Azərbaycanın cənub bölgəsində 5 maqnitudada qeydə alınmış zəlzələ altı rayonda 4 bal gücündə hiss olunub.

Oxu.Az xəbər verir ki, bu barədə Seysmoloji Xidmət Mərkəzindən bildirilib.

"Zəlzələlərin tədqiqatı bürosunun məlumatına əsasən Lerik stansiyasından 27 km şərqdə Lerik rayonunda zəlzələ qeydə alınıb.

Zəlzələ episentrdə 5 bala yaxın, ətraf rayonlarda - Lerik, Lənkəran, Astara, Yardımlı, Masallı, Cəlilabadda 4 bal, digər rayonlarda 3 bal gücündə hiss olunub", – məlumatda qeyd olunub.

07:55

Azərbaycanın cənub zonasında güclü zəlzələ olub.

Oxu.Az Seysmoloji Xidmət Mərkəzinin məlumatına istinadən bildirir ki, gücü 5 balla ölçülən yeraltı təkanlar Talış Dağlıq zonasında, Lerik rayonu ərazisində yerli vaxtla 7:43-də qeydə alınıb.

Təkanlar 18 km dərinlikdə meydana gəlib.

“Neçə illərdir ki, Araz çayının Saatlı rayonu ərazisindən keçən hissəsində çoxlu sayda qum karxanaları fəaliyyət göstərir. Bu karxanalarda yerin təkindən istifadə qaydalarına riayət olunmaması nəticəsində Araz çayının məcrası dəyişib, yaxınlıqda yerləşən yaşayış məntəqələrində yeraltı suların səviyyəsi aşağı düşüb, həmçinin minerallaşma dərəcəsi də dəyişib”. Tribunainfo.az xəbər verir ki, bu barədə ictimai fəal Abış Astanov yazıb.
O bildirib ki, çayın yeni məcrasında “oyuq”lar əmələ gəlib, kənarda isə dərinliyi 20 metrdən çox olan göllər və axmazlar yaranıb. “Mütəxəssislərin dediyinə görə, çayın müasir məcrasından kənarda bərpası mümkün olmayan faydalı qazıntı materiallarının çıxarılması gələcəkdə bu zona üçün su ehtiyatlarının tükənməsinə, çirklənməsinə və ətraf ərazilərdə ekoloji tarazlığın pozulmasına səbəb ola bilər”.
Astanov deyir ki, artıq neçə illərdir ki, bunun fəsadları Saatlı rayonunda öz təsirini göstərir. “Bunu hər il rayonun müxtəlif kəndlərində baş verən “su üsyanları”ndan da aydın görmək olar. Onu da qeyd etməyi özümə borc bilirəm ki, burada yaranan dərin göllərdə xeyli sayda insan boğularaq dünyasını dəyişib. Beləcə də kimlərinsə var-dövlət yığmaq hərisliyi səbəbindən insanlar həlak olur, xalqa, dövlətə, təbiətə xeyli ziyan dəyir”.
İctimai fəal qeyd edir ki,bütün bu əməllər barəsində əhali tərəfindən dəfələrlə müxtəlif dövlət qurumlarına müraciətlər olunsa da heç bir tədbir görən yoxdur. “Ona görə ki, karyer işlədənlərin özlərinin də dediyinə görə “krışa”ları Bakıda yüksək vəzifə sahibidirlər”.
Abış Astanov onu da deyib ki, yaxın günlərdə həmin karyerlərin kimlərə məxsus olması, orada hansı dövlət qurumlarının texnikalarından istifadə olunması, vergidən yayınma halları və digər qanunsuzluqlar barəsində, həmçinin onların “krışa”ları haqqında geniş məlumat verəcək.

Qərbi Azərbaycan Xronikası layihəsi çərçivəsində jurnalist Əsgər İbrahimovun müəllifliyi ilə Vorontsovka rayonu haqqında süjet hazırlanıb.

"Çar Rusiyasının Vorontsovkada siyahıyaalma saxtakarlığı" adlı süjetdə kəndləri yer üzündən silinən, əhalisi amansızlıqla qətlə yetirilərək su quyularına atılan, barışıq bəhanəsi ilə tövlələrə toplanıb yandırılan rayonun tarixi yerlərinin saxtalaşdırıldığı, yaşayış məskənlərində oğuz türklərinin izinin itirildiyi, tarixi abidələrin dağıdıldığı bildirilib.

Qeyd olunub ki, bütün bunlar ermənilərin və havadarlarının məkrli siyasətindən qaynaqlanır: "Qərbi Azərbaycanın Loru mahalının Dağlıq Borçalı ərazisində yerləşən Vorontsovka rayonu ərazisində 1828-1831-ci illərə qədər türklər üstünlük təşkil edib, sonradan bura Türkiyədən və İrandan kütləvi şəkildə ermənilər köçürülüb. Etnik tərkibi dəyişdirmək üçün Rusiyanın mərkəzi quberniyalarından bura malakanlar da yerləşdirilib. 1905-1907, 1918-1920-ci illərdə Cənubi Qafqazda baş verən münaqişələr zamanı Vorontsovka rayonunun bir çox kəndi erməni vandallarının hücumuna və işgəncələrinə məruz qalıb, azərbaycanlılar tamamilə qovularaq ruslaşdırılıb".

Diqqətə çatdırılıb ki, inzibati ərazi vahidi olan Vorontsovka rayonunun adı 1937-ci il dekabrın 31-də dəyişdirilərək Kalinino adlandırılıb. 1991-ci ildə rayonun adı yenidən dəyişdirilərək Taşir qoyulub. Rayonun Soyuqbulaq kəndi yaxınlığında Armudlu və Qaçaqqıran dərələrində əsrlərin yadigarı olan Soyuqbulaq qayaüstü rəsmlərin mövcudluğu, Cücəkənd kəndində əlləzlilər, qaraqurbanlılar, sakatlar, qarakəllər, dəmirçilər, saraclılar, bocalevi, işvahannılar, çırpanevi, dərvişlər kimi qədim oğuz tayfalarının yaşaması bu məkanın qədim tarixini əks etdirib.

Bildirilib ki, 1948-1953-cü illərdə yenidən deportasiya həyatı yaşayan Vorontsovka sakinləri məcburi prinsiplər altında acınacaqlı vəziyyətdə Azərbaycanın Aran rayonlarına köçürülüb. Son olaraq 1988-ci ildə azərbaycanlılar yaşadıqları 16 kəndi məcburi tərk ediblər. Bundan sonra rayon üzrə 19 tarixi yer adları dəyişdirilib. Nəhayət, 1995-ci ildə mərkəzi Böyük Qarakilsdə, yəni Vanadzor olan Lori mərzliyi yaradılıb.

Sonda vurğulanıb ki, Vorontsovka rayonu da müxtəlif vasitələrlə, havadarların köməyi ilə erməniləşdirilib: "Amma bu gün Qərbi Azərbaycan reallığı Ermənistan hakimiyyətinin kabusuna çevrilib. Biz isə doğma yurd-yuvamızda pozulan növrağımızı yenidən qurmaq üçün Qərbi Azərbaycan hədəfinə addım-addım yaxınlaşırıq".

Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Ətraflı Baku TV-nin süjetində:

Məlum olduğu kimi, ölkə ərazisində taksi xidmətinin qiyməti 2 dəfədən artıq bahalaşıb. İctimai nəqliyyatla bağlı mövcud problemlərin fonunda bu bahalaşma insanlarda ciddi narahatlıq doğurur. Çünki ictimai nəqliyyat probleminin öz mövcudluğunu daha da möhkəmləndirdiyi bir vaxtda, Bakı şəhərinin sakinləri bir müddət əvvələ qədər kifayət qədər sərfəli qiymətə təklif edilən taksi xidmətindən istifadə edirdilər. Bu da şəhərin ictimai nəqliyyat probleminə aqressiyanı bir qədər yumşaltmış olurdu. Hazırda isə vəziyyət fərqlidir. Taksi xidmətlərinin qiyməti artdıqca ictimai nəqliyyata üz tutanların sayı da artır, nəticədə marşrut xətlərindən, avtobuslardan şikayətlərin sayı artmağa başlayıb.

Yerüstü ictimai nəqliyyatla bağlı əsas şikayətlər avtobusların gecikməsi, texniki nasazlığı, isti aylarda kondisioner sisteminin işləməməsi, sərnişin sıxlığı, axşam saatlarında bir çox marşrut xətlərində avtobusların olmaması ilə bağlıdır. İyul ayının 1-dən isə taksi fəaliyyəti ilə bağlı yeni tələblərin tətbiqinə başlanılacaq. Bundan sonra taksi xidmətində qiymətlərin daha da artacağı gözlənilir.

Bəs, təxmin edildiyi kimi taksi xidmətlərinin qiymətində artım tendensiyası davam edəcəkmi? Bakının yerüstü ictimai nəqliyyat probleminin həlli nə dərəcədə mümkündür?

Mövzu ilə bağlı AYNA-ya danışan nəqliyyat üzrə ekspert Rauf Ağamirzəyev deyib ki, taksi xidmətində qiymət artımının olacağına dair ehtimallar yüksəkdir: “Proseslərin gedişatı taksi xidmətlərində qiymət artımının olacağını göstərir. Əhalinin ictimai nəqliyyatdan narazılığı tamamilə obyektiv səbəblərdən qaynaqlanır. Mövcud problemlərin sürətli, təxirə salınmadan aradan qaldırılması istiqamətində addımlar atıla bilər. Bu gün ümumi olaraq problemin həlli istiqamətində müəyyən tədbirlər görülür. Məsələn, “28 May”da nəqliyyat qovşağının qurulması, velosiped, avtobus zolağı şəbəkəsinin yaradılması ilə bağlı işlərə başlanılıb. Bunlar mərhələli şəkildə icra edilir. Piyadalar üçün infrastrukturun yaradılması istiqamətində işlər isə çox azdır”.

“Lakin bu proses ümumi aparılmalıdır. Bu işlərdə çatışmayan elementlər də var. Belə ki, mövcud zolaqlardan effektiv istifadə üçün onların zəbt edilməsinin qarşısı alınmalı və bundan ötrü də nəzarət sərtləşdirilməli, hesabatlılıq təmin edilməlidir. Bu zaman qısa məsafə üçün taksi xidmətinə və fərdi avtomobillərə yönəlmiş sərnişinləri ictimai nəqliyyata yönəldə bilərik. Çünki ən önəmli olan vaxtdır və bu, ictimai nəqliyyatla qazanılacaqsa, o zaman biz mövcud problemi, ictimai nəqliyyatdan narazılığı həll etmiş olacağıq”, - deyə həmsöhbətimiz bildirib.

Ekspertin fikrincə, buna paralel olaraq, şəhər daxilində dəmir yolu stansiyalarının, dayanacaqlarının da artırılmasına ehtiyac var: “Dayanacaqların artırılması Dərnəgül, Keşlə, Böyükşor, Nərimanov, Binəqədi istiqamətində mövcud nəqliyyat sistemində axının parçalanmas və hazırkı stansiyaların yükünün azalması ilə nəticələnəcək. Bu, alternativ çıxış imkanlarının yaradılması deməkdir, həmçinin ictimai nəqliyyat probleminin həlli istiqamətində aparılan islahatların birinci mərhələsi - yüngül formasıdır”.

Daha sərt islahatlara gəlincə isə, Ağamirzəyevin sözlərinə görə, bunun üçün böyük investisiya lazımdır: “Şəhər canlı orqanizmdir. Dəmiryolu şəbəkəsi, tramvay xətlərinin çəkilməsi, metro xətlərinin inkişafı və s. hamısı ümumi nəqliyyatı, şəhərdə hərəkətliliyi təmin edən elementlərdir. Hazırkı vəziyyətdə qısa həllərlə bu cür problemlərin öhdəsindən gəlmək mümkün deyil. Mərhələli şəkildə icra planı olmalıdır və investisiyaların yatırılması istiqamətində qərarlar verilməlidir”.

İctimai nəqliyyatda problemlərin həlli üçün investisiya yatırmağa gəlincə, mütəxəssis bildirib ki, burada fərqli modellər var: “Bizdə hələ ki, əsas yükü dövlət öz üzərinə götürüb. Lakin düşünürəm ki, fərqli modellərdən istifadə edərək bu işi icra etmək lazımdır. Bu halda yükü dövlətin üzərindən götürüb biznesə ötürmək olar. Sadəcə bu zaman dövlətin üzərinə müəyyən öhdəlik düşür. Qanunvericlik dəyişməli, sərnişin axınını təmin etmək üçün bəzi qabaqlayıcı, kompleks tədbirlər görülməlidir. Avtomobil üçün bir qədər narahat, piyada, çeşidli ictimai nəqliyyat üçün isə daha komfrotlu və sürəti təmin edəcək qərarlar verilməlidir. Şəhərin ən bahalı resursu torpaqdır. Onun səmərəli istifadəsi yönündə 8 Noyabr prospektindəki zolaqların ensizləşdirilməsi ilə bağlı verilmiş qərar ilk xoş təcrübədir. Orada zolaqlar 3.75 metrdən 3.10 metrə endirilib. Düşünürəm ki, kənar zolaq xaric, digərlərini 2.5 metrə qədər azaltmaq olar. Artıq qalan sahəni isə digər hərəkət iştirakçıları üçün daha səmərəli istifadə etməkdən ötrü alternativlər yaranır və nəticədə hərəkət axını fərqli növlər üzrə bölünmüş olur”.

“Bu təcrübə daha da təkmilləşdirilməli, irəli aparılmalıdır. Şəhərdə aqresiv mühitə son qoyulmalı, fərqli hərəkət iştrakçıları üçün şərait yaradılmalıdır. İndiki halda dəmir parçası üçün çox şərait yaratmışıq. Avtomobil bir status hesab olunur. Amma insanların fikrini dəyişdirməliyik və bundan ötrü də şərait yaratmalıyıq. Piyada üçün zolağı rahatlaşdıracağımız halda, insanların şəhərdən zövq ala-ala gəzə biləcəyini təmin etmiş olacağıq. Biz piyada, velosiped, avtobus zolağının davamlılığını və sərt nəzarəti təmin etdiyimiz halda, insanlar özləri hansı məsafəni piyada, hansını nəqliyyatla gedəcəklərinə qərar verəcəklər. Bu zaman hətta insanlar avtobusun təzə və ya köhnə olmasına yox, qrafiklə işləməsinə köklənəcəklər. Yəni biləcəklər ki, məsələn, səhər beş dəqiqədən bir filan avtobus sürətlə hərəkət edir və bu, onlar üçün əlverişlidir. Onu da qeyd edim ki, avtobusların daha inklüziv və müasir olması da əsas öhdəliklərdəndir”, - deyə müsahibimiz vurğulayıb.

Əlavə edib ki, sıxlığı çox olan ərazilərdə, eləcə də Bakıda daha çox daşınma imkanı yaradan nəqliyyat vasitəsi kimi travmayların hərəkəti bərpa edilməlidir: “3 milyondan çox insanın yaşadığı bir şəhərdə hərəkətdə mobilliyi təmin etməyin yolu reysli nəqliyyatın olmasıdır. Bu yöndə investisiya qoyulmalıdır. Tramvaylar sıxlıq çox olan ərazilərdə eyni anda daha çox daşıma imkanı yaradır. Bir tramvayın daşıyacağı sərnişin sayı 3-5 avtobusun daşıyacağı sərnişin sayı ilə eyni olsa da, onun istismar ili avtobusla müqayisədə daha çoxdur və istismar xərcləri də daha ucuzdur”.

Bakının Xətai rayonunda ailəsinin beş üzvünü qətlə yetirməkdə təqsirləndirilən Əhməd Əhmədovun məhkəməsi keçilirib.

TEREF 32gun.az-a istinadla xəbər verir ki, məhkəmədən yayılan fotolarda Əhməd Əhmədovun əynindəki köynək diqqət çəkib.

Həmin köynək brend marka sayılan "Moncler" firmasının istehsalıdır.

Bu köynəklərin qiyməti 300 dollardan başlayır. Bazarda həmin məhsulun saxtası demək olar ki, yoxdur.

Bu baxımdan, ehtimal olunur ki, onun əynindəki köynək orijinal məhsuldur.

İnternetdə Mahaçqalada baş vermiş dəhşətli hadisəni əks etdirən müşahidə kameralarının videosu yayılıb.

Görüntülər “Burada Dağıstan” Telegram kanalında yayımlanıb.

“Cinayətkarların olduğu avtomobil işıqforda dayanır, polislər məcbur qalıb dayanıblar və enən kimi polis maşınına atəş açmağa başlayıblar”, – nəşr yazır.

Kadrlardan görünür ki, tıxacda qalan avtomobillər atışma başlayandan sonra sürətlə qarşıdan gələn nəqliyyatın yoluna daxil olmağa başlayıb.

İyunun 23-də Dağıstan Dərbəndində bir neçə nəfər Lenin küçəsində yerləşən Müqəddəs Məryəm Şəfaət kilsəsinə və Tağı-Zadə küçəsindəki Kələ-Numaz sinaqoquna hücum edərək onları avtomatlardan atəşə tutub. Eyni zamanda Mahaçqalada silahlılar atəş açıb. Ermoşkin küçəsində yol polisi postu və yaxınlıqdakı sinaqoq atəşə tutulub. Orconikidze küçəsindəki Müqəddəs Aspir kilsəsi yaxınlığında da atışma olub. Polis hücum edənlərdən beşini öldürüb.

Hadisə zamanı 23 nəfər ölüb.

/Oxu24.com

Ötən həftə Milli Məclisdə nəqliyyat vasitələri ilə bağlı nəzərdə tutulan bir sıra cərimələrin məbləği artırıldı. Artımlar əsasən, dayanma-durma, parklanma, işıqforda hərəkət və səkilərlə bağlı cərimələrlə bağlı oldu.

Cərimələrin artırılması sosial şəbəkələrdə müzakirəsiz ötüşmədi. Əksər sürücülər mövcud artıma kəskin etiraz edərək, cərimələrin onsuz da çox olduğunu və bu artımın vəziyyəti daha da ağırlaşdıracağını bildirdi. Xüsusən avtomobillərin intensiv şəkildə hərəkət etdiyi paytaxt yollarında qayda pozuntusundan yayınmaq demək olar ki, mümkün deyil. Bəziləri cərimələrdəki artımın avtomobil bazarında da təsirsiz ötüşməyəcəyini deyir. Yüksək məbləğli cərimələrin fonunda, bəzi vətəndaşların avtomobil almaq fikrindən daşınacağı iddia edilir.

Görəsən, bu ehtimal nə dərəcədə doğrudur?

Mövzu ilə bağlı Yenisabah.az-a danışan nəqliyyat məsələləri üzrə ekspert Aslan Əsədov bildirib ki, sürücülər arasında nəqliyyat qaydalarının pozulması elə də geniş hal yayılmayıb:

“Nəqliyyat vasitələri ilə bağlı cərimələrin artırılması əslində əksər sürücülərə aid deyil. Qaydaların pozulması, sənədsiz avtomobil idarəetmə, dayanma-durma qaydaları kimi pozuntular elə də kütləvi hal təşkil etmir. Ona görə bu barədə narahatlığa səbəb görmürəm. Cərimələrin məbləğinin artırılması nəqliyyat vasitələrinin qiymətinə və alıcı kütləsinə elə də güclü təsir etməyəcək. Bu baxımdan alıcılar cərimələr səbəbindən nəqliyyat vasitəsi almaqdan yayınmayacaq”.

Ekspertin fikrincə, avtomobil bazarındakı köklü dəyişiklik kütləvi utilizasiya zamanı olacaq:

“Hal-hazırda maşın bazarında kifayət qədər alıcı və satıcı kütləsi var. İndi qarşıda bizi kütləvi utilizasiya prosesi gözləyir. Artıq onda bu barədə dəqiq nəsə demək olar. Həmin vaxt avtomobil bazarında radikal dəyişiklik ola bilər. Lakin cərimələrin artırılmasının bu istiqamətdə alış-satış tendensiyasına çox da təsir edəcəyini düşünmürəm”.