İş adamlarının icra başçısı Zakir Fərəcovla 8 ildən çoxdur davam edən səs-küylü borc qalmaqalına görə, Sumqayıt ölkə mətbuatının gündəmindən düşmür və belə gedişlə heç düşən də deyil. Bu səbəbdən ki, şəhər rəhbərinin göz qabağındakı bağışlanmaz günahları borc qalmaqalı ətrafında baş verənlərin insanlıq əleyhinə yönələn hərəkətlər kimi xarakterizə olunmasına rəvac verir. Bu ciddi məsələ əməkdaşlarının daim diqqətində olduğuna görə, barəsindəki çoxsaylı yazılar araz.az-da da geniş yer alır. Bu mövzuda növbəti bu yazımızı, başçının və yaxın ətrafının başlarına oyun açdıqları bu sahibkarlar tərəfindən bir daha ölkə başçısına ünvanlanan və yuxarıda qeyd etdiyimiz məqamı özündə ehtiva edən şikayət xarakterli Müraciət əsasında hazırlamışıq.

“Möhtərəm Prezident! Köməyinizə ehtiyacımız böyükdür. Sumqayıtın icra başçısı Zakir Fərəcovla bacarmırıq. O, bizi işlədib, çoxdandır ki, pulumuzu vermir. Bu barədə neçənci dəfədir ki, Sizə də yazıb, kömək istəmişik. Lakin başçı öz üsullarıyla yazdıqlarımızın qarşısını alıb, Sizə çatmasına imkan verməyib. Belə olmasaydı, yoxsa Siz bizim çoxdan dərdimizə əlac edərdiniz.
Bir daha demək istəyirik ki, şəhərin hər yerində zövq oxşayan müasir standartlara uyğun abadlaşdırma və təmir-tikinti işlərini yüksək məsuliyyət hissi ilə həyata keçirməkdən ötrü, əlimizdən gələni etmişik. Özünüz Sumqayıta gələrkən, həyata keçirilən bu işlərlə tanış olduqda da, gördüyümüz bütün işlərin alqışalayiq yüksək qiymətini vermisiniz. Buna baxmayaraq, Zakir Fərəcov gördüyümüz bu yüksək səviyyəli işlərə görə, ondan ala bilmədiyimiz halal pullarımızı vermək əvəzinə, başımıza oyun açdırır. Getdikcə şiddətləndirdiyi hədə-qorxu, təhdid və böhtanları ilə, rahatlığımızı belə əlimizdən alıb. Haqqını qanun çərçivəsində tələb edəni “dəmir barmaqlıqlar” arxasına atdırmaqdan belə çəkinmir”, — sahibkarların dövlət başçısına və digər əlaqədar dövlət qurumlarının rəhbərlərinə sonuncu şikayət məktubları belə başlayır. Qeyd edirlər ki, Sumqayıt Bulvarının və şəhərin giriş hissəsinin inşasını yüksək səviyyədə həyata keçirsələr də, illərdir, başçıdan onlara çatacaq pullarını ala bilmirlər: “Borcun bu günə qədər ödənilməməsi, üstəlik, əvəzində bizim təhdid və təqib olunmağımız barədə ölkə mediasında geniş məlumatlar verilib. Buna baxmayaraq, rəsmi qurumlar da, hələ məsələyə hüquqi qiymət verməyə tələsmirlər.
Amma 450 nəfərə yaxın sahibkarın və işçinin haqqı olan həmin məbləğin icra başçısı tərəfindən qəsdən ödənilməməsi, birbaşa, bu pulların mənimsənildiyindən xəbər verir. Axı, dövlətin büdcəsindən ayrılan bu qədər vəsaitin iş görənlərə verilməməsinin başqa adı da yoxdur.
Dəfələrlə icra başçısının və onun müavinlərinin yanında olmuşuq. Hər dəfə isə, Zakir Fərəcov bir bəhanə ilə məsələdən boyun qaçırıb. Müavinləri isə, öncə belə deyirlər ki, biz yuxarılara çox yazsaq da, şikayətlərimizin əsas ünvanına çatmasına Zakir Fərəcov imkan verməyəcək. Bizsə deyirik ki, biz başçıdan əlavə nəsə istəmirik. Öz haqqımız olan pulu tələb edirik. Lakin hər dəfə bizi ya təhdid edir, ya yola verməyə çalışır, ya da borcun 30 faizinin ona bağışlanmasını tələb edirlər.
Bir icra başçısının dövlətin pulunu mənimsədiyi az deyil, üstəlik, gördürdüyü işin pulundan pay istəməsi nəinki qanunsuzluq, həm də hüquqi məsuliyyətdir. Zakir Fərəcov kimə və ya kimlərə arxayındır bilmirik. Ancaq onu bilirik ki, bu adam nə qanun sayır, nə qayda bilir, nə də, onun kimsədən qorxusu var. Əgər belə olmasaydı, dövlətin pulunu asanlıqla mənimsəməz, vaxtında milyonlarımızı qaytarar, bu qədər borc yaratmazdı”.
İş adamları daha sonra öz şikayətlərində qeyd edirlər ki, onlar bütün imkanlarından yararlanaraq, pullarını almağa çalışırlar. Onların sözlərinə görə, bunun üçün, bütün barışıq təkliflərindən istifadə edirlər. Ödənişlərin heç olmsa hissə-hissə həyata keçirilməsini istədiklərini deyirlər. Lakin icra başçısı və onun əlaltıları bunu qəbul etmirlər: “Cənab Prezident! Biz, dəfələrlə Zakir Fərəcovun qəbulunda olmuşuq. Hər dəfə, öz halal pulumuzu istədiyimizə görə, bizi təhdid edib. Hədələyərək, deyib ki, əgər puldan imtina etməsək, bizi həbs etdirəcək. Son vaxtlar isə, bu məsələni elə bir həddə çatdırıb ki, Sumqayıt şəhərinə nəinki işlə bağlı gedə bilirik, hətta yaxınlarımızı ziyarət etməyə belə cürət etmirik. Biz hüquqi bir ölkədə yaşayırıq. Bir icra başçısının özünü bu qədər qanundan üstün bilməsi, özbaşınalıqla məşğul olması, sahibkarı və işçini həbslə hədələməsi onun əndazələri aşmasının, qanunları saya salmamasının təzahürüdür. Bunun başqa adı yoxdur. Biz cəngəllikdə yaşamırıq. Şükür Allaha ki, Sizin sayənizdə güclü və hüquqi bir dövlətdə yaşayırıq. Məhz, Sizin gözəl rəhbərliyiniz nəticəsində ölkədə qanunçuluq, asayiş, əmin-amanlıqdır və tam əminik ki, bundan sonra da, belə davam edəcək. Zakir Fərəcovun özünü harada hiss etməsi isə, bizə çox maraqlıdır və aydın deyil. Ona görə ki, qanunları saya salmadan, onlara məhəl qoymadan, qorxusuz və hürküsüz dövlətin və sahibkarların pulunu mənimsəməsi üçün, bir icra başçısı ya özünə çox arxayın olmalı, ya bir kimsədən qorxmamalı, ya da, hansısa bir qüvvənin təsiri altında, toxunulmaz şəkildə istədiyini etməlidir”.
Sahibkarlar daha sonra müraciətlərində vurğulayırlar ki, hal-hazırda həyata keçirilən islahatlar nəticəsində, ölkədə bir çox yeniliklərə imza atılıb, xeyli işlər görülüb. Onların sözlərinə görə, indiyə qədər cəzasız qalan məmurlar da, bu islahatlardan öz paylarını alacaqlar: “Möhtərəm Prezident! Siz hər dəfə məmurları qəbul edərəkən, bu ölkənin, habelə iqtidarımızın adına ləkə gətirən vəzifə sahiblərinə çox yerində və gözəl bir şəkildə öz tələbələrinizi çatdırırsınız. Xüsusi olaraq qeyd edirsiniz ki, qanunsuzluqla, özbaşınalıqla, əmək adamlarının haqqını yeməklə məşğul olan sabiq icra başçıları layiqli cəzalarını alıblar və bundan sonra da, alacaqlar. Biz, bunlara görə, Sizi alqışlayır, dəstəkləyirik. Həqiqətən də, ölkəmizdə Sizin etimad göstərdiyiniz, lakin bundan sui-istifadə edərək, özbaşınalıqla məşğul olan, işçinin haqqını yeyən icra başçıları, məmurlar var. Onlar elə zənn edirlər ki, xan, bəy və ya ağadırlar. Hamıya yuxarıdan aşağı baxırlar, xərac toplayırlar, dövlətin pullarını şəxsi vəsaitləri kimi mənimsəyirlər. Belə harın vəzifə sahibləri o qədər öz hədlərini aşıblar ki, Sizin yürütdüyünüz siyasətə qarşı çıxır, vətəndaşları incidir, sahibkarların haqqını yeyir, əhaliyə zülm edirlər. Belə icra başçılarından biri də, Sumqayıtın icra başçısı Zakir Fərəcovdur. O, Sizin bəyənib: “Qısa müddətdə bu işləri görmək möcüzədir!” — dediyiniz və həmin möcüzəni reallığa çevirən biz sahibkarların pullarımızı vermir. Bu azmış kimi, bizi hədələyir, təhdid edir və min bir bəhanə ilə pulu qaytarmaq istəmir. O təkcə bizim deyil, daha neçə-neçə iş adamlarının da, haqqını mənimsəyib. Hətta onların arasında xarici iş adamları da var”.
İş adamları bu şikayət ərizələrində xüsusi olaraq onu qeyd ediblər ki, indiyə qədər ölkə rəhbərinə etdikləri müraciətlərin təsirinin olmaması, bunun, hələ də problemlərinin həllinə gətirib çıxarmaması onları olduqca təəccübləndirərək, narahat edir; “Bu barədə, bu günədək Sizə dəfələrlə müraciət etsək də, müsbət yanaşım yoxdur. Problemimiz həll olunmamış qalıb. Lakin biz əminik ki, sözlərimiz Sizə çatdıqdan sonra, müraciətimizə baxıb, lazımi göstərişlər verəcəksiniz. Çünki, Siz, hər zaman zəhmətkeş insanların, sahibkarların, işçilərin yanında olmusunuz, onlara dəstək vermisiniz və onları hər zaman himayəniz altında saxlamısınız. Şübhəsiz ki, bu gözəl ənənə, bundan sonra da, davam edəcək. Ona görə, Sizdən bir daha xahiş edirik ki, üzləşdiyimiz problemin aradan qaldırılmasına, yəni, illərdir halal haqqımız olan pulun Sumqayıtın icra başçısı Zakir Fərəcovdan alınaraq, bizə verilməsinə köməklik edəsiniz. Bizim Sizdən başqa güvənəcəyimiz kimsəmiz yoxdur. Və inanırıq ki, səsimizi eşidib, Zakir Fərəcov haqqında hüquqi tədbirlərin görülməsini təmin edəcəksiniz!. Köməyinizə ehtiyacımız var, artıq son həddə çatmışıq, möhtərəm Prezident!”.
Bu yerdə qeyd etmək istəyirik ki, sahibkarların şikayət məktubunda icra başçısı Zakir Fərəcovla sahibkarlar arasında uzun müddətdir davam edən bu borc qalmaqalında başçının “sağ əli” kimi özlərini tanıdan Gündüz Əliyevin və Adil Xudadatovun da, min oyunlardan çıxmaları xüsusi vurğulanıb: “Məhz buna görədir ki, ölkə mediası onlarla bağlı çox xoşagəlməzliklər üzə çıxarıb. Bütün bunlara görə, onların nə utanmaqları var, nə də qızarmaqları. Elə, belə xoşagəlməzliklər müqabilində də, “zəmanət məktubu” ilə bağlı prosesdə icra başçısı bizə verdiyi kişi sözünə indiyədək əməl etmək istəmir. Bir də, yaltaqlığın və ikiüzlülüyün nəticəsidir ki, iş adamlarına birbaşa Zakir Fərəcovun özü borclu olduğu halda, “zəmanət məktubu” bizim tərəfimizdən Sumqayıt İcra Hakimiyyətinin Yerli Özünidarətmə Orqanları ilə iş üzrə şöbəsinin rəhbəri Gündüz Əliyevin adına verilib. Nədən, məhz Gündüz Əliyevin adına?! Sualın cavabı çox sadədir: “Ona görə ki, bütün bu işlərin hamısı, məhz, ikiüzlü, yaltaq, saxtakar… şöbə müdirinin əli, onun yalan və şirin vədləri ilə həyata keçirilib. Zakir Fərəcov bununla, kimsəyə borcu olmadığı görüntüsü yaradaraq, bütün məsuliyyəti Gündüz Əliyevin üzərinə qoyub. Halbuki, bu istiqamətli pulların ayrılması və onlarla bağlı sərəncam verilməsi, Gündüz Əliyevin səlahiyyətində deyil. Elə, Gündüz Əliyevin yalan və şirin vədlərinə görədir ki, bu ciddi məsələdən bir gün sonra nə pul ödənilib, nə də hər hansı borc bağlanıb. Bunu görərək, notarial qaydada hazırlanmış “zəmanət məktubu”nu ləğv etdirmişik. Üstəlik, bütün dövlət qurumılarına da müraciətlər edərək, durumun dəhşətli olduğunu çatdırmışıq.
Törətdiyi belə qatı cinayət əməllərinə görədir ki, Zakir Fərəcovun maxinator və talançı ortağı olan yüksək vəzifə sahibi Gündüz Əliyevin vəziyyəti olduqca çətinləşib. Bütün bunlar ona bir işarədir ki, Zakir Fərəcov və onun bu yaxın cinayət ortağı, qanunsuzluq “donu geydirtdikləri” bütün əməllərini, ölkə üçün olduqca həssas keçən bu dönəmdə belə şiddətləndirməkdən heç vaxt çəkinməyiblər. Gündüz Əliyev həyata keçirdiyi bütün korrupsiya əməllərinə görə, artıq mühakimə olunur.
O da maraqlıdır ki, çoxlarının dediyi və mətbuatın da yazdığına görə, son vaxtlar Sumqayıt İcra Hakimiyyətində Gündüz Əliyevlə Memarlıq və Tikinti şöbəsinin müdiri — Baş memar Adil Xudadatov
arasında çəkişmə başlayıb. Bu qalmaqalın səbəbləri də artıq məlum olub. Əsas səbəb odur ki, müxtəlif iddia və ittihamlarla məsuliyyətə cəlb olunandan əvvəl Gündüz Əliyev Zakir Fərəcovun baş trolu kimi, şəhərdə fəaliyyət göstərən idarə, müəssisə, şirkət və firmalardan başçıya çatacaq “aylıq paketləri” toplayıb. Bir sözlə, başçının “qara işlərini” görməkdə adı daha çox keçib. Onun barəsində cinayət işi və məhkəmə istintaqı başlanandan sonra isə, hər şey əlindən çıxıb. İndi isə, “sükan Adil Xudadatovun əlindədir”…
…Özünüzün deyin, bütün deyilənlər Zakir Fərəcov kimi bir vəzifə sahibinin olan-qalan imicinə daha bir ağır zərbə deyilmi?!”.

Əli HÜSEYN,
Anar MUSTAFA,
araz.az xəbər portalının xüsusi müxbirləri.

araz.az xəbər portalı.

Lerik rayonundan bir qrup sakini rayondakı məmur özbaşınalığı və korrupsiya faktlarından şikayətçidir.

Onlar Anaxeber.info-ya bildiriblər ki, rayonda tam bir anarxiya hökm sürür.

Məmur özbaşınalığı artsa da, cəzasızlıq mühiti də bir o qədər onlara at oynatmağa meydan verir.

Sakinlər bildirirlər ki, bir müddət öncə rayondaxili yolların təmiri və yeni asfalt çəkilməsi üçün Lerik rayonuna dövlət büdcəsindən 1.200 000 (bir milyon iki yüz min) manat vəsaiti ayrılıb.

Onların sözlərinə görə, ayrılmış bu pulun Rayon İcra Hakimiyyətinin başçısı və Yol İstismar İdarəsinin müdiri Elxan Əliyev tərəfindən necə və hansı yollarla mənimsənildiyi məlum deyil.

Sakinlər deyirlər ki, rayondaxili yollar olduqca bərbad vəziyyətdədir. Ayrılmış vəsait yollara xərlənmədiyi üçün belə bir mənzərə yaranıb.

Leriklilər hər dəfə yaranmış çala-çuxura düşəndə, bu yolu bu hala salanlardan gileylənir, eyni zamanda, ölkə rəhbərliyindən yerli məmurlara qarşı tədbir görülməsini istəyirlər.

Sakinlər deyirlər ki, ölkə rəhbərliyi rayon rəhbərinin təqdimatına əsasən Elxan eks-prezident Əliyevi Heydər Əliyevin 100 illiyi ilə əlaqədar "Heydər Əliyev medalı " ilə təltif edib, çünki ona yanlış məlumat və təqdimat verilib. Halbuki adıçəkilən məmur baş verən korrupsiya pozuntularına görə sorğulanmalı idi.

"Görünür, yollara ayrılmış pulun mənimsənilməsi icra başçısı Əkbır Abbasovu narahat etmir. Çox güman, onun da bu məsələdə maraqları təmin olunub. Budur, leriklilərin dərdi və onları dövlətdən narazı salan məmurlar və onların yaratdığı özbaşınalıq mühiti. Biz ölkə rəhbərliyindən bu məsələtə rekasiya verməsini xahiş edirik", - sakinlər bildiriblər.

“Ötən ilin sentyabrında oftalmoloq Azər (Benjamin) Kazımov tərəfindən “Kəpəz” Hospitalda gözümdən ekzimer lazer əməliyyatı olunmuşam. Lakin əməliyyatdan sonra da görmə zəifliyi, ağrılar və qıcıqlanma kimi problemlər aradan qalxmadı. Həkim uzun müddət bizi yola verdi, problemimizi aradan qaldırmadı. Axırda başqa həkimə gedib müayinə olunanda bildik ki, gözümün buynuz qişasını zədələyib, məni şikəst edib”.

Bu iddialarla “Qafqazinfo”ya pasiyent Nəzrin Cəfərli müraciət edib.

Onun sözlərinə görə, əməliyyatı icra edən həkimə problemin aradan qaldırılması üçün bir neçə dəfə müraciət etsə də, heç bir köməklik etməyib: “Həkimi televiziyadan Elgizin verilişində reklam olunanda görüb müraciət etmişik. Əməliyyatdan sonra problemlər qalanda həkim bizə dedi ki, bir müddətdən sonra düzələcək. Vəziyyətdən çıxmaq üçün məni Milli Oftalmologiya Mərkəzində Cəmil adlı həkimin qəbuluna göndərdi. Lakin onun da müalicələrinin xeyri olmadı. Vəziyyət o həddə çatmışdı ki, kimsə qolumdan tutmadan tək hərəkət edə bilmirdim. Məcbur olub başqa həkimə müraciət etdim və məlum oldu ki, Azər Kərimov məni səhv əməliyyat edib...”

Şikayətçi bildirir ki, nəticədə daha iki dəfə gözündə cərrahi əməliyyat icra olunub: “Müayinədə bildik ki, gözümün buynuz qişası çox dərin kəsilib. Bu dəfə müraciət etdiyim həkim isə dedi ki, dərin yaraları tikmək üçün ancaq əməliyyat olunmalıyam. Çünki həmin fəsadları ancaq bu yolla aradan qaldırmaq olar. Daha iki dəfə əməliyyat olundum. Birinci əməliyyat təyin olunanda Benjamin Azər Kərimova müraciət etsəm də, bizə müxtəlif bəhanələr gətirərək rədd etdi. Yenicə öyrənmişik ki, artıq əvvəlki klinikadan çıxaraq başqa bir özəl tibb müəssisəsinə keçib. İstəyirəm ki, mənim və mənim kimi digər insanların sağlamlığını əlindən alan bu həkim öz cəzasını alsın. Bu cür reklam olunan həkimlər insanların həyatını korlamasınlar.

Aylardır işə gedib-gələ bilmirəm. Bu həkim mənə həm maddi cəhətdən böyük ziyan vurub, həm də şikəst eləyib. Problemim isə hələ də aradan qalxmayıb...”

Sadalanan ittihamlara aydınlıq gətirmək üçün Benjamin Azər Kərimovla əlaqə saxladıq. Özünü həkimin asistenti kimi təqdim edən şəxs isə heç bir açıqlama vermək istəmədi: “Zəhmət olmasa, nə sualınız varsa, hüquq-mühafizə orqanlarına müraciət edin”.

Problemlə bağlı Səhiyyə Nazirliyinin Analitik Ekspertiza Mərkəzinə müraciət etdik. Qurumdan sorğumuza belə cavab aldıq: “Özəl tibb fəaliyyəti haqqında” AR Qanuna əsasən özəl tibb müəssisələrində xəstələrə tibbi yardımın göstərilməsi tərəflər arasında bağlanmış müqavilənin şərtləri ilə tənzimlənir. “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanununa əsasən yerində plandankənar (növbədənkənar) yoxlama insanların həyat və ya sağlamlığına birbaşa və mühüm təhlükənin olması və ya mühüm zərərin vurulması barədə hüquqi və fiziki şəxslərdən, dövlət və yerli özünüidarəetmə orqanlarından yoxlayıcı orqana konkret faktlara əsaslanan rəsmi müraciətlər (məlumatlar) daxil olduqda, habelə mediada məlumatlar yayıldıqda keçirilir.

Vətəndaş tərəfindən Səhiyyə Nazirliyinə və yaxud birbaşa Anlitik Ekspertiza Mərkəzinə rəsmi müraciət olunduğu halda, yoxlama zamanı həmin klinikada göstərilən tibbi yardım, müayinə və müalicəni icra edən mütəxəssis barəsində yerində araşdırma aparıla bilər. Yoxlama nəticələrinə əsasən həkim və müəssisə barəsində “İnzibati Xətalar Məcəlləsi”nin müvafiq maddələrinə uyğun olaraq inzibati tənbeh və digər tədbirlər görülə bilər. Eyni zamanda, Analitik Ekspertiza Mərkəzinin səlahiyyətlərinə məhkəmə-tibbi ekspertizasının aparılmasının daxil və həkiminin əməllərinə hüquqi qiymət verilməsi məsələsinin aid olmadığını nəzərə alaraq vətəndaşa təsdiqedici sənədlərlə birlikdə hüquq-mühafizə və ya məhkəməyə müraciət etmək hüququn var”.

Gülnar Əliyeva

Son zamanlar Sağlamlıq İmkanları Məhdud 3 saylı xüsusi internat məktəbinin direktoru Tariyel Əkbərovun barəsində mətbuat səhifələrində yayılan xəbərlər gündəmin əsas mövzularından biri kimi yadda qalıb.

Beləki adıçəkilən məktəbin müəllimləri direktorun özbaşınalıqları, müəllimlərin dərs yükünün azaldılması və direktorun müəllimlərlə etik – davranış qaydalarını pozması barədə Azərbaycan Elm və Təhsil Nazirliyinin qarşısında etiraz aksiyası təşkil ediblər.

Bundan əlavə adıçəkilən məktəbin müəllimi Bahar Kazımova öz həmkarı Könül Səmədliyə Qərbi azərbaycanlı olduğu üçün erməni deyib təhqir etmişdi. Etiraz aksiyasında iştirak edən müəllimlər bu mövzunu da aksiyada səsləndiriblər.

Məktəbin müəllimi Aygün Hüseynovanın öz “Facebook” hesabında paylaşdığı video da diqqətimizdən yayınmayıb . Məktəb müəlliminin belə bayağı mahnı sədası altında video paylaşması müəllim davranışından xəbər vermir.

Maraqlıdır həmin məktəbin şagirdləri, Azərbaycanın gələcəyi olan bugünkü uşaqlar belə müəllimədən nə örnək götürsünlər?

Həmin videonu təqdim edirik :

Qazax Rayon İcra Hakimiyyəti başçısı Rəcəb Babaşovun birinci müavini Məmməd Alıyev yenidən "gündəm" olub.

32gun.az xəbər verir ki, rayonun ən aktov səhifəsi "Qazaxlılar"da edilən paylaşım diqqət çəkib.

Həmin paylaşımı olduğu kimi diqqətə çatdırırıq:
"Səhifəmizə daxil olan şikayətlərdə vətəndaşlar Məmməd Alıyevin özbaşınalıqlarından təngə gəldiklərini bildiriblər. İllərdir ki, yuxarıdakı adamlarına güvənərək vətəndaşlara hədə-qorxu gəlir. Bir tədbir olduqda idarə və müəssisələrə zəng edib gəlməyəcəkləri halda işdən çıxarmaqla hədələyir. Rayon icra başçısını da, rayon polis şöbəsinin rəisini də, rayon prokurorunu da barmağında oynadır. Kimdən xoşu gəlmirsə bir zənglə işini bitirir.
Ən son keçirilən qanvermə aksiyasında da bənzər problemlər yaşanıb".
Xatırladaq ki, M.Əliyev pandemiya dövründə oğluna mal-çağırlı toy etməsi, bəlıdiyyə sədri olan bacısı oğluna xəstəxanada əlavə iş verdirməsi və oğlu Elnur Alıyevə 120 min dollarlıq “Land Cruiser” avtomobili alması ilə gündəm olmuşdu.

Beylıqan rayon sakini Quliyev Elxan Şəmil oğlu tərəfindən Hurriyyet.az saytının redaksiyasına şikayət məktubu daxil olub. O, iddia edir ki, rəsmi qurumlara ünvanladığı müraciətinə baxılmır:

“Mən, Quliyev Elxan Şəmil oğlu, yazaraq sizdən xahiş edirəm ki, problemimi işıqlandırasınız.

Şikayətim “AED MMC” şirkətindəndir. 2022-ci ilin aprel ayında “AED MMC” şirkətinə işə girmişəm. 1200 manat əmək haqqı alırdım. 2023-cü ilin fevral ayında gördüyüm iş başa çatdığından, işdən çıxmışam.

İşdən çıxarkən, şirkət son 3 aylıq əmək haqqımı verəcəyini demişdi. Bir müddət sonra Əmək Müfəttişliyinə müraciət etdim, məlum oldu ki, mənim adıma kart açılıb və oradan 1092 manat çəkilib.

Şikayət etməyimə baxmayaraq işimə baxılmır, heç bir köməklik etmirlər. Nə polis, nə də şirkət araşdırmır ki, mənim adıma açılan hesabdan kim, necə pul çəkib?!

Mən əziyyətimin haqqını tələb edirəm. Xahiş edirəm, mənə köməklik göstərin.

Məsələ ilə bağlı dəfələrlə Beyləqan rayon polisinə müraciət etsəm də, heç bir nəticə yoxdur. Hər dəfə bildirirlər ki, narahat olmayın, köməklik ediləcək. Amma ortada heç bir nəticə yoxdur”.

Qeyd edək ki, vətəndaşın müraciəti ilə bağlı Daxili İşlər Nazirliyinə məlumat verilib.

Bakı sakini Dadaşov Abbas Eldar oğlu Əmlak Məsələləri Dövlət Xidmətinin rəis müavini Rüstəm Şahbazovun qardaşı Teymur Şahbazovdan şikayətçidir.

AFN.az-a göndərdiyi növbəti şikayət məktubunda A.Dadaşov bildirir ki, Teymur Şahbazov qardaşı, 15 ilə yaxındır ki, Əmlak Məsələləri Dövlət Xidmətinin rəis müavini işləyən Rüstəm Şahbazovun onun işini düzəldəcəyinə söz verərək külli miqdarda pulunu mənimsəyib. Şikayətçi bildirir ki, Sumqayıt şəhəri, Koroğlu küçəsi, Əmlak Komitəsinin Sumqayıt şöbəsinin yaxınlığında yerləşən 0.68 ha boş torpaq sahəsini uzun müddətə icarəyə götürmək istəyi haqda əvvəlcədən tanıdığı Şahbazov Teymur Adıgözəl oğluna və onunla birgə olan Allahverdiyev Rövşən Oqtay oğlu adlı şəxsə danışıb: “Onlar mənə bildirdilər ki, bizim Əmlak Komitəsində tanıdığımız şəxs var və bu işi çox asanlıqla həll edə bilər. Bildirdilər ki, bu barədə həmin məsələni həll edəsi şəxslə danışıb səninlə görüşüb, ümumi bir razılığa gələrik. Bir neçə gündən sonra Teymurla görüşdük və o, mənə bildirdi ki, danışmışam 180 min manata torpaq məsələsi həll olunacaq. Mən ondan bu işi kiminlə həll edəcəyini soruşdum. Bildirdi ki, qardaşı Şahbazov Rüstəm uzun müddətdir ki, Əmlak Məsələləri Dövlər Xidmətində müavin vəzifəsində işləyir. Bütün məsələləri Rüstəm həll edir. Dedi ki, arxayın olun, məsələ 100 faiz həll olunacaq. Teymurun söhbətinə mən tam inandım və ona hissə-hissə 236000 manat pul verdim”.

T.Şahbazov verdiyi vədə əməl etmədiyinə görə A.Dadaşov ondan şübhələnib: “Ona bildirdim ki, sən işi yubadırsan, işin yubanmasının səbəbini mənə izah et. Dedi ki, qardaşım Rüstəm ölkədə yoxdur, ona görə də sənədləşmə bir az gecikir. Rüstəm gələn kimi sənədləşmə yekunlaşacaq və sənədləri tam şəkildə sənə verəcəm. O, dedi ki, bütün ölkə üzrə bu məsələlərə qardaşı rəhbərlik edir. Mən arxayın oldum ki, Teymur yalan danışmaz, qardaşı Rüstəm Şahbazovla məsələni həll edəcək. Teymur mənə onu da dedi ki, pulun hamısını qardaşına verib”.

“Sövdələşmə”nin üzərindən bir müddət keçsə də, lazım olan sənədlər A.Dadaşova verilməyib. Şikayətçinin sözlərinə görə, T.Şahbazov və Rövşən Allahverdiyev hər dəfə ona Rüstəm Şahbazovla görüşdüklərini, narahatçılığa əsas olmadığını deyib vaxtı uzadıblar: “Lakin mən artıq Teymurun və Rövşənin yalan danışdıqlarını, mənə qarşı dələduzluq etdiklərini anladım. Bundan sonra Teymura və Rövşənə nə qədər zəng vurdum telefon zənglərimə cavab vermədilər. Artıq mən əmin oldum ki, Teymur Rövşənlə birlikdə məni aldadaraq, Teymurun qardaşı Rüstəmlə qabaqcadan əlbir olub, 236000 manat pulumu ələ keçirib, mənə qarşı dələduzluq etməklə, Azərbaycan Respublikası CM-nin 178-ci maddəsinin 2.1, 2.2, 3.4-cü hissələrində nəzərdə tutulan cinayət əməlini törədiblər”.
Teymur Şahbazov və Rövşən Allahverdiyevin əməlləri bununla bitməyib. Belə ki, şikayəçinin sözlərinə görə, onlar sənəd saxtakarlığına da gediblər: “Mənimlə özəlləşdirilən dövlət müəssisə və obyektlərinin, habelə hüquqi və fiziki şəxslər tərəfindən inşa edilmiş müəssisə və obyektlərin yerləşdiyi dövlət torpaq sahəsinin icarəyə verilməsi haqqında 27 iyul 2022-ci ildə müqavilə bağladılar. Bununla da Teymur Şahbazov məni daha da inandırdı. Sonra mənə məlum oldu ki, tərtib olunan həmin müqavilə də saxtadır. Həmin müqaviləyə görə də Teymur məndən 4-5 ay olmaqla hər ay 7850 manat “icarə haqqı” aldı”.

Şikayətçi onu da qeyd edib ki, bu “üçlük” tək onu yox, bir neçə adamı aldadaraq pullarını ələ keçirib. A.Dadaşov Şahbazov Teymur Adıgözəl oğlunun və qardaşı Şahbazov Rüstəm Adıgözəl oğlunun, həmçinin Allahverdiyev Rövşən Oqtay oğlunun cinayət məsuliyyətinə cəlb olunması və ona dəymiş 236000 manatın ödənilməsi üçün aidiyyəti üzrə göstəriş verilməsini xahiş edir. O, müvafiq müraciətini aidiyyatı hüquq-mühafizə orqanlarına da göndərib.

"Hazırda Rövşən Allahverdiyevlə bağlı Daxili İşlər Naziliyinin Kibercinayətkarlıqla Mübarizə Baş İdarəsində cinayət işi açılıb. Təxminən 6 aydan çoxdur ki, axtarışa verilib. Amma rahatca şəhərdə gəzir, maraqlıdır ki, heç kim onu saxlamır. Barəsində Cinayət Məcəlləsinin 178-ci maddə ilə cinayət işi açılıb. Bir neçə nəfər zərərçəkmiş var, biri də mənəm. Mənə 1 milyona yaxın zərər vurub. Onun həbs edilməsini, cinayət işinin araşdırılmasını istəyirəm" - deyə A.Dadaşov saytımız vasitəsilə ölkə rəhbərliyinə, hüquq-mühafizə orqanlarına, daxili işlər naziri, general-palkovnik Vilayət Eyvazova ünvanladığı müraciətdə qeyd edib.

Qeyd edək ki, qeyd edilənlərlə bağlı Əmlak Məsələləri Dövlət Xidmətinin rəis müavini Rüstəm Şahbazovdan mövqe almaq cəhdlərimiz boşa çıxdı. Belə ki, Xidmətin mətbuat xidmətinə ünvanladığımız sorğuya cavab olaraq bildirildi ki, məsələyə hüquq-mühafizə orqanları baxır, ona görə mövqe vermək məqsədəuyğun deyil. R.Şahbazova məxsus votsap nömrəsinə göndərdiyimiz müraciət də cavabsız qaldı. Hər bir halda, qarşı tərəfin mövqeyini verməyə hazırıq.

AFN.az, Araşdırma qrupu