Dövlət Sərhəd Xİdmətində (DSX) baş verən qanunsuzluqlar və maliyyə maxinasiyası ilə bağlı “Hürriyyət”in redaksiyasına məlumat daxil olub. Etibarlı qaynaqlardan verilən informasiyaya görə, rəhbərliyin qanunsuz tələblərini yerinə yetirməyən hərbi qulluqçular dərhal “qara siyahı”ya salınır və müxtəlif bəhanələrlə maaşları kəsilir.

“Bilirsiniz ki, hərbi qulluqçulara hər ilin sonunda, yəni dekabr ayında 13-cü əməkhaqqı, yəni əlavə bir oklad maaş verilir. Buna baxmayaraq, hərbi hissələrdə hansı hərbi qulluqçunun bir töhməti varsa 25%, 2 töhməti varsa 50%, üstəlik də 13-cü maaşı kəsilir”, - deyən mənbə iddia edir ki, DSX rəisindən, yəni Elçin Quliyevdən töhməti olanların isə maaşından minimum 50% , şiddətli töhməti varsa 100% kəsilir. Ən maraqlısı isə odur ki, bütün bunlar heç bir qanunla tənzimlənmir:

“Belə deyək də, kimin kimdən xoşu gəlmirsə, mütləq ilin sonuna yaxın cəzalandırılır. Bəlkə də baş verənlərdən Elçin Quliyevin xəbəri yoxdur, amma hər hansı bir araşdırma təyin olunursa, nəticədə birmənalı olaraq xidmər rəisinin adından cəza yazılır”.

Məlumata əsasən, Elçin Quliyevin adından cəza verilən hərbi qulluqçu bir il ərzində nə rütbə, nə də vəzifə ala bilməz: “Gərək bil il keçə ki, o cəza götürulə, hərbi qulluqçu təltif oluna”.

Mənbə deyir ki, DSX-da ezamiyyət xərcləri adı altında külli miqdarda vəsait də talan olunur: “Bəllidir ki, ezamiyyət pulları qanunvericiliklə tənzimlənir. Yəni Bakıdan hər hansı bir rayona gedərkən gündəlik 90 AZN ezamiyyət xərci hesablanmalıdır. Buna baxmayaraq rəhbər strukturlar xaric, bütün hərbi hissələr pulu kəsirlər. Bəziləri 65, bəziləri 30, bəziləri 27 manat ödəyir. Yəni kim necə istəyir, o qayda da tənzimləyir.

Hərbi qulluqçular Bakıdan rayona gedirsə, oteldə qalması, yemək yeməsi, yolpulu və s. kimi xərclər nəzərdə tutulub. Hərçənd ki, cənab Prezident hərbi qulluqçuların yaşayışının yaxşılaşdırılması üçün ezamiyyət xərclərini belə qaldırıb. Bunlarla yanaşı, hərbi qulluqçuların evlərlə təmin olunmaları ilə bağlı da göstəriş vermişdir. Lakin heç kim bu göstərişə əməl etmir. Kimlər rəhbərliyə yaxındır, generalın qohumu, tanışıdır, ancaq onlara ev verilib, kimlər yaddır, onlar hələ də kirayələrdə qalır”.

Mənbə deyir ki, DSX rəhbərliyində qanunsuz yollarla külli miqdarda sərvəst sahibi olan zabitlər var: “Bəzi yüksək rütbəli zabitlərin obyektləri, bağ evləri, restoranları və s. var. Bunlar hərbçi maaşları ilə alınası deyil. Buna baxmayaraq, hansısa bir yetim, adamsız zabitin, gizirin hardansa 30-50 AZN əlavə qazancı olarsa, rəsmən ciyərini çıxarırlar. Bunlara niyə sual verən yoxdur ki, bu boyda imarət, maşınlar, obyektlər, restoranlar hardandır?!”

“Hürriyyət”

Redaksiyadan: Qarşı tərəfin mövqeyini dərc etməyə hazırıq.

“Azərenerji” ASC-nin 2 milyardlıq zərəri, milyardlıq krediti və sədrinin 1 töhməti var

“Azərenerji” ASC-nin sədri Balababa Rzayev Azərbaycan hökumətində şiddətli töhmət almış yüksək çinli yeganə məmurdur. Bu cəza Əmək Məcəlləsinin 186 maddəsində nəzərdə tutulub, əmək və icra intizamının pozulmasına görə intizam məsuliyyətinin növlərindən biridir.
Məcəllədə qeyd olunub:
İşçi əmək funksiyasını tam və ya qismən yerinə yetirmədikdə, yaxud keyfiyyətsiz yerinə yetirdikdə, bu Məcəllənin 10-cu maddəsində nəzərdə tutulan, həmçinin əmək müqaviləsi ilə müəyyən edilmiş vəzifələrini, müəssisədaxili intizam qaydalarını pozduqda işəgötürən ona aşağıdakı intizam tənbehlərindən birini verə bilər:
a) töhmət vermək;
b) sonuncu xəbərdarlıqla şiddətli töhmət vermək;
c) kollektiv müqavilələrdə nəzərdə tutulmuşdursa, aylıq əmək haqqının 1/4-i məbləğindən çox olmamaq şərtilə cərimə etmək;
ç) əmək müqaviləsini bu Məcəllənin 70-ci maddəsinin «ç» bəndi ilə ləğv etmək.

Baş nazir Əli Əsədovun məlum sərəncamından belə məlum olur ki, B.Rzayevə Məcəlləsinin 186-cı maddəsinin (b) bəndi – sonuncu xəbərdarlıqla şiddətli töhmət elan olunub. “Azərenerji” ASC prezidentinin suçunun nədən ibarət olması sadə oxucular üçün o qədər də aydın deyil. Sərəncamda qeyd olunur ki, 2024-cü il üzrə təsdiq edilmiş yanacaq-enerji balansında qazdan istifadə istiqamətlərini pozaraq müvafiq qaydada razılaşdırmadan elektrik enerjisini ixrac etdiyinə görə Balababa Rzayevə şiddətli töhmət elan edilib.

Sənəddə sözügedən yanacaq-enerji balansından qazdan istifadə limiti, onun pozulması nə deməkdir, onu daha sonra mütəxəssisin köməyi ilə izah edəcəyik. Əvvəlcə ASC-nin B. Rzayevin prezident təyin olunduğu və ondan əvvəlki dövrdə maliyyə vəziyyəti, gəlirləri, öhdəlikləri barədə məlumatlara göz atmağa ehtiyac var.

Azərbaycanda elektrik enerjisinin istehsalı və topdan satışı ilə məşğul “Azərenerji” ASC qeyri-neft sektoru üzrə dövlətə məxsus əsas ixracatçı subyektlərin reytinqində 1-ci yerdə durur. Qurum ölkənin elektroenergetika sisteminin fəaliyyətini təmin etməklə, elektrik enerjisinin istehsalı və ötürülməsinin, vahid mərkəzdən idarə olunan elektrik stansiyalarının, yarımstansiyaların, sistemtəşkiledici yüksək gərginlikli – 110, 220, 330, 500 kilovoltuq elektrik verilişi xətlərinin və onların dispetçer idarəetmə vasitələrinin koordinasiyasını həyata keçirir.

ASC-nin açıqladığı maliyyə hesabatına görə, 2023-cü ili 175,1 milyon manat xalis mənfəətlə bitirib. Həmin ilin yanvar-oktyabr aylarında "Azərenerji" 347,3 milyon dollar dəyərində məhsul ixrac edib. Bu, 2022-ci ilə nisbətən 60% və ya 261,4 milyon manat azdır.

Dövlət şirkəti 2022-ci il üzrə 436,5 milyon manat xalis mənfəət açıqlamışdı. Xalis mənfəətin azalması enerji satışından gəlirin düşməsi və əməliyyat xərclərinin artması ilə əlaqələndirilir. Belə ki, şirkətin enerji satışından gəlirləri 2022-ci ildə 1 milyard 840,6 milyon manat olduğu halda, 2023-cü ildə 1 milyard 685,3 milyon manata enib. Yəni satış gəlirləri 155,3 milyon manat azalıb.

“Azərenerji"nin ümumilikdə əməliyyat xərcləri isə 2022-ci ildəki 1,4 milyard manatdan 2023-cü ildə 1 milyard 447,3 milyon manata yüksəlib.

Bundan başqa, ASC-nin açıqladığı rəqəmlərə əsasən 2023-cü ilin sonunda “Azərenerji"də 1 milyard 994,4 milyon manat yığılmış zərər olub. 2022-ci ilin sonunda yığılmış zərər isə 2 milyard 164,7 milyon manat idi. Qeyd olunur ki, dövlət şirkətinin cəmi aktivləri 31 dekabr 2023-cü il tarixinə 17,5% artaraq, 5 milyard 313,9 milyon manata çatıb. Bu dövrdə ASC-nin kredit borcu 8% artaraq, 1 milyard 266 milyon manat olub.

Ötən ilin sonunda “Azərenerji"nin 1 milyard 266 milyon 16 min manat kredit borcu olub (2022-ci ilin sonunda 1 milyard 172 milyon 998 min manat).

Qeyd edək ki, 2023-cü ildə ASC-nin ən iri elektrik stansiyası “Azərbaycan” İES-in də gəlirləri kəskin azalıb. Belə ki, şirkətin xalis zərəri 2.32 milyon manat təşkil edib. Qurum 2022-ci ildə bundan 2 dəfəyə qədər çox - 4.33 milyon manat xalis mənfəət əldə etmişdi. Hesabata görə, şirkətin enerji satışından əldə etdiyi gəlir 239.86 milyon manat olmaqla, öncəki ildən 12.24 milyon manat az və ya 4.86% az olub.

“Azərbaycan” İES-in yanacaq xərcləri 2023-cü ildə 175.28 milyon manat olub ki, bu da 2022-ci ildəki 171.07 milyon manatı 4.21 milyon manat və ya 2.46% üstələyir. Amortizasiya xərcləri 2023-cü ildə 1.83% artımla 46.77 milyon manat, təmir və texniki xidmət xərcləri 55% azalaraq, 2023-cü ildə 3.60 milyon manat, işçi heyətinin saxlanılması xərcləri 12% artaraq, 7.65 milyon manat olub.

Zərərdən sonra bölüşdürülməmiş mənfəət 2023-cü ildə 88.79 milyon manatdan 86.63 milyon manata düşüb. Hesabata əsasən, şirkətin ümumi aktivləri 2023-cü ildə 79.37 milyon manat və ya 12.69% artaraq 704.84 milyon manat təşkil edib.

Rəqəmlərdən də görünür ki, Baş nazir Əli Əsədovun “Azərenerji” prezidentinin fəaliyyətindən narazı qalması üçün kifayət qədər əsaslar var: gəlir azalıb, zərər 2 milyardı keçib, kredit borcları artıb və s. Müstəqil audit yoxlaması mənfi tendensiyanın obyektiv səbəblərlə, yoxsa, yarıtmaz idarəçiliklə bağlı olduğunu müəyyənləşdirə bilər.

Şiddətli töhmətlə bağlı sərəncamda qeyd olunan məqamlara gəlincə, enerji sektoru üzrə mütəxəssis İlham Şaban Pressklub.az-a şərhində deyib ki, ümumiyyətlə hökumətin fəaliyyətində şəffaflıq problemləri var.

Ekspert aydınlaşdırıb ki, hər bir ölkədə dekabr ayında növbəti il üçün enerji balansı hökumət tərəfindən təsdiqlənir. Onun sözlərinə görə, bu, əslində kommersiya sirri hesab olunan sənəd deyil, hava şəraitindən asılı olaraq hər rüb ona dəyişikliklər edilir. İ.Şaban xatırladır ki, Gürcüstan, Ukrayna, Rusiya, Avropa ölkələri bu sənədi ictimaiyyət üçün dərc edirlər. “Azərbaycanda isə bu sənəd şirkətlər üçün olmasa da, ictimaiyyət üçün gizlidir. Baş nazir Əli Əsədov bu sənədi imzalayıb, amma bir kəs demir ki, “Azərenerji” bu qədər qaz alıb, bu qədər də enerji istehsal etməlidir. Azərbaycan hökuməti bunu açıq şəraitdə niyə etmir ki? Hamı bilməli idi ki, “Azərenerji” bu qədər qaz almaqla normativləri keçib, ya yox? Birdən-birə töhmət məsələsi ortaya çıxır”, - o vurğulayır.

İlham Şaban qeyd edir ki, məlumatlar şəffaf olarsa, hansı sahədə problemlərin gözlənildiyi barədə ictimaiyyət əvvəldən məlumatlı olar: “Heç bir məlumat verilmir, birdən də deyirlər ki, filan obyektdə vəziyyət pisdir. Cəmiyyət haradan bilsin ki, doğrudan da pisdir, yoxsa yaxşıdır? Bunun üçün hökumətin imzaladığı sənədləri vaxtaşırı ictimaiyyətə açıqlamaq lazımdır”.

Ekspert vurğulayır ki, hökumət bilməlidir ki, rəqəmsallaşma, şəffaflıq bütün sahələrdə lazımdır. Belə olsa, hansısa bir qərar veriləndə cəmiyyətə əlavə izahat verməyə ehtiyac qalmaz.

Mövzu ilə bağlı əsas suallardan biri “Azərenerji” prezidentinin yol verdiyi qanunsuzluğun miqyasına, dövlət maraqlarına dəyən zərbəyə görə verilən “şiddətli töhmət” cəzasının nə qədər adekvat olmasıdır.

Hüquqşünas Hafiz Həsənov Pressklub.az-a şərhində bildirib ki, Balababa Rzayevə verilən şiddətli töhmətin onun yol verdiyi pozuntuya adekvat olub-olmamasını müəyyən etmək üçün onun "2024-cü il üzrə təsdiq edilmiş yanacaq-enerji balansında qazdan istifadə istiqamətlərini pozaraq müvafiq qaydada razılaşdırmadan elektrik enerjisini ixrac etmə" əməlinin detalları və bu əməlin təhülkəsizlik dərəcəsi barədə məlumatlar olmalıdır.

“İndiki halda ictimaiyyətə bu məlumatlar açıqlanmayıb. Ola bilər ki, burada inzibati və ya cinayət əməllərinin əlamətləri olsun. Ona görə də Balababa Rzayevə sərəncamda qeyd edilən əməlinə görə sadəcə intizam cəzası kimi şiddətli töhmət verilməsinin onun yol verdiyi qanun pozuntusuna adekvat olmasını demək çətindir”, -hüquqşünas vurğulayıb.

“Zəfər Qurbanov Azərbaycan Dövlət Aqrar Universitetinə rektor təyin edildikdən dərhal sonra, bu ali məktəbin müasir standartlara uyğun inkişafına nail olmaq əvəzinə, sanki adını məhv etməyi qarşısına əsas məqsədi kimi qoyub. Sübutlar göz önündədir — ADAU artıq “saxtakarlıqlar bataqlığında can verir”. Bu iyrənc halın bitməsi isə, mümkünsüz görünür. Bilərəkdən edilənlər “canımızı boğazımıza yığıb”, nə edəcəyimizi bilmirik. Burada hər sahədə müxtəlif saxtakarlıqlara və qanunsuzluqlara qorxub-çəkinmədən imza atılmasını, universitet təəssübü çəkən heç kəs şəninə sığışdırmır”, — deyə, adını çəkdiyimiz ali təhsil ocağının professor-müəllim heyətinin bir qrupu Azərbaycan Respublikasının Prezidenti İlham Əliyevdən kömək istəyir. Bu və buna bənzər fikirlər, onların imzasıyla araz.az xəbər portalının redaksiyasına da daxil olan Müraciətdə öz əksini tapıb.

“Möhtərəm Prezident! Son ümidimiz Sizsiniz və üz tutduğumuz media vasitəsi ilə, dərdimizi Sizə çatdırmaq qərarına gəldik. Çünki deyilənlər barəsində yazdıqlarımızı dəfələrlə Sizə çatdırmaq istəmişik. Lakin günahkar vəzifə sahibləri hər dəfə yazdıqlarımızın qarşısını almağa nail olublar. Əlaqədar dövlət qurumlarında da, ürək ağrısıyla yazdıqlarımız heç kəsin vecinə olmayıb. Hər yerdən naümid, başıaşağı, necə deyərlər, “əlimiz ətəyimizdən uzun” geri dönmüşük. Ümid qalıb yalnız Sizə və ölkə mediasına” — daha sonra bu sözlər naəlac elm adamlarının imzaladıqları Müraciətdə xüsusi vurğulanıb. O da qeyd olunub ki, bu universitetdə təhsilin keyfiyyəti heç bir vəzifə sahibini narahat etmir:

“Əslində, tələbənin kəsiri olduqda, təlimata görə, nə olursa-olsun dövlət imtahanına buraxılmamalıdır. Lakin rektor Zəfər Qurbanov rüşvət müqabilində belə tələbələri dövlət imtahanına buraxdırır. Kəsiri ola-ola, akademik borcunu ödəməyən belə tələbələrə diplom veriləndə, “Kənd təsərrüfatı texnikası və texniki servis” kafedrasının dosenti Vaqif Mirzəliyev müxtəlif orqanlara, eləcə də Sizə şikayət etdi. Nəticədə, rektor özünü müdafiə etmək üçün “Magistratura” şöbəsinin müdiri Aqil Mustafayevi işdən azad etdi. Əslində isə, həmin saxtakarlıqları prorektor Əhməd Məlikov tədris hissə müdiri Elay Zeynallı və kafedra müdiri Aydın İsayevlə birlikdə həyata keçirmişdi. Lakin adları çəkilən şəxslər rektor Zəfər Qurbanovun pul yığanları olduğu üçün, bu işin “qurbanı” kimi, “Magistratura” şöbəsinin müdiri Aqil Mustafayev işindən azad olundu.

Belə saxtakarlıqlar edənlərdən biri “Kənd təsərrüfatı texnikası və texniki servis” kafedrasının müdiri Aydın İsayevdir. O, hətta 3-cü kursda oxuyan tələbə qıza sataşmaqdan belə qorxmayıb. Bu qız isə, kafedra müdirlərinin bu iyrənc hərəkəti ilə bağlı prorektor Əhməd Məlikova şikayət edib. Lakin, hələ də rektor bununla bağlı heç bir tədbir görmək istəmir. Amma həmin kafedranın müəllimi Taleh Vəliyev seçki prosesində Aydın İsayevin əleyhinə səs vermişdi deyə, rəhbər şəxslər vaxt tapıb, onu dərhal şərlətdirə, yaxınları olan bəzi tələbə qızları və laborant xanımları öyrədərək, üzünə durdura və əmrini verib, işdən azad etdirə bilmişdilər. Tələbə qıza sataşmaq məsələsinə isə, hələ də vaxt tapmayıblar. Yeri gəlmişkən qeyd edək ki, artıq həmin müəllimin yerinə, rüşvət müqabilində, başqa birisi də təyin edilib.

Bu gün magistr adı altında ADAU-da tələbələr dərsdən yayınırlar. Elə magistrlər var ki, adları universitetdə tələbə kimi gedir, lakin özləri xaricdədirlər. Bunların dissertasiya işləri belə, maddiyyat gücünə yazılıb hazırlanır, sonra isə, həmin magistrlər bircə dəfə universitetə gəlir, diplom müdafiəsində iştirak edərək, aradan çıxır, sonra isə, onlara diplom verilir. Magistr şöbəsində elə tələbələr var ki, təhsil haqqı borcları ola-ola, universiteti qurtarırlar. Onların universitetə təhsil haqqı borcu olduğu sonradan məlum olur. Bundan sonra narazılıqlar başlasa da, külli miqdarda borclar ödənilməmiş qalır; Beləcə, son nəticə həngamələrə dirənir.

İnformasiya texnologiyaları ixtisası tələbəsinin rəhbəri eyni adlı kafedranın müəllimi Mahir Məmmədov idi. Tələbə müdafiəsini etdi, universiteti bitirdi və diplomunu da aldı. Sonra məlum oldu ki, tələbənin təhsil haqqı kimi xeyli borcu ödənilməmiş qalıb. Açıq-aydın göründüyü kimi, universitetdə bütün işlərə səhlənkar yanaşma halları kifayət qədərdir.

Bu da, ağrıverici daha bir dəhşət: “Baytarlıq təbabəti” fakültəsindəki biabırçılıqların sonu görünmür. Bu fakültəni rektor Zəfər Qurbanovun universitetdəki özəl hissələrindən biri kimi tanımışıq və özünün özəl şərtləri ilə idarə olunur. Ali təhsil müəssisələrində dekan vəzifəsinə seçkilərin keçirilməsi qaydalarına görə, fakültə dekanı vəzifəsinə, həmin fakültədə kadr hazırlığı aparılan ixtisaslara uyğun, ən azı 5 il elmi-pedaqoji təcrübəyə və peşə-ixtisas hazırlığına, elmi ad və elmi dərəcəyə malik həmin ali məktəbin ştatında olan professor və ya dosentlər arasından seçilməlidir. Şəlalə Zeynalova isə, 2006-cı ildə Kənd Təsərrüfatı Nazirliyi yanında Respublika Baytarlıq Laboratoriyasının Virusologiya şöbəsində aparıcı baytar həkim kimi işə qəbul olunub, daha sonra isə, Bakteriologiya və Virusologiya şöbələrinin müdiri işləyib. 2016-cı ildən isə, Bakıda yerləşən həmin laboratoriyada direktor müavini vəzifəsində çalışıb. Göründüyü kimi Şəlalə Zeynalova universitetdə ştatda olmadığından, bu xanımın dekan təyin olunması (dekan seçilir, təyin olunmur) təlimata tamamilə ziddir. Buna baxmayaraq, dekanlıq ixtiyarı olmasa da, indi bu xanım hər yerdə Zəfər Qurbanovun adından danışır və səlahiyyətinə aid olmayan istədiyi işlərlə məşğul ola bilir. O, kafedra müdirlərinin — İlqar Gəncəyevin, Mirzə Əliyevin, dekan müavini Gülçin Məmmədovanın… hədə-qorxu yoluyla ərizələrini alaraq, onları işdən azad etdirib də.

Fakültənin dekan müavini və kafedralarının müdir vəzifələri boşdur, idarə olunmur deyə, burada acınacaqlı durum hökm sürür. Bizə artıq məlum olub ki, bu vəzifələr auksiona çıxarılıb, daha çox pul verən adamlar axtarılır.

Onu da qeyd etməyi lazım bilirik ki, dekan xanımın — Şəlalə Zeynalovanın adı Şəmkir Quşçuluq fabrikinin əməkdaşı kimi də işdə gedir. Ona görə də, o, fakültənin tələbələrini həmin fabrikə aparıb, orada yumurta yığdırır. Maraqlıdır, tələbələr universitetə oxumağa gəlir, yoxsa, Şəmkir Quşçuluq fabrikində fəhləlik etməyə?! Rektor Zəfər Qurbanov isə, qalib pis vəziyyətdə: Universitetdəki özəl sahələrindən biri kimi tanıtdırdığı bu fakültənin başına paytaxt Bakıdan tapıb, özü ilə gətirdiyi Şəlalə Zeynalova ilə artıq bacarmır. Bir sözlə, barəsində ölçü götürüb, heç bir tədbir görə bilmir.

Rektor, atası vaxtilə Baytarlıq Elmi — Tədqiqat İnstitutunun direktoru işləyən, “Gigiyena və qida təhlükəsizliyi” kafedrasının çox yaxşı müəllimlərindən olan Vamik Fərzəliyevi işdən çıxartdı. Lakin Vamik müəllim bu barədə Respublika Prezidentinə şıkayət etdiyi üçün, onu, müqavilə əsasında yenidən yarım ştat müəllim götürməyə məcbur oldu. Vamik müəllim isə, mübarizəsini sonadək aparacağını qorxub-çəkinmədən hər yerdə deyənlərdəndir.

Zəfər Qurbanov neft mühəndisi olduğundan, aqrar sahəyə tamamilə yad bir adamdır. O, universitetin tədris-təcrübə təsərrüfatının adını belə bilmir. Həmişə Elmi Şuradakı çıxışlarında oranın adına təcrübə mərkəzi deyir.

Universitetdə maaşlar və həvəsləndirici mükafatlar verilmir. Bura xeyli vaxtdır lazım olan dəftərxana ləvazimatları alınmır. Tədris üçün vacib olan avadanlıq və vasitələr çatışmır, alınması nəzərdə tutulan avadanlıqların heç birindən xəbər yoxdur. Bu adla pullar isə, kotirovka yolu ilə hesabdan silinir.

Maraqlısı odur ki, bu elm ocağındakı haqsızlıqlardan şikayət edəndə, hətta Azad İbrahimov kimi digər prorektorlar, eləcə də şöbə müdirləri, dekanlar… belə deyirlər ki, axı, onlar kimdir? Dediklərini veclərinə alan, sözlərini eşidən yoxdur. Yaxşı, onda professor və müəllimlər dərdlərini kimə desinlər?! Axı, universiteti özəl hissələri ilə idarə edən, həftənin 4 gününü Bakıda, ailəsinin yanında keçirən, müxtəlif xarici ölkələrdə gəzməklə, tutduğu vəzifədə getdikcə möhkəmlənən, işdə tapılmayan qiyabiçi rektorla bacarmaq olmur!

Konkret desək, ADAU-da təhsil məhv olaraq, aradan gedir. Dərdimizə əlac edin. Əlaqədar qurum rəhbərlərini də, bu vacib işdə bizə köməyə, lazımi tədbirlər görməyə çağırırıq!”.

Sonda xüsusi olaraq onu qeyd etmək istəyirik ki, əlaqə saxladığımız və köməksiz qalan Müraciət müəllifləri araz.az-ın əməkdaşlarına deyiblər ki, əlləri hər yerdən üzüldüyündən, artıq, Böyük Allahımıza əl açmağa məcbur olublar. Təəssübünü çəkdikləri bu elm ocağına kömək üçün, ümidləri həm də Uca Yaradanadır.

Tahir HÜSEYNOV,
Səməndər QURBANOV,
araz.az xəbər portalı.

“AZƏRSUN” şirkətinə aid “BAZARSTORE” mağazalar şəbəkəsinin əməkdaşları maaş azlığından şikayət edirlər.

Məlum səbəblərdən adlarını çəkmək istəmədiyimiz mağaza əməkdaşlarının Missiya.Az-a verdiyi məlumata görə, “Bazarstore”lərdə ciddi işçi çatışmazlığı var:

“Çünki heç kəs az maaşla ağır şərtlər altında işləmək istəmir. Yəqin görmüsünüz ki, mağazalarda kassaların hamısı işləmir və bu səbəbdən də böyük növbələr yaranır. Bəzən 5 kassadan üçü işləmir. 2 kassa da alıcıları rahatlıqla yola sala bilmirlər. Hər gün alıcıların narazılığını, giley-güzarını eşidirik. Olur ki, alıcılar arasında mübahisələr də yaranır. Bunun da hamısı işçi çatışmazlığına görədir.

“Azərsun” rəhbərliyi bu qədər pul qazanır, amma işçilərə normal maaş verməyə canları çıxır. Deyəsən ki, al-ver olmur, ona görə də rəhbərlik maaşları günün reallığına uyğun qaldıra bilmir? İnanın, mağazalarda hər gün qələbəlik yaşanır. Kassaların qarşısında uzun növbələr yaranır. Amma nə olsun bunun işçinin maaşına heç bir xeyri dəymir. İşçilər tədricən çıxıb gedirlər, daha çox da “Bravo”ya keçirlər. Çünki orada işçilərin qədrini bilirlər. Bizdə əməkdaşları anbarda da işlədir, vitrinlərin qarşısında da, kassada da. Maaşlara isə əlavə pul ayırmaq istəmirlər. Ehtiyac üzündən məcburən qalıb işləyirik. Reklamlarda yalan vəd edirlər ki, biz sizə karyera yüksəlişinə şərait yaradacağıq, yenilənən maaş sistemi ilə çalışacaqsız. Boş şeylərdir hamısı. Burada ancaq əməyin istismarı ilə məşğul olurlar. Rəhbərlik hər şeydən pul qazanır: yalançı endirim aksiyalarından, normadan artıq əməyə cəlbetmədən, hətta mağazaların qarşısındakı parkovkalardan. Alıcılar beş dəqiqəlik mağazaya girirlər, çıxanda “parkovşik” yaxınlaşıb ödəniş tələb edir. Məsələn, Badamdar, Bayıl marketlərinin qarşısında çoxdandır ki, belə vəziyyətdir. Deyə bilərlər ki, bundan xəbərimiz yoxdur. Onda soruşuruq, həmin o pul tələb edən adamlar necə olur ki, hər gün orada iş başında olurlar? Niyə buna görə onlara bir söz deyən olmur? Ola bilsin ki, hər gün yığılan “parkovka” pulları Gözəl qardaşlarına verilmir. Söhbətlər gəzir ki, “Parkovşiklər” aylıq ödəyir. Xəbərləri yoxdursa, onda araşdırıb öyrənsinlər ki, “Bazarstore” müştərilərindən pulı yığan kimlərdir?- deyə, “Bazarstore” əməkdaşları bildirib.

Şirkət əməkdaşları onu da qeyd ediblər ki, maaşların artırılması tələblərini dəfələrlə mağaza rəhbərliyinə bildirsələr də, onlara hər şeyin Gözəl qardaşlarından asılı olduğunu deyirlər. Qeyd edək ki, “Azərsun” şirkətinə daxil olan digər müəssislər və fermalarda çalışanlar da maaş azlığından şikayət edirlər. Şəkər və konserv zavodlarında çalışanlar, eləcə də çöllərdə məhsul əkimi və yığımı işlərinə günəmuzd cəlb olunan əyalət rayonlarının sakinləri bildirirlər ki, hər dəfə maaş məsələsini qaldıranda onlara ancaq bir cavab verilir:

“Sağol deyin ki, hələ sizə iş veririk. “Azərsun” olmasaydı hamınız acından ölərdiz”.

Teref yazır ki, poçtumuza daxil olan şikayət məktubunu təqdim edirik:
Azərbaycan Respublikasının Ədliyyə Nazirliyi Penitensiar xidmətinin 15 saylı Cəzaçəkmə Müəssisəsinin tibb sanitar hissəsində cəza çəkən 1-ci dərəcəli əlil məhkum Səmədov Əli Azər oğlu tərəfindən

Müraciət

Yazıb sizə bildirirəm ki, mən hazırda xəstəliyim səbəbi ilə tibb sanitar hissədə müalicələrə cəlb edilmişəm.Səhətimin ağır olması səbəbi ilə müalicə ala bilmədikdə cəzamı çəkə bilmirəm.Sizə bildirirəm ki, son iki aydan da artıq müddət keçməsinə baxmayaraq müəssisəyə dərman preparatlarının gəlişinə məhdudiyyətlər qoyulmuşdur.15 saylı Cəzaçəkmə Müəssisəsində olduğu kimi digər Cəzaçəkmə Müəssisələrində habelə müalicə müəssisəsində də vəziyyət eynidir.Xəstə məhkumlarin dərmanların bitməsi səbəbi ilə müalicələri tamamilə dayandırılmışdır, həkimlər əllərindən gələni etmək istəsələr dərmanların olmamasına görə hər gün məhkumlarla mübahisəyə girmək məcburiyyətində qalır və onlara o dərmanları şəxsi hesablarına almaqlarini xahiş edirlər.Mənim kimi sosial müavinət alan məhkumlar dərmanları ala bilsə də kasıb, kimsəsiz məhkumlar yalnız öləcəyi günü gözləyirlər.Muraciətimə əsasən Ədliyyə Nazirliyi Tibb Baş idarəsinin əməkdaşı Məhəl həkim şifahi olaraq bildirir ki dərmanların bazadan cəzaçəkmə müəssisələrinə göndərilməməsinin başlıca səbəbi Ədliyyə Nazirliyi Tibb Baş idarəsinin rəisinin yeni dəyişdirilməsi və yeni rəisin cəzaçəkmə müəssisələrinə dərman preparatlarının paylanmasına dair sənədləri imzalamamasidir. Səbəb olaraq 11 saylı cəzaçəkmə müəssisəsinin baş həkimi Elşən İsayevin dərmanları müəssisə ərazisindən qeyri-qanuni çixarmasidir. Məsələ Tibb Baş idarəsi tərəfindən araşdırılır yəqin ki, önümüzdəki aylarda dərmanlar cəzaçəkmə müəssisələrinə çatdırılacaqdi.
Mən mətbuat vasitəsi ilə Prezident cənab İlham Əliyevə və Ədliyyə Naziri cənab Fərid Əhmədova müraciət edib xahiş edirəm yuxarıda qeyd etdiklərimi obyektiv araşdırıb qanunu tədbirlər görəsiniz. Əvvəlcədən sizə öz təşəkkürümü bildirirəm.
Məhkum Əli Səmədovun qardaşı Məhəmməd Səmədov
QEYD: Aidiyyatlı orqanların mövqeyini dərc etməyə hazırıq!
TEREF

Neftçala Suvarma Sistemləri İdarəsi Qırmızıkənd B-3 (LRN-100) nov kanalının (PK27+78 – PK22+18) L=1,080 km üzərindəki qurğularla birlikdə əsaslı təmiri üzrə bir mənbədən satınalma metodu ilə keçirdiyi tenderdə “ALİBƏY” Məhdud Məsuliyyətli Cəmiyyətini qalib seçib və 154.999,05 manat məbləğində satınalma müqaviləsinin bağlanılması barədə məlumatı 06.10.2024-cü ildə dövlət satınalmalarının vahid internet portalına yerləşdirib.

Aktualinfo.org Neftçala Suvarma Sistemləri İdarəsi qalib seçdiyi MMC ətrafında araşdırma apardı. Məlum oldu ki, “ALİBƏY” (VÖEN 5502156611) Məhdud Məsuliyyətli Cəmiyyəti Dövlət Vergi Xidmətinin 8 saylı Ərazi Vergilər İdarəsində 06.06.2024-cü ildə dövlət qeydiyyatına alınıb. Nizamnamə kapitalı 10 manat olan şirkətin hüquqi ünvanı İMİŞLİ RAYONU, MƏZRƏLİ, , ev 0-da yerləşir. MMC-nin qanuni təmsilçisi Əliyev İlham Zöhrab oğludur.

Qeyd edək ki, Neftçala Suvarma Sistemləri İdarəsinin Satınalma Komissiyası “Dövlət Satınalmaları Haqqında” Qanununun tələblərini elə bir mənbədən satınalma metodu ilə keçirdikdə pozub. Sözügedən qanunun 49-cu maddəsinə görə: 49.1.1. satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda; 49.1.2. satınalma predmetinə təcili tələbat yarandıqda.
Göründüyü kimi Neftçala Suvarma Sistemləri İdarəsi satınalmanın təşkilindən cəmi üç ay əvvəl dövlət qeydiyyatına alınmış, xüsusi hüquqlara malik olmayan bir MMC ilə satınalma müqaviləsi bağlamışdır ki, bu da satınalmanın saxtalaşdırıldığına əsaslı şübhələr yaradır.
Bundan əlavə Neftçala Suvarma Sistemləri İdarəsinin Satınalma Komissiyası satınalma proseduru zamanı Nazirlər Kabenitinin 30 dekabr 2023-cü il tarixli Qərarı ilə müəyyən edilmiş uyğunluq göstəricilərini nəzərə almamış, “ALİBƏY” MMC-nin satınalma müqaviləsinin icrası üçün peşəkarlıq və təcrübə meyarını, oxşar analoji xüsusiyyətli (Sututarın üzərində konstruktiv və mürəkkəblik baxımından oxşar hidrotexniki qurğuların əsaslı təmir-bərpası, su hövzələrinin, su anbarlarının) işlərin görülməsi təcrübəsinin olmamasını nəzərə almamış, satınalma müqaviləsinin icrası üçün texniki imkanlarının və maddi-texniki bazasının olması meyarı üzrə nəqliyyat vasitələri və xüsusi texnikaları, “işçi qüvvəsi” meyarları ilə bağlı tələblərə uyğun olmadığı açıq aydın görsənməkdədir.
Belə olan halda suallar yaranar. Neftçala Suvarma Sistemləri İdarəsi üç ay əvvəl dövlət qetdiyyatına alınmış bir MMC ilə bir mənbədən satınalma metodu ilə keçirilən tenderdə iştirakına necə yol verib? Neftçala Suvarma Sistemləri İdarəsinin Satınalma Komissiyası satınalma müqaviləsi bağlayarkən “ALİBƏY” Məhdud Məsuliyyətli Cəmiyyətinin uyğunluq göstəricilərini nə üçün dəqiq araşdırmamış, MMC-nin tələblərə cavab vermədiyinə niyə göz yummuşdur? Suvarma İdarəsi”ALİBƏY” MMC-nin maliyyə imkanları və ödəmə qabiliyyəti, müvafiq sahədə peşəkarlığı və təcrübəsi, işçi qüvvəsi olmadığı halda MMC necə qalib seçib? Bütün bunlar MMC-nin təqdim etdiyi bir sıra sənədlərin saxtalaşdırıldığını deməyə ciddi əsaslar verirmirmi?
Bütün bu kimi suallara cavab almaq üçün Neftçala Suvarma Sistemləri İdarəsinin Satınalma Komissiyasına ünvanladığımız sorğu məktubu cavabsız qaldı. İdarənin baş mühasibi Elçin Gözəlov satınalmadan üç ay əvvəl yaradılmış MMC-nin bir mənbədən satınalma metodu ilə tenderin qalibi olmasına aydınlıq gətirə bilmədi, Antinhisar Dövlət Xidmətindən soruşmağımızı məsləhət gördü. Baş mühasib 154 min manat dəyərində sifariş verdikləri MMC-nin əlaqə vasitəsini də bilmədiyini dedi.

Açıq internet axtarış sistemləri üzərindən apardığımız araşdırmada Neftçala Suvarma Sistemləri İdarəsinin bir mənbədən satınalma metodu ilə 154 min manat məbləğində müqavilə bağladığı MMC -nin barədəsində heç bir məlumat əldə edə bilmədik. Mərkəzi Seçki Komissiyasının seçicilərin siyahısında “ALİBƏY” MMC -nin qanuni təmsilçisi Əliyev İlham Zöhrab oğlu İmişlı rayonu, Məzrəli kəndində daimi pasport qeydiyyatındadı, 1990-cı il təvəllüdlüdü.

İmişlidəki mənbələrimizdən əldə etdiyimiz məlumata görə Əliyev İlham Zöhrab oğlu İmişli Beton zavodun direktoru Bakir Əliyevin bacısı oğludur. Özü də hazırda Beton zavodda kon sürür. Çox güman ki, “ALİBƏY” MMC -nin əsl sahibi də Beton zavodun direktoru Bakir Əliyevdir.

Neftçala Suvarma Sistemləri İdarəsinin baş mühasibinin bilib, bizə bildirmək istəmədiyini biz axtarıb, araşdırıb tapdıq. Göründüyü kimi Neftçala Suvarma Sistemləri İdarəsi bir mənbədən satınalma metodu ilə keçirdiyi tenderdə kifayət qədər ciddi qanun pozuntularına yol verilib. Deyilənə görə bütün bunlara Antiinhisar və İstehlak Bazarına Nəzarət Dövlət Xidməti yol verib.

Qeyd edək ki, Neftçala Suvarma Sistemləri İdarəsinin rəisi Elçin Ataş oğlu Əsədovdur. Onun bu vəzifədə nə vaxtdan çalışması barədə məlumat yoxdu. Amma sosial şəbəkələrdə və elektron mediada onun barəsində kifayət qədər geniş şikayətlər var.

Aktualinfo.org

Azərbaycan Dövlət Milli Gənc Tamaşaçılar Teatrının aktyoru Tahir İsmayılovun başına iş gəlib. Aktyor dələduzluqla üzləşib.

Bu barədə lent.az-a danışan Tahir İsmayılov bildirib ki, torpaq satın alsa da, nə torpağa sahib ola bilir, nə də pulunu geri ala bilir.

"İki qızım və bir oğlum var. Övladlarım ailə quranda evimi satıb torpaq sahəsi aldım ki, uşaqların hərəsinə bir ev tikib hədiyyə edim. Binəqədi rayon bələdiyyəsindən qanuni şəkildə, bütün sənədləri hazır olan 6 sot torpaq sahəsi aldım. Torpağın bütün sənədləri hazır və düzgündür. Evin tikintisinə başlayanda bir nəfər yaxınlaşdı ki, torpaq mənimdir, mənə satılıb. Üstündən 20 dəqiqə keçməmiş bir başqa xanım da yaxınlaşdı ki, torpağı mən almışam. Onlardan biri bələdiyyə sənədi ilə torpağı alıb, digərinə sənədi saxta yollarla makler hazırlayıb. Və ən önəmlisi də budur ki, bu iki nəfər torpaqla bağlı problemi bilirmiş, iş hətta məhkəməyə gedib çatıbmış. Bələdiyyə bu məhkəmədə qalib gəlib, torpağı alan qadın uduzub. Bələdiyyə bunu məndən gizlədərək mübahisəli torpağı yenidən satıb. 9 aydır mən nə pulumu ala bilirəm, nə evi tikə bilirəm, nə torpağa sahib ola bilirəm. Torpağı almaq üçün 18500 manat pul vermişəm, bunun 16000 manatı torpaq, 2500 manatı sənədləşəmə üçün tələb olunmuşdu. Bu müddət ərzində sənədləşmə üçün nəzərdə tutulan hissədən 1700 manat ala bilmişəm, qalanını yox. Verilmiş sənədlər Binəqədi bələdiyyəsinin 4-5 il öncə sədri olmuş adamın adı ilə çıxarılıb verilib", - deyə aktyor bildirib.

Tahir İsmayılova məsələnin həlli söz verilsə də, hələlik problem olduğu kimi qalır.

Kürdəmir Suvarma Sistemləri İdarəsində çalışan bir qrup işçi şikayətçidir.

130 nəfərdən ibarət olan heyət iddia edir ki, heç bir səbəb olmadan rəhbərlik tərəfindən işdən azad olunublar.

43 ildir sözügedən müəssisədə çalışan Yunus İsgəndərov bildirib ki, üç gün öncə idarə heyəti işçiləri çağıraraq, təmirə ehtiyacı olan nasosları düzəltdirib, səhəri gün isə onları işdən azad ediblər.

Məsələ ilə bağlı Kürdəmir Suvarma Sistemləri İdarəsinin baş mühəndisi Rəşid Nəsirov bildirib ki, işdən çıxarılma struktur dəyişikliyi ilə bağlıdır və növbəti günlərdə də bir neçə nəfərin işdən çıxarılması gözlənilir.

Qeyd edək ki, bir neçə gün öncə Abşeron Sukanal İdarəsinin bir qrup əməkdaşı işdən çıxarılmışdı.

Masallı rayonun Müsaküçə kəndi ərazisində orta və iridiametirli 6 -ya yaxın ağac (tut, çinar ) kəsilmiş və yerlərində "TIR" maşınları üçün dayanacaq yeri düzəldilmişdir. Gördünüdüyü kimi İşbazlar əvvəlcə ağacları budayıb, sonra onları kəsmiş.

Ölkəmizdə COP29-a hazırlıq işləri gedən bir ərəfədə işbazlar yaşıllıqlara qənim kəsilib.

Aldığımız məlumata görə bu işlərin başında Masallı RİH-nin Müsaküçə ərazi üzrə nümayəndəsi Sirac Allahverdiyev və bələdiyyə sədri Rafiq Eynullayevin durduğu bildirilir.
Yuxarıda adı çəkilən şəxslər bir neçə il öncə sözügedən kəndin ərazisinin torpaqların qazılıb satması ilə gündəmə gəlmişdilər.

Aidiyyatı qurumlar hara baxır, məgər onlar bu biabırçılıq görmür?!

Qarşı tərəfin mövqeyin dinləyib dərc etməyə hazırıq.

Nyus.Az