 |
|
|
Xəbər verildiyi kimi, dünən Azərbaycan Milli Elmlər Akademiyasının prezidenti postuna seçkilər keçirilib. Nəticələrə əsasən İsa Həbibbəyli qurumun rəhbəri seçilib.
TEREF.AZ JAMAZ.İNFO-ya istinadla bildirir ki, bu hadisəyə Milli Şuranın sədri, AMEA-nın üzvü, professor Cəmil Həsənli maraqlı münasibət sərgiləyir. Tarixçi alimin Facebook hesabında bununla bağlı yazıbnı olduğu kimi təqdim edirik:
Dünən İsa Həbibbəylinin Azərbaycan Milli Elmlər Akademiyasının prezidenti təyin edilməsi cəmiyətdə xeyli suallar doğurdu. Əgər 3 ay bundan əvvəl radikal islahat adı ilə təqdim olunanlar, Akademiyanın parçalanması İsa Həbibbəylinin prezident olacağı ilə nəticələnəcəkdisə daha bunun nəyi radikal və harası islahat idi. Həmin “islahatla” Akademiya öldürüldü, Həbibbəylinin prezident təyin edilməsi isə özünün dəfn mərasimi, bütövlükdə Akademiya elminin fatihəsinin verilməsidir. İsa Həbibbəyli Akademiyanın yerliçilik mərəzinə tutulmasının mərkəzi fiqurlarından, əsas koordinatorlarından biri idi. İndi isə birincisi oldu. Elmə heç bir töhfə verməyən bir dəstə həmyerlilərin Akademiya üzvü seçilməsində onun “əməyi və rolu” müstəsnadır.
Azərbaycan Milli Elmlər Akademiyası deyəndə ki, artıq Akademiya nə millidir, nə də elmidir. Orta səviyyəli birisi kimi İsa Həbibbəyli də çoxdan elmdən ayrıldığı üçün alimdən çox məmurdur, çinovnikdir. Adam ikicə cümlənin bir-birinin ardınca quraşdırıb normal bir fikri ifadə edə bilmir. Şübhəsiz ki, vaxtıla Həbibbəyli Mirzə Cəlilin yaradıcılığı, mühiti və müasirləri ilə bağlı bir şeylər yazıb. Amma son illərdəki “qələm təcrübəsi” ilə o özü Mirzə Cəlilin müasir personajlarından birinə çevrilib. Axı Mirzə Cəlil həmişə bizim müasirimizdir. Ata Akademiyanın prezidenti, oğul da Naxçıvan Gömrük Komitəsinin sədri. Daha əvvəl də yazdığım kimi son illərdə gömrük orqanları ilə akademiya arasında elə bir fərq yox idi. İndi bu fərq həm mənəvi, həm də milli mənada daha da qısaldı. Bir qalır gömrük komitəsinin adını Milli Gömrük Komitəsi qoysunlar.
Təbrizdə maraqlı bir deyim var: qanı damara görə alarlar. İsa Həbibbəyli bir tərədən Milli Məclisin deputatıdır, o bir tərəfdən Komitə sədri, yan tərəfdən YAP siyasi şurasının üzvü, yön tərəfdən YAP Elm və təhsil komitəsinin sədr müavini (görəsən sədri kimdir?), yuxarı tərədən Ədəbiyyat İnstitutunun direktoru, aşağı tərəfdən AMEA-nın Humanitar elmlər bölməsinin sədridir. Daha lüğətdə tərəfləri göstərən ifadələr qalmadığı üçün o biri vəzifələrini yazmıram. Hələ prezident olmazdan əvvəl keçirdiyi növbəti iclasların birində demişdi ki, bu gün bundan əvvəl 18 iclas keçirib. Onun prezident seçilməsi olsa-olsa keçirdiyi iclasların sayını artıra bilər, elmə elə bir töhfə verə bilməz. Dediyim odur ki, islahat deyilən nəsnə AMEA-nı elə vəziyyətə saldı ki, hətta İsa Həbbəyli kimi birisi də onun prezidenti ola bildi. Adam hələ birinci vitse prezident olanda müasir Azərbaycan dilçiliyinin ən mükəmməl bir alimi 80 yaşlı Tofiq Hacıyevə “məsləhət” görmüşdü ki, Tofiq müəllim yaxşı olar ki, özün ərizə yazıb könüllü şəkildə Dilçilik İnstitutunun direktoru vəzifəsindən gedəsən, biz səni əmrlə çıxarsaq “turdavoyun” körlanar. Əsl Mirzə Cəlilik mövzudur, özü də müasirindən.
Ramiz Mehdiyevdən sonra İsa Həbbəylinin Akademiyanın prezidenti təyin edilməsi AMEA deyilən qurumu yenidən ironiya mənbəyinə, gülüş hədəfinə çevirdi. Yəni İsa Həbibbəylinin prezidentliyi elə Akademiyanın Mehdiyevləşməsinin davamıdır, onun daha eybəcər formasıdır, regional xəstəliyin “elm məbədində” xroniki hal almasıdır. Vaxtılə mən onu və belələrini “donqili akademiklər” adlandırmışdım. İndi Akademiya özü bütövlükdə “Donqili Akademiya” oldu. Axır bu islahatların bir çıxacağı vardı. Şükür ki, bu xatasız ötüşdü və Milli Elmlər Akadeiyamızın “millisiz”” və elmsiz” donqili bir quruma çevrilməsi ilə yekunlaşdı.
“Qaz, yol, məktəb, uşaq bağçası, tibb məntəqəsi, ictimai nəqliyyat yoxdur, işıq dirəkləri aşır, əsasən yayda su qıtlığı hökm sürür”.
Qəbələnin Bəyli və Quşlar kəndlərinin sakinləri Meydan TV-yə kənddəki sosial problemlərdən danışıblar.
Onlar bildiriblər ki, hər iki kənddə yaşayış üçün vacib şərtlər olmadığından, insanların güzəranı olduqca ağır keçir. Bəylidə 75, Quşlarda da təqribən o civarda ailə yaşayır. Sakinlərin sözlərinə görə, Sovet vaxtı Qəbələnin kəndlərində, o cümlədən, Bəyli və Quşlarda mavi yanacaq olub. 1990-cı illərin əvvəllərində kəndlərə mavi yanacağın verilişi dayandırılıb. Mavi yanacağın verilməsi son illərdə başqa kəndlərdə bərpa olunsa da, bu iki kənddə hələ də adamlar qaz xətlərinə baxıb, köks ötürürlər.
Bəyli sakini İntiqam Quliyev danışır:
“Sovet vaxtı Ağdaş istiqamətindən gələn qaz borusu ilk bu kənddən keçib, bizdən Quşlara, oradansa başqa kəndlərə gedib. İndi də qaz xətləri yerindədir, bir az qırıq yerlərin təmir-bərpasına ehtiyac var. Ancaq qaz verilmir. Qaz qonşuluqdakı Savalan kəndinədək gəlir, ordan bu tərəfə xətt bağlıdır, verilmir. Məsələn, Quşlardan sonrakı kəndlərdə qaz var, o kəndlərə başqa istiqamətdən gəlir. Bir sözlə, ətraf kəndlərin hamısında qaz var, iki kənd qalıb ortada…”.
Bəyli və Quşlarda qış sərt keçir. Ancaq bir neçə ildir ki, kəndlilər evlərini isitmək üçün meşədən çör-çöp də yığa bilmirlər. Nəticədə baha qiymətə odun almalı olurlar. Odunun qiyməti ilbəil artır ki, bu da büdcəsi olmayan kəndliyə uyğun deyil.
Hər iki kəndin enerji təminatı bərbaddır. Qəzalı vəziyyətdə olan naqilləri saxlayan 30-40 ilin çürümüş taxta dirəklər aşmasın deyə, kəndlilər onların dibinə əlavə dirəklər basdırıblar. Qışda isinmək üçün qızdırıcılardan istifadə olunduğuna görə, naqillərdə qısaqapanmalar olur, köhnə ötürücü şitlər sıradan çıxır, nəticədə bu iki kənd tez-tez işıqsız qalır.
Təhsil məsələsi də hər iki kənddə problemlidir. Bəyli kəndinin uşaqları 2-3 kilometr qol qət edərək Quşlardakı məktəbə gedir. Halbuki, heç bu məktəb də istifadəyə yararlı deyil. Bina köhnədir, dərs ləvazimatları, avadanlıqlar yararsızdır.
Bəylidə tibb məntəqəsi yoxdur, Quşlardasa tibb məntəqəsi adına Sovetdənqalma bir tikili var – dağılmış, qapısı qıfıllı…
Sakin İlhamə Səfərova danışır: “Əvvəllər Bəyli ilə Quşlar eyni sovetlikdə idi, indi ayırıblar. Tibb məntəqəsi Quşlarda olub, Bəyli kəndinin sakinləri də həmin tibb məntəqəsindən istifadə edib. Uzun illərdir ki, tibb məntəqəsindən geriyə uçuq-sökük bir daxma qalıb. Hər iki kəndin xəstələri ən aşağı tibbi xidmət almaq üçün də rayon mərkəzinə getməlidir. Hər dəfə sistem qoşdurmaq üçün 10 manat o başa, 10 manat bu başa xərcləməlisən. Çoxu xəstələnir, imkansızlıqdan tibbi xidmət ala bilmir, dünyasını dəyişir”.
Bu kəndlərdə yol da bərbaddır. Yağış yağanda palçıq dizə qalxır, uşaqlar məktəbə gedəndə ayaqlarına sellofan bağlayır.
Kəndliləri narahat edən məsələlərdən biri də işsizlikdir. Bəyli və Quşlarla rayon mərkəzi arasında 30 kilometr yol var. Ancaq sakinlərin mərkəzə gedib-gəlmələri üçün ictimai nəqliyyat yoxdur. Taksiylə gedib-gəlmək təxminən 20 manata başa gəlir:
“Kəndlərdə iş yoxdur, məşğuliyyətimiz maldarlıqdır, əkindir, ancaq bu işlərlə məşğul olmağa şərait, su yoxdur. Əkinçilik aşağı səviyyədədir, baha başa gəldiyi üçün kəndlilər əkin işinə girişmir. Qalır bircə heyvandarlıq, o da orta səviyyədədir. İş yalnız rayonun özündə tapmaq mümkündür, ancaq ictimai nəqliyyat olmadığından, adamlar kənddən kənara çıxa bilmir”.
Məsələn, Bəylidə yalnız bir üzümçülük təsərrüfatı var, kəndlilərin bir qismi orada işləyir, o da mövsümi işdir. Üstəlik, bu iş bütün ailələri əhatə etmir.
Hər iki kəndin sakinləri uzun illərdir ki, sadalanan problemlərin həll olunması üçün aidiyyəti qurumlara yazır, ayaq döyür. Hər dəfə də eyni sözləri eşidirlər – növbəti ildən hər şey yaxşı olacaq:
“Deyirlər, gələn ay yol çəkiləcək, o biri ay qaz veriləcək… Artıq bu boş vədlərdən boğaza yığılmışıq”.
Qəbələ Rayon İcra Hakimiyyətindən Meydan TV-yə bildirilib ki, qurumun nümayəndələri tez-tez həmin kəndlərdə olur, problemləri qeydə alır. İcra hakimiyyəti problemlərin aradan qaldırılması üçün digər aidiyyəti qurumlara rəsmi müraciətlər edir. Kəndlərdə ilk növbədə qaz və yol problemlərinin həlli nəzərdə tutulub. //Meydan TV//
DogruXeber.az:[b][/b] - Oktyabrın 24-də Masallı Rayon Statistika idarəsi rayondakı bələdiyyələrin gəlirləri və xərcləri haqqında məlumat paylaşıb.
Məlumatda qeyd olunur ki, 9 ay ərzində Masallıdakı 36 bələdiyyə ümumilikdə 363, 6 min manat gəlir əldə edib, 380, 9 manat isə xərcləyib.
Cenub.az-ın araşdırma qrupub u rəqəmləri, necə deyərlər, çözəliyib.
Məlum olub ki, Masallı bələdiyyələrinin 9 ayda qazandığı 363, 6 min manatı rayondakı 36 bələdiyyəyə böləndə, hər bələdiyyəyə 9 ayda ən yaxşı halda 10.122 manat pul düşür. Həmin 10.122 manatı da 9 aya böləndə hər bələdiyyənin ortalama hər ay 1.122 manat düşdüyü anlaşılır.
Ortaya suallar gəlir?
Bələdiyyə bu gəlirləri nədən və haradan qazanır?
1. Subsidiyalar
2. Vergilər
3. İcarələr
4. Torpaq satışı
İndi oğulsan, öyrən ki, subsidiya nə qədərdir, icarədən, torpaq satışından, vergidən gəlir nə qədərdir?
Ölkədəki tankların, qumbaraların, minaların, sualtı qayıqların sayın öyrənmək olar, amma bələdiyyələrin gəlir-çıxarını yox.
Halbu ki, Bələdiyyələr Haqqında Qanuna görə, hər 6 aydan bir, BƏLƏDİYYƏLƏR seçicilərinə məlumat verməlidir. Bunun üçün çoxlu adam yığmaq çətin olsa, müvafiq saytlarda, ən azından özlərinin feyzbuk səhifələrində (onların belə səhifələri varmı?) həmin detallı məlumatları paylaşa bilərlər.
(cenub.az saytı belə məlumatları bizə təqdim olunsa, hər vaxt ödənişsiz, detalları ilə paylaşmağa hazırdır)
Bələdiyyələr qazandıqlarından çox xərcləyir, yaxud, niyə Masallıdakı 36 bələdiyyədən 31-i kəsirlə işləyir.
Yuxarıda qeyd etdiyimiz kimi, bələdiyyələr qazandığından çox xərcləyir və 36 bələdiyyənin 5-dən 4-ündən çoxu, kəsirlə işləyir.
Və bu, illərlə belədir. Qəribə səslənsə də, görəsən, hansı heyvandar “qısır” inəyi, süd verməyən inəyi illərlə saxlayar?
Bələdiyyələr, haradan qazandıqlarını gizlətdikləri kimi, həmin pulları hara xərclədiklərini də həmin qayda da gizlədirlər.
Rayonun çox önəmli yerlərində obyektlər tikili? Görəsən, onlar bələdiyyəyə nə qədər pul köçürür? Bir neçə il öncə AzərSUN Qızılağac bələdiyyəsindən 150 hektar torpağı icarəyə götürmüşdü. İndi o torpaqlar kimlərə və neçəyə icarəyə verilir?
Iki il öncə saytlarda məlumat yayıldı ki, rayonun Musaküçə kəndində 1000 maşından artıq qum satılıb. O pullar hara getdi?
Hələ Qəriblər kəndi ərazisində çay yatağında daşının daş-qum üçün hər gün ciblərə gedən “levi” pullar hara getdi?
Onlarla belə misallar çəkmək olar.
Niyə müvafiq orqanlar buna susur. Bələdiyyələrin fəaliyyətində aşkarlığa mane olanlar kimlərdir? Həmin dairələrdən seçilən deputatlar belə məlumatların gizlədilməsində niyə maraqlıdırlar?
Axı, bu aşkarlıq nə pul, nə digər material tələb etmir.
Gecə-gündüz saflıqdan, paklıqdan danışanlar, niyə müvafiq qanunlara hörmətsizlik edib bələdiyyələrdə aşkarlığı təmin etmirsiniz?
Yalançı rəqəmlərlə başımızı niyə qatırsiniz?
Bizimlə “faiz-faiz” oynamaqdansa, yazın kı, konkret hansı bələdiyyələr gəlirlə işləyib, hansı bələdiyyələr illərlə kəsirlə işləyir?
Qısası, hər şeyi detalları, xırdalıqları ilə bildirin və biz də çap edək. Xalq bilsin Kİ, harada nə var, kim nəyi neçəyə alır, neçəyə satır? Demirsinizsə, tələb etmirsinizsə, inciməyin, belələri ilə ya şəriksiniz, ya aciz.
Qeyd: Yəqin ki, yaydığı məlumatı “alt-üst” etdiyimə görə, Masallı Statistika İdarəsinin gənc və perspektivli müdiri bizdən inciməz- çünki belə detallı məlumatlar verməyi onlara qadağan ediblər.
Həm də belə gizlədilən məlumatlar təkcə bələdiyyələrdə deyil.
Araşdıracağıq. Bizi izləyin. Kim aşkarlıqdan qaçırsa, o...
Cenub.az. Zahir Əmənov
Göygöl şəhəri 1 nömrəli tam orta məktəbin müəllim kollektivi və həmin məktəbdə təhsil alan uşaqların valideynləri Elm və təhsil naziri Emin Əmrullayevə müracət edib.
Nazirə edilən bu dəfəki müraciət isə ənənəvi müraciətlərdən fərqlənib.
Söhbət adıçəkilən məktəbdə sentyabrın 15-dən bu günə qədər suyun olmamasıdır.
Gununsesi.info-nun elektron postuna daxil olan müraciəti biz də təqdim edirik.
Təhsil naziri cənab Emin Əmirullayevə.
Hörmətli cənab nazir!
Fəaliyyət göstərdiyimiz Göygöl şəhəri 1 nömrəli tam orta məktəbdə sentyabrın 15-dən bu günə qədər su yoxdur.
Bu səbəbdən 3 mərtəbəli məktəbdə 12 sanitar qovşağını təmizləmək mümkün deyil.
Məktəbdə müəllim və şagirdlərin ümumi sayı 1000 nəfərdən artıqdır.
Həmçinin 12 gündən artıqdır ki, məktəbdə işıq yoxdur.
Məktəbin müəllimləri şəxsi vəsaiti hesabına, cibimizdən işıq sayğacının kartına pul yükləyirik. (Zərurət olarsa ödəniş qəbzini də Sizə göndərə bilərik.)
Məktəbdə hər bir sinif müəllimi süpürgə və digər yumşaq inventarları öz şəxsi vəsaiti ilə alır.
Göygöl Təhsil Sektoruna bu problemlər barədə bir neçə dəfə müraciət olunub.
“Pul yoxdur, yuxarının da məlumatı var, pul olanda su motoru düzələcək, sayğaca pul yüklənəcək” deyə cavablar verilib.
Bu barədə Gəncə-Daşkəsən Regional Təhsil İdarəsinə, Göygöl Təhsil Sektoruna dəfələrlə rəsmi məktubla müraciət edilib.
Yazdıqlarımızı kiminsə şəxsinə yazılmayıb.
Hamısı faktlardır. Araşdırmanızı xahiş edirəm.
Cənab nazir!
Bu məsələlərdən sizin məlumatlı olduğunuz bildirilir.
Müəllimlər də, şagirdlər də, valideynlər də bilmək istəyir ki, doğrudan da cənab nazir Emin Əmirullayevin bu işdən xəbəri var? Yoxsa bizi aldadırlar?
Göygöl şəhəri 1 nömrəli tam orta məktəbin bütöv müəllim, şagird, müəllim kollektivi bilmək istəyir ki, biz niyə cibimizdən süpürgə almalıyıq?
Biz niyə məktəbin işığının pulunu cibimizdən ödəməliyik?
Biz niyə 1 aydan çoxdur təmizlənə bilməyən sanitar qovşaqlarından istifadə etməliyik?
Biz niyə məktəbə kapron qablarda əlimizdə su daşımalıyıq?
Bu işin cavabdehi kimdir?
Niyə məktəbdə bu cür xoşagəlməz hallar yaşanır?
Suallarımıza cavab istəyirik.
Hörmətlə: Göygöl şəhəri 1 nömrəli tam orta məktəbin şagird, müəllim, valideyn kollektivi
Gununsesi.info
Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan sabiq polis əməkdaşı Ramin Talıbovun cinayət işi üzrə məhkəmə prosesi başlayıb.
Bakı Ağır Cinayətlər Məhkəməsində hakim İradə Həsənzadənin sədrliyi ilə baş tutan prosesdə təqsirləndirilən şəxslərin anket məlumatları dəqiqləşdirilib.
Daha sonra Ramin Talıbovun vəkili bir neçə vəsatətlə çıxış edib. Vəkilin ilk vəsatəti müdafiə etdiyi şəxs barəsində olan cinayət təqibinə bəraətverici əsaslarla xitam verilməsi olub. O bildirib ki, müdafiə etdiyi şəxs barəsində istintaq orqanı tərəfindən verilən ittihamda heç bir sübut yoxdur: “20 il əvvəl istintaqa ifadə verən Hindistan vətəndaşları deyiblər ki, Samir Kərimovun yanında bir cavan polis əməkdaşı olub, həmin polis əməkdaşı kənarda dayanıb, heç bir halda müdaxiləsi olmayıb. Bundan başqa, müdafiə etdiyim şəxsin həmin adamlarla telefon danışığı da olmayıb”.
Prokuror isə deyib ki, bu məsələyə məhkəmə araşdırmasının sonunda qiymət verilməlidir.
O, vəsatətin baxılmamış saxlanılmasını istəyib. Hakimlər hazırkı mərhələdə vəsatəti baxılmamış saxlayıblar.
Daha sonra vəkil prosesin audioyazı ilə aparılması barədə vəsatət verib. Hakimlər hazırkı mərhələdə prosesin audioyazı ilə aparılması üçün texniki imkanların olmadığını deyiblər. Bu səbəbdən vəsatət təmin olunmayıb.
Bundan sonra vəkil müdafiə etdiyi Ramin Talıbovun əleyhinə ifadə vermiş bəzi şahidlərin dindirilməsi barədə vəsatət verib.
Vəkil qeyd edib ki, həmin şahidlər 13 il əvvəl prokurorluqda dindirilsələr də, cinayət işi sonradan yenilənən zaman həmin şahidlərin dindirilməsi, təqsirləndirilən şəxslərlə üzləşdirilməsi təmin olunmayıb.
Bu vəsatəti digər təqsirləndirilən Samir Kərimovun vəkili Kamandar Nəsibov da dəstəkləyib. Onun sözlərinə görə, sabiq baş prokuror Zakir Qaralovun Samir Kərimovla yaxşı münasibətləri olub.
O qeyd edib ki, Qaralova kostyumu da Samir Kərimovun atası alıb. Vəkilin sözlərinə görə, Abbas Abbasovun oğlu Aydın Abbasovun şikayətindən sonra Samir Kərimovla bağlı araşdırma başlanılıb. Vəkil deyib ki, şikayətçi Hindistan vətəndaşları Aydın Abbasovun himayədarlığı altında olublar:
“Aydın Abbasovun müraciətindən sonra Zakir Qaralov məsələyə qarışıb. Amma Samir Kərimovla bağlı heç bir araşdırma aparılmayıb. Biz müdafiə tərəfi olaraq dəfələrlə bununla bağlı istintaqa müraciəöt etsək də, bu iş dondurulub. Cinayət işinin icraatı dayandırılıb. Biz də hesab edirik ki, həmin şahidlər cinayət işi təzələnəndən sonra dindirilməli idilər. Amma istintaq nədənsə bunu etməyib. Biz də həmin şahidlərin dindirilməsinin təmin olunmasını istəyirik”.
Samir Kərimov deyib kİ, hazırda 62 yaşı var, ürək-damar sıxıntısı xəstəliyi keçirib, həmçinin kəskin böyrək çatışmçazlığından əziyyət çəkir. Göz yaşlarını saxlaya bilməyən Samir Kərimov deyib ki, prokurorluq orqanlarında bir sıra yüksək vəzifələrdə xidməti olub, sonuncu iş yeri isə Bakı şəhər prokurorluğunda müstəntiq vəzifəsi olub. O bildirib ki, Baş prokurorluqda onun vəzifəsi daha yüksək olub və Zakir Qaralovun baş prokuror təyin olunması üçün təqdimatın verilməsində iştirak edib.
Samir Kərimov əlavə edib ki, Zakir Qaralov baş prokuror təyin olunandan sonra onu Baş Prokurorluqdan kənarlaşdırıb və Bakı şəhər Prokurorluğuna müstəntiq təyin edilib.
Samir Kərimov qeyd edib ki, bu cinayət işi üzrə 1 il istintaq aparılıb və işlə bağlı onu kiminləsə üzləşdirməyiblər.
Müşavirə keçirən hakim heyəti isə vəsatəti hazırkı mərhələdə baxılmamış saxlayıb. Hakim İradə Həsənzadə deyib ki, cinayət işi üzrə əsas şahidlər dindirildikdən sonra əlavə şahidlərin dindirilməsi məsələsi müzakirə olunacaq.
Daha sonra Ramin Talıbovun vəkili o dövrdə bölmə rəisi işləyən Ülvi Allahyarovun əlavə şahid qismində dindirilməsi barədə vəsatət verib. Vəkilin bu vəsatəti təmin edilib. Hakim deyib ki, əsas şahidlər dindirildikdən sonra bu şahidin dindirilməsi təmin olunacaq.
Bundan sonra Samir Kərimovun vəkili Kamandar Nəsibov deyib ki, müdafiə etdiyi şəxs Baş Prokurorluqda müxtəlif yüksək vəzifələrdə çalışıb. Onun sözlərinə görə, sonuncu iş yeri isə Bakı şəhər Prokurorluğu olub və sonradan işdən çıxarılıb.
Kamandar Nəsibov bildirib ki, işdən çıxarılandan sonra Samir Kərimovun barəsində araşdırma başlanıb: “Bununla bağlı biz müdafiə tərəfi olaraq Baş Prokurorluğa dəfələrlə müraciət etmişik. Teleqramlar vurmuşuq. Bununla bağlı iş mareriallarında da var. Samir Kərimov burada iş tapa bilmədiyi üçün Rusiyaya gedib. Orada vətəndaşlığı qəbul edib, Rusiyada yaşayıb, amma heç yerdə gizlənməyib. Dəfələrlə Azərbaycanın Rusiyadakı səfirliyində olub, onların təşkil etdikləri tədbirlərdə iştirak edib.
Rusiyada olmasına baxmayaraq Samir Kərimov yenə də barəsində aparılan araşdırma ilə bağlı teleqramalar göndərib, dindirilməsini istəyib. Amma bu məsələ araşdırılmayıb. Bir gün Samir Kərimov səfirliyə gedib. Orada Daxili İşlər Nazirliyinin nümayəndəsi onu qəbul edib və deyib ki, barəsində araşdırma başlanıb. Bundan sonra onu Moskva prokurorluğuna aparılıb. Azərbaycan tərəfi onu tələb edib.
Amma Moskva prokurorluğa Samir Kərimovu təhvil verməyib və onun barəsində olan cinayət işinin materiallarını tələb edib. Azərbaycan prokurorluğu isə onun barəsində olan sənədləri Moskva prokurorluğuna göndərməyib. Biliriblər ki, onların sənədləri orada bərbad vəziyyətə düşəcək”.
Kamandar Nəsibov deyib ki, sonradan Daxili İşlər Nazirliyinə müraciət ediblər: “Nazirlikdən Samir Kərimovun barəsində axtarışın ləğv edildiyini deyiblər. Bir il sonra isə müraciətimizə cavab olaraq bildirilib ki, həmin sənədlər məhv edilib. 2004-cü ildən 2022-ci ilin fevralına kimi Samir Kərimovun barəsində axtarış aparılmayıb. Bu da rəsmi sənədlərlə iş materillarında öz təsdiqini tapır.
Həmçinin Samir Kərimov şəxsiyyət vəsiqəsini yeniləmək üçün ASAN xidmətə müraciət edir. Səhəri gün isə onu həbs edirlər. Bildirmək istəyirəm ki, Samir Kərimovun xəstəliyi var. Onun həbsdə saxlanılmasına ehtiyac yoxdur. Bundan əlavə, cinayət işinin cəlb etmə müddətinin vaxtı da keçib. Onun barəsində seçilmiş həbs qətimkan tədbirinin ev dustaqlığı ilə əvəz olunmasını istəyirik”.
Samir Kərimov bildirib ki, onun bu işlərdə heç bir günahı yoxdur: “Məhkəmə araşdırması zamanı da bu müəyyən olunacaq. Mən də bu işə aydınlıq gətirilməsini istəyirəm. Bu işi Abbas Abbasovun oğlu Aydın Abbasov qurub”.
Prokuror isə deyib ki, təqsirləndirilən şəxs hüquq-mühafizə orqanları tərəfindən axtarışda olub. Onun sözlərinə görə, Samir Kərimov Rusiyaya gedib və bundan sonra da ad-soyadını dəyişib: “2006-cı ildə isə Rusiya vətəndaşlığını alıb. Başqa ad-soyadla Azərbaycana gəlməsindən heç kim xəbərdar ola bilməzdi”.
Bu zaman prokurorla vəkil Kamandar Nəsibov arasında mübahisə yaranıb. Hakim isə vəkilə xəbərdarlıq edib. Müşavirə keçirən hakim heyəti Samir Kərimovun barəsində seçilmiş həbs qətimkan tədbirinin dəyişdirilməsi barədə vəsatəti təmin etməyib.
Daha sonra çıxış edən Samir Kərimov deyib ki, o, hələ müstəntiq olan zaman Zakir Qaralovun göstərişi ilə barəsində araşdırma aparılması başlanılıb:
“Digər otaqda bununla bağlı araşdırmalar aparılırdı. Mənə bir söz deyilmirdi. Hiss edirdim ki, mənimlə bağlı nəsə bir iş görürlər. Bununla bağlı özüm Baş Prokurorluğun Ağır Cinayətlərə Dair İşlər üzrə İstintaq İdarəsinə getdim. Orada məni Nurəddin adlı müstəntiq dindirdi. Ondan sonra məni heç kim heç yerə çağırmayıb, dindirən olmayıb. Burada iş axtarsam da, tapa bilmədim. 2004-cü ildə Rusiyaya getdim. Orada vəkil olmaq üçün sənəd verdim. Rusiyada olduğum zaman səfirliyin tədbirlərindən iştirak etmişəm. Qanuna görə, cinayət işinin cəlb etmə müddətinin vaxtı 12 ildir. Amma bu işin üstündən 12, 14 il yox, düz 18 il keçib”.
Samir Kərimov cinayət işi üzrə adı keçən 11 nəfər Hindistan vətandaşının yerinin müəyyən edilməsini və məhkəmədə dindirilməsini istəyib. Məhkəmə vəsatəti təmin etməyib.
Məhkəmə baxışı oktyabrın 31-nə təyin edilib.
Qeyd edək ki, Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan Ramin Talıbovla qabaqcadan əlbir olub, Hindistan vətəndaşlarından rüşvət alıb.
İstintaq sənədlərinə görə, 2001-ci ildə Bakı Şəhər Prokurorluğunun mühüm işlər üzrə müstəntiqi işləyən Samir Kərimov Yasamal rayon Polis İdarəsinin 28-ci polis bölməsinin əməkdaşı polis zabiti Ramin Talıbov və digər polis əməkdaşlarının müşayiəti ilə Hindistan vətəndaşlarının işlədiyi yuyucu toz satışı ilə məşğul olan şirkətə gedib.
Sabiq müstəntiq şirkətə baxış keçirib, hindistanlıları yararsız yuyucu tozlar satmaqda ittiham edib.
Bundan sonra müstəntiq məsələnin bağlaması üçün Hindistan vətəndaşlarından 20 min dollar rüşvət alıb.
Təqsirləndirilən Ramin Talıbov isə həmin vaxt sahə inspektoru kimi fəaliyyət göstərib, müstəntiqin tələbi ilə onunla birgə gedib.
Bir müddət sonra müstəntiqin əməlinin üstü açılıb, o, prokurorluq orqanlarından xaric olunub. Həmin vaxtdan isə Samir Kərimov ölkəni tərk edib.
Faktla bağlı Samir Kərimov və Ramin Talıbov barəsində cinayət işi açılıb. Samir Kərimov ölkədə olmadığı üçün barəsində həbsli axtarış elan olunub. Ramin Talıbov isə zaminə buraxılıb.
İttiham olunan Bakı şəhər Prokurorluğunun mühüm işlər üzrə sabiq müstəntiq Samir Kərimov cinayət hadisəsi törətdikdən sonra ölkədən çıxdığı üçün iş 20 il ərzində dayandırılıb. Bu ilin əvvəlində isə cinayət işi yenilənib.
İstintaq orqanı tərəfindən təqsirləndirilən şəxslərin barəsində Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) və 311.3.3-cü (külli miqdarda rüşvət alma) maddələri ilə ittiham elan olunub.
Təqsirləndirilən şəxslərdən Samir Kərimov həbsdə, Ramin Talıbov isə zamindədir.
Xatırladaq ki, Hindistan vətəndaşlarını işlədiyi şirkət baş nazirin sabiq 1-ci müavini Abbas Abbasovun oğlu Aydın Abbasova məxsus olub.
Qeyd edək ki, Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan Ramin Talıbovla qabaqcadan əlbir olub, Hindistan vətəndaşlarından rüşvət alıb.
Samir Kərimov 2001-ci ildən axtarışda olub və ötən il həbs olunub.
İstintaq orqanı tərəfindən təqsirləndirilən şəxslərin barəsində Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) və 311.3.3-cü (külli miqdarda rüşvət alma) maddələri ilə ittiham elan olunub.
Xatırladaq ki, təqsirləndirilən şəxslərdən Samir Kərimov həbsdə, Ramin Talıbov isə zamindədir.
Teleqraf.com
Xəbər verdiyimiz kimi, bu gün AMEA-nın ümumi yığıncağı keçirilib. Yığıncaqda seçki keçirilib və millət vəkili akademik İsa Həbibbəyli AMEA-nın prezidenti seçilib.
Qaynarinfo xəbər verir ki, İsa Həbibbəyli ailəlidir, iki oğlu, bir qızı var.
AMEA prezidentinin oğlu Səhət Həbibbəyli Naxçıvan Muxtar Respublikası Dövlət Gömrük Komitəsinin sədridir. Gömrük xidməti general-leytenantı rütbəsi daşıyan Səhət Həbibbəyli 2019-cu ildən bu vəzifəni tutur.
İsa Həbibbəylinin digər oğlu Ərəstü Həbibbəyli isə Azərbaycan Respublikası Baş nazirinin Katibliyinin rəisidir. O, birinci dərəcəli Fövqəladə və Səlahiyyətli Elçi rütbəsi daşıyır.
Deputatın qızı Günay Mənsimova isə Xırdalan şəhər 1 saylı Notariat Kontorunun rəisidir.
Ötən həftə Bakı Nəqliyyat Agentliyinin Mətbuat xidmətinin rəhbəri Mais Ağayev sübh saatlarında Bakı küçələrinin birində çəkilən videonu öz sosial şəbəkə hesabında paylaşaraq Bakının tıxacsız şəhər olması üçün vətəndaşları şəxsi avtomobillərindən istifadə etməməyə çağırıb. O qeyd edib: "İctimai nəqliyyatın hərəkət etdiyi tıxacsız Bakı. Yalnız sübh tezdən deyil, bütün günü bu cür olmasını istəyirsinizsə, şəxsi avtomobillərdən istifadədən imtina edib ictimai nəqliyyatın xidmətindən yararlanın. Daha rahat və tez mənzil başına çatmağın başqa alternativi yoxdur!"
Xatırladaq ki, Prezident İlham Əliyevin 2022-ci il 7 fevral tarixli “Bakı şəhərinin inzibati ərazisində nəqliyyat sahəsində idarəetmənin təkmilləşdirilməsi haqqında” imzaladığı Fərmanla Bakı Nəqliyyat Agentliyi Bakı Şəhər İcra Hakimiyyətinin balansına verildi. Ona görə verildi ki, Bakı şəhərinin inzibati ərazisində yol hərəkətinin təşkili, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində göstərilən xidmətlərin keyfiyyəti yüksəldilsin, bu sahədə idarəetmə təkmilləşdirilsin. Bu o demək idi ki, BNA artıq müstəqil bir dövlət qurumu kimi hərəkərin təşkilində vəzifə və öhdəliyini tam olaarq həyata keçirə bilmir. Parkinqlərin olmaması, Bakıda tıxaclar, sözün əsl mənasında tıxacların atmasının səbəblərindən biri olan avtobus zolaqlarının ehtiyac olmadan çəkilməsi və başqa addımlar BNA-nı vətəndaşın gözündə işə yaramaz bir quruma çevirmişdi. Bu günlərdə isə yalnız avtobusların gecikməsi ilə bağlı xəbərləri yaymaqla gündəmdə olan BNA sözçüsünün "yeni" açıqlaması birmənalı qarşılana bilməz.
TEREF.AZ-ın məlumatına görə, media və ictimaiyyətlə əlaqələr mütəxəssisi Orxan Musa Bizimyol.info xəbər portalına açıqlamasında bildirib ki, ölkənin nəqliyyatını idarə edən qurum nümayəndəsinin verdiyi təklif anlaşılandır və həqiqət payı da var. Ancaq istismar müddəti bitdiyi üçün xəttə buraxılmayan, sayının yetərsiz olmadığı iddia edilən, qiymət artımı tələb edildiyi üçün sükan arxasına oturulmayan avtobuslara görə və görünən-görünməyən birçox səbəbdən şəhərdə "yerləşdirilən" dayanacaqlar dolub daşır.
Mütəxəssisin fikrincə, ölkə nəqliyyatındakı tək problem şəxsi avtomobildən istifadədirsə və ya sübh tezdən çəkilmiş kadra əsaslanaraq, günün işlək saatlarını müqayisə edərək təklif olunan tək həll yolu budursa, elə cənab Mais Ağayev cəmiyyətə təklif verməyi bacardığı kimi nümunə olmağı da bacarmalıdır: “Mətbuat katibinin təklifinə qoşularaq onun bu təklifinə dəstək olmaq məqsədiylə bir təklif də mən verirəm. Sübh videosunu bütövlükdə bir gün müddətinə nümunə göstərən Mais Ağayev və BNA-da çalışan yüksək vəzifəyə sahib idarəçidən xadiməyə kimi bütün əməkdaşları avtomobil əvəzinə ictimai nəqliyyatdan istifadə edərək cəmiyyətə nümunə ola bilər. Hətta bir piar çalışması olaraq da, bu təqdirəlayiq addımı avtobus kameralarından alınmış görüntüləri ictimaiyyətlə paylaşaraq, cəmiyyət tərəfindən quruma inam və qurumda şəffaflıq yarada bilər”.
Orxan Musa qeyd edib ki, ictimai əlaqələr çox həssas fəaliyyət növüdür. Hansısa fikrə və ya hadisəyə şərh verəndə 100 ölçmək bəs etmir. Açıqlamadakı "fikir" yetərsiz təkliflə bəzədilsə də, icrasını təşkil etmək xüsusi strategiya tələb edir. Əgər qurum nümayəndəsi cəmiyyətin "fəryadını" düzgün analiz edib, problemə daha konstruktiv təkliflər verə bilsə və ya verilən təklifləri icra edə bilsə, qurumun zərər görmüş imicini bərpa edə bilər.
“Osmanlı hökmdarları kimi fərqli libas geyinib xalq arasına qarışmağa ehtiyac yoxdur. Pensiya arxasınca banka gedən alnı qırışmış qoca vətəndaşın, çiynindəki kitab dolu çantanın ağırlığından buruşmuş məktəblinin göylərə yüksələn "nəqliyyat problemi" adlı naləsini əyani eşidə bilər. Sosial şəbəkədən də "reaktiv" istifadə edən qurum sözcüsü üçün problem dinləmək üçün məkan və ya platforma fərq etməməlidir. Əsas odur ki, problemləri həll etməyə can atsın” - deyə mütəxəssis qeyd edib.
Ekspert bildirir ki, ictimai nəqliyyatdan istifadənin şəhərə necə faydalı olduğunu sübut edəcək bir vizual vasitədən istifadə edərək, cəmiyyət üçün bu faydalı addımın davamlılığını ictimai nəqliyyatın digər vasitələrinin məsul nümayəndələrinə ötürə bilər. Metropolitendən və ADY sürətli qatarından istifadə etməklə nəqliyyat problemi həll olacaqsa, bu addımlar atılmalıdır.
“Təsəvvür edək ki, ən azı bir qurumun nümayəndələri öz işlərinin dəyərini göstərmək üçün bu addımı atırlar. Zərəri yox, faydası olar. Hətta vaxtilə yan amiotrofik skleroz (YAS, ingilis dilində ALS) xəstəliyi üçün başladılan sosial məsuliyyət trendinə oxşar bir trend də başlada bilər. Bunun üçün başından buz dolu soyuq su vedrəsini boşaltmağa da ehtiyac yoxdur. Şəxsi avtomobildən imtina edin demək də, həll yolu təklif etmək də kifayət etmir. Həllə dair təklifləri icra etməklə yollarımızı tıxacdan xilas etmək olar” - deyə Orxan Musa vurğulayıb.
Xatırladaq ki, bir müddət əvvəl nəqliyyat ekspertləri bildirib ki, BNA Bakını piyada şəhərinə çevirmək istəyir. Bu isə mümkün olmayan bir düşüncə kimi qəbul edilirdi. Orxan Musa qeyd edib ki, BNA bu utopik arzusunu reallaşdırmağı üçün dövlətin hər bir strukturu ilə birgə gələcəkyönümlü layihələr hazırlayıb icra edilməsinə nail olmalıdır. Məsələn Azərbaycan Avtomobil Yolları Dövlət Agentliyi ilə yolların çəkilişində, Ekologiya və Təbii Sərvətlər Nazirliyi ilə yol kənarındakı ağacların qorunmasında, İcra hakimiyyətləri və bələdiyyələr ilə binaların yerləşmə nöqtələrində və s. işlərdə söz sahibi olmasa da, fikirlərə ortaq olmaq mümkündür.
“Piyadaların rahatlıqla hərəkət etməsi üçün səki, zolaq, məhəccər təmin edilməyən bir şəhərə "piyada şəhəri" vədi vermək samanlıqda iynə tapılacağına söz verməyə bənzəyir. Yaxın dövrlərdə müəyyən ərazilərdə çəkilmiş velosiped zolaqlarının üzərində kiosk yerləşdirilməsi və ya həmin yolların ağacda sonlanması kimi maneələrlə qarşılaşaraq görülən fəaliyyətin yetərsizliyinə şahid olduq” - deyə Orxan Musa əlavə edib.
P. S. Mais Ağayevin təklifi o zaman reallaşa bilərdi ki, Bakıda 30 il əvvəl olduğu kimi 1 milyon əhali yaşayaydı. O zaman belə tıxac olmadığı üçün heç bu problem gündəmə də gəlməzdi. Amma bu gün real olaraq Bakıda 5 milyon əhali yaşayır. Və təcrübələr göstərir ki, ictmai nəqliyyatın gücü bu vətəndaşları daşıyacaq qədər deyil.
İllərlə ictmai nəqliyyat - dəmir yolları, metro, elə BNA-nın özünün rəhbərliyində olan şəxslər Bakıda olan nəqliyyat problemini gözardı ediblər. Və bu gün Bakı artıq tıxacdan boğulduğu bir zamanda edilən bu təklif sadəcə absurddur. Ali təhsil müəssisləri, dövlət qurumlarının binaları və s. Bakı şəhərində olduğu müddətdə Bakıda vəziyyət elə belə də davam edəcək. Bu qeydlər digər şəhərlərimizə də aiddir.
İki yük dolu maşını Mazımçay Gömrük Postunda qalan sahibkar İlyas Qocamanovun səlahiyyətli nümayəndəsi Ayaz Qocamanov mətbuat vasitəsi ilə ölkə başçısı İlham Əliyevə, Birinci vitse-prezident Mehriban Əliyevaya və Dövlət Gömrük Komitəsinin (DGK) sədr əvəzi, general-leytenant Şahin Bağırova videomüraciət edib.
DİA.AZ-ın məlumatına görə, sahibkar İlyas Qocamanovun səlahiyyətli nümayəndəki Bizimxeber.az-a ünvanladığı videomüraciətdə bildirir ki, şirkətlər və onlara məxsus anbarlar Sumqayıt qeydiyyatındadır.
Qanunun tələblərinə, həmçinin sahibkarların rahat fəaliyyətinin tənzimlənməsi üçün yüklər şirkətin qeydiyyatda olan ünvanlarında rəsmiləşdirilməlidir. Amma Mazımçay Gömrük Postunda yüklərin təyinat yeri Bakı şəhərinə dəyişidrlib.
Ağdam Rayon İcra Hakimiyyəti tender qaydalarını pozub.
Teref.az xəbər "Qafqazinfo"ya istinadla xəbər verir ki, Ağdam RİH rayon ərazisində ikinci mərhələ abadlaşdırma (yaşıllaşdırma) xidmətlərinin görülməsi işləri ilə bağlı tendərə yekun vurub.
Tenderin qalibi “Caspian Sun” MMC olub. Tərəflər arasında 7798 manatlıq sözləşmə imzalanıb.
Məsələ burasındadır ki, müsabiqənin qalibinin 1079.64 manat vergi borcu var. Bu isə qanun pozuntusu deməkdir. İş burasındadır ki, “Dövlət Satınalmaları haqqında” Qanunun 6.2.5-ci maddəsinin tələbləri vergi borcu olan şirkətlərin tenderdə iştirakını istisna edir.
Ağdamın icra başçısı Vaqif Həsənovdur. “Caspian Sun” MMC isə dövlət qeydiyyatında 2018-ci ildə alınıb. Açıq mənbələrdə barəsində heç bir məlumat tapılmayan şirkətin qanuni təmsilçisi Məmmədov Taleh Rafiq oğludur. Şirkət hüquqi ünvanı isə Vaqif Həsənovun vaxtı ilə icra başçısının müavini işlədiyi Xəzər rayonu ərazisindədir.
Bundan başqa, Ağdam Rayon İcra Hakimiyyətinin 2022-ci ildə elan etdiyi və artıq başa çatan daha üç tender diqqət çəkir.
Bunların hər üçü Ağdam Bayraq meydanı üçün dövlət bayrağının alınması ilə bağlıdır.
Məsələ burasındadır ki, Ağdam RİH sentyabrın 12-də Şərifov Fərid Hacı oğlu ilə 8x16 ölçüdə 6 ədəd Azərbaycan Respublikasının Dövlət Bayrağının alınmasıyla bağlı sözləşmə imzalayıb. Müqavilənin şərtlərinə əsasən, RİH qarşı tərəfə 4194 manat ödəyib.
İş burasındadır ki, Ağdam RİH bir ay sonra, yəni ötən gün yenidən Bayraq meydanı üçün eyni ölçüdə, eyni sayda bayraq alıb. Bu dəfə isə “Qarabağ Təmir-Tikinti” MMC-yə keçən aydan fərqli olaraq, ikiqat, yəni 8850 AZN ödənilib. Sözügedən şirkət ötən ildən başlayaraq, Ağdam RİH-in 8 tenderinin qalibi olub.
Bayraq tenderi isə sonuncu deyil. Belə ki, 4 ay əvvəl də “Azbayraq” MMC-dən Bayraq meydanı üçün 4 ədəd eyni ölçdə bayraq alınıb. İyun ayında edilən ödəniş isə 3280 manat təşkil edib.
Kənd Təsərrüfatı Nazirliyi sifarişçi olduğu növbəti satınalmaya yekun vurub.
TEREF.AZ Qlobal.az-a istinadla xəbər verir ki, nazirliyin "Yeni inzibati bina üçün mebel və inventarlar”ın satın alınması" lotu üzrə keçirdiyi tenderin məbləği 1.394.994 manat təşkil edib.
Tenderdə "Avşaroğlu" Məhdud Məsuliyyətli Cəmiyyəti qalib elan edilib.
Nazirlik ilə "Avşaroğlu" MMC arasında bağlanan müqavilənin şərtlərinə görə şirkət nazirliyi 111 adda mal ilə təmin edəcək. Alınacaq mebellər əsasən divan, kreslo, paltar dolabı, televizor altı, ofis masası, stul, stol və digər avadanlıqlardan ibarət olacaq.
Müqavilədə diqqətçəkən məqamlardan biri siyahıdakı mebellərin parametrlərinin dəqiq göstərilməsidir.
Məsələn, satınalma müqaviləsi üzrə alınacaq 1 ədəd rəhbər kreslosunun qara rəngdə, təbii dəri bellikdən, erqonomik, taxta ayaqları, hündürlük tənzimləyicisi, vakum qazlift ölçülərinin və çəki dözümlülüyünün 200 kq olması şərtləndirilir.
Qeyd edək ki, "Avşaroğlu" MMC 2001-ci ildə təsis edilib.
Şirkətin qanuni təmsilçisi Cəfərov Eldəniz Raqub oğludur.
Cahandar Laçınlı
Qlobal.az