 |
|
|
Xəbər verdiyimiz kimi, bu gün Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirə keçirib.
Dövlət başçısı müşavirədə Gədəbəyin Söyüdülü kəndində baş verən hadisələrdən də danışıb.
Prezident çıxışında Ekologiya və Təbii Sərvətlər Nazirliyini sərt şəkildə tənqid edib, qurumun səhlənkarlığa yol verdiyini bildirib.
Prezidentin həmin məsələ ilə bağlı çıxışının videosunu təqdim edirik:
Bu gün Tovuz döyüşlərinin başlamasından üç il keçir.
2020-ci ilin iyulun 12-də günorta saatlarından başlayaraq Ermənistan silahlı qüvvələrinin bölmələri Tovuz rayonu istiqamətində atəşkəs rejimini kobud şəkildə pozublar.
Ermənilər mövqelərimizi ələ keçirmək məqsədilə hücuma keçməyə cəhd göstəriblər. Düşmən əvvəlcə yüngül atıcı silahlardan, 60, 82, 120 millimetrlik minaatanlar və daha iriçaplı digər ağır artilleriya qurğularından istifadə etməklə və sərhədboyu bir sıra yaşayış məntəqələrimizi - Ağdam, Dondar Quşçu, Əlibəyli, Vahidli, Yuxarı Öysüzlü, Aşağı Öysüzlü kəndlərini atəşə tutub.
Düşmənə qarşı cavab tədbirlərinin görülməsi ilə bağlı komandanlıq tərəfindən bu istiqamətdə yerləşən bölmələrə dərhal əmr verilib.
Görülən tədbirlər nəticəsində düşmən hücumunun qarşısı alınıb, onun müdafiəsinin ön xəttindəki atəş nöqtələri, müdafiəsinin dərinliyində yerləşən ehtiyatlar, dayaq məntəqələri, artilleriya qurğuları, müxtəlif təyinatlı hərbi obyektlər, döyüş texnikaları və yüzədək canlı qüvvəsi məhv edilib.
Azərbaycan Müdafiə Nazirliyi bildirir ki, Ermənistanın hərbi-siyasi rəhbərliyi 2016-cı ilin aprel döyüşlərində olduğu kimi, bu dəfə də hərbi məlumatların yayılmasına tətbiq edilən qadağanı əsas gətirərək döyüş itkilərini ictimaiyyətdən gizlədib.
Əldə olunan məlumata görə, düşmənin itkiləri arasında Suriya və Yaxın Şərqin müxtəlif ölkələrindən erməni əsilli döyüşçülər də olub. Bu kateqoriyadan olan şəxslər Ermənistanda rəsmi qeydiyyata alınmadıqları üçün erməni hərbi rəhbərliyinə bu itkiləri gizlətmək daha asan olur.
İyulun 12-dən başlayan aktiv döyüş əməliyyatları iyulun 17-i axşam saatlarınadək davam edib. Bu müddət ərzində Ermənistan silahlı qüvvələri bölmələrinin mövqelərimizi ələ keçirmək cəhdlərinin qarşısı qətiyyətlə alınıb və hər hansı ərazi itkisinə yol verilməyib.
Bu əməliyyat istiqaməti eyni zamanda həm də iki ölkə arasında dövlət sərhədi olduğundan Azərbaycan Ordusunun gördüyü cavab tədbirləri sadəcə düşmənin tətbiq etdiyi silah növlərinə uyğun, onun atəş nöqtələrinin susdurulması və onun irəliləməsinin qarşısının alınmasına yönəlib.
Təbii ki, döyüşlərdə bölmələrimizin qarşısında düşmən mövqelərini ələ keçirmək və ya hansısa istiqamətdə irəliləmək kimi məqsəd yox idi.
Döyüşlərdə düşmən hücumunun qarşısını alarkən Azərbaycan Ordusunun 12 hərbi qulluqçusu – general-mayor Polad Həşimov, polkovnik İlqar Mirzəyev, mayor Namiq Əhmədov, mayor Anar Novruzov, baş leytenant Rəşad Mahmudov, gizir İlqar Zeynallı, gizir Yaşar Babayev, MAXE əsgər Elçin Mustafazadə, MAXE çavuş Vüqar Sadıqov, MAXE əsgər Nazim İsmayılov, baş əsgər Elşad Məmmədov, əsgər Xəyyam Daşdəmirov şəhid olub. Döyüşlər zamanı yaralananlar da olub.
Ermənistan ordusundakı vəziyyətdən fərqli olaraq qürurverici haldır ki, şəhid olan general və zabitlərimiz tabeliklərində olan əsgərlərlə bir sırada, ön xətdə düşmənlə döyüş zamanı həlak olublar.
Qeyd edək ki, döyüşlər zamanı yaşayış məntəqələri, qeyri-hərbi obyektlərin intensiv atəşə tutulması nəticəsində mülki əhaliyə, dövlət əmlakına, fərdi mülklərə, eləcə də infrastruktur obyektlərinə ziyan dəyib.
Artilleriya atəşi nəticəsində iyulun 14-də Tovuz rayonunun Ağdam kənd sakini, 1944-cü il təvəllüdlü Əziz Əzizov həlak olub.
Tovuz döyüşləri Azərbaycanda Ermənistanın işğalına qarşı dövlətin strateji qətiyyətini və xalqın müqavimət ruhunu gücləndirdi.
Tovuzdakı şiddətli döyüşlər zamanı Azərbaycanda könüllü şəkildə orduya yazılmaq prosesi başladı. Bu döyüşlərdə məğlub olan Ermənistan Azərbaycana qarşı təxribatlarını genişləndirdi. Tovuz döyüşləri həm də həmin ilin sentyabrında başlayan Vətən müharibəsi üçün qığılcım rolunu oynadı. Azərbaycan ermənilərin davamlı təxribatlarına cavab olaraq sentyabrın 27-də güclü əks-hücum əməliyyatlarına başladı və 44 gün ərzində işğalda olan ərazilərini azad etdi.
Gəncəyə güclü yağışdan sonra dolu yağıb.
Gununsesi.info xəbər verir ki, bu barədə görüntülər sosial şəbəkələrdə paylaşılıb.
Bildirilib ki, bu gün təxminən 16 radələrində şəhərə dolu düşüb.
Doludan sonra hər hansı bir fəsadın olmadığı bildirilir.
Qeyd edək ki, qərb bölgəsində qeyri-sabit hava şəraiti davam edir.
Küveytdə həddindən artıq istilər səbəbindən dəfn mərasimləri gecə saatlarında keçiriləcək.
Modern.az xəbər verir ki, bu barədə Küveytim “Ər-Ray” qəzeti məlumat yayıb.
Qərara əsasən, vəfat edən şəxslərin meyitləri iyul və avqust aylarında gecələr dəfn edilə bilər.
Dəfn işlərinin asanlaşdırılması məqsədi ilə bələdiyyələr tərəfindən vətəndaşlara işıqlandırma və digər xidmətlər göstəriləcəyi bildirilib.
Sumqayıtda toyda qətl olub. Bu haqda Sumqayıt24 xəbər verir.
Hadisə 8 iyul saat 23:00 radələrində “Green House” şadlıq sarayında baş verib. Şahidlərin sözlərinə görə, qonaqlar rəqs edən zaman Elxan Ələkbərov (şərti) orta yaşlı qardaşı Namiqə (şərti) arxadan yaxınlaşaraq bıçaqla onun boğazını kəsib.
Namiqin həyat yoldaşı, Elnarə (şərti) olanları görəndə panikaya düşüb. Bu zaman Elxan onun da çənəsinə bıçaq saplayıb. Lakin qadın sağ qalıb.
Qətllə bitən münaqişənin səbəbləri hələ ki qaranlıq qalıb.
Bu ilin aprel ayında general-polkovnik Arzu Rəhimov Səfərbərlik və Hərbi Xidmətə Çağırış üzrə Dövlət Xidmətinin rəisi vəzifəsindən azad edildi.
O, bu postda nə az, nə çox, düz 11il çalışdı. Arzu Rəhimovun yerinə elə həmin gün Mürsəl İbrahimov təyin olundu.
Qeyd edək ki, yeni rəis uzun müddət daxili işlər və təhlükəsizlik orqanlarında çalışıb.
Bəs, Arzu Rəhimovun Xidmətə rəhbərlik etdiyi dövr nə ilə yadda qaldı?
Tərəddüd etmədən demək olar ki, 11 il ərzində bu qurumun fəaliyyətində əvvəlki dövrlə müqayisədə hansısa müsbət dəyişikliklər nəzərə çarpmadı. Hətta sələfi Əliağa Hüseynovdan fərqli olaraq, Arzu Rəhimovun cəmiyyətə, mediaya daha qapalı adam olduğu üzə çıxdı. O, bu qapalılığını 11 il ərzində Xidmətin fəaliyyətinə də uğurla tətbiq edə bildi. Mediaya tamamilə qapalı olan Səfərbərlik və Hərbi Xidmətə Çağırış üzrə Dövlət Xidmətində, onun strukturlarında nələr baş verdiyindən çox zaman cəmiyyətin xəbəri olmadı. Amma buna baxmayaraq, mətbuatda tez-tez Arzu Rəhimovun fəaliyyəti tənqid olunur, Xidmətdə ciddi rüşvət və korrupsiya faktlarının olduğuna dair materiallar dərc olunurdu.
Artıq Arzu Rəhimovun vəzifəsindən uzaqlaşdırılmasından sonra onun dövründə Səfərbərlik Xidmətində baş verən qanunsuzluqlar gün işığına çıxmağa başlayıb.
Fotoda: Rahim Ağayev
Belə ki, bu günlərdə Baş Prokuror yanında Korrupsiyaya qarşı Mübarizə Baş İdarəsi Səfərbərlik və Hərbi Xidmətə Çağırış üzrə Dövlət Xidmətinin Laçın, Xaçmaz və Cəlilabad şöbələrində əməliyyat keçirib.
Nəticədə Xaçmaz rayon şöbəsinin rəisi, polkovnik-leytenant Ağayev Rahim Əlifağa oğlu, Laçın hərbi komissarlığının müfəttişi Rəşad Rəşidli və Cəlilabad rayon hərbi komissarlığının müfəttişi Ramil Həsənov qanunsuz əməlləri ifşa olunduğuna görə həbs ediliblər. Sonuncu iki nəfərin barəsində polisin nəzarəti altına vermə növündə qətimkan tədbiri seçilib.
Qeyd edək ki, Ramil Həsənov və Rəşad Rəşidliyə qarşı Cinayət Məcəlləsinin 312-1-ci (vəzifəli şəxsin qərarına qanunsuz təsir göstərmə-nüfuz alveri) maddəsilə ittiham irəli sürülüb.
Onların işlədikləri tabe qurumların çağırış və hərbi-həkim komissiyalarının vəzifəli şəxslərinin qərarlarına təsir imkanlarından istifadə edərək, vətəndaşların hərbi xidmətə yararsız hesab edilməsinə nail olmaqla müxtəlif məbləğlərdə pul almalarına əsaslı şübhələr müəyyən edilib.
Səfərbərlik və Hərbi Xidmətə Çağırış üzrə Dövlət Xidmətinin Xaçmaz rayon şöbəsinin rəisi Rahim Ağayevə gəlincə, onun çağırışçının sağlamlıq vəziyyətilə əlaqədar həqiqi hərbi xidmətə yararsız hesab edilməsinə köməklik göstərilməsi müqabilində vətəndaşdan tələb etdiyi 8 min manat məbləğində pul vəsaitinin 5 min manatını rüşvət qismində almasına əsaslı şübhələr müəyyən edilib.
Ona qarşı Cinayət Məcəlləsinin 311.3.3 (külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələrilə ittiham elan edilərək barəsində məhkəmənin qərarı ilə həbs qətimkan tədbiri seçilib.
Hazırda həbs olunan şəxslərin fəaliyyəti ilə bağlı araşdrımalar davam edir. Cinayətə aidiyyəti olan digər şəxlərin də saxlanılacağı istisna olunmur.
Bakupost.az -ın əldə etdiyi son məlumatlara görə isə Baş Prokuror yanında Korrupsiyaya qarşı Mübarizə Baş İdarəsinin Xidmətin yerli və mərkəzi strukturlarında növbəti əməliyyatlar keçirəcəyi gözlənilir.
Bildirilir ki, ötən illər ərzində rayon şöbələrində rüşvət müqabilində saxta səndələr tərtib etməklə xeyli insan hərbi xidmətdən yayındırılıb. Həmçinin Xidmətə dövlət büdcəsindən ayrılan vəsaitlərin xərclənməsində də ciddi nöqsanlara yol verilib. Daha doğrusu, bu vəsaitlərin xeyli hissəsi Xidmətin keçmiş rəhbərliyi tərəfindən mənimsənilib.
Beləliklə, növbəti əməliyyatların daha səs-küylü olacağı, Xidmətin keçmiş rəisi Arzu Rəhimovun də fəaliyyətinin araşdırılacağı və hətta həbs olunacağı bildirilir.
Gənclər və İdman Nazirliyi tərəfindən yeni yaradılmış Regional Gənclər və İdman İdarələrinin rəhbərliyinə təyinatlar davam edir. Regional idarələrə rəis təyin olunan şəxslərin siyahısında bir sıra maraqlı adlara rast gəlmək mümkündür.
Tribunainfo.az xəbər verir ki, nazir Fərid Qayıbov Lənkəran- Astara Regional Gənclər və İdman İdarəsinə öz yaxın qohumunu rəis təyin edib. Regional idarəyə rəis təyin olunan Teymur Babazadə nazir Fərid Qayıbovun xalasının nəvəsidir.
Xatırladaq ki, Teymur Babazadə indiyə qədər Lənkəran Rayon Gənclər və İdman İdarəsinin rəisi vəzifəsini müvəqqəti icra edib. Onun adı Lənkəran rayon ictimaiyyətinə rayonda onunla bağlı yaşanmış ciddi bir qalmaqalla tanışdır./Editor.az/
Seneqaldan İspaniyaya məxsus Kanar adalarına gedən 3 qayıq Atlantik okeanının sularında itib.
Bu barədə “Report” “Reuters”ə sitinadən xəbər verir.
Miqrantları Avropaya daşıyan “Caminando Fronteras” qeyri-hökumət təşkilatının nümayəndəsi Helena Maleno bildirib ki, qayıqlarda ümumilikdə 300 nəfər olub.
Onun sözlərinə görə, qayıqların birində təxminən 65 nəfər, digərində isə 50-60 nəfər olub. Onlar 15 gün əvvəl yoxa çıxıblar. Göyərtəsində təxminən 200 nəfərin olduğu başqa bir gəmi iyunun 27-də Seneqalı tərk edib və o vaxtdan bəri harada olduğu bilinmir.
Afrikanın qərb sahillərində yerləşən Kanar adaları İspaniyaya çatmağa çalışan miqrantların əsas məkanına çevrilib.
“Ailələr çox narahatdırlar. Seneqalın eyni bölgəsindən təxminən 300 nəfər. Onlar Seneqaldakı qeyri-sabitliyə görə gediblər”, - deyə Maleno bildirib.
Azərbaycan Dövlət Pedaqoji Universitetinin müəllimi, dosent İlham Əhmədov Təhsil naziri Emin Əmrullayevin Azərbaycan əhalisinin böyük hissəsinin savadsız olduğunu ehtiva edən açıqlamasına münasibət bildirib.
Xarırladaq ki, E.Əmrullayev deyib: “Yaşı 25-dən yuxarı olanların 60 faizi oxuduğu mətndə əsas fikri başa düşmür. Mən faktı deyirəm”.
Dosent İ.Əhmədov nazirin bu fikrinə belə münasibət bildirib: “Ölkədə 10 milyondan çox əhali var. Yaşı 25-dən çox olanların sayı 6 milyondan artıqdır. Bunun 60% -i oxuduğunu başa düşmürsə, deməli bizim əmək bazarında 3,6 milyon insanımız savadsızdır. Bu qədər savadsız işçi qüvvəsi olan ölkəyə hansı əcnəbi şirkət investisiya qoyar?
Bəs son 20 il ərzində “neft kapitalını insan kapitalına çevirək” siyasətini səmərəsiz icra edən Təhsil Nazirliyinin yarıtmaz fəaliyyətinə görə kim cavab verəcəkdir?
Kim kimi günahlandırır?”
Yay ayları olsa da, Bakıda hələ də kirayə mənzil problemi var. Fəslin adətən bu aylarında tələbələr rayonlara üz tutduqlarından, həmçinin insanlar bağlara və digər bölgələrə getdiklərindən kirayə evləri çoxalırdı.
Xezerxeber.az xəbər verir ki, bu il isə tam əksi baş verib. Ev alqı-satqısı və kirayəsi ilə məşğul olanlar bildirirlər ki, yay ayları olsa da, bazara kirayə evləri təklif edilmir.
Nərimanov rayonunda fəaliyyət göstərən reiltor Rüfət Məmmədov deyir ki, xüsusilə bu rayonda köhnə tikililərdə kirayə üçün nəzərdə tutulan ev yox səviyyəsindədir. Üstəlik Rusiya-Ukrayna müharibəsi ilə əlaqədər olaraq həmin ölkələrdən gələn həmvətənlərimizin sayının artması da bazara öz təsirini göstərib.
Əmlakçı Ülvü Əliyev isə deyir ki, nəinki nərimanov, digər mərkəzi hissələrdə də kirayə mənzil tapmaq müşkül məsələdir.
Köhnə binalarda 2 otaqlı kirayə mənzillərin qiyməti 500 manatdan başlayır. Təzə binalarda isə kirayə evlər olduqca bahadır.
Əmlakçılar bildirirlər ki, nisbətən mərkəzdən kənar ərazilərdə kirayə mənzillər tapmaq mümkündür. Bununla belə həmin ərazilərdə olan kirayə evlər ucuz deyil.
Xezerxeber.az mövzu ilə bağlı daha ətraflı videomaterialı təqdim edir: