“Əhalinin ipoteka kreditləşməsinə çıxış imkanının genişləndirilməsi məqsədi ilə sabit vergi ödəyicilərinin də (aşbaz, bərbər, dayə və digərləri) ipoteka kreditlərinə çıxşını təmin etmək üçün müvafiq tədbirlər hazırlanıb".

Bunu İpoteka Kredit və Zəmanət Fondunun (İKZF) baş direktoru İlham Kələşov deyib. Onun sözlərinə görə, bu yeniliklərin tətbiqi ilə bağlı təkliflər qanunvericilik şəklində aidiyyəti üzrə təqdim edilib:

"Müvafiq qaydada təsdiq prosesini keçdikdən sonra, yəqin ki, yaxın vaxtlarda bu yeniliklərin də istifadəsi mümkün olacaq”.

Qeyd edək ki, bu gün mənzilə ehtiyacı olan vətəndaşların əsas problemlərindən biri məhz ipoteka krediti zamanı ödəniş məbləğinin yüksək olmasıdır. Məhz bunu nəticəsidir ki, mənzil almaq istəyən bir çox vətəndaş ipoteka kreditindən faydalana bilmirlər.

Sabit gəlirli aşbaz, bərbər, dayə və digər vətəndaşların ipoteka kreditlərindən yararlanması üçün maddi imkanı çatacaqmı?

DİA.AZ-ın xəbərinə görə, iqtisadçı-ekspert Rəşad Həsənov Cebhe.info-ya açıqlamasında sabit vergi ödəyiciləri hesab edilən şəxslər kifayət qədər gəlir əldə etdiklərini deyib:

“Məsələn, bu gün xüsusilə də bərbərlər, dərzilərin gəlirləri var. Söhbət ipotekadan gedirsə, ipotekanın nə qədər həcmdə götürülməsi, aylıq borcun məbləğindən asılı olaraq ipoteka götürənin vəziyyətinin qiymətləndirilməsi daha yaxşı olardı. Məsələn, elə ipoteka götürülə bilər ki, onun aylıq ödəniş məbləği 150-200 manatdır. Bu aspektdən qiymətləndirsək, regionlarda daşınmaz əmlakın qiyməti aşağıdır. Bu imkan yaradır ki, həmin insanlar ipotekadan istifadə etməklə mənzil sahibi olsunlar. Az borclanırlar, çünki qiymət aşağıdır. Daha kiçik aylıqları icra etməklə bu öhdəliyi yerinə yetirə bilirlər.

Bu baxımdan mən düşünürəm ki, şərait yaradılması lazımdır. Eyni zamanda, onların müəyyən bir gəlirləri olsa da, onlar tam müdafiə olunan sosial qrupları da deyillər. Sadəcə həssas qruplardan qismən daha yaxşı dolanışığı olan insanlardır ki, bu imkanlar mənzil təminatını yaxşılaşdırmağa o qədər də imkan yaratmasa da, müəyyən gəlirləri var. Bu sahədə fəaliyyət göstərənlərin əksəriyyəti peşə sahibləridir. Peşə sahibləri öz fəaliyyət sahələrində davamlı çalışırlar. Onların bu imkandan istifadə etmək hüququ var və bu şəraitin yaradılması məqbuldur”.

Ekspertin sözlərinə görə həmin sabit vergi ödəyiciləri olan peşə sahiblərinin gəlirləri vergiyə münasibətdə müəyyənləşmir:

“Gəlirləri qismən qiymətləndirmək olar. Məsələn, vətəndaşın yığdığı vəsaiti, ilkin ödəniş qabiliyyətini, yaxud digər aktivləri, kommunal öhdəliklərinin yerinə yetirilməsi, məsuliyyətliyini və s. nəzərə almaq olar. Eyni zamanda, bugünkü ipoteka mexanizmində vacib deyil ki, vətəndaşın ödəmə qabiliyyəti mütləq maksimum səviyyədə qiymətləndirilsin. Çünki onsuz da predmetin özü girovdur. İlkin ödəniş məbləği yüksəkdir. Bankların əksəriyyəti 30 faizdən çox ödəniş tələb edirlər.

Bu şərtlər daxilində satılan mənzil üçün gəlirin haradan əldə edilməsi əsas deyil. Məsələn, hansısa qohumu verəcək. Bir məsələ də aydındır ki, Azərbaycanda mənzil məsələsi bəzən nəinki ailə, hətta tayfa qayğısına çevrilir. Sadəcə həmin insanların azgəlirli olmasını qəbul etmək lazımdır. Dövlət qulluğunda işləyən insanlara ipotekanın verilməsindənsə, o sosial qruplara ipotekanın yolunun açılması daha məqsədəuyğundur”.

Ekspert burada heç bir ciddi risk görmür:

“Onlar mümkün olduğu qədər o öhdəliklərini yerinə yetirməyə çalışacaq və bunun üçün səy göstərəcəklər”.

“Muğan Bank” ASC-nin lisenziyası 19 oktyabr 2023-cü il tarixindən etibarən ləğv edilib, banka müvəqqəti inzibatçı təyin edilib və bankın müflisləşmə yolu ilə ləğv edilməsi barədə məhkəməyə müraciət olunub.

Mərkəzi Bankın İdarə Heyətinin yuxarıda qeyd olunan qərarı ilə “Muğan Bank” ASC-yə müvəqqəti inzibatçının təyin olunması ilə əlaqədar “Muğan Bank” ASC-nin idarә olunması üzrә bütün sәlahiyyәtlәr, o cümlәdәn bank sәhmdarlarının ümumi yığıncağının sәlahiyyәtlәri müvәqqәti inzibatçıya keçib.

Bəs “Muğan Bank”ın işçilərinin aqibəti necə olacaq?

Məsələ ilə bağlı danışan İctimai Şuranın üzvü, “Vətəndaşların Əmək Hüquqlarını Müdafiə Liqası”nın İcraiyyə Komitəsinin sədri Sahib Məmmədov Referans.Az-a bildirib ki, əgər bank tamamilə bağlanacaqsa, bu halda Əmək Məcəlləsinin 70-a bəndi işə düşür:

“Yəni müəssisənin ləğvi ilə bağlı işçilərin ixtisar olunması prosesi başlayır. Həmin maddəyə uyğun olaraq həmin müəssisədə işləyənlərin sığorta stajı nəzərə alınmaqla onlara kompensasiya ödənilir. Bu kompensasiyalar iki aya qədər ola bilər. Əgər o bankın ləğv edilib hansısa digər banka birləşdirilmə halı olarsa, işçilərin bir qismi də ora keçə bilər”.

Eyni zamanda bir müddət orada ləğv etmə prosesləri davam edəcək. bir qism işçi qalıb həmin ləğv etmə prosesində iştirak edə bilər – deyə Sahib Məmmədov qeyd edib.

Hüquqşünas Turan Abdullazadə isə bildirir ki, bununla bağlı "Muğan Bank"ın rəhbərliyi qərar verməlidir. Onun sözlərinə görə, "Muğan Bank"ın lisenziyası Mərkəzi Bank tərəfindən ləğv olunubsa, bank buna heç bir şey edə bilməz.

Şəhid xanımı rəsmi qurumlardan şikayətçidir: “Deyirlər ki, vaxtınız çatmayıb, İkinci Qarabağ Müharibəsinə görə əvvəlki şəhidlərə veriləcək evlər müvəqqəti təxirə düşdü”

Gədəbəy rayonu, Daşbulaq kənd sakini, şəhid xanımı Məmmədova Fəridə Əli qızı tərəfindən "Hürriyyət" qəzetinin redaksiyasına şikayət məktubu daxil olub. Şikayətçi deyir ki, illərdir ev növbəsində olmasına baxmayaraq, dövlət tərəfindən şəhidin ailəsinə ev verilməyib:

"Mən, Məmmədova Fəridə Əli qızı, yazaraq sizə bildirirəm ki, yoldaşım 1993-cü ildə şəhid olub. O vaxtdan öz evim yoxdur, müvəqqəti olaraq qohum evində yaşayıram. Nə vaxt müraciət etsək, “vaxtınız çatmayıb, İkinci Qarabağ Müharibəsinə görə əvvəlki şəhidlərə veriləcək evlər müvəqqəti təxirə düşdü” deyirlər. Belə qanun, belə saxtakarlıq olar? Şəhidin köhnəsi, yenisi var? Bütün şəhidlər Azərbaycana aid deyil ki?

2 qız övladım var, çətinliklə dolanıram. Xahiş edirəm bizə dəqiq məlumat versinlər, özləri dediyi kimi, “köhnə şəhidlər”ə ev verilir, ya verilmir?" Bu qədər ayrı-seçkilik olmaz axı”.

Məsələ ilə bağlı Əmək və Əhalinin Sosial Müdafiəsi Nazirliyinin Sosial Xidmətlər Agentliyi ilə əlaqə saxlamağa çalışsaq da, zənglərimiz cavabsız qaldı.

Jalə FAMİLQIZI

Redaksiyadan: Qarşı tərəfin mövqeyini dərc etməyə hazırıq.

Hər ay büdcədən müavinətlərə yüzmilyonlar silinir

Prezident Heydər Əliyev 26.12.2001 tarixli 613 saylı “Kommunal, nəqliyyat və digər xidmətlər üzrə güzəştlərin müavinətlərlə əvəz olunmasının təmin edilməsi haqqında” Fərmanı ilə Azərbaycan dövlətinin ərazi bütövlüyünün, müstəqilliyinin və Konstitusiya quruluşunun müdafiəsində , 1990-cı il 20 Yanvar hadisələrində , Böyük Vətən müharibəsində iştirakla əlaqədar əlilliyi müəyyən edilmiş şəxslərə, müharibə ilə əlaqədar əlilliyi müəyyən edilmiş şəxslərə bərabər tutulunlara, həqiqi hərbi xidmət dövründə Çernobıl qəzasının nəticələrinin aradan qaldırılmasına cəlb edilmiş və həmin qəza nəticəsində əlilliyi müəyyən edilmiş hərbi qulluqçulara – 26 manat; Böyük Vətən müharibəsi iştirakçılarına - 25 manat; həlak olmuş döyüşçülərin dul arvadlarına – 18 manat; Sovet İttifaqı və Sosialist Əməyi Qəhrəmanlarına, üç dərəcəli Şöhrət ordeninin hər hansı bir dərəcəsi ilə təltif olunmuş şəxslərə - 12 manat; Böyük Vətən müharibəsindən sonra vəfat etmiş döyüşçülərin dul arvadlarına – 12 manat aylıq müavinət verilməsini qərara alıb. Nə yazıq, Konstitusiyanın 149-cu maddəsinin IV hissəsi dərc edilmiş fərmanların tətbiqinin və icrasınının bütün vətəndaşlar, icra hakimiyyəti orqanları, hüquqi şəxslər üçün məcburi olmasını doğrulasa da, 22 ildir qüvvədə olan fərman Qarabağ əlillərinə, şəhid ailələrinə tətbiq olunmur. Vurğulayaq ki, fərmandan “şəhid ailəsi üzvlərinin hər birinə -12 manat” sözləri 31 dekabr 2020 tarixli 1223 nömrəli Prezident fərmanı ilə çıxarılıb. Böyük Qarabağ Zəfərindən sonrakı ayda şəhid ailələrinə bu “böyük diqqət və qayğını” sosial yönlü hökumət nə ilə izah edə bilər? Yaxşı, tutaq ki, bu “diqqət və qayğını” anladıq, bəs “həlak olmuş döyüşçülərin dul arvadları” kateqoriyasına şəhidlərin həyat yoldaşları niyə aid edilmir? Yoxsa şəhid- həlak olmuş döyüşçü sayılmır? Elə bu saymazlıq “qayğısı” şəhidlərin dul qalmış həyat yoldaşlarını həlak olmuş döyüşçülərin dul arvadlarına verilən 18 manatdan məhrum edib.
Qarabağ, 20 Yanvar əlillərinə müəyyən edilən 26 manatlıq aylıq müavinətin verilməsindən imtinanı ƏƏSMN tabeliyində DSMF-in qurumları “Sosial müavinətlər haqqında” 06.02.2006 tarixli qanunla “ciblərinə uyğun” yanlışla izah edirlər. “Cibə uyğun” yanlışlıq odur ki, prezident fərmanının tətbiqi və icrasının 2006-cı ildən dayandırılması Qarabağ əlillərinin əmək pensiyası kateqoriyasına keçməsi (?-M.B.) ilə “əsaslandırılıb qanuniləşdirilir”. Təsəvvür edin hətta Milli Məclisin başbilənləri bu “əsaslandırmaya” inanırlar. “Əsaslandırma” o qədər absurddur ki, dövlət hakimiyyəti orqanlarının buna inanmasına heyrətlənməyə bilmirsən. Belə çıxır, müharibə əlilləri 2006-cı ilə kimi prezident fərmanı ilə kommunal, nəqliyyat və digər xidmətlərə görə sosial müavinət alırmışlar, 2006-cı ildən əmək pensiyasına keçiblər . Absurdluğu Böyük Vətən müharibəsi əlilləri və iştirakçılarına münasibətdə sosial məmurların yanlış “təfsiri”nin tətbiq olunmaması ortaya qoyur. Yəni, 80-100 yaşlı ll Dünya savaşı veteranlarına da 100 illiyi bu il bayram edilən Heydər Əliyev 22 il öncə sosial müavinət ayırıbmış? Bəs Böyük Vətən müharibəsi veteranlarının, onların dul arvadların müavinəti 2006-cı ildən “əmək pensiyaçısı olduqlarına görə” niyə kəsilmir, verilməsindən imtina olunmur? Bunu necə izah edə bilər DSMF-in fərmanı “cibinə, qarnına uyğunlaşdıran” məmurları? Biz hələ onu demirik ki, şəxs əlildirsə, mütləq ƏLİLLİYƏ GÖRƏ ya sosial müavinət alır, ya da əmək pensiyası. “Sosial müavinətlər haqqında” qanunun 5-ci maddəsinə görə isə, bir neçə müavinət almaq hüququ olan şəxslərə öz seçimləri ilə biri-ən yüksəyi verilir. Əlillər o qədər ağılsız oldular ki, 150-220-270 manat arası əlilliyə görə sosial müavinəti yox, 6-26 manat arası 25-45 dəfə az “kommunal xidmətlərə görə” müavinətini seçirlər?
Onu da vurğulayaq ki, Prezidentin 26.12.2001 tarixli fərmanında l-ll dərəcəli əlillər, sosial pensiyaçılar, yəni sosial müavinət alanlar da unudulmayıb, onlara da 6 manat kommunal xidmətlərin haqqını ödəməyə aylıq müavinət ayrılıb. Amma bunu da, maliyyə, sosial müdafiə qurumları vermir, özləri mənimsəyir. Bunu vurğulamaqda amacımız prezident fərmanı ilə ayrılan müavinətin sosial müavinət yox, ləğv edilən kommunal və digər güzəştlərin əvəzinə kompensasiya olduğunu maliyyə, sosial məmurların , hökumətin diqqətinə çatdırmaqdır. Yeri gəlmişkən, prezident fərmanının icrasını təmin etmək məqsədi ilə NK-nın 09.01.2002 tarixli, 2 saylı qərarı ilə təsdiq edilən Qaydaların 7-ci bəndində Maliyyə Nazirliyinin ƏƏSMN vasitəsilə müavinət alanlar üçün tələb olunan vəsaiti ƏƏSMN-in , digər orqanlardan vəsait alanlar üçün həmin orqanların xəzinə hesabına köçürməsi doğrulanıb. Belə çıxır, Maliyyə Nazirliyi hər ay dövlət büdcəsindən yüz milyonlarla vəsaiti əlillərə vermək üçün ƏƏSMN-in xəzinə hesabına köçürür, amma əlillərə verilmir ki, əmək pensiyaçısıdırlar.(?) Belə ayda yüzmilyonluqlarla yeyintini Maliyə, ƏƏSM nazirlikləri tək yeyə bilməz. Bəs Hesablama Palatası, bəs Ombudsman, bəs Baş prokurorluq və sair və ilaxir nəzarətedici qurumlar nə yesin?
Prezidentin icra olunmayan daha bir aktının yaşı 23 ildir. 29.12.2000 tarixli, 597 saylı sərəncamla indi 100 yaşı olan Prezident “Əlil olmuş və digər kateqoriyalardan olan bir qrup aztəminatlı vətəndaşlara dövlət yardımının artırılması”nı qərara alıb və Azərbaycan Respublikasını erməni təcavüzündən müdafiə edərkən və 20 Yanvar hadisələri zamanı əlil olmuş şəxslərə 50 (3-cü qrup),60 (2-ci qrup) və 70 min manat (1-ci qrup) müavinət ayırıb. Lakin sərəncamla bu müavinətin 15 min – 25 min manatını ödəməyə təhkim edilən DSMF dövlət büdcəsindən ayrılan hissəsini də vermir, özü yeyir. Xüsusi Şərtlərlə Təyinat üzrə Mərkəzi Filialı isə bu yeyintini də “Sosial müavinətlər haqqında” qanunla kommunal xidmətlərə görə müavinətlərin əmək pensiyasına keçdikdə dayandırılması ilə izah edir. Yeyinti, mənimsəmə özbaşınalığına baxın, Prezident sərəncamında “kommunal”ın adı belə çəkilmir, amma Xüsusi Şərtlərlə Təyinat üzrə Mərkəzi Filialı Qarabağ əlillərinin dövlət yardımını yemələrini “kommunal”la bağlayır. Dövlət hakimiyyəti orqanları -icra, qanunverici və məhkəmə isə bu özbaşınalığa uyur.
Nə isə...100 illiyində də Heydər Əliyevin aztəminatlı şəxslərə fərman , sərəncamlarla ayırdığı müavinətlər verilmədi. Büdcədən isə hər ay yüz milyonlarala vəsait bu müavinətlərə silinir...
Məğrur Bədəlsoy
https://e-qanun.az/framework/179
Teref.az

Tribunainfo.az xəbər verir ki, Bayden cümə günü bildirib ki, o, ilk 20 humanitar yardım maşınının yaxın 24-48 saat ərzində Qəzzaya daxil olacağına inanır.

“Mən israillilərdən və Misir prezidentindən keçidin açılacağına dair öhdəlik götürmüşəm”. – Bayden bildirib.

Gülnar Heydərova Xaçmazın Köhnəxaçmaz kəndində yaşayır. 3 az yaşlı övladı ilə yanaşı öhdəsində xəstə həyat yoldaşı var. Üstəlik yoldaşının xəstə valideynləri də onlar baxırlar. Ailə sosial müavinət üçün hər dəfə müraciət etsə də, onlara imtina gəlir.

“Azərbaycanda effektiv pensiyada olma müddəti 15 ildir və bu rəqəm dünyada olan ən yüksək rəqəmlərdəndir”.

Bakıvaxtı.az xəbər verir ki, bu fikirləri əmək və əhalinin sosial müdafiəsi naziri Sahil Babayev Milli Məclisdə “Heydər Əliyev -100: Müasir Azərbaycan - sosial rifah və sosial ədalət dövləti” mövzusunda keçirilən elmi-praktik konfransda səsləndirib.
“Biz pensiya sistemini dağıtmaq istəyiriksə, istənilən əsası olmayan fikirlər səsləndirmək olar. Gəlin deyək pensiyada qalmaq yaşı 30 il olsun” deyən nazir qeyd edib ki, amma bunun əsasında rəqəmlər, iqtisadi hesablamalar dayanmalıdır axı.

Onun sözlərinə görə, gənclər arasında işsizlik həmişə ümumi işsizlikdən üstün olacaq: “Bu, təbii haldır, dünyanın hər yerində onlar üçün iş tapmaq çətin olacaq. Bunun üçün proqramlar olmalıdırmı, bəli olmalıdır və biz bir çox proqramlar, layihələr üzərində işləyirik.

Nazir deyib ki, bəzi şəxslər mövzunu başqa yerə aparırlar. Deyirlər pensiya yaşı 50-55 yaşa endirilməlidir. Bunu deyən şəxslər fərqində deyillər ki, araşdırma aparmadan dedikləri bu fikirlər Azərbaycanın gələcəyi üçün nələr vəd edir”.

Ceyhun Məmmədov: Qadınların pensiya yaşının azaldılmasını istəyirəm, amma…

Deputat Ceyhun Məmmədov Bakıvaxtı.az-a açıqlamasında bildirib ki, pensiya yaşının 50-55-ə endirilməsi ilə bağlı yanaşma yanlışdır. Onun fikrincə, bu, bizim üçün gələcəkdə, həqiqətən də, müəyyən problem yarada bilər: “Gələcəkdə müəyyən çətinliklər yaşaya bilərik. Düşünürəm mi, xüsusilə qadınların pensiya yaşına diqqət etməliyik. Pensiya yaşı kişilər üçün 63, qadınlar üçün isə 60 olması daha məqsədəuyğundur”.

Deputat qadınların pensiya yaşının daha da azaldılmasını istəyir: “Ancaq indiki vəziyyətdə xərcləri nəzərə alaraq, qadınların təqaüd yaşının, heç olmasa, 60 olmasını təklif edirəm. Düşünürəm ki, belə daha yaxşı olar və insanların rifahına öz töhfəsini verər. Biz bu istiqamətdə işləyirik”.

Müsahibimiz qeyd edib ki, lakin 55 yaş, həqiqətən də, kadr qıtlığı yarada bilər: “Eyni zamanda, belə hal dövlətin maliyyə qıtlığını daha da artıra bilər. Ona görə, hesab edirəm ki, bu kimi məsələlərdə daha diqqətli olmalıyıq”.

Kamran Əsədov: Pensiya yaşını aşağı salsaq, kadr çatışmazlığı yaranar

Təhsil eksperti Kamran Əsədov Bakıvaxtı.az-a açıqlamasında bildirib ki, hazırda Azərbaycanda 51 ali təhsil müəssisələrində 187 min tələbə təhsil alır: “Hər il ali təhsil müəssisələrinin bakalavr pilləsindən əmək bazarına 40 minə yaxın insan daxil olur. Həmçinin, orta ixtisas təhsil müəssisələrindən, ümumilikdə, 22 mindən çox şəxs əmək bazarına daxil olur. Ancaq hələ də baxırıq ki, müəyyən sahələrdə işçi çatışmazlığı var. Bunun bir neçə səbəbi var. İşəgötürənlər məzunların bilik və bacarıqlarından razı olmurlar. Yəni həmin məzunlar müsabiqələrdən uğurla keçə bilmirlər. Ona görə də, Sahil Babayevin dediyi doğrudur. Pensiya yaşını aşağı salsaq, həmin şəxsləri əvəzləyəcək kadrlar çatışmayacaq”.

Ekspert qeyd edib ki, bu gün Elm və Təhsil Nazirliyinin keçirdiyi MİQ imtahanlarından sonra baxırıq ki, imtahanda iştirak edən 50 min nəfərdən 25 mini minimum keçid balını toplaya bilir: “Orta məktəblərdə hələ də minlərlə vakant yer var. Yəni həmin şəxsləri birdən birə təqaüdə göndərsək, kadr problemimiz olacaq”.

K.Əsədov bildirib ki, bizim kifayət qədər məzunlarımız var, amma onların bilik və bacarıqları əmək bazarının tələblərinə, müasir standartlara uyğun deyil. Həmçinin, onlar minimum müsabiqə şərtlərini ödəmirlər. Onları işə götürmək bizə daha ciddi problem yaradacaq.

Bakıda pilot layihə kimi binalar və fərdi evlərin söküntüsü zamanı əhaliyə yeni tikiləcək binalardan mənzillər və ya kompensasiya təklif olunur. Vətəndaşlar istəkdən asılı olaraq daşınmaz əmlaklarına görə sökülən evləri qarşılığında kompensasiya alırlar.
Bəzən vətəndaşlara təqdim olunan kompensasiyanın həcmi böyük narazılıq doğurur. Belə ki, tikinti şirkəti ilə razılaşmayan sakinlər onlara təqdim edilən pulun az olmasını əsas gətirərək evlərini tərk etməkdən imtina edirlər.
Bəs sökülən evə görə mənzil sahibinə nə qədər kompensasiya ödənilməlidir?
Məsələ ilə bağlı Referans.az-ın sorğusunu cavablandıran əmlak məsələləri üzrə ekspert Elnur Fərzəliyev bildirib ki, Bakıda inşa olunan pilot layihələrdə vətəndaşların narazı qaldığı əsas məsələlərdən biri kompensasiyanın ödənişidir:
“Nazirlər Kabinetinin 86 saylı qərarına əsasən Bakıda pilot layihələr üzərindən köhnə, istismar müddətini bitirmiş və qəzalı vəziyyətdə olan binaların sökünütüləri başlanıldı. Bu günə qədər onlarla köhnə çoxmənzilli yaşayış binaları sökülərək yeni tikili binalarla əvəzləndi. Hazırda söküntü işləri sürətlə davam edir ki, burada sökünütü işlərini aparan öz sektordur ki, həmin binaları sökür, onların yerində yeni binalar inşa edir və mənzil sahiblərinə sökdükləri gündən etibarən kirayə pulu verir, köç xərclərini verir”.
Ekspert qeyd edib ki, daha sonra həmin sakinlərə sökdükləri binaların yerindən 20 faizdən artıq sahəsi olan mənzillər təhvil verilir. Onun sözlərinə görə, vətəndaşa ödənilən kompensasiya təqribən həmin 20 faiz ümumi artıq sahədir: “Bu da vətəndaşın təqribi 2-3 il müddətində gözlədiyinə görə olan kompensasiyalardır. Bundan əlavə həmin ərazilərdə sökülən evlərin əvəzinə vətəndaşa yeni tikili binadan verilən mənzillərin satış qiymətindən vətəndaşın köhnə mənzilinin satış qiymətindən demək olar ki, 2 dəfəyə qədər baha qiymətə bazarda dəyərləndirilir”.
Bəzi ərazilər də var ki, özəl şirkətlər həmin əraziləri sökərək yerində hər hansısa bir tikinti işləri aparır, o zaman isə vətəndaşa verilən məbləğ ərazi üzrə qiymətləndirilir və bazar qiymətinə uyğun olaraq vətəndaşlara kompensasiya verilir – deyə Elnur Fərzəliyev əlavə edib.