 |
|
|
Azərbaycan Televiziya və Radio Verilişləri QSC (AzTV) tərəfindən keçirilən tender müsabiqəsinin qalibi “Ukrayna Ticarət Evi” MMC (VÖEN – 1404173661) olub.
Yeniavaz.com xəbər verir ki, tenderin qalibi olan şirkət AzTV-nin sifarişi əsasında “Düşən Pullar” televiziya şousunun çəkiliş məkanında yaradıcı heyətin və kütləvi səhnələrdə iştirakçıların qidalanması (“Catering") xidmətini həyata keçirəcək və qarşılığında 24 min 18 manat 90 qəpik alacaq.
Bildirilir ki, AzTV 30 gün müddətində hər gün 230 ədəd sendviç (sendviç çörəyi, toyuq əti 100 qram, kahı, xiyar, pomidor, moyenez) və 6 900 ədəd 0,5 litr su (təbii mineral) alacaq.
Məlumat üçün bildirək ki, 10 manat nizamnamə kapitalı olan “Ukrayna Ticarət Evi” MMC 6 aprel 2018-ci il tarixində dövlət qeydiyyatına alınıb. MMC dövlət qeydiyyatına alınan zaman şirkətin qanuni təmsilçisi Yuriy Osadçenko Leonidoviç olub.
“Ukrayna Ticarət Evi” MMC-nin rəsmi saytında qeyd olunur ki, şirkətin əsas fəaliyyət istiqamətləri xarici ticarət, daxili ticarət şəbəkələri və distribusiyalarının yaradılması, fəal nəqliyyat-logistika zəncirlərinin işlənib hazırlanması, turizm, maliyyə auditi və konsaltinqdir. Eyni zamanda, Ukrayna ticarət-sənaye subyektlərinin Azərbaycandakı kontr-partnyorlar ilə qarşılıqlı əlaqələrinə, onların əməkdaşlığına və istehsalat kooperasiyalarına yardım və konsultativ monitorinq etmək nəzərdə tutulub.
Dövlət Vergi Xidmətinin reyestr məlumatlarında göstərilir ki, “Ukrayna Ticarət Evi” MMC-nin qanuni təmsilçisi 59 saylı Quba seçki dairəsindən deputat seçilən Əlibala Məhərrəmzadə Səttar oğludur. Əlibala Məhərrəmzadə iqtisadiyyat elmləri doktoru, eyni zamanda yazıçı-publisistdir.
Onu da qeyd edək ki, Azərbaycan Respublikası Konstitusiyasının 89-cu maddəsinin 1-ci hisssəsində deputatın hansı hallarda mandatından məhrum ediləcəyi göstərilib. Konstitusiyanın 89-cu maddəsinin 1-ci hisssəsinin 4-cü bəndində açıq şəkildə yazılır ki, deputat dövlət orqanlarında vəzifə tutduqda, din xadimi olduqda, sahibkarlıq, kommersiya və başqa ödənişli fəaliyyətlə məşğul olduqda (elmi, pedaqoji və yaradıcılıq fəaliyyəti istisna olmaqla) mandatından məhrum edilir.
Məsələ ilə bağlı, Yeniavaz.com-a açıqlama verən millət vəkilinin köməçisi Elnur Xəlilov bildirib ki, Əlibala Məhərrəmzadə 6 sentyabr 2024-cu il tarixindən “Ukrayna Ticarət Evi” MMC-nin təsisçiliyindən azad olunub. Deputatın köməkçisi qeyd edib ki, Əlibala Məhərrəmzadə həm də MMC-nin qanuni təmsilçiliyini başqa bir şəxsə təhvil verib. Elnur Xəlilov reyesterdə müvafiq dəyişikliklərin aparılması üçün Vergi Xidmətinə rəsmi müraciətin edildiyini və yaxın günlərdə dəyişikliyin reyesterdə əks olunacağını bildirib.
Xatırladaq ki, 2022-ci ilin yanvar ayında Ukrayna Prezidenti Volodimir Zelenski Məhərrəmzadə Əlibala Səttar oğlunu III dərəcəli “Xidmətə görə” ("За заслуги") ordeni ilə təltif edib.
Xatırladaq ki, Ukrayna Prezidenti Volodimir Zelenski 2019-cu ildə Bakıda “Ukrayna Ticarət Evi” MMC-yə məxsus “Ukrayna Məhsulları” ticarət şəbəkəsinin mərkəzi mağazasının açılış mərasimində iştirak edib.
Siyəzən Suvarma Sistemləri İdarəsi torpaq məcralı Yenikənd (PK16+40/PK28+00) kanalının beton üzlüyə alınması və üzərindəki qurğuların əsaslı təmiri işlərinin satın alınması üzrə keçirdiyi açıq tenderdə “SVS-LTD” Məhdud Məsuliyyətli Cəmiyyətini qalib seçib və 90.797,01 manat məbləğində satınalma müqaviləsinin bağlanılması barədə məlumatı 14.06.2024-cü ildə dövlət satınalmalarının vahid internet portalına yerləşdirib.
Bundan başqa Siyəzən Suvarma Sistemləri İdarəsi Torpaq məcralı Yenikənd (PK 32+14÷PK 48+54, L=1,64 km) kanalının beton üzlüyə alınması və üzərindəki qurğuların əsaslı təmiri işlərinin satın alınması üzrə “SVS-LTD” MMC ilə bir satınalma müqaviləsi bağladığını da 02.02.2024-cü ildə dərc edib. Bu müqavilənin qiyməti 194.824,62 manat təşkil edib.
Göründüyü kimi Siyəzən Suvarma Sistemləri İdarəsi dörd ay ərzində kanalının beton üzlüyə alınması və üzərindəki qurğuların əsaslı təmiri işləri üzrə “SVS-LTD” MMC ilə ümumi dəyəri 285 621 manat olan iki satınalma müqaviləsi bağlayıb. Amma gəlin görək bu MMC sözügedən işləri həyata keçirmək iqtidarındadırmı.
“”Lisenziyalar və İcazələr haqqında Azərbaycan Respublikası Qanununun 8.1 maddəsinə uygun olaraq İqtisadiyyat Nazirliyi tərəfindən aparılan lisenziyaların və icazələrin vahid reyestrində MMC -nin tikintisinə icazə tələb olunan bina və qurğuların tikinti-quraşdırma işləri üzrə lisenziya alması barədə məlumat yoxdu.
Kommersiya qurumunun hüquqi şəxslərin dövlət reyestrinə daxil edilmiş məlumatlarında “SVS-LTD” MMC (VÖEN 2900259021) Dövlət Vergi Xidmətinin 2 saylı Ərazi Vergilər İdarəsində 18.01.1996-cı ildə dövlət qeydiyyatına alınıb. Nizamnamə kapitalı 91 020.00 manat olan şirkətin hüquqi ünvanı SUMQAYIT ŞƏHƏRİ, CORAT, ev 579B-də yerləşir. MMC-nin qanuni təmsilçisi Quliyev Məhərrəm Esaq oğludur.
Elektron mediada yayılan məlumatlarda da “SVS-LTD” MMC-nin adı bir çox şübhəli satınalmalarda hallanır. Sözügedən məlumatlarda MMC-nin müvafiq sahədə peşəkarlığında, ixtisas göstəricilərində, təcrübəsində, texniki və maliyyə imkanlarında, işçi qüvvəsində, idarəetmə səriştəsində bir sıra şübhəli məqamların olduğu bildirilir.
Bundan əlavə “SVS-LTD” MMC -nin uyğunluq göstəricilərinə tam cavab vermədiyi tərəfimizdən də aşkar edilmişdir ki, bu da Siyəzən Suvarma Sistemləri İdarəsinin satınalma proseduru zamanı qanunsuzluqlara yol verdiyini bir daha təsdiq edir. Bu elə Azərbaycan Dövlət Su Ehtiyatları Agentliyinə tabeli “Tikilməkdə Olan Obyektlərin Müdiriyyəti” kimi bir ciddi dövlət qurumun keçirdiyi satınalma prosedurunda öz əksini tapıb.
Araşdırdıqda məlum oldu ki, Tikilməkdə Olan Obyektlərin Müdiriyyəti tərəfindən 14.08.2024-ci ildə elan edilmiş Şamaxı rayonunun Böyük Xınıslı kəndinin su təchizatı üzrə satınalmanın nəticələrinə dair bu bidirişdə təchizatçı “SVS-LTD” MMC tərəfindən müqavilənin icrası zamanı istifadə olunacaq əmlakından sərbəst və məhdudiyyətsiz istifadə etmək imkanının olması meyarı üzrə sənədlərin tələblərə cavab vermədiyi müəyyən edilmişdir. Təchizatçı son bir il ərzində iki dəfə və ya daha çox Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxslərin hər hansı işlərin (xidmətlərin) yerinə yetirilməsinə cəlb edilməsinə görə maliyyə sanksiyasının və ya inzibati cərimənin tətbiq edilməsi meyarı üzrə arayış təqdim etməyib. Digər tərəfdən, təchizatçının satınalma müqaviləsinin icrası üçün peşəkarlıq və təcrübə meyarı üzrə şərtlər toplusunun tələblərinə uyğun oxşar analoji xüsusiyyətli işlərin görülməsi təcrübəsinin olmadığı aşkar edilmişdir. Bu səbəbdən “SVS-LTD” MMC müsabiqədən kənarlaşdırılmışdır.
Məlumat Tikilməkdə Olan Obyektlərin Müdiriyyəti tərəfindən dövlət satınalmalarının vahid internet portalına 23.09.2024-cü il tarixdə yerləşdirilib. Bu məlumat isə “SVS-LTD” MMC-nin əmlakından sərbəst və məhdudiyyətsiz istifadə etmək imkanının, müvafiq sahədə peşəkarlığının və təcrübəsinin, işçi qüvvəsinin olmamasını bir daha təsdiq edir.
Belə olan halda suallar yaranar. Bu necə olur ki, Siyəzən Suvarma Sistemləri İdarəsinin tabe olduğu, Dövlət Su Ehtiyatları Agentliyinin “Tikilməkdə Olan Obyektlərin Müdiriyyəti” “SVS-LTD” MMC-nin uyğunluq göstəriciləri tələblərə cavab vermədiyinə görə müsabiqədən kənarlaşdırılır. Amma Siyəzən Suvarma Sistemləri İdarəsi bu tələbləri nəzərə almadan “SVS-LTD” MMC-ni qalib seçir.
Göründüyü kimi, Dövlət Su Ehtiyatları Agentliyinin “Tikilməkdə Olan Obyektlərin Müdiriyyəti” “SVS-LTD” MMC-ni su təchizatı üzrə satınalmadan kənarlaşdırıb. Siyəzən Suvarma Sistemləri İdarəsi isə MMC-ni daha qlobal, kanalların beton üzlüyə alınması və üzərindəki qurğuların əsaslı təmiri işləri üzrə satınalmanın qalibi seçib. Göründüyü kimi birinci satınalan təşkilat təchizatçının satınalma müqaviləsinin icrası üçün peşəkarlıq və təcrübə meyarı üzrə oxşar analoji xüsusiyyətli işlərin görülməsi təcrübəsinin olmadığı aşkar etmişdir. Amma Siyəzən Suvarma Sistemləri İdarəsi bu çatışmazlıqlara göz yumaraq MMC-ni qalib seçmişdir.
Göründüyü kimi Siyəzən Suvarma Sistemləri İdarəsinin Satınalma Komissiyası açıq tenderin keçirilməsi zamanı “Dövlət Satınalmaları Haqqında” Azərbaycan Respublikası Qanununun bir çox tələblərinə riayət etməmiş, “SVS-LTD” MMC-nin müvafiq sahədə peşəkarlığını, ixtisas göstəricilərini, təcrübəsini, işçi qüvvəsini, maliyyə imkanlarını və ödəmə qabiliyyətini, etibarlığını nəzərə almamışdır. Bu da keçirilmiş tender prosedurunda Siyəzən Suvarma Sistemləri İdarəsinin Satınalma Komissiyasının bir çox məsələrə göz yumduğunu deməyə əsas verir.
Qeyd edək ki, Siyəzən Suvarma Sistemləri İdarəsinin rəisi Murad Xəlilovdur. Onun bu vəzifədə nə vaxtan çalşıması haqqında konkret məlumat yoxdu. Siyəzən rayonunda 247 km uzunluğunda suvarma kanalları mövcuddur. Rayonda 12-min hektardan çox suvarılan ərazi mövcuddur. Rayonun əsas suvarma mənbəyi Samur-Abşeron kanalı, Taxtakörpü-Ceyranbatan kanalı, Gil-gilçay və Ataçay çaylarıdır. Son dövrlər rayonda 1685-ədəd hidrotexniki qurğu, 198-min 286 metr uzunluğunda qapalı supaylayıcı şəbəkə, üzərində 118 ədəd hidrotexniki qurğu olan 24 min 103 m uzunluğunda beton üzlüklü açıq suvarma kanalı və 2300 hektar ərazini əhatə edən 26-kilometr açıq, 121-kilometr isə qapalı drenaj şəbəkəsi çəkilib. Görsənən odur ki, bütün bu sadalanan işlərin hamısında da SVS-LTD” MMC ilə olduğu kimi axtakarlıq hallarına yol yerilib.
Aktualinfo.org
Xəbər verildiyi kimi ötən gün paytaxtın Nizami rayonu, 8-ci köndələn küçəsində yerləşən sexdə partlayış baş verib. Fövqəladə Hallar Naziliyindən verilən ilkin məlumata görə ümumi sahəsi təxminən 40 m² olan qazanxanada yanğınla nəticələnməyən partlayışa səbəb qaz sızması olub. Partlayışda həm obyektə ciddi ziyan dəyib, həm də 6 nəfər bədən xəsarətləri alıb.
Bizim.Media-nın araşdırmasına görə partlayış Azərbaycanda kəllə qənd istehsalı ilə məşğul olan “Bolluq LTD” MMC-nin Bakı şəhəri, Nizami rayonu, Böyük Şor qəsəbəsi, 8-ci köndələn 5 ünvanında yerləşən istehsalat müəssisəsində baş verib.
Hansı ki, bu şirkət ümumilikdə fəaliyyətində verdiyi nöqsan və pozuntulara görə dəfələrlə aidiyyəti qurumlar tərəfindən cəzalandırılıb.
İstehsal olunan qəndlər sünu şəkildə ağardılır?
Qeyd edək ki, partlayış baş verən fialilda artıq ikinci qalmaqaldır ki, baş verir. Bundan əvvəl “Bolluq” MMC-nin Nizami rayonu, Böyük Şor qəsəbəsi, 8-ci köndələn 5 ünvanında yerləşən istehsalat müəssisəsinin müdiri satış üçün hazırlanan qəndlərin tərkibinə normadan artıq kükürd dioksid vurulmasında (qəndin ağardılması) ittiham olunaraq məhkəmə qarşısına çıxarılıb.
Müəssisənin bağlanılmasına qərar verilibsə, niyə fəaliyyətdədir?
Bu ilin iyun ayında şirkətin Abşeron rayonu, Bakı-Sumqayıt şosesi, 13-cü kilometr ünvanında isə yoxlama zamanı yanğın təhlükəsizliyi sahəsində çoxsaylı nöqsanın mövcud olduğu aşkarlanıb.
Belə ki, obyektin mətbəx sahəsində çəkilmiş qaz xəttində yivli birləşmələrdən istifadə olunub, anbar sahələrində rəflərin ara məsafələri yanğınların söndürülməsinə və ya malların hadisə zamanı köçürülməsinə maneə törədəcək əşyalarla tutulub. Həmçinin obyektin bəzi sahələri yanğınxəbərverici siqnalizasiya qurğusu və ilkin yanğınsöndürmə vasitələri ilə təmin olunmayıb.
Elə insan həyatı və ya sağlamlığına, ətraf mühitə, eləcə də dövlətin əmlak maraqlarına birbaşa təhlükə yaratdığı üçün həmin ünvandakı obyektin bağlanmasına rəsmi qərar da verilib. Amma əldə etdiyimiz məlumata görə bu qərara məhəl qoymayan şirkət rəhbərliyinin göstərişi ilə Bakı-Sumqayıt şosesi, 13-cü kilometr ünvanındakı müəssisə hələ də fəaliyyətdədir.
Təhlükəsizlik qaydaları pozulur...
Görünən odur ki, şirkətin sözügedən filailında olduğu kimi “Bolluq” MMC-nin Nizami rayonu, Böyük Şor qəsəbəsi, 8-ci köndələn 5 ünvanındakı sexdə də insan sağlamlığına təhlükə yarada amillər olub. İddialara görə bu müəssisədə də digəri kimi qaz xəttində yıvli birləşmələrdən istifadə olunub və qaz sızması yaranıb.
Maraqlısı odur ki, şirkətin öz daxilində də qanunsuzluqlar yaşanıb. Belə ki, “Bolluq LTD” MMC-nin Şirvan şəhər filialının satış təmsilçisi çalışdığı müəssisənin pullarını mənimsəyib və işə rayon prokuroluğu qarışıb.
Ölkənin qida və qənnadı sektorunda istehsal, satış və distribüter şirkəti kimi fəaliyyət göstərən “Bolluq” MMC-nin adı başqa qalmaqallarda da çəkilir.
Belə ki, "Bolluq LTD" reklam haqqında qanunvericiliyin tələbini pozmasına görə 5 min manat cərimə edilib.
Bundan əlavə şirkətin fabriklərində antisanitariyanın hökm sürdüyü ilə bağlı zaman-zaman mediada məlumatlar və görüntülər yayılıb.
Saxta düyü istehsal olunur?
Bu azmış kimi “Bolluq” MMC saxta düyü istehsalı iddiası ilə də ad qazanıb. Novruz bayramı ərəfəsində süfrələri bəzəyən düyünün sintetik olduğuna dair görüntülər ictimaiyyətdə əməlli başlı səs-küy yaradıb. Ciddi narahatlıq doğuran məsələ ilə bağlı çaşqınlığa şirkətin rəhbərinin açıqlamasından sonra son qoyulub. Hətta məlum olmayan səbəblərdən sintetik düyü ilə bağlı görüntülər sosial şəbəkələrdən götürülüb.
Qeyd edək ki, iki gündür ki, partlayışın səbəbi ilə bağlı “Bolluq” MMC ilə əlaqə yarada bilmirik. Zənglərimizə şirkətin fərqli bir neçə əməkdaşı cavab versə də, ya baş verən partlayışdan xəbərsiz olduqlarını, ya da bu barədə düz ünvana düşmədiyimizi bildirirlər.
Məlumat üçün bildirək ki, 1993-cü ildə topdansatış mərkəzi kimi fəaliyyətə başlamış “Bolluq LTD” MMC-nin direktoru Ağasəf İsgəndərovdur.
Divin, Təpəgözün, İkibaşlı əjdahanın olduğu nağıllarla böyüdük.
DogruXeber.az: - Nənə-babalarımız bizi bu nağıllara elə inandırdılar ki, sadalanan nağıl personajlarının hər an qarşımıza çıxa biləcəyi qorxusu ilə bir uşaqlıq yaşadıq. Və illər keçdi, biz böyüdük. Böyüdükcə də özümüzü inandırdıq ki, div də, əjdaha da, onu məhv edən Məlikməmməd də sadəcə nağıl qəhrəmanları idi, nağılda da qaldı.
Amma yox... Sən demə elə Nənə-babalarımız doğru deyibmişlər, biz özümüz özümüzü onların yoxluğunan inandırmaqla aldatmışıq. Onlar indi də var, amma sadəcə olaraq, rəhmətliklərin dedikləri qədər qorxunc görünmürlər.
Nə yazıq ki, özümüzdən biri kimi görünüb, insanlara, insanlığa qənim kəsilən belə şəxslərin böyük əksəriyyətinin "əzəməti" də onların əyləşdikləri "taxt-tacda" - yəni, vəzifə kürsüsündədir.
Təsəvvür edirsiniz?
Qaradağ Rayon Müşfiqabad qəsəbəsinin - xüsusilə də Qaçqın şəhərciyinin sakinləri dünya yeni-yeni qarşıda yer üzünü gözləyən su qıtlığından narahatlığını bəyan edəndə biliblər ki, sən demə buvaxta qədər su bol imiş. "Həftə səkkiz, mən doqquz" suları kəsilən bu binəva camaat üçün illərdir ki, nə əvvəl mövcud olan ("fəaliyyət göstərən" desək sözügedən ərazi sakinlərini cırnatmış olarıq) "Azərsu" ASC, nə də hazırkı qurum Su Ehtiyatları Agentliyi heç bir ehtiyat tədbirləri də görməyiblər.
Artıq, iki gündür susuz qalan şəhərcik sakinləri deyir, "Elə hey su kəsilir, hər dəfə də hansısa borunun təmir olunduğunu deyib, uşaq kimi başımızı aldadırlar".
Bəli, yuxarıda da qeyd etdiyimiz kimi bu hal Qaçqın şəhərciyində ilk dəfə deyil, amma Zaur Mikayılov fəaliyyətinin sürətlə topladığı narazı vətəndaş auditoriyası bunu deməyə əsas verir ki, bu heç son da deyil.
Buna görə də sözügedən ərazinin sakinləri redaksiyamıza, ən qısa zamanda kütləvi halda etiraza qalxmaq məcburiyyətində olduqlarını deyiblər.
Yay boyunca da tez-tez susuz qaldıqlarını və evlərinin içində səhra həyatı yaşadıqlarını deyən bu insanlar "Qorxmaz Hüseynovun da heç nümunəvi fəaliyyəti yox idi, amma Zaur Mikayılov gələndən bəri bizə, "Qorxmazlı günlərə şükür" oxutdurur. Deyəsən bizim də ölkə başçısına müraciət etməkdən başqa çarəmiz qalmır" deyə, "DogruXeber.az" informasiya agentliyinin rəhbərinə gileyləniblər.
Ümid edirik ki, ən qısa zamanda mövcud problem aidiyyatı qurum tərəfindən aradan qaldırılar və bu insanlar da belə kiçik məsələlər üçün ölkə başçısına müraciət etmək məcburiyyətində qalmazlar.
Özümüz yazdığımıza baxmayın, doğrusu mövcud vəziyyət bizi də çox məyus etdi. Təqribən 4 il əvvəl elə bu camaat Qorxmaz Hüseynovu "əsrin əjdahası" adlandıraraq, "suyun boğazına yatdığını" deyib, dərdlərini də məhz "DogruXeber.az"a danışmışdılar, bu gün də təkrar etdilər. Görünür, bu 4 ildə fəaliyyətdə heç nə dəyişməyib.
Bu gedişlə deyəsən," Mirzə dayıya hələ çox gözaydınlığı verəcəyik". İndi heç "xaricdə belə olmayan əjdahalar" bizdə var.
Redaksiamız hər kəsin söz haqqını tanıyır.
DogruXeber.az
"Ağstafa rayon Vurğun qəsəbəsində yerləşən 1 saylı körpələr evi-uşaq bağçasının rəhbərliyindən narazıyıq. Heç bir əsaslı səbəb olmadan bağçanın müdiri Afaq Fatapur tərəfindən işimizə xitam verilib". Bu şikayətlə "Qafqazinfo"ya adıçəkilən müəssisənin bir qrup işçisi müraciət edib.
10 ildir bağçada tərbiyəçi işlədiyini deyən Aygül Rəhimovanın iddialarına görə, A.Fatapur heç bir töhməti olmadan onun işinə xitam verib:
"Mənə heç bir xəbərdarlıq edilmədən, ən əsası həmkarlar sədrinin xəbəri və rəyi olmadan qanun pozuntusuna yol verərək işimə xitam verilib. Buna səbəb onun qanundankənar işlərə cəlb etmək istəyini rədd etməyimdir. Bağçanın müdiri bizi işimizlə hədələyir, qapını bağlayaraq işə buraxmır və yalandan davamiyyəti pozduğumuzu iddia edir".
Tərbiyəçi deyir ki, müdir uşaqların və işçilərin gözü önündə onu təhqir edib:
"Haqqımız olan məzuniyyəti bizə vermir. Yaşadığımız bütün problemlərlə bağlı Ağstafa Rayon Təhsil Sektoruna və Qazax-Tovuz Regional Təhsil İdarəsinə şikayətlərimizi rəsmi formada bildirmişik. Hazırda iş məhkəmədədir".
Şikayətçi bağçada uşaqlar üçün yemək çatışmazlığı kimi problemlərin də olduğunu bildirib:
"İşçilərə məcburi olaraq bağçada artıq uşaq sayı yazdırırlar, nəticədə daha çox ərzaq gəlir, ancaq bunu aşpazla mənimsəyirlər".
Aygül Rəhimova saytımıza göndərdiyi videoda bağçada beş uşağa cəmi bir boşqab makaron və 3-4 dilim ağ pendir verildiyini, bunu azyaşlılar arasında bölməyin çətin olduğunu vurğulayıb.
Həmin bağçanın təsərrüfat müdiri Lətafət Əsgərova, dayə Səidə Məmmədova, mövsümi ocaqçı Gülnur Quliyeva da şikayətlərində bənzər problemlərlə üzləşdiklərini iddia ediblər.
L.Əsgərova bildirib ki, onun bütün səlahiyyətləri əlindən alınıb:
"Müdir imzamı kopiyalayaraq ərzaq və inventarları özü qəbul edir və aşpazla mənimsəyir. Qəbul edilən ərzaqlardan xəbərim olmur. Buna etirazımı bildirdiyim üçün məni işimlə hədələyir və təhqir edir".
S.Məmmədovanın sözlərinə görə, işdən səbəbsiz yerə çıxarılmaqla hədələnib:
"Müdir Afaq Fatapurdan şikayətçiyəm. Məzuniyyətdən qayıdan kimi, mənə kobud ifadələr işlədir, şərəf və ləyaqətimi alçaldaraq işdən çıxaracağını bildirir. Səbəbini soruşduqda isə özünün belə istədiyini söyləyir. Dəfələrlə etiraz etməyimə baxmayaraq, işimlə hədələyir. Bu təzyiqlərə dözməyərək bağçada halım pisləşib və iş yoldaşlarım tərəfindən təcili tibbi yardım çağırılıb, məni Ağstafa Rayon Mərkəzi Xəstəxanasına yerləşdiriblər".
Gülnur Quliyeva isə deyir ki, bağçanın müdiri mövsüm bitdikdən sonra artıq ona işə gəlməməyi tapşırıb:
"Gələn mövsümdə mənə ocaqçılıq vəzifəsini verməyəcəyini söylədi. Buna səbəb mənim 65 yaşı tamam olub əmək məzuniyyətinə çıxan texniki işçinin yerinə vakant yer tələb etməyimdir. Nəinki vakant yer vermək, ocaqçılıq vəzifəmi belə əlimdən alaraq səsinin tonunu qaldırıb mənə bir daha bağçaya gəlmə dedi".
Sadalanan iddialarla bağlı bağçanın müdiri Afaq Fatapurla əlaqə saxlanılıb. O, açıqlamasında haqqında deyilənləri təkzib edib:
"Bu barədə heç bir şey demək istəmirəm. Sadəcə onu deyə bilərəm ki, şər-böhtandır. Onların əl atmadığı iş qalmayıb. Yalan məlumatlardır, bununla bağlı mən hüquq-mühafizə orqanlarına müraciət edəcəyəm".
Bağça müdiri əməkdaşlarının işinə xitam verilməsi ilə bağlı sualı cavablandırmaq istəməyib.
İttihamlarla əlaqədar Qazax-Tovuz Regional Təhsil İdarəsinə də sorğu ünvanlanıb. Qurumdan cavab olaraq bildirilib ki, sözügedən təhsil müəssisəsi hazırda təmir üçün bağlıdır:
"Qazax-Tovuz Regional Təhsil İdarəsinin tabeliyində fəaliyyət göstərən ümumi və məktəbəqədər təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni binaların inşası və mövcud binaların əsaslı təmir olunması əsas prioritetlərimizdəndir.
Bildiririk ki, Ağstafa rayon Vurğun qəsəbə 1 saylı körpələr evi-uşaq bağçasının mövcud vəziyyəti ilə bağlı məlumatlıyıq. Sözügedən körpələr evi-uşaq bağçası 16.09.2024-cü il tarixindən təmirə bağlanıb. Təmirlə əlaqədar olaraq təlim-tədris prosesinin fasiləsizliyini təmin etmək üçün körpələr evi-uşaq bağçası müvafiq təşkilatlarla razılaşdırılmaqla müvəqqəti olaraq qəsəbə ərazisindəki başqa tikiliyə köçürülüb.
Məktəbəqədər təhsil müəssisəsi haqqında səsləndirilən digər iddialarla bağlı Qazax-Tovuz Regional Təhsil İdarəsi tərəfindən araşdırma aparılır. Araşdırmanın nəticəsindən asılı olaraq müvafiq tədbirlər görüləcək".
Qeyd edək ki, Afaq Fatapurun adı həbsdə vəfat edən Ağstafa Rayon İcra Hakimiyyətinin (RİH) keçmiş başçısı Nizaməddin Quliyevin cinayət işində də hallanıb. İş üzrə şahid qismində tanınan RİH-in başçısının müavini Lalə Eyyubova istintaqa verdiyi ifadəsində bildirib ki, Vurğun qəsəbə 1 saylı körpələr evi və uşaq bağçasının müdiri Afaq Bayraməli qızın Fatapurdan da vəzifədə saxlanılmasına görə 2 000 manat rüşvət alıb.
Və yaxud işğaldan azad olunan ərazidə fəaliyyət göstərən tikinti şirkətləri agentlik rəhbərliyindən niyə narazıdır?!
Azərbaycan Respublikasının Minatəmizləmə Agentliyinin (ANAMA) adı ölkə mətbuatından dəfələrlə şübhəli tender qalmaqallarında hallanıb. Təkcə son bir neçə ay ərzində bu agentliyin on milyonlarla manatlıq bir neçə layihəsi istər mətbuatda, istər də sosial şəbəkələrdə ciddi müzakirə mövzusuna çevrilib. Hətta bəzi hallarda tender elan olunmadan agentlik tərəfindən formal olaraq “qalib şirkətin” adı da elan olunub ki, bu da növbəti saxtakarlıq və maliyyə maxinasiyası kimi qəbul olunub.
O da maraqlıdır ki, ANAMA-nın tenderlərinin qalibləri əsasən hansısa məmurlara, bəzi hallarda isə sabiq məmurlara məxsus şirkətlərdən ibarətdir. Məsələn, cari ilin aprel ayında agentlik “İmprotex İndustries” MMC (VÖEN – 1401813511) ilə satınalma müqaviləsi imzaladı. Həmin vaxt bildirildi ki, sözügedən müqaviləyə görə ANAMA minatəmizləmə texnikaları, ehtiyat hissələri və təlim xidmətlərinin satın alınması üçün “İmprotex İndustries” MMC-yə 19 milyon 629 min 520 manat ödəyəcək. Bəs, bu “İmprotex İndustries” MMC kimə məxsusdur?
Mətbuatın apardığı araşdırma nəticəsində aydın oldu ki, “İmprotex İndustries” MMC 1 iyul 2010-cu ildə qeydiyyata alınıb. Nizamnamə kapitalı 100 manat olan şirkətin hüquqi ünvanı Bakı şəhəri Nəsimi rayonu, Həzi Aslanov, ev 115, m. 21-də yerləşir. MMC-nin qanuni təmsilçisi Abdullayev Mühəmməd Fərid Azər oğludur. Əslində isə, agentlikdən təxminən 20 milyon manatlıq sifariş alan şirkət Azərbaycanın keçmiş əmək və əhalinin sosial müdafiəsi naziri Füzuli Ələkbərova məxsusdur.
Sabiq nazir işğaldan azad olunan ərazilərdə yaradılan “Araz Vadisi İqtisadi Zonası”nda xüsusi təyinatlı texnika və metal məmulatları istehsal edən müəssisə açıb. Həmin müəsssiədə mexaniki minatəmizləyənlərin də hazırlandığı bildirilib.
Ən təəccüblüsü isə o idi ki, bu müqavilə üzrə satınalma proseduru dövlət satınalmalarının vahid internet portalında keçirilməyib. Halbuki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir. Nəzərə alaq ki, minatəmizləmə texnikasının satın alınması məxfi məlumat hesab oluna bilməz. Hətta ötən ilin oktyabr ayında mətbuatda “İmprotex İndustries” MMC-nin ANAMA-ya 4 ədəd “Revival P” mexaniki minatəmizləmə maşını təhvil verdiyi barədə məlumat yayılmışdı. Bu səbəbdən də, ANAMA-nın satınalma prosesini bu şəkildə keçirməsi başadüşülən deyil.
Növbəti müəmmalı tenderlər
Ötən ayın sonu ANAMA-nın daha bir tenderinin nəticəsi elan olundu. Bu zaman məlum oldu ki, Ağdam, Füzuli və Xocavənd Rayonlarında Bərpa,Tikinti və İdarəetmə Xidməti “Xocavənd rayonu, Hadrut qəsəbəsinin və Tuğ kəndinin sahədaxili mühəndis kommunikasiyaları sistemləri (su, kanalizasiya və qaz xətləri), daxili yol və səkilərin tikinti-quraşdırma işlərinin satın alınması” tenderinin qalibi “İnşaatçı-Neftçi” MMC olub. Qalib şirkətlə 12 583 453 manat məbləğində müqavilə imzalanıb. Hansı ki, bu şirkətin adı indiyədək bir çox maliyyə maxinasiyalarında çəkilib, hətta onu himayə edən məmurun hesabına dəfələrlə audit yoxlamalarından yayınmağa da nail olub.
Ardınca isə ANAMA-nın keçirdiyi daha bir açıq tender müsabiqəsinin qalibi açıqlandı. Bəlli oldu ki, ANAMA-nın 181 min 17 manat 90 qəpik dəyərindəki tender müsabiqəsini “Universal-RA” MMC (VÖEN - 1301581481) udub.
“Universal-RA” MMC ANAMA-ya 31 min 500 kiloqram quru it yemi satacaq.
Hansl ki, ondan bir həftə öncə ANAMA Xorvatiyanın "Piper d.o.o." şirkətindən 202 min 500 dollar (344 min 250 manat) dəyərində minaaxtaran itlər almaq üçün satınalma müqaviləsi imzalamışdı.
Məlumat üçün bildirək ki, ANAMA-ya it yemi satacaq “Universal-RA” MMC 24 dekabr 2007-ci ildə qeydiyyata alınıb. Nizamnamə kapitalı 20 manat olan şirkətin qanuni təmsilçisi Abbasov Rəşad Bəhlul oğludur. Ən maraqlısı isə odur ki, ANAMA-nın 181 min manatlıq tenderini udan bu “20 manatlıq şirkətin” “Universal-RA” MMC-nin həmin vaxt dövlət büdcəsinə 13 min 50 manat 78 qəpik vergi borcu olub. Bu haqda Dövlət Vergi Xidməti tərəfindən məlumat verilib.
Agentlik üçün 1,1 milyonluq texniki baza
Son olaraq isə agentlik “Bakı şəhəri, Binəqədi şossesi 53 ünvanında Azərbaycan Respublikasının Minatəmizləmə Agentliyi üçün texniki bazanın tikintisi işlərinin satın alınması” tenderinin nəticələrini elan etdi. Məlum oldu ki, bu tenderin qalibi “Şəmkir Tikinti-18” ASC olub. Qalib şirkətlə 1 147 146 manat məbləğində müqavilə imzalanıb.
“Şəmkir Tikinti-18” ASC də ölkəmizdə bir çox iri layihələrin icrasını həyata keçirdiyindən faktiki olaraq “tender kralı” kimi tanınır. Deməli, bu şirkətin arxasında da hansısa məmur dayanır. Əks halda, indiki reallıqda sıradan bir vətəndaşa bu qədər böyük imkanlar tanınması absurd olar.
ANAMA-nın faydalı işləri və “yediyi” milyonlar
Əlbəttə, ANAMA-nın xalqımız üçün çox böyük, faydalı işlər gördüyü danılmazdır. Məhz bu agentliyin əməkdaşlarının səyi nətiəsində bu gün vətəndaşlarımız işğaldan azad olunan ərazilərdə sərbəst şəkildə gəzib-dolaşa bilirlər. Doğrudur, hələ minatəmizləmə işləri tam yekunlaşmayıb. Amma inanırıq ki, qarşıdakı bir neçə il ərzində bütün ərazilərimiz minalardan təmizlənəcək və vətəndaşlarımız Vətənin hər qarışında təhlükəsiz şəkildə addımlaya biləcək.
Şübhəsiz, minatəmizləmə işləri heç də asan başa gələn bir proses deyil. Bunun bəzi hallarda ANAMA əməkdaşlarının həyatını itirməsi ilə nəticələndiyi də bizlərə bəllidir. Amma bütün bunlar onu deməyə əsas vermir ki, agentlik rəhbərliyi dövlətin, xalqın pulunu talan etməlidir.
Əlbəttə, burada yalnız müəmmalı tender maxinasiyalarından söhbət getmir. Son vaxtlar agentliklə müqavilə bağlayan şirkətlər arasında da narazılıq yaranıb. Onlar iddia edirlər ki, görülən işləri vaxtında yerinə yetirsələr də, ANAMA-dan pullarını almaqda çətinlik çəkirlər. Əksər hallarda müqavilədə qeyd olunan vəsait onlara kəsirlə verilir.
Bu baxımdan, müvafiq qurumlar tərəfindən ANAMA-nın fəaliyyətinin dərindən araşdırılmasına ehtiyac olduğunu əminliklə deyə bilərik.
“Hürriyyət”
Redaksiyadan: Qarşı tərəfin mövqeyini dərc etməyə hazırıq.
Sabirabad Təhsilində "həmkarlar"ın pulları kimin cibinə gedir?Avqust ayının 26 da Azərbaycan Həmkarlar İttifaqları Konfederasiyasının (AHİK) yeni sədri vəzifəsinə Sahib Məmmədov seçidli.
Bundan sonra isə Konfederasiyada bir sıra nəzərə çarpacaq islahatlar başlandı. Bir sıra kadr islahatları həyata keçirildi. Sahib Məmmədov bundan sonra Konfederasiyanın şəffaf və hesabatlılıq prinsipləri ilə işləyəcəyini bəyan elədi.
Sahib Məmmədov
S.Məmmədov müvafiq olaraq regional idarələrə tapşırıqlarını verdi.
Eyni zamanda bu ilin avqust ayının 29-da Azərbaycan Təhsil İşçiləri Azad Həmkarlar İttifaqına yeni sədr seçilib. İttifaqın yeni sədri Araz Paşayev sədr seçilib. Eyni qaydada Araz Paşayev də yeni seçkidən sonra müvafiq olaraq yerli idarələrə şəffaflıqla bağlı tapşırılar verib. Bu barədə rəsmi xəbər agentliklərində informasiyalar yer alıb.
Azər Paşayev
Gundeminfo.az xəbər verir ki, yeni sədr islahatlara başlada da, müvafiq olaraq tapşırıqlar versə də, bu tapşırıqlar deyəsən Bakıdan 165 km uzaqda olan Sabirabad rayonuna gedib çatmayıb.
Sabirabad Rayon Təhsil İşçiləri Həmkarlar İttifaqından isə narazılıqlar son bir neçə ayda xeyli artıb. Redaksiyamıza daxil olan məlumata əsasən Seyidhüseyn Hüseynov rayon üzrə 4 min nəfərdən ibarət olan pedaqoji kollektivdən hər ay topladığı vəsaitlərlə bağlı hesabat vermir.
S.Hüseynova müraciət edən müəllimlər yay tətilində putyovka ala bilmələri bir yana, qəpik-quruş ehtiyacları üçün dəstək də ala bilmirlər.
Onlar Sabirabad Rayon Təhsil İşçiləri Həmkarlar İttifaqına müraciət etdikdə isə kassada pul yoxdur cavabı alırlar.
Narazı müəllimlər deyir ki, S.Hüseynov özü dəbdəbəli həyyat yaşayır. Dəyəri 60 min manatdan baha olan ən son model "Toyota Camry" avtomobili idarə edir.
Hər ay Sabirabad rayonunda 4 min müəəllimin əmək haqqından 2 faiz Həmkarlar İttifaqına vergi tutulur. Bu isə ortalama adambaşına 20 manat deməkdir. 20 manat 4 min müəllimdən toplanan aylıq 80 min manat hara yoxa çıxır.
S.Hüseynova müraciət edən müəllimlərə cavab verilir ki, toplanan vəsaitlərin 50 faizi avtomatik olaraq Bakıya, Azərbaycan Həmkarlar İttifaqları Konfederasiyasının hesabına köçürülür. Yerdə qalan 10 faiz yardım və putyovkaların yazılmasına xərclənir, əsas 40 faizi isə guya Sabirabadda keçirilən tədbirlərə xərclənir. Maraqlıdır ki, toplanan vəsaitlırin 50 faizi Sabirabadda qalsa da keçirilən tədbirlər, onların təşkili ilə bağlı sərf edilən vəsaitlər haqqında məlumat almaq mümkün olmadı.
Mövzu ilə bağlı qarşı tərəfin də mövqeyi ni dinləməyə hazırıq.
Eks-deputat Hacı Qalib Salahzadə Bilgəhdə toy-bayram edir.
Bu haqda Musavat.com-a "POSAT" kooperativinin üzvləri məlumat verib.
Bildirirlər ki, sabah, oktyabrın 8-də Bakı Apellyasiya Məhkəməsində hakim Rəşid Səmədovun sədrliyi ilə onların Hacı Qalibin qanunsuz əməllərindən şikayətləri ilə bağlı qərar veriləcək.
Hacı Qalib indidən qərarın onun xeyrinə veriləcəyinə əmindir və yaxın ətrafına Bakı Apellyasiya Məhkəməsindən qərarı artıq aldığını deyib.
Kooperativ üzvləri təcili şəkildə Məhkəmə-Hüquq Şurasının sədri İnam Kərimova, Bakı Apellyasiya Məhkəməsinin sədri Mübariz Əkbərova müraciət edib qanunsuzluğun qarşısının alınmasını istəyirlər.
"Bizim şikayətimiz tam əsaslıdır. Məhkəməyə də bütün sənədləri, sübutları təqdim etmişik. Hakim Rəşid Səmədov da başa düşür ki, biz haqlıyıq. Hacı Qalib bizlərin sənədli-sübutlu torpaq sahəmizi zəbt edib. Tələb edirik ki, bizə məxsus 4, ümumilikdə isə 5.3 hektar bağ torpaq sahəsini zəbtdən azad etsinlər. Qalib Salahzadə heç bir əsası, kötüyü olmayan bir kağızı əlinə alıb. Həmin kağızı özü yazıb, kooperativə məxsus 4 hektar torpaq sahəsini vəfat etmiş nənəsi Kübra Camalovanın adına həyətyanı sahə kimi verib. Əlavə olaraq 1.3 hektar torpağı da həmin 4 hektara qataraq yekun olaraq 5.3 hektarı nənəsinin adına rəsmiləşdirib. Respublikanın hansı bir yerində qoca arvada həyətyanı sahə olaraq 5.3 hektar torpaq verirlər?
Bakı Apellyasiya Məhkəməsində Hacı Qalibdən nənəsinin adına verdiyi sənədin kötüyünü tələb etdilər, yalandan yazırlar ki, Bilgəh Bələdiyyəsində yanğın olub, arxiv yanıb. Saxtakarlığı bu şəkildə ört-basdır edirlər" - bu sözləri redaksiyamıza müraciət edən "POSAT" Bağ Tikinti Kooperativinin sədri Yusif Nağıyev deyib.
Y. Nağıyevin sözlərinə görə, kooperativin 28 üzvü sabiq deputat Hacı Qalib Salahzadənin onlara aid 4 hektar torpaq sahəsini zəbt etməsindən şikayətçidirlər:
"Hacı Qalib Salahzadə nənəsi Kübra Camalovanın adına Bilgəh bələdiyyəsinin sənədini 2005-ci ildə çıxarıb və bizə məxsus 4 hektar ərazini də digər 1.3 hektar torpağa qataraq hasarlamaqla zəbt edib. Halbuki həmin bağ torpaq sahəsi 5 hektar olmaqla Bakı Şəhər Xalq Deputatları Sovetinin İcrayə Komitəsinin (XDS İK) 7 may 1976-cı il tarixli 25/247 nömrəli qərarı ilə keçmiş Azərbaycan SSR Tikinti Nazirliyinə ayrılıb. Bakı Şəhər XDS İK-nın 15 fevral 1989-cu il tarixli 1/14 nömrəli qərarı ilə həmin ərazinin 4 hektarı kooperativ bağların tikintisi üçün ayrılıb. Tikinti Nazirliyinin tabeliyindəki "Tikintiavtonəqliyyat" İstehsalat Birliyinin nəzdində həmin idarənin qısaldılmış abreviaturasını əks etdirən "POSAT" (Производственное Обьядинение СтройАвтоТранспорт) Bağ Tikinti Kooperativi təsis edilib və keçmiş Şaumyan (indiki Xətai rayonu) rayon XDS IK-nın 27 oktyabr 1989-cu il tarixli 81/58 nömrəli qərarı ilə həmin Kooperativ qeydiyyatdan keçib. Hacı Qalib Salahzadə ərazinin kooperativə məxsus olduğunu bildiyi halda ərazini zəbt edib. Bu gün həmin ərazi oğlu Əliabbas Salahzadənin adınadır. Cibində deputat mandatı gəzdirən Əliabbas Salahzadənin atası tərəfindən zəbt olunmuş kooperativə məxsus bağ torpaq sahəsinin adına keçirilməsi də əslində kriminaldır. Əliabbas Salahzadə gec-tez bu qanunsuzluğa görə Azərbaycan hüquq-mühafizə orqanları qarşısında cavab verməli olacaq".
"POSAT" BTK üzvləri Musavat.com-a deyiblər ki, kooperativə məxsus 4 hektar bağ torpaq sahəsinin qanunsuz olaraq zəbt olunması ilə bağlı qalaq-qalaq məhkəmə qətnamələri, qərarları var. Amma Azərbaycan dövləti adından verilən qərarlar icra olunmur, 15 ildən çoxdur ki, kooperativ üzvləri torpaq sahələrinə yaxın düşə bilmirlər:
"Bu qədər göz önündə olan saxtakarlığı dövlət qurumları görmək istəmirlər. Bizə məxsus 4 hektar torpaq sahəsini və əlavə olaraq 1,3 hektar qonşu torpaq sahəsini həyətyanı torpaq sahəsi kimi Hacı Qalib Salahzadə nənəsi Kübra Camalovanın adına özəlləşdirib və sonradan oğlu Əliabbas Salahzadənin adına rəsmiləşdirib. Bu, absurd və qanuna tüpürməkdir. Çünki bələdiyyə sədrinin verdiyi sənədlərin saxtalığına və qanunsuzluğuna əmin olmaq üçün nə ekspert lazımdır, nə də məhkəmə hakimi. Vaxtilə Bilgəh bələdiyyəsinin sədri olan Fazil Rüstəmovun imzası var. Vəfat etmiş adamın adına torpaq sahəsində kadastr almamış BTİ çıxarış verib. Üzvləri olduğumuz "POSAT" Bağ Tikinti Kooperativinə 4 hektar torpaq sahəsi 1989-cu ildə ayrılıb".
Kooperativ sədri Yusif Nağıyev deyib ki, müstəqillik dövründə 4 hektar sahəni təkrar qeydiyyatdan keçiriblər:
"Bütün sənədlərimiz yerli-yerində var. Vergilər Nazirliyində təkrar qeydiyyatdan keçirmişik, Torpaq və Xəritəçəkmə Komitəsindən kadastr almışıq. Sonradan bizə məlum olub ki, DƏDRX-nin Bakı şəhər Ərazi İdarəsi tərəfindən qeyri-qanuni olaraq, həmin torpaq sahəsinə 2010-cu ildə vəfat etmiş, mərhum Camalova Kübra Mirəbdül Hüseyn qızının adına xüsusi mülkiyyətdə olmasına dair 02.10.2013-cü il tarixdə RX seriyalı 0272020 saylı çıxarış verilib. Qalib Salahzadə nənəsinin adına olan torpağı vərəsəlik qaydasında oğlu Əliabbas Salahzadənin adına keçirib".
Yusif Nağıyevin sözlərinə görə, bundan sonra Qalib Salahzadə onların torpağa aid sənədlərini ləğv etdirmək üçün məhkəməyə müraciət edib. Lakin ilkin, apellyasiya və Ali Məhkəmə iddianın qanunsuz və əsassız olduğunu nəzərə almaqla rədd edib:
"Bunu görən Qalib Salahzadə öz imkanlarından istifadə edərək, 2016-cı ildə yenidən Bakı Şəhər İcra Hakimiyyəti vasitəsilə Bakı şəhər Xalq Deputatları Soveti İcraiyyə Komitəsinin 15.02.1989-cu il tarixli qərarının etibarsızlığına dair ikinci dəfə sərəncam qəbul etdirdi və biz yenidən həmin sərəncamı mübahisələndirmək məcburiyyətində qaldıq. Bu dəfə də məhkəmələrimiz ədalətli mövqe nümayiş etdirdi. Bakı Şəhər İcra Hakimiyyətinin sərəncamının ləğv edilməsinə dair iddiamız təmin olundu. Həmin qərar qanuni qüvvəsini aldıqdan sonra Bilgəh bələdiyyəsinə qarşı digər mübahisəmiz üzrə icraat təzələnərək, iş davam etdirildi. Məhkəmə icraatı təzələndikdə iş materiallarına əlavə edilmiş sənədlərdən müəyyən edildi ki, Qalib Salahzadə bizim başımızı digər məhkəmə çəkişmələrinə qatdığı müddətdə bizə ayrılmış torpaq sahəsinin bir hissəsini digər qohum-əqrəbasının adına rəsmiləşdirib.
Məhkəmə araşdırması zamanı alınmış sorğulardan da mübahisələndirdiyimiz qərarın nə bələdiyyənin arxivində, nə də ki, Milli Arxiv İdarəsində olmadığı müəyyən olundu. Yəni cinayət faktı aşkar edildi. 2 saylı Bakı İnzibati İqtisadi Məhkəməsi 2018-ci ildə Bilgəh bələdiyyəsinin “vətəndaş Camalova Kübra Mirəbdül Hüseyn qızına fərdi yaşayış evinin tikintisi üçün 5,3 ha torpaq sahəsi ayrılması barədə” 22.11.2005-ci il tarixli, 041 saylı qərarının bizə ayrılmış 4,0 ha torpaq sahəsinin hüdudları daxilində etibarsızlığının tanınmasına və həmin qərarın hüquqi nəticələrinin qanunsuz sayılmasına dair qərar qəbul edib. Bundan sonra Qalib Salahzadə artıq çıxılmaz vəziyyətdə olduğunu gördüyündən, yenidən özünün və qanunvericiliyin yol verdiyi prosessual imkanlardan istifadə edir, bu dəfə artıq torpaq sahələrini adlarına rəsmiləşdirdiyi qohumlarının və onun təsiri altında olan Bilgəh bələdiyyəsinin adından müxtəlif əsassız şikayətlər, ərizələr və sairə xahişlər verərək məhkəmə baxışını, məhkəmə qərarlarının qanuni qüvvəyə minməsini yubatmağa çalışır".
Yusif Nağıyev ölkə rəhbərliyinə, Məhkəmə-Hüquq Şurasının sədri İnam Kərimova müraciət edərək Bakı Apellyasiya Məhkəməsində Qalib Salahzadənin təsiri altında veriləcək qanunsuz qərarın durdurulmasını xahiş edib.
Azərbaycanın elm və təhsil naziri Emin Əmirullayev Saakaşvili kimi islahatçı görünüb, Şverdandze kimi idarə edir. Rüşvət bataqlığına gömülmüş Azərbaycan təhsili həqiqətən can verir və deqradasiyaya uğrayıb. Artıq birmənalı şəkildə hamı həzm etməyə başlayıb ki, məktəb təhsil vermir, ora hər gün getmək formal xarakter daşıyır, uşaqların taleyi repetitorlar, kurslar sayəsində həll olunur. Bəs məktəb vermədiyi təhsilin qarşılığında nə alır? - rüşvət, fond pulu yığımı, 5 oktyabr və 8 mart bazarlığı...
Bəli, doğurdan da məktəb çoxdan təhsil vermir. Bizim uşaqlar məktəbdənkənar tədrisin hesabına ali təhsil ocaqlarına qəbul olunurlar. Çox uzağa niyə gedirik, sosial şəbəkələrdə videosu durmadan paylaşılan şagirdi yada salaq: məlum olur ki, Bakıda yerləşən 4 saylı Xankəndi məktəbinin uşaqları axşam 8-də evə gedirlər. Demə, yer yoxdur və üç növbəli təhsil rejimi mövcuddur. Acınacaqlıdır. Xəcalət çəkməli haldır.
Yaxud Baku TV-nin məktəblərin önündə keçirdiyi sorğunu qeyd edək: məktəblilər də, valideynlər də təsdiq edirlər ki, bəli, 5 oktyabrda 20-50 manat civarında Müəllimlər Günü pulu yığılıb. Yaxşı ki, direktorların evlilik günü, müəllimlərin xınayaxdı günü kimi "əlamətdar" tarixlər də xatırlanıb pul yığılmır.
Ancaq əmin olun ki, azca vəziyyət kontroldan çıxarsa, utanmadan o adlarla da pul yığarlar, direktorlar qızlarına cehiz də düzəldərlər.
Di gəl, bu iki fakt - həm məktəblinin axşam 8-də evə getdiklərini deməsi, həm pul yığılmasının dilə gətirilməsi qarşılığında ötən həftə, elə oktyabrın 5-i çıxış edən nazir Əmirullayev elə danışdı ki, "Tarixi-Nadir" i oxumuş adamlar başa düşmədi, bu binəvalar nə dediyini necə anlasın. Nazirin rabitəsiz, anlaşılmaz cümlələri ilə nə söyləmək istədiyi aydın olmadı. Hətta bir sosial media istifadəçisi olan xanım video paylaşım edərək nazirin redaktora ehtiyacı olduğunu açıqladı, onu güzgü qarşısında çıxışa hazırlaşmağa dəvət etdi. Həqiqətən də sanki danışan elm, təhsil adamı deyildi. Əmirullayev elə cümlələr qurdu ki, heç bir ana dili müəlliməsi onu izah edə bilməz.
Yəni təhsilin problemləri, təhsildə eybəcərliklər qaldı bir kənarda, nazir nələrsə danışmaq istədi. Lakin reallıq tragikdir - ilbəil təhsilimiz geriləyir, ilbəil məktəblər həyatımızda yalnız bazar rolu oynayır, ilbəil təhsilin keyfiyyəti məktəblərdə aşağı düşür və getdikcə məktəblər heç bir əhəmiyyət kəsb etmirlər. Madam ki, əksər uşaqlar ev tapşırıqlarını hazırlıq müəllimi ilə edir, tələbə adını almaq üçün gecə-gündüz dərsdən kənar hazırlaşır, o halda 11 il bu məktəb uşağa nə verib? Amma dəqiqliklə demək olar ki, o uşaqdan çox şey alıb, onun valideynindən də...
Bu baxımdan biz Əmirullayevin nazir olduğu dövrdə hər hansı arzuolunan nəticə əldə edə bilmədik. Ona görə də bu gün Azərbaycan təhsili supermarketə oxşayır.
Yaxşı, media bu sahəni dərindən bilməyə və yanıla bilər, bəs,
VI çağırış deputat olmuş təhsil eksperti Etibar Əliyevin tənqidlərinə nə deyə bilərsiniz? Əslində, Əmirullayev təhsil siyasətini dəyişəcək iradəyə malik olmadığını qəbul edir, etiraf etmir. Nazir məktəblərdə nə baş verdiyini çılpaqlığı ilə görür, dəyişməyə sanki gücü çatmır. Çünki bir zəncirvari rüşvət sistemi formalaşıb, onun bir zəncirini belə qıra bilməyib. Odur ki, təməli necə qoyulubsa, elə də gedir.
Elə son prosesləri götürək: xəbərlərsən biri odur ki, Biləsuvar rayonu R.Şirinov adına Təzəkənd kənd tam orta məktəbin direktorunun müəllimlərdən dərs saatlarına görə rüşvət alması barədə sosial şəbəkələrdə məlumat yayılıb. Ümumiyyətlə, ümumtəhsil məktəblərində hazırda 150 minə yaxın müəllim işləyir və 1 milyon yarıma qədər şagird təhsil alır. Ölkədə 4447 ümumtəhsil məktəbi, lisey, gimnaziya, sağlamlıq imkanları məhdud olanlar üçün fəaliyyət göstərən təhsil müəssisələri var. Bu gün əksər məktəblərdə rüşvətxorluq olduğunu demək mümkündür.
Rüşvətə səbəb ilk növbədə əməkhaqqının aşağı olmasıdır. Bu gün diaqnostik qiymətləndirmədən (DQ) keçmiş, hələ əməkhaqqı qalxmamış yüzlərlə müəllim var. Elə məktəblər də var ki, məktəb direktorları 210 manat vəzifə maaşı alırlar. Eləcə də DQ-dən keçmiş, əməkhaqqı qalxmış müəllimlər ölkə prezidentinin 994 nömrəli sərəncamı ilə 18-ci dərəcəli əməkhaqqı alırlar ki, bu da təqribən 425 manat edir. Məsələ burasındadır ki, hazırda məktəb direktoru və direktor müavinlərinin əməkhaqqı həddindən artıq aşağıdır.
Digər bir tərəfdən isə rayon təhsil şöbələrinin birbaşa İcra hakimiyyəti başçılarının nəzarəti altında olması da neqativ hallara yol açır, bu da öz növbəsində təhsildə rüşvətə yol açan səbəblərdən daha biridir. Belə olduğu halda artıq cəzasızlığın hökm sürdüyünü görən məktəb direktorları, eləcə də direktor müavinləri işlərinə davam edirlər. O səbəbdən də qanqrena verən təhsil sistemindəki o yanaşmanı kəsib atmaq və ciddi nəzarət mexanizmi qurmaq lazımdır. Ancaq bu da azdır, təhsilin səviyyəsi artmalıdır, təhsilə və şagirdə sevgi olmalıdır, pula yox...
Azər Talıbov
AnaXeber.info