Parlament seçkiləri ərəfəsində istər yeni namizədlər, istərsə də uzun illər Milli Məclisdə papağını günə yandıran deputatlarla bağlı silsilə məqalələr yazmışıq.

Builki seçkilərdə də ortaya çıxıb vədlər verən, mandat almaq uğrunda əlindən gələni əsirgəməyən bəzi namizədləri də radarımızdan keçirib, onları törətdikləri əməllər ilə baş-başa qoymuşuq.

Yenicag.az-ın qalmaqallı deputatlarla bağlı başlatdığı rubrikada istər hakim YAP, istər müxalifət düşərgəsi, istərsə də parlamentə bitərəfliyi ilə girib elə öz dairəsinin problemlərinə qarşı da bitərəf olan deputatları daim hədəfə götürmüşük.

Mərkəzi Seçki Komissiyasının qeydə alınmış namizədlərlə bağlı siyahısına nəzər yetirərkən gözümüz 110 saylı Balakən seçki dairəsindən hakim YAP-ın sıralarından deputatlığa namizəd olan Nəsib Məhəməliyevə sataşdı. O Nəsib Məhəməliyev ki 2000-2006-cı illərdə Balakən rayonunun, 2006-2015-ci illərdə isə Bakı şəhəri Nəsimi rayon icra hakimiyyətinin başçısı vəzifəsində işləyib. Bundan sonra isə o, Milli Məclisin V və VI çağırış deputatı olub.

N. Məhəməliyevlə bağlı isə apardığımız araşdırmanın nəticəsi isə heç də ürəkaçan olmayıb.

Onun deputatlıq fəaliyyətindən öncə isə gəlin 6 il rəhbərlik etdiyi Balakəndə necə yadda qaldığını öyrənək. Mediada onun fəaliyyəti, daha dəqiq desək, fəaliyyətsizliyi ilə bağlı gedən yazını olduğu kimi təqdim edirik:

“Cənab Məhəməliyevin Balakən rayonunda demək olar ki, heç bir nüfuz və dəstəyi yoxdur. Hazırda onun ətrafında rayonda imkanlı, nüfuzlu şəxslərdən demək olar ki, heç biri yoxdur. Rayon ziyalılarının fikrincə, müəyyən adamlar var ki, rayonda olduqca kasıb vəziyyətdə yaşayırlar. Həmin adamlar Nəsib Məhəməliyevdən pul qopartmaq naminə 2015-ci ildə onun ətrafına toplaşıb və seçkidə ona dəstək olacaqları vədini veriblər. Ancaq bu, baş tutan deyil. Əvvəla, ona görə ki, Nəsib Məhəməliyev uzun müddət Balakən rayon icra hakimiyyətinin başçısı vəzifəsində çalışıb. Bu adam bir nəfər kasıb, imkansız adama əl tutmayıb. Bu şəxsin işi-peşəsi pul, mal-mülk toplamaq olub. Bir sözlə desək, ev tikən yox, ev yıxan olub. Vaxtı ilə onun qəbuluna gələnləri icra hakimiyyətindəki polislərə, ətrafında olan şillə vuranlara döydürürdü. İnsanlara yuxarıdan aşağı baxırdı.

Nəsib Məhəməliyevin dövründə rüşvət, məmur özbaşınalığı heç vaxt olmadığı qədər yüksəklərə qaldırıldı. Həmin dövrlər niyə fikirləşmədi ki, bu günün sabahı da var? Axı bu illər ərzində Balakənə, balakənlilərə Nəsib Məhəməliyev nə verdi ki, indi də gəlib onlardan deputat olmaq üçün səs istəyir? Əgər Nəsib Məhəməliyev balakənlilərin başına açdığı oyunları unudubsa, biz bunu unutmamışıq. Rayon səhiyyəsini, təhsilini məhv etdi. Rüşvət hesabına nə qədər ki, savadsız adamlar var idi, hamısını yığıb vəzifələrə doldurdu. Onun səpdiyi toxumlar Balakəni hələ də ağrıdır. Hesab edirik ki, həm sadə balakənlilər, həm də rayon ziyalıları Nəsib Məhəməliyevi yaxşı xarakterizə etmir və onun Balakən rayonundan millət vəkili seçilməyinə də səs verməyəcəyik. Əgər o rüsvay olmaq istəmirsə, bu inadından əl çəkməlidir. Nə istəyir? Uzun illər həm Balakəni, həm də Nəsimi rayonunu çapıb talayıb. Yığdıqları indən belə yeddi nəslinə də yetər. Ümumiyyətlə, Nəsib Məhəməliyevin Balakən və balakənlilərin adından danışmağa heç bir haqqı çatmır”.
Namizədin əməlləri bununla da yekunlaşmır. Maraqlısı budur ki, cənab Məhəməliyev Nəsimi rayon icra hakimiyyətinin başçısı olduğu dönəmdə də maraqlı “fəaliyyət”i ilə ad çıxarmışdı.

Mediada bu barədə gedən digər yazını təqdim edirik:

“Məlumatlardan biri budur ki, o, Nəsimi rayon İH-nin başçısı kimi rayon ərazisində, 4-cü mikrorayon, Mircəlal Paşayev küçəsində 5 mərtəbəli binaların həyətində uşaq bağçası kompleksi inşa etdirib. Qeyd olunur ki, Mircəlal Paşayevin adını daşıyan küçədə 2 mərtəbəli, təqribən, 200 uşaq yerli olan bağça kompleksini icra başçısı vəzifəsindən uzaqlaşdırıldıqdan sonra təhvil verdirmir.

Məlumatda deyilir ki, cənab Məhəməliyev bu bağçanı həyat yoldaşının adına özəlləşdirib və bağçanın fəaliyyətinə icazə verilmədiyinə görə, qapısına qıfıl vurduraraq, ağzı bağlı saxlatdırır. Cənab Məhəməliyev görünür dövlət hesabına inşa etdirdiyi bu əmlakı hələ çox ağzı bağlı saxlayacaq”.

Xülasə, Nəsib müəllim və onun fəaliyyəti ilə bağlı bir çox faktlar dövri mətbuatda yayılsa da, biz oxucularımızı bununla yormaq istəmirik. Qısacası, sözümüzün canı odur ki, 15 illik icra başçısı, 9 illik isə deputatlıq dönəmində cənab Məhəməliyev Balakən və paytaxtın Nəsimi rayonlarına hansı müsbət işi ilə yadda qalıb ki, bu gün 3-cü dəfə böyük ehtirasla mandat əldə etmək uğrunda parlamentə düşmək istəyir? Balakəndə daş üstünə daş qoymayan, Arif Əsgərov kimi Nəsimi rayonunda öz mal-mülklərini artırmağa çalışan Nəsib müəllim hansı haqla bu gün parlamentə düşmək istəyir? Ümumiyyətlə, qalmaqallı keçmişi olan belə bir şəxs axı seçicilərin nəyinə lazımdır? Qəribədir…

Mövzunu davam etdirəcəyik…

Azərbaycanda Milli Məclisə sentyabrın 1-də keçiriləcək növbədənkənar seçkilər artıq özünün həlledici fazasına daxil olub. Seçkilər çərçivəsində avqustun 9-da start götürən təşviqat mərhələsinin başlaması ilə deputatlığa iddialı olan namizədlər seçici rəğbəti uğrunda mübarizəyə girişiblər.

Azərbaycanda seçkilərin spesifikiliyinə dair hələ ki dəyişməz stereotiplərin qalmasına baxmayaraq, namizədlər “meydanda yeriyə-yeriyə qalib gəlməyin” mümkün olmadığının fərqindədirlər.

O baxımdan, millət vəkilliyi uğrunda rəqabətə baş vuranların əksəriyyəti ayrı-ayrılıqda özlərinin ən layiqli namizəd olduqlarına seçiciləri inandırmaq üçün az qala bütün vasitələrə əl atırlar.

Hər halda, təşviqat kampaniyasının hələ tam “relsə düşmədiyini” nəzərə alsaq, qarşıdakı həftələrdə maraqlı və gərgin mübarizənin şahidi olacağımız gözlənilir.

1 sentyabr seçkilərində mandatını qorumağa çalışan VI çağırş deputatların və millət vəkili statusunu ilk dəfə qazanmaq arzusunu gerçəkləşdirmək istəyənlərin bu mübarizəyə nə qədər hazırlıqlı olduqlarını isə yekun nəticələrgöstərəcək.

Bununla belə, səsvermənin nəticələrinin konkretləməsinin yaxın həftələrin söhbəti olduğunu vurğulayaraq qeyd edə bilərik ki, bir sıra iddialılar üçün sonucların artıq indidən müəyyənləşdiyini söyləməyə əsas yaradan ciddi səbəblər mövcuddur.

Həmin namizədlər arasında Milli Məclisin sonuncu tərkibinə daxil olmuş şəxslərin üstünlük təşkil etməsi isə onların 2020-ci il fevral seçkilərindən necə “qalib” çıxmaları və millət vəkili kimi fəaliyyətlərinin nə dərəcədə “effektli” olması ilə şərtlənir.

Çünki heç kəsə sirr deyil ki, ötən seçkilərdə namizəd olduqları dairələrdə seçicilərə “qızıl dağlar” vəd edən bir çox deputatlar mandat qazandıqdan sonra nə təmsilçisi olduqları seçicilər, nə də dövlət üçün faydalı işləri ilə seçildilər. Odur ki, nəzərdə tutulan keçmiş deputatların Milli Məclisdə yenidən təmsilçilik hüququ əldə etmələri yetərincə problemli görünür.

Onların sırasına ötəri nəzər yetirdikdə, fəaliyyətsizlik kriteriyası uyğun gələn sabiq parlamentarilərdən birinin 2020-ci il seçkilərinə 89 saylı Göyçay-Ağdaş seçki dairəsindən deputat olmuş Məzahir Əfəndiyev olduğunu görərik.

Əminliklə söyləmək mümkündür ki, bu ad nəinki ölkənin ictimai-siyasi həyatını yaxından izləyənlərə, heç Göyçay və Ağdaş seçicilərinə də heç nə demir. Axı tanınmaq üçün iş görmək, seçicilərin problemləri ilə maraqlanmaq, onların həlli istiqamətində çalışmaq lazımdır. Ortada faydalı bir yoxdursa, onu kim və necə tanısın?

Ümumiyyətlə, Məzahir Əfəndiyevin adı ilk dəfə geniş publikaya onun özünü saldığı çox komik bir situasiyada məlum oldu. O, parlamentdə fəaliyyətə başlamağından təqribən üç il keçdikdən sonra birinci dəfə çıxış etmək üçün elektron növbəyə yazılsa da, səriştəsizliyi üzündən bu imkanı itirmişdi. Bəhs olunan olayla əlaqədar spiker Sahibə Qafarova ilə Əfəndiyev arasında olmuş komik dialoq sosial şəbəkələrdə hələ də izlənməkdədir.

Bu da sözügedən keçmiş deputatın qeyri-adi sərgüzəştlərinin hamısı deyil. 2024-cü ilin yanvarında Məzahir Əfəndiyevin adı daha bir qalmaqalda hallandı və bu olay mediada, həmçinin sosial şəbəkələrdə geniş işıqlandırıldı.

Belə məlum oldu ki, Əfəndiyev yol hərəkəti qaydalarını pozduğu üçün yazılmış cəriməni ödəmədiyinə görə məhkəməyə verilib. Əlbəttə, qanunlara riayət etməkdə digər vətəndaşlara nümunə olası deputatın adının belə bir arzuedilməz məsələdə hallanması Milli Məclisin də reputasiyasına ciddi zərbə idi.

Lakin göründüyü qədər, bu qeyd olunan “ÇP”lər Məzahir Əfəndiyev üçün “sıradan olay”lar silsiləsinə aiddir. Əks halda, o yenidən eyni dairədən (Göyçay-Ağdaş seçki dairəsi yeni sıralamada 92 saylıdır) namizədliyini irəli sürməzdi.

Ancaq Əfəndiyevin 2020-ci ildə Milli Məclisə düşməsinə təkan vermiş amillərin bu dəfə “aktiv” olmadığı bildirilir. Mediada dərc edilmiş çoxsaylı materiallara əsasən, onun 2020-ci il seçkilərində mandat qazanması Azərbaycan cəmiyyətində “boz kardinal” kimi tanınan, yüksək vəzifədən azad edildikdən sonra da təsir imkanlarını müəyyən mənada qoruyub saxlamağı bacaran Ramiz Mehdiyevin dəstəyi sayəsində baş tutub. Mətbuatda yazılanlara görə, bu işdə Əfəndiyevlə qohumluq əlaqələrinə malik olan mərhum professor Seyfəddin Qəndilovun ailəsinin Mehdiyevlə yaxınlığı həlledici rol oynayıb.

Hər kəsə aydındır ki, indi vəziyyət kökündən dəyişib və “boz kardinal”ın erası çoxdan başa çatıb. Bu isə Əfəndiyevin öz əsas hamisindən məhrum olması, təkrar parlamentə düşmək şansını bəlkə də tamamilə itirməsi anlamına gəlir. Maraqlıdır, 4 il ərzində səsi çıxmayan, seçicləri üçün faydalı olmayan sabiq deputat bu dəfə kimə, yaxud nəyə güvənir?

www.yenicag.az

"Gold Residence" adlı MTK şirkəti Nərimanov rayonu Fətəli Xan Xoyski küçəsindəki qəzalı vəziyyətdə olan beşmərtəbəli binanı söküb, ərazini almaq istəyir. Ancaq bina sakinləri buna etiraz edirlər.
Problemlə əlaqədar yerli sakinlər redaksiyamıza müraciət ediblər. Onların dediyinə görə, bu evlərin qarşılığında şirkət onlara 15 min manat pul təklif edir, ya da 14-15 kv. metrlik evlər verir. Həmin evlər də şəhərdən kənarda yerləşən Bakı kəndlərindədir. Məsələ ilə əlaqədar hüquq-mühafizə orqanlarına müraciət olunsa da, "baxılacaq" deyilib, amma hələ də baxılmayıb. Vətəndaşların qazını, suyunu və işığını kəsiblər, axşamlar da gəlib evdən çıxmaları üçün hədə-qorxu gəlirlər. Bina 30 ilə yaxındır qəzalı vəziyyətdədir, bu barədə həmin illər ərzində FHN-dən heç bir sənəd verilməyib:

"...Amma şirkət əraziyə yerləşib, köhnə binaların ortasında bir otel tikəndən sonra gözü bu binalara düşüb və FHN-dən onların qəzalı vəziyyətdə olması ilə bağlı "tezbazar" sənəd ala bilib. İndi həmin sənədi əsas gətirərək, bizdən bu binanı təcili tərk etməyimizi tələb edirlər. Kişilərimizlə, cavan oğlanlarla burda dava-qırğına, şillə-təpiyə çıxırlar, zor tətbiq edirlər, gecənin bir vaxtı gəlib, hədələyirlər ki, "səhər evi boşaldın!". Bizə 14-15 kv. metrlik evlər təklif edirlər, halbuki, pilot layihələrdə 56 kv. metrdən aşağı ev yoxdur. Suyumuzu, qazımızı, işığımızı kəsirlər. Bu binada ikili vətəndaşlığı olan sakinlər də yaşayır. Onlara deyirlər ki, "Azərbaycandan imtina et, get, Rusiya səni qəbul etsin". Bu şirkətin rəhbəri adını "Hacı" qoyub. Biz bilmirik, hacılıq bunun baş daşındadır, yoxsa əməlində? Əgər burdan köçürüksə, 45 kv. metr bizim haqqımızdır. Burdakılar 128-ci və 130-cu küçələrdəki binanın sakinləridir. Toplasan, burda 50 nəfər var. Zəhmət çəksinlər, haqqımızı versinlər",- deyə, məhəllə sakinləri şirkət nümayəndələrinin davranışından şikayət ediblər.

Məsələ ilə əlaqədar "Gold Residence"in (Digər adı ilə "İmişli MTK") rəsmi nümayəndəsi ilə əlaqə saxlsaq da, şirkətin mövqeyi ilə bağlı redaksiyamıza açıqlama verməkdən imtina etdi. "Vüsal müəllim" adlanan şəxs bizi şirkətin ofisinə dəvət edib, məsələ ilə əlaqədar "təklikdə özəl" söhbət etməyi təklif etdi. Bu təklifin qanundankənar olduğunu bildirsək də, "sizi belə adi zənglə tanıya bilmərəm, gəlin, ofisdə söhbət edək" deyib, açıqlama verməkdən imtina etdi. Şirkətin rəhbəri olduğunu iddia edən Vüsal müəllimə məhəllə sakinlərindən bir neçə nəfərlə şirkətə gəlib, məsələni müzakirə etməyi təklif etsək də, yenə də müsbət cavab ala bilmədik.

Bina sakinlərinin müraciəti üzrə ərazidən çəkdiyimiz görüntüləri təqdim edirik. Qarşı tərəfin mətbuat etikasına zidd təklifləri istisna olmaqla, məsələ ilə əlaqədar verəcəkləri açıqlamanı dərc etməyə hazırıq.

Problemlə bağlı hüquq-mühafizə orqanlarının hərəkətsizliyi barədə də araşdırma aparmaq üçün müvafiq qurumlara sorğu verəcək və nəticəsi barədə oxucularımızı məlumatlandıracağıq.

Mətin Şükürlü, Bizimyol.info

2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərdə Yeni Azərbaycan Partiyası (YAP) tərəfindən 67 saylı Sabirabad seçki dairəsindən deputatlığa namizədliyii növbəti dəfə irəli sürülmüş Əhliman Əmiraslanovun mülkləri sosial şəbəklərdə yenidən gündəm olub

Yerli.media ölkə mediasında gedən məlumatlara əsaslanaraq qeyd edir ki, Azərbaycan Tibb Universitetinin keçmiş rektoru, deputatlığa namizəd Əhliman Əmiraslanovun övladlarının biznesi əsasən Türkiyə və Rusiyanı əhatə edir.

Araşdırmaçı jurnalist Cavanşir Həsənli feysbuk səhifəsində yazılanlara görə..

Onun sözlərinə görə, Fövqəladə hallar nazirinin müavini Tapdıq Əmiraslanovun və qardaşı Azər Əmiraslanovun biznes şəbəkəsinə çoxsaylı tikinti şirkətləri, ticarət mərkəzləri, restoran və kafelər daxildir:

“1. İÇ MİMARLIK İNŞAAT PROJE TAAHHÜT TASARIM UYGULAMA TİCARET LİMİTED ŞİRKETİ 2015-ci il aprelin 17-də İstanbul, BEŞİKTAŞ, LEVENT MAH.ÜLGEN SK.47 ünvanında 50 min lirə nizamnamə kapitalı ilə qeydiyyatdan keçib. Qeydiyyat nömrəsi 971304-0-dır. Təsisçiləri Əhliman Əmiraslanovun oğlu Azər Əmiraslanov və Türkiyə vətəndaşı Alev Kaygazdır. Alev Kaygaz Türkiyədəki biznesi idarə etməkdən əlavə London və Dubayda da tez-tez görünür. Deputatın oğlu ilə şərikliyə qədər o, 2K TASARIM VE İÇ MİMARLIK İNŞAAT SANAYİ VE TİCARET LİMİTED ŞİRKETİ-nin sahibəsi olub.

Şirkət inşaat və daşınmaz əmlak sektorunda fəaliyyət göstərir, o cümlədən yaşayış binalarının tikintisi ilə məşğul olur.

2. Azər Əmiraslanovun Türkiyədə təsis etdiyi digər şirkət ENERJİM E TİCARET BİLİŞİM VE YAZILIM HİZMETLERİ LİMİTED ŞİRKETİdir. 250 min lirə nizamnamə kapitalı olan şirkətin qeydiyyat nömrəsi 801011-0, hüquqi ünvanı SARIYER, MASLAK MAH.AKASYA SOK.ECLİPSE MASLAK SİTESİ F BLOK NO:5 F/4-dür. Bu ünvan İstanbjlda deputatın oğluna məxsus AĞLANÇ RESTAURANT-ın yerləşdiyi ünvandır.elə şirkətin də kvalifikasiya sahəsinə restoran və içki məkanları, ərzaq və içki idxalı, ixracı daxildir. Azər Əmiraslanovun bu şirkətdəki şərikləri Elmir Cəbrayılov və Türkiyə vətəndaşı Emir Turacıkdır.

3. İstanbulda Əmiraslanovlara məxsus qeydiyyatdan keçmiş daha bir şirkət isə AZER GAYRİMENKUL MEDİKAL İNŞAAT SANAYİ VE TİCARET LİMİTED ŞİRKETİdir. Bu şirkətin təsisçiləri qismində Azər Əmiraslanovdan başqa, Əhliman Əmiraslanovun digər oğlu, fövqəladə hallar nazirinin müavini Tapdıq Əmiraslanov da iştirak edir.

Şirkətin qeydiyyat nömrəsi 704740-0, hüquqi ünvanı İstanbul, BEŞİKTAŞ, LEVENT MAH.ÜLGEN SK.47-dir. Əvvəldə qeyd etdiyim kimi Azər Əmiraslanovun Alev Kaygazla ortaq qurduğu şirkət də bu ünvanda fəaliyyət göstərir.

Şirkət əsasən tibbi təyinatlı olmaqla, daşınmaz əmlak sektorunda fəaliyyət göstərir.

4. Deputatın oğlu Rusiyada da indiyədək 5 şirkət qeydiyyatdan keçirib, onlardan yalnız biri fəaliyyətini dayandırıb.

“NOVİNKİ” MMC (ОБЩЕСТВО С ОГРАНИЧЕННОЙ ОТВЕТСТВЕННОСТЬЮ “НОВИНКИ”) hələ Əliman Əmiraslanovun Tibb Universitetinin rektoru olduğu dönəmdə – 1996-cı ilin avqustunda Azər Əmiraslanov və şərikləri tərəfindən 8 milyon rubl nizamnamə kapitalı ilə təsis edilib (qeydiyyat nömrəsi 77160019227716). Hüquqi ünvanı Moskva, Novinki küçəsi 12 A-dır. Şirkətin adı elə bu küçənin adından götürülüb. Kolomenskoe metrosu yaxınlığındakı ünvanda şirkətə məxsus olan və hazırda “PRIMAVERA” şadlıq evi kimi fəaliyyətdə olan obyekt yerləşir.

Şirkətin təsisçilərindən biri – Nəsimi Allahverdiyev Azərbaycan Dövlət Aqrar Universitetinin yoluxmayan xəstəliklər kafedrasının mərhum professoru, şair Rübail Allahverdiyevin oğludur. Rübail Allahverdiyev Əhliman Əmiraslanovla uzun illərin dostu olub.

Daşınmaz əmlak sektorunda fəaliyyət göstərən şirkətin 2018-ci il maliyyə hesabatına görə gəlirləri 4 844 000 rubl təşkil edib.

5. Azər Əmiraslanov həmin tarixdə Nəsimi Allahverdiyevlə birgə Moskvada “Super-Kosna” MMC-ni də (ОБЩЕСТВО С ОГРАНИЧЕННОЙ ОТВЕТСТВЕННОСТЬЮ “СУПЕР-КОСНА”) qeydiyyatdan keçiriblər. 1 milyon 650 min rubl nizamnamə kapitalı olan daşınmaz əmlak şirkəti Rusiya paytaxtının Novinki küçəsi 12B ünvanında təsis olunub. Sözügedən ünvanda şirkətə məxsus “PRONTO” Ticarət mərkəzi və restoran fəaliyyət göstərir.

2017-ci il maliyyə hesabatına görə şirləyin gəlirləri 8 milyon 251 min rubl təşkil edib.

6. “DİVİDEND” MMC (ООО “ДИВИДЕНД”) 2010-cu ilin mayında 10 000 rubl nizamnamə kapitalı ilə təsis olunub. Şirkətin 49 faiz hissələri Azər Əmiraslanova, qalan 51 faizi isə Nəsimi Allahverdiyevin və qardaşının adına rəsmiləşdirilib, 2017-ci il maliyyə hesabatına əsasən gəlirləri 39 milyon 784 min rubl (o zamankı valyuta kursu ilə 610 min dollar) təşkil edib.
Daşınmaz əmlak sektorunda fəaliyyət göstərən şirkət Moskvada, Privolnaya küçəsi 63-də hüquqi qeydiyyatdadır. Bu ünvanda yerləşən və şərq mətbəxi təqdim edən ikimərtəbəli “Lepyoşka” kafesi “Dividend” MMC üzərindən idarə olunur.

7. Azəf Əmiraslanov “Bereq” MMC-ni (ОБЩЕСТВО С ОГРАНИЧЕННОЙ ОТВЕТСТВЕННОСТЬЮ “БЕРЕГ”) nizamnamə kapitalı 10 min rubl olmaqla 2014-cü ilin sentyabrında Fail Qurbanov adlı işadamı ilə birgə qeydiyyatdan keçirib.

Şkulyova küçəsi 2a/1 ünvanında hüquqi qeydiyyatda olan şirkət restoran biznesi sahəsində fəaliyyət göstərir. Əhliman Əmiraslanovun oğlu və onun şəriki bu şirkət üzərindən həmin ünvanda “AnderSon” restoranına sahibdirlər. Şirkət hissələrinin 65 faizi Fail Qurbanova 35 faizi isə deputatın oğluna məxsusdur.

8. Azər Əmiraslanovun Moskvada şərik olduğu daha bir şirkət – “PSK” MMC (ОБЩЕСТВО С ОГРАНИЧЕННОЙ ОТВЕТСТВЕННОСТЬЮ “ПЕРВАЯ СТРОИТЕЛЬНАЯ КОРПОРАЦИЯ”)

2003-cü ilin dekabrında qeydiyyatdan keçib. Tikinti sektorunda fəaliyyət göstərmiş şirkət 2013-cü ilin iyulunda ləğv edilib.

Mətbuatda yer alan məlumatlara görə Azər Əmiraslanov yaxın adamı və köməkçisi kimi tanınan Vüqar Cavadovun adına rəsmiləşdirilmiş “Azər-Türk” klinikasına və başqa bir neçə klinikalara, apteklərə, restoranlara və mağazalara da sahibdir”.

Həmçinin ökə mediasında gedən iddialara görə, Əhliman Əmiraslanovun oğlunu Türkiyədə qaçırıblarmış. Sözügedən mövzu ilə bağlı 03-10-2022-ci ildə ölkə mediasında çoxsayda materiallar dərc edilib.

Həmin məlumatlarda birini diqqətinizə çatdırırıq:

Türkiyədə azərbaycanlı deputatın oğlu oğurlanıb. Deputatdan oğlunun sərbəst buraxılması üçün 10 milyon dollar tələb olunub.

Danışıqların nəticəsi olaraq oliqarx deputat (keçmiş yüksək vəzifəli məmur) oğlunun sərbəst buraxılması qarşılığında 5 milyon dollarından keçməli olub.

Deputatın oğlunu oğurlayanlar separatçı kürd qruplaşmasının üzvləri olublar.

Qeyd edək ki, oliqarx deputatın oğlu 5 milyon dollar ödənildikdən sonra sərbəst buraxılıb. Onun hazırda Bakıda olduğu bildirilir.

****

***

Bakupost.az saytı isə oğurlanan şəxsin Azərbaycan Tibb Universitetinin sabiq rektoru, Milli Məclisin Səhiyyə komitəsinin sədri Əhliman Əmiraslanovun oğlu Azər Əmiraslanov olduğunu yazıb.

Azər Əmiraslanov Türkiyədə geniş biznes şəbəkəsinə sahibdir. Onun bir neçə klinika və tibb sahəsi ilə bağlı biznes obyektləri var. A.Əmiraslanovun məhz geniş maliyyə imkanlarına görə maddi maraq üçün oğurlandığı bildirilib.

****

“Qafqazinfo”nun əldə etdiyi məlumata görə, Azər Əmiraslanov İstanbulda oğurlanıb. Bildirilir ki, A. Əmiraslanov bir müddət əvvəl Türkiyədə yaşayan kriminal aləmin üzvləri ilə problem yaşayıb. O, kriminal dairələrdən Türkiyənin hüquq-mühafizə orqanlarına şikayət edib və onların saxlanılmasına nail olub.

*****

Əhliman Əmiraslanov haqqında qalmaqallar bununla bitmir. 13/03/2020-ci il tarixində gedən məlumata görə, Əhliman Əmiraslanovun qardaşı oğlu da ölkədə “hoqqa” verib.

vətəndaş Tamella Fərzəliyeva bildirir ki, Emil Vaqif oğlu Əmiraslanov ondan dəyəri 115.250 (Bir yüz on beş min iki yüz əlli) manat civarında qızıl-zinət əşyaları götürüb və qaytarmayıb.

Şikayətçinin sözlərinə görə, Emil Əmiraslanov həmin vəsaitin 30000 (otuz min) manatlıq hissəsinin qarşılığında vasitəçilik xidməti təklif edərək iş görəcəyini vəd edib, hansı ki, yerinə yetirməyib. Qalan böyük hissəsini isə borc kimi alaraq hər ay hissə-hissə, hər dəfə 10000 (on min) manat qaytaracağını söz verib. İlk aylar 1000 (bir min), 2000 (iki min), 3000 (üç min) manat qaytarsa da, sonradan gizlənərək öhdəlikdən yayınıb, telefon zənglərinə də cavab verməyib.

Vətəndaş T.Fərzəliyeva əlacsız qalaraq Emilin böyüklərini axtarıb. Atası – Bakı Humanitar Kollecinin direktoru Vaqif Əmiraslanovla və anası ilə əlaqə saxlayıb. İlk əvvəl Emilin valideynləri işi qaydasına qoyacaqları barədə ümidverici sözlər desələr də, sonradan onlar da oğullarının borcunu ödəməkdən və yü ödətdirməkdən yayınıblar. Belə olan halda borc yiyəsi məcbur olub Əhliman Əmiraslanovun qəbuluna düşüb və akademikin diqqətinə çatdırıb ki, Emil ona iş düzəldəcəyini vəd edərkən, məhz nüfuzlu əmisinin adından istifadə edib. Hərçənd, alim əmi də qardaşoğlunun əməllərinə cavabdeh olmaqdan boyun qaçırıb.

Ölkədə ən geniş yayılmış hüquq pozuntusunun dələduzluq olduğunu
cinayətlərin statistikasından başqa hər gün qarşıya çıxan faktlar da
doğrulayır. Dələduzluq cinayətləri , adətən, dövlət orqanlarının, vəzifəli
şəxslərin səlahiyyətlərini saxtalıqla mənimsəməklə gerçəkləşdirilir.
Danışacağımız faktda isə dələduzluğu edən dövlətin iqtisadi siyasətinə
cavabdeh edilən dövlət orqanıdır, İqtisadiyyat Nazirliyi yanında Əmlak
Məsələləri Dövlət Xidməti və tabeliklərindəki xidmətlərdir. Anlamaq olmur,
ƏMDX- Əmlak Məsələləri Dövlət Xidmətidir, yoxsa DƏLƏDUZLUQ
XİDMƏTİ?
“Veteranlar haqqında” qanunun 11-ci maddəsinin 2-ci abzası ilə DÖVLƏT
müharibə veteranlarının istifadəsində olan dövlət bağlarının və
bağçılıq sahələrinin ƏVƏZSİZ olaraq onların ( müharibə
veteranlarının- M. B. ) ŞƏXSİ MÜLKİYYƏTİNƏ verilməsini
aktlaşdırıb. Dövlətin adından bu görəvi yerinə yetirməyə təhkim edilən
İqtisadiyyat Nazirliyi yanında Əmlak Məsələləri Dövlət Xidməti isə açıq
mətnlə bildirir ki, eyni nazir(liy)in başçısı olduğu Tarif Şurası qanunu-
normativ hüquqi aktı ləğv edib.(?) Bir aydan çoxdur Konstitusiyaya açıq
sayğısızlığa qiymət verilmir. ƏMDX və tabe qurumlar “dedığım dedik,
çaldığım düdük” deyib dururlar. Elə bil, bunların özünün ayrıca özbaşınalıq
qanunu, konstitusiyaları var!(?) Ölkədə ən yüksək hüquqi qüvvəyə malik
qanun Konstitusiyadırsa, bu qanunda yazılıb ki, qanunların icrası və tətbiqi
məcburidir (maddə149, III hissə); heç kəsdən qanunda nəzərdə
tutulduğundan artıq vergilər və digər dövlət ödənişləri alına bilməz
(maddə73, II hissə). Bəs niyə müharibə veteranlarından ƏVƏZSİZ olaraq
ŞƏXSİ MÜLKİYYƏTƏ keçirməyə haqq etdikləri bağlarına görə “Dövlət
rüsumu haqqında” qanuna əsasən 125 manat dövlət rüsumu və Tarif
Şurasının 31.07.2023 tarixli, 5 saylı qərarına görə 118 manat xidmət
haqqı tələb edilir? Bəyəm ƏMDX bilmir ki, dövlət rüsumu – göstərilən
XİDMƏTLƏRƏ və hüquqi hərəkətlərə görə ödənilən haqdır?( “Dövlət
rüsumu haqqında” qanunun 1.1 maddəsi). Onu da bilmir ki, heç bir
qurum qanunla nəzərdə tutulmuş əsaslar olmadan və qanunda
göstərilmiş həcmdən əlavə vergilər və digər dövlət ödənişilərini
MÜƏYYƏN EDƏ bilməz? ( “Dövlət rüsumu haqqında” qanunun 1.2
maddəsi) Belə bəlli olur ki, bilmir. Bilsəydi, ödənişdən azadolma bir yana,
şişirtmə DÖVLƏT (DƏLƏDUZLUQ) ÖDƏNİŞLƏRİ MÜƏYYƏN ETMƏZDİ.
İqtisadiyyat Nazirliyi yanında Əmlak Məsələləri Dövlət Xidmətinin
Daşınmaz Əmlakın Dövlət Kadastrı və Reyestri publik hüquqi şəxsin idarə
heyətinin sədr müavini Elşad Məmmədov 06.08.2024 tarixli məktubla
şişirtmə DÖVLƏT ÖDƏNİŞİNİ bircə ayrıntı ilə digər müavin Elvin
Məmmədov kimi “əsaslandırıb”. Ayrıntı ondadır ki, “Veteranlar haqqında”
qanunu Elvin Məmmədov görməzliyə vururdusa, Elşad Məmmədov
belə TƏFSİR EDİB: “Veteranlar haqqında” qanunun 11-ci maddəsinə
görə, müharibə veteranlarının istifadəsində olan dövlər bağları və
bağçılıq sahələrinin ƏVƏZSİZ olaraq onların ŞƏXSİ MÜLKİYYƏTinə
verilməsi QEYD EDİLMİŞ , lakin DAŞINMAZ ƏMLAK ÜZƏRİNDƏ
HÜQUQLARIN DÖVLƏT QEYDİYYATINA ALINMASI barəsində GÜZƏŞT
NƏZƏRDƏ TUTULMAMIŞDIR” . Dəhşətli dələduzluq təfsirinə baxın, bu
yekəlikdə ƏMLAK XİDMƏTİ şəxsi MÜLKİYYƏTin əmlakın dövlət
qeydiyyatına alınması olduğunu (da!) BİLMİR!
Özgə izaha, şərhə, təfsirə ehtiyac varmı? Suala cavab vermək Prezident
yanında korrupsiyaya qarşı mübarizə komissiyasının, baş prokurorluğun
boynundadır.
Məğrur Bədəlsoy
TEREF

Milli Məclisin qocaman üzvlərindən olan Səttar Möhbalıyev millət vəkili kreslosundan əl çəkmək istəmir. O bu dəfə də deputat olmaq istəyir. Rəsmi məlumata əsasən, Möhbalıyev bitərəf şəxs kimi 3 saylı Babək-Kəngərli-Naxçıvan seçki dairəsi üzrə namizədliyini verib və onun namizədliyi qeydə alınıb.

S.Möhbalıyev yenidən millət vəkili seçilərsə, onun deputatlıq fəaliyyəti 30 ilə çatacaq.

İlk dəfə 2000-ci ildə deputat olan Möhbalıyev 2005, 2010, 2015 və 2020-ci illərdə keçirilən seçkilərdə parlamentə düşə bilib. Artıq 24 ildir ki, deputat olan S.Möhbalıyev ahıl yaşını millət vəkili kimi qarşılamağı arzulayır.

S.Möhbalıyev müsbət imici olmayan şəxslərdən biridir. O, uzun müddətdir ki, bir neçə postu tutur və siyasi, ictimai fəaliyyəti əsasən mənfi cəhətlərinə görə yadda qalıb.

Möhbalıyev 1993-cü ildən Azərbaycan Həmkarlar İttifaqları Konfederasiyasının, 2010-cu ildən Azərbaycan Təhsil İşçiləri Azad Həmkarlar İttifaqı Respublika Komitəsinin sədridir.

Həmkarlar təşkilatlarının əsas məqsədi işləyənlərin əmək hüquqlarının qorunması, onlar üçün layiqli iş şəraitinin yaradılması olsa da, qocaman millət vəkilinin bu istiqamətdə təsirli fəaliyyəti görünmür. Mehbalıyev heç vaxt müxtəlif sahələr üzrə müstəqil həmkarlar təşkilatının yaranmasına da imkan verməyib.

Milli Məclisin iclaslarında da kifayət qədər passiv olan Möhbalıyev hətta onun peşə fəaliyyətinə aid olan məsələlərin müzakirəsi zamanı da susmağı üstün tutur.

S.Möhbalıyevin millət vəkili, konfederasiya rəhbəri postlarından bərk-bərk yapışmasının əslində başqa məqsədləri var. Bu postlar Möhbalıyevin, onun ailəsinin biznes imkanlarının genişləndirilməsinə himayədarlıq edir.

Azərbaycan Həmkarlar İttifaqları Konfederasiyası böyük maddi texniki bazası, iri maliyyə vəsaitləri olan təşkilatlardandır. Qurumun balansında çoxlu sayda istirahət, idman və əyləncə qurğuları mövcuddur. Möhbalıyevin adı bu qurğuların bəzilərinin satılması işində hallanır.

Bakı Ağır Cinayətlər Məhkəməsində aparılan məhkəmə araşdırması göstərir ki, Möhbalıyevin rəhbərlik etdiyi konfederasiya Gəncə, Göygöl və başqa yerlərdə olan stadionlarını öz mülkü kimi satıb. S.Möhbalıyevin adı həm də Bakının Yasamal rayonundakı “Məhsul” stadionunun satışı ilə bağlı cinayət işində keçir.

Stadionun ərazisini satmaq adı ilə dələduzluq etməkdə suçlanan Azərbaycan Həmkarlar İttifaqlarının İdman Təşkilatları Assosiasiyasının sədri Nadir Əliyev və “Yasamal” idman-sağlamlıq klubunun direktoru Alik Həsənov 2 ilə yaxındır ki, həbsdədirlər. İddia olunur ki, onlar bina tikintisi ilə məşğul olan bir neçə sahibkarı aldadaraq, həmin əraziyə görə onlardan külli miqdarda pul alıblar. Zərərçəkmiş qismində tanınan sahibkarların təkcə elə birindən beh kimi 900 min manat pul alınıb.

Nadir Əliyev isə istintaqa ifadəsində günahkar olmadığını iddia edir. O hətta Azərbaycan Həmkarlar İttifaqları Konfederasiyasının sədri S.Möhbalıyevin də adını çəkib, prosesə onun rəhbərlik etdiyini bildirib. Bu işlərlə bağlı məhkəmə prosesi davam edir. Digər bir iddiaya əsasən konfederasiya rəhbəri həmkarlara məxsus mülklərin ərazisini müxtəlif yollarla özəlləşdirməklə çoxmərtəbəli binaların inşasını həyata keçirir. Onun artıq xeyli müddətdir ki, tikinti biznesinə böyük sərmayə qoyduğu bildirilir. Biznes fəaliyyəti isə sadəcə Azərbaycanla məhdudlaşmayıb. Konfederasiya rəhbəri ailə üzvlərinin adına Türkiyədə yaratdığı və nizamnamə kapitalı 250 min dollar olan şirkət vasitəsilə qardaş ölkədə biznesini genişləndirib.
Möhbalıyevin qızının Türkiyədə bahalı villa alması da xaricə qoyulan “investisiya”lardan biridir.

S.Möhbalıyevin rəhbərlik etdiyi həmkarlar təşkilatı faktiki ailə təşkilatına çevrilib. Sədrin ailə üzvlərinin təşkilatda mühüm mövqeləri tutması bunun sübutudur. Mehbalıyevin xanımı, 1960-cı il təvəllüdlü Böyükxanım Mirzə qızı Möhbalıyeva qurumun beynəlxalq əlaqələr departamentinin əməkdaşıdır. Qızı, 1988-ci il təvəllüdlü Lalə Möhbalıyeva isə Həmkarlar İttifaqları Konfederasiyasının Gənclər Şurasının üzvüdür. Konfederasiyanı xarici ölkələrdə keçirilən tədbirlərdə bir qayda olaraq deputatın xanımı və qızı təmsil edir.
Möhbalıyevin biznes və siyasi imkanlarının genişlənməsində Əli Həsənovla quda olması da mühüm rol oynayıb. Ə.Həsənovla qohumluqdan sonra onun xüsusən tikinti biznesinin xeyli böyüdüyü görünüb.

Son illərdə adı korrupsiya faktlarında daha tez-tez çəkilən, siyasi fəaliyyəti görünməyən Möhbalıyev kimi şəxslərin yenidən millət vəkili olması ehtimalı təəssüf doğurur. Belə şəxslərin əvəzinə aktiv, reputasiyası yüksək olan insanların Milli Məclisdə xalqı təmsil etməsi daha yaxşı olardı.

Sfera.az