 |
|
|
İki şirkətə satılan ərazi qalmaqalı: “Siz heç bilirsiniz bunu kim tikir?
Xəbər verdiyimiz kimi, Nərimanov Rayon İcra Hakimiyyəti Təbriz, Həsənoğlu və A.M.Cümə küçələrinin kəsişməsində yerləşən torpaq sahəsini eyni anda iki şirkətə satdığı iddia olunur. Ərazinin daha əvvəl satıldığı "Star City Construction" MMC şirkəti bununla bağlı Nərimanov Rayon İcra Hakimiyyətinə qarşı məhkəmə iddiası qaldırıb. Məhkəmə şirkətin lehinə qərar çıxarsa da, icra hakimiyyəti məhkəmə qərarını icra etməyib. Hazırda bu ərazidə torpağı sonradan alan “Ailə Park” MTK tərəfindən tikinti işləri aparılır.
Məsələ ilə bağlı sözügedən əraziyə yollanaraq vəziyyəti yerində müşahidə etdik. İnşa olunan binaların böyük əksəriyyəti yaşayış üçün tam hazır vəziyyətdədir. Hətta tikilinin aşağı mərtəbələrində iaşə obyektləri və mağazalar da fəaliyyət göstərir. Bununla yanaşı, ərazidə daha bir neçə binanın inşası üçün söküntü işləri aparılır.
Ərazidə görülən işlər açıq-aşkar fəallığın və planlı inşaat prosesinin getdiyini göstərir. Sahədə fəhlələr işləyir, texnikalar hərəkətdədir. Hər şey sanki bu ərazidə hər hansı bir mübahisə və ya problem yoxmuş kimi davam edir. Binaların hər biri də torpağı sonradan alan “Ailə Park” MTK tərəfindən inşa edilib.
Ərazini ilk aldıqlarını iddia edən "Star City Construction" şirkəti isə hüquqlarının pozulduğunu bildirir. Onların bildirdiyinə görə, torpaq sahəsini illər əvvəl rəsmi sənədlərlə alıblar və hazırda həmin ərazidə gedən tikinti işləri qanunsuzdur. Şirkət ya həmin torpaq sahəsinin geri qaytarılmasını, ya da bərabər dəyərdə başqa bir ərazinin verilməsini tələb edir.
"Star City Construction" MMC şirkətinin hüquqşünası Etibar Paşayev də mübahisəli ərazidə idi. O bizimlə söhbətində xatırlatdı ki, Bakı Şəhər Nərimanov Rayon İcra Hakimiyyəti Başçısının 296 saylı, 16 iyul 2018-ci il tarixli" çoxmərtəbəli yaşayış binalarının layihələndirilməsi haqqında" sərəncamı ilə ərazidə yerləşən 4,44 ha torpaq sahəsi şirkətin daimi istifadəsinə verilib. Lakin sonra məlum olub ki, eyni torpaq sahəsi "Ailə Park" MTK adlı şirkətə də ayrılıb:
“Ərazidə tikinti işlərinə başladıqdan sonra məlum oldu ki, həmin torpaq sahəsi daha sonra başqa bir şirkətə də satılıb. İkinci satış 2020-ci ildə, bizim müqaviləmizdən təxminən iki il sonra baş tutub. Bu satış barədə bizə nə əvvəlcədən bildiriş verildi, nə də sonradan hər hansı xəbərdarlıq edildi. Hətta bir neçə müştəri ilə müqavilə bağlayıb evlərin satışına başlamışdıq. Məsələ ilə bağlı məhkəməyə müraciət etdik və qərar bizim xeyrimizə oldu. Ancaq qanuni qüvvəyə minmiş bu qərar bu günə qədər icra olunmur. Hətta Azərbaycan Respublikası Prezidentinin Administrasiyası tərəfindən verilmiş tapşırıqlar da yerinə yetirilmir.”
Hüquqi nümayəndənin sözlərinə görə, şirkət hazırda nəinki tikinti işlərini davam etdirə bilmir, həm də daha əvvəl ev alan müştərilərlə ciddi problemlər yaşayır:
“Hətta bizdən ev alan şəxslərə müqaviləni pozmaları üçün “Ailə Park” MTK tərəfindən təzyiqlər də olundu. Hazırda şirkətimizlə müqavilə bağlayıb ev almağı gözləyən insanlar var. Biz sonda alternativ olaraq tələb etdik ki, heç olmasa bizə başqa bir ərazidə torpaq sahəsi ayrılsın. Bu təklifi də müsbət cavablandırmadılar. Nərimanov Rayon İcra Hakimiyyəti isə dəfələrlə etdiyimiz müraciətlərə cavab vermir. Haqqımız olanı tələb edirik. Məhkəmə qərarı icra olunmalıdır”.
Mövqelərini öyrənmək üçün “Ailə Park” MTK-nın nümayəndələrinə yaxınlaşdıq. Onlar bizə bu məsələ ilə bağlı məlumatlarının olmadığını bildirdilər:
“Siz heç bilirsiniz bunu kim tikir? Burada özbaşına bir daş belə qoya bilmərik. Bu, dövlət səviyyəsində olan layihədir. Bu məsələyə başqa heç kim qarışa bilməz. Biz artıq bir neçə binanı tikib tamamlamışıq. Hazırda da digər tikililər üçün də işlər davam edir. Digər şirkətin iddiaları ilə bağlı məlumatımız yoxdur”.
Hətta "Sizin başqa işiniz-gücünüz yoxdur gəlmisiz bura?" deyib işimizi də öyrətməyə çalışdılar.
Məsələdə ən çox adı çəkilən tərəf olan Nərimanov Rayon İcra Hakimiyyəti ilə dəfələrlə əlaqə saxlamağa cəhd etdik. Zənglərimiz cavabsız qaldı, elektron məktublarımıza isə heç bir reaksiya verilmədi. Tərəflərin mövqeyini təqdim etməyə hazırıq.
"Direktor Ülviyyə Aslanova sinfin bağlanmaması üçün valideynlərdən pul tələb edir. Etiraz edən valideynləri hədələyir".
TEREF Xəzər TV-yə istinadən xəbər verir ki, bu iddiaları Bakının Sabunçu rayonu, 170 saylı orta məktəbin 2 d sinfinin valideynləri səsləndiriblər.
Valideynlər bildiriblər ki, məktəb rəhbərliyi üzrlü səbəbdən kiçik summativ qiymətləndirmə (KSQ) yazmayan şagirdlərin yenidən KSQ yazması üçün də eyni addımı atmaqdan çəkinmir.
İddialara görə, direktorun sinif rəhbəri ilə münasibəti yaxşı olmadığı üçün 2 d sinfinin həm şagirdlərini, həm də valideynlərini cəzalandırır.
Valideynlər problemin həlli üçün müvafiq qurumlara müraciət də ediblər.
Məsələ ilə bağlı 170 nömrəli tam orta məktəbdən bildirilib ki, 2 d sinfində 3 şagird fevral ayından etibarən təhsildən yayınır. II yarımil ərzində şagirdlər dərsə gəlmədiyi üçün heç bir KSQ-də də iştirak etməyib və qiymətləndirilməyiblər.
Uşaqların davamiyyət problemlərinə görə dəfələrlə valideynlərinə xəbərdarlıq olunub. Uşaqların təhsildən yayındırılmasının qarşısının alınması üçün Sabunçu Rayon İcra Hakimiyyətinin Yetkinlik yaşına çatmayanlarla iş komissiyasına və Sabunçu Rayon Polis İdarəsinə rəsmi məktub göndərilib.
Həmçinin məktəb rəhbərliyi və icra nümayəndəliyi tərəfindən məsələ ilə bağlı valideynlərlə evlərində də görüş zamanı müvafiq söhbət aparılıb. Digər iddialar əsassız və böhtan xarakterlidir.
Bakı Şəhər Təhsil İdarəsindən isə bildirilib ki, qeyd edilən məsələ ilə bağlı araşdırma aparılacaq. Nəticəsi barədə ictimaiyyətə məlumat veriləcək.
Ətraflı süjetdə:
“Bir direktorun 22 ilə yaxın bir məktəbdə kök atıb oturması nədən xəbər verə bilər?”
Son vaxtlar təhsil müəssisələində baş verən neqativ proseslər cəmiyyətdə haqlı narazılıqlar yaradır. Bugünlərdə İlkxeber.org-un redaksiyasına ünvanlanan şikayət məktubunda da 62 saylı məktəb-liseydə baş verənlər haqda bəhs olunur. Həmin məktubda qeyd olunanların qısa məzmununu oxucularımızın diqqətinə çatdırırıq.
Beləliklə, şikayət məktubunda iddia olunur ki, məktəbdə yol verilən qanunsuzluqlarla bağlı Elm və Təhsil Nazirliyinə edilən çoxsaylı şikayətlərimizin yuxarı instansiyalara çatmaması üçün məktəbin direktoru Mətanət Cabbarlıya geri qaytarılır. “Bir direktorun 22 ilə yaxın bir məktəbdə kök atıb oturması nədən xəbər verə bilər?”-deyə şikayət məktubunda bildirilir.
Daha sonra iddia olunur ki, məktəbə gələn və ya gələcəyi gözlənilən yoxlamalar barədə direktor əvvəlcədən məlumatlı olur və buna uyğun olaraq hazırlıq görür: “Məktəbdə boş yer olmadığı halda şagirdlərin elektron sistemdə əlaqəli şəxs vasitəsilə 500 manat müqabilində qəbul edilir. Şagirdlərin şəxsi işlərinə baxılır və valideynlərinin iş statusuna əsasən daim daha çox rüşvət verən müəllimlərin siniflərinə yerləşdirilməsi həyata keçirilir. Məsələn, 66 yaşında olan bir müəllimin bu qədər şagirdə effektiv dərs deməsi real görünmür. Yoxlama gələn zaman isə bu şagirdlər müvəqqəti olaraq digər siniflərə göndərilir. Elm və Təhsil Nazirliyi bu vəziyyəti sistem üzərindən asanlıqla yoxlaya bilər. Sistemdə manipulyasiya edərək, müəllimlərə "şagird gəlmir" deyə 19 və ya daha az sayda şagird göstərilir və buna əsasən ibtidai sinif müəllimlərinə siniflərin 1500-2000 manat müqabilində verilməsi həyata keçirilir. İbtidai siniflərdə dərsdən sonra hazırlığın keçirilməsinə görə müəllimlərdən şagirdə görə 20 manat alınır. Məktəbdə yığılan vəsait hesabına direktorun özü tərəfindən yaradılmış klublar, dərnəklər və kurslara, həmçinin digər şəxslərlə əlbir olaraq təşkil olunan idman zallarına şagirdlər məcburi şəkildə göndərilir. Sözügedən dərnəklər isə 3-cü şəxslərin adına rəsmiləşdirilərək fəaliyyət göstərir. Bunlara misal olaraq aşağıdakı qurumları göstərmək olar: Empati Education Center, Açar Xüsusi Qayğı Mərkəzi, Açar Tədris Mərkəzi, Empati Kid Center. Demək olar ki, hər il bütün yaş qrupları üzrə siniflərdə “venetka” (buraxılış albomu) çəkilir və hər şagirddən ödəniş alınmaqla yanaşı, şəkil çəkən şirkətdən də əlavə rüşvət tələb olunur. “Qırmızı Xaç” Cəmiyyəti adı altında məktəb müəllimləri və şagirdlərindən uşaq bezləri toplanaraq, sonradan direktorun nəzarətində olan şəxsi dərnəklərə daşınır. İbtidai sinifdən yuxarı sinfə keçid zamanı lisey bölməsinə daxil olmaq üçün nəticələri zəif olan şagirdlərin valideynlərindən 300–500 manat məbləğində ödəniş tələb edilir. İbtidai siniflərdə direktora daha yaxın olan (yəni daha çox “hörmət edən”) müəllimlər tərəfindən testlər hazırlanır. Daha sonra ümumi test imtahanı keçirilir və təbii olaraq, testi hazırlayan müəllimlərin şagirdləri daha yüksək nəticə göstərirlər. Bu prosesdən sonra zəif nəticə göstərən şagirdlərin müəllimlərinə müxtəlif formalarda təzyiq göstərilir. Nəticədə həmin müəllimlər bayramlar zamanı bu təzyiqlərdən qurtulmaq üçün direktora daha çox pul verməyə məcbur qalırlar. Yuxarı sinif şagirdlərinin hazırlıq kurslarına getmək səbəbilə dərs buraxmalarına görə valideynlərdən 1000–2000 manat arası ödəniş tələb olunur. Təxminən 100 şagirddən 40 nəfərinin bu ödənişi etdiyi nəzərə alınsa, ümumi məbləğ minimum 40,000 manat təşkil edir. Məktəbdə çalışan 100-ə yaxın müəllimdən bütün bayramlar və direktorun ad günü münasibətilə 150–300 manat arası məbləğdə pul toplanır (məbləğ müəllimin dərs saatı və hazırladığı şagirdlərin sayına görə dəyişir). Bu proses nəticəsində ildə təxminən 150,000 manat məbləğində vəsait toplanır (8 mart, Yeni il, Direktorun ad günü, Müəllimlər günü və s.). Yuxarı sinif müəllimlərinin aylıq dərs yükü 20 saat olduğu halda, əlavə dərs saatları üçün ödəniş tələb olunur - 2 əlavə saat üçün 500 manat, 4 saat üçün isə 1000 manat ödənilməsi tələb edilir. Direktorun ad günü yay aylarında olsa da, həmin tarix süni şəkildə may ayına keçirilir və bu bəhanə ilə əlavə hədiyyə və pul yığılır. 15 may 2025-ci il tarixində məktəbin kamerasına baxsanız biz müəllimlərin təbrik üçün əlində pul direktorun otağının qabağında dayandığı açıq aydın görəcəksiniz. Böyük və ya kiçik otaqların müəllimlər arasında pulla bölüşdürülməsi və otağın ölçüsünə görə tələb olunan məbləğ 500–1000 manat arasında dəyişir. Pensiya yaşına çatmış müəllimlərlə hər tədris ili üçün 2000–3000 manat qarşılığında müqavilələrin uzadılması həyata keçirilir. Bu praktika 2025–2026 tədris ilində də davam edir. Yay tətili zamanı müəllimlər üçün nəzərdə tutulan iş günlərində, müəllimlərdən hər gün üçün 10–20 manat arasında ödəniş yığılır və bunun qarşılığında onlar işə gəlmirlər. Məktəbdə şagirdlərə əlavə kitab, jurnal və gündəliyin satılması. Rüşvət və direktorun özbaşınalıqları səbəbindən məktəbdən bir neçə kişi müəllim işdən ayrılmışdır. Pul verməyən müəllimlərin iclaslarda təhqir edilməsi halları yayılmış bir haldır. Yay tətilinə görə təmir pulunun yenidən 150 manatdan yığıması 2025-2026-cı tədris ili üçün hazırda davam etməkdədir. Son zəng barəsində isə yazmağı məsləhət bilmədik, artıq hər şey məlumdur”.
İlkxeber.org
Son aylarda bir sıra məktəb direktorlarının qanunsuz fəaliyyəti ifşa olunub, bəziləri işdən azad edilib. Bu xüsusda Elm və Təhsil nazirliyinin neqativ hallara operativ reaksiyası təqdir edilməlidir.
Ancaq təhsil sistemində hesabatlılıq, şəffaflıq və ictimai nəzarətin olmaması ilə bağlı narahatlıqlar artmaqdadır. Bakı məktəblərinə rəhbərlik edən direktorların fəaliyyəti, vəzifədə qalma müddəti və bu vəzifələrə hansı yollarla gəldikləri cəmiyyətin əsas müzakirə mövzusuna çevrilib.
Editor.az xəbər verir ki, bu kontekstdə xüsusi diqqət çəkən nümunələrdən biri Bakı şəhəri, Nərimanov rayonu 47 saylı məktəbin direktoru Aytən Bağırovadır. O, 1998-ci ildən etibarən artıq 28 ildir ki, eyni məktəbə rəhbərlik edir.
Bu qədər uzun müddət dəyişmədən direktor vəzifəsində qalmaq cəmiyyətdə ciddi suallar doğurur: Aytən Bağırovanı bu kresloda bu qədər müddət saxlayan hansı güclərdir? Onun toxunulmazlığını təmin edən kimlərdir?
Daha maraqlısı isə odur ki, bir məktəbdə 28 illik rəhbərlik tarixçəsinə malik bir şəxsin fəaliyyəti barədə nə mediada, nə də rəsmi mənbələrdə demək olar ki, ciddi, təsirli bir xəbərə, hətta yeni bir fotoya rast gəlmək mümkün deyil. Bununla bağlı internet üzərindən aparılan kiçik bir araşdırma dediklərimizi təsdiq edir.
Aytən Bağırova sanki ictimaiyyət üçün “görünməz direktor”a çevrilib. Bu qədər mühüm vəzifə daşıyan bir şəxsin bu səviyyədə qapalı qalması, ictimai hesabatlılığın olmaması ciddi narahatlıq doğurur.
Bir müddət əvvəl məktəbin müəllimlərindən biri Təranə Mərdanova mətbuata verdiyi açıqlamada bildirib ki, direktor Aytən Bağırova məktəbi şəxsi obyektinə çevirib. Onun sözlərinə görə, direktorla bağlı etdiyi şikayətlər yuxarı instansiyalarda cavabsız qalır. Bu faktlar onu göstərir ki, məsələ təkcə uzun müddət kresloda qalmaqla bitmir – burada həm də himayədarlıq, məsuliyyətsizlik və cəzasızlıq mühiti mövcuddur.
Əgər ölkədə direktorlar vaxtaşırı monitorinqdən keçirsə, fəaliyyətləri qiymətləndirilirsə və nəticəyə əsasən rotasiyalar həyata keçirilirsə, bu qədər müddət eyni vəzifədə qalan şəxslər necə və niyə dəyişməz qalır?
Yoxsa bəzi direktorlar üçün bu sistem işləmirmi?
Təhsil cəmiyyətin təməlidir. Bu təməlin üzərində şəxsi maraqlar yox, peşəkarlıq, cavabdehlik və şəffaflıq dayanmalıdır. Əks halda, təhsil müəssisələri şəxsi təsir dairəsinə çevrilir və bu da nə müəllimlərə, nə valideynlərə, nə də şagirdlərə xidmət edir.
Cərrah-həkim deyir ki, ailələr iddia qaldırmalı, məsələ araşdırılmalıdır
Bakıda qeysəriyyə əməliyyatı daha bir gənc ananın həyatına son qoyub. Mayın 6-da 3-cü uşağını bu üsulla dünyaya gətirən 33 yaşlı Günay Məmmədova 13 gün komada qaldıqdan sonra vəfat edib. Ailəsi qadının ölümündə həkim səhlənkarlığının olduğunu bildirir.
Bu barədə Xəzər TV-yə mərhumun anası danışıb: “Körpə uşaqdır ikisi də, heç biri qalmır. Gecələri də yatmırlar. "Anam hanı, nənə? Anam niyə gəlmir?", - deyə soruşurlar".
Valideynin sözlərinə görə, qeysəriyyə əməliyyatı Yeni Klinikada uzman cərrah mama-ginekoloq Sevinc Məmmədova tərəfindən həyata keçirilib. Xəstə doğuşdan sonra palataya yerləşdirilib. G.Məmmədovanın anasının dediyinə görə, qızında əməliyyatdan sonra qanaxma baş verib, həkimlər isə bundan gec xəbər tutublar: “Neçə dəfə UZİ-yə gedib, poliklinikada olub. Sapsağlam idi. Qızımı əməliyyat edəndən sonra aparıb palataya yerləşdiriblər. O, palatada yox, reanimasiyada qalmalı idi, 5-10 dəqiqədən bir təzyiqi ölçülməli idi. Təzyiqi ölçülsəydi, nəzarətsiz palatada qalmasaydı, biləcəkdilər ki, təzyiq düşür, demək, nəsə normal deyil. Tamam təzyiqi düşüb, halı pis olub yıxılıb. Doğuşdan sonra qanaxma baş verib”.
Məsələ ilə əlaqədar TƏBİB-dən bildirilib ki, ölüm halları Tibbi Şura tərəfindən və TƏBİB-in müvafiq komissiyalarında ixtisaslı mütəxəssislərin iştirakı ilə araşdırılır. Ölüm hadisəsi ilə bağlı prokurorluqdan xəstəxanaya gəliblər, meyit yarılmağa göndərilib, hazırda ekspertizanın rəyi gözlənilir. G.Məmmədovanın 4 və 6 yaşlı daha iki oğlu var.
Təəssüf ki, bu kimi faciəvi hallar son vaxtlar artmaqdadır. Bəs səbəb nədir? Günahkarlardan cəzalanan varmı? Ümumiyyətlə, qeysəriyyə ilə bağlı seçimi daha çox həkimin istəyinə, yəni tibbi göstərişə bağlı olur, yoxsa pasiyentin istəyinə? Burada tibb personalının bir kommersiya marağı yoxdur ki? Nədən təbii doğuş dəbdən düşüb? Körpələrin yetim qalmasına görə, nəhayət, kimsə məsuliyyətə cəlb olunacaqmı?
Adil Qeybulla
Cərrah həkim, professor Adil Qeybulla mövzu ilə bağlı “Yeni Müsavat”a fikrini bölüşüb: “Doğuş prosesi zamanı ölüm hallarının olması, əlbəttə, üzücü haldır. Amma bir məsələ var: bəzən qeysəriyyə əməliyyatını istəyən xəstənin elə özü olur. Bunlar həkimləri məcbur edirlər. Bəziləri doğuşdan qorxur, bəziləri doğuşun fəsadlarından ehtiyat edir. Bəziləri də doğuş yollarının genişlənməsinin qarşısını almaq üçün, sonradan müxtəlif əməliyyatlara ehtiyac yaranmaması məqsədilə guya bunu edirlər. Yəni xəstələrin təşəbbüsü burada daha çoxdur. Əlbəttə, həkimlər xəstənin istəyinə yox, göstərişə diqqət yetirməlidirlər. Göstəriş nədirsə, o olmalıdır. Bir çox hallarda bu məqama diqqət edilmir.
Məsələn, çanağın darlığı varsa, ayaq gəlişidirsə, sarğı gəlişidirsə, bu zaman doğuş çətinləşə bilər, uşaqda asfiksiya (oksigen çatışmazlığı) yarana bilər. Bu halda qeysəriyyə kəsiyi ilə süni abdominal doğuş aparılmalıdır. Bu, əsaslandırılır, daha sonra isə xəstə əməliyyata götürülür. Məsələ bundan ibarətdir ki, biz çox vaxt bu prinsipi pozuruq.
Bu halın nədən baş verdiyinin araşdırılması üçün mütləq məhkəmə-tibbi ekspertizası aparılmalıdır. Xəstə qanaxmadanmı dünyasını dəyişib, yaxud da başqa bir özəl səbəb olub? Bəzən də görürsən ki, əməliyyat xaric, xəstədə hepatitlər olur, ağır böyrək çatışmazlığı olur. Bunlar da ölümə gətirib çıxara bilər. Əgər xəstənin valideynləri şikayətçidirsə, onlar mütləq meyitin təşrihinə nail olmalıdırlar. Səbəb müəyyən olunmalıdır. Ondan sonra artıq iddia qaldırmaq olar. Yoxsa sadəcə demək ki, ölüm həkim səhvindən olub - bu, abstrakt qalacaq. Bunun əsasında kiməsə ittiham irəli sürmək olmaz".
Mərhum Günay Məmmədovanın ailəsi hesab edir ki, həkimlər səhlənkarlıq edib. Əgər bu sübuta yetirilərsə, həkimlər Cinayət Məcəlləsinin 314-cü maddəsinə əsasən, vəzifə səhlənkarlığı ittihamı ilə məsuliyyətə cəlb edilə bilərlər. Amma praktika onu göstərir ki, Azərbaycanda həkim məsuliyyətə cəlb olunması hallarına nadir rast gəlinir. Əksər hallarda “ekspertiza nəticəsi gözlənilir” deyə işlər uzadılır və nəticədə ailələr ədalətə çata bilmir. Bu halların qarşısını almaq üçün ilk növbədə məcburi klinik protokollar tətbiq olunmalı, hər doğuş üçün tibbi göstərişlər və qərarların yazılı əsaslandırılması qanunla tələb edilməlidir. Tibb işçiləri və cəmiyyət təbii doğuşun əhəmiyyəti və təhlükəsizliyi barədə maarifləndirilməlidir. Hər bir ana ölümü hadisəsi müstəqil və şəffaf şəkildə araşdırılmalı, özəl və dövlət klinikalarında doğuşlar üzrə illik auditlər aparılmalı və nəticələr ictimaiyyətə açıqlanmalıdır. Ən əsası isə tibbi səhlənkarlıq sübuta yetirilərsə, məsul şəxslər müvafiq qaydada cəzalandırılmalıdır.
Bir qadının doğuş zamanı həyatını itirməsi, sadəcə, tibbi yox, həm də sosial fəlakətdir. Bu faciələr yalnız bir ailəni deyil, bütöv cəmiyyəti silkələyir. Təbii doğuşun dəbdən düşməsi, qeysəriyyə əməliyyatlarının normaya çevrilməsi və nəticədə baş verən ana ölümləri ciddi siqnal verməlidir.
Afaq MİRAYİQ,
“Yeni Müsavat”
DogruXeber.az: - Ötən gün Ağstafa rayonunun Köçəsgər kəndində yerləşən A.Ələkbərov adına 2 saylı tam orta məktəbdə 8-ci və 9-cu sinif şagirdləri arasında idman dərsi zamanı dava baş verib.
32gun.az-a hadisə yerində olan əməkdaşının bildirdiyinə görə, mübahisə zamanı şagirdlərdən birinin qolu sınıb.
2011-ci il təvəllüdlü məktəbli sol bazu sümüyünün yerdəyişmiş sınığı diaqnozu ilə xəstəxanaya yerləşdirilib və dərhal əməliyyat olunub. Vəziyyəti qənaətbəxş qiymətləndirilən şagird evə buraxılıb.
Məktəbin direktoru Şəfəq Süleymanovanın rəhbərlik etdiyi təhsil müəssisəsində baş verən hadisə ilə bağlı araşdırma aparılır. Məlumata görə, məktəb rəhbərliyi jurnalistlərin içəri daxil olmasına icazə vermir.
Azərbaycanda tender anlayışı formaldırmı? Yoxsa pulla danışanlar üçün sistemdə xüsusi yollar, görünməyən qapılar açılır? Təbii kifayət qədər ciddi sualdır. Biz aşağıdakı yazıda faktlarla sübut edəcəyik ki, maləsəf, hələ də dövlətimizin büdcə pulları kimlər üçünsə peşkəş edilməkdədir. Hələ də bəzi işbaz məmurlar var ki, dünənə qədər büdcəmizi sümürən dələduzları dövlət büdcəsinə şərik qoşur. Maləsəf bu faktdır və "DİA-AZ" olaraq aşağıda həmin faktlardan birini - Dövlət Su Ehtiyatları Agentliyində baş verməkdə olan TENDER KORRUPSİYASINI təqdim edəcəyik...
Beləliklə... Bu gün keçmiş "Azərsu" – ölkənin su və kanalizasiya infrastrukturuna cavabdeh olan dövlət qurumu – milyonlarla manatlıq layihələri tendersiz şəkildə bir şirkətə verir: "EREN" şirkəti... Bəli... yəqin ki bu şirkət sizlərə tanı gəldi. "Azərsu"nunun əvvəlki rəhbərliyi - Qorxmaz Hüseynovun vaxtında bu şirkətin kəsdiyi başa sorğu-sual yox nidi və sorğusuz-filansız "Azərsu" tenderləri bu şirkətə verilirdi. Çünki az qala ayrılan tender vəsaitinin 20 faizi geriyə "otkad" kimi Qorxmaz müəllimə qayıdırdı. Elə indi də elədir... Qorxmaz Hüseynov yoxdur... amma onun QORXMAZ "EREN" şirkəti var...
Tender keçirilmədən 20 milyon manatlıq layihələr
Son dövrlər 19-20 milyon manatlıq layihələrin tender keçirilmədən, birbaşa Eren şirkətinə verildiyi iddia olunur. Halbuki Azərbaycan bazarında qeydiyyatda olan yüzlərlə şirkət var ki, bu layihələr üzrə həm texniki imkanlara, həm də daha aşağı qiymət təklifinə malikdir.
Lakin onların sənədlərinə baxan belə olmur. Rəqabət sıfırlanır. Ədalət ikinci plana keçir. Və nəticədə – ictimai vəsaitlər yüksək qiymətlərlə xarici şirkətlərə ötürülür.
Köhnə rəhbərlik – köhnə əlaqələr
Məlumata görə, bir neçə il əvvəl "Azərsu"da keçmiş rəhbərlik dövründə "Eren" şirkəti ilə sıx əməkdaşlıq olub. Adları hallanan Qorxmaz və Elman adlı şəxslərin, "Eren" şirkətinə böyük layihələri tender olmadan ötürdüyü deyilir. Məlumata görə, "Eren" şirkəti aldığı pulların 20%-ni onlara geri “təqdim edirmiş. Bu, həmin şirkətin daxili çevrələrində etiraf edilmiş məlumatlar sırasındadır.
Yeni rəhbərlik, köhnə metod
Yenilənmiş rəhbərliklə yollar axtaran "Eren" şirkəti, son 2-ildə yenidən sistemə inteqrasiya olunmağı bacarıb. Və bu dəfə də nəticə dəyişməyib: yenə də bütün böyük layihələr yenidən "Eren"ə verilir.
Layihələrin siyahısı artıq gizli deyil
"DİA-AZ" olaraq araşdırmalarımız nəticəsində ortaya konkret dəlillər də çıxarmışıq. Məsələn, bu günə qədər "Eren" şirkətinin iştirak etmədən aldığı layihələrə aşağıdakılar daxildir:
• Zığ-Hövsan kanalizasiya kollektorü
• Müşfiqabad hövzəsi üzrə gətirici kollektor mikrotunel quyuları
• Xankəndi kollektoru
• Tərtər sol sahil kanalı
• Kəlbəcər infrastruktur layihəsi
və digərləri.
Bu layihələrin əksəriyyəti 50-100 milyon manat arasında dəyərə malikdir.
Sual açıq qalır: Eren kimdir və AXI NİYƏ?
"Eren" şirkətinin rəhbəri Eren Mollaoğlu bu gün Azərbaycanda tender sistemi ilə “öz dilində danışmağı bacaran” biri kimi tanınır. Tender olmadan layihə almaq, istədiyi işi götürmək, rəqibləri kənarlaşdırmaq onun üçün çətin deyil.
Bu vəziyyət yalnız yerli sahibkarların hüquqlarını pozmur, eyni zamanda xalqın büdcəsinin qeyri-şəffaf şəkildə istifadəsinə yol açır.
Hesabatlılıq və şəffaflıq haradadır?
"Azərsu" və digər dövlət qurumları üçün bu sual təkcə hüquqi deyil, həm də mənəvi məsuliyyətdir:
Niyə tenderlər real keçirilmir?
Niyə hər dəfə eyni şirkət qalib olur?
Niyə yerli şirkətlər rəqabətdən kənarlaşdırılır?
Və ən əsası: bu işlərdən kim qazanır? Xalqmı, yoxsa şəxsi maraqlarmı?
VƏ NƏHAYƏT...
Bu yazı bir iddia deyil, görünənlərin və eşidilənlərin səsidir.
Bu ölkədə ədalətli tender sistemi qurulmayınca, ictimai vəsait yalnız seçilmişlərin sərvətinə çevriləcək...
BU DA SON DEYİL...
Bizi izləyin və növbəti yazıda Eren Mollaoğlunun öz dilindən etirafları təqdim edəcəyik. Artıq "Azərsu" tenderlərinin hansı formada təşkil olunduğunu detal-detal biləcəksiniz...
Bizi izləməyə davam edin...
Əslində bu barədə çox yazılıb, çox danışılıb, çox eşidilib. Amma nədənsə bu danışılanlardan deyəsən, AYNA-nın (Azərbaycan Yerüstü Nəqliyyat Agentliyi) məsul şəxslərinin ya xəbəri olmur, ya da çıxardacaq nəticələri yoxdur. Yoxsa işi və məqsədi vətəndaşların rahat daşınmasına xidmət göstərmək olan bir qurum niyə vətəndaşlarına bu qədər laqeyid yanaşsın ki?!
Bu laqeyidlikdən də artıq saymazlıq və hörmətsizlikdir. Faktlarla danışacam və hətta qurumun 141 nömrəli qaynar xəttinə də müraciət etmişdim. Və əminəm ki, qeyd edəcəyim hal təkcə mənim başıma gəlməyib, bunu bir çox vətəndaş təsdiq edər. Söhbət sərnişin daşınma xidmətini həyata keçirən avtobuslardan gedir. Belə ki, avtobusların nizamsız və vaxtsız hərəkəti insanları xeyli narazı duruma gətirir. İntervalın düzgün təşkil olunmaması, yaxud marşurut xəttlərinin təsdiqində olan uyğunsuzluq ucbatından vətəndaşlar saatlarla yollarda avtobus gözləməli olurlar. Mənim qeyd etdiyim 11 nömrəli marşurut avtobusunda olan nizamsızlıq, əminəm ki, bir çox marşurut xəttlərində mövcuddur. Həzi Aslanov-28 May metro stansiyası və geriyə xətt üzrə hərəkət edən avtobusları yollarda gözləyən yüzlərlə hətta, minlərlə sərnişin görə bilərsiniz. Həm də saatlarla... Təsəvvür edin, saat 13:00-da dərsdən çıxan şagird, saat 14:00-a qədər dayanacaqda avtobus gözləməli olursa, hansı rahatlıqdan danışaq ay AYNA. Bu hal bir dəfə deyil, hər gün təkrarlanırsa, deməli sistemdə boşluq var. Buna əncam çəkmək o qədər çətindirmi? Axı bu qədər inkişaf etmiş ölkədə bu qədər cüzi problemlər olmamalıdır. Bu şəhərin gözəlliyi fonunda yorğun, əsəbi, gərgin insanların dayanacaqda saatlarla qalmasını görmək çox sarsıdıcıdır. O insanların rahatlığını əlindən almağa, narazı salmağa, əsəb yaşatmağa sizin ixtiyarınız çatmır, axı.
Ölkədə bütün qurumlarda qaynar xətt mövcuddur və ora edilən zənglərə demək olar hamısında dərhal reaksiya verildiyinin də şahidi olmuşuq. Yeganə qurum AYNA-dır ki, edilən müraciətin ağırlığından asılı olmayaraq, ən yaxşı halda 1 aya araşdırşlacağını deyib, vətəndaşı "yola verirlər”. Nəyi araşdırırsan, nəyi hesablayırsan, nə nəticə çıxardırsan ki? Hansısa avtobusun saat neçədə hansı dayanacaqdan keçdiyini bilirsən, hansı ərazilərdə vətəndaşların sıxlıq təşkil etdiyini də gözəl bilirsən. Səbəb nədir? Çox maraqlıdır. İnsanları narazı salmaqda, bezdirməkdə səbəb nədir? Bütün bunlara bir bəhanələri də var: Yollarda sıxlıqdı, avtobuslarda gecikmə baş verib. Bunun bəhanə olduğunu baxçadakı uşaq da bilir. Çünki şəhərin yollarında keçilməyən bir yol olduğunu az qala baxçadakı uşaqlara da öyrədirlər. O yol məktəb yolu deyil, o yol avtobus yoludur. Ki, ora daxil olmaq olmaz!!! Hə, daxil olacam deyirsənsə də 100 manat cəriməyə hazır olmalısan. O zaman suala cavab verin, hörmətli AYNA-dakılar: Avtobus yoluyla yalnız avtobuslar hərəkət edirsə hansı sıxlıqdan, hansı tıxacdan danışırsız?
Üstəlik, digər nəqliyyat vasitələrinin avtobus yoluna daxil olması qadağandırsa, niyə avtobuslar istədiyi vaxt kənar yollara daxil olub, qəza şəraiti və narahatlıq yaradır? Çox çətindirmi, bütün daşıyıcı şirkətlərə, marşurut xəttlərinin sahiblərinə qəti təlimat keçəsiniz ki, yalnız öz yolunuzla hərəkət edin, digər nəqliyyat vasitələrinin hərəkətinə maneə yaratmayın? Həqiqətənmi bunları görmürsüz, yaxud nəzarət edə bilmirsiz? Həqiqətənmi mənim yazdığım, sizin üçün xırda vətəndaşlar üçün böyük olan problemləri aradan qaldırmaq o qədər çətindir? Olmazmı ki, parklanma sisteminə etdiyiniz nəzarətin heç olmasa 5-10 faizin də avtobusların hərəkətinə ayırasız. İstənilən halda, onsuz da hər ikisindən qazanc əldə edirsiz. Demək məqsədiniz qazanc əldə etmək də deyil. İnsanları incitmək, narazı salmaq. Çünki hər ikisində vətəndaşların əsəblərini gərginləşdirdiyinizi çox gözəl bilirsiz.
Axı, əslində, hədəfiniz Azərbaycanın iqtisadi inkişaf potensialından yararlanaraq, vətəndaşlar üçün nəqliyyat sahəsində daha yaxşı, müasir, rahat, təhlükəsiz mühit yaratmaqdır. Üstəlik, qarşıdan isti ayların gəldiyini nəzərə alsaq, İnsanların günvurmadan əziyyət çəkməyinə səbəbkar olmayın.
Hədəfinizə çatmaq üçün amalınızı unutmayın!
Təmiz və gözəl pəncərədən baxmaq, hər şeyin gözəl olduğu anlamına gəlmir...
ORXAN ÜLVİ - "DİA-AZ"
Bir neçə gün öncə Ağdaş rayonunda təşkil olunan "Peşən sənsən” adlı festivalda iştirak edən Ağdaş rayon icra başçısı Orxan Hüseynzadə, festivalda qurulmuş stendlərə baxış keçirərək, peşə sahibləri ilə də söhbət edib. Lakin festivalda yaşanan bir məqam, diqqətləri üzərinə çəkib.
İcra başçısının, peşə sahibləri ilə söhbət etdiyi zaman bildirib ki, Ağdaşda bu cür peşə sahiblərinin olduğundan xəbərsiz olub. Daha sonra isə diqqət çəkici bir açıqlama verərək, saçını qırxdırmaq üçün Bakıya bərbərə gediyini qeyd edib.
Bu sözlər, xüsusən də icra başçılarının təyinatları zamanı ölkə başçısı tərəfindən qəbul edildiklərini və onlara xalqa xidmət etmələri üçün məsləhətlər verildiyini nəzərə alaraq, cəmiyyətdə böyük müzakirələrə səbəb olub. Bir çoxları, Orxan Hüseynzadənin bu açıqlamasının, yerli rəhbərlərin öz rayonlarına daha yaxın olma və yerli xidmətlərdən faydalanmağı düşünmələri gərəkdiyini vurğulayırlar.
Xalqın xidmətində olmaq və yerli problemləri birbaşa izləmək məqsədini daşıyan icra başçıları, belə açıqlamalarla cəmiyyətdə mənfi təəssürat yarada bilər. Cənab Orxan Hüseynzadənin bu açıqlamaları, artıq bölgə sakinlərinin və sosial şəbəkə istifadəçilərinin diqqətini cəlb edib.
"DİA-AZ"
Cəhri kənd sakini Zülfəli Hüseynovun iddiasına görə, 2022-ci ilin ortalarında kəndin yolunu genişləndirmək üçün onun hasarını söküb, həyətinin 30 sot ərazisini yola qatıblar. Bundan əlavə, həyətdəki 200 kv.m-lik yardımçı tikililəri də söküblər.
Yol çəkilişi Vasif Talıbovun zamanında başlayıb, “canişin”in zamanında tamamlanıb.
Zülfəli Hüseynov ona dəyən zərərin kompensasiya edilməsi üçün dəfələrlə “canişin” həzrətlərinin yanında olub. “Canişin” isə “Vasifin zibilini mən təmizləməli deyiləm” deyib onu yola salıb. Kənd sakininə məsləhət verib ki, zəhmət çəkib məhkəməyə müraciət etsin. Zülfəli hər ay 150 manat əlillik pensiyası aldığını, bu səbəbdən də məhkəməyə müraciət etməyə pulunun olmadığını bildirib. Əvəzində isə “mən sənə pul verən deyiləm ki” cavabını alıb. Zavallı kəndli “bəs mən nə edim, bu gedişlə gedib özümü öldürəcəyəm” deyib, ona çarəsiz vəziyyətdə olduğunu çatdırıb. “Canişin” həzrətləri də öz növbəsində ona ən “optimal” məsləhətini verib: - “Get, öldür. Sən özünü öldürəcəksən deyə, mən Vasif Talıbovun səhvini düzəltməliyəm?”
Heydər Oğuz
