Azərbaycan Respublikasının Prezidenti tərəfindən 30 dekabr 2023-cü ildə imzalanmış və 19 yanvar 2024-cü ildə qüvvəyə minmiş qanunla Azərbaycan Respublikası Cinayət Məcəlləsinə 281-1 və 284-2-ci maddələr əlavə edilib.

Trend-in məlumatına görə, Cinayət Məcəlləsinin 281-1-ci maddəsinə əsasən, Azərbaycan Respublikasının ərazi bütövlüyünün parçalanmasına yönələn atributların və ya simvolların nümayiş etdirilməsi, yayılması, nümayiş etdirmək və ya yaymaq məqsədilə hazırlanması, əldə edilməsi, saxlanılması, daşınması və ya gəzdirilməsinə görə cinayət məsuliyyəti müəyyən edilib.

Bu əməllərə görə beş ilədək azadlıqdan məhrumetmə cəzası nəzərdə tutulur. Həmin əməllərin xarici təşkilatlar və onların nümayəndələrinin tapşırığı ilə törədilməsi isə yeddi ildən on iki ilədək müddətə azadlıqdan məhrumetmə ilə cəzalandırılacaq.

Cinayət Məcəlləsinin yeni 284-2-ci maddəsi isə müharibə vaxtı və ya döyüş şəraitində Azərbaycan Respublikası Silahlı Qüvvələrinin şəxsi heyətinin, hərbi silah, sursat və ya hərbi texnikasının hərəkəti, yaxud dislokasiyası haqqında məlumatların yayılmasına görə cinayət məsuliyyəti nəzərdə tutur. Bu əməlləri törədənlər üç ildən altı ilədək müddətə azadlıqdan məhrumetmə cəzası, ağır nəticələrə səbəb olduqda isə beş ildən səkkiz ilədək müddətə azadlıqdan məhrum etmə cəzası ilə üzləşəcək.

Məzmunundan göründüyü kimi, qeyd olunan əməllər dövrümüzdə ictimai təhlükəliliyinin yüksəkliyi, doğurduğu nəticələrin ağırlığı ilə əlaqədar kriminallaşdırılıb.

Qeyd olunan cinayətlərin ibtidai istintaqının aparılması Azərbaycan Respublikası Dövlət Təhlükəsizliyi Xidmətinə həvalə olunub.

Sosial şəbəkələrdə Bakı şəhəri 6 nömrəli məktəb-liseydə 2-ci sinif şagirdinin həmin məktəbin 7-ci sinif şagirdləri tərəfindən dəfələrlə cinsi-seksual hərəkətlərə məruz qaldığına dair məlumatlar yayılıb.

Baku TV-nin çəkiliş qrupu məsələni araşdırmaq üçün sözügedən məktəbdə olub.

Valideynlər hadisənin ört-basdır edildiyini bildiriblər:

“Uşaqla bağlı əvvəl də şikayət olmuşdu. Həmin şagirdlə bağlı heç bir tədbir görmədilər”.
Baş verənlərlə bağlı cinsi-seksual hərəkətlərə məruz qaldığı deyilən şagirdin valideyni ilə əlaqə saxlanılıb. Ana suallara cavab vermək istəmədiyini deyərək məktəb rəhbərliyinin məsələni həll etdiyini bildirib.

6 nömrəli məktəbin direktoru Gülşən Orucova da deyəcəklərini kamera qarşısında deyil, şifahi olaraq açıqlayıb. Bildirib ki, 7-ci sinif şagirdi 2-ci sinif şagirdinə mobil telefonda əxlaqsız video göstərib. Bu həmin videoya baxan uşağa psixoloji olaraq pis təsir edib. Hadisə məlum olandan sonra 7-ci sinif şagirdi öz valideyninin istəyi ilə başqa məktəbə köçürülüb. Direktorun sözlərinə görə, tualetdən kabinetlərə qədər kamera quraşdırılıb. Görüntülərə baxılıb və həmin uşaqların deyilən vaxtlarda tualetdə birgə olmadığı müəyyən edilib.

Psixi Sağlamlıq Mərkəzinin direktor müavini Gülnarə Musabəyova zorakılığa məruz qaldığı deyilən şagirdin sağlamlığı ilə bağlı açıqlama verib. Onun sözlərinə görə, müayinə zamanı azyaşlıda təşviş, stresdən sonrakı vəziyyət və qorxu simptomları aşkar edilib.

Azərbaycanda vəzifəli şəxslərin böyük bizneslərə, obyektlərə sahib olmaları barədə çox yazılıb. Dövlətdən maliyyələşən təşkilatlara rəhbərlik edən əksəriyyət məmurların sahib olduqları var-dövlətlə aldıqları məvaciblər isə böyük ziddiyyət təşkil edir. Bir çox məmurların qanunları tapdalayaraq korrupsiyadan qazandıqları pullar hesabına öz adlarına obyekt biznes sahələri yaratmaları artıq adi hal alıb.

AzFakt.com-un əldə etdiyi məlumata görə belə məmurlardan biri də 54 saylı Xocalı Yol İstismar İdarəsinin rəisi Məzahir Səlimovdu.

Aldığımız məlumata görə Məzahir Səlimov 54 saylı Xocalı Yol İstismar İdarəsinin hesabına əldə etdiyi pullarla xeyli sayda obyekt və mülklərə sahib olub. Belə mülklərdən biri də Yevlax şəhər Heydər Əliyev prospekti 52 ünvanında yerləşən 2 mərtəbəli ticarət mərkəzidir.

Dövlət Şəhərsalma və Arxitektura Komitəsinin rəsmi saytında yerləşdirilən məlumatda bildirilir ki, tikinti sahəsi 522 kvadrat olan 2 mərtəbli obyektin tikintisinə icazə 2021-ci ildə verilib. Ümumi sahəsi 857 kvadrat olan obyektin hazırkı bazar qiymətinin 300 min manatdan çoxdur.

Qeyd edək ki, hazırda Məzahir Səlimovun rəhbərlik etdiyi 54 saylı Xocalı Yol İstismar İdarəsi işğaldan azad edilmiş Qarabağ ərazilərində müxtəlif tenderlərin podrat işlərini həyata keçirdiyi bildirilir.

Mövzu ilə bağlı araşdırmamız davam edir.

Qarşı tərəfin mövqeyini dərc etməyə hazırıq.

Milli Məclisin deputatı Tahir Mirkişilinin qardaşı Famil Mirkişilinin qanuni təmsilçi olduğu şirkətin dövlətə külli miqdarda vergi borcu yaranıb.

Qlobal.az xəbər verir ki, Famil Mirkişilinin rəhbərlik etdiyi “Absheron City” Mənzil Tikinti Kooperativinin hazırda dövlətə olan vergi borcu 592.638 manat təşkil edir.

“Absheron City” MTK 2014-cü ildə dövlət qeydiyyatına alınıb. Şirkət əsasən yaşayış binalarının tikintisi ilə məşğuldur.

Qeyd edək ki, Tahir Mirkişili Milli Məclisin V və VI çağırış deputatıdır.

Tahir Mirkişili Milli Məclisin İqtisadi siyasət, sənaye və sahibkarlıq komitəsinin sədri vəzifəsini tutur.

Dövlət Sosial Müdafiə Fondunun (DSMF) keçirdiyi tender müsabiqəsinin qalibi “Entre” MMC (VÖEN – 1806256761) olub.

Yeniavaz.com xəbər verir ki, DSMF Həsən bəy Zərdabi 80 ünvanında yerləşən inzibati binasının əsaslı təmiri üzrə layihələndirmə işlərinin satın alınmasına görə “Entre” MMC-yə 88 min 28 manat ödəyəcək.

Məlumat üçün bildirək ki, tender müsabiqəsi ötən ilin oktyabr ayında elan olunub. Müsabiqənin qalibi olan “Entre” MMC isə tender elanından 6 ay əvvəl – ötən ilin aprel ayında dövlət qeydiyyatına alınıb.

Nizamnamə kapitalı 10 manat olan MMC barəsində açıq mənbələrdə heç bir məlumat yoxdur. Şirkətin daha əvvəl hansı fəaliyyətinin olduğu barədə məlumat mövcud deyil. 88 min manatlıq tender müsabiqəsinin qalibi olan MMC-nin nəinki veb-saytı, heç sosial şəbəkə hesabları da yoxdur.

Xatırladaq ki, bu hal “Dövlət satınalmaları haqqında” Qanunun 23-cü maddəsində malgöndərənlərin (podratçıların) ixtisasına dair tələblərə uyğun deyil. Belə ki, həmin maddənin 23.4.-cü bəndində açıq şəkildə yazılır ki, satınalma müqaviləsinin icrası üçün müvafiq sahədə peşəkarlığının və təcrübəsinin olması, texniki imkanlarının və maddi-texniki bazasının olması, müvafiq tələblərə cavab verən işçi qüvvəsinin olması lazımdır. Tender müsabiqəsindən cəmi 6 ay əvvəl yaranan şirkətin qeyd olunan tələblərə nrecə cavab verəcəyi başa düşülən deyil.

Tender müsabiqəsiylə bağlı diqqət çəkən başqa bir məqam isə odur ki, DSMF daha əvvəl – 2023-ci ilin avqust ayında inzibati binasının əsaslı təmiri üzrə layihələndirmə işləri üçün tender müsabiqəsi keçirib. Tenderin qalibi “GENTECHS” MMC (VÖEN -2001394581) olub. Lakin, müqavilə imzaladıqdan 2 ay sonra – 2023-cü ilin oktyabr ayının 1-də müvafiq icra hakimiyyəti orqanının qərarı əsasında ləğv olunub.
Ləğv etməyə səbəb kimi “Dövlət satınalmaları haqqında” Qanunun 38.2-ci maddəsi göstərilib. Həmin maddədə göstərilir ki, tender komissiyası bu Qanunla müəyyənləşdirilmiş vəzifələrini yerinə yetirərkən qeyri-obyektivliyə yol verərək, hər hansı iddiaçının tərəfini saxlayarsa, iddiaçılardan hər biri müvafiq icra hakimiyyəti orqanına və ya məhkəməyə müraciət edə bilər. Həmin orqanlar tenderin hazırlanması və keçirilməsi zamanı qanun pozuntusuna yol verildiyini təsdiqləyərsə, tenderin nəticələri ləğv olunur və satınalan təşkilat həmin iş üzrə yeni tender keçirir. Bu halda qəbul olunmuş qərardan fərqlənən xüsusi rəy vermiş komissiya üzvlərindən başqa, komissiyanın sədri və digər üzvləri 3 il müddətində hər hansı tender komissiyasının sədri və ya üzvü ola bilməzlər.

Onu da bildirək ki, nəticəsi ləğv olunan və yenidən keçirilən tender müsabiqəsi zamanı DSMF-nin məsul şəxsi Satınalmaların Təşkili və Təchizat departamentinin müdiri Zahir Əliyev olub.

Maraqlıdır ki, tenderin hazırlanması və keçirilməsi zamanı qanun pozuntusuna yol verildiyi halda (Maddə 38.2.) Zahir Əliyev öz vəzifəsini icra etməyə davam edib.

DSMF-nin mətbuat xidmətindən Yeniavaz.com-un sorğusuna cavab olaraq bildirib ki, “Entre” MMC Fondla təkbaşına müqavilə bağlamayıb:“Keçirilmiş satınalma əsasında Fondla adını qeyd etdiyiniz şirkət tək yox, konsorsium sazişi əsasında iddiaçı kimi qeydə alınmış və qalib gəlmiş “SS Proje” MMC və “Entre” MMC şirkətləri arasında 2023-cü ilin iyunun 13-də müqavilə bağlanıb. Sözügedən satınalma proseduru və bağlanmış müqavilə üzrə işlər davam etdirilir”.

Qeyd edək ki, dövlət satınalmaları portalında DSMF ilə müqavilə bağlayan şirkət kimi yalnız “Entre” MMC-nin adı qeyd olunub.

Zahir Əliyevin öz vəzifəsinin icrasına davam etməsi ilə bağlı sualımıza isə Fonddan hər hansı cavab verilməyib.

Əhalini narazı salan xidmət sahələrindən biri də nəqliyyat sektoru, marşrut xətlərindəki özbaşınalıqlardır. Bu sektorda xəttə buraxılan avtobusların standartlara cavab verməməsindən tutmuş, sürücülərin qeyri-peşəkar davranışlarına qədər çoxsaylı problemlər müşahidə olunur. İctimai nəqliyyat sahəsindəki çatışmazlıqlarla bağlı mediada və sosial şəbəkələrdə dəfələrlə müzakirə açılsa da, nədənsə müsbətə doğru ciddi dəyişiklik müşahidə edilmir.

Daha acınacaqlı durum isə bölgələrdədir. Elə bu yazıdakı şikayət də paytaxtın təxminən 30 kilometrliyində yerləşən Sumqayıt şəhərinin ictimai nəqliyyat sektorundandır. Şəhərin Kotec qəsəbəsi – “Yaşıldərə” massivi marşruti üzrə hərəkət edən 10A saylı avtobusların iş prinsipi sərnişinlərin ciddi narazılığına səbəb olur. Açığı, bu marşrutdan bəhs edərkən “prinsip” sözündən istifadənin özü də yerinə düşmür. Çünki sözügedən avtobusların hazırkı fəaliyyəti demək olar ki, prinsipsizlik üzərində qurulub.

KONKRET.az-a müraciət edən Arif İsgəndərov adlı Sumqayıt sakini də adıçəkilən marşrutun daimi sərnişini kimi burada rastlaşdığı neqativlərdən danışıb.

Şikayətçinin sözlərinə görə, 10A marşrutu ilə bağlı sərnişinlərin narazılığı ilk növbədə avtobusların quruluşca əlverişsiz və narahat olmasıdır. Xəttə buraxılan çəhrayı avtobusların xüsusən ön giriş qapısından istifadə (əsasən də uşaqlar və qocalar üçün – red.) çox əziyyətlidir. Təəssüf ki, Kotec qəsəbəsi – “Yaşıldərə” massivi üzrə alternativ marşrut xətti olmadığından sərnişinlər məcburən bu əziyyətə qatlaşmalı olurlar. Təbii ki, sərnişinlərin üzləşdiyi belə fiziki əziyyət sürücülərin diqqətindən yayınmır və insanların minib-düşməkdə çətinlik çəkməsi onların da işini ağırlaşdırır. Təbii ki, bu məsələdə sözsüz ki, sürücülərin həll edə biləcəyi nəsə yoxdur. Yəni onların əlindən belə bir naqolay avtobusların xəttə buraxılmasına görə dillərinin altında deyinməkdən başqa bir iş gəlmir. Əslində biz də belə əlverişsiz avtobusların hansı səbəbdən ölkəyə gətirilməsinin səbəbini tapmaqda çətinlik çəkirik. Görünür, avtobusları alıb dövriyyəyə buraxanlar onun keyfiyyətindən çox, ucuzluğuna önəm veriblər.

Arif İsgəndərovun dediyinə görə, 10A marşrut xətti üzrə təxminən 20-yə yaxın avtobus işləyir. Onları idarə edən sürücülərin əksəriyyəti də sükan arxasına sanki öz öhdəliklərindən xəbərsiz halda, yəni təlimatlandırılmadan əyləşir. Vətəndaşın redaksiyaya təqdim etdiyi fotodan da görünür ki, avtobusu idarə edən sürücü peşə məsuliyyətindən xəbərsizdir. Sərnişin deyir ki, sözügedən marşrutda hər gün belə bir mənzərə ilə qarşılaşırlar. Bu avtobusun əksər sürücüləri bəzən hətta yolboyu 20-30 dəqiqə telefonla danışır, sükan arxasında tum çırtlayır, eyni xətdə işlədikləri digər sürücü həmkarları ilə intervala görə mübahisə edərək yollarda təhlükəli vəziyyət yaradırlar.

Vətəndaşın digər gileyi isə son zamanlar avtobuslar arasındakı intervalın xeyli artmasıdır. A.İgəndərov deyir ki, sürücülərə bununla bağlı irad bildirəndə belə cavab alıblar: “Avtobuslardan 7-8-i texniki baxımdan sıradan çıxdığına görə təmirə göndərilib. Təmir üçünsə ehtiyat hissələri yoxdur. Ona görə də hamısı qarajda ilişib-qalıb”.

Nəticədə avtobuslar arasındakı 6 dəqiqəlik interval 15-20 dəqiqəyə çatıb ki, bu da sürücülərlə sərnişinləri üz-üzə qoyub.

Əməkdaşımız şikayətlə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucovla əlaqə saxlayıb. Agentliyin sözçüsü məsələyə aydınlıq gətirərək bildirib ki, “10A nömrəli marşrut xəttində hazırda planlaşdırılan sayda – 14 ortatutumlu avtobusla sərnişindaşıma fəaliyyəti həyata keçirilir. Avtobusların iş qrafiki 6:15-dən 23:00-dək, marşrut xətti üzrə avtobuslararası interval isə 7 dəqiqə təşkil edir və avtobus sayında heç bir azalma müşahidə edilmir”.

T.Orucov əlavə edib ki, daşıyıcıya günün “pik” saatlarında avtobuslararası intervalın sərnişin axınına uyğun olaraq tənzimlənməsi tapşırığı verilib. Həmçinin, AYNA tərəfindən sərnişindaşınma imkanlarının artırılması üçün Sumqayıt şəhərində daşıma göstəricisi aşağı olan marşrutlara əlavə avtobuslar cəlb edilib. Şəhərdə nəqliyyatın əlçatanlığının təmin olunması məqsədilə 10A nömrəli avtobus marşrutu da daxil olmaqla 12 marşrut xəttinə əlavə avtobuslar buraxılıb”.

Lakin yazı çapa hazırlanan müddətdə apardığımız müşahidələrdən də belə məlum oldu ki, “Sumqayıt nəqliyyat – 1” MMC tərəfindən xəttə buraxılan marşrutun real fəaliyyəti ilə rəsmi məlumatlar heç də üst-üstə düşmür. Abtobusların gecə saat 23:00-a qədər işləməli olduğu halda, 21:00-22:00-a qədər çalışması da həmin xəttin tabeliyində olan MMC tərəfindən nəzarətsiz buraxılmasının daha bir göstəricisidir. Bu qədər nöqsana adıçəkilən şirkət tərəfindən illərdir, göz yumulması da bir sıra qaranlıq məqamlardan xəbər verir.

Bu arada onu da xatırladaq ki, “Sumqayıt nəqliyyat – 1” MMC Sumqayıt Şəhər İcra Hakimiyyətinin başçısı Zakir Fərəcovun bacısı oğlu Elgiz Fərəcova məxsusdur.

Deputatın oteli ilə “Azərcell”in çəkişməsi Lerikin bir hissəsini rabitəsiz qoyub
Millət vəkili İqbal Məmmədova məxsus olan və Lerikdə yerləşən “Relax” otellə “Azərcell” mobil operator arasında yaranan maliyyə mübahisəsi sözügedən rayonun bir hissəsini mobil rabitəsiz qoyub. Bu barədə məlumatı Azinforum.az-ın canlı yayımında müsahibə verən Kamil Cəfərov adlı vətəndaş verib. Onun sözlərinə görə, mobil operator “Relax”ın həyətində yerləşdirdiyi ötürücü qullənin icarə pulunu ödəmədiyi üçün onun enerjisini kəsib.

Azinforum.az həmin videomüsahibəni təqdim edir:

Naxçıvanlılar uzun illərdir ki, öz rəhbərlərinin fərqlənmək “xəstəliyindən” əziyyət çəkirlər. Naxçıvan Ali Məclisinin sabiq sədri Vasif Talıbov da bu “sindroma yoluxmuşdu”. Fərq odur ki, Talıbov muxtar respublika rəhbəri seçiləndən, təqribən, 10 il sonra “xəstələnmişdi”. Naxçıvanın muxtariyyət statusunu əlində bayraq edən Vasif Talıbov hər vəchlə Azərbaycanın əsas hissəsindən fərqlənməyə çalışırdı. Onun keçirdiyi tədbirlər, qəbul etdiyi qərarlar Bakıdan fərqlənirdi. Bununla bağlı çoxsaylı misallar deyə bilərik. Məsələn, koronavirusun tüğyan etdiyi dövrdə Azərbaycanın paytaxtında və bütün bölgələrində hər kəsdən maska taxmaq tələb edilirdi. Hətta Prezident İlham Əliyev də şəxsi nümunə göstərərək keçirdiyi tədbirlərdə maska taxırdı. Həmin dövrdə Azərbaycanda maska taxmayan yeganə rəhbər vəzifəli şəxs Vasif Talıbov idi. Talıbov Azərbaycanın əsas hissəsindən fərqlənərək Naxçıvanda heç kimi maska taxmağa məcbur etmədi. Naxçıvan Azərbaycanın yeganə bölgəsidir ki, orada maska taxmamağa görə heç kim cərimə olunmayıb. Vasif Talıbov mərkəzdə yaradılan dövlət orqanlarını Naxçıvanda fərqli formada təsis edir, aparılan struktur islahatlarını Bakıya uyğunlaşdırmırdı. Bu fərqlənmək “xəstəliyi” uzun illər müalicə olunmadığından metastaz verdi və sonda Talıbovun biabırçı şəkildə vəzifədən qovulması ilə nəticələndi.

Vasif Talıbovun istefasından sonra naxçıvanlılar hesab edirdi ki, bu fərqlənmək “sindromu” sağalacaq, muxtar respublikada hər şey Bakıdakı kimi olacaq. Ancaq ümidlər özünü doğrultmadı. Vasif Talıbovun “ənənələri” davam etdirildi, fərqlənmək “xəstəliyi” yenidən baş qaldırdı.

Həqiqətən də insanlar bunu dərk etməkdə çətinlik çəkir. Niyə belə olur? Axı mərkəzdən, siyasi hakimiyyətdən belə tələb olunmur! Naxçıvan niyə özünü Bakıdan və digər regionlardan fərqləndirməyə çalışır? Bu fərqlənmək arzusu və istəyi Naxçıvan əhalisinə problem yaradır, onları çətinə salır.

Bu günlərdə redaksiyamıza göndərilən iki fotoya baxandan sonra bu qənatə gəldik.

Rəqəmsal inkişaf və nəqliyyat naziri Rəşad Nəbiyevin Naxçıvanda vətəndaş qəbulu.


Azərbaycan Respublikasının rəqəmsal inkişaf və nəqliyyat naziri Rəşad Nəbiyev Naxçıvanda vətəndaş qəbulu keçirib. Diqqətli oxucumuz Rəşad Nəbiyevin və Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəflinin keçirdikləri vətəndaş qəbullarının fotolarını göndərib soruşur ki, Naxçıvanda Bakıdan fərqlənmək “sindromu” sağalmayıb?

Prezidentin səlahiyyətli nümayəndəsi Fuad Nəcəflinin Kəngərli rayonunda vətəndaş qəbulu.

Oxucumuz artıq Bakıdan yüksək vəzifəli şəxslərin gedib Naxçıvanda qəbullar keçirməsinə sevinir, muxtar respublikada hər şeyin paytaxtdakı kimi olmasını arzulayır.

Bu müraciətdən sonra Fuad Nəcəflinin və Azərbaycanın mərkəzi icra hakimiyyəti orqanları rəhbərlərinin Naxçıvanda keçirdiyi vətəndaş qəbullarının fotolarına baxdıq. Ölkəmizin mərkəzi icra hakimiyyəti orqanları rəhbərlərinin vətəndaş qəbullarının formatı, demək olar ki, eynidir. Naxçıvan isə Talıbov dövründəki “ənənəsinə” sadiq qalaraq bu formatı dəyişib və fərqlənib. Soruşa bilərsiniz ki, burda böyüdüləcək nə var ki! Biri qəbul zamanı stolu başqa cür, o biri ayrı formada qoyur. Biz də çoxları kimi düşünürdük. Amma oxucumuz bu məqama da aydınlıq gətirib. Deyir ki, əvvəla Azərbaycanın mərkəzi icra hakimiyyəti orqanlarının rəhbərlərindən fərqlənmək özünü ayrı bir dövlətin təmsilçisi kimi göstərmək istəyidir. Bununla demək istəyirlər ki, biz sizdən daha üstünük.

İkincisi, bu necə vətəndaş qəbuludur ki, şikayətçini hər kəsin yanında qəbul edirlər. Səlahiyyətli nümayəndə vətəndaşları qəbul edərkən rayonun icra başçısı, muxtar respublikanın bəzi mərkəzi icra hakimiyyəti orqanlarının rəhbərləri, rayonun müxtəlif idarə və təşkilatlarının rəhbərləri qəbul keçirilən zalda oturur. İndi bu vətəndaş hər kəsin içində öz dərdini, şikayətini Prezidentin səlahiyyətli nümayəndəsinə necə desin? İcra başçısından, nazirdən onların yanında səlahiyyətli nümayəndəyə necə şikayət etsin?

Üstəlik qəbulun formatı elə qurulub ki, vətəndaş ilk andan psixoloji gərginlik içində olur. Müttəhim kürsününə bənzər stulda, hər kəsin yanında vətəndaşın dərdini soruşsan, o, şikayətini olduğu kimi deyə bilməyəcək. Vətəndaşla fərdi qaydada danışmaq, onunla səmimi olmaq lazımdır ki, o, məmurlardan şikayətini ürəkaçıqlığı ilə deyə bilsin. Beləliklə, problemlər, narazılıqlar aradan qaldırılar, vətəndaş məmnunluğu təmin edilər. Elə bu məqamda daha bir ciddi sual meydana çıxır. Bu qəbulların formatı fərqlənmək üçün belə seçilib, yoxsa vətəndaşın problemlərinin həll edilməməsi üçün? Hər ikisi qəbuledilməzdir və Azərbaycan dövlətinin apardığı siyasətə ziddir. Dövlət heç kimin fərqlənməməsi, hər kəsin bərabər səviyyədə yaşaması və fəaliyyət göstərməsi, vətəndaş məmnunluğunun təmin edilməsi istiqamətində lazımi tədbirlər həyata keçirir. Naxçıvanda isə...

Azərbaycanın mərkəzi icra hakimiyyəti orqanları rəhbərlərinin Naxçıvanda vətəndaş qəbulu.



Fuad Nəcəflinin Ordubad rayonunda vətəndaş qəbulu.



Fuad Nəcəflinin Culfa rayonunda vətəndaş qəbulu.



TNS.az