməmmədovun keçirdiyi 100 minlik saxta tenderlər, mətbəə məhsulları adı ilə sildiyi pullar, yumşaq inventar,yataq ləvazimatları və xüsusi geyimlərin alınması üzrə mənimsədiyi dövlət vəsaiti barədə uzun-uzadı yazmaq istəmirik.
Təkcə onu qeyd edək ki, Fazil Alməmmədov Mühafizə xidmətlərinə 105 800.69 manat pul xərcləyib. Görəsən, Maliyyə Nazirliyi, Səhiyyə Nazirliyi, yaxud Hesablama Palatası demir ki, ay Alməmmədov, bu qədər vəsaiti hara xərcləmisən..? Yeri gəlmişkən, Alməmmədov özü də cangüdənlə gəzir, ona hətta öz əməkdaşları yaxın düşə bilmir. Biz Alməmmədovun koronavirusdan qazanmağı, yəni həkimlərə verilən əlavə əmək haqqını mənimsməsindən də bəhs etmək istəmirik. Bütün bu maliyyə maxinasiyaları, qanunsuzluqlar azmış kimi, Fazil Alməmmədov ölkənin tibbi kadr korpusunu da məhv edir.
Belə ki, təcrübəli, savadlı, həkim adına layiq olan kadrları işdən uzaqlaşdırıb, özü kimi “biznesmen-həkimləri”, alverçiləri vəzifəyə təyin edir. Özü də çox nəzakətsiz, tərbiyəsiz şəkildə… Bəli, Fazil Alməmmədov bu yaxınlarda Şəhla Məmmədovanı Nərimanov Tibb Mərkəzə tabe olan 8 saylı poliklinikaya ( indiki 1 saylı şöbə ) baş həkim təyin edib. Hansı ki, 18 saylı poliklinikada ( indiki 2 saylı şöbə ) baş həkim işləyən 67 yaşlı Şəhla Məmmədova çoxdan təqaüdə göndərilməli idi. Ən dəhşətlisi isə odur ki, Şəhla Məmmədova 8 saylı poliklinkaya ( indiki 1 saylı şöbəyə) nəzarət edən 55 yaşlı, 35 il iş təcrübəsi olan, şəhid ailəsinin üzvü Gülnarə Əfəndiyevanı əvəz edib. Hansı ki, həmin polklinikada 35 il işləyən, sahə həkimindən başlayaraq şöbə müdiri vəzifəsinə yüksələn Gülnarə Əfəndiyeva orada baş həkimi əvəz edirdi. Alməmmədovdan soruşan lazımdır ki, çoxdan təqaüdə çıxmalı olan, 2 dəfə müddəti uzadılmış Şəhla Məmmədova nə üçün Gülnarə Əfəndiyevanı əvəz etməlidir..? Axı, Gülnarə Əfəndiyevanın təqaüdə çıxmasına hələ 10 il var. Həm də 35 ilin həkiminə, baş həkimi əvəz edən Gülnarə Əfəndiyevaya qarşı edilən hərəkətlər, nəinki insana yaraşan hal deyil, heç...
Belə ki, Gülnarə Əfəndiyeva otağında iş başında olduğu halda, sentyabrın 23-də Fazil Alməmmədovun qoçu dəstəsi otağa daxil olaraq 35 ilin həkiminə deyirlər ki, otağı tərk elə, çıx get… Bütün bunlar azmış kimi, sentyabrın 24-də səhər Şəhla Məmmədovanın özü ilə gətirdiyi mühafizəçilər Gülnarə Əfəndiyevanı işə buraxmırlar.
Nəhayət Şəhla Məmmədovadan icazə alandan sonra Gülnarə Əfəndiyevanı içəri buraxırlar. Yəni Gülnarə Əfəndiyeva əvvəl olduğu kimi həkim-terapevt işini davam etdirmək qərarına gəlir. Amma buna da imkan vermilər. Belə ki, bu dəfə isə həkim-terapevtin yanına xəstənin gəlməsi üçün onun adına kompüterdə çek vurulmalıdır. Buna da Şəhla Məmmədova icazə verməyib. Deyib ki, çek başqa həkimin adına vurulacaq. Və beləcə Gülnarə Əfəndiyeva 35 il çalışdığı işindən qanunsuz olaraq uzaqlaşdırılıb. Məşhur filmdə deyilən kimi, görəsən Rüstəm bəy qoca Məşədi İbadın nəyinə aşiq olub..? İndi maraqlıdır ki, Fazil Alməmmədov nənəsi yaşda 76 yaşlı təqaüdçü Şəhla Məmmədovanın nəyinə, olmayan savadına, bəlkə olmayan təcrübəsinə “aşiq” olub ki, onu Gülnarə Əfəndiyevanın yerinə təyin edib və üstəlik şəhid ailəsinin üzvü olan həkim işini də itirib. Redaksiyamıza daxil olan son məlumata görə, Şəhla Məmmədova Fazil Alməmmədovun yerlisidir, hər ikisi Oğuz rayonundandır. Ancaq məncə, yerli olmaq əsas məsələ ola bilməz. Oğrunun, rüşvətxorun, korrupsionerin nəinki yerlisi, heç vətəni də olmur. Əsas məsələ odur ki, bunlar almağı-verməyi, cinayət etməyi bacaran adamları axtarırlar. Bəli, Şəhla Məmmədova kresloya oturan kimi 18 saylı poliklinikadakı ( indiki 2 saylı şöbə ) “sağ əli” Gültəkini yanına gətirmək istəyir. Daxil olan məlumatdan o da bəlli olur ki, Şəhla Məmmədova 8 saylı poliklinikaya ( indiki 1 saylı şöbəyə ) gələn kimi sürücülər və sağlamlıq üçün verilən arayışların qiyməti 15 manatdan 40 manata qalxıb. Sürücülüklə bağlı arayış və sağlamlıq arayışlarının biri 15 manat, o biri isə 30 manat idi. İndi isə hər ikisi 40 manat olub. Şəhla Məmmədova deyir ki, kor olsun, kar olsun, lap mayıf olsun...əsas odur ki, 40 manatını verib arayışını alsın.
Bu hələ harasıdır ? Şəhla Məmmədova mürdəşir kimi ölülərin cibini soymaqla məşğuldur. Belə ki, Şəhla Məmmədova yeni iş yerinə gələn kimi ölüm haqqında qeydiyyat kitabını gətirib qoyub böyrünə. Və deyir ki, ölülər mənlikdir, yəni ölülərə verilən arayışı özü satacaq. Bu hələ harasıdır..? 8 saylı poliklinikanın ( indiki 1 saylı şöbənin ) özünün “troyka” ( qan, sidik və s) analizi, ümumi qan analizi üçün laboratoriyası olduğu halda, “troyka” analizini 1 saylıda götürüb, 5 saylıya, ümumi qan analizini isə özəl klinikalara göndərirlər. Analizlərin pulunu isə İcbari Tibb Sığorta 5 saylıya və özəl klinikalara köçürür..?
Niyə, məqsəd nədir ? Hansı ki, 1 saylı şöbənin özündə laboratoriya cihazlarının üstünü bərk-bərk basdırıb, nəyisə gözləyirlər..?
Yəqin ki, özəl klinikalara satacaqlar. Məlumat üçün onu da qeyd edək ki, TƏBİB-in sədri Vüqar Qurbanovun həyat yoldaşı, hörmətli Sevda xanım 5 saylıda nevrologiya şöbəsinin müdiridir. Görəsən, Sevda xanım iş yerində gördüyü biabırçılıqları evdə həyat yoldaşına demir..? Yeri gəlmişkən, Fazil Alməmmədovun həyat yoldaşı da Respublika Klinik Xəstəxanasında göz şöbəsinin müdiridir. İndi isə keçək Şəhla Məmmədovanın 1 saylı şöbəsində satılan firma dərmanlarına. Bəli, 1 saylı şöbənin “zavxozu”nun əsas işi dərman satan firmalarla biznes əlaqəsini qurmaqdır. Tez-tez şöbənin koridorlarında müxtəlif dərman firmalarının nümayəndələrini görmək olur. İndi isə keçək ƏN ƏSAS MƏSƏLƏYƏ... Axı, yazının girişində sual etdik ki, Alməmmədov Şəhla Məmmədovanın nəyinə...?
Bəli, bu sualın cavabını Şəhla Məmmədova bu yaxınlarda məclislərin birində açıb deyib. Şəhla Məmmədova deyib ki, onsuz da özüm də bilirəm ki, təqaüdə gedəcəm. Amma təqaüddən qabaq əlimdə çox vacib iş var... Belə ki, 1 saylı şöbə ilə üzbəüz yerləşən diş poliklinikasının yerini özəlləşdiriblər. Amma 1 saylı şöbənin yeri tikintiyə mane olduğu üçün buranı özəlləşdirib satacaqlar. Və bu qanunsuz əməlləri Şəhla Məmmədovanın əli ilə edəcəklər. İndi bildinizmi Alməmmədov Şəhlanın nəyinə...?
Bəli, Şəhla Məmmədova deyib ki, 1 saylı şöbənin yerini özəlləşdirib satacağıq və mən də haqqımı alıb rahatca təqaüdə gedəcəm. Hələ üstəlik tikilən obyektin 1-ci mərtəbəsində Şəhlaya obyekt də verəcəklər. Bəli, sözün qısası, səhiyyəmiz cinayətkar şəbəkənin əlində can verir. Hippokrat andı sizə qənim olsun, ay al-ver məmmədovlar... //gundelik-baku.com//

Elmir Məhərrəmov şifer satışı ilə məşğuldur. Deyir, 2009-cu ildə "Şərur İnşaat" MTK-ya təxminən 27 min manat məbləğində şifer satıb. Şirkət isə pul ödəyəcəyi tarixə qədər ona girov kimi Yasamal rayonu ərazisində tikilən bir binadan mənzil verib.

Elmir Məhərrəmov tikinti şirkətindən şikayətçi olsa da, məhkəməyə müraciət etməyib.

"Şərur İnşaat" MTK-nın mətbuat xidmətinin rəhbəri Tünzalə İsmayılova deyir ki, sözügedən mənzil və pul ilə bağlı sənədləşmə onların yox, "MUR-AY" MMC-nin adından aparılıb.

E.Məhərrəmov ona müqavilə bağlananda "MUR-AY" MMC "Şərur İnşaat"-ın podratçısı olduğu üçün sənədləşmənin bu cür aparılmalı olduğunu dediklərini bildirir. Zemfira İsmayılova isə, bu ittihamı rədd edir.

Hüquqşünas Yalçın İmanov hesab edir ki, E.Məhərrəmov məhkəməyə müraciət edəcəyi təqdirdə şikayətinin təmin edilməsi üçün hüquqi perspektiv var.

Muray MMC-nin təsisçi və rəhbərləri 2011-ci ildə həbs olunub. Məhkəmə zamanı verilən ifadələrdən və Şərur MTK-nin təsisçisi İsfəndiyar Axundovun mətbuata müsahibələrindən belə aydın olur ki, Muray MMC-nin əmlakı və öhdəlikləri Şərur MTK-ya verilib.

Bununla belə, yüzlərlə zərərçəkən hələ də məhkəmələrdə və mətbuat vasitəsilə ziyanın ödənməsinə nail olmağa çalışır.

Toplum TV