Azərbaycan Respublikası Dövlət Sərhəd Xidməti emalatxana avadanlıqlarının satın alınması üzrə 13.10.2023-cü ildə başladığı açıq tender müsabiqəsini tamamlayıb və “NM STOCK” Məhdud Məsuliyyətli Cəmiyyəti ilə 99.767,82 manat məbləğində satınalma müqaviləsi bağladığını 18.10.2023-cü il tarixdə dövlət satınalmalarının vahid internet portalında açıqlayıb.

Tenderin şərtlərinə görə “NM STOCK” MMC 2023-cü ilin sonuna qədər Dövlət Sərhəd Xidmətini təkərli əl damkratı 5 t, kobra test aparatı, yağ sovurma kompressoru (80 litrlik), yağ sovurma kompressoru (80 litrlik), patçipnik çıxartmaq üçün məngənə, universal açar dəst (46 parça), kompleks açar dəsti (156 parça), transmissiyaya yağ vuran aparat, təkər təmiri üçün alətlər kimi 69 adda emalatxana avadanlıqlarə ilə təchiz etməlidi.

Qeyd edək ki, dövlət satınalmalarının vahid internet portalına yerləşdirlimiş məlumatdan da görsəndiyi kimi Dövlət Sərhəd Xidməti emalatxana avadanlıqlarının satın alınması üzrə keçirdiyi açıq tenderin qalibi “NM STOCK” olub və MMC-nin VÖEN-i kimi 1404425431 bu göstərilib.

Apardığımız araşdırmalar zamanı məlum oldu ki, sözügedən VÖEN- 1404425431 “NM STOCK” MMC-yə deyil, “İNPORT” Məhdud Məsuliyyətli Cəmiyyətinə məxsusdu. Daha ətraflı araşdırdıqda məlum oldu ki, MMC 2018-ci ildə “QARAJ-21” kimi dövlət qeydiyyatına alınıb 2022-ci ilin oktyabr ayından adını dəyişdirərək “İNPORT” MMC qoyub. MMC-nin qanuni təmsilçiləri müxtəlif vaxtlarda Zərbəliyev Zəki Zərbəli oğlu və Bayramov Azər qəzənfər oğlu olublar. Reyestr məlumatlarında MMC-nin hüquqi ünvanı kimi BAKI ŞƏHƏRİ NƏSİMİ RAYONU, CƏLİL MƏMMƏDQULUZADƏ, ev 63 göstərilib.

Bəs Dövlət Sərhəd Xidməti tərəfindən dövlət satınalmalarının vahid internet portalında açıqlanmış “NM STOCK” MMC kimə məxsusdur?

Qeyd edək ki Dövlət Vergi Xidmətinin məlumatlarında MMC-nin VÖEN-i 2008078691 kimi qeyd olunub. MMC 22.06. 2023-cü il tarixdə dövlət qeydiyyatına alınıb. Hüquqi ünvanı BAKI ŞƏHƏRİ XƏTAİ RAYONU, XƏQANİ RÜSTƏMOV, ev 6, mənzil 26, nizamnamə kapitalı 100 manat, qanuni təmsilçisi Məhərrəmova Nigar Tahir qızıdır.

Dövlət Sərhəd Xidməti tərəfindən dövlət satınalmalarının vahid internet portalına yerləşdirilmiş məlumatlarda isə müsabiqənin başlama tarixi 01.05.2020-ci il, zərflərin açılış tarixi isə 12.06.2020-ci il göstərilib. Məlumatlardan belə görsənir ki, Dövlət Sərhəd Xidməti emalatxana avadanlıqlarının satın alınması üzrə açıq tender müsabiqəsinə 3 il bundan əvvəl başlayıb.

Maraqlıdır dövlət satınalmalarının vahid internet portalında nə üçün qalib “NM STOCK” MMC-nin VÖEN-i 2008078691 deyil, “İNPORT” MMC-nin VÖEN- i 1404425431 göstərilib? Bu bir yanlışlıqdır, səhvdir, yoxsa Dövlət Sərhəd Xidməti Tender Komissiyasının növbəti saxtakarlıqları. Bunu biz rəsmi dövlət qurumlarının məlumatlarına əsaslanaraq qeyd edirik.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti kimi ciddi və rəsmi bir dövlət qurumunun nəzarətində olan bir portalda bu kimi yanlış məlumatların yerləşdirilməsi nə dərəcədə inandırıcı görsənir?

Göründüyü kimi, “NM STOCK” (VÖEN 2008078691 ) MMC cəmi üç aydır dövlət qeydiyyatına alınıb. Qanuni təmsilçisi isə bir xanımdır. Açıq mənbələrdə MMC-nin fəaliyyət sferası barədə heç bir məlumat yoxdu. Çox güman ki, “NM STOCK” MMC-ni tenderin qalibi göstərib. Amma işləri subpodratçı kimi “İNPORT” (VÖEN 1404425431) MMC aparacaq. Burada məqsəd nədir. Qanuni təmsilçisi xanım olan “NM STOCK” (VÖEN 2008078691 ) MMC-nin heçabına pul köçürülür, oradan müəyyən faiz çıxarıldıqdan onra qalan vəsait subpodratçı “İNPORT” (VÖEN 1404425431) MMC-nin hesabına köçürülür.

Qayıdaq tender müsabiqəsinin başlama tarixinə. Göründüyü kimi məlumatlarda müsabiqənin başlanma tarixi 2020-ci il göstərilib. Bəs 2020-ci ildə başlanana tenderin nəticələri nə üçün indi açıqlanır. Həm də şübhəli məqamlarla dolu. Maraqlıdır Antiinhisar və İstehlak Bazarına Nəzarət Dövlət Xidməti bütün bu saxtalıqları görmürmü?

Aktualinfo.org

Əlikram Ağayevin qanunsuz həbs edildiyi iddia olunur

Lerikdə fəaliyyət göstərən "Meşəbəyi” Sanator-Kurort və Turizm Mərkəzinin rəhbəri Əlikram Ağayevə 15 sutka inzibati həbs cəzası verildiyi bildirilir.

Bu barədə Meydan TV-yə Lerik rayonundan məlumat verilib.

Yaxınları da Əlikram Ağayevin həbs edildiyini təsdiqləyiblər.

Onların sözlərinə görə, mərkəz rəhbəri əsassız həbs edilib.

"Polis rəisi zəng edib ki, guya Əlikram Ağayevdən şikayət var. Onu idarəyə dəvət edib. O da deyib ki, rəsmi bildiriş göndərilsin, amma bildiriş göndərilməyib. Onun barəsində məcbiri gətirilmə qərarı verilib”, – deyə onlar qeyd ediblər.

Turizm mərkəzinin rəhbərinin polisin qanuni əmrinə tabe olmama ittihamı ilə həbs edildiyi bildirilir.

Daxili İşlər Nazirliyindən məsələni Meydan TV-yə şərh etmək istəməyiblər.

Lerik Rayon Polis İdarəsi də məsələyə münasibət bildirməyib.

Lerik Rayon İcra Hakimiyyəti başçısının müavini Habil Məlikov isə Əlikram Ağayevin həbsindən xəbərsiz olduğunu deyib.

Rayondan "Arqument.az"a verilən məlumata görə, Əlikram Ağayev Lerikin sayılan ağsaqqalarından biridir. Onun həbsinin rayonda birmənalı qarşılanmadığı da qeyd olunur.

Bildirilir ki, polis rəisi bununla da iş adamını hörmətdən salmaq istəyir.

İş adamı Lerikin icra başçısı Əkbər Abbasovla da yaxın dostu olduğu qeyd olunur, hətta başçının da bu həbsə mane ola bilmədiyi deyilir.

"ARS Reabilitasiya Mərkəzi" barəsində inzibati tənbeh vermə haqqında qərar ləğv edilib və işə yenidən baxılması Səhiyyə Nazirliyinə tapşırılıb.

Bu barədə Nərimanov Rayon Məhkəməsi qərar çıxarıb.

İş materiallarından aydın olur ki, Səhiyyə Naziriliyi "ARS Reabilitasiya Mərkəzi" MMC-də bir ay ərzində iki dəfə plandankənar yoxlama keçirib. MMC-nin rəhbərliyi barəsində İnzibati Xətalar Məcəlləsinin 602.4 (sahibkar tərəfindən yoxlama prosesində yoxlamaya aid sənədlərin yoxlayıcıya təqdim edilməməsi, yoxlama zamanı yaranan suallara şifahi və (və ya) yazılı izahatlar verilməməsi, digər yerlərə baxış keçirilməsinə mane olması) maddəsi ilə protokol tərtib edilib.

Sözügedən protokolla bağlı "ARS Reabilitasiya Mərkəzi"nin rəhbəri məhkəməyə şikayət verib.

İddia olunub ki, keçirilmiş həmin yoxlamada yoxlayıcı şəxslər qismində Teymur Musayev, İlkin Əhmədov və Aqşin Salmanovun iştirak etməli olduğu halda, səlahiyyəti çatmayan şəxslər iştirak edib.

Digər bir tərəfdən isə B.Mirzəyev özünü İlkin Əhmədov kimi təqdim etməyə cəhd edərək yoxlama prosesində qeyri-qanuni iştirak edib və onun yoxlamada iştirakını təsdiq edən heç bir hüquqi sənəd mövcud olmayıb. Bu hal MMC-nin nəzarət kameralarının videoçəkilişi ilə təsdiq olunur.

Məhkəmədə "ARS Reabilitasiya Mərkəzi"nin rəhbəri Sevda Xanməmmədova izahat verərək 17 il sahibkarlıq fəaliyyəti ilə məşğul olduğunu, 2020-ci ildə lisenziya aldığını və məqsədinin realibitasiya sahəsində köməyə ehtiyacı olanlara yardım etmək olduğunu deyib.

O, Səhiyyə Nazirliyi tərəfindən aparılan həmin yoxlamaların qərəzli olduğunu iddia edib.

Sevda Xanməmmədova göstərilənləri nəzərə alaraq şikayətin təmin edilməsini məhkəmədən xahiş edib.


Sevda Xanməmmədova

Səhiyyə Nazirliyinin nümayəndəsi isə məhkəmə iclasında çıxış edərək MMC-də 2 dəfə planlı və plansız yoxlama keçirildiyini bildirib.

İlk yoxlama zamanı "ARS Reabilitasiya Mərkəzi"ndə sertifikatsız işçi müəyyən olunub və inzibati xəta haqqında protokol tərtib edilib.

İkinci yoxlama 30 avqust 2023-cü il tarixdə keçirilib.

Bu dəfə sənədlər təqdim edilmədiyi üçün inzibati tənbehvermə haqqında qərarın qəbul olunduğunu deyib.

Məhkəmənin qərarı ilə "ARS Reabilitasiya Mərkəzi"nin rəhbərinin şikayəti qismən təmin edilib. Səhiyyə Nazirliyi tərəfindən tərtib edilmiş protokol isə ləğv olunub və işə yenidən baxılması Səhiyyə Nazirliyinə tapşırılıb.

Bir müddət əvvəl Milli Məclisin vitse-spikeri Adil Əliyevlə "ARS Reabilitasiya Mərkəzi" arasında qalmaqal yaranmışdı. Gununsesi.info-nun bu barədə yaydığı məlumatda bildirilirdi ki, Adil Əliyev adıçəkilən tibb müəssisəsinin məsuliyyətə cəlb olunmasını istəyir.

Buna səbəb isə vitse-spikerin oğlu Məhəmməd Əliyevin "ARS Reabilitasiya Mərkəzi"ndə prosedur zamanı kürəyinin yandırılmasıdır. Bu hadisədən sonra Əliyevlər ailəsi Nərimanov rayon Prokurorluğuna müraciət edib.

M.Mirqasımov adına Respublika Klinik Xəstəxanasına gündə minlərlə insan müraciət edir. İcbari Tibbi Sığorta üzrə bütün ölkədən bura xəstələr göndəriş alır. Təkcə rentgen kabinetindən gündə yüz xəstə keçir.
Ötən ay planlı yoxlamalar zamanı xəstəxanada ciddi radiasiya dozası, rentgen kabinetinin standartlara cavab vermədiyi aşkar olunub.

Buna görə xəstəxananın yeni direktoru Elviz Qasımova protokolla xəbərdarlıq edilmiş, aşkar edilmiş nöqsanların aradan qaldırılması üçün vaxt verilmişdi. Lakin direktor bu müddət ərzində heç bir tədbir görməmiş və Nüvə və Radioloji Fəaliyyətin Tənzimlənməsi üzrə Dövlət Agentliyinin növbəti reydi zamanı qorxu saçan rentgen kabineti möhürlənərək bağlanmışdı.

Rentgen kabinetləri ona görə bağlanıb ki, izolyasiya tədbirləri görülməyib, aparatlar texniki standartdan çox şüalanma verir və kabinetə girən həkim də, xəstə də bir dəfə rentgen müayinəsi zamanı alacağı radioaktiv şüalanmadan qat-qat artıq şüaya məruz qalırdı. Kabinetdən radioasiya dəhliz və bütün mərtəbə, hətta həmin binaya təsir edirdi. Bu isə personal və xəstələr üçün ciddi təhlükə deməkdir.

Medicina.az -a daxil olan məlumata görə, rentgenin istismarının məhdudlaşdırılmasından 1 həftə sonra həmin kabinet yenidən açılıb. Aşkar olunan problemlər aradan qaldırılmayıb, şüalanma və təhlükə həddi olduğu kimi qalıb. Görünür, xəstəxana rəhbərliyi ən gəlirli və vacib diaqnostik vasitə olan rentgen kabinetini hər vasitə ilə işlətməyə qərar verib.

TƏBİB-dən məsələ ilə bağlı Medicina.az-a verilən açıqlamaya görə, həqiqətən rentgen kabineti açılıb, amma istifadəyə köhnə yox, yeni aparat verilib.

“Akademik M.Ə.Mirqasımov adına Respublika Klinik Xəstəxanasında hazırda 1 KT və MRT istifadədədir. Xidmət keyfiyyətinin artırılması və vətəndaş məmnunluğunu nəzərə alaraq, sənəd problem olan rentgen avadanlıqları ilə bağlı Fövqəladə Hallar Nazirliyi arasında danışıqlar aparılıb, belə razılığa gəlinib ki, sənədlərin qaydaya salınması üçün əlavə vaxt verilsin. Əldə olunmuş razılığa əsasən rentgen avadanlıqları kabinetdə istifadəyə verilib. Əvvəldən istismarına qadağa qoyulmuş şüalanma ilə bağlı problemli köhnə avadanlıq istifadəyə verilməyib”.

Naxçıvanda Vasif Talıbovun yaxınlarına aid olan bir sıra müəssisələri alan “APF” kimə məxsusdur?
Naxçıvanda yeni şirkətlər qrupu yaradılıb.

Teref.az bildirir ki, TNS-in əldə etdiyi məlumata görə, “APF” şirkətlər qrupu əvvəllər Naxçıvanın sabiq rəhbəri Vasif Talıbovun yaxınlarına aid olan bir sıra müəssisələri alıb.

Şirkət hazırda üç istiqamət üzrə fəaliyyət göstərir: inşaat, kənd təsərrüfatı və qida sektorları.

APF qida sektorunda çörək, süd və süd məhsulları istehsal edir. Bu müəssisə 2005-ci ildə “Gəmiqaya Bərəkət Qida Məhsulları” Məhdud Məsuliyyətli Cəmiyyəti kimi fəaliyyətə başlayıb. Müəssisə artıq “APF Qida Məhsulları” Məhdud Məsuliyyətli Cəmiyyəti adı ilə fəaliyyətini davam etdirir. Müəssisədə müxtəlif istehsal sahələri fəaliyyət göstərir.

Şirkətlər qrupunun daha bir müəssisəsi “APF Agro”dur. Babək rayonunun Nehrəm kəndinə 12 km məsafədə yerləşən münbit torpaqlarda üzüm və alma bağları salınıb. Əvvəllər bu müəssisə də “Gəmiqaya Holdinq”in tərkibində idi.

Yuxarıda qeyd etdiyimiz kimi, “APF” şirkətlər qrupu tikinti sektorunda da fəaliyyət göstərəcək. Qrupa daxil olan “APF inşaat” Naxçıvan şəhərində çoxmənzilli yaşayış və qeyri-yaşayış binalarının tikintisi üzrə yeni layihələrin həyata keçirilməsini planlaşdırır. Naxçıvan şəhərinin Heydər Əliyev prospektində 21 yaşayış binasından ibarət “Nakhchivan Residence”in inşasına tezliklə start veriləcək. Artıq təsdiq edilən layihə çərçivəsində 2, 3 və 4 otaqdan ibarət 5-11 mərtəbəli binalarda 1100 mənzil inşa ediləcək.

Göründüyü kimi, “APF” şirkətlər qrupuna Naxçıvanda yaşıl işıq yandırlıb və geniş imkanlar yaradılıb. Maraqlıdır ki, şirkətlər qrupu cəmi bir ay bundan əvvəl yaradılıb. Yəni, APF hansısa köklü şirkət deyil.

Bəs şirkətin sahibi və ya sahibləri kimdir?

Şirkət təmsilçisi TNS-in əməkdaşının bu sualını cavablandırmaqdan imtina edib. Görəsən, şirkətin sahibini niyə gizli saxlayırlar?

“APF-nin açıqlaması nə deməkdir?” sualımız da cavabsız qalıb.

Əldə etdiyimiz məlumata görə, “APF” şirkətlər qrupunun adı üç şəxsin adının baş hərflərindən götürülüb: Anar, Pərvin, Fuad. Bu şəxslərin kimiliyini dəqiqləşdirə bilmədik. Ümid edirik ki, yaxın günlərdə şirkətin sahibləri və fəaliyyət istiqamətləri barədə ictimaiyyətə daha ətraflı məlumat veriləcəkdir. Naxçıvan ictimaiyyəti bunu bilməlidir. Çünki muxtar respublikada ən iri layihələr bu şirkətə verilir. Yəni, şirkətin sahibi sıradan biri deyil.

Qeyd edək ki, APF-nin aldığı deyilən müəssisləri və əmlakları bir neçə ay bundan əvvəl yenə yeni yaradılmış “HİMAL” Holdinqin alacağı bildirilirdi. Sonra hansısa müəmmalı səbəbdən holdinq ona təklif olunan əmlakları satın almaq fikrindən daşındı.