Dövlətin “BakuBus” MMC üçün aldığı 715 avtobusun yoxa çıxan 303-nün aqibəti haqda hələ də rəsmi açıqlama verilmir. Əslində Hesablama Palatası bir neçə il əvvəl bu faktı ortaya çıxarıb və məlum olub ki, Bakı Nəqliyyat Agentliyi 303 avtobusun istifadəyə yararlı müxtəlif ehtiyat hissələrini söküb digərlərinə quraşdırıb.

Yəni indiyədək 80 milyon manat vəsait hesabına alınan avtobusların 25 faizi istismara yararsız hala gətirilib. Acınacaqlısı isə odur ki, onları təmir etmək də mümkün deyil.

2015-ci ildə dövlət tərəfindən alınan 715 avtobusun 303-ü sıradan çıxıbsa, yerdə 412 avtobus qalır. Həmin avtobusların isə gündəlik 100-120 ədədi xəttə buraxılmır. Hansı səbəbdən buraxılmadığı da məlum deyil. Məsələ burasındadır ki, aidiyyəti qurumlar zəhmət çəkib nə yoxa çıxan, nə xəttə buraxılmayan avtobusları araşdırır, nə də qanunsuz addımın qarşısı alınır. Deməli burada qaranlıq məqamlar və qüsurlar var. Qəbul edilməyən isə sərnişinlərə bilərəkdən problem yaradılması və onlara etinasız münasibətdir.

Onu da qeyd edək ki, son vaxtlar BNA “BakuBus”la bağlı heç bir prosesə müdaxilə etmir. Halbuki Hesablama Palatasının araşdırıb ortaya çıxardığı məsələdə birbaşa BNA ittiham olunur.

Qurumun başqa bir məsələdə də adı çəkilir.

Bu günlərdə Bakı Nəqliyyat Agentliyinin İdarə heyətinin sədrinin müşaviri Faiq Abbasov dövlətin daşıyıcı şirkətlər üçün ayırdığı 7,5 milyon manatın “Bakubus” MMC-yə ayrıldığını bildirib. Nazirlər Kabinetinin müvafiq qərarında 7,5 milyon manatın BNA vasitəsilə sərnişindaşıma fəaliyyəti ilə məşğul olan şirkətlərə ödənilməsi tapşırılıb. Lakin vəsaitin hamısını BNA həmin vaxt öz tərkibində olan “Bakubus” MMC-yə köçürüb.

Qeyd edək ki, Bizim.Media iki həftəyə yaxındır ki, “BakuBus” MMC-yə məsələlərlə bağlı rəsmi sorğu göndərib. Qurumun mətbuat katibi Qabil Babayev sorğulara rəsmi email ünvanından cavab veriləcəyini desə də, suallarımız cavabsız qalıb.

Ümid edirik ki, avtobuslarının sayını azaldıb vətəndaşları narazı salan “Bakubus” məsələyə aydınlıq gətirəcək.
Bizim.Media

Övladları üçün "şəhidlik statusu" tələb edən bir qrup vətəndaş Milli Məclisin qarşısında toplaşıb. Valideynlərin etirazından sonra onları deputat Adil Əliyev qarşılayıb. Deputat bildirib ki, problemlər müxtəlif olduğu üçün vətəndaşlar fərdi müraciətlər etməlidirlər.

Daha ətraflı aşağıdakı videoda:

Daxili İşlər Nazirliyinin Polis Akademiyası tərəfindən keçirilən tender müsabiqəsinin qalibi məlum olub.

Yeniavaz.com açıqlanan rəsmi məlumatlara istinadən bildirir ki, dəyəri 48 min 115 manat olan tender müsabiqəsinin qalibi “NOHUR NN 2022” MMC (VÖEN- 1703383761) olub.

“NOHUR NN 2022” MMC Polis Akademiyasının sifarişi əsasında nəqliyyat vasitələrinin cari təmiri və ehtiyyat hissələrinin alınmasını həyata keçirəcək.

Nizamnamə kapitalı 10 manat olan “NOHUR NN 2022” MMC-nin hüquqi ünvanı Səbail rayonu, Abbasqulu Abbaszadə, ev 1/B-də yerləşir. MMC-nin qanuni təmsilçisi Ocaqquliyev Elçin Əli oğludur.

Tender müsabiqəsinin maraqlı və qəribə tərəfi odur ki, tender müsabiqəsinin qalibi olan şirkət –“NOHUR NN 2022” MMC cəmi 2 ay əvvəl – bu ilin iyul ayının 26-da dövlət qeydiyyatına alınıb.

Məlumat üçün onu da bildirək ki, “Dövlət satınalmaları haqqında” Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlılığının olması lazımdır.

Rəsmi saytı, sosial şəbəkə hesabı olmayan, adı heç bir yerdə keçməyən və cəmi 2 ay əvvəl yaranan şirkətin hansı peşəkarlığa və təcrübəyə sahib olduğu da başa düşülən deyil.

Maraqlı məqamlardan biri də odur ki, son aylarda “Səbail rayonu, Abbasqulu Abbaszadə, ev 1/B” ünvanında yüzlərlə şirkət qeydiyyata alınıb. Bu şirkətlərin bir-neçəsinin qanuni təmsilçisi eyni şəxslər olub.

Onu da qeyd edək ki, yeni yaranan, təcrübəsiz şirkətlər daha əvvəl də Polis Akademiyası tərəfindən keçirilən tenderlərdə qalib olublar.

“Final” yağ məhsullarının qiymətində son iki ay ərzində 8 manata yaxın artım müşahidə edilib.

Bu barədə sosial şəbəkələrdə görüntülər yayılıb.

Videoda danışan şəxs bildirib ki, 5 litrlik “Final” qarğıdalı yağının qiyməti 2 ay bundan əvvəl 29,70 AZN olub. Hazırda isə eyni məhsulun qiyməti 37,65 AZN təşkil edir.

Nəticə etibarilə iki ay ərzində 5 litrlik “Final” qarğıdalı yağının qiyməti 7,95 AZN bahalaşıb.

Qeyd edək ki, Bakıdakı iri marketlər şəbəkələrindən birində 5 litrlik “Final” qarğıdalı yağının qiyməti (bu günə olan qiymət) 37,55 AZN göstərilib.

Məsələ ilə bağlı “Final” yağlarının istehsalçısı “Azersun Holding”dən Yeniavaz.com-a bildirilib ki, məhsullarda qiymət artımı mövcuddur:

“Bu mövzu ilə bağlı nəzərinizə çatdırmaq istəyirik ki, dünyada mövcud iqtisadi halların təsiri nəticəsində il ərzində yağ məhsullarının xammalının kəskin qiymət artımı qeydə alınır. Məhsullarda qiymət artımı mövcuddur. Nəinki bu yağlarda, digər məhsullarda da mövcuddur”.
aztoday

Bugünkü tarixə (05.10.2022) olan məlumata görə Fövqəladə hallar nazirinin birinci müavini general-leytenant Rəfail Mirzəyevin oğlu Rəşad Mirzəyevin həmtəsisçisi olduğu “ATL Tech” MMC-nin (VÖEN – 2002575181) dövlət büdcəsinə vaxtında ödənilməyən 103 min 755 manat 73 qəpik vergi borcu var.
TEREF.AZ yeniavaz.com-a istinadən bildirir ki, “ATL Tech” MMC 22.02.2013-cü il tarixində “Nəsimi rayonu, Bülbül pr, ev 105, M12, m. 3” ünvanında dövlət qeydiyyatına alınıb. Nizamnamə kapitalı 100 manat olan MMC-nin qanuni təmsilçisi Əliyev Anar İsmayıl oğludur.
Şirkətin rəsmi veb-saytında qeyd olunur ki, şirkətin 2 həmtəsisçisindən biri general-leytenant Rəfail Mirzəyevin oğlu Rəşad Mirzəyevdir. Rəşad Mirzəyev 1988-ci ildə anadan olub. Şirkət təsis olunanda 25 yaşı olub. Mirzəyev öz şəxsi blogunda yazır ki, “ATL Group”-un təsisçisi və icraçı direktorudur. Qrupa “ATL Academy”, “ATL Tech”, “ATL Consulting”, “ATL SMS”, “ATL Trading” və “Əjdaha” fast food (dönər evləri) daxildir. Eyni zamanda bir neçə yerli və xarici start-uplarda partnyordur.
General oğlunun fəaliyyətilə bağlı maraqlı məqamlardan biri də odur ki, onun rəhbərlik etdiyi “ATL Tech” MMC atasının yüksək vəzifə (birinci müavin) tutduğu nazirlik (FHN) tərəfindən keçirilən tenderlərdə qalib olur.
“ATL Tech” MMC cəmi 3 ay əvvəl – bu ilin iyun ayında FHN-nin keçirdiyi 3 tenderdə qalib olub. 3 tenderin ümumi məbləği 804 min 663 manat 69 qəpik olub. Bundan başqa “ATL Tech” MMC ötən il FHN-nin keçirdiyi 1,4 milyon manatlıq 4 tender müsabiqəsində də qalib olub.
Qeyd edək ki, "Dövlət satınalmaları haqqında" Qanunun 11-cı maddəsində “dövlət satınalmalarında maraqların ziddiyyəti”nə dair tələblər yer alıb. Həmin maddənin 13.2.1-ci bəndində açıq şəkildə yazılır ki, satınalma prosedurlarında iştirak edən iddiaçının nümayəndəsi və ya vəzifəli şəxsi ilə birbaşa qohumluğu, qəyyumluq, hamilik və ya övladlığa götürmə, təsisçilik və

Hesablama Palatası: “Qiymətin şişirdilməsi, maraqların toqquşması kimi halları auditlə aşkarlamaq çox çətindir”
Tenderlər Azərbaycanda dövlət vəsaitlərinin əsas yağmalanma vasitəsi olaraq qalmaqdadır. Ölkəyə neft gəlirlərinin axının başlanması ilə başlayan və pik həddə çatan tender soyğunçuluğu hələ də davam edir. Həbs olunan bütün məmurların cinayət işinin ana xəttini məhz tenderlər - dövlət satınalmaları təşkil edir. Onların hamısı dövlət vəsaitlərini talamaq üçün satınalamlardan istifadə ediblər. Bugünlərdə sabiq əmək və əhalinin sosial müdafiəsi naziri Səlim Müslümovun cinayət işi üzrə son məhkəmə prosesində tender yolu ilə pulların mənimsənilməsi mexanizminə dair maraqlı faktlar açıqlanıb. Bununla bağlı ifadələrdən birini şahid Eldar Əliyev verib. Məhkəmədə məlum olub ki, o, ümumiyyətlə, hərfləri tanımır və gözləri yaxşı görmür. Lakin onun adına şirkət rəsmiləşdirilib və qanunsuz yolla şirkət tenderlərin qalibi edilib. Nazirlik tərəfindən şirkətə köçürülən pullar nəğdləşdirilərək götürülüb: “Mən Maştağada bağda işləyirəm. Əncir qurudub satıram. Evimdə çörək və yumurtadan başqa heç nə yoxdur. Qonşu Məlikhəsən bir dəfə gəldi ki, kasıb adamsan, gəl səni işə düzəldim. O özü də quş, toyuq saxlayırdı. Dedi ayda 200 manat verəcəm. Dediyi kimi də oldu. Şəxsiyyət vəsiqəmi istədi, verdim. Arada sənəd gətirirdi, qol çəkirdim. Təxminən 2 il hər ay 200 manat verdi”.

Bu ifadə son 20 ilə yaxın dövrdə Azərbaycanın dövlət qurumlarında adiləşmiş, hamının xəbərdar olduğu, mövcudluğu dəfələrlə faktlar əsasında sübuta yetirilən cinayət əməlinin icra mexanizmidir. Bu illər ərzində bu və ya başqa mexanizmlər vasitəsilə tender prosedurlarının qanunsuz qazanc yoluna çevrilməsinə dair yüzlərlə fakt ortaya qoyulub, lakin onun birdəfəlik aradan qaldırılması hələ də baş verməyib. Açıqlanan hər fakt üzrə ayrıca götürülmüş halda hansısa hüquqi addımlar atılıb, kimlərsə həbs olunub, az keçməmiş azadlığa çıxıb. Bəziləri də Səlim Müslümov kimi, mənimsədiklərinin yüzdə birini dövlətə qaytarmaqla canını qurtarıb...

Artıq qəbul olunmuş faktdır ki, dövlət satınalmalarındakı korrupsiya mexanizmlərinin saxlanmasında ən yüksək vəzifələri tutan şəxslər - məsələn, S.Müslümovun timsalında, nazirlər, - maraqlıdılar. Buna görə də ölkədə satınalmalarda real şəffaflıq yaranmasına gətirib çıxaracaq hər hansı addımın qarşısı rahatlıqla alınır. Nəticə isə budur ki, yalnız hansısa tenderlərdə qalib edilmək üçün şirkətlərin yaradılması praktikası geniş yayılmış olaraq qalır. Onlar bu gün yaradılır, 1-2 aydan sonradan başlayaraq 6-7 ay, bəzən hətta 1-2 il tenderlərə “qatılıb” qalib çıxır, sonra isə ləğv edilir. Bu şirkətlər bir çox hallarda biznesdən xəbəri olmayan, ucqar kəndlərdə yaşayan şəxslərin adlarına, əksər vaxt özlərinin xəbəri belə olmadan yaradılır. Azərbaycanda dövlət satınalmaları “Dövlət satınalmaları haqqında” Qanunla tənzimlənir. Həmin qanunda şirkətin yaranma tarixinə görə tenderdə iştirak etmək üçün hər hansı məhdudiyyət nəzərdə tutulmayıb. Bundan əlavə, qanun tenderdə dövlət büdcəsinə borcu olan şirkətlərin də qalib çıxmasını əngəlləmir. Əsas tələb qalib şirkətin “Dövlət satınalmaları haqqında” Qanunun 6.2.5-ci maddəsinə əsasən, Azərbaycanda vergilərə və digər icbari ödənişlər üzrə vaxtı keçmiş öhdəliklərinin olmamasıdır. Yəni cari borcların olması tenderdə iştirak və qalib elan olunmaq üçün məhdudiyyət yaratmır...

Azərbaycanda dövlət satınalmaları prosesinə audit nəzarətini Hesablama Palatası həyata keçirir. Palatanın 2021-ci ilin dövlət büdcəsinin icrasına verdiyi rəydən də aydın olur ki, dövlət satınalmaları sahəsində problemlər hələ də davam edir. Müxtəlif qurumlarda aparılan auditin nəticələri göstərib ki, dövlət satınalmaları sahəsində aşkar edilmiş nöqsanlar arasında büdcə qanunvericiliyinin və dövlət satınalmalarını tənzimləyən hüquqi aktların tələblərinin pozulması, həmçinin mühasibat uçotu və hesabatlılıqla bağlı nöqsanların payı yüksək olub. Bundan başqa, palata aşkar edib ki, bəzi qurumlar müxtəlif növ tədbirlər üzrə qüvvədə olan normativlərə əməl etmədikləri üçün artıq xərclər yaranır. Bəzi hallarda qeyri-büdcə gəlirlərinin əldə edilməsi üçün zəruri tədbirlər görülmədiyinə görə dövlət büdcəsindən əlavə vəsaitlərə tələbat və istifadəyə yol açılır. Palatanın diqqət çəkdiyi digər maraqlı məqam odur ki, bəzi hallarda qurumun vəzifə və funksiyalarına aid olduğu halda, həmin işlərin yerinə yetirilməsi üçün kənar təşkilatlarla satınalma müqavilələri bağlanılır və icra edilir.

Antiinhisar və İstehlak Bazarına Nəzarət Dövlət Xidməti tərəfindən təqdim edilən məlumatlara əsasən, 2021-ci ildə ölkə üzrə ümumilikdə 12 129 sayda satınalma tətbiq edilməklə 6 milyard 11,7 milyon manat məbləğində satınalma müqavilələri bağlanıb. Bu, 2020-ci illə müqayisədə satınalmaya cəlb edilmiş məbləğdən 555,5 milyon manat və ya 8,5 faiz az, sayda isə 2926 və ya 31,8 faiz çoxdur. Palata bildirir ki, hesabat ilində ÜDM-in, həmçinin dövlət büdcəsinin xərclərinin artımı fonunda, satınalmaya cəlb edilmiş vəsaitin həcmində azalma müşahidə edilib: əvvəlki illə müqayisədə satınalma məbləğinin ÜDM-ə nisbət göstəricisi 2,6 faiz bəndi, xərclərə nisbəti isə 2,9 faiz bəndi azalmaqla müvafiq olaraq 6,5 faiz və 21,9 faiz bəndi təşkil edib: “Qeyd edək ki, bu göstəricilər son illərdə ən aşağı göstərici olub. Təqdim edilmiş məlumatların təhlili göstərir ki, 2021-ci ildə keçirilmiş 8635 müsabiqə əsaslı satınalma üzrə 2 milyard 646 milyon manat məbləğində müqavilə bağlanılıb ki, bu da ötən illə müqayisədə sayda 859 satınalma (11,0 faiz) çox və məbləğdə isə 854,5 milyon manat (24,4 faiz) azdır”.

Hesablama Palatasının rəyindən aydın olur ki, ötən il 2970 elektron açıq tenderlər keçirilib, bu tenderlərdə cəmi 804,5 milyon manat vəsait xərclənib. Beləliklə də ümumi satınalmaların sayında bu metodun payı 24,5 faiz, məbləğdə isə cəmi 13,4 faiz olub. Bu o deməkdir ki, dövlət qurumları az məbləğdə çoxsaylı tenderləri elektron keçirməklə iri məbləğli satınalmaları ənənəvi qeyri-şəffaflıq imkanı yüksək olan üsullarla reallaşdırırlar. Nəticədə ötənilki dövlət xərcləmələrində əvvəlki illərdə olduğu kimi say baxımından kotirovka sorğusu, məbləğ baxımından bir mənbədən satınalma əhəmiyyətli çəkiyə malik olub. Müsabiqə əsaslı satınalma metodlarına cəlb edilmiş məbləğdə əvvəlki illə müqayisədə azalma, bir mənbədən satınalma üzrə isə əksinə, artım müşahidə edilib: “Say baxımından 2021-ci ildə satınalmalar arasında kotirovka sorğusu 41,5 faiz, açıq tender (elektron daxil olmaqla) 25,3 faiz, təkliflər sorğusu 4,3 faiz, bir mənbədən satınalma metodu 28,8 faiz paya malik olsa da, məbləğ baxımından satınalmada açıq tender (elektron daxil olmaqla) ümumi məbləğdə 30,3 faiz, təkliflər sorğusu 12,1 faiz, kotirovka sorğusu 1,7 faiz, bir mənbədən satınalma metodu isə 56 faiz təşkil edib”.

Azərbaycanda büdcə xərcləmələrinin mühüm hissəsi adətən 4-cü rübdə, ən çox da dekabr ayında reallaşır. Bu tendensiya satınalmalarda da özünü göstərir. Belə ki, 2021-ci ildə bütün satınalma metodları üzrə məbləğ və say ifadəsində daha çox satınalma IV rübdə həyata keçirilib. Hesablama Palatası bu qənaətdədir ki, dövlət satınalmaları üzrə müqavilələrin ilin sonunda bağlanılması bank və akkreditiv hesablar üzrə qalıqların, eyni zamanda qabaqcadan ödəniş məbləğlərinin artımına şərait yarada bilər: “Təqdim edilmiş məlumatlara görə, il ərzində satınalma metodlarının 40,7 faizi ilin birinci yarısında, 59,3 faizi isə ikinci yarısında tətbiq edilib. Məbləğ ifadəsində bu göstəricilər 36,8 faiz və 63,2 faiz olub. Açıq tender üzrə satınalmaların 37,2 faizi və ya 676,3 milyon manatı, kotirovka sorğusu üzrə satınalmaların 36,4 faizi və ya 37,1 milyon manatı, təkliflər sorğusu üzrə satınalmaların 49,8 faizi və ya 361,5 milyon manatı, bir mənbədən keçirilən satınalmaların 39,2 faizi və ya 1 milyard 321,5 milyon manatı dördüncü rübdə reallaşdırılıb. Satınalmaların ilin sonunda həyata keçirilməsi dövlət maliyyəsi üçün bir sıra risklər yarada bilər. Belə ki, bu hal ilin sonunda istifadə edilməyən vəsaitin bank hesablarına, akkreditiv hesablara yönəldilməsinə yol açır, eyni zamanda ilkin ödəniş (avans) üçün əhəmiyyətli məbləğin podratçılara köçürülməsinə, bununla da ilin sonunda qabaqcadan ödəniş məbləğlərinin artımına səbəb ola bilər. Eyni zamanda, ilin sonuna bağlanılmış müqavilələr növbəti büdcə ili üçün də vəsaitlərin düzgün planlaşdırılmasına mənfi təsirlərini ötürmüş olur”.

Palatanın sədri Vüqar Gülməmmədov deyir ki, rəhbərlik etdiyi qurum apardığı nəzarət tədbirlərində dövlət satınalmalarında üç əsas məsələyə diqqət edir: “Bunlar dövlətin zəruri ehtiyacının doğru və düzgün müəyyən edilməsi, bu ehtiyacın ödənilməsi üçün optimal qiymət və münasib şərtlərlə qalibin seçilməsi, qalib təşkilatla bağlanmış müqavilənin satınalma prosesində razılaşdırılmış şərt və öhdəliklərinin icra edilməsi məsələsidir. Bizim fikrimizcə, dövlət satınalmasının keçirilməsində məqsəd bundan ibarət olmalıdır və nəzarət də bunun üzərində qurulmalıdır. Hesab edirik ki, bu məsələlərdə yol verilmiş pozuntular satınalmaların etibarsız olması ilə bağlı dəlillərdir. Həmçinin, dövlət satınalmaları ilə bağlı qeyd etdiyim 3 əsas məsələdə fəaliyyətin gücləndirilməsinə hələ də ehtiyac duyulduğunu vurğulamaq istərdim. Bu sahədə müşahidə edilən mühüm müsbət meylləri, o cümlədən büdcə vəsaitinin dövlət satınalmalarına cəlb olunmasının əhatəsinin və rəqabətli satınalma metodlarına üstünlük verilməsi hallarının artdığını, satınalmalarda ehtimal olunan qiymətlə orta bazar qiymətləri arasındakı fərqin azaldığını, ölkədə e-satınalma modelinin tətbiq edilməsi ilə keçiriləcək satınalmalar barədə məlumatlara əlçatanlığın təmin edildiyini, dövlət satınalmalarında qalib təşkilatların vergi öhdəliklərinə nəzarətin artırıldığını da qeyd etməliyəm”.

Palata sədrinin sözlərinə görə, dövlət satınalmalarında korrupsiya ehtimalını yaradan iki əsas nöqsan halı var ki, bunlar da qiymətin bilərəkdən baha olması və satınalmalarda maraq ziddiyyətidir: “Audit və ya təftiş aparmaqla, sadaladığım bu ciddi pozuntunu sübut etmək çox çətindir və demək olar ki, mümkün deyil. Bu cür halları hüquq-mühafizə orqanları çox uğurla müəyyən edir və nəticələr də göz qabağındadır”.

Dünya SAKİT,
“Yeni Müsavat”

“MS OYL” şirkətinin sosial şəbəkədəki hesabına rəy yazan internet istifadəçilərindən Məryəm Süleymanova Mehdiabad qəsəbəsində yerləşən yanacaqdoldurma məntəqəsinin işçilərinin müştərilərlə kobud davranışılarından şikayətlənir və şirkət rəhbərliyinə onlara “qulaqburması” verilməsini tövsiyə edir. Görünür, xanım sürücü YDM-dəki operatorun benzinin qramından kəsilməsi ilə üzləşib. Murad Sarıyev adlı başqa bir internet istifadəçisi isə MS OYL” məntəqəsində doldurduğu yanacağın onun avtomobilini xarab elədiyini, ustaların bunu təsdiqlədiyini yazır.

Bakıda, Abşeronda və bir çox başqa rayonlarda fəaliyyət göstərən “MS Oil” yanacaqdoldurma məntəqələri “MSDIS Holding”ə məxsusdur. Holdinqin rəhbəri Mirfəyyaz Nağıyevdir. «MS OIL» şirkətinin hüquqi ünvanı Bakı, Nərimanov rayonu, İsmayıl Hidayətzadə ev 20A m 51-dir. Nağıyev Mirfəyyaz Oktay oğlu 24.09.2018-ci idə qeydiyyata alınan “MS Group Holding” MMC, “MS Group Consulting” MMC və “Enerjiquraşdırma-M” MMC-nin də qanuni təmsilçisi olub.

Onu da qeyd edək ki, “MSDIS Holding” MMC fəaliyyətə başladığı iki il ərzində çox sahibkarın arzu etdiyi 300-dən çox layihə həyata keçirib, bir neçə nəhəng tenderlərinin qalibi olub.

Sumqayıt şəhər İcra Hakimiyyəti yanında “Mənzil-Kommunal Təsərrüfatı İstehsalat Birliyi” “MSDIS Holding” MMC-yə Sumqayıt şəhərində küçə, yol, mikrorayon və məhəllələrin ərazilərindəki asfalt örtüyünün təmiri işləri üçün 2 milyon manatdan çox pul ödəyib.

— 26.04.2021-ci ildə Abşeron rayonu, Novxanı qəsəbəsi, Bağlar ərazisində «Azərişıq» ASC-yə məxsus 2 saylı Sumqayıt-Maştağa 35 kV-luq hava xəttinin bir hissəsinin sökülərək kabel xətti ilə əvəz edilməsi işləri üçün “Azərişıq” ASC ilə 116 min 489 manat 60 qəpiklik,

— 22.05.2021-ci il tarixində Xırdalan şəhərində abadlıq işləri üçün Abşeron rayon İcra Hakimiyyətilə 1 milyon 362 min 482 manat 86 qəpiklik,

— 25.05.2021-ci il tarixində Sumqayıt şəhərində «Karvan yolu» küçəsinin və Mehdi Hüseynzadə adına Sumqayıt şəhər stadionunun giriş hissəsinin asfaltlanması işləri üçün Sumqayıt şəhər İcra Hakimiyyətilə 277 min 715 manat 67 qəpiklik,

— 01.06.2021-ci il tarixində Sumqayıt şəhərində küçə, yol, mikrorayon və məhəllələrin ərazilərindəki asfalt örtüyünün təmiri işləri üçün Sumqayıt şəhər İcra Hakimiyyətilə 2 milyon 20 min 503 manat 68 qəpiklik müqavilə imzalanıb.

Yanacaq müştəriləri həmçinin xatırlayırlar ki, hər dəfə benzinin qiymətinin artacağı xəbəri çıxan kimi “MS OYL”un məntəqələrində benzinin olmadığı deyilir. Yəni, benzini anbarda saxlayıb qiymətinin qalxmasını gözləyirlər ki, baha satsınlar.

Cəmiyyətdə adının önündə “mir” sözü daşıyanlara xüsusi yanaşma var. Heç kəsə sirr deyil ki, ta qədimdən Azərbaycanda seyid nəslindən olan insanlara xüsusi hörmət və ehtiram olub. Ancaq “imam övladları” onlara bəxşiş olan nüfuzlarını qoruyub-saxlamağı bacarmalı, qazandıqları ruzi halal olmalı, şeytana aldanmamalı, nəfslərini tox tutmalıdırlar. Maraqlıdır, görəsən Mirfəyyaz Nağıyevin personasına bu qədər böyük diqqətin səbəbi nədir və ya səbəbkarı kimdir?

Bu və ya digər suallarla bağlı hörmətli Mirfəyyaz Nağıyevə dəvələrlə zəng edib, mesaj göndərsək də, cənab müdirdən heç bir cavab ala bilmədik. Odur ki, növbəti yazılarımızda suallarımıza cavab öyrənməyə çalışacağıq. //gundeminfo.az//