“Hazırda silahı təhvil verib təslim olan qanunsuz erməni yaraqlılarına tətbiq edilən amnistiya qondarma rejimin keçmiş rəhbərlərinə şamil edilməməlidir”. DİA.AZ bildirir ki, ermənişünas alim, Türkiyənin Erciyes Universitetinin professoru Qafar Çaxmaqlı Cebhe.info-ya açıqlamasında belə deyib.
Onun sözlərinə görə, həm terrorçu rejimin nümayəndələri, həm də Ermənistan hakimiyyəti çaşqınlıq içindədir və yeni situasiyada hansı addımları atacaqlarını bilmirlər:
“Azərbaycanın əsas tələblərindən biri separatçılığın ləğv olunması və qondarma rejimin özünü buraxmasından ibarətdir. Amma uydurma qurum hələ özünü buraxmayıb.
Qarabağda separatçılıq ləğv olunmasa, gələcəkdə Azərbaycan yeni təhlükələr, münaqişələrlə üzləşə bilər. Ermənilərin orada qalması Azərbaycan üçün təhdiddir. Biz onlara reinteqrasiya təklif edirik. Bu proses həyata keçirilsə, ermənilər Bakıya və Azərbaycanın digər bölgələrinə gəlib-gedəcəklər. Əgər onlar separatçılıq düşüncəsindən imtina etməsələr Azərbaycan üçün təhlükə törədə bilərlər. Ona görə də Azərbaycan ilk növbədə, qondarma rejimin ləğvinə çalışmalıdır.
Əlbəttə, Xankəndidən Yevlax şəhərinə nümayənlər gəldi. Amma onların kimi təmsil etdiyi tam aydın deyil. Buna aydınlıq gətirməlidir. Qarabağ iqtisadi rayonunun ermənilər yaşayan hissəsində Azərbaycanın dövlət strukturları yaradılmalı və inzibati idarəetmə orqanları fəaliyyətə başlamalıdır.
Azərbaycan separatçı, etnik bölücülük aradan qalxsın. Bu tələb hələ yerinə yetirlməyib. Ermənistan da yeni siyasi vəziyyətə uyğun şərtlərin necə olacağını təsəvvür edə bilmirlər. Ermənistan hökuməıtinin özündə Qarabağa dair hansı siyasəti yürüdəcəkləri barədə bitkin fikir yoxdur. YalnızBaş nazir Nikol Paşinyan Qarabağın Azərbaycanın ərazisi olduğunu elan edib və münaqişədən uzaqlaşmaq siyasətini yürüdür.
Onlar Qarabağda yaşayan ermənilərin hüquqları və təhlükəsizliyi ilə bağlı siyasəti beynəlxalq müstəvidə yürütməkdə davam edəcəklər. Bundan kənarda Ermənistanın Qarabağa aid siyasəti yoxdur. Yəni qondarma rejimin özünü buraxması məsələsində qeyri-müəyyənlik var”.
Qeyd edək ki, rəsmi Bakı qondarma rejimin hazırkı və keçmiş rəhbərlərinin Azərbaycana təhvil verilməsini tələb edir. Cinayətkar qurum bu şərtə əməl etməsə, o zaman Azərbaycanın ərazi bütövlüyü və suverenliyi üçün təhlükə mənbəyi qalamaqda davam edəcək. Belə olan halda Azərbaycan həmin terrorçuların saxlanılması üçün xüsusi əməliyyat keçirmək məcburiyyətindədir.
Qafar Çaxmaqlı hesab edir ki, Azərbaycan xalqına qarşı soyqırım, işğalçılıq və etnik təmizləmə prosesində iştirak etmiş həmin adamlara amnistiya tətbiq etmək olmaz:
“Azərbaycan əvvəldən bəyan edib ki, silahı yerə qoyub təslim olan qanunsuz erməni hərbi birləşmələrinin üzvlərinə amnistiya tətbiq olunacaq. Amma bunlar Azərbaycan Prezidentinin səlahiyyətlərinə daxildir. Hələ belə bir fərman yoxdur.
Ermənistanda onların taleyinin necə olacağı ilə bağlı müzakirələr gedir. Hesab edirəm ki, Azərbaycana qarşı ağır cinayətlər, soyqırım törətmiş adamlar konstitusiyamızın tələblərinə uyğun şəkildə cəzalandırılmalıdır. Bako Saakyana, Arkadi Qukasyana amnistiya necə tətbiq oluna bilər?
Onlar Azərbaycan ərazilərinin işğalına, etnik təmizləmə siyasətinə rəhbərlik ediblər. Sonra isə işğal olunmuş Azərbaycan torpaqlarında separatçı xunta rejimi yaradıblar. Eləcə də, Birinci Qarabağ müharibəsində iştirak etmiş Robert Köçəryan, Serj Sarkisyan, Seyran Ohanyan, Samvel Babayan Xocalıda dinc əhaliyə qarşı soyqırım həyata keçiriblər.
Samvel Babayan və Vitali Balasanyan Şuşanın və digər ərazilərin işğalında birbaşa iştirak edib. Yaxud Araik Arutunyan və digərilərinin əlləri Azərbaycan xalqının qanına batıb. Onların adları Azərbaycan hüquq-mühafizə orqanları tərəfindən axtarışda olan cinayətkarlardır.
Həmin canilər məsuliyyətə cəlb edilməlidir ki, bir daha belə hadisələr təkrar olmasın. Lakin silahı yerə qoyub Azərbaycana təslim olan erməni əsgərlər əfv edilə bilər.
Qarabağda separatçılığı tamamilə məhv edib dinc erməni əhalisinin reinteqrasiyasına nail olmaq üçün müəyyən yollar tapılmalıdır”.
