Ölkəmizdə dövlət qulluğunda çalışmaq istəyənlərə, adətən, Dövlət İmtahan Mərkəzinin təşkil etdiyi imtahanlardan keçmək təklif edilir. Amma, sən demə, bu qurumun təşkil etdiyi imtahan mərhələlərini uğurla keçmək hələ insanın öz arzusuna çatması üçün kifayət etmir.

Hər halda, Bakı Dövlət Universitetinin və İtaliyadakı Bolonya Universitetinin hüquq fakültəsinin məzunu Qəzənfər Malik oğlu Paşayevin KONKRET.az-a müraciətindən belə aydın olur. Onun müraciəti Xarici İşlər Nazirliyində işə qəbul olunmaması ilə bağlıdır.

Məlum olur ki, Azərbaycan, İtaliya və Yunanıstanın müxtəlif hüquq şirkətlərində çalışıb, ingilis və italyan dillərini mükəmməl səviyyədə bilən mütəxəssis xaricdə vətənimizə qarşı ikili standartların şahidi olub, elə bu səbəbdən də diplomatik xidmətdə çalışmaq və ölkəmizi yüksək səviyyədə təmsil etmək fikrinə düşüb. Bu məqsədlə 2022-ci il may-iyun aylarında Xarici İşlər Nazirliyi və Dövlət İmtahan Mərkəzinin birgə təşkil etdiyi diplomatik xidmətə qəbul imtahanında iştirak edib.

Onun sözlərinə görə, 460 namizədin qatılığı həmin imtahanların hər üç mərhələsini müvəffəqiyyətlə keçib. Sonra həmin namizədlərdən yalnız 67 nəfərə işə qəbul olunduqları barədə şifahi və yazılı şəkildə məlumat verilib.

“XİN-dən öncə mənə bildirildi ki, bütün mərhələləri keçmişəm və işə qəbul olunmuşam. Mənimlə profilaktik söhbət də aparıldı. Deyildi ki, bir-iki aya işə çağırılacağam. Beləliklə, məni və digər namizədləri ehtiyat kadrlar siyahısına saldılar. İlkin mərhələdə həmin siyahı üzrə 38 nəfər çağırıldı, digər 29 nəfər ehtiyat kadrlar siyahısında qaldı. Amma onlar da sonradan çağırılmağa başladı. Qeyd edim ki, işə qəbul olunmuş namizədlərin heç də hamısı Azərbaycanı xarici ölkələrdə təmsil etmək iqtidarında deyildilər”.

Lakin iş dəvəti gözlədiyi zaman XİN tərəfindən 9 nəfərə, o cümlədən Qəzənfər Paşayevə imtina cavabı verilir. “Oktyabr ayında XIN-nin Kadrlar İdarəsinin rəisi Raman Məmmədov məni və diğər 8 namizədi dəvət etdi. Bizə bildirdi ki, sizin barənizdə diplomatik vəzifəyə təyin olunmağa mane olan hallar aşkarlanıb. Mən də soruşdum ki, bu hallar nədən ibarətdir? Mənə dedi ki, bu barədə məlumat verə bilməz”.

“Fərdi məlumatların qorunması haqqında” Qanunu və XİN-nin Qaydalar Toplusunu xatırladan Qəzənfər Paşayevin “Hər halda dövlət sirri təşkil edən məlumat deyil. Bunu bizə açıqlamalısınız” tələbi də Kadrlar İdarəsinin rəisinə təsir etməyib.

Onun sözlərinə görə, işdən imtina verilən 9 nəfər xaricdə təhsil almaları, nadir dil biliklərinə və yüksək savada malik olmaları ilə fərqləniblər.

“Dövlət Təhlükəsizliyi Xidmətinə (DTX) də müraciət etdim. DTX əməkdaşı mənə bildirdi ki, sizin dövlət təhlükəsizliyi ilə bağlı hər hansı probleminiz yoxdur”, – deyə Q.Paşayev əlavə edib.

Məsələ ilə bağlı XİN-in mövqeyinə gəlincə, quruma ünvanladığımız sorğumuz cavablandırılmadı.

Tikinti maqnatı İsfəndiyar Axundov (Şərurlu İsfəndiyar) kollec alıb.

TEREF Qaynarinfo-ya istinadən xəbər verir ki, İsfəndiyar Axundov Azərbaycan Tətbiqi Elmlər Kollecinin sahibinə çevrilib.

İqtisadiyyat Nazirliyi yanında Dövlət Vegri Xidmətinin reyestr məlumatlarında da Azərbaycan Tətbiqi Elmlər Kollecinin qanuni təmsilçisi kimi tikinti maqnatının adı qeyd edilib. O, bu ilin martından kollecin qanuni təmsilçisidir.

İddialara görə, İsfəndiyar Axundovun təhsil sektoruna yatırım etmək kimi bir niyyəti yoxdur. Bildirilir ki, iş adamına sadəcə kollecin ərazisi lazımdır.

İsfəndiyar Axundovdan əvvəl kollecin qanuni təmsilçisi Dünyamalıyeva Sabirə Səfi qızı olub.

Araşdırmalarımız zamanı məlum olub ki, Sabirə Dünyamalıyeva Azərbaycan Rəssamlıq Akademiyasının professorudur. O, 1990-1993-cü illərdə Bakı Qızlar Kollecinin, 1993-cü ildən sonra isə Azərbaycan Ali Tətbiqi Elmlər Kollecinin rektoru vəzifəsində işləyib.

Ali Tətbiqi Elmlər Kolleci sonradan sadəcə Azərbaycan Tətbiqi Elmlər Kolleci adlandırılıb. Hazırda sözügedən kollec fəaliyyət göstərmir.

Yeri gəlmişkən, 2008-ci ildə kollecin Naxçıvan şöbəsi saxta diplom satışı ilə gündəmə gəlib. Həmin vaxt Naxçıvan Muxtar Respublikası (MR) Daxili İşlər Nazirliyinin (DİN) İstintaq və təhqiqat şöbəsnin rəisi, polis polkovnik-leytenantı Hikmət Əliyev jurnalistlərə açıqlamasında bildirmişdi ki, Naxçıvan şəhər sakini Zöhram Fuad oğlu Cəfərov da qeyri-qanuni yolla 1990-cı ildə "Gənc təbib", 1993-cü ildə isə "Azərbaycan Ali Tətbiqi Elmlər Kollecinin Naxçıvan şöbəsi" adlı məktəb yaradıb, hər iki "tibb məktəbi" 2002-ci ilədək 1000 nəfərdən çox vətəndaşa saxta diplom verib.

İsfəndiyar Axundov isə bildirib ki, mən kollec almamışam, xəbərim yoxdur bu məsələdən".

“Novxanıda yolun üstündə bir məscid var. Onun yanında da məscidin axundunun evi var. Axundun evi məsciddən gözəldir. Axundların evlərinə, villarına baxın. Başım çıxmır ki, onları necə tikirlər?”

Bu sözləri müğənni Niyam Salami “YouTube” səhifəsində paylaşdığı videoda deyib. O, illərdir səhnədə olmasına baxmayaraq, villa tikə bilmədiyini bildirib:

"Mən müğənniyəm, restoran işlədirəm, amma kartımda 550 manat pul var. İllərdir səhnədəyəm, başımdan pul səpirlər, amma mən villa tikə bilmirəm. Axundun, mollanın necə villası ola bilər? Hasarı mənim evimin qiymətindədir. Bu, necə ola bilər? Dindən əyri istifadə edirsiniz, utanırsınız? Sizə elə bilirsiniz ki, sizə rəhmət düşəcək? Sizə rəhmət düşməyəcək! Villa tikən mollalar o dünyada necə yaşayacaq bilmirəm...”

Sənətçinin bu fikirləri ilə bağlı ilahiyyatçı Tural İrfan “Cebhe.info”-ya danışıb:

“Harada yazılıb ki, axund, din adamı, ilahiyyatçı ac, kasıb və zəlil yaşamalıdır. Harada yazılıb ki, ancaq müğənnilər, mütrüflər, təlxəklər yaxşı yaşamalıdır? Din xadimi insan deyil? Göydən gəlib? Kiminsə qazancını, varını, evini, mülkünü müzakirə etmək, həsəd aparmaq, onu dilə - dişə salıb hədəfə gətirmək insani hal deyil. Bəlkə o axundun istixanası var, Novxanıda pomidor əkir, bəlkə dükanları var, kitab - dəftər satır? Bəlkə imkanlı adamlar din xadimi kimi ona kömək ediblər, bəlkə dostu ev bağışlayıb? Niyə gözü götürmür bəzilərinin? Niyə bizim xalqın din xadimi, ilahiyyatçısı kasıb yaşamalıdır? Çox absurd və gülünc yanaşmadır”.

İlahiyyatçı qeyd edib ki, bu cür fikirlər səsləndimrək ayıb, paxıllıqdır və dind günahdır, adətimizdə də belə şey qəbahət sayılıb:

“Bacarana baş qurbandır, azad ölkədə yaşayırıq. Bir misal var, deyir ki, qonşunu iki inəkli istə, özün də bir inəkli olasan. İndi başqalarına paxıllıq yox, əksinə, daha da imkan arzu etmək lazımdır ki, hamı yaxşı yaşasın. Tanımadığın, bilmədiyin adamın mülkünü, mənzilini müzakirə etmək doğru deyil”.

Malayziyanın Nəqliyyat Nazirliyi 2014-cü ildə Hind okeanı üzərində yoxa çıxan Malayziya Hava Yollarına (Malaysia Airlines) məxsus "MH370" reysinin axtarışlarını bərpa etmək qərarına gəlib.

Referans.az xarici KİV-ə istinadən xəbər verir ki, bu barədə departamentin rəhbəri Entoni Loke Sieu Fuk faciənin onuncu ildönümünə həsr olunmuş tədbirdə məlumat verib.

O, axtarış əməliyyatlarına Amerikanın "Ocean Infinity" şirkətini cəlb etməyi planlaşdırdıqlarını açıqlayıb.

Qeyd edək ki, 2018-ci ildə Malayziya axtarışa "Ocean Infinity" şirkətini cəlb edib, lakin şirkətin axtarışları nəticə verməyib.

Xatırladaq ki, 2014-cü il martın 8-nə keçən gecə Kuala-Lumpurdan Pekinə uçan Malayziya Hava Yollarına məxsus təyyarə radarlardan itib və Hind okeanının cənubunda qəzaya uğrayıb. Axtarış əməliyyatı heç bir nəticə verməyib, laynerin qalıqları hələ də tapılmayıb.

Qəzaya uğrayan təyyarənin göyərtəsində 227 sərnişin və 12 ekipaj üzvü olub.

Bakı-Sumqayıt yolunda "Jeep" markalı avtomobil və "sərnişin"i təhlükəli vəziyyət yaradıb.

"Azərbaycan Reallığı" xəbər verir ki, hadisə yolun Xırdalan şəhəri ərazisindən keçən hissəsində qeydə alınıb.

Maşının pəncərəsindən asılı formada gedən şəxs həm özünün, həm də digər hərəkət iştirakçılarının həyatını təhlükəyə atıb.