 |
|
|
Xəbər verdyimiz kimi, AMEA-nın Rəyasət Heyətinin qərarına əsasən, Folklor İnstitutunun Musiqi folkloru şöbəsi ləğv edilib və bu səbəbdən institutun Elmi Şurasının qərarı ilə “Qorqud” ansamblının da fəaliyyətinə xitam verilib.
DİA.AZ bildirir ki, “Qorqud” ansamblının rəhbəri, Əməkdar artist Nuriyyə Hüseynova Pravda.az-a müsahibəsində AMEA-nın qərarı ilə bağlı etirazını bildirib.
O deyib ki, təkcə Musiqi şöbəsini yox, AMEA-da bir çox qurumları ləğv edirlər: “Niyə ləğv etdiklərinin səbəbini bilmirəm. Bizə, sadəcə deyiblər ki, gəlin hamınız ərizə yazın. Çox üzülürəm. Mən sənət insanıyam, səhnədəyəm, səfərlərim, səhnə, televiziya fəaliyyətim, ictimai insan kimi fəaliyyətim dayanmır. Ansamblda oldum-olmadım, bu, həmişə davam edəcək. Sadəcə, işləmək istəyirdim. Biz yaradıcı insanlarıq, bizim üçün hər yerdə iş də var. Fəaliyyətimiz təkcə ansambldan ibarət deyil ki, deyəm “bağlandı, qaldıq havada”. Xeyr. Məsələ bu deyil. Söhbət ansamblın üzvlərindən gedir, özümü kənara qoyuram. Ansamblın elə üzvləri var ki, gözlərini ordan aldıqları maaşa dikiblər. Birtəhər, zülmlə dolanırlar, toya, şou proqrama getmir, sırf ciddi musiqiyə xidmət edirlər. Onsuz da maaşlar azdır, ansambldan elə yüksək maaş da almırdıq… Bəziləri sənətə yaxşı yaşamaq, maddiyyat üçün gəlir. Gündəlik insanları əyləndirəcək musiqilərlə üzə çıxırlar, insanlar da onlara daha çox meyil edir. Onların qazanc yeri, toyları, tədbirləri həmişə olur. Amma ciddi sənətə xidmət edən insanlar yalnız maaşla dolanırlar. Ansamblın ləğv edildiməsi ilə bağlı qərar veriləndə deməyə söz tapmadım. Dedim ki, artıq sözün bitdiyi yerdir. Bundan sonra necə olacaq, deyə bilmərəm. Xatırlayıram ki, cənab Prezident İlham Əliyev folklor ansambllarının inkişafı ilə bağlı çıxış etmişdi. Həmin çıxışdan sonra bizi V Xarıbülbül Beynəlxalq Folklor Festivalına dəvət etdilər. Bölgələrimizdə fəaliyyət göstərən bir çox folklor ansamblları ilə birgə festivalda çıxış etdik. Möhtəşəm tədbir idi. Xalqın milli-mənəvi sərvəti onun folkloru, milli ənənələri, keçmişidir. Biz bununla varıq. Düşündük ki, bundan sonra fəaliyyətimiz daha gözəl olacaq, irəli gedəcəyik, inkişaf edəcəyik. Amma qışın bu oğlan çağında, insanların dolanışığının çətin vaxtında, bu bahalıqda, iş yeri tapmamış deyirlər ki, ansambl ləğv edildi. Musiqi folkloru şöbəsi AMEA-nın Memarlıq və İncəsənət İnstitutunun nəzdinə verildi. Şöbənin işçilərini də ora göndərdilər. Düşündüm ki, yəqin, bizi də göndərərlər. Amma olmadı. Birbaşa dedilər ki, hamı gedib özünə iş tapsın. İşi olmayan da gedib evdə otursun...”
O, ansamblın üzvlərinin AMEA-nın qərarı ilə bağlı müraciət edib-etmədikləri sualına isə belə cavab verib: “Mən demokratik bir insanam. Demokratiyanı anarxiya hesab edən adamları tənqid edirəm. Demokratiya “anarxiya” demək deyil. İnsan kimi demokratiyanı sevirəm. Kiməsə basqı etməyi, kimisə nəyəsə məcbur etməyi sevmirəm. Ayrı-ayrılıqda hər kəsi danışdırsanız, görərsiniz. Hətta İnstitut mənə ayrıca bir otaq da vermişdi, öz otağım idi. Amma mən o otağa bir dəfə olsun, girmirdim ki, özümü rəhbər kimi aparım. Uşaqlara deyirdim ki, biz yaradıcı insanlarıq, sənət adamlarıyıq. Bizim işimiz səhnədir, ortaya gözəl işlər qoymaqdır. Nə rəhbər? Hamımız sənət dostlarıyıq. Həmişə də belə olub. Buna görə də ansamblın heç bir üzvünə deyə bilmərəm ki, etiraz et. Bilmirəm bunun kökündə nə durur. Ola bilsin, AMEA maaş verə bilmir, ona görə ansambl bağlanır”.
N.Hüseynova bildirib ki, “Qorqud” ansamblının öz dəsti-xətti var olub: “Mən işləməyi çox sevirəm. Sənətimi o qədər çox sevirəm ki. 30 ildən artıqdır, ansambl “İrs” adı ilə fəaliyyət göstərirdi. Sidqi Mustafayev pensiyaya gedəndən sonra ansambla rəhbərlik etdim. 2014-cü ildən bu günə qədər ansamblımızın Beynəlxal Muğam Mərkəzi ilə birgə imzaladığımız müqaviləyə əsasən, AZTV-nin də lentə aldığı dövlət tədbirləri, böyük layihələr oldu. Hamısının ideya müəllifi mən idim. Vətən müharibəsində qazandığımız qələbə ilə bağlı ötən il gözəl bir konsert proqramımız baş tutdu. Sonra qazilərimiz, şəhid ailələrimiz üçün bir tədbir keçirdik. Nəsimiyə, Hüseyn Cavidə həsr olunmuş gecə, AXC-nin 100 illiyi ilə bağlı, eyni zamanda “Şuşa İli” çərçivəsində tədbir keçirdik. Bu kimi xeyli tədbirlərimiz oldu. Bilmirəm hansını deyim. Naxçıvanda böyük alim, folklorşünas, 174 növ “yallı” növünü nota köçürən bir insan – Əkrəm Məmmədlinin varlığını belə hiss etməmişdilər. Mən onu Bakıya gətirdim, kitabının təqdimatını etdik, böyük tədbir keçirdik. Uzun illər “İrs” ansamblında fəaliyyət göstərən Mələkxanım Əyyubovanın 60 illik yubileyini qeyd etdik. Sonuncu tədbirimiz Əhməd Cavada həsr olunmuş gecə idi. Bundan sonra növbəti tədbirimiz fevralın 15-də Heydər Əliyevin 100 illiyinə həsr olunmuş “Bir millət, iki dövlət” tədbiri olacaqdı. Tədbir Mədəniyyət Nazirliyi, AMEA, Beynəlxalq Muğam Mərkəzinin birgə layihəsi idi, Türkiyədən gələn sənətçi Orxan Çakmakın dəstəyi ilə keçiriləcəkdi. Türkiyədə baş verən fəlakət səbəbilə tədbir təxirə salındı, fevralın 23-nə keçirildi. Yəqin ki, AMEA-nın adı artıq qeyd olunmayacaq. Türkiyədən də sənətçilər gələcək. Tədbirin proqramına dəyişiklik etdik, şən musiqilər çıxarıldı. Əsas Allah bizə maneə olmasın, bəndənin maneə olması mənim üçün önəmli deyil. Martın 16-na Yunis Əmrə İnstitutu ilə birgə Beynəlxalq Muğam Mərkəzində “Aşıq Veysəl”in gecəsini hazırlayırıq. Bu, mənim işimdir, zövqlə, sevə-sevə edirəm. Əməyimlə, zəhmətimlə buralara qədər gəlib çıxan sənətçiyəm. Amma belə çıxır ki, işləyən adam lazım deyil. Gözləyək…”
N.Hüseynova bildirib ki, Türkiyədə folklor musiqiləri, milli ansambllar həddən artıq çoxdur: “Türk Dünyası ilə bağlı tədbirlərə gedəndə hamısını görürəm. Bir qrupda 70-80 nəfər adam olur. Hamısı da dövlətdən maaş alır. Amma bizdə folklor ansamblı, demək olar, yoxdur. Rayonlarda var, amma dövlət səviyyəsində deyil. Mədəniyyət evlərinin nəzdində olurlar, ya da özəl fəaliyyət göstərirlər. “Qorqud” ansamblı isə sırf dövlətdən maliyyələşirdi. Çox deyildi, bir idi. Kaş belə olmazdı. Heç yaxşı şey deyil. Həmişə deyirsən ki, il ildən daha gözəl olacaq. Biz yaşımızın ən gənc vaxtlarından bu sənətə gəldik. Mən müsabiqədən keçib, ən birinci Heydər Əliyevin göstərişi ilə Bakıya gəlmişəm, ulu öndərin göstərişi ilə Bülbül adına məktəbdə, Konservatoriyada təhsil almışam. Bu boyda əziyyət, təhsil… Həm ailə, ev, uşaq, həm bu sənətin yükü… Çox çətindir. Mən bu yükü üzərimə alıb, çox çətinliklə bu günə qədər daşıyıb gətirmişəm. Düşünmüşəm ki, hər il daha yaxşı olacaq, əməyimə, zəhmətimə dəyər veriləcək. Gözləyə-gözləyə gəldik, müəyyən yaşa çatdıq. Gördük ki, yox, əməyin nə dəyəri, nə qiyməti var. Dünən şou ilə gəlib üzə çıxan, ölkənin mənəviyyatını pozan adamlar səndən qat-qat öndədir. Həm maddi, həm mənəvi – hərtərəfli səndən qat-qat üstün və gözəl yaşayır. Buna görə də insan qəribə hallara düşür ki, əcaba, onda mən nə üçünəm, kimə lazımam? Təkcə özümü nəzərdə tutmuram, mənim kimi xeyli sənət adamı var. Bu insanlara qarşı bu qədər laqeyd, diqqətsiz olmaq olmaz. Bu Vətən bizimdir. 44 günlük müharibədə oğlum, kürəkənim, bacımın oğlu – üç hərbçini Qarabağa, döyüş bölgəsinə göndərmişdim. Oğlum minlərlə yaralı əsgəri səhra hospitalında əməliyyatla həyata qaytarıb. Könüllü gedib, orda can qoyub. Bu ölkənin vətəndaşıdır, borcu idi, getməli idi. Kim hansı sahədə çalışırsa, əlindən gələni bu Vətən, millət, dövlət üçün etmək onun müqəddəs borcudur. Buna görə heç kimə təşəkkür düşmür. Bütün terror, xoşagəlməz hadisələr, zəlzələlər və s. niyə müsəlman ölkələrindədir? Niyə xristian ölkələrində baş vermir? Gəlin, bəzi şeyləri özümüzlə əlaqələndirək. Görək, “Quran”da yazılanlara, İslamın qaydalarına müsəlman ölkələrində nə dərəcədə əməl olunur? Əməl olunsaydı, Türkiyə kimi dindar bir ölkədə - ideal saydığımız Türkiyə dinə daha çox riayət edir – insan oğlu Allahın tövsiyyə etdiyi dürüstlüyə əməl edirmi? Etsəydi, bu faciə niyə yaşanırdı? Yerlə-yeksan oldu. Niyə? Göydən yerə gələn, toz olan binalar... Həlak olan dörd tələbəmizə baxanda ürəyimin yağı əriyir. Bacardığım qədər Vətənimə, mədəniyyətimə xidmət edirəm. Amma baxıram ki, bu qədər fəaliyyətimiz var, ölkəmizə sevgimiz, sayğımız… Görürəm ki, heç biri qiymətdə deyilmiş…”
“Biz telekanalda ştatda olan işçisiyik. Verilən açıqlamada isə bizi kənar müəllif” adlandırıblar. Məsələ sadədir. Videomüraciət yayımlandı. Sabahı isə işdən dərhal verilişin bağlandığı deyildi. Amma indi özləri də narahat olublar. Çünki ölkə rəhbərinin bu videomüraciətə müsbət cavab verəcəyi ilə bağlı xəbərlər dolaşır”.
Gununsesi.info bildirir ki, bu sözləri bir neçə gün əvvəl Prezident İlham Əliyevə dublyaj sahəsində mövcud problemlərlə bağlı müraciət edən aktyor, aparıcı, Kamal Yaşar bildirib.
O bildirib ki, bu gün AZTV-nin kadrlar şöbəsinə əmək müqaviləsinin xitam verilməsi ilə bağlı müraciət etsə də bunu etməyiblər: “Mən hazırda şöbəsindən gəlirəm. Dedim ki, gətirin qol çəkim xitam müqaviləsinə. Dedilər yox, gözləyin, bir şey var onu araşdıraq. Yəni TV-nin bu absurd qərarı tələsik və mənasızcasına verilib”.
K.Yaşar bildirib ki, sabah Mədəniyyət Nazirliyi onu görüşə dəvət edib. “Ona görə tv də etdiyinin yanlış və tələsik qərar olduğunu anlayır”.
Aparcı bildirib ki, AZTV sədrinin iddia etdiyi kimi deyil: “Biz bu ayın verilişlərini çəkmişik. Hətta Xocalı faciəsinin ildönümü ilə bağlı kanalın tələb etdiyi verilişi də çəkmişik, ayın 25-i efirə getməli idi”.
O, daha sonra AZTV-nin əməkdaşı olmasını təsdiq edən vəsiqənin fotosunu paylaşıb.
Xəbər verdiyimiz kimi, bu gün AzTV tanımış dublyaj aktyoru Kamal Yaşarın işdən çıxarılması, verilişinin bağlanması ilə əlaqədar açıqlama yayıb.
Açıqlamada, “bu il kollektivə daha bir imkan verilsə də, reytinq toplamadığı üçün yayımının dayandırılmasına qərar verildi. Bunu hansısa açıqlama və paylaşımla əlaqələndirmək fikri başqa istiqamətə yönləndirməkdən, süni ajiotaj yaratmaqdan başqa bir şey deyil”, – deyə bildirilmişdi.
Məsələ ilə bağlı Kamal Yaşar Yeniavaz.com-a açıqlama verib. O bildirib ki, prosesin reytinqlə heç bir əlaqəsi yoxdur:
“Veriliş reytinqinin aşağı olması və sair barədə bu günə qədər mənə heç bir söz deyilməyib. Hətta, əməkdaşlığımız yaxşı davam edirdi. Xocalı Soyqırımına aid bir veriliş hazırlamışdıq. Bu ay həmin proqram yayımlanmalı idi. Öz xərcimizlə hazırlamışıq. Nə oldu ki, yaydığım videomüraciətin sonrasında AzTV belə bir addım atdı? Mən orada yanlış bir söz işlətməmişdim. Sadəcə Prezidentə belə bir problem barədə xəbər vermək istədim. Çünki, başqa hara müraciət etmişəmsə baxmayıblar. Prezident əgər mənim müraciətimə müsbət reaksiya versə AzTV o zaman necə addım atacaq?”
Qeyd edək ki, K. Yaşar sosial şəbəkə hesabı vasitəsilə Prezidentə dublyah sahəsində olan bəzi problemlər barədə müraciət ünvanlamışdı.
Məşhur aktyor Çağrı Çıtanakın anası Kahramanmaraşda baş verən və 10 vilayətdə dağıntılara səbəb olan zəlzələdə dağıntılar altında qalıb. Günlərdir anasının tapılması üçün kömək istəyən aktyorun aldığı acı xəbər onu sarsıdıb. SİA xəbər verir ki, fevralın 6-da episentri Kahramanmaraşda baş verən 7,7 və 7,6 bal gücündə zəlzələlər Adana, Adıyaman, Diyarbəkir, Qaziantep, Hatay, Kahramanmaraş, Kilis, Malatya, Osmaniye və Şanlıurfada dağıntılara səbəb olub.
Başak Gümulcinelioğlu ilə evli olan aktyor Çağrı Çıtanakın anası da zəlzələdə yaralanıb. Günlərdir sosial media hesablarından anaları üçün kömək istəyən cütlük pis xəbəri açıqlayıb. İlk gündən axtarış-xilasetmə prosesləri ilə bağlı tez-tez paylaşımlar edən gözəl aktrisa bu gün acı xəbəri verib. İnstaqram hesabında paylaşım edən Gümülcinelioğlu "Anamızı itirdik... Başımız sağ olsun" deyib.
Şair, publisist Qəşəm Nəcəfzadə Birinci vitse-prezident Mehriban Əliyevanın ona Bakıda mənzil hədiyyə etməsinə münasibət bildirib.
DİA.AZ bildirir ki, Q.Nəcəfzadə Pravda.az-a açıqlamasında Prezident İlham Əliyevə, Birinci vitse-prezident Mehriban Əliyevaya təşəkkür edib.
“Bu, çox böyük qayğı, diqqətdir. Həmişə ziyalılarımıza, mədəniyyət xadimlərimizə qayğı göstərirlər. Mənə göstərilən də həmin o qayğılardan biridir”, - o deyib.
Q.Nəcəfzadə oğlu Kəramət Böyükçölün onu təbrik edib-etməməsinə isə belə cavab verib: “Əlbəttə, Kəramət niyə təbrik etməsin ki? O da çox sevinir…”
O, “Qəşəm Nəcəfzadənin hökumətə münasibəti loyal olsa da, oğlu Kəramət Böyükçöl müxalifdir” deyənlərə, bəzilərinin bunu “şou” adlandırmasına da münasibət bildirib: “Vallah, bu barədə heç bir münasibət bildirmirəm. Nə deyim? Camaat durub elə şeylər deyir ki. Belə olmaz. Bu, ev məsələsidir, könül məsələsidir. Kəramət də çox sevinir, mən də. Evimiz-eşiyimiz ailəmizindir. Burada pis nə var ki?”
Azərbaycan Respublikası Prezidentinin fərmanı ilə yaradılan Azərbaycan Respublikasının Kino Agentliyi publik hüquqi şəxsin ən yaxın zamanda fəaliyyətə başlaması üçün Nazirlik tərəfindən aidiyyəti qurumlarla birgə lazımi tədbirlər həyata keçirilir.
DİA.AZ bildirir ki, bu barədə Trend-in sorğusuna cavab olaraq Mədəniyyət Nazirliyindən bildirilib.
Bildirilib ki, quruma rəhbər təyinatı, onun strukturunun təsdiq olunması, maddi-texniki baza ilə təmin edilməsi və s. istiqamətlərdə müvafiq işlər görülür.
Qeyd edək ki, Azərbaycan Respublikası Kino Agentliyinin(ARKA) əsas məqsədi bu sahəyə investisiyaların, sərmayələrin cəlb olunması, xarici investorları kino sənayemizə cəlb etmək və bununla da Azərbaycan kinosunun inkişafına nail olmaqdır.
Azərbaycanda son zaman çəkilən serialların sitahısını istənilən qədər uzatmaq olar, mahiyyəti bir şey olmasa da.
Bir neçə il bundan əvvəl, yerli seriallar çəkək, deyə xarici serialların yayımı qadağan edildi. Və bundan sonra arxa-arxaya çəkilən serial bənzətmələrinin içindən, bir neçəsini çıxmaq şərtilə qalanlarının nə demək istədiyini başa düşmək belə mümkün olmadı. Təəssüf ki, bu gün efiri başına alan bu seriallarda nə süjet xətti, nə normal danışıq üslubu, nə də ki, ötürmək istədiyi mesaj var. O seriallardan bir örnək - “Bir qadın” adı verilən “seriala” baxanda nə görürük? Hamı bir-birinə qışqırır, ailədə nə böyük bilinir, nə kiçik. Heç kim bir-biri ilə normal ünsiyyətə girmir.
Evin anası, yaşlı-başlı xanım özvladları ilə danışanda ən yaxşı halda “Yaxşı edirəm, azz. Əcəb edirəm.
Nə istəyirəm onu da edirəm...”, “O restoranı sənin gözüvə soxaram...” kimi ifadələrlə danışır. Ümumiyyətlə, ana balaya, gəlin qaynanaya, qardaş bacıya, oğul anaya ağzına və ağlına gələni deyir. Əvvəldən axıra gərgin musiqi fonunda çığır-bağır, vəssalam.
Çoxumuz bu mövzulardan söz düşən kimi “Azərbaycan televiziyalarını izləmirik”-deyib yaxasını kənara çəkir. Amam yalandır, bu seriallarla kifayət qədər beyni, əxlaqı zəhərlənən kütlə yaranıb artıq.
Audiovizual Şurasından qurumun Aparat rəhbəri Fazil Novruzov məsələyə müansibət bildirib. Dia.az-ın məlumatına görə, Bizim.Media-nın bu gün efirdə yayımlanan serialların vəziyyəti ilə bağlı ünvanladığı suala Novruzov cavab olaraq bildirib ki, “Media haqqında” Azərbaycan Respublikası Qanununun 5.4-cü maddəsinə əsasən media sahəsində fəaliyyət yaradıcılıq və redaksiya müstəqilliyi əsasında həyata keçirilir:
“Yəni, audiovizual yayımçılar hər hansı bir mövzuda proqram (o cümlədən, serial, film və s.) hazırlayarkən və ya sifariş edərkən redaksiya müstəqilliyi prinsiplərinə uyğun olaraq onun mövzusunu, üslubunu və digər xüsusiyyətlərini müəyyənləşdirməkdə sərbəstdirlər. Qeyd olunan proqramlarda (o cümlədən, serial, film və s.) sanksiya nəzərdə tutulmuş qanun pozuntusu faktı halı aşkarlandıqda Şura tərəfindən qanunla müəyyən edilmiş səlahiyyətlər daxilində müvafiq tədbirlər görülür”.
Bəs, bu məsələ ilə bağlı ekspertlər nə düşünür?
Sosioloq, iqtisad elmləri doktoru Əhməd Qəşəmoğlu bizə açıqlamasında bir sıra məqamlara toxunub:
“Təəssüf ki, bizim serial yaradanların əksəriyyəti onun mahiyyəti, yaradılma səbəbi ilə bağlı məlumatsızdırlar. Vaxtilə serialların yaradılmasında psixoloq və sosioloqların çox ciddi rolu olub. Əvvəllər filmlər uzağı 3 serialı olurdu. Sonradan seriallar meydana çıxdı. Mütəxəssislər-sosioloq, psixoloqlar düşündülər ki, əhalinin arasında elə adət-ənənələr, vərdişlər var ki, onu dəyişməyə ehtiyac var.
Yəni, elə mənfi şeylər var ki, onu ortadan çıxarmaq, ya da müsbət nələrisə yaratmaq lazımdır. Və bu teleseriallar ona görə çoxserialı olur ki, əhali arasında ideyaları gündə bir qədər və damcı-damcı yayır. İnsanlarda neqativ mentalitet, davranış, hər hansı hadisəyə münasibət dəyişir. Bu amil teleserialın yaranmasının əsas fəlsəfəsidir. Amma bizdəkilər elə bilir ki, caamatın başını qatmaq üçün serialları uzatmaq lazımdır”.
Ekspert qeyd edib ki, serial çəkənlərimiz bu işin fəlsəfəsini yaxşı bilmədiklərindən bir az Türkiyədən, bir az Venesuela, Kolumbiya və Amerikadan köçürür, guya maraqlı nəsə edir, gərginlik yaradırlar və s.
Əslində onların etdiklərinin teleseriala dəxli olmadığını deyən Əhməd Qəşəmoğlu serialın dərman kimi təsirindən bəhs edib:
“Serial dərman kimi bir şeydir. Dediyim kimi, serallar insanların psixologiyasında xüsusi olaraq davranışların dəyişdirilməsi üçün nəzərdə tutulub. Seriallardan əhali arasında düşməncəsinə də istifadə etmək olar, ya da əksinə. Hər bir xalq dərindən düşünməlidir və elə seriallar yaratmalıdır ki, əhalinin xarakterində olan mənfi halları dəyişdirsin. Seriallar o qədər bədiiləşmiş şəkildə olmalıdır ki, insanların xarakterinə təsir edə bilsin”.
Teleserialı yalnız kino işçiləri yarada bilməz...
Müsahibimiz deyir ki, “Mən yaxşı rejissoram, gözəl serial çəkəcəyəm” düşüncəsi yanlışdır.
Onun sözlərinə görə, rejissor serial yaradanda psixoloq, sosioloq, sosial işçi ilə, ən azından məsləhətləşməli, birlikdə iş aparmalıdır:
“Teleserialı yalnız kino işçiləri yarada bilməz. Bizdə isə belə deyil. Ona görə serial yaradanlar özləri də axıra kimi nə etməli olduqlarını bilmirlər. Bu xaotiklik də ona görə yaranır. Bu istiqamətdə çox ciddi iş aparılmalıdır”.
Şuranın qarışmaması doğru deyil...
Sosioloq bildirib ki, Şuranın yaradıcılıq işlərinə qarışmamaqla bağlı səsləndirdiyi fikir doğru deyil:
“Mənim adımdan bunu səsləndirə də bilərsiniz ki, sosioloq qurumun səhv etdiyini deyir. Yaradıcılığa qarışmıram nə deməkdir? Bu əhalinin mənəviyyatına təsir edən bir vasitədir. Elə bil ki, kimsə havanın ekologiyasını çirkləndirsin, əlaqədar nazirlik də desin ki, yox mən bu işə qarışmıram. Bu iş ümumxalq işidir və ciddi əhəmiyyət daşıyır.
Ona görə də Mədəniyyət Nazirliyinin də, Şuranın da, humanitar siyasətlə məşğul olan idarələrin də bu işlə maraqlanmaq, doğru olmayana qarışmaq borcudur. Bu diqqət mərkəzində olan məsələ olmalıdır.
Kimin kefi necə istədi, mən yaradıcıyam, rejissoram belə bir şey yaratmışam, belə olmaz. Yaradırsan, get nəsə maraqlı bir şey yarat. Mənə təsir edən bir şey var ki, son vaxtlar Orta Asiya ölkələri, elə qonşularımız özləri də bizdən daha yaxşı seriallar yaradırlar. Təəssüf ki, bizə bu işlər başlı-başına buraxılıb”.
İranın tanınmış kinorejissoru Məhəmməd Rasulof fevralın 12-də yeddi ay həbsdə qalandan sonra Tehrandakı bədnam Evin həbsxanasında azadlığa buraxılıb.
“AzPolitika.info” xəbər verir ki, 2020-ci ildə “Şər yoxdur” filmi Berlin film festivalının ali mükafatını almış Rasulof iyulda həbs olunub.
O, Abadan şəhərində ölümlərə səbəb olmuş bina uçqununa etirazlara hökumətin divan tutmasını tənqid etdiyinə görə həbsə atılıb.
Rasulof ölkənin digər incəsənət adamları və fəalları ilə birlikdə hakimiyyətə müraciətlə “Silahlarınızı yerə qoyun” çağırışı yer alan bəyanata imza atmışdı. Onun həbsi daha öncə kəsilmiş birillik həbs cəzası ilə əlaqələndirilmişdi.
“Səhhətimdə heç bir problem yoxdur! Yayılan xəbərlər şayədir, yalandır. Bu yalnış xəbərlər sevənlərimi də, sənət yoldaşlarımı da üzüb. Hamısı zəng edib, soruşur. Bu günlərdə tezlikə, yeniliklərlə efirlərə qayıdacam”
DİA.AZ bildirir ki, bunu Moderator.az-a özəl açıqlamasında xalq artisti, sevilən sənətkar Nisə Qasımova deyib.
Sənətkar bu sözləri ilə də haqqında yayılan bütün xəbərləri yalanlayıb.
Qeyd edək ki, BakuPost.az saytı xalq artistinin insult keçirdiyini yayıb.
Türkiyədə dağıdıcı zəlzələdən sonra dağıntılar altından müxtəlif yaşlarda uşaqlar xilas edilib.
Ailəsini itirən və zəlzələdən sağ çıxan uşaqları himayə etmək üçün Türkiyənin Ailə və Sosial Xidmətlər Nazirliyi şərtləri açıqlayıb.
Cebhe.info xəbər verir ki, bir neçə məşhur bununla bağlı müvafiq quruma müraciət etdiyini açıqlayıb.
Müğənni Petek Dinçöz sosial şəbəkə hesabında həyat yoldaşı Nida Büyükbayraktarla zəlzələ nəticəsində ailəsini itirən uşaqlardan birini himayə etməyə qərar verdiklərini yazıb. O, bunun üçün müraciət etdiklərini də qeyd edib.
Bundan başqa, modelyer Burcu Sedef və aktrisa Handa Erçelin bacısı, sosial media fenomeni Qamze Erçel həyat yoldaşı Caner Yıldırımla övladlığa uşaq götürmək üçün müraciət etdiklərini və cavab gözlədiklərini bildiriblər.