“Harada zəlzələ baş verirsə, süni zəlzələ ehtimalını dilə gətirənlər olur. İnsanları çaşdırmaq, öz siyasi məqsədləri üçün bunları edənlər olur”.

Teref.az xəbər verir ki, bunu “Kaspi”yə Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin (RSXM) baş direktoru Qurban Yetirmişli deyib.

“Süni zəlzələ ilə təbii zəlzələ seysmoqramda fərqlənir. Məsələn, tədqiqatlarımızda təbii zəlzələlər öz yerində, eləcə də sənaye partlayışları olanda, onları da qeydə alırıq, onların gücünü də veririk. Bilirik ki, bu partlayışdan dolayı olan silkələnmədir, bu isə təbii zəlzələ. Zəlzələni bilməyən adamlar ortaya elə ehtimal atırlar”, deyə Qurban Yetirmişli bildirib.

“Sovetlər dövründə Qazaxıstanda SSRİ-nin poliqonu var idi. Yer altında nüvə silahlarının sınağını həyata keçirirdilər. Silahlardan asılı olaraq fərqli gücdə təkanlar hiss edilirdi. Çox dərində olmadığına görə 5-6 bal gücündə zəlzələ əmələ gəlirdi. Ağacı yıxmaq, maşını çevirmək gücünə malik olurdu. Bu həmin ərazidə olurdu, orda da hiss edilirdi. Müasir dövrə gəlincə, tektonik silahlar var, zəlzələ ocaqlarına enerji buraxıb həmin zəlzələni tezləşdirməyin mümkün olduğunu deyirlər. Amma bir məsələ var, sən neçə kilometrlərdən hansısa əraziyə bu enerjini necə buraxa bilərsən? Metro xətti deyil ki, gəlib o silah bu əraziyə dəysin, burda zəlzələ yaratsın”, deyə baş direktor əlavə edib.

Türkiyədə baş verən zəlzələdən sonra, öz köhnə maşını ilə apardığı yardım mənzərəsilə məşhurlaşan Sərvər Bəşirlinin həmin vaxt etdiyi hərəkət təqdirəlayiqiydi.
Əslində həmin vaxt Sərvərin etdiyini bütün Azərbaycan edirdi. Yardım kampaniyasının aparıldığı ərazilərdə canlı müşahidə aparan şəxs kimi bundan da təsirli mərdlik mənzərlərinin şahidi oldum.
Sadəcə, Sərvərin mövzusu vaxtında ictimailəşdiyi üçün geniş rezonans doğurdu. Ondan sonra baş verənlər bir qədər təəccüblü görünür. Hansısa şirkət Sərvərə iş təklif edir, bir iş adamı ona maşın hədiyyə edir. Bir sözlə, Sərvərin üzərindən əməlli başlı piar gedir.
Bir şirkət deyib ki, Sərvərin evinin bütün elektrik avadanlıqları ilə pulsuz təmin etməyi öz üzrərinə götürür. Maraqlıdır ki, həmin şirkət Sərvər kimi 100-lərlə kasıbı divara dirəyib kredit borclarını tələb edir.
Heç bir sosial güzəşt kampaniyası həyata keçirmir. Məhkəmələrdə müşahidə aparsanız həmin şirkətlərin kasıb insanlara qarşı qaldırdıqları iddia tələblərindəki qəddarlığın dərəcəsi ilə yaxından tanış ola bilərsiniz.
Hətta Sərvərə hədiyyə edilən maşına nömrənin verilməsi hadisəsinindən belə, DYP özünü piar etdi. Nədi-nədi Sərvər köhnə maşınındakı nömrəsini ona veriblər, dövlət rüsumunu da DYP-nin özləri ödəyib. Bah, nə böyük iş görüblər…
Görəsən, Sərvər yox, başqa bir vətəndaş DYP-dən köhnə avtomobilinin nömrəsini özündə saxlamağı istəsə, ondan hansı məbləğdə rüşvət alarlar? Hamı bilir ki, DYP-nin nömrə verən idarəsində açıq bazardı. Hətta 50 min manata belə maşın nömrəsi satırlar. Yəni görünən budur ki, kimin əlinə fürsət düşürsə, Sərvəri özü üçün piar alətinə çevirib. Bikin ki, bütün bu “xeyriyyəçiliklər” Sərvərin kasıb orazına deyil, onun populyarlığına görə edilir.
Sərvərlə bağlı yaşananlar mənə vaxtı ilə cüdo üzrə olimpiya çempionu olmuş Elnur Məmmədlinin taleyini xatırlatdı. Elnur karyerasının ən parlaq vaxtında , 20 yaşında olimpiya çempionu oldu. Onun ən azı 3 dəfə də olimia çempionu olmaq kimi şansı varıydı. Çünki belə nümunələr çoxdu. Məsələn, rus güləşçisi Karelin 4, ağırlıq qaldıran Xəlil Mutlu isə 3 qat olimpiya çempionu olmağı bacardılar.

Ancaq biz nəyi müşahidə etdik? Kim özünü reklam etmək istədisə Elnura bahalı avtomobil və mənzil hədiyyə etdi. Vəziyyət o yerə çatdı ki, Elnur həmin maşınları satmaq üçün özünə avtisalon açdı. Hansı nazir ölkə rəhbərliyinin gözünə girmək istədisə, onun çiyninə rütbə yapışdırdı. Nəticədə, 20 yaşlı idmançı kökəldi və döşəkdə əvvəlki Elnura yaraşmayan biabırçı nəticələr göstərməyə başladı.
Sonra da zədəsini bəhanə edib, ən cavan yaşında peşəkar idmandan qaçmalı oldu. Təbiidir ki, burada Elnurun özünün də günahı az deyil. İmkan verməməliydi ki, kimlərsə onun şöhrətinin hesabına özlərini reklam etməsin. Bir az da karyerasını puldan çox istəməliydi.
Əslində, kasıb Sərvər, əvvəllər məşqə getməyə pulu olmayan Elnurun bu taleyindən özü üçün lazımi nəticəni çıxarmalıdır. Bir də , bizdə xalq olaraq poulyarlığa meyl çoxdu. Çünki bu, həm də dolanışıq deməkdi. Əksər hallarda isə həmin popularlığı qazananlar onu xalqın xeyrinə deyil, şəxsi faydaları üçün istifadə edir.
Buna aid də bir misal çəkim. Mərhum Heydər Əliyevlə görüş şansını əldə edən şairlərimizdən biri evi ola-ola ondan mənzil istəmişdi. İstəyi təmin olunmuşdu. Həmin ziyalı ikinci dəfə də Heydər Əliyevlə görüşmək xoşbəxtçiliyini əldə edir. Bilirsiniz nə xahiş edir? Prezidentin ona hədiyyə etdiyi mənzilin təmirini. Halbuki həmin ziyalı heç olmasa ikinci görüşdə xalqın xeyrinə olan bir xahişi ilə böyük bir problemin həllinə nail ola bilərdi.
Sözüm Sərvər Bəşirliyədir. Qardaş, nə verirlərsə görür, ancaq imkan vermə ki, sənin üzərindən şoular qursunlar. Onda səni də Elnur Məmmədlinin uğursuzluğu gözləyə bilər. O, nəticə verə bilmədi, sənlə bağlı nə olacaqsa, onu indidən deyə bilmərəm…
Məhəmmədəli Qəribli
Teref.az

“Vətəndaşlar 20 il yaşadıqları, əsgər yola saldıqları ev üçün bələdiyyələrdən torpaq alıb, banklara ödəniş edib, yerli icra hakimiyyətindən icazə alıblar”.

“Qafqazinfo” xəbər verir ki, bu fikirləri Milli Məclisin plenar iclasında deputat Rəşad Mahmudov deyib.

Deputat qeyd edib ki, 2020-ci illərdə torpaqların sərhədləri müəyyənləşəndən, elektron xəritələr tərtib olunandan sonra bu torpaqların bələdiyyələrin səlahiyyətinə daxil olmayan ümumi istifadədəki torpaqlar olduğu üzə çıxıb: “İndi vətəndaşlar 20 il əvvəlin sənədləri ilə evlərinə çıxarış ala bilmirlər. Müvafiq qurumlardan bildirilir ki, həmin sənədlər saxtadır. Belə məsələlər diqqət mərkəzində saxlanılmalıdır”.

“Azərpoçt” MMC-nin yeni istifadəyə verdiyi “PostCargo” xidməti vasitəsilə bazarda dempinq fəaliyyəti ilə məşğul olması barədə mediada səsləndirilən iddialar həqiqəti əks etdirmir.

Teref.az xəbər verir ki, bu barədə qurumun İctimaiyyətlə əlaqələr şöbəsi məlumat yayıb.

“Əvvəlcə onu qeyd edək ki, qurum 2022-ci ildə dövlətdən universal poçt xidmətləri üçün kiçik bir məbləğ, təxminən yüz min manat subsidiya almışdır. Bu isə onu deməyə əsas verir ki, “Azərpoçt” öz gəlirlilik siyasətini artıq uğurlu şəkildə qurub. Hətta son beş ildə ilk dəfə olaraq 2022-ci ili 4.2 milyon manat xalis mənfəətlə başa vurub.

Karqo bazarında dempinq siyasəti iddiasına gəldikdə isə bildiririk ki, “Azərpoçt” a məxsus karqo xidmətinin tarifləri orta bazar qiymətinə uyğundur və tariflər aydın şəkildə www.postcargo.az saytında təqdim olunub. Materialda bəhs olunan konkret nümunə – yəni 1 kq ağırlığında yükün daşınma qiymətinin 2 ABŞ dolları olması haqqındakı məlumat endirim kampaniyasına aiddir. Endirim kampaniyası isə qanunazidd deyil və normal marketinq siyasətidir. Belə ki, istənilən məhsul və ya xidmət bazara yeni daxil olduqda müştəri bazasını formalaşdırmaq üçün müxtəlif endirim kampaniyaları təşkil edilir və bütün kommunikasiya vasitələrində bu barədə məlumatlar dərc olunur. Bu kampaniya haqqında da “PostCargo” xidmətinin veb-səhifəsində ətraflı və açıq şəkildə məlumat verilib, martın 1-dək davam edəcəyi qeyd olunub”, - məlumatda qeyd olunub.

Fevralın 6-da Türkiyədə baş vermiş dəhşətli zəlzələ nəticəsində ən azı 10 azərbaycanlı həlak olub. Amma bu, son rəqəm olmaya bilər.
Belə ki, Türkiyədə zəlzələ bölgəsində olan daha 9 azərbaycanlıdan hələ də xəbər yoxdur. Onların axtarışı davam edir.

Pressklub.az xəbər verir ki, bunu Xaici İşlər Nazirliyinin (XİN) Mətbuat xidməti idarəsinin rəisi Ayxan Hacızadə bildirib.

XİN rəsmisi eyni zamanda, müraciətlər daxil olduqca təxliyə prosesinin davam etdiriləciyini vurğulayıb: “Ümumilikdə zəlzələ bölgəsindən Azərbaycana təxliyə edilən vətəndaşların sayı 513 nəfərdir”.

Türkiyədə 6 fevral zəlzələlərindən sonra axtarış-xilasetmə işləri davam etdirilir.

Növbəti möcüzə xəbəri Hataydan gəlib.

Belə ki, axtarış-xilasetmə qruplarının işi nəticəsində 10 yaşlı Osman 260 saatdan sonra dağıntılar altından sağ çıxarılıb.

Onun xəstəxanaya yerləşdirildiyi bildirilib.

Kahramanmaraşda baş verən 7,7 bal gücündə zəlzələdən dərhal sonra polisin ratsiya vasitəsilə verdiyi anonsların səs yazısı paylaşılıb.

Zəlzələ zamanı Kahramanmaraşın Onikişubat və Dulkadiroğlu məhəllərində xidmət aparan polislərin ratsiya danışıqları dəhşətin miqyasını ortaya qoyub.

Səs yazısında şəhərdəki dağıntılar barədə polis bölməsinə məlumat verən qrupların anonslarında axtarış-xilasetmə və sağlamlıq qruplarının dağıntı bölgələrinə göndərmək üçün göstərdiyi səylər və yaşanan çaxnaşma qeydə alınıb.

Rusiyanın ən qalmaqallı siyasətçilərindən sayılan mərhum LDPR sədri Vladimir Jirinovskinin nikahdan kənar oğlu həbs edilib.

jirinovskinin adı Oleq, soyadı Eydelşteyn olan oğlu Moskvadakı gürcü restoranlarının birində dava saldığı üçün saxlanılıb. Polis bölməsinə gətirilən Eydelşteyn burada polis işçisinə əl qaldırıb. Ardınca, məhkəməyə aparılan Jirinovskinin törəməsinə 15 sutka həbs cəzası kəsiblər.

Qeyd edək ki, Rusiya XİN Akademiyasında təhsil almış 36 yaşlı Eydelşteyn də siyasətlə məşğuldur və atasının partiyasında təmsil olunur. Onun anası Osetiyadandır. Eydelşteyn soyadı isə Jirinovskinin atasının soyadıdır.

Vladimir Jirinovskinin digər nikahdan kənar övladı da var. Bu, Anastasiya Petrovadır. Jirinovskinin “qanuni” oğlununsa adı İqordur.

Cümhuriyyət Xalq Partiyasının (CHP) keçmiş sədri Deniz Baykalın dəfn mərasimində Türkiyə Prezidenti Rəcəb Tayyib Ərdoğanın müxalifətçilərdən yalnız Məmləkət Partiyasının rəhbəri Məhərrəm İncə ilə əl-ələ görüşməsi müzakirələrə səbəb olub.

“Qafqazinfo” xəbər verir ki, M.İncə bu məsələyə münasibət bildirərək onu tənqid edənlərə cavab verib.

“Həmin an cənab Ərdoğanın başqaları ilə salamlaşıb-salamlaşmadığını belə görmədim. Bunu xəbərlərdən öyrəndim. Mənim şou ilə işim yoxdur, məmləkətim qan ağlayır. Buradan siyasi nəticə çıxarıb məni tənqid edənlər var. Bunlar əxlaqsız insanlardır. Dağıntılar altında insanlarımız var, salamlaşsa nə olacaq, salamlaşmasa, nə olacaq. Mən atayam, babayam, müəlliməm, övladlarım dağıntılar altındadır”- M.İncə bildirib.