Sumqayıt şəhərində özünü 5-ci mərtəbədən atan şəxs sağ qalıb.

“Report”un yerli bürosu məlumat verir ki, hadisə şəhərin 41-ci məhəlləsində qeydə alınıb.

Belə ki, Sumqayıt şəhər sakini, 2003-cü il təvəllüdlü Elvin Vüqar oğlu Mürvətov yaşadığı mənzilin eyvanından özünü ataraq intihara cəhd edib.
Binanın 5-ci mərtəbəsindən düşməsinə baxmayaraq, o sağ qalıb.

Yaralı dərhal xəstəxanaya çatdırılıb və həkim nəzarətinə götürülüb.

Bakının Nizami rayonunda ağır xəsarətlə nəticələnən yol-nəqliyyat hadisəsi baş verib.

“Report”un məlumatına görə, avtomobil yolu keçən 1994-cü il təvəllüdlü Kamran Bayram oğlu Dəmirovu vurub.

Yaralı təcili tibbi yardımın köməyi ilə xəstəxanaya çatdırılıb.
Müayinə zamanı ona müştərək travma və açıq kəllə-beyin travması diaqnozları qoyulub. Hadisənin təfərrüatı araşdırılır.

Bu gün Bakıda oğlu tərəfindən qətlə yetirilən 59 saylı məktəbin direktoru Əhmədova Bikə Bədəl qızı ilə bağlı redaksiyamıza yeni məlumat daxil olub.

TEREF bildirir ki, Bakupost.az-a verilən məlumata görə, mərhum Bikə Əhmədova Moskvadakı "Bakı bulvarı" restoranlar şəbəkəsini işlədən Niyaz Bədəlovun bacısıdır.

O da bildirilir ki, Niyaz Bədəlov tanınmış azərbaycanlı milyarder Qod Nisanovun Moskvadakı biznesini idarə edir.

Əslən Neftçaladan olan Niyaz Bədəlovun imkanlı və uğurlu iş adamı olduğu qeyd olunur.

Bu gün Bakıda ailəsinin 5 üzvünü qətlə yetirən Əhməd Əhmədovla bağlı daha bir fakt bəlli olub.

TEREF bildirir ki, Bakupost.az-a daxil olan məlumata görə, Əhməd bir müddət bundan əvvəl də cinayət törədib.

Belə ki, onun yaxın dostunu bıçaqladığı bildirilir. Deyilənə görə, hadisəyə səbəb dostunun Əhmədin ünvanına söyüş söyməsi olub.

Məlumatda o da bildirilir ki, o zaman tərəflər məsələni öz aralarında həll ediblər.

Qeyd edilir ki, güləşlə məşğul olan Əhməd vaxtilə Azərbaycan çempionu olub. Onun qətlə yetirdiyi və əslən Qazax rayonundan olan atası Mehman Əhmədovun da idmançı olduğu bildirilir.

52 yaşı olmasına baxmayaraq, güclü və fiziki cəhətdən sağlam olan Mehman Əhmədovun oğlu tərəfindən necə qətlə yetirməsi də ailəni tanıyanların təəccübünə səbəb olub.

Bakıda qətl baş verən ailənin daha iki üzvünün öldürüldüyü məlum olub.

APA xəbər verir ki, bu barədə DİN-in Mətbuat Xidmətindən bildirilib. Xəbərə görə, davam etdirilən araşdırmalarla paytaxtın Xətai rayonunda valideynlərini və qardaşını qətlə yetirməkdə şübhəli bilinən Əhməd Əhmədovun bu cinayəti törətməzdən əvvəl başqa bir ünvanda bacısı - 1997-ci il təvəllüdlü Əhmədova Elmira Mehman qızını və onun azyaşlı övladını eyni üsulla qətlə yetirməsi müəyyən edilib.

Qətlə yetirilən qız uşağının 5 yaşı olub.

***

18.20

Bakıda 3 nəfər ailə üzvünü qəsdən öldürməkdə şübhəli bilinən şəxs tutulub.

Xətai rayon prokurorluğundan APA-ya verilən məlumata görə, fevralın 13-də saat 16 radələrində paytaxtın Xətai rayonu ərazisində 3 nəfərin öldürülməsi barədə rayon prokurorluğuna məlumat daxil olub.

Araşdırma zamanı 1999-cu il təvəllüdlü Əhməd Əhmədovun aralarında yaranmış mübahisə zamanı atası 1972-ci il təvəllüdlü Mehman Əhmədova, anası 1977-ci il təvəllüdlü Bikə Əhmədovaya və 2015-ci il təvəllüdlü azyaşlı qardaşına balta ilə xəsarətlər yetirərək onları qəsdən öldürməsinə əsaslı şübhələr müəyyən edilib.

Faktla bağlı Xətai rayon prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələrilə cinayət işi başlanıb, Əhməd Əhmədov prokurorluğun qərarı ilə iş üzrə şübhəli şəxs qismində tutulub.

Hazırda ibtidai istintaq davam edir.

***

17.27

Bakıda oğlu tərəfindən qətlə yetirilən qadın məktəb direktoru olub.


APA xəbər verir ki, qətlə yetirilən Bikə Əhmədova Xətai rayonu 59 saylı tam orta məktəbin direktoru vəzifəsində çalışıb.

Hadisə ailənin Xətai rayonu, General Şıxlinski küçəsi 29 ünvanında olan evlərində qeydə alınıb. Ailədə olan münaqişənin qətllə nəticələndiyi bildirilir.

Ailənin böyük oğlu, 1999-cu il təvəllüdü Əhməd Əhmədov balta ilə anası Bikə Əhmədovanı, atası Mehman Əhmədovu və 2015-ci il təvəllüdlü Məhəmməd Məmmədovu qətlə yetirib.

Hadisə barədə polisə qonşular məlumat verib.

Hazırda hadisə yerinə hüqüq-mühafizə orqanlarının əməkdaşları cəlb olunub, istintaq hərəkətləri aparılır.

***

16.58

Fevralın 13-də saat 16:30 radələrində paytaxtın Xətai rayonunda 1972-ci il təvəllüdlü Əhmədov Mehman Əhməd oğlunun, 1977-ci il təvəllüdlü Əhmədova Bikə Bədəl qızının və 2015-ci il təvəllüdlü Əhmədov Məhəmməd Mehman oğlunun kəsici alətlə qətlə yetirilməsi barədə polisə məlumat daxil olub.

Bu barədə APA-ya DİN-in Mətbuat Xidmətindən bildirilib. Xəbərə görə, ailə üzvlərini qətlə yetirməkdə şübhəli bilinən 1999-cu il təvəllüdlü Əhmədov Əhməd Mehman oğlu polis əməkdaşları tərəfindən saxlanılıb.

Araşdırma aparılır.

Türkiyə prezidenti Rəcəb Tayyib Ərdoğan İlk türk astronavtı Alper Gezeravcıya yüksək vəzifə verib.

Bakupost.az Türkiyə mediasına istinadla xəbər verir ki, Gezeravcı Türkiyə Kosmik Agentliyinin İdarə Heyətinin üzvü təyin edilib.

Tanınmış vəkil Əkrəm Həsənov Azərbaycanda süni mayalanma zamanı kişilərin aldadılması haqda status yazıb. Vəkil həkimlərin qadınlarla əlbir olaraq cinayətə bərabər əmələ yol verdiklərini, nəticədə "bicbala"ların dünyaya gəldiyini vurğulayıb.

TEREF vəkilin bu xüsusda yazdığı statusu təqdim edir:

"Ali Məhkəmənin təəccüblü mövqeyi: süni mayalanmaya gedən kişilər, ehtiyatlı olun!

Övladı olmayanların süni mayalanmaya əl atması halları artır. Məlum olduğu kimi, həkimlər ər və arvadın hüceyrələrini götürərək embrion yaradır və qadının bədəninə yerləşdirirlər. Lakin necə əmin olaq ki, həkimlər məhz ər və arvadın hüceyrələrindən istifadə edirlər? Bəlkə hüceyrələr donorlara məxsusdur? Söz açacağım hadisə məhz bu qəbildəndir.

İşin təfərrüatları Ali Məhkəmənin Mülki Kollegiyasının 2(102)-586/2021 saylı iş üzrə 15 mart 2021-ci il tarixli Qərarında əks olunub. Onu dərc edir və işin mahiyyətini qısaca izah edirəm.

Deməli, süni mayalanma nəticəsində ailədə əkiz övladlar dünyaya gəlib. 7 ildən sonra boşanıblar. Bu əsnada arvad kişiyə deyib ki, sən heç uşaqların atası da deyilsən (amma aliment tələb edib və alıb da). Sən demə, kişi tam sonsuzdur. Kişinin dediyindən belə çıxır ki, bunu bilən həkim (Türkiyə əsilli Öndər Tulumbacı) arvada başqa kişinin donorluğundan istifadə etməyi təklif edib, o da razılaşıb. Amma bunu kişidən gizlədiblər.

Kişi məhkəməyə müraciət edərək, atalığının ləğv olunmasını tələb edib. Amma başda Ali Məhkəmə olmaqla məhkəmələr iddianı təmin etməyiblər (yəni kişi ata kimi qalıb və aliment ödəməyə məcbur edilib). Bu zaman Ali Məhkəmə iki arqument gətirib: 1) bioloji ata olmadığını bilmədiyini və buna razılıq vermədiyini kişi sübut etməlidir; 2) kişinin razılığı olmadan klinika belə əməliyyat apara bilməzdi.

Bu arqumentlər əlbəttə ki, gülüncdür. Kişi necə sübut etsin ki, razılıq verməyib? Əksinə, klinika sübut etməlidir ki, kişi yazılı formada razılıq verib. Amma klinika həmin razılığı məhkəməyə təqdim edə bilməyib. Deməli, razılıq da olmayıb. Olmayıbsa, digər kişinin donorluğundan istifadə qanunsuz olub. Arvad və klinika (həkim) sövdələşərək kişini aldadıblar.

Odur ki, süni mayalanmaya gedən kişilər və qadınlar! Müqaviləni dönə-dönə oxuyun, həkimləri dəfələrlə xəbərdar edin ki, fırıldaq etməsinlər. Ən əsası isə uşaq doğulandan sonra azı iki fərqli yerdə DNT analizi etdirin ki, uşağın valideyni olduğunuza əmin olasınız. Xüsusən də bu kişilərə aiddir. Çünki "bicbala"ların doğulması, bir qayda olaraq, qadınların razılığı ilə baş verir. Sonradan da məhkəmələr bu fırıldağa qanuni don geyindidir. Bildiyimə görə digər oxşar məhkəmə işləri də var! / müsavat.com

Azərbaycanda fevralın 7-də keçirilən növbədənkənar prezident seçkilərində namizədlərin topladığı yekun səslər məlum olub.

“Report”un xəbərinə görə, bu, Mərkəzi Seçki Komissiyasının prezident seçkilərinə dair protokolunda öz əksini tapıb.

Beləliklə, İlham Əliyev 92,12 % (4 567 458 səs) səslə seçkilərin qalibi olub.

Digər namizədlərin səs faizi aşağıdakı kimidir:

Prezidentliyə namizədliyi özü tərəfindən irəli sürülən Zahid Oruc - 2,17 faiz (107 632 səs);

Böyük Quruluş Partiyasının prezidentliyə namizədi Fazil Mustafa - 1,99 faiz (98 421 səs);

Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev - 1,72 faiz (85 411 səs);

Milli Cəbhə Partiyasının prezidentliyə namizədi Razi Nurullayev - 0,80 faiz (39 643 səs);

Böyük Azərbaycan Partiyasının prezidentliyə namizədi Elşad Musayev - 0,66 faiz (32 885 səs);

Namizədliyi özü tərəfindən irəli sürülən Fuad Əliyev - 0,54 faiz (26 517 səs).

Xatırladaq ki, növbədənkənar prezident seçkilərində seçici fəallığı 76, 43 faiz olub.

2022-ci il dekabrın 16-da Bakının Nəsimi rayonu, Asif Məhərrəmov küçəsi, 174 ünvanında yerləşən kişi salonunda paytaxt sakini İlkin Qurbanlının meyiti aşkar edilib. Hüquq-mühafizə orqanları əməkdaşlarının keçirdiyi tədbirlərlə cinayəti törədən İsmayıllı rayon sakini, 1994-cü il təvəllüdlü İsmət Qədirov saxlanılıb.

İstintaqla müəyyən edilib ki, oktyabrın 1-də aralarında yaranan mübahisədən sonra İsmət Qədirov İlkin Qurbanlının ortaq tanışlarının yanında onun barəsində nalayiq ifadələr işlətməsini düşünüb. Bunu bəhanə edən İsmət dekabrın 16-da saat 13 radələrində salona gələrək, üzərindəki mətbəx bıçağı ilə İlkinə zərbələr vuraraq, onu öldürüb.

İş üzrə dindirilmiş İsmət Qədirov bildirib ki, 4 ildir bərbərlik fəaliyyəti ilə məşğuldur. İlkin Qurbanlını 2022-ci ilin may ayından tanıyıb. O, İlkin və Vüsal adlı şəxs eyni kişi salonunda çalışıblar.

Onun sözlərinə görə, satmaq məqsədilə bir tanışından ətirlər alıb. İlkinin Elməddin adlı tanışı 2022-ci il sentyabrın 20-də ondan bir ədəd ətir götürüb və pulunu sonra verəcəyini deyib. Amma bir neçə gün keçsə də, həmin şəxs pulu verməyib. Oktyabrın 1-də borca görə salonun elektrik enerjisi kəsilib. Vüsal təxminən 90 manat borclarının bir hissəsini vermək lazım olduğunu söyləyib. Həmin gün onun üzərində 23 manat pul olub. İlkinə deyib ki, tanışı Elməddinin götürdüyü ətirin pulundan heç olmasa 10 manat versin, amma iş yoldaşı üstündə cəmi 5 manat olmasını bildirib və “ətir satanın” ünvanına nalayiq ifadə işlədib.

Ətir satdığı üçün İlkindən kimi söydüyünü soruşduqda, İlkin ona ətir gətirənləri nəzərdə tutduğunu deyib. Müştəri az gəldiyinə və iş zəif olduğuna görə o, oktyabr ayında həmin salondan çıxaraq, Yasamal rayonu, Ələsgər Ələkbərov küçəsində icarəyə yer götürüb. Amma orada da çox işləməyib. Noyabrın ortalarında əvvəl işlədiyi salona gedib. Müştərilərin yanında onun barəsində nalayiq ifadələr işlətdiyini soruşanda, İlkin onun haqqında pis heç nə söyləmədiyini deyib. Dekabrın 11-də 20 Yanvar küçəsində icarəyə yeni yer götürüb, yenidən bərbərlik fəaliyyətinə başlayıb. Öz müştərilərinə bu barədə xəbər etsə də, bəziləri onun yanına gəlməkdən imtina edib. Ürəyində şübhə yaranıb ki, İlkin müştərilərin yanında onun arxasınca danışıb, amma bunu ona üzbəüz deyə bilməyib.

Dekabrın 16-da İlkini öldürmək qərarına gəlib və bu məqsədlə xırdavat dükanından mətbəx bıçağı alıb. Saat 12 radələrində İlkinin işlədiyi salona yollanıb. İçəri keçəndə İlkinin paltar şkafının qarşısında telefonda nəyəsə baxdığını görüb. Gödəkçəsinin iç cibindən bıçağı çıxararaq cəld şəkildə onun ürək nahiyəsinə güclü zərbə vurub. Daha sonra İlkinin bədəninə və ayaqlarına da çoxsaylı xəsarət yetirib. Salonda olan İlkinin iş yoldaşlarından Sahillə Əfqan bıçağı İsmətin əlindən almağa çalışanda hər ikisi əllərindən xəsarət alıb. İlkin isə aldığı xəsarətlərdən elə yerdə uzanıqlı vəziyyətdə keçinib. Daha sonra polis əməkdaşları gəliblər və onu polis şöbəsinə aparıblar.

Bakı Ağır Cinayətlər Məhkəməsinin hökmü ilə İsmət Qədirov 16 il müddətinə azadlıqdan məhrum edilib.

Daha ətraflı Baku TV-nin süjetində: