İxtisaslı kadrlar kənarda qalır, dost-tanışlara yol açılır…

İki gün əvvəl Dövlət Təhlükəsizlik Xidmətinin (DTX) Mədəniyyət Nazirliyində apardığı xüsusi əməliyyat hələ də gündəmin başlıca mövzusudur. İnternetdə qısa araşdırma apardıqda Mədəniyyət Nazirliyinin, eləcə də bu gün Prezidentin sərəncamı ilə işdən çıxarılan birinci müavin Elnur Əliyevin niyə DTX-nın “qəzəbinə gəldiyini” aydınlaşdırmaq heç də çətin deyil.


Elnur Əliyev
Tərəfimizdən aparılan araşdırma nəticəsində belə qənaətə gəlmək olur ki, cəmi 1 il əvvəl mədəniyyət nazirinin müavini vəzifəsinə təyin olunan E.Əliyev qısa müddətdə nazirlikdə bütün strukturu ələ ala bilib. Belə ki, o, birinci müavin kreslosuna oturar-oturmaz Mədəniyyət Nazirliyində bir sıra önəmli vəzifələrə öz adamlarını yerləşdirib. Deyilənə görə, “arxası” möhkəm olan Elnur Əliyev bəzi hallarda nazir Anar Kərimova qarşı çıxmaqdan da çəkinməyib. Görünür, məhz bu səbəbdən də onu Mədəniyyət Nazirliyinin “Boz kardianal”ı adlandırıblar.

Lakin çox təəssüflə qeyd etməliyik ki, E.Əliyevin əksər kadrları qeyri-peşəkarlardan ibarət olduğundan, sırf qohumbazlıq prinsipi əsasında seçildiklərindən, onlar vəzifə başına keçən kimi rəhbərlik etdiyi qurumu söküb-talamağa başlayıblar. Buna misal kimi, 2021-ci ilin noyabr ayında Qlobal.az saytında dərc olunan bir materialı göstərə bilərik. Saytda dərc olunan “Gəncə Regional Mədəniyyət İdarəsində şübhəli satınalma – Borclu şirkət necə qalib edilib?” sərlövhəli yazıda bildirilir ki, Gəncə Regional Mədəniyyət İdarəsi 2021-ci ilin noyabr ayının 10-da “Abadlaşma xidmətlərinin satınalınması” lotu üzrə sifarişçi olduğu satınalmaya yekun vurub:

“Satınalmanın məbləği 12.800 manat, qalibi isə “VALLEY-LM” Məhdud Məsuliyyətli Cəmiyyəti olub.

“VALLEY-LM” MMC cari ilin may ayının 20-də dövlət qeydiyyatına alınıb.

Şirkətin nizamnamə kapitalı 10 manat, hüquqi ünvanı isə Raana qəsəbəsi, ev 15, mənzil 6 ünvanıdır. “VALLEY-LM” MMC-nin fəaliyyət profili, maddi-texniki bazası, müqavilə ilə çalışan işçilərinin sayı barədə heç bir məlumat yoxdur.

Gəncə Regional Mədəniyyət İdarəsinin sözügedən satınalmasında şübhəli, daha doğrusu kobud qanun pozuntusu olan məqam isə qalib elan edilən “VALLEY-LM” MMC-nin dövlətə külli miqdarda vergi borcunun olmasıdır. Hazırda “VALLEY-LM” MMC-nin dövlətə 4256 manat vergi borcu var.

Halbuki “Dövlət Satınalmaları Haqqında” Azərbaycan Respublikasının Qanununa görə dövlət satınalmalarında iştirak edən təşkilatlar tender komissiyalarına vergi borclarının olmaması barədə müvafiq arayış təqdim etməlidirlər”.

Bacanağını idarə rəisi təyin etdirdi…

Dəyərli oxucuların diqqətinə çatdıraq ki, Gəncə Regional Mədəniyyət İdarəsinin rəisi Vasif Cənnətov DTX tərəfindən həbs olunan birinci müavin Elnur Əliyevin kadrı hesab olunur. O, 2021-ci ilin yanvar ayının 26-da Mədəniyyət naziri Anar Kərimovun əmri ilə Gəncə Regional Mədəniyyət İdarəsinin rəis təyin edilib.

Vasif Cənnətov bundan əvvəl Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 3 saylı Gəncə Ərazi İdarəsinin Samux rayon şöbəsində müdir vəzifəsində işləyib.

Mənbə deyir ki, V.Cənnətov Elnur Əliyevin bacanağı və ən yaxın kadrlarından biridir. Bu baxımdan, V.Cənnətovun bütün maliyyə maxinasiyalarında E.Əliyevin əlinin olduğu istisna edilmir.

Elnur Əliyevin daha bir uğursuz kadrı…

Mötəbər qaynaqlardan əldə etdiyimiz məlumata görə, Gəncə Dövlət Filarmoniyasının yeni direktoru Rəşad Rauf oğlu Yusifov da Elnur Əliyevin Mədəniyyət Nazirliyindəki “kadr bankı”nın parlaq simalarından biridir.

Xatırladaq ki, R.Yusifov 2022-ci ilin avqustunda mədəniyyət naziri Anar Kərimovun müvafiq əmri ilə Gəncə Dövlət Filarmoniyasının direktoru vəzifəsinə təyin edilib. Avqustun 11-də yeni direktor kollektivə təqdim olunub və tədbirdə Mədəniyyət Nazirliyi İncəsənət və qeyri-maddi mədəni irs şöbəsi Musiqi sektorunun müdiri Vüqar Hümbətov və Gəncə Regional Mədəniyyət İdarəsinin rəisi Vasif Cənnətov (!) da iştirak ediblər.

Erməni qarışığı var…

Qeyd edək ki, Rəşad Yusifov Gəncə Dövlət Filarmoniyasının direktoru postuna təyin olunanadək heç bir rəsmi vəzifəsi və əmək fəaliyyəti haqqında hər hansı məlumat yoxdur. Onun barəsində sadəcə o bəlli olub ki, anası Gəncə şəhər 16 saylı tam orta məktəbin direktorudur və kecmiş Baş prokurorun müavini Rüstəm Usubov anasının doğma dayısıdır.


Rəşad Yusifov
Ən təəccüblüsü isə odur ki, Elnur Əliyevin önəmli mədəniyyət mərkəzimizə rəhbər təyin etdirdiyi şəxsin – Rəşad Yusifovun erməni qarışığı olduğu haqda iddialar var. Belə ki, onun nənəsinin – atasının anasının milliyətcə erməni olduğu bildirirlir. Deyilənə görə, həmin qadının əvvəlki adı Sonya olsa da, sonradan Sona adını götürüb.

Bunadan əlavə, yeni direktorun əmisi Yusufov Rasif Alı oğlu barəsində vaxtilə Sürət Hüseynov hadisələrinə görə cinayət işi açıldığı və bu səbəbdən də 10 il qaçıb Özbəkistanda gizləndiyi bildirilir.

Aqrar Universiteti bitirdi, Filarmoniya direktoru oldu

Bir daha Rəşad Yusifovun “əmək fəaliyyəti”nə qayıdaraq dəyərli oxucularımızı bilgiləndirək ki, Aqrar Universiteti bitirən yeni direktor bir müddət Gəncədə çayçı işlədib və bazarda tütün məmulatları alıb-satmaqla məşğul olub. Sonradan Elnur Əliyevin “sehirli çubuğu” işə salması ilə adam Gəncə Dövlət Filarmoniyasina direktor təyin olunub. İndi çoxlarına maraqlıdır ki, heç bir musiqi təhsili olmayan R.Yusifov belə bir önəmli idarəyə necə rəhbərlik edir?

Yeri gəlmişkən, Rəşad Yusifovun direktor təyin edilməsində Gəncə Regional Mədəniyyət İdarəsinin rəisi Vasif Cənnətovun da əməyinin olduğu danılmazdır. Məlumata əsasən, V.Cənnətov onunla qohumluq əlaqələri olan R.Yusifovun işlə təmin edilməsi üçün bacanağına xahiş edib, Elnur Əliyev də onu Gəncə Dövlət Filarmoniyasina direktor təyin etdirib.

İxtisaslı kadrlar kənarda qalır, dost-tanışlara yol açılır…

Təbii ki, Elnur Əliyev təkcə regionlarda deyil, Bakıda və digər iri şəhərlərdə də öz adamlarını mühüm vəzifələr gətirməyə nail olub. Əldə etdiyimiz məlumata əsasən, kadr seçimi zamanı işçilərin ixtisası, təcrübəsi, savadı nəzərə alınmayıb. Hər bir kadr qohumluq prinsipləri əsasında seçilib. Heç də təsadüfi deyil ki, məhz bu cür yanlış seçim nəticəsində müxtəlif post-sovet ölkələrində, məsələn, Rusiyada iki illik ixtisasartırma adı ilə sertifikat alan şəxslər çox asanlıqla teatrlarda rəhbər vəzifələrə təyin ediliblər. Butun bu məsələlərdə isə, əsasən Elnur Əliyevin və Mədəniyyət Nazirliyinin Teatr sektorunun rəhbəri Könül Cəfərovanın rolu böyük olub.


Könül Cəfərova
Yeri gəlmişkən, Könül Cəfərovanın da qohumluq prinsipi əsasında belə bir önəmli vəzifəyə gətirildiyi haqda məlumatlar var. İddia olunur ki, o, mədəniyyət naziri Anar Kərimovun xalası, yaxud da bibisi qızıdır.

Mənbə deyir ki, Könül Cəfərova da, nazirlikdə yuxarıdan aşağı qurulan sistem üzrə, ancaq dost-tanışların vəzifələrə yerləşdirilməsinə imkan yaradır. Bu səbəbdən də, ixtisaslı kadrlar kənarda qalır, onların yerini ixtisasartırma, yaxud bir-iki illik natamam kurs keçənlər doldurur.

Haşiyə çıxaq ki, hazırda Azərbaycan Dövlət Mədəniyyət və İncəsənət Universiteti ölkədə ixtisaslı kadrların hazırlanması prosesini həyata keçirən yeganə təhsil ocağıdır. Əgər mədəniyyə sahəsində olan mühüm vəzifələrə bu universitetin kadrları yaxın buraxılmayacaqsa, o zaman bu təhsil ocağının fəaliyyətinə nə ehtiyac var?!

Daha bir qeyri-ixtisas sahibi…


Fərəh Acalova
Mədəniyyət Nazirliyində qeyri-ixtisas sahibi olaraq mühüm vəzifədə çalışan kadrlardan biri də İncəsənət və qeyri-maddi mədəni irs şöbəsinin müdiri Acalova Fərəh Fuad qızıdır.

Qeyd edək ki, Fərəh Acalova 1980-ci ildə Bakı şəhərində anadan olub. 2000-ci ildə Bakı Dövlət Universitetinin “Beynəlxalq münasibətlər” ixtisası üzrə bakalavr, 2002-ci ildə həmin ixtisas üzrə magistr pilləsini bitirib. Son təyinatadək Azərbaycan Respublikası Xarici İşlər Nazirliyində Beynəlxalq İnsan Hüquqları Təsisatları ilə Əməkdaşlıq İdarəsinin rəis müavini vəzifəsində çalışıb. İkinci dərəcəli müşavir diplomatik rütbəsinə malikdir.

Ümumiyyətlə, Fərəh Acalovanın təhsil kariyerası zəngin olsa da, Mədəniyyət Nazirliyinin İncəsənət şöbəsinin müdiri vəzifəsini daşımaq üçün bu sahədə yetərli təcrübəyə malik olmayıb. Deyilənə görə, onun bu sahəyə heç bir adiyyatı olmadığı kimi, bu sahədən anlayışı da yoxdur. Lakin onu bu vəzifəyə təyin edənlər belə qərara gəliblər ki, “Abdulla Şaiqin kotucəsi olduğu üçün Fərəh xanım Mədəniyyət Nazirliyində də çalışa bilər”. Lakin bəzi iddialara görə, o, çalışdığı sahədən xəbərsiz olduğu üçün Teatr sektorunun müdiri Könül Cəfərovanın dediyi ilə oturub-durur. Yəni K.Cəfərova öz vəzifəsi ilə yanaşı, qeyri-rəsmi olaraq F.Acalovanın da səlahiyyətlərini icra edir.

Oxucularımıza aydın olsun deyə onu da bildirək ki, Mədəniyyət Nazirliyində teatr, tamaşa və konsert sahəsi birbaşa nazir müavini Elnur Əliyevin kurasiyasında olduğundan, Fərəh Acalova, Könül Cəfərova və Regional Mədəniyyət İdarələrinin rəisləri ancaq onunla işləyiblər. Bu səbəbdən, sözügedən idarələrdə üzə çıxan qanunsuz faktlar məhz E.Əliyevin adı ilə bağlıdır. Heç də təsadüf deyil ki, Şəmkir Regional Mədəniyyət İdarəsinin rəisi cəmi yeddi ay sonra Baş Prokurorluq yanında Korrupsiyaya qarşı Mübarizə Baş İdarəsi tərəfindən həbs olundu.

Maraqlıdır ki, bu həbsdən sonra Şəmkir Regional Mədəniyyət İdarəsinə hələ də rəis təyin edilməyib. Çünki Elnur Əliyev buna imkan verməyib, DTX tərəfindən saxlanıldığı günədək həmin vəzifəyə özünə yaxın kadr axtarışında olub.

Əlbəttə, yuxarıda qeyd oluna fatktlar sadəcə bizim əldə etdiklərimiz, bildiklərimiz olduğundan, Mədəniyyət Nazirliyində daha ciddi qanunsuzluqların baş alıb getdiyi istisna deyil. Deməli, birinci müavin Elnur Əliyevin qandallanması heç də səbəbsiz olmayıb.

Bütün proselər həm də onu deməyə əsas verir ki, nazir Anar Kərimov Elnur Əliyevin təqdimatı ilə bütün istiqamətlərdə uğursuz kadrlar təyin etməklə, bilərkdən, yaxud bilməyərəkdən Azərbaycan mədəniyyətinin qəbirini qazıb, qalır onu basdırmaq…(hurriyet.az)

Azərbaycanda əhalinin, iş adamlarının, hətta xarici ölkə vətəndaşlarının narazı olduğu dövlət qurumlarının arasında Dövlət Gömrük Komitəsi ilk yerlərdən birində dayanır desək, yəqin səhv etmərik. Ötən illər ərzində Gömrük Komitəsinin rəhbərliyində bir neçə dəfə dəyişiklik olsa da gömrükdə baş verən qanunsuzluqlar, iş adamlarının, vətəndaşların incidilməsi halları azalmır.

Təsadüfü deyil ki, son bir neçə ayda Dövlət Təhlükəsizlik Xidməti tərəfindən Gömrük Komitəsində həyata keçirilən silsilə əməliyyatlar çərçivəsində bir sıra yüksək vəzifəli gömrük generalları vəzifələrindən azad edilib və həbs olunublar.

Komitənin sədri dəyişdirilib, çoxsaylı kadr dəyişiklikləri aparılıb. Ancaq gömrüklə bağlı narazılıqlar, şikayətlər azalmır. Hətta keçmişdə baş verən qanunsuzluqların daha ifrat şəkildə davam etdirildiyini söyləməyə əsas verir.

Rusiya Federasiyasının vətəndaşı Cantemirova Mərcan Usmanovna tərəfindən Ölkə Prezidenti İlham Əliyev cənablarına, Birinci vitse-prezident Mehriban xanım Əliyevaya ünvanlanan, surəti hüquq-mühafizə orqanlarını rəhbərlərinə, Gömrük Komitəsinin sədrinə və saytımıza da göndərilən şikayət məktubu da qurumun fəaliyyətində ciddi problemlərin qaldığını təsdiqləyir.

Mərcan Cantemirovanın etibarnamə üzrə nümayəndəsi Həmidova Sefiyat Həmidullayevna tərəfində redaksiyamıza təqdim olunan məktubda deyilir: “Azərbaycan Respublikası Dövlət Gömrük Komitəsinin əməkdaşları və məhkəmə icraçılarının mənə qarşı qanunsuz əməlləri barədə Sizə məlumat verirəm.

Belə ki, 23 il ərzində mən ticarətlə məşqul olmuşam və Azərbaycana tranzit yolu ilə satış üçün mal gətirmişəm. 2014-cü ilin sentyabr ayında ümumi dəyəri 95.000 ABŞ dolları olan malları (təbii xəzdən istehsal olunmuş xəz palto) Azərbaycana gətirərək Dövlət Gömrük Komitəsinin saxlanc yerinə təhvil vermişəm (Xaçmaz Gömrük İdarəsinin Samur gömrük postunun saxlanc yeri).

Naməlum şəraitdə həmin mallar gömrük komitəsinin saxlanc yerindən oğurlanmış, hüquq mühafizə orqanlarına və Dövlət Gömrük Komitəsinə çoxsaylı müraciətlərim heç bir nəticə verməmişdir. Bununla bağlı məhkəmə orqanlarına müraciət etmişəm və Azərbaycan Respublikası Ali Məhkəməsinin 29 iyun 2020-ci il tarixli qərarı ilə iddia tələbim tam təmin edilərək, oğurlanan malların, həmin mallar olmadıqda onların dəyəri olan 95.000 ABŞ dolları pulun Dövlət Gömrük Komitəsindən alınaraq mənə verilməsi qət edilmişdir. Ali Məhkəmənin qərarı qüvvəyə minmiş və icra vərəqəsi icra edilməsi Yasamal rayon Məhkəmə İcraçılarına göndərilmiş və hal hazırda məhkəmə icraçısı Bəxtiyar Babayevin icraatındadır” .

Şikayət məktubunad daha sonra qeyd edilir ki, Bəxtiyar Babayevə və Dövlət Gömrük Komitəsinə çoxsaylı müraciətləri heç bir nəticə verməyib, Ali Məhkəmənin qərarı bu günə kimi icra edilməyib: “Gömrük Komitəsinin əməkdaşları və məhkəmə icraçısı Bəxtiyar Babayev məhkəmə qərarının icra edilməməsini onunla əsaslandırmışlar ki, mənə ödənilməli olan məbləğ Gömrük Komitəsinin 2022-ci il üçün ayrılan büdcəsində nəzərdə tutulmayıb.

Dövlət Gömrük Komitəsinə və Ədliyyə Nazirliyinin Baş İcra İdarəsinə rəsmi müraciətlərim və həmin təşkilatların rəhbərlərinin qəbuluna yazılmaq üçün müraciətlərim də heç bir nəticə verməyib.

Ona görə də Rusiya Federasiyasının Azərbaycan Respublikasındakı səfirliyinə müraciətim əsasında Azərbaycan Respublikasının Xarici İşlər Nazirliyinə rəsmi nota göndərilib.

Yuxarıda adı çəkilən təşkilatların əməkdaşlarının qanunsuz və etinasız yanaşması nəticəsində mən müflis olmuşam, yeganə yaşayış yerim olan evimi sataraq gohumlarımın və tanışlarımın evində müvəqqəti yaşamaq məcburiyyətində qalmışam.

Artıq bu haqsızlığa dözməyə gücüm qalmayıb, Sizlərdən xahiş edirəm mənə kömək edəsiniz və pozulmuş hüquqlarımın bərpasında mənə köməklik göstərəsiniz”

Qeyd edək ki, saytımıza təqdim olunan sənədlərdən məlum olur ki, bürün məhkəmə instansiyalarında Mərcan Usmanovnanın iddiasının haqlı olduğu vurğulanıb, Dövlət Gömrük Komitəsinin (DGK) üzərinə ona dəymiş ziyanın ödənilməsi tələbi qoyulub.

Ancaq Gömrük Komitəsinin rəhbərliyi bu tələbi yerinə yetirməmək üçün işi Ali Məhkəməyə qədər daşıyıb, Bakı Apellyasiya Məhkəməsi Mülki kollegiyasının 24 oktyabr 2019-cu il tarixdə Mərcan Cantemirovanın xeyrinə çıxardığı qətnaməsindən kassasiya şikayəti verib.

Ali Məhkəmənin Mülki kollegiyası isə 2020-ci ilin iyun ayının 29-da çıxardığı qərarda BakıApellyasiya Məhkəməsi Mülki kollegiyasının qətnaməsi qüvvədə saxlanılıb, DGK-nin üzərinə Mərcan Cantemirovaya 95 min ödənilməsi öhdəliyi qoyulub.

Qeyd edək ki, Ali Məhkəmənin Mülki kollegiyasının qərarında Mərcan Cantemirovanın 95000 dollar dəyərində olan mallarının necə yoxa çıxdığı da aydın təsvir edilib: “Cantemirova Mərcan (Marjan) Usmanovna (bundan sonra – iddiaçı) içərisində qadın xəz şubaları olan üç ədəd çanta ilə 23 sentyabr 2014-cü il tarixdə Xaçmaz Gömrük İdarəsinin Samur gömrük postuna daxil olmuş, həmin bağlamalar Xaçmaz Gömrük İdarəsinin Samur gömrük postuna müvəqqəti saxlanca verilmişdir. Qeyd edilən malların müvəqqəti saxlanca verilməsi ilə əlaqədar Samur gömrük postunun əməkdaşları tərəfindən 23 sentyabr 2014-cü il tarixli 216 saylı protokol tərtib edilməklə imzalanmışdır.

İddiaçı 29 iyun 2015-ci il tarixdə Azərbaycan Respublikası Dövlət Gömrük Komitəsinin sədrinə ünvanladığı ərizəsində kommersiya fəaliyyəti ilə məşğul olduğundan, Çindən xəz şubaları gətirərək Azərbaycandan tranzit yolu ilə Dağıstana apardığını qeyd etmişdir. Gətirilən şubalardan 52 ədədi qüsurlu olduğundan həmin malların Çinə qaytarılması üçün Samur gömrük postunda saxlanca verildiyini, sonradan həmin malların qaytarılmadığını qeyd edərək, həmin malların qaytarılmasında köməklik olunmasını xahiş etmişdir...”

Ancaq məhkəmə raşdırması ilə də müəyyən edilir ki, həmin mallar məhz gömrükçülərin günahı üzündən yoxa çıxıb. Buna görə də Ali Məhkəmə DGK-nin üzərinə Mərcan Cantemirovaya 95 min ödənilməsi öhdəliyi qoyub.

Belə bir şəraitdə DGK-nin iki ildən artıqdır ki, müxtəlif bəhanələrlə məhkəmə qərarını yerinə yetirməkdən qaçması ən azı qanunlara hörmətsizlik, Azərbaycan dövlətinin imicinə zərbədir. Hər halda gömrük əməkdaşlarının məsuliyyətsizliyi, səhlənkarlığı və ya acgözlüyü üzündən baş vermiş bir hadisəni Rusiya səfirliyinin Azərbaycan XİN-ə nota verəcək səviyyə qədər davam etdirilməsini başqa cür izah etmək mümkün deyil.

Belə görünür ki, hətta bu nota belə DGK rəhbərliyini Ali Məhkəmənin Azərbaycan dövlətinin adından çıxardığı qərarı, qurunun üzərinə qoyduğu öhdəliyi yerinə yetirməyə vadar etməyib. Buna görə də Mərcan Cantemirova son ümid yeri kimi Prezident İlham Əliyevə və Birinci vitse-prezident Mehriban xanım Əliyevaya müraciət edərək könmək istəyir.

Qeyd edək ki, Mərcan Cantemirovanın etibarnamə üzrə nümayəndəsi Sefiyat Həmidova bildirir ki, artıq onların nə gözləməyə səbrləri, nə də imkanları qalıb. Hətta intihar etməyi belə düşünüblər.

“Ancaq Prezident İlham Əliyevin və Birinci vitse-prezident Mehriban xanım Əliyevanın tapşırığı ilə problemin tezliklə həll ediləcəyinə, Gömrük Komitəsinə nəhayət ki, məhkəmənin qərarını yerinə yetirəcəyinə ümid edirik” –deyə, Sefiyat Həmidova bildirib.

Gömrük Komitəsinin Ali Məhkəmənin qəratrını niyə yetirmədiyini öyrənməyə çalışsaq da, zəngələrimizi cavab ala bilmədik. Ancaq DGK-nin də mövqeyini dərc etməyə çalışacağıq.

“AzPolitika.info”

Əhməd Qəşəmoğlu: “Günah alimlərimizdə deyil, akademiya bu sahəyə vəsait ayırmayıb”
“Son illərdə akademiyanın beynəlxalq əlaqələri genişlənib, amma etiraf etmək lazımdır ki, bu gün cənab Prezident İlham Əliyevin açdığı magistral istiqamətlərə tam cavab vermir”. Bunu Azərbaycan Milli Elmlər Akademiyasının Rəyasət Heyətinin iclasında AMEA-nın prezidenti İsa Həbibbəyli bildirib. Onun sözlərinə görə, AMEA bu gün Avropa və Avrasiyanın heç bir nüfuzlu beynəlxalq elmi təşkilatının, assosiasiyasının üzvü deyil: “Asiya Elmlər Akademiyasının üzvü olsaq da, heç bir layihələrində, qrant proqramlarında iştirak etmirik. Beynəlxalq elmi təşkilatlarla əlaqələrimizin genişlənməsi istiqamətində yeni imkanlar açmalıyıq”.

Bu, çox ilginc bir açıqlamadır. Təsəvvür belə etmək mümkün deyil ki, Azərbaycan AMEA-sı müstəqillik dövründə heç bir elm mərkəzi ilə əlaqə qura bilməyib! Hətta 10-15 illik fəaliyyət tarixçəsi, 3-5 üzvü olan bir çox QHT-lər Avropanın, Asiyanın müvafiq mərkəzləri ilə əlaqə qurub, amma AMEA kimi bir qurum dünya ilə hansısa ciddi əlaqələr qurmağa nazil ola bilməyib. Elm adamları bunun səbəbini nədə görür? Qeyri-peşəkar menecerlikdə, yoxsa Azərbaycan elm adamlarının dünyaya çıxarmağa bir əsəri olmamasında?

Qeyd edək ki, İ.Həbibbəyli doktorantura təhsili ilə bağlı problemlərə də toxunub. O qeyd edib ki, bu gün ölkəmizdəki doktorantura təhsili SSRİ-dən qalma modeldir. Yalnız doktorant və onun elmi rəhbəri ilə peşəkar kadr hazırlamaq mümkün deyil. Onun sözlərinə görə, doktorantların tədris planı, təhsil kreditləri, imtahanları olmalıdır və bu istiqamətdə əməli addımların atılması planlaşdırılır: “Eyni zamanda elmdə qocalmanın qarşısını almalıyıq. Akademiyada son 7 ildə elmlər doktorluğunu müdafiə edən və yaşı 40-dan aşağı olan yalnız 8 nəfər, yaşı 50-dən aşağı isə 20 nəfərə yaxın elmi işçi vardır. 10 il sonra necə olacaq? Belə getsə, elmlər doktoru məsələsi ciddi problemə çevriləcək. Bunun bir sıra obyektiv və subyektiv səbəbləri var. Dissertantlara, doktorantlara tələbkarlıq da, qayğı da artırılmalıdır”.

TEREF.AZ yazır ki, mövzu ilə bağlı sosioloq, iqtisad elmləri doktoru Əhməd Qəşəmoğlu “Yeni Müsavat”a dedi ki, hazırda bu məsələ olduqca aktualdır: “Çox şadam ki, İsa müəllim Elmlər Akademiyasının prezidentliyinə başladığı vaxtda ilk addımda bu məsələlərə diqqət yönəldib. Bu, olduqca aktual bir məsələdir. Ölkə üçün də, elə akademiya üçün də olduqca vacibdir. Beynəlxalq əlaqələr ölkənin tərəqqisində də mühüm rol oynayan bir məsələdir. Deyim ki, İsa müəllimin bu barədə danışmağı bir elə qanunauyğundur. Çünki İsa Həbibbəyli həmişə beynəlxalq əlaqələri qurmağa can atan adamdır. Öz səlahiyyəti daxilində bunu edib. Naxçıvan Universitetinin rektoru olanda da universitetin beynəlxalq əlaqələrini yaradırdı. Türkiyədən, İrandan, başqa ölkələrlə də əlaqələr yaradıb. Eləcə də Ədəbiyyat İnstitutunun direktoru olaraq, AMEA-nın direktoru olaraq da bu istiqamətdə həmişə fəaliyyət göstərib. Orta Asiya respublikaları ilə çox sıx əlaqə yaradıb. Ədəbiyyat İnstitutunda xüsusi şöbə də yaradıb. Ona görə düşünürəm ki, bu istiqamətdə yaxınlarda akademiyanın çox ciddi fəaliyyəti olacaq. O ki qaldı əlaqələrin olmamağının əsas səbəbinə, bu, təşkilatçılıqla bağlıdır. Əsas səbəb menecment məsələlərinə diqqətin zəifliyindədir və bu istiqamətdə işlər getməli idi və bu getməyib. Bu, faktdır. Akademiya alimlərinin əsərlərinə gələndə isə olduqca ciddi əsərlər yaranır, dünya üçün əhəmiyyətli olan əsərlər yaranır. Mənim riyaziyyat, fizika, kimya sahələrində görülən işlər barədə məlumatım var. Özünüreklam kimi olmasın, konkret olaraq elə mənim təqdim etdiyim "Ahəngyol" yeni bir elmi nəzəriyyədir, yeni bir elmi sistemdir. Azərbaycanın məşhur alimi Rafiq Əliyev seminarda bunu çox yüksək qiymətləndirdi və Lütfi Zadəyə göndərdi. Gözləmədiyimiz halda o da çox yüksək qiymətləndirdi. O, bu elm sahəsini 2011-ci ildə Kaliforniya Universitetində dünyanın ən nüfuzlu bir elmi jurnalında təqdim etdi. Bundan sonra dünyanın bir çox aparıcı jurnalları “Ahəngyol” barədə xeyli məqalələr verdi. Amma deyəndə ki, dünyanın başqa elm sahələrində də işləməliyəm, dəvətlər var, buna vəsait lazımdır. Dedilər ki, bu sahəyə pul ayrılmır. Halbuki həmin vaxt Polşa alimləri Krakovda beynəlxalq bir tədbir keçirmək istəyirdi. Onun üçün də mənə heç olmasa min, min beş yüz dollar lazım idi. O vaxt da o pul məndə yox idi, istədim də, akademiya vermədi. Dedilər, bizim bu sahə üçün pulumuz yoxdur, imkanımız yoxdur. Dəfələrlə Çindən, Yaponiyadan dəvət almışam. Çünki “Ahəngyol” harmoniya, ahənglə bağlı bir elm sahəsidir və o da elm adamlarının həmişə diqqət mərkəzində olub. Amma ora elmi ezamiyyətə getməyə akademiyada pul tapılmadı. Deməli, bu işlərin təşkilati, maliyyə, iqtisadi tərəfinə diqqət verilməyib. Mən tək deyiləm. Akademiyada tanıdığım xeyli adamların belə ciddi, beynəlxalq səviyyədə diqqət mərkəzində olan əsərləri var. Amma akademiya indiyə kimi buna pul ayırmayıb ki, bu sahədə alimlərə bir dəstək olsun. Ən azı bu alimlərin yazılarının, kitablarının xaricdə çap olunmasına kömək olsun. Bax, akademiyada bu istiqamətdə zəiflik olub. Yəni günah alimlərimizdə deyil, əksinə, bu şərait yaransaydı, alimlər stimullaşdırılsaydı, kitabları xaricdə çıxsaydı, başqaları da onlara qoşulacaqdı. Gənclər də maraqlanacaqdı. Ümid edirəm ki, İsa müəllim bu məsələyə hökmən diqqət verəcək və yaxın vaxtlarda bu sahədə nəticələrin olmağına inanıram".

Professor akademiya ətrafında gedən söz-söhbətlər barədə də fikir bildirib: “Bir də baxırsan ki, elmdən heç xəbəri olmayan adam gülməli səviyyədə durub deyir ki, akademiya bizim nəyimizə lazımdır, orada heç bir iş görülmür. Sənin nədən xəbərin var axı, sən elm adamı deyilsən, gəl bir maraqlan, bir gör nə necədir? Yaxud elə AMEA-ya prezident seçkisində aləm qarışdı bir-birinə. Niyə İsa Həbibbəyli bura seçildi? Əvvəla, indi akademiyada əsas cəmləşən institutların hamısı ictimai təmayüllü institutlardır. Bu akademiya bir il bundan qabaqkı akademiya deyil ki, içərisində fizika ilə, riyaziyyatla, texniki elmlər və başqa sahələrlə məşğul olan institutlar olsun. Burada ancaq 10-11 institut birləşib. Akademiyada da bu sahədə ən çox təcrübəsi olan, elmlə ciddi məşğul olan adam İsa Həbibbəylidir. Yaxşı, onda İsa Həbibbəyli kimi bu sahədə fəaliyyəti gözəçarpan, nəticəsi olan adam kim tanıyırsa, desin. Akademiyanın prezidenti həm də iş görən adam olmalıdır. Təkcə elmi kitab, məqalənin olması azdır. Bu vəzifədə iş görən adamlar olmalıdır”.

Afaq MİRAYİQ,

TEREF.AZ yazır ki, noyabrın 2-də İDEA İctimai Birliyinin təmirə ehtiyacı olan həyətlərin abadlaşdırılmasına yönəlmiş "Bizim həyət" layihəsi çərçivəsində yenilənən növbəti həyət sakinlərin istifadəsinə verilib.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva həyətin açılışında, o cümlədən tədbir zamanı keçirilmiş ağacəkmə aksiyasında iştirak edib.
Yenilənmiş həyət Bakı şəhəri, Suraxani rayonu, Qaraçuxur qəsəbəsi, Yeni Günəşli “V” yaşayış massivi 13, 14, 14A, 15, 16, 17, 18 ünvanlarında 2232 nəfər sakinin yaşadığı 7 çoxmərtəbəli yaşayış binasını əhatə edir.
“Bizim həyət” layihəsinin əsas məqsədi ölkə ərazisində həyətlərin ekoloji cəhətdən təmiz və abad edilməsi, yaşıllıqların bərpası, sağlam həyat tərzinin formalaşdırılması, sakinlər üçün təhlükəsiz və rahat yaşam şəraitinin yaradılmasıdır.
Abadlaşdırılan növbəti həyətdə əlil və sağlamlıq imkanları məhdud insanların rahat hərəkəti nəzərə alınıb, bütün yaş qrupları üzrə uşaqların inkişafı üçün əlverişli şəraitin yaradılması, gənclərin asudə vaxtlarının səmərəli keçirmələri və onlarda sistematik idmanla məşğulolma refleksinin yaradılması məqsədilə ərazidə süni örtüklü mini futbol stadionu, şahmat meydançaları, müxtəlif idman qurğuları, uşaq meydançaları salınıb. Eyni zamanda, ərazidə çoxsaylı söhbətgah və oturacaqlar, tullantılar üçün qutular, quş yuvaları və pişik evləri quraşdırılıb.
Sakinlərin istək və maraqları nəzərə alınaraq, həyətdə yeni işıqlandırma dirəkləri, müşahidə kameraları quraşdırılıb, binaların fasad və blokları tam təmir olunub, asfalt və dam örtüyü yenilənib, elektrik sistemi yenidən qurulub.
Həyətin ərazisindəki mövcud yaşıllıqların bərpası ilə yanaşı, 2000-ə qədər müxtəlif cinsli ağaclar və 19000 ədəd kollar əkilib, 2600 kvadratmetr ərazidə yaşıllıq zolağı salınıb. Bununla yanaşı, həyətin ətraflarında 1400 ədəd adi daşsarmaşığı və digər sarmaşan birkilər əkməklə “yaşıl səddlər” (green barriers) yaradılıb.
Yaşıl səddlər adi daşsarmaşığı kimi sarmaşan, sıx bitən və havadakı zərərli toz hissəciklərini effektiv şəkildə tutub-saxlaya bilən bitki növlərindən ibarətdir. Belə səddlərin əsasən ictimai yerlərin perimetrində, müvafiq olaraq hasarlar, söhbətgahlar və binaların üzərində əkilməsi nəzərdə tutulur ki, bunlar iynəyarpaqlı, həmişəyaşıl ağaclarla və digər bitkilərlə yanaşı hava çirklənməsinin əhəmiyyətli dərəcədə azaldılmasına töhfə verəcək.
“Bizim Həyət” layihəsi çərçivəsində ümumi yaşayış sahələrinin həyətlərinin abadlaşdırılmasına dair məlumat və tövsiyələrin IDEA İctimai Birliyinə təqdim edilməsi xahiş olunur.

“Cənab prezident, türk gəncliyi sizin mesajınızı alıbdır.
Azərbaycan dövləti öz dövlətimiz, Azərbaycan prezidenti öz prezidentimizdir.
Biz hər zaman güneyli gənclər olaraq, Azərbaycanın cəbhəsindəyik.
Vətənimizin o tayı, bu tayı yoxdur. Biz böyük Azərbaycanıq”, - posterlərdə yazılır.
Mollaların yuxusuna haram qatan görüntülərdir.
Asif Nərimanlı
Teref.az

Mədəniyyət Nazirliyi son iki ildə artıq ikinci dəfə ittiham və eyni zamanda da istehza, lağ-lağı obyektinə çevrilib. Birinci dəfə 2020-ci ildə nazirlikdə “DTX əməliyyatı” keçiriləndə və Əbülfəs Qarayev vəzifədən çıxarılanda, ikinci dəfə isə cəmi iki il sonra, yəni bugünlərdə DTX növbəti dəfə bu nazirliyə “baş çəkəndə”.

Nazir müavinin və nazirliyin Təchizat və əmlak şöbəsinin müdirinin həbs olunması onu deməyə əsas verir ki, əməliyyat yenə maliyyə cinayətləri, yeyintilərlə bağlıdır. Eyni cinayətlərin təkrarlanması az qala belə təəssürat yaradır ki, bura sanki nazirlik yox, mafiya yuvasıdır – cəza olsa da, bu, heç kimi cinayətdən çəkindirmir.

Ola bilsin ki, korrupsiya cinayətləri sarıdan bundan betər vəziyyətdə olan qurumlar da var, ancaq görünür, bu nazirlik hansısa xüsusi “özəlliyi” ilə seçilir...

Mədəniyyət naziri Anar Kərimov nisbətən gənc nazirlərdəndir və cəmi iki ilə yaxındır ki, bu vəzifəni daşıyır. Adətən, belədə “nə yatdı ki, nə yuxu görsün” deyirlər. Amma belə görünür ki, bu nazir ümumiyyətlə, yatmayıb və “böyük sədaqət” nümayiş etdirərək, özündən əvvəlki nazirin “adət və ənənələrini” can-başla davam etdirib. Nəticədə, necə deyərlər, beş illik planı cəmi iki ilə doldura bilib...

Ümumiyyətlə, bu necə nazirlik, necə təşkilatdır, və orada hansı mühit var ki, adam ora ayaq basar-basmaz rüşvətxora, korrupsionerə çevrilir?

Axı, məntiqlə Əbülfəs Qarayevin vaxtında keçirilən “DTX əməliyyatı”nın xofu, əks-sədası ən azından bir müddət bu təşkilatın divarlarına hopmalı, havasına çökməli idi. Görünür, sözügedən nazirlikdə o qədər sərbəstlik, cəzasızlıq, ya da səhlənkarlıq və özbaşınalıq mühiti, “aurası” kök salıb ki, heç kim heç nədən nə qorxmayıb, nə çəkinməyib. Ya da hər şey sistemli şəkildə qurulub


Ən aşağı vəzifədə oturandan ən başda yer tutana qədər korrupsiya, rüşvət mexanizmi var gücü ilə işləyib. Yeni nazir də bu mexanizmə toxunmayıb. Axı, Azərbaycan reallıqları çərçivəsində kim deyə bilər ki, şöbə müdiri, hətta nazir müavini rüşvət alır, korrupsiya ilə məşğul olur, amma nazirin bundan xəbəri yoxdur? Kim buna inanar? Ən yeni Azərbaycan tarixində belə “fərsiz-fərasətsiz” nazir heç zaman olmayıb və ola da bilməzdi!...

Görünür, necə ki, Əbülfəs Qarayevin az qala bütün böyür-başı, müavini, şöbə müdirləri və s. həbs olundu, lakin özü “sudan quru çıxdı”, A.Kərimovla da bağlı eyni mənzərənin şahidi olacağıq. O vaxt idarə rəisləri, nazir müavini və hətta nazirliklə “işləyən” şirkət rəhbərləri öz ifadələrində birbaşa Qarayevin adını çəkərək, bütün göstərişlərin onun tərəfindən verildiyini, rüşvətin, “otkatlar”ın da ona çatdığını bildirdilər.

Doğrudur, Qarayevi heç kim tutmadı, heç istintaqa şahid qismində də olsa cəlb etmədi, ancaq ən azından xalq, cəmiyyət bildi ki, bu nazirlikdəki korrupsionerin, rüşvətxorun yekəsi elə nazirin özü imiş. Bəs, indi kim inanar ki, eyni nazirlikdə, eyni əməllər törədilir və nazirin bundan xəbəri yoxdur?

“Ssenarilər müsabiqəsi var və seçilən uğurlu ssenarinin əsasında da filmin çəkilişi olacaq. Biz çox filmlər çəkmək istərdik, amma bizdə olan məhdud resurslara görə Qarabağ haqqında bir vacib filmin çəkilməsini nəzərdə tuturuq...” Bunu A.Kərimov bu ilin fevralında demişdi və nazirliyin Qarabağa dair bir neçə film çəkməyə gücünün çatmadığına, maliyyə çatışmazlığından əziyyət çəkdiyinə eyham vurmuşdu.

İndi, görək, DTX-nın həbs etdiyi nazir müavini və idarə rəislərindən nə qədər pul çıxacaq? Yəni, nə qədər yeyintiyə yol verildiyi məlum olacaq? Bəri başdan arxayın ola bilərsiniz ki, ortaya çıxan məbləğlər milyonlarla, bəlkə də on milyonlarla ölçüləcək və məlum olacaq ki, film çəkməyə tapılmayan həmin pullar kimlərinsə ciblərinə, bank hesablarına, villalarına axıdılıb...

Əbülfəs Qarayevin müavini də daxil olmaqla, başının dəstəsi həbs olunanda, həmin adamlara qarşı irəli sürülən ittihamların əsas hissəsi Mədəniyyət Nazirliyinin keçirdiyi dövlət satınalmaları və tenderlərdə yol verilmiş saxtakarlıq və yeyinti faktları ilə əlaqədar idi.

Qarayev 2020-ci ilin mayında vəzifəsindən azad olundu. İyul ayından etibarən onun yerini Anar Kərimov tutdu və dərhal da dövlət satınalmaları və tenderlər məsələsində əvvəlki rəhbərliyin “metod və üslubları” ilə işləməyə başladı. Məsələn, elə həmin il Ə.Qarayevin dövründən bu nazirliyin əsas “tender tərəfdaşı” olan "STONE CONSTRUCTİON" QSC-yə təxminən 1.5 milyonluq tender verdi. Bu mövzuya ötən il toxunmuşuq və bu “tender tərəfdaşlığı”nın nələrə əsaslandığını yenidən izah etməyə yəqin ki, ehtiyac yoxdur...

Bütün bu baş verənlərin fonunda sıravi vətəndaşda sual yaranır - yaxşı, Əbülfəs Qarayev getdi, yola salındı, yerinə Anar Kərimov gəldi. Nəsə dəyişdimi? Mədəniyyət sahəsində hansısa nəzərəçarpacaq dəyişikliklər baş verdiyinə dair ciddi əlamət görmürük. Əvəzində, yenə DTX-nın növbəti əməliyyatı və nazirlikdə maliyyə yeyintiləri, korrupsiyaya dair ittihamlar var. Yəni, dəyişən heç nə yoxdur. Yaxşı, əgər belədirsə, Ə.Qarayevi o boyda hay-küylə yola salmağın, “urvatsız etməyin” nə mənası vardı? Kişi oturub işləyirdi də... Əbülfəs yemədi, Anar, Əhməd, Məmməd yedi – camaat üçün nə fərqi var, axı?

Ümumiyyətlə, yaxşı olar ki, bizim bəzi yeni nazirlər öz adları ilə deyil, sələflərinin adıyla çağırılsın. Ən azından ona görə ki, əhaliyə və mətbuat işçilərinə yeni nazirin adını əzbərləmək, onu üzdən tanımaq üçün xeyli vaxt lazım olur. Ona görə də, o nazirliklərdə ki, nazirin ad və soyadından başqa heç nə dəyişməyib, nazirləri, məsələn, I Əbülfəs, II Əbülfəs, yaxud I Səlim, II Səlim, I Ziya, II Ziya və s. kimi adlandırmaq və tanımaq daha yaxşı olar...

Əslində, hər nə qədər ironiya ilə yanaşmaq istəsək də, bu baş verənlər olduqca acınacaqlıdır. Çünki məhz belə “gənc kadrlar”ın yarıtmaz, səhlənkar, biganə, bəzi hallarda isə korrupsiya və digər cinayətlərlə müşayiət olunan fəaliyyəti, əməlləri insanların islahatlara, Qərbdə təhsil almış gənclərə, bir sözlə, gələcəyə olan-qalan az-çox ümidini də qırır.

Cəlal Məmmədov

“AzPolitika.info”

Azərbaycan təmsilçisi “Araz-Naxçıvan” futzal üzrə Çempionlar Liqasında keçirdiyi hər 3 görüşdə məğlub olaraq, qrupda sonuncu yeri tutdu. Azərbaycandan Bosniya və Herseqovinaya 13 futzalçı aparılmışdı. Onların 9-u əcnəbi idi. Bunun üzərinə baş məşqçi Joze Alesio Da Silvanı da əlavə edək. Braziliyalı mütəxəssis həmyerlilərinə Azərbaycanda iş tapıb. Hər biri də kifayət qədər sanballı məbləğə gəliblər Azərbaycana.

10 braziliyalının hər biri minimum 10 min dollar məvacib alır Bakıda. Hər ay Braziliyaya minimum 100 min dollar gedir Azərbaycandan. İl ərzində də 1 milyon dollardan çox. Bu, braziliyalıların qazancı. Bəs Azərbaycanın qazancı nədir? 3 oyunda 0 xal? Bunun üçün ildə 1 milyon dollarımız ölkədən çıxır? 3 oyunda 3 məğlubiyyət almaq üçün Braziliyadan bir dəstə futzalçını Bakıya gətirmək, onlara il ərzində 1 milyon dollar vermək kimin ideyasıdır? Özü də bu məbləği təkcə “Araz-Naxçıvan”ın braziliyalıları aparır.

Ümumiyyətlə, futzal sahəsində təkcə “Araz-Naxçıvan” dərdi deyil dərdimiz. Azərbaycanın futzal çempionatında çıxış edən komandaların əksəriyyətinin heyəti braziliyalı və iranlılardan ibarətdir.

Belə çıxır ki, futzala yaxşı pul ayrılır. Amma bu pul futzalın inkişafına, yerli futzalçıların yetişdirilməsinə xərclənmir, Braziliya və İrana göndərilir.

Niyə? Məqsəd nədir? Sualdır də özümüz özümüzə veririk. Cavab verən isə yoxdur.

Mənbə: Publika.az

Yasamal Rayon İcra Hakimiyyətinin başçısının aparatının Mənzil-Kommunal Təsərrüfatı Birliyinin dövlətə külli miqdarda vergi borcu üzə çıxır.

32gun.az-ın əldə etdiyi məlumata görə, sözügedən qurumun hazırda 3.5 milyon manatdan çox (3509001.47AZN) vergi borcu var.

Qeyd edək ki, adı çəkilən birliyin sədri Ədalət Bağırovdur.

Yasamal Rayon İcra hakimiyyətinin başçısı Elşad Həsənovdur.

Azərbaycanda “Azərlotoreya” adlandırılan fırıldaq sürətlə yayılır. Bu bəla xalqımızı talamaqla məşğul olan dağıdıcı məmurlara havayı qazanc verir. “Poz, qazan” adlı fırıldaq ölkəni tam işğal etməkdədir.

Qurum aşkar formada və sadə yollarla insanları fırıldaq oyunlara cəlb edir, küçələrdə, məhəllələrdə, metro çıxışlarında, bazarlarda, dayanacaqlarda, az qala hər tində bucaqda, o cümlədən rayonlarda “Poz, qazan” oyunlarını genişləndirir. İnsanlar da küçələrdə bu mərci gördükcə şirniklənir, həvəslənir, nəticədə hər gün uduzurlar.

Ona görə ki, “Azərlotereya” ASC oyunçuları aldadır, nadir hallarda kimsə mərcdən cüzi qazana bilir, udan da onu tamaha gəlib başqa bir yerdə uduzur. Beləcə hər gün yüzminlərlə manat dövr edir və kasıb təbəqədən çıxan pullar şirkətin cibinə girir. İşin bəlalı tərəfi budur ki, bu oyunlar hansısa mərkəzlərdə, məntəqələrdə deyil, hər yerdə təşkil olunur. Kasıb, üzülməkdə olan xalq da qazanmaq ümidilə sonuncu manatlarını qumara sərf edir və acından ölməmək üçün oğurluğa və digər ağır cinayətləri törətməyə vadar olur.

Deputatlardan biri açıq deyir ki, Azərbaycanda bu cür oyunlara yer verilməsi, insanların zəhmətsiz gəlir əldə etməyə alışdırılılması və milli psixologiyada dərin çatlar yaradan qumar oyunları dərhal küçələrdən yığışdırılmalıdır: “İnsanlar bu kimi oyunlar nəticəsində var-yoxdan çıxaraq evini, maşınını, həyatını qurban verir və hətta öz ailə üzvünü belə gözə almayaraq qumarda uduzurlar, faciələr baş verir”.

Kasıb təbəqə, dövlətin himayəsində olan qumarxana ilə oyuna girir və hesab edir ki, nə vaxtsa “cek-pot” udub həyatını dəyişdirəcək, yazıq kasıb, bir də cahillikdən əziyyət çəkir. Azərlotereyanın feysbuk səhifəsində isə şərh yazan insanların böyük əksəriyyəti lotereyada uduşların çox xırda rəqəmlərdən və az olmasından şikayətçidir.Feysbukda keçirdiyimiz sorğuda, həmçinin bu cavablarla qarşılaşdıq.

TEREF.AZ yazır ki, 7times.az saytının əməkdaşı mövzuya dair küçədə bilet satan satıcılardan bir sıra məlumatlar almağa çalışıb. Maraqlıdır, gün ərzində nə qədər bilet satılır, satılan biletlərə iri məbləğli uduşlar düşürmü? Ənvər adlı satıcı bildirdi ki, gün ərzində 50-60 satış edə bilir. İri məbləğli uduşla bağlı məsələyə gəlincə, bir həftə öncə 800 manatlıq uduş olduğunu bildirdi. Bu ərəfədə piştaxtaya yaxınlaşan bir alıcı isə heç vaxt böyük məbləğlər uda bilmədiyini, ara-sıra əyləncə üçün uşaqlarına aldığını söylədi. Söhbət zamanı piştaxtaya yaxınlaşan alıcı “Binqo” aldı. Bildirdi ki, tez-tez lotereya bileti alır, amma cəmi bir dəfə 5 manat udub.

Düşünürük ki, məsələyə dövlət səviyəsində baxılmalı, daim nəzarətdə saxlanmalıdır. Azərlotereya oyunların necə keçirilməsi ilə bağlı açıqlama verməlidir. İnsanları göz görə-görə aldatmaq və qeyri-şəffaf keçirilən oyunlara icazə vermək qəbul edilməzdir!

Teref.az yazır ki, LAF TV-nin redaktoru əməkdar jurnalist Leman Eleşrefqızı sosial şəbəkədə head&shoulders şampununun Azərbaycanda saxtalaşdırıldığı barədə şübhələrini səsləndirərək video paylaşım edib. Ləman xanımın paylaşdığı statusu və videonu oxuculara təqdim edirik:
"Uzun illərdir saçımı ancaq head&shoulders şampunu ilə yuyuram. Bu dəfə uşaq gedib marketdən kiçik, üstündə yasəmən şəkli olan şampun aldı. Elə bil zirzəmidə hazırlanıb, head&shouldersin iyi yüngülvari gəlir,amma içi zibil.Əslində bunu salonda mənə illər qabaq demişdilər ki, bu şampuna da əl qatırlar, inanmamışdım.
Yaxşı, bəs bu ünlü şirkətin Azərbaycanda nümayəndəliyi yoxdumu? Hara baxırlar? İstehlakçını belə aldatmaq olurmu? Biz buna pul verib alırıq, sizin qablaşdırdığınız zibili yox. Əcəb işə düşmüşük, dünyaca məşhur brendi gətirib Azərbaycanda özümüzə oxşadırıq. Keçən dəfə Sisleyin timsalında gəldi başıma, indi də belə. Ölkədə normal məhkəmə də yoxdur ki, vurub belini qırasan bunların."