Türkiyə prezidenti Rəcəb Tayyib Ərdoğan İlk türk astronavtı Alper Gezeravcıya yüksək vəzifə verib.

Bakupost.az Türkiyə mediasına istinadla xəbər verir ki, Gezeravcı Türkiyə Kosmik Agentliyinin İdarə Heyətinin üzvü təyin edilib.

Tanınmış vəkil Əkrəm Həsənov Azərbaycanda süni mayalanma zamanı kişilərin aldadılması haqda status yazıb. Vəkil həkimlərin qadınlarla əlbir olaraq cinayətə bərabər əmələ yol verdiklərini, nəticədə "bicbala"ların dünyaya gəldiyini vurğulayıb.

TEREF vəkilin bu xüsusda yazdığı statusu təqdim edir:

"Ali Məhkəmənin təəccüblü mövqeyi: süni mayalanmaya gedən kişilər, ehtiyatlı olun!

Övladı olmayanların süni mayalanmaya əl atması halları artır. Məlum olduğu kimi, həkimlər ər və arvadın hüceyrələrini götürərək embrion yaradır və qadının bədəninə yerləşdirirlər. Lakin necə əmin olaq ki, həkimlər məhz ər və arvadın hüceyrələrindən istifadə edirlər? Bəlkə hüceyrələr donorlara məxsusdur? Söz açacağım hadisə məhz bu qəbildəndir.

İşin təfərrüatları Ali Məhkəmənin Mülki Kollegiyasının 2(102)-586/2021 saylı iş üzrə 15 mart 2021-ci il tarixli Qərarında əks olunub. Onu dərc edir və işin mahiyyətini qısaca izah edirəm.

Deməli, süni mayalanma nəticəsində ailədə əkiz övladlar dünyaya gəlib. 7 ildən sonra boşanıblar. Bu əsnada arvad kişiyə deyib ki, sən heç uşaqların atası da deyilsən (amma aliment tələb edib və alıb da). Sən demə, kişi tam sonsuzdur. Kişinin dediyindən belə çıxır ki, bunu bilən həkim (Türkiyə əsilli Öndər Tulumbacı) arvada başqa kişinin donorluğundan istifadə etməyi təklif edib, o da razılaşıb. Amma bunu kişidən gizlədiblər.

Kişi məhkəməyə müraciət edərək, atalığının ləğv olunmasını tələb edib. Amma başda Ali Məhkəmə olmaqla məhkəmələr iddianı təmin etməyiblər (yəni kişi ata kimi qalıb və aliment ödəməyə məcbur edilib). Bu zaman Ali Məhkəmə iki arqument gətirib: 1) bioloji ata olmadığını bilmədiyini və buna razılıq vermədiyini kişi sübut etməlidir; 2) kişinin razılığı olmadan klinika belə əməliyyat apara bilməzdi.

Bu arqumentlər əlbəttə ki, gülüncdür. Kişi necə sübut etsin ki, razılıq verməyib? Əksinə, klinika sübut etməlidir ki, kişi yazılı formada razılıq verib. Amma klinika həmin razılığı məhkəməyə təqdim edə bilməyib. Deməli, razılıq da olmayıb. Olmayıbsa, digər kişinin donorluğundan istifadə qanunsuz olub. Arvad və klinika (həkim) sövdələşərək kişini aldadıblar.

Odur ki, süni mayalanmaya gedən kişilər və qadınlar! Müqaviləni dönə-dönə oxuyun, həkimləri dəfələrlə xəbərdar edin ki, fırıldaq etməsinlər. Ən əsası isə uşaq doğulandan sonra azı iki fərqli yerdə DNT analizi etdirin ki, uşağın valideyni olduğunuza əmin olasınız. Xüsusən də bu kişilərə aiddir. Çünki "bicbala"ların doğulması, bir qayda olaraq, qadınların razılığı ilə baş verir. Sonradan da məhkəmələr bu fırıldağa qanuni don geyindidir. Bildiyimə görə digər oxşar məhkəmə işləri də var! / müsavat.com

Azərbaycanda fevralın 7-də keçirilən növbədənkənar prezident seçkilərində namizədlərin topladığı yekun səslər məlum olub.

“Report”un xəbərinə görə, bu, Mərkəzi Seçki Komissiyasının prezident seçkilərinə dair protokolunda öz əksini tapıb.

Beləliklə, İlham Əliyev 92,12 % (4 567 458 səs) səslə seçkilərin qalibi olub.

Digər namizədlərin səs faizi aşağıdakı kimidir:

Prezidentliyə namizədliyi özü tərəfindən irəli sürülən Zahid Oruc - 2,17 faiz (107 632 səs);

Böyük Quruluş Partiyasının prezidentliyə namizədi Fazil Mustafa - 1,99 faiz (98 421 səs);

Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev - 1,72 faiz (85 411 səs);

Milli Cəbhə Partiyasının prezidentliyə namizədi Razi Nurullayev - 0,80 faiz (39 643 səs);

Böyük Azərbaycan Partiyasının prezidentliyə namizədi Elşad Musayev - 0,66 faiz (32 885 səs);

Namizədliyi özü tərəfindən irəli sürülən Fuad Əliyev - 0,54 faiz (26 517 səs).

Xatırladaq ki, növbədənkənar prezident seçkilərində seçici fəallığı 76, 43 faiz olub.

2022-ci il dekabrın 16-da Bakının Nəsimi rayonu, Asif Məhərrəmov küçəsi, 174 ünvanında yerləşən kişi salonunda paytaxt sakini İlkin Qurbanlının meyiti aşkar edilib. Hüquq-mühafizə orqanları əməkdaşlarının keçirdiyi tədbirlərlə cinayəti törədən İsmayıllı rayon sakini, 1994-cü il təvəllüdlü İsmət Qədirov saxlanılıb.

İstintaqla müəyyən edilib ki, oktyabrın 1-də aralarında yaranan mübahisədən sonra İsmət Qədirov İlkin Qurbanlının ortaq tanışlarının yanında onun barəsində nalayiq ifadələr işlətməsini düşünüb. Bunu bəhanə edən İsmət dekabrın 16-da saat 13 radələrində salona gələrək, üzərindəki mətbəx bıçağı ilə İlkinə zərbələr vuraraq, onu öldürüb.

İş üzrə dindirilmiş İsmət Qədirov bildirib ki, 4 ildir bərbərlik fəaliyyəti ilə məşğuldur. İlkin Qurbanlını 2022-ci ilin may ayından tanıyıb. O, İlkin və Vüsal adlı şəxs eyni kişi salonunda çalışıblar.

Onun sözlərinə görə, satmaq məqsədilə bir tanışından ətirlər alıb. İlkinin Elməddin adlı tanışı 2022-ci il sentyabrın 20-də ondan bir ədəd ətir götürüb və pulunu sonra verəcəyini deyib. Amma bir neçə gün keçsə də, həmin şəxs pulu verməyib. Oktyabrın 1-də borca görə salonun elektrik enerjisi kəsilib. Vüsal təxminən 90 manat borclarının bir hissəsini vermək lazım olduğunu söyləyib. Həmin gün onun üzərində 23 manat pul olub. İlkinə deyib ki, tanışı Elməddinin götürdüyü ətirin pulundan heç olmasa 10 manat versin, amma iş yoldaşı üstündə cəmi 5 manat olmasını bildirib və “ətir satanın” ünvanına nalayiq ifadə işlədib.

Ətir satdığı üçün İlkindən kimi söydüyünü soruşduqda, İlkin ona ətir gətirənləri nəzərdə tutduğunu deyib. Müştəri az gəldiyinə və iş zəif olduğuna görə o, oktyabr ayında həmin salondan çıxaraq, Yasamal rayonu, Ələsgər Ələkbərov küçəsində icarəyə yer götürüb. Amma orada da çox işləməyib. Noyabrın ortalarında əvvəl işlədiyi salona gedib. Müştərilərin yanında onun barəsində nalayiq ifadələr işlətdiyini soruşanda, İlkin onun haqqında pis heç nə söyləmədiyini deyib. Dekabrın 11-də 20 Yanvar küçəsində icarəyə yeni yer götürüb, yenidən bərbərlik fəaliyyətinə başlayıb. Öz müştərilərinə bu barədə xəbər etsə də, bəziləri onun yanına gəlməkdən imtina edib. Ürəyində şübhə yaranıb ki, İlkin müştərilərin yanında onun arxasınca danışıb, amma bunu ona üzbəüz deyə bilməyib.

Dekabrın 16-da İlkini öldürmək qərarına gəlib və bu məqsədlə xırdavat dükanından mətbəx bıçağı alıb. Saat 12 radələrində İlkinin işlədiyi salona yollanıb. İçəri keçəndə İlkinin paltar şkafının qarşısında telefonda nəyəsə baxdığını görüb. Gödəkçəsinin iç cibindən bıçağı çıxararaq cəld şəkildə onun ürək nahiyəsinə güclü zərbə vurub. Daha sonra İlkinin bədəninə və ayaqlarına da çoxsaylı xəsarət yetirib. Salonda olan İlkinin iş yoldaşlarından Sahillə Əfqan bıçağı İsmətin əlindən almağa çalışanda hər ikisi əllərindən xəsarət alıb. İlkin isə aldığı xəsarətlərdən elə yerdə uzanıqlı vəziyyətdə keçinib. Daha sonra polis əməkdaşları gəliblər və onu polis şöbəsinə aparıblar.

Bakı Ağır Cinayətlər Məhkəməsinin hökmü ilə İsmət Qədirov 16 il müddətinə azadlıqdan məhrum edilib.

Daha ətraflı Baku TV-nin süjetində:

Mingəçevir sakini odlu silahdan açılan atəşlə öldürülüb.

Bu barədə Daxili İşlər Nazirliyinin (DİN) Mətbuat Xidmətinin Şəki regional qrupu məlumat yayıb.

Məlumata görə, saat 22 radələrində şəhər sakini, 1983-cü il təvəllüdlü Aqil Əhmədovun tir tüfəngindən açılan atəş nəticəsində ölməsi barədə polisə məlumat daxil olub.
A.Əhmədova tir tüfəngindən atəş açmaqda şübhəli bilinən Sadiq Yusifov saxlanılıb.

Araşdırma aparılır.

Dövlət İmtahan Mərkəzi bu gün ali təhsil müəssisələrinin magistraturalarına qəbul imtahanı keçirəcək.

Mərkəzdən "Report"a verilən məlumata görə, magistratura səviyyəsinə qəbul imtahanı respublikanın 7 şəhər və rayonunda - Bakı, Sumqayıt, Abşeron, Naxçıvan, Gəncə, Mingəçevir və Lənkəranda, ümumilikdə 78 binada təşkil olunacaq.

Bakalavrların imtahan verəcəyi yer onun “Şəxsi kabinet”ində qeyd etdiyi faktiki yaşadığı məntəqəyə uyğun müəyyən olunur.

İmtahan bütün binalarda eyni vaxtda – saat 11:00-da başlanır. İmtahanın başlanmasına 15 dəqiqə qalmış saat 10:45-də buraxılış rejimi başa çatır. Bundan sonra gələn iştirakçılar imtahan binasına buraxılmırlar.

İmtahanda bakalavrların xarici dil üzrə dinləyib-anlama bacarıqları da yoxlanılır. İmtahan dinləmə mətninin səsləndirilməsi ilə başlanacaq. Mətnin səsləndirilməsinə hazırlıq və binada sakitliyin təmin olunması ilə əlaqədar imtahanın başlanmasına 15 dəqiqə qalmış hər kəs zalda olmalıdır.

İmtahanın müddəti 3 saat 30 dəqiqədir. İmtahanın başlandığı andan 3 saat sonra test tapşırıqlarının cavablandırılması üçün ayrılan vaxt başa çatır və cavab kartları zal nәzarәtçisi tәrәfindәn yığılır. Bundan sonra iştirakçılara yazı işi (esse) vәrәqlәri paylanılır. Esselərin yazılmasına 30 dəqiqə vaxt verilir.

Qeyd olunan dəyişikliklə əlaqədar imtahan nəticələri 2 mərhələdə elan olunacaq. İmtahandan sonrakı 2-3 gün ərzində qapalı və cavabları kodlaşdırılan açıq tipli tapşırıqların nəticələri elan olunacaq. Yekun imtahan balı isə esse tapşırıqları yoxlanıldıqdan sonra təqdim olunacaq. İmtahan iştirakçılarının nəticələrlə bağlı apellyasiya müraciətlərinə yekun bal elan olunduqdan sonra baxılacaq və bu zaman yalnız tapşırıqların məzmunu və yazı işi ilə bağlı müraciətlər qəbul olunacaq.

“İmtahan iştirakçılarının nəzərinə çatdırırıq ki, cavab kartındakı mәlumatlar optik qurğu vasitәsilә oxunur. Ona görə də optik qurğuların tələblərinə əsasən, cavab kartını qara vә ya tünd göy rәngdә yazan mürәkkәb axıtmayan diyircәkli qәlәmlә, yaxud tünd rəngdə yazan sadә karandaşla doldurmaq lazımdır. Cavablar üçün nəzərdə tutulmuş dairələrin içi göstərilən növ qələmlərlə və ya karandaşla tam qaralanmalıdır. Təlimata uyğun olmayan formada qeyd olunmuş cavablar, o cümlədən cavabın optik qurğu tərəfindən səhv kimi nəzərə alınması ilə nəticələnən düzəlişlərə (məsələn qapalı sualda iki dairənin qaralanması və s.) baxılmayacaq. Bununla bağlı tövsiyə olunur ki, cavab kartında cavabları tam əmin olduqdan sonra qeyd edin və ya cavab kartında imtahan bitənədək hər hansı düzəliş etmək imkanının olması üçün dairələri karandaşla qaralayın.

Bir daha xatırladırıq ki, kartı zədələmək vә cırmaq olmaz. İmtahan nəticələri ilə əlaqədar apellyasiya müraciətlərinə baxılarkən göstərilən hallarla bağlı hər hansı müraciət qəbul edilməyəcək”, - DİM-dən bildirilib.

İmtahan binasına mobil telefon və digər rabitə vasitələri, elektron cihazlar, kalkulyator, elektron məlumat daşıyıcısı, kitab, dəftər, jurnal, konspekt, məlumat kitabçası, lüğət, cədvəl, çanta və digər yardımçı vəsaitlər gətirmək qadağandır: “İştirakçılardan imtahan binasına əlavə əşyaları gətirməməyi xahiş edirik. Bütün bunlar buraxılış rejimi işinin səmərəli təşkilinə və onun vaxtında başa çatdırılmasına mane olur.

Məlumat üçün qeyd edək ki, ərizələrin qəbulu internet vasitəsilə yanvarın 15‑dən 29-dək aparılıb. İmtahanda iştirak etmək üçün 19 725 bakalavr ərizə təqdim edib. Onlardan 18 205 nəfər Azərbaycan bölməsi, 1 520 nəfəri rus bölməsi üzrə imtahan verəcək. Bakalavrlardan 12 713-si cari ilin, 7 012-si isə əvvəlki illərin məzunlarıdır, 46 nəfər xarici ölkə vətəndaşıdır.

Qəbul imtahanı Bakıda 55, Sumqayıtda 5, Abşeronda 5, Gəncədə 6, Naxçıvanda 2, Mingəçevirdə 3, Lənkəranda 2 binada təşkil olunacaq. Bakıda 14 331, Naxçıvanda 497, Gəncədə 1 361, Sumqayıtda 1 367, Abşeronda 1 145, Mingəçevirdə 615, Lənkəranda 409 bakalavrın imtahan verəcəyi gözlənilir. İmtahanın idarə olunmasına 78 ümumi rəhbər, 221 imtahan rəhbəri, 1 396 nəzarətçi-müəllim, 266 buraxılış rejimi əməkdaşı (mühafizə) cəlb olunacaq”.

Bakalavrlar imtahana gələrkən aşağıda göstərilən sənədləri mütləq özləri ilə gətirməlidirlər:

- Şəxsiyyəti təsdiqləyən sənədin əslini;

- “İmtahana buraxılış vərəqəsi”ni.

Göstərilən sənədləri arasında uyğunsuzluq aşkarlanan, yaxud həmin sənədlərdən biri olmayan şəxslər imtahana buraxılmayacaq.

İmtahanlarda iştirak edəcək nəzarətçilər, imtahan rəhbərləri və mühafizə əməkdaşları ilə təlim-seminarlar keçirilib. Bütün imtahan binaları yoxlanılır, zallarda bakalavrların rahat imtahan verməsi üçün zəruri şərait yaradılıb. Təhlükəsizliyin təmin edilməsi məqsədilə fevralın 10-da imtahan mərkəzləri, zallar, giriş-çıxış qapıları, binalar möhürlənməklə Daxili İşlər Nazirliyi Baş Mühafizə İdarəsinin əməkdaşlarının mühafizəsinə verilib.

Sumqayıtda 53 yaşlı kişi quyuya düşərək ölüb.

“Report”un məlumatına görə, hadisə Hacı Zeynalabdin Tağıyev qəsəbəsində baş verib.

1971-ci il təvəllüdlü Mahir Qabil oğlu Əhmədov ərazidəki üstü bağlanmamış quyuya düşərək ölüb.
Faktla bağlı Sumqayıt şəhər Prokurorluğunda araşdırma aparılır.

Xəzər dənizində suyun çəkilməsindən sonra illər əvvəl batmış gəmi qalıqları üzə çıxıb.

Xezerxeber.az-ın məlumatına görə, sakinlər bildiriblər ki, əslində, bu ərazidə üzə çıxan qalıqlar əvvəlcədən də görünüb. Lakin sonradan suyun daha artıq çəkilməsi ilə qalıqlar çox üzə çıxıb.

Gəminin hansı quruma aid olduğunu aydınlaşdırmaq üçün “Xəzər Dəniz Gəmiçiliyi” QSC-yə müraciət etdik. Bildirildi ki, gəmi “Xəzər Dəniz Gəmiçiliyi”nə aid deyil. Qeyd olunub ki, gəminin adı məlum olmadığından, heç bir məlumata malik deyillər.


Qeyd edək ki, Xəzərin XX əsrdə ən aşağı səviyyəsi 1977-ci ildə qeydə alınıb. Həmin vaxt dənizin səviyyəsi bugünkündən 70 sm aşağı olub.

Bəs bu gəmi nə vaxt batıb və hansı məqsədlər üçün istifadə edilib?

Xezerxeber.az mövzu ilə bağlı daha ətraflı videomaterialı təqdim edir.

Bakıdakı evlərin birində eyvan aylardır ki, qəzalı vəziyyətdədir. Eyvanın uçmaması üçün altına taxta dirək qoyulub. Ərazidən həm piyadalar, həm də sürücülər istifadə edirlər.

Xezerxeber.az-ın məlumatına görə, söhbət Yasamal rayonu, Əlövsət Quliyev 37 ünvanında yerləşən evdən gedir.

Sakinlərin sözlərinə görə, yük maşını eyvanı zədələyib.

Mənzilin sahibindən hadisə ilə bağlı məlumat ala bilmədik.

Yasamal rayonu Mənzil-kommunal təsərrüfat birliyindən isə bildirildi ki, sözügedən ərazidə yoxlamalar aparılıb. Lazımi tədbirlərin görülməsi üçün aidiyyəti üzrə müraciət edilib.

Sakinlər ümid edir ki, aylardır, güclü küləklərə rəğmən quru taxtaya söykənərək ayaqda duran eyvan hər hansı hadisəyə səbəb olmadan təmir edilər.

Xezerxeber.az mövzu ilə bağlı daha ətraflı videomaterialı təqdim edir.