Elə ki şəhər gecə köynəyini əyninə geyinir, o zaman hər şey başqa cür görünür. Zülmət gecəyə Bakının al-əlvan işıqlarından don biçilir...

AZƏRTAC-ın fotomüxbirləri məhz füsunkar Bakı gecələrinin nur süzülən mənzərələrini lentə alıblar.

İşıqları sayrışan Bakı gecələri şairləri, bəstəkarları, rəssamları ilhama gətirib. Onların hərəsi gecənin bağrına xal salan işıqları bir cür vəsf edib. Mavi Xəzərə söykənən şəhərin sahilyanı işıqları ona daha da füsunkarlıq verir. Şairin məşhur misraları yerinə düşür: “Bir dön bizim Bakıya bax, sahilləri çıraq-çıraq...”

Bakının gecə həyatı nağıllar aləmini yada salır. Bu işıqlardan yanıb-sönəni, göz vuranı da, közərəni, gur yananı da var, səhərədək işıq saçanı da. Şəhərin gecə mənzərəsi çox romantik və əsrarəngiz təsir bağışlayır. Elə bil kimsə bir ovuc ulduz topasını şəhərin üstünə səpələyib...

Neon lampalarından süzülən işıqlar qara paltar üzərinə çəkilmiş zərli geyimi xatırladır. İllərdən bəri eşidilən və hər eşidildikcə sanki gəncləşən məşhur mahnının misraları qulağımızda səslənir:

Bəzən sakit həyatlıdır,
Bəzən toylu büsatlıdır.

Göy göyərçin qanadlıdır,

Bizim Bakı gecələri...

Prezidentin Xankəndi, Ağdərə, Xocalı nümayəndəsi “JEK”-in məktubunu Konstitusiyadan üstün sayır

Azərbaycan Respublikası Prezidentinin 07.03.2024-cü il tarixli sərəncamı ilə Elçin Mustafa oğlu Yusubov Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi təyin olunub. Elçin Yusubov son 3-4 ildə dövlətin adından çıxarılan məhkəmə qərarını, Konstitusiyanı “JEK”-in (qondarma) məktubundan aşağıda tutan əmlak məmuru kimi ad çıxarıb. Elə Konstitusiyanın 109-cu maddəsinin 32-ci bəndi əsasında Qarabağa Prezident nümayəndəsi postuna təyinat alan gündə Prezident təqaüdçüsü Qarabağ qazisinin elektron poçtuna göndərdiyi 06.03.2024 tarixli Konstitusiyaya zidd məktub bu “aşağılığı” bir daha ortaya qoyur. Xətai məhkəməsinin 26.05.2009 və 21.06.2011 tarixli 2 (!) qətnaməsi ilə tələbkar Qarabağ əlilinə sahibkarlıqla məşğul olmağa əmlak – qeyri-yaşayış otaqları verməyə borclu edilən Əmlak Məsələləri Dövlət Komitəsi (ƏMDK) 15 ildir dövlətin adından çıxarılan məhkəmə aktını nəinki icra edir, əksinə məhkəmə qərarının, Konstitusiyanın “JEK”-in saxta, olmayan məktubundan aşağıda olduğunu bildirməkdən yorulmur. Komitə olanda sədr müavini Rafiq Cəlilovun, İqtisadiyyat Nazirliyi yanında Xidmət olanda rəis müavini Elçin Yusubovun imzası ilə. Maraqlıdır, biri(ncisi) Cəlilabada , o biri Qarabağa Prezidentin nümayəndəsi təyin edilir. Görəsən, Qarabağ qazisinə borcunu ödəməyən əmlak məmurları Prezidentin yerlərdə icra siyasətini necə sürdürürlər?

15 ildir nə Xətai məhkəməsi, nə Ədliyyə Nazirliyi ( Xətai və Nizami icra şöbələri) borclunu borcunu ödəməyə məcbur etmir. Bu günlərdə 10-15 ildir susan Xətai məhkəməsi ƏN-in Nizami icra şöbəsinə istinadla bildirib ki, icra sənədi bir neçə dəfə Nizami icra şöbəsinə göndərilsə də, anında icra olunmadan geri qaytarılıb və hazırda şöbədə icra sənədi yoxdur.(?) Özbaşınalığa baxın, icra şöbələri məhkəmənin icra sənədini icra etmək yerinə , it-bata salır, məhkəmə də bu cinayətkar saxtalığa göz yumur. Borclu da borcunu icra etmək yerinə məhkəməni də, icra məmurlarını da “əmlakla satın alıb”, Konstitusiyanı ayaqaltı edir(lər). Görün, borclu Elçin Yusubov Qarabağa xüsusi nümayəndə təyin olunandan bir gün öncə tələbkar Qarabağ qazisinə nə yazıb:

“ ..Nizami rayonu, Bəhruz Nuriyev-10a ünvanındakı qeyri-yaşayış sahəsi Nizami MKTB-nin (“JEK”-in- M.B.) 19.02.2008 tarixli, 02/09 nömrəli razılıq məktubu ilə icarəyə verilmiş, 2008-ci ildə icarəçi (adı yoxdur, anonimdir?- M. B.) tərəfindən özəlləşdirilmişdir. “. “JEK”-in məktubunun da , Elçin Yusubovun məktubu kimi saxta olması bir yana, axı saxta-doğruluğundan asılı olmayaraq , heç bir məktubun, şəhadətnamənin, özəlləşdirmə sənədinin məhkəmə qərarından üstün ola bilməzliyini Konstitusiyanın 129-cu maddəsi doğrulayır! Xətai məhkəməsinin 22.07.2011 tarixli, 2(011)-855/11 saylı icra vərəqəsində isə yazılıb: “ ... Xətai məhkəməsi ( hakim İlqar Əliyev) 21.06.2011-ci il tarixdə ... ƏMDK və qeyrilərinə qarşı “ QƏTNAMƏNİN İCRASINA MANE OLDUĞUNA GÖRƏ MƏSULİYYƏTİN MÜƏYYƏN EDİLMƏSİ və Nizami rayonu, BƏHRUZ NURİYEV, 10”a” ÜNVANINDAKI boş olan yerin İSTİFADƏSİNƏ VERİLMƏSİ tələbinə dair iddia ərizəsinə.. baxaraq QƏRARA ALDI: İDDİA QİSMƏN TƏMİN EDİLSİN.

26.05.2009 tarixli icra sənədi BƏHRUZ NURİYEV, 10 a icra edilməsi .. Xətai və Nizami icra şöbəsinə həvalə edilsin. Qətnamə qalan hissədə (məsuliyyət hissəsində, prokurora xüsusi qərardadla xəbər verilməsi hissəsində- M. B.) təmin edilməsin.” Bu qətnamə ilə Ədliyyə Nazirliyinin Xətai və Nizami icra şöbələrinin üzərinə konkret öhdəlik qoyulsa da, hər iki şöbə məhkəməyə 15 ildir hörmətsizlik edir, görəv və məhkəmə borcunu icra etməkdən əmlak rüşvəti ilə imtina edir, hətta tələbkar 1-ci dərəcəli qaziyə borcu tələb etdiyinə görə işgəncə verdiri(blə)r.

Əsas borclu ƏMDX -nın sədr müavini borcunu ödəmədən Qarabağa posta göndərildi. Kürsü postuna. Döyüş postunda isə , hər çağ olduğu kimi, qazilərdir. Elçin Yusubovun qanuna, Konstitusiyaya zidd “JEK”-in ölkədə ŞAH olması” cavabını imzalamaq görəvini , görəsən, nazir Mikayıl Cabbarov, rəis Mətin Eynullayev.. kimə tapşıracaq? Kim olsa, icra başçısı getmək şansı yüksəkdir...
Məğrur Bədəlsoy

Son illərdə bölgələrdə və paytaxtda sakinlər arasında narazılıq yaradan əsas məsələ Azəriqaz İstehsalat Birliyinin tətbiq etdiyi cərimələrdir. Sakinlər bu cərimələrin onlara sayğaca müdaxilə iddiası ilə tətbiq edildiyini bildirsələr də, heç bir halda belə bir qanunsuzluğa yol vermədiklərini deyirlər. Bu etirazların ölkə mediasında və sosial şəbəkələrdə yayılması sakinlərin heç də haqsız olmadığını deməyə əsas verir.

İşin qəribə tərəfi budur ki, "Azəriqaz” sayğacın zədələnməsi iddiası ilə sözügedən qurğuları dəyişdirib və yalnız bundan sonra müdaxilə edilməsini əsas gətirərək cərimə yazır.

Məsələ ilə bağlı dəfələrlə mətbuatda və sosial şəbəkələrdə şikayətlər dərc olunub.

Qeyd olunan məsələ ilə bağlı Cəlilabad rayonunda da vəziyyət kritikdir.

Omedia.az məsələ ilə bağlı statistik araşdırma aparıb.

Məlum olub ki, son 2 ildə "Azəriqaz İB"-nin Lənkəran regional idarəsinin Cəlilabad xidmət sahəsi üzrə 300-ə qədər vətəndaşa əsassız cərimə yazılıb.

Əsassız olduğunu deməyimizin isə tam qanuni əsası var. Son iki ildə cərimə yazılan vətəndaşlar arasında 123 abonent Cəlilabad rayon Məhkəməsində "AZƏRİQAZ" İB-nin Lənkəran regional idarəsinin Cəlilabad xidmət sahəsinə qarşı cərimənin əsassız olması ilə bağlı iddia qaldırıb.

Yekun qərar çıxarılan 103 məhkəmə işinin hamısında məhkəmə vətəndaşları haqlı hesab edib, Cəlilabad xidmət sahəsinin əməkdaşlarının yazdığı cəriməni əsasız hesab edib və borcun silinməsi qərarını verib.

Hal - hazırda Cəlilabad rayon məhkəməsində 20 nəfərin analoji iddia ərizəsi baxılma mərhələsindədir.

Vətəndaşlara yazılan cərimələrin məbləği minumum 127 azn, maksimum 4500 manat arasında dəyişir.

Cəlilabad rayonunda məhkəmə qararı ilə son 2 ildə əsasız hesab edilən cərimənin məbləği isə nə az nə çox düz 85min 560 manatdır (85.560 azn).

Cərimənin yazılması isə sahə əməkdaşları tərəfindən bir birinə oxşar hallarla həyat keçirilir.

Azəriqaz İB-nin Lənkəran regional İdarəsinin Cəlilabad Xidmət Sahəsinin əməkdaşları vətəndaşın yaşadığı evə quraşdırılmış qaz sayğacına baxış keçirmiş, sayğacın istismar müddəti bitdiyi üçün çıxararaq aparırlar və vətəndaş üçün yeni sayğac quraşdırılır. Həmin vaxt köhnə sayğacda kənar müdaxilənin olması barədə hər hansı irad və ya akt tərtib edilmir bir neçə gün sonra jsə akt tərtib olunur və həmin aktda guya sayğaca müdaxilə olunduğu göstərilir.

Məhkəmə qərarların araşdırarkən məlum olur ki, həmin qaz sayğaclarına Azəriqaz» İB-nin Lənkəran regional İdarəsinin Cəlilabad Xidmət Sahəsinin əməkdaşı olan nəzarətçilər mütəmadi olaraq baxış keçirirlər, belə bir müdaxilə olsaydı nəzarətçilər bunu aşkar edərdilər. Mübahsəli akt tərtib olunan zaman vətəndaşın iştirakı təmin edilmir və abonentlər həmin aktdan sonradan xəbər tuturlar.

Rayonlar arasında ən çox məhkəməyə müraciət isə Abşeron rayonun payına düşür.

Belə ki, son iki ildə Abşeron rayon sakinləri tərəfindən cərimələrin silinməsi ilə bağlı 3000 dən çox müraciət Abşeron rayon Məhkəməsinə daxil olub, 2250 halda yekun qərar verilib, 2218 halda vətəndaş haqlı hesab edilib.

Cəlilabad rayonu üzrə bu sahədə olan araşdırmanın ikinci hissəsi növbəti yazımızda olacaq.

Qeyd olunanlarla bağlı adı çəkilən qurumların mövqeyini dərc etməyə hazırıq.

Bir müddət öncə Qafqaz Müsəlmanları İdarəsinin sədri Şeyxülislam Allahşükür Paşazadə Abşeron rayonu ərazisində İlahiyyat Universiteti üçün yeni inzibati bina və kampus-kompleksi tikilməsi üçün müraciət edib.
“Unikal”ın əldə etdiyi məlumata görə, məhz bu məqsəd üçün Xırdalan şəhəri ərazisində, Ceyranbatan su anbarına panoraması olan 20 hektar torpaq sahəsi ayrılıb. Lakin sonradan universitetin tikintisi həyata keçirilməyib. Həmin ərazi şeyxlə Prezident Administrasiyasının sabiq rəhbəri Ramiz Mehdiyev arasında bölüşdürülüb.Məlumata görə, ərazinin 10 hektarı şeyxin oğlu Məhəmməd Paşazadənin, digər 10 hektarı isə Ramiz Mehdiyevin həyat yoldaşı Qalina Mehdiyevanın adına sənədləşdirilib. Şeyxin oğlunun adına olan ərazidə "Blue City" yaşayış kompleksi tikilib və hazırda satış həyata keçirilir.

Tələbələrin təhsilini müvəqqəti dayandırması (onlara akademik məzuniyyətin verilməsi) halları açıqlanıb.

Bu barədə Elm və Təhsil Nazirliyinin Kollegiyasının Ali təhsil müəssisələrinin bakalavriat (əsas (baza ali) tibb təhsilində) və magistratura səviyyələrində təhsilalanlar tərəfindən təhsil müəssisəsinin, ixtisasın, təhsilalma formasının dəyişdirilməsi, onların təhsil müəssisəsindən xaric və ya təhsil müəssisəsinə bərpa olunması, habelə təhsilalanların təhsilini müvəqqəti dayandırması (onlara akademik məzuniyyətin verilməsi) qərarında bildirilib.

Tələbəyə (xüsusi təyinatlı ali təhsil müəssisələrinə münasibətdə yalnız həmin müəssisələrdə təhsil alan mülki şəxslərə) akademik məzuniyyət aşağıdakı hallarda və müddətə verilir:

– müddətli həqiqi hərbi xidmətə çağırıldıqda – xidmət müddətinə (2 ildən çox olmamaqla), səfərbərlik üzrə hərbi xidmətə çağırıldıqda isə – xidmətdən tərxis edilənədək;

– ailə vəziyyətinə görə (təhsil müəssisəsinin Elmi Şurası tərəfindən müəyyən edilmiş hallar üzrə) – 2 il müddətinədək;

– səhhətinə görə – həkim-məsləhət (və ya tibbi-həkim ekspertiza) komissiyasının arayışında (və ya qərarında) göstərilən müddətə (2 ildən çox olmamaqla);

– sosial məzuniyyətə çıxdıqda – qanunvericiliklə müəyyən olunmuş müddətə;

– dövlət proqramları və təhsil sahəsində Azərbaycan Respublikası ilə xarici ölkələr arasında bağlanılmış müqavilələrə uyğun müəyyənləşdirilmiş kvota çərçivəsində Azərbaycan Respublikası vətəndaşları xarici ölkələrə təhsil almağa getdikdə – bakalavriat proqramlarında təhsil alanlara münasibətdə 1 (bir) ildən, magistratura proqramlarında təhsil alanlara münasibətdə 6 (altı) aydan çox olmamaqla;

– xaricdə öz hesabına təhsil aldıqda – 1 (bir) il müddətinədək.

– Akademik məzuniyyətdən qayıdan şəxslər tədris prosesinə növbəti tədris semestrindən (yaz və ya payız semestrindən) buraxılırlar. Akademik məzuniyyətdən qayıtdıqda əvvəl təhsil aldığı ali təhsil müəssisəsində öz ixtisası (magistraturada təhsil alanlara münasibətdə ixtisaslaşması) və təhsilalma forması üzrə kadr hazırlığı aparılmadıqda tələbə həmin müəssisədə mövcud təhsilalma formasında və ali təhsil müəssisəsi tərəfindən müəyyən olunan uyğun ixtisasda (magistraturada təhsil alanlara münasibətdə ixtisas daxilində digər ixtisaslaşmada) təhsilini davam etdirə bilər.

Bu zaman bu Qaydaların 2.7-2.12-ci bəndlərinin tələbləri nəzərə alınır. Magistratura səviyyəsində akademik məzuniyyətdən qayıdan şəxsin əvvəl təhsil aldığı ixtisas, ixtisaslaşma və təhsilalma forması üzrə heç bir təhsil müəssisəsində kadr hazırlığı aparılmırsa, o, Nazirlik tərəfindən müəyyən olunan uyğun ixtisas və ixtisaslaşma üzrə (bu zaman şəxsin əvvəl təhsil aldığı və bərpa olduğu ixtisasların eyni ixtisaslar qrupuna daxil olması nəzərə alınır) öz təhsil müəssisəsində təhsilini davam etdirə bilər./axar.az

Bakının Binəqədi rayonu, Biləcəri qəsəbəsində yerləşən meşəlik ərazi baxımsız vəziyyətdədir.

Belə ki, 70 ildir əkilən şam ağaclarına düzgün qulluq göstərilmədiyindən budaqları qırılıb və çürüyüb.

Yaxınlıqda yaşayan sakinlər yerli icra orqanlarına müraciət etsələr də, heç bir nəticə əldə olunmayıb.
Daha ətraflı “ATV Xəbər”in süjetində:

Bir anlığa təsəvvür edin ki, gecə yarısı balansında heç bir vəsait olmayan debet kartınızdan pul çəkilir və bir müddət sonra bank sizə "borcunuz var, gəlin ödəyin” mesajı göndərir.

Bəlkə də bu durum kiməsə inandırıcı görünməyəcək, amma şikayətçi Rəvan Novruzovun KONKRET.az-a müraciətində Unibank-la əlaqədar yaranmış belə bir anlaşılmaz durumdan bəhs edilir.

Şikayətçinin sözlərinə görə, hadisə 2023-cü il sentyabrın 15-də gecə saat 02.15-də baş verib. Unibank-a məxsus debet kartından 10 saniyə ərzində pul çəkilməyə başlanıb:

"Balansım sıfır olduğundan kartımdan pul çəkmək mümkün deyildi. Haradasa 10 saniyə ərzində xarici valyuta üzrə 30 əməliyyat həyata keçirildi. Balansım -267.18 olanda isə kartım avtomatik olaraq bloklandı. Mən dərhal Unibank əməkdaşlarına zəng etdim və baş verənlərlə bağlı onları məlumatlandırdım. Mənə məsələnin araşdırılacağını dedilər”.

Amma aradan 6 ay keçdikdən sonra, 29 yanvar 2024-cü il tarixində Unibankdan şikayətçiyə "**6622 nömrəli kart üzrə overdraft borcunun olması haqda məlumat daxil olub. Bildirilib ki, 5 gün ərzində borc ödənməsə, kredit rəsmiləşəcək və bu, mərkəzi reyestrdə əks olunacaq.

Bu xəbərdarlıqdan şoka düşən Rəvan Novruzov Unibank-a təkrar müraciət etməli olur. Ona bildirilir ki, debet kartının məlumatları oğurlanıb və ABŞ-dən karta müdaxilə edilib. Avro və dollarla qida məhsulları almaq məqsədilə balansı "0” olan kartda overdraft borcu yaranıb.

"Mənə deyirlər ki, siz ərizə yazmalıydınız. Mən də deyirəm ki, bankla dərhal əlaqə yaratmışam və problemi qeydiyyata saldırmışam. Amma mənə ərizə yazmalı olduğum barədə heç nə deyilməyib. Yoxsa mən ərizə də təqdim edərdim. Fakt odur ki, mən vaxtında Unibank-ı məlumatlandırmışam”.

Şikayətçinin "kartın təhlükəsizlik sistemi düzgün işləmirsə, bunun əzabını mən çəkməliyəm?” və "balansımda pul olmaya-olmaya kartımdan necə pul çəkilə bilər?” kimi haqlı iradları da Unibank əməkdaşlarına təsir etməyib.

"Belə çıxır ki, mən istədiyim yerdən balansında pul olmayan debet kartı ilə alış-veriş edə bilərəm?! Belə xidmət yoxdur axı. Məndə şübhə yaranıb ki, kartımın məlumatlarını başqa şəxsə özləri ötürüblər. Hazırda qəribə vəziyyət yaranıb. Bank əməkdaşları karta kiberhücum olduğunu boyunlarına alırlar. Məndə onların etirafının 30 dəqiqəlik səsyazısı var. Amma bu məsələ ilə bağlı yardım etmirlər, hər gün məbləğin faizini artırırlar”, – deyə şikayətçi gileylənib.

Sosial şəbəkələrə nəzər salanda məlum olur ki, bu eybəcər durum təkcə bizim şikayətçinin başına gəlməyib. Məsələn, İlahə Qasımova adlı xanım şikayətlənib ki, hətta plastik kartınız oğurlanmasa və kart məlumatlarını keç kəslə paylaşmasanız, pulunuz olmasa belə oğurluq baş verə bilər. "Buna görə isə bank sizə həmin pulu borc olaraq yazacaq. Çünki belə hadisə mənim də başıma gəlib”.

O qeyd edib ki, noyabrın 13-də kartından pul çıxarılmasına cəhd edilib. Kartın balansında 4 manat olarkən, bu rəqəm -29 manata çevrilib.

"Tez kartımı blokladım və bu barədə bankın "İnstaqram” səhifəsinə yazdım. Sonra kartım öz-özünə app-dən silinib. 3 dəfə yazmağıma rəğmən, bankdan "heç bir yerdə məlumatlarımı paylaşmadığım halda hesabım necə oğurlana bilər?” sualıma heç bir qənaətbəxş cavab gəlmədi. Sadəcə cavab yazdılar ki, müdaxilə dələduzlar tərəfindən oluna bilər. Cavabın absurdluğunu görürsünüzmü? Yəni mənim kartımda böyük məbləğdə pul olsa və oğurlansaydı da eyni cavab veriləcəkdi?”.

Onun sözlərinə görə, daha absurd və həngamə isə bundan 4 ay sonra baş verib. Zərərçəkən xanıma "hesabınızda 29 AZN borc var, bunu ödəməsiniz kredit reyestrində qeyd olunacaq və cərimə olunacaqsınız” mesajı gəlib.

Xanımın iradına Unibank-dan "Kartda balans olmadığı halda 13.11.2023-də Globus Center Bravo üzrə 19.46 üsd ödəniş edilmişdir, bu səbəbdən overdraft formalaşıb” cavabı verilib.

KONKRET.az-a açıqlamasında hüquqşünas Sədrəddin İsgəndərov baş vermiş hadisəni təşviş doğuran hal kimi qiymətləndirib. "Çünki hazırda əksəriyyətimiz kartlardan istifadə edirik və hər kəs kiberhücuma məruz qala bilər”.

Hüquqşünas qeyd edib ki, Unibank-ın müştərisi tələblərində haqlıdır. "Deməli, bankın təhlükəsizlik sistemi düzgün işləmir. Çünki onun kartındakı balansdan pul çəkilərkən, müştəriyə alış-verişin baş tutub-tutmaması, pul çıxarılmasına icazənin verilib-verilməməsinə dair sorğu gəlməliydi”.

Sədrəddin İsgəndərov hesab edir ki, bu xəbər mütləq ictimailəşdirilməlidir, çünki uzaq Amerikadan müdaxilə inandırıcı gəlmir.

"Bu, çox güman ki, yerli hakerlər tərəfindən törədilir. Onlar Amerika və digər ölkələrin nömrələri ilə kartlara müdaxilə edirlər. Banklar bu hadisələrdən ciddi nəticə çıxarmalı və təhlükəsizlik sistemnə yenidən baxmalıdırlar”.

Hüquqşünas belə hücumlara məruz qalan müştərilərə məhkəməyə müraciət etməyi, təzminatı, o cümlədən hüquqi xərclərini də iddia ərizəsində göstərməyi məsləhət görüb.

Dini Qurumlarla İş üzrə Dövlət Komitəsinin birinci sədri Rafiq Əliyev xələfi Hidayət Orucov haqda tənqidi fikirlər səsləndirib. O, Bakupost.az-a açıqlamasında H. Orucov haqda bunları deyib:

“Dini bilən adam Dini Qurumlarla İş üzrə Dövlət Komitəsinə sədr olmalıdır. Bu vəzifədə birinci 5 il mən işlədim. Mən dini də, ərəb dilini də bilirdim. Təxminən 5 il ərzində dövlət konsepsiyası hazırladıq və müəyyən işlər gördük.

Daha sonra həmin vəzifəyə Hidayət Orucov təyin olundu. O, nə dini, nə də siyasəti bilirdi. Hidayət Orucov 9 il bu vəzifədə işlədi, lakin bu müddət ərzində onun gördüyü hər hansı işi qeyd edə bilmirəm. Çünki ədəbiyyatşünas idi və ancaq yazı-pozu ilə məşğul olurdu”.
TEREF xəbər verir ki, Hidayət Orucovun cavabı özünü çox gözlətməyib. O, “Yeni Müsavat”a müsahibəsində bunları açıqlayıb:

“Əvvəllər də bir-iki dəfə mətbuatda nə isə dedi - mənim Dövlət Komitəsindən təzə gedən vaxtlarımda - əhəmiyyət vermədim. Heç indi də əhəmiyyət verməzdim. Amma indi elə yalanlar, uydurmalar, şər, böhtan deyib, elə qeyri-ciddi, nə keçmiş sədrə, nə professora yaraşan ifadələr işlədib ki... Bu məni çox təəccübləndirdi. Onu da deyim ki, Dövlət Komitəsinə sədr gedəndə də təəccüblənmişdim. İnanmazdım, hətta təsəvvür eləməzdim ki, Azərbaycanda elə antidövlət komitəsi var. Məndən 5 il qabaq o komitə ulu öndərin sərəncamı ilə yaradılmışdı. Getdim, orada Dövlət Komitəsinin fəaliyyəti, statusu, görəcəyi işlərlə bağlı heç nə görmədim. Bir daha təkrarlayıram, mən inanmazdım, həm də təsəvvür eləməzdim ki, Azərbaycanda elə antidövlət komitəsi var”.

H. Orucov bildirib ki, o zaman Azərbaycanda situasiya çox mürəkkəb idi, çox ciddi problemlər var idi: “Yəni xarici missionerlərin ölkəmizə axını, onların təmsil olunduqları ölkələrdəki dövlət-din münasibətlərini burada təbliğ etmələri, İslam dəyərlərini özlərinə məxsus şəkildə yaymağa cəhd eləməsi, Azərbaycan üçün ənənəvi olmayan və Azərbaycan xalqının heç vaxt qəbul etmədiyi radikal təriqətlərin, mövhumatın burada yayılması və ilaxır. Bu məsələlərlə bağlı demək olar ki, heç bir iş görülmürdü. Əksinə, müəyyən adamlar da bu istiqamətdə heç narahat deyildilər. Hətta xarici missionerlərə şərait yaradanlar da istisna olunmurdu. Ona görə deyirəm ki, dövlət siyasətinin həyata keçirilməsi ilə bağlı heç bir iş görülmürdü. Adama belə gəlirdi ki, bu, elə antidövlət komitəsidir. Mən buna çox təəssüfləndim”.

O deyib ki, R. Əliyevin özü ilə heç bu barədə danışmaq istəməyib: “Onunla bu haqda danışmağın heç bir mənası yox idi, çünki o artıq işdən çıxarılmışdı. Lap dözülməzi o idi ki, bu, ümumiyyətlə, Dövlət Komitəsinin işi ilə məşğul olmurmuş. Mən orada fəaliyyətə başlayandan sonra əməkdaşlar dedilər ki, o, saat 11-12-də işə gəlirmiş, günorta 1-də, uzaqbaşı 2-də çıxıb gedirmiş və ondan sonra qayıtmırmış. Dövlət Komitəsini idarə edən maliyyə şöbəsinin müdiri onun yeznəsi imiş. Onun siyasətlə, dinlə heç bir əlaqəsi olmayıb, ticarətdə - “Azərittifaq”ın Ağdamdakı qurumunda işləyib. Əvvəla, yaxın qohumu ora işə götürmək olmaz, bu, öz yerində. Digər tərəfdən, “Azərittifaq”ın keçmiş işçisi siyasi bir qurumda, Dövlət Komitəsində, günün yarısından çoxunu sədrin yerinə necə işləyə bilər? O vaxt məlum oldu ki, bu adam 5 il komitə sədri işlədiyi dövrdə onun əsas diqqəti özünün maddi biznes maraqlarına yönəlib. Məsələn, “İrşad” hoteli tikdi, telefon şirkəti yaratdı və ilaxır”.

Xatırladaq ki, R. Əliyev komitəyə 2001-2006-cı illərdə, H. Orucov isə 2006-2012-ci illərdə sədrlik edib.