 |
|
|
Çanaqqala boğazı gəmilərin hərəkəti üçün müvəqqəti olaraq bağlanıb.
Axar.az xəbər verir ki, bu barədə Türkiyə mətbuatı məlumat yayıb.
Məlumata görə, buna səbəb səhər saatlarına doğru bölgədə güclənən dumanın dənizdə görmə qabiliyyətini pisləşdirməsidir.
Duman aradan qalxdıqdan sonra naviqasiya bərpa olunacaq.
Polşa Prezidenti Anjey Duda dünyada təhlükəsizlik xatirinə Rusiya imperializminin dayandırılmasının qaçılmaz olduğunu bəyan edib və Ukraynada müharibənin başa çatması üçün iki başlıca addımı açıqlayıb.
Bu barədə o, İtaliyanın «RAİ» telekanalına danışıb.
«Biz, bilirik ki, Avropanın təhlükəsizliyi üçün, dünyada təhlükəsizlik üçün Rusiya imperializmi dayandırılmalıdır. Mənim üçün bu, hər şeydən əvvəl o deməkdir ki, Rusiya Ukraynanın beynəlxalq birlik tərəfindən tanınmış sərhədlərinə sıxışdırılmalıdır» - o, izah edib.
Dudanın sözlərinə görə, Polşa bilir ki, Rusiyanın hücumu və işğal nə deməkdir. O, qeyd edib ki, polyaklar görəndə ki, ukraynalılar nələrdən keçirlər, onların köməyi gerçək, emosional oldu və ürəkdən gəldi.
«Amma Polşa hakimiyyəti olaraq, biz, buna soyuq və rassional baxırıq. Biz bilirik ki, rusiyalıları dayandırmaq lazımdır, o, yenidən doğulmuş rus imperializmidir» - Duda qeyd edib.
Duda hesab edir ki, əgər Ukrayna məğlub olarsa, Rusiyanın növbəti hədəfi Polşa olacaq.
Türkiyə Prezidenti Rəcəb Tayyib Ərdoğan ilə ukraynalı həmkarı Volodimir Zelenski arasında telefon danışığı olub.
Bu barədə "Report"un yerli bürosuna Türkiyə Prezidentinin Administrasiyası yanında Kommunikasiya İdarəsindən məlumat verilib.
Telefon danışığı zamanı Rusiya-Ukrayna müharibəsindəki son hadisələr müzakirə edilib.
Türkiyə Prezidenti danışıqlar yolu ilə müharibənin sona çatması üçün hər cür töhfə verməyə hazır olduğunu bildirib.
Ərdoğan Bartında baş verən mədən partlayışı ilə bağlı başsağlığına görə Zelenskiyə təşəkkür edib.
Böyük Britaniyanın müdafiə naziri Ben Uolles ABŞ-a səfəri zamanı Pentaqon rəhbəri Lloyd Ostinlə İranın Rusiyaya silah göndərməsini müzakirə edib.
APA xəbər verir ki, bu barədə The Daily Telegraph nəşri məlumat yayıb.
Qəzet yazır ki, nazirlər Ukraynadakı vəziyyəti müzakirə edib, Rusiyanın bu ölkədə İran istehsalı olan PUA-lardan istifadə etməsinə xüsusi diqqət yetiriblər.
Britaniyanın müdafiə naziri Ben Uolles İcmalar Palatasının Müdafiə Komitəsi qarşısında çıxışını təcili ləğv edərək, Vaşinqtona yola düşüb.
Bu barədə Britaniya mətbuatı məlumat yayıb.
“Müdirim Ben Uolles bu səhər Vaşinqtondadır”, - deyə Uollesin müavini Ceyms Hippi bildirib.
O, səfərin məqsədini dəqiq açıqlamayıb, lakin eyhamlarla danışıb. “Uolles “elə söhbətlər edəcək ki... həqiqətən də inanılmazdır ki, bu cür söhbətlərə ehtiyac duyulan bir dövrdə yaşayırıq”, - deyə Hippi əlavə edib.
“Sky News”un təhlükəsizlik və müdafiə üzrə redaktoru Debora Heyns isə Müdafiə Departamentindəki mənbəyə istinadən qeyd edib ki, müdafiə naziri ümumi təhlükəsizlik məsələlərini müzakirə etmək üçün Vaşinqtondadır. Həmçinin qeyd edib ki, bu məsələlərə Ukraynada vəziyyət də daxildir. Heyns bildirib ki, nazir Pentaqondakı həmkarını və Ağ Evdəki yüksək vəzifəli məmurları ziyarət edəcək.
Mənbə: Yevropeyskaya pravda
ABŞ Rusiyaya yardım etdiyinə görə İrana qarşı sanksiyaları sərtləşdirməyi planlaşdırır. Belə ki, Tehran Moskvaya ballistik raketlər göndərməyi də planlaşdırır.
“Report” xəbər verir ki, bu barədə “Politico” nəşri yazıb.
“Biz İrana Rusiyaya ukraynalıları öldürməyə kömək edən hər kəsə mütləq sanksiya tətbiq edəcəyik”, - Ağ ev rəsmisi deyib.
Nəşr bildirib ki, ABŞ Prezidenti Cozef Baydenin administrasiyası əvvəllər İranın Rusiyaya silah satışı ilə bağlı məlumatları açıqlayıb və bunun sanksiyalara səbəb olacağını vurğulayıb.
Ağ ev rəsmisi söhbətin hansı sanksiyalardan getdiyini açıqlamasa da, böyük ehtimalla bunlara iqtisadi məhdudiyyətlər və ixraca nəzarət tədbirləri daxil olacaq. “Politico” qeyd edib ki, bu, İran və Rusiyaya yardım edən üçüncü tərəflərə qarşı yönəldiləcək.
Xatırladaq ki, hələ iyul ayında KİV-də İranın Rusiyaya “Shahed” pilotsuz uçuş aparatlarını satdığına dair məlumat yayılmışdı. Avqustda ABŞ-ın “The Washington Post” nəşri İran istehsalı “Mohajer-6” və “Shahed” PUA-larının ilk partiyasının Rusiyaya çatdırıldığını bildirmişdi. Sentyabrın 13-də Ukrayna Silahlı Qüvvələrinin Strateji Kommunikasiyalar İdarəsi İran istehsalı olan ilk PUA-nın zərərsizləşdirildiyini açıqlamışdı. Sentyabrın 23-də isə İran İslam Respublikasının Ukraynadakı müvəqqəti işlər vəkili bu ölkənin Xarici İşlər Nazirliyinə (XİN) çağırılıb, səfir akkreditasiyasından məhrum edilib.
İranın Ərdəbil şəhərində xəstəxanada mülki geyimli repressiv qüvvələr tələbələrə hücum ediblər.
Bu barədə “Azad İran” “Telegram” kanalı xəbər verir.
Qeyd edilir ki, Tibb Universitetinin molla rejimindən narazı tələbələri hökumət qüvvələrinə xitabən “şərəfsiz” şüarı səsləndiriblər.
Türkiyə prezidentinin sözçüsü İbrahim Kalın ABŞ rəhbərinin təhlükəsizlik məsələləri üzrə müşaviri Ceyk Sallivanla telefon danışığı aparıb.
Musavat.com-un xəbərinə görə, danışıq zamanı ikitərəfli siyasi və iqtisadi əlaqələr, müdafiə sənayesi və enerji sahələrində əməkdaşlıq, Ukraynadakı müharibə, Egey və Aralıq dənizində vəziyyət, digər regional məsələlər müzakirə edilib.
"Makron əslində Rusiyanı günahlandırmadı, əksinə, özünə haqq qazandırdı. Fransanın özünün 1960-cı illərin sonundan bəri keçmiş müstəmləkələrində necə davrandığını xatırlamaq lazımdır. O, Fransanın Ermənistanı nə qədər çox sevdiyini şiddətlə deyir. Bununla o, müdrik və nəcib görünməyə çalışır. Son açıqlama açıq-aşkar erməni diasporasının rəğbətini qazanmağa hesablanıb".
Bunu Rusiya Federasiyası Təhlükəsizlik Şurasının sədr müavini Dmitri Medvedev özünün "VKontakte" hesabında paylaşıb.
O bildirib ki, Makronun Rusiyanı Ermənistan-Azərbaycan sərhədində vəziyyəti alovlandırmağı ilə bağlı ittiham etməsi çox yanlışdır:
"Avropa siyasətinin sevimli metodu günahı sağlam başın üzərinə yıxmaqdır. Fransa Prezidenti Emmanuel Makronun son bəyanatını izah etməyin başqa yolu yoxdur", - Medvedev hər iki dildə deyib.
Dmitri Medvedev Fransanı iyrənc müstəmləkə keçmişi olan ölkə adlandıraraq hazırkı ermənipərəst mövqeyinə görə qınayıb:
"İyrənc müstəmləkə keçmişi, hazırda isə açıq-aşkar amerikapərəst mövqeyi üçün - (C'est une honte) ayıb olsun, cənab Prezident!".
Qeyd edək ki, Fransa Prezidenti Emmanuel Makron “France 2” telekanalının efirində Rusiyanı Cənubi Qafqazda və onun hüdudlarından kənarda sabitliyi pozmaq üçün Ermənistan və Azərbaycan arasında son toqquşmaları qəsdən təhrik etməkdə ittiham edib.
Almaniyalı alim, doktor Mixael Reynhard Hess Fransa Prezidenti Emmanuel Makrona açıq etiraz məktubu yazaraq, onun bu il oktyabrın 14-də “France 2” telekanalına verdiyi müsahibədə Azərbaycanla bağlı fikirlərinə tutarlı dəlillərlə tənqidi münasibət bildirib.
Açıq məktubu alim özünün Facebook sosial şəbəkəsindəki hesabında yerləşdirib.
“Nə Fransa, nə Ermənistan, nə də Azərbaycan vətəndaşıyam, bu ölkələrdə yaşayan xalqlardan heç biri ilə də etnik bağlılığım yoxdur, bununla belə, Ermənistan və Azərbaycan arasında münaqişə barədə bir neçə kitabın və məqalələrin müəllifi olan tədqiqatçı kimi Sizə kiçik bir açıq məktub yazmağı vacib saydım” - Makrona müraciətini bu sözlərlə başlayan alman alim, ilk növbədə, Fransa prezidentinin müsahibədə münaqişə barədə söylədiklərini özünün şəxsi fikri kimi qələmə verməsi ilə razılaşmır və onun mövqeyini həm də Fransanın rəsmi mövqeyi hesab etdiyini bildirib.
Bunu aşkar məntiqsizlik kimi səciyyələndirən Hess yazıb: “Çünki, bir tərəfdən siz Fransanı “vasitəçi qüvvələrin bir hissəsi” kimi təsvir edir, digər tərəfdən, həvəslə, böyük emosionallıqla və təsirli şəkildə vurğulayırsınız ki, Fransa bu münaqişədə Ermənistanı dəstəkləyir və ondan “əlini çəkməyəcək”. Mən anlamıram, hər hansı dövlət və ya siyasətçi“vasitəçilik” səylərində iştirak etməklə neytral mövqedə olmalı ikən münaqişə tərəflərindən birinin tərəfini necə saxlaya bilər”.
Alman alim, həmçinin hesab edir ki, məhz Fransa kimi tərəfsizliyi bacarmayan dövlətlərin vasitəçilik missiyası yerinə yetirən dövlətlərarası siyasi qurumların (Minsk qrupu kimi) tərkibində olması münaqişənin tənzimlənməsi üçün 1992-ci ildən həyata keçirilən diplomatik səylərin uğursuzlunun səbəblərindən biridir.
Makronun Qarabağla bağlı qaranlıq tarixi, siyasi və hüquqi istinadlarını da qəbul etmədiyini bildirən M.R.Hess Fransa prezidentinin “Gördüyünüz kimi, Dağlıq Qarabağbeynəlxalq səviyyədə tanınmadı və buna görə də münaqişə yarandı” sözlərini misal gətirib, keçmiş muxtar vilayətin daim Azərbaycanın tərkibində olduğunu xatırladıb.
Alman alim “Qarabağdan və Azərbaycanın digər rayonlarından bütün işğalçıqüvvələrin dərhal çıxarılması haqqında” 1993-cü ildə BMT Təhlükəsizlik Şurasının Fransanın iştirakı ilə qəbul etdiyi qətnamələri də E.Makronun yadına salıb. O, həmçinin Fransanın prezidentinin diqqətini Normandiya əyalətindəki separatçıların, Adalarla yaxınlığına görə, bu ərazinin Böyük Britaniyaya birləşdirilməsi barədə iddialara da yönəldib:
“Siz çıxışınızda BMT-nin qəbul etdiyi beynəlxalq hüquq prinsiplərinə açıq və birmənalı şəkildə üstünlük vermir, sanki xalqlar və dövlətlər arasında münasibətlərdə, əksərən yersiz qeyri-rəsmi söhbətlərin istənilən vaxt “mübahisə” üçün dəlil kimi istifadə edildiyi, separatçıların işinə yarayan konsepsiyadan yapışırsınız”.
Hess “müharibəni Azərbaycanın başlaması, əraziləri işğal etməsi” barədə Fransa prezidentinin əsassız iddialarına da açıq məktubda tutarlı cavablar verib, 1991-ci ildən başlanan erməni təcavüzü, erməni silahlı dəstələrinin törətdiyi kütləvi qətllər, o cümlədən Xocalı hadisəsi barədə həqiqətləri xatırladıb.
Almaniyalı alim ötən əsrin əvvəllərində baş verdiyi iddia edilən uydurma “erməni genosidi”ni Ermənistan-Azərbaycan konflikti kontekstində xatırlatmasını isə E.Makronun çıxışının ən təhlükəli məqamı kimi səciyyələndirib.
Fransa prezidentinin müsahibəsində söylədiklərinin onun bir siyasətçi kimi ölkəsindəki erməni dairələri ilə yaxşı münasibət qurmaq istəyi ilə bağlı olduğunu ehtimal edən M.R.Hess onu qarşı tərəfindən səsini eşitməyə, fransızdilli mühitdə azərbaycanlıların dəlillərini ortaya qoyacaq çox az sayda araşdırmaçıları və publisistləri də görməyə çağırıb, həmçinin, münaqişə tərəfləri arasında sülhə nail olmaq naminə E.Makrona vasitəçi və arbitr mövqelərini bir-birinə qarışdırmamağı tövsiyə edib.
Xatırladaq ki, 55 yaşlı alim Mixael Reynhard Hess hazırda Azad Berlin Universitetində və Giezen şəhər Universitetində çalışır. Azərbaycan ədəbiyyatına, tarixinə və mədəni irsinə dair bir neçə kitabın müəllifidir. Onun bu il çapdan çıxmış almanca “Şuşanın irsi. Azərbaycan mədəniyyət paytaxtının tarixi və inkişaf yolu” kitabın ADA Universitetində və Qaçqınların və Məcburi Köçkünlərin İşləri üzrə Dövlət Komitəsində təqdimatı təşkil edilib.