 |
|
|
Bu ilin yayında “Sea Breeze”də baş verən kütləvi dava ilə bağlı məhkəmə istintaqı davam edir.
“Qafqazinfo”nun məlumatına görə, Sabunçu Rayon Məhkəməsində hakim Mirheydər Zeynalovun sədrliyi ilə keçirilən iclasda zərərçəkmiş qismində tanınmış Elnur Məmmədov ifadə verib.
E.Məmmədov eyni dava ilə bağlı həm də təqsirləndirilən şəxsdir. Lakin o və axtarışda olan bir neçə nəfərin işi ayrıca icraata götürülüb, hələ ki ibtidai istintaq mərhələsindədir. Ondan başqa bu iş üzrə Cavad Muradov da həm təqsirləndirilən, həm də zərərçəkmişdir.
Fotoda Elnur Məmmədov
Bəhs etdiyimiz iş üzrə 4 nəfər-Elmir İsmayılov, Məhəmməd Həsənzadə, Peyman Vəlizadə və yeniyetmə M.Ə müttəhim kürsüsündə əyləşir. Onlardan yalnız M.Ə həbsdə deyil. Təqsirləndirilən şəxsin yeniyetmə olması nəzərə alınaraq barəsində alternativ qətimkan tədbiri seçilib.
Bundan əvvəl Elnurun məhkəmədən yayınması və vəkillərin buna etiraz etməsi barədə yazmışdıq. E.Məmmədov bu gün məhkəməyə gəlib, sərbəst ifadə verib.
Zərərçəkmiş deyib ki, müttəhimlərdən yalnız Elmir İsmayılovu tanıyır. Onunla davadan əvvəl bir neçə dəfə birlikdə yeyib-içiblər:
“Həmin gün “Sea Breeze”də konsert var idi. Qohumum Vüqar Tağıyev və Cavad Muradovla restoranda eyni masada əyləşmişdik. Vüqarla Elmir tanış idilər. Ona görə, Elmir əlində içki ilə bizim masaya gəldi. Tam yadımda deyil necə oldu, amma aramızda mübahisə yarandı. Elmir də mən də çox içkili idik. Sonra mübahisə böyüdü, çölə çıxdıq. O, məni, mən onu vurdum. Kütləvi dava düşdü. Bilmədim kim-kimi vurdu. Əynimdə ağ köynək var idi, dava vaxtı cırıldı”.
Elnur Məmmədovun əksər suallara “bilmirəm”, “xatırlamıram” kimi cavablar verməsi hakimi özündən çıxarıb:
“Sizə xəbərdarlıq etdim ki, yalan ifadə verməyə görə cinayət məsuliyyyətinə cəlb oluna bilərsiz. Burda 4 nəfər cinayətdə təqsirləndirilir. Siz də zərərçəkmiş kimi tanınmısız. İndi gəlib deyirsiz ki, xatırlamıram. Onda belə çıxır ki, bu adamlara əsassız ittiham verilib?!”.
İttihamda yazılır ki, Elnur Məmmədov hadisə vaxtı huşunu itirib. Məhkəmədə vəkilin eyni sualına cavab verərkən isə huşunu itirmədiyini bildirib.
Müdafiə tərəfini maraqlandıran məsələlərdən biri Elnurla Elmirin hadisədən sonra görüşüb barışıq əldə etmələri, bir neçə saat sonra isə Elnurun gedib polisə şikayət etməsi olub.
“Görüşdən sonra polisdən zəng etdilər. Dedilər dava videoya düşüb. Mən də hadisənin necə baş verdiyini dedim. Bu iki içkili adam arasında olan münaqişə idi. Ortada bir şikayət də yoxdur. Burda böyüdüləsi nə varki?”, -E.Məmmədov deyib.
Davanın görüntüləri:
Əvvəlki iclasda ifadə verən şahidlərin dediyinə görə, həmin gün Elnur Elmirin maşınının qarşısını kəsərək yerə düşürüb. Bu vaxt o, Elmirə yumruqla zərbələr endirib. Həmin vaxt Elmirin “Range Rover” markalı avtomobili də yararsız hala salınıb.
Elnurun son deyilənlərin yalan olduğunu deməsi şüşə qəfəsdə əyləşən Elmiri əsəbləşdirib:
“Necə yəni məni maşından düşürüb vurmamısan? Mən sənə görə 6 aydır günahsız yerə həbsdə yatıram. Düzünü danış”.
Elmir İsmayılovun vəkili Elnurun istintaqa verdiyi ifadəsinin elan olunmasını istəyib. Vəkil deyib ki, bundan əvvəl təqsirləndirilən şəxslərin hər birinin əvvəlki ifadəsi elan olunub. Buna görə də zərərçəkmişin də ifadəsi elan olunmalıdır. Hamıya maraqlıdır ki, niyə görə Elnurun işi ayrıca aparılır.
Hakim “əvvəlki ifadənin elanına zərurət yoxdur” deyərək vəsatəti təmin etməyib.
Prosesin davamında təqsirləndirilən şəxslərdən 3-ü sərbəst ifadə verib. Elmir İsmayılov ifadəsində deyib ki, hadisə günü Elnur Məmmədov dostları ilə birgə onu əyləşdiyi masadan kənara çağırıblar. Bu vaxt onlar arasında mübahisə yaranıb, onu döyməyə başlayıblar:
“Hadisə “parkovka”da baş verdi. Mənə söyüş söyən də o idi. Amma mən cavab qaytarmadım. Hisslərimi içimdə boğdum. Elnur dostları ilə birgə üstümə hücum etdi. Bir neçə nəfər idilər. Davanı Elnur başlatdı. Üstündən biraz keçəndən sonra qardaşıma zəng etdim ki, gəlin məni götürün. Mən uşaqları ora davaya çağırmamışdım. Səhəri gün Elnur məni görüşə çağırdı. Məndən üzr istədi. Ondan sonra eşitdim ki, gedib polisə şikayət edib”.
Prosesin davamında bu iş üzrə zərərçəkmiş Cavad Muradovun Elnur Məmmədova üz tutaraq “hadisə gününün səhəri kafedə bir nəfərə demisən ki, davanın videosu yayılıb, gəlin kimisə “rasxoda” qoyaq”,- deməsi Elnurun nalayiq şəkildə reaksiyasına səbəb olub.
O, elə bir söz demədiyini bildirib, məhkəmə zalında hər kəsin eşidəcəyi şəkildə həmin sözləri deyənin də ünvanına söyüş söyüb.
E.Məmmədovun iclas zalında söyüş söyməsinə hakim sərt reaksiya verib:
“Sən deyəsən, buranı olduğun başqa yerlərlə səhv salmısan. Məhkəmə söyüş söymək yeri deyil”.
C.Muradov E.Məmmədovla üzləşməsində ondan hər şeyi necə var danışmasını istəyib:
“Kişi kimi danış, orda dava necə başladı? Sən pis söyüş söydün, ona görə… Onun səhəri biz gedib restoranda oturduq, sən Elmirdən üzr istədin. Elmirə dedin ki, nə söyüş söymüşəmsə özümə getsin. Barışıqdan sonra da gedib şikayət verdin. Məsələ belə olub”.
Fotoda Cavad Muradov
Cavad Muradov özünün təqsirsiz olduğunu, kiminsə badına gedib 6 aydır dustaq olduğunu bir daha məhkəmənin diqqətinə çatdırıb.
Bundan sonra digər müttəhimlər ifadə veriblər. Peyman Vəlizadə Məhəmməd Həsənzadə əsasən oxşar danışıblar. Onların dediyinə görə hadisə günü Elmirin qardaşı Elgünlə birgə Mərdəkan qəsəbəsində bağda olublar. Elmirin zəngindən sonra Muradı da götürüb “Sea Breez”ə gəliblər. Onlar restorana çatanda kütləvi dava olduğunu görüblər:
“Sea Breez”ə çatanda Elmir qanın içində idi. Kütləvi dava gedirdi, amma Elmir içlərində yox idi. Elnur söyüş söyməsəydi, dava da olmazdı. Söyüşə görə də Elmirin qardaşı Elgün də davaya qarışdı. Biz bu işdə zərərçəkmişik, amma 6 aydır kiminsə sifarişi ilə həbsdə yatırıq”,- təqsirləndirilən Vəlizadə belə deyib.
Növbəti iclas təqsirləndirilən yeniyetmənin ifadəsi ilə davam etdiriləcək.
Qeyd edək ki, Elnur Məmmədov Binəqədi İcra Hakimiyyəti başçısının sabiq müavini Leysan Məmmədovun oğludur. Leysan Məmmədov 2006-2021-ci illərdə Gənclər və İdman Nazirliyinin Tikilməkdə olan obyektlərin Müdiriyyətində direktor müavini, direktor, 2021-ci ildən 2022-ci ilin fevral ayına qədər Minatəmizləmə Agentliyində Aparat rəhbəri kimi davam edib. Elnur Məmmədov Leysan Məmmədovun üç övladından biridir. Elnur Məmmədovun qardaşı prokurorluq orqanlarında çalışır, “Sea Breeze”dəki davanın iştirakçısı olan Elnur isə Vergilər Xidmətinin inspektorudur.
Mənbə: qafqazinfo.az
Müraciət
Salam Mirvari xanım. Çox xahiş edirəm paylaşın.
Neftqazelmitədqiqatlayihə insititutunun baş mühəndisi Fazil Həsənov açıq-aşkar formada bu institutda işə düzəltdiyi ailə üzvlərinə, qohumlarına və yalnız vəzifəli qohumları olan işçilərə imtahandan kənar və ya formal həyata keçirdiyi imtahanla dərəcə verməklə, bizim kimi aktiv işləyən gənclərə qarşı ayrı-seçkilik edir. Bu haqsızlıq və ədalətsizlik artıq uzun illərdir ki, davam edir. Hər dəfə eyni şəxslərə qiymət verilməsi biz gənclərdə böyük ruh düşkünlüyünə səbəb olur. Aramızdakı bəzi əməkdaşlar işdən çıxarılma qorxusuna görə bütün baş verən ədalitsizliklərə boyun əyib susurlar. Baş mühəndis Fazil Həsənov "Neft və qaz emalı şöbəsi"nin mühəndis-texnoloqlarının işləməli olduğu layihələri "Neft və qaz yataqlarının abadlaşdırılması" şöbəsinə yönləndirir. Şəxsi ədavəti olduğu üçün Emal şöbəsinin işçilərinin gördüyü işləri qiymətləndirmir. Baş mühəndis Fazil Həsənov min bir behanə ilə "Neft və qaz emalı" şöbəsinin işçilərini müxtəlif şöbələrdə oturub işləməsini əmr vermişdir. F. Həsənov öz maraqlarını güdür. Nəninki dərəcə artimlarında hətta şəxsi icazə almalarda da ayrı-seçkilik salır. İşçi xəstə halda həkimin qəbuluna gedən zaman həkim deyir ki "rəhbərlik tapşırıb, ölsən də qalsan da işdən buraxılmağa icazə yoxdur".
Şölə Haqverdiyeva
Mirvari Gahramanli
Teref. Xocanın Blogu
Səhifəmiz hamnın üzünə açıqdı
Dünya Bankı "Azərbaycanın iqliminə və inkişafına dair Hesabat"ını yayımlayıb. Hesabatda ölkə iqtisadiyyatının mövcud durumunun ölkənin iqlim hədəflərinə təsiri də dəyərləndirilib. Dünya Bankının hesabatında bildirilir ki, indi Azərbaycanın Ümumi Daxili Məhsulunun (ÜDM) üçdə biri, ixracınsa 90 faizi enerji sektorundan asılıdır. Qurumun hesablamalarına görə, Azərbaycanın mövcud neft ehtiyatları qarşıdakı 25 ildə ölkənin tələbatının ödənilməsinə yetəcək. Dünya Bankının qənaətincə, belə ortamda kompleks və effektiv dekarbonizasiya səyləri ilə iqtisadiyyatı şaxələndirməyə, yaşıl hidrogen və kənd təsərrüfatı kimi yeni artım drayverlərinə ehtiyac var. Təbii qaz ehtiyatları ilə bağlı isə bildirilir ki, ölkədə ixrac üçün mövcud təbii qaz ehtiyatlarının 2060-cı ilədək 35 faizədək artacağı proqnozlaşdırılır.
Hazırda Azərbaycanın ciddi iqlim riskləri ilə üz-üzə olmasına da hesabatda xüsusi diqqət yetirilir. Hesabatda bildirilir ki, ölkənin, demək olar, bütün ərazisi həm quraqlığa, həm də su qıtlığına məruz qalır. Ekstremal hava şəraiti üzündən quraqlığın tezlik və sıxlığının artacağı gözlənilir. Eyni zamanda, ölkənin təbii sərvətləri torpağın deqradasiyası, səhralaşma və ifrat otarılma nəticəsində zədələnir və bu, kənd təsərrüfatına mənfi təsir göstərir. Onu da unutmaq olmaz ki, neft-qaz hasilatı da torpağın aşındırıb və su ehtiyatlarını çirkləndirib.
Azərbaycan dekarbonizasiya hədəflərinə çata bilməyəcək
Dünya Bankının hesabatında bildirilir ki, Azərbaycan iqlim dəyişikliyi üzrə Paris Sazişini imzalasa da, hələ də ölkə üzrə emissiyaların xalis sıfır səviyyəsinə çatdırılmasına dair hər hansı öhdəlik götürməyib. Bununla belə, ölkə 2030-cu ilədək istixana qazı emissiyalarını 1990-cı il səviyyəsindən 35 faiz, 2050-ci ilədəksə 40 faiz azaltmaqla bağlı milli hədəflər müəyyənləşdirib. Dekarbonizasiya üzrə öhdəliklərini gücləndirsə də, Azərbaycan hələ də öz milli hədəflərinə çatmaq yoluna qədəm qoymayıb.
Dünya Bankının hesablamaları göstərir ki, Azərbaycan 2035 və 2050-ci illərədək hədəflədiyi göstəricilərə çata bilməyəcək. Sənəddə bildirilir ki, Azərbaycan 1990-cı illə müqayisədə istixana qazının zəhərli tullantılarını 2030-cu ilədək 35 faiz, 2050-ci ilədək isə 40 faiz azaltmağa dair proqnozdan geridə qalır. Belə ki, 1990-cı illə müqayisədə enerji ilə əlaqədar və sənaye proseslərindən yaranan zəhərli tullantılar 2030-cu ilədək yalnız 28 faiz, 2050-ci ildə isə 30 faiz daha az olacaq.
Azərbaycanın dekarbonizasiya hədəflərinə çata bilməməsinin əsas səbəblərindən biri milli iqtisadiyyatın strukturudur. Dekarbonizasiya kursunu müəyyənləşdirib gerçəkləşdirməkdən ötrü iqtisadi şaxələnmə və daha çevik özəl sektor tələb olunur. Azərbaycanda isə bu sahədə ciddi çağırışlar var və uzun illərdir önəmli dəyişikliklər qeydə alınmayıb. Nəzərə almaq lazımdır ki, energetika və su təchizatı da daxil, yaşıl keçidə mütləq gərəkli sektorlarda dövlət müəssisələri daha çoxdur və ölkədəki işçi qüvvəsinin yarısı onlarda çalışır.
Kənd təsərrüfatı ilə bağlı çətinliklər
Dünya Bankının hesabatında Azərbaycanda kənd təsərrüfatı ilə bağlı çətinliklərə də diqqət çəkilir. Sənəddə bildirilir ki, Azərbaycandakı fermerlər hələ də ənənəvi əkinçilik təcrübəsindən yararlanır, torpağın sağlamlığının artırılmasının faydaları barədə bilgili deyillər. Bu sahədəki məlumatlılığın azlığı daha yüksək məhsuldarlıq potensialını özündə birləşdirən yeni bitkilərin tətbiqini məhdudlaşdırır.
Qurumun Azərbaycanda kənd təsərrüfatı ilə bağlı diqqət çəkdiyi daha bir məqam su çatışmazlığı və çağdaş suvarma sistemlərinin məhdudluğudur. Dünya Bankı analitiklərinin fikrincə, məhsuldarlığı artırmaq və iqlim dəyişmələrinə qarşı dayanıqlılıq yaratmaq üçün kiçik və orta fermerlərin bacarıqları gəlişdirilməlidir və bu baxımdan onların ayrıca dəstəyə ehtiyacı var. Fermerlərə dəstəklə yanaşı, çatışmazlıqları aradan qaldırmaqdan ötrü mütləq kadr və maliyyə resursları da olmalıdır. İndi dövlət bu potensialı gücləndirmək üçün iş görmədiyindən özəl sektordakı müxtəlif subyektlər belə çatışmazlıqları müvəqqəti tədbirlərə əl atmaqla aşmaq məcburiyyətində qalır. Daha iri aqrobiznes müəssisələrinin bəziləri öz heyətlərindən və təchizatçı fermerlərdən ötrü təlim keçəcək beynəlxalq mütəxəssislər gətirir. Bostançılığın inkişafına dəstək məqsədilə yaradılmış bir sıra ticarət birliyi də eyni işi görür. Ancaq belə təşəbbüslərin əhatə dairəsi yetərsiz olduğundan yeni yaradılmış birliklərin həmin sektorları dəstəkləməyə təcrübə və resursları yoxdur.
Dünya Bankının hesablamasına görə, hökumət effektiv cavab tədbirləri görə bilməsə, yağış suyu ilə qidalanan bitkilərin məhsuldarlığı 2060-cı ilədək, orta hesabla, 14-20 faiz azalacaq. Yüksək dəyərli bitkilərdə daha çox azalma gözə çarpacaq. Hesabatda vurğulanıb ki, hazırda Azərbaycanda suvarılan bitkilər də su çatızmazlığı riski ilə üz-üzədir. Bu problem cənub rayonlarında bəzi bitkilərin 60 faizindən çoxunun, Şərqi Aşağı Kür hövzəsində isə 20 faizdən çoxunun itirilməsi ilə nəticələnəcək. Onu da nəzərə almaq lazımdır ki, bütün bu proseslər əkinçiliklə yanaşı, heyvandarlığı da mənfi təsir göstərəcək. Hesabatda ayrıca vurğulanıb ki, torpağın nəmişliyinin azalması, səhralaşma, otlaqların normadan artıq istismarı otlaq sahələrinin keyfiyyətini aşağı salacaq. Bitki örtüyündən qaynaqlanan problemlər də mal-qaranın sağlamlığına birbaşa təsir edəcək.
Mənbə: AzadlıqRadiosu
“Kontakt Home” mağazalar şəbəkəsindən may ayında kondisioner alan vətəndaş peşman olub. Alınan gündən problemi olan kondisiner dəfələrlə rəsmi servisə göstərilsə də problemi aradan qalxmayıb. Mağaza isə vətəndaşa satdığı yararsız məhsuldan boyun qaçırır.
Tribunainfo.az-a yazan şikayətçi Ziyad Hüseynov bildirib ki, mağaza satdığı məhsula görə məsuliyyəti boynundan atır:
“29 may 2023-cü il tarixdə “Kontakt Home” mağazalar şəbəkəsinin Azadlıq prospektində yerləşən mağazasından həyat yoldaşım Hüseynova Vəfanın adına Birkartla dəyəri 1549,99AZN olan bir ədəd LG markalı 60m² – lik kondisioner aldıq. Dükan işciləri kondensioneri quraşdırdı. Yay mövsümündə işləyən zaman kondisionerdə arabir titrəmə səsi gəlirdi. Bunun qarsısını almaq üçün çöl blokun kronşteynə bağlanan yerlərinə rezin qoydum, lakin heç bir köməyi olmadı.
Soyuqlar düşdükdən sonra mən onu isti rejimdə işlətməyə başladım, bu zaman çöl blokdan mənzilin içərisinə sirayət edən uğultu səsi eşidilirdi. Bu səs bizim üçün narahatlıq yaradırdı.
“Kontakt Home”un servis xidmətinə müraciət etdim,tələb etdim ki, problemi aradan qaldırsınlar. Həmin servisdən gələn əməkdaşlar dedilər ki, bu hava süzgəcindəndir, süsgəci təmizləyib yerinə qoydular, lakin heç bir effekt vermədi.
Bir neçə gündən sonra servisdən yenə gəldilər və dedilər ki, quraşdırma vaxtı səhvə yol verilib, çöl blokla iç blok arasındakı birləşmə boruları qısadır. Çoxsaylı müraciətlərdən sonra mağazadan gəlib boruları uzadıb getdilər, amma yenə heç bir effekt vermədi. Mənim təkrar müraciətimdən sonra “Kontak Home” rəsmi srvisin əmakdaşları gəlib mikrofonla səsin səviyyəsin öçdülər və qeyd etdilər ki, mənzildə kondisionerdən gələn səsin səviyyəsi norma daxilindədir və uğultu səsi eşidilir. Bununla bərabər dedilər ki, bu inentor tipli kondisionerlər belə işləyir və getdilər. Bu cavab əlbəttə məni qane etmədi, uğultu səsi davam edirdi!
Mağazanın Emil adlı vətəndaşına yaxınlaşıb bildirdim ki, ya problem aradan qaldırılsın, ya da məhsul yenisi ilə əvəz edilsin. Bundan sonra bizə yenə servis əməkdaşı göndərdi və onlar təsdiq etdi ki, problem var. Bunun anormal olduğunu bildirdi və akt yazdı. Dəfələrlə olan müraciətlərimə ğazadan bildirdilər ki, mənə heç bir köməklik edə bilməyəcəklər. Bu mağazalar şəbəkəsinin dələduzluğuna son qoyulmalıdır”.
Mənbə: Tribunainfo.az
Teref. Xocanın Blogu
Ağsu sakini Nüşabə Cəfərova deyir ki, əmlakını ona heç bir xəbərdarlıq edilmədən, məhkəmə qərarı olmadan söküblər. Onun sözlərinə görə, əlində mülkiyyət hüququnu təsdiqləyən və başqa lazımi sənədlər ola-ola əmlakını yerlə-yeksan ediblər. Bəziləri deyib ki, bunu edənlər Ağsu rayon İcra Hakimiyyətinin əməkdaşlarıdır. Amma dağıntıda Meşə Təsərrüfatı Mərkəzinin də adını hallandıranlar olub.
Söhbət Bakı-Qazax yolunun 150-ci kilometrliyində (Ağsu dolayları), yolun üstündə yerləşən restorandan gedir.
İcra hakimiyyəti: “Şərtlərə əməl etməyib…”
Nüşabə Cəfərova bildirir ki, obyektini dağıdanlara elə söküntü vaxtı etiraz ediblər. Amma etirazları nəticəsiz qalıb. Məcbur olub, Daxili İşlər Nazirliyinin “102” Xidmətinə zəng edib. Amma bu şikayətin də xeyri olmayıb.
Ardınca o, rəsmi qaydada Ağsu Rayon İcra Hakimiyyətinə üz tutub, tələb edib ki, obyekti bərpa olunsun, həmçinin ona dəymiş zərər ödənilsin. Bir müddət sonra icra hakimiyyətindən cavab alıb ki, yeməkxananın yerləşdiyi ərazi meşə fonduna aiddir.
“Müqavilə şərtlərinə əsasən, sizə istifadə üçün verilən ərazidə və onun əhatəsində heç bir əsaslı tikinti aparmadan, meşə fond torpaqlarının vəziyyətini pisləşdirmədən, ətraf mühitə zərər vurmadan ərazidə çadır tipli, yaxud da sökülüb-yığılan yüngül konstiruksiyalı qurğulardan istifadə etməli idiniz. Lakin şərtlərə əməl etməyib, orada əsaslı tikinti aparmısınız…”, – icra hakimiyyətinin cavab məktubunda belə yazılıb.
Əlavə olunub ki, Meşələrin İnksafı Xidmətinin Şamaxı Regional Meşə Təsərrüfatı Mərkəzindən sözügedən yeməkxana ilə bağlı icra hakimiyyətinə məktub göndərilib. Orada göstərilib ki, müqavilənin şərtləri pozulduğuna görə yeməkxana qanunsuz tikili hesab olunub.
İcra hakimiyyəti iddia edib ki, söküntünü Şamaxı Regional Meşə Təsərrufatıı Mərkəzinin əməkdaşları aparıb.
“Sökülən tikinti materialları da ünvanınıza aparılıb…”, – icra hakimiyyətindən bildirilib.
“15 ildən sonra niyə yadlarına düşdü?”
Nüşabə Cəfərova deyir ki, bundan sonra Şamaxı Regional Meşə Təsərrüfatı Mərkəzinə müraciət edib. Bu qurumdan mülkiyyətçiyə gələn cavabda iddia olunub ki, qardaşı Lətif Cəfərov ərazidə inşa olunmuş obyektlərin sökülməsi üçün mərkəzin əməkdaşlarından kömək istəyib:
“Lətif Cəfərovla birlikdə Şamaxı Regional Meşə Təsərrüfatı Mərkəzinin əməkdaşları və Ağsu rayonundakı sosial işçilərinin köməyilə tikililər sökülüb…”.
Həmçinin iddia olunub ki, bu əmlakla əlaqədar Lətif Cəfərovla keçmiş Şamaxı Meşə Mühafiə və Bərpası Müəssisəsi arasında istirahət rekrasiya məqsədilə 1 illik müqavilə bağlanıb. 2004-cü ilin aprelində bağlanmış müqavilənin müddəti isə 2005-ci ildə başa çatıb.
Mülkiyyətçi Nüşabə Cəfərova dövlət orqanlarından ona gələn cavab məktublarında yazılanların yalan olduğunu bildirir. Deyir ki, əgər müqavilənin müddəti 2005-ci ildə başa çatıbsa, o zaman niyə 15 ildən sonra yadlarına düşdü:
“Ən əsası, mülkiyyət toxunulmazdır. Məhkəmə qərarı olmadan obyektin darmadağın edilməsi mülkiyyət hüququnun tapdanmasıdır”.
O da məlum olub ki, yeməkxananın yerləşdiyi torpaq sahəsi hələ 1998-ci ildə Ağsu Rayon İcra Hakimiyyəti başçısının sərəncamıyla rayonun Aratkənd kənd sakini Cabir Səftərova verilib. O isə ərazidə kiçik yeməkxana tikdirib. Tikilini Mənzil-Kommunal Təsərrüfatı Komitəsinin “Aztexinventarlaşdırma” İstehsalat Birliyi elə 1998-ci ilin martında onu Reyestr kitabında qeydə alıb. Yeməkxanaya qeydiyyat vəsiqəsi və texniki pasport da verilib.
2002-ci ilin sentyabrında Cabir Səftərov yeməkxananı Nüşabə Cəfərovaya satıb, həmin vaxtdan da əmlak onun mülkiyyətindədir.
“Məhkəmənin göstərdiyi əsas gülüncdür, kimin əmlakı qanunsuz sökülsə, sarsılmaz?”
Əmlakın sökülməsindən sonra dövlət orqanlarına ünvanladığı məktublardan qaneedici cavab ala bilmədiyini deyən Nüşabə Cəfərova daha sonra məhkəməyə üz tutub. O, həm Ağsu Rayon İcra Hakimiyyətini, həm də Şamaxı Regional Meşə Təsərrüfatı Mərkəzini məhkəməyə verib.
Ərazi aidiyyəti üzrə Şəki İnzibati Məhkəməsinə təqdim olunan iddia ərizəsində ona dəymiş ziyanın ödənilməsi məqsədilə Maliyyə Nazirliyi də üçüncü şəxs qismində göstərilib.
Nüşabə Cəfərovanın məhkəməyə ərizəsində tələbi belə olub ki, Ağsu Rayon İcra Hakimiyyəti və Şamaxı Regional Meşə Təsərrüfatı Mərkəzindən birlikdə 180 min manat pul tutulub, ona verilsin. Bu məbləğin də 80 mini sökülmüş tikilinin dəyərinin əvəzi, 100 min manatı isə ona dəymiş mənəvi ziyana görə təzminat kimi qoyulub.
Şəki İnzibati Məhkəməsi bu iddianı təmin etməyib. Nüşabə Cəfərova bu qərardan apelyasiya şikayəti verib:
“Şəki İnzibati Məhkəməsinin rədd qərarında birinci əsas budur ki, guya mənim həmin əmlakla bağlı ümumiyyətlə, mülkiyyət hüququm yoxdur. Məhkəmənin gətirdiyi bu əsas gülüncdür. Üstəlik, tam qanunsuzdur. Həmin əmlakla bağlı mülkiyyət hüququ Daşınmaz Əmlakın Dövlət Reyestrində qeydə alınıb. Əmlak da mənə notariat qaydada, alqı-satqı müqaviləsiylə satılıb. Mülkiyyət hüququ başqa necə olur? Məhkəmənin qərarında yazıb ki, guya mən özümə mənəvi zərər vurulduğunu sübut eləyə bilməmişəm. Kiminsə əmlakını qanunsuz sökürlərsə, o adamın sarsıntı keçirdiyinə kimin şübhəsi ola bilər?”
Məhkəmə qərarı: “İcra hakimiyyəti 23 min 630 manat pul ödəsin”
Nüşabə Cəfərovanın sözlərinə görə, məhkəməyə şikayətindən sonra Şamaxı Regional Meşə Təsərrüfatı Mərkəzi də ona qarşı iddia qaldırıb. Bu qurum Ağsu Rayon Məhkəməsinə müraciətində sözügedən əmlakın alqı-satqısıyla bağlı 2002-ci ildə notariat kontorunda bağlanmış müqavilənin, həmçinin əmlakın qeydiyyat vəsiqəsinin etibarsız hesab olunmasını istəyib. Ancaq Ağsu Rayon Məhkəməsi iddianı rədd edib.
Şəki İnzibati Məhkəməsinin rədd qərarından Nüşabə Cəfərovanın verdiyi apelyasiya şikayətinə baxılarkən ekspertiza təyin olunub. Ekspertizanın rəyinə görə, sökülmüş restoranın bərpası üçün təmir-tikinti işlərinin ümumi dəyəri 23 min 630 manat müəyyənləşdirilib. Ekspertlər rəydə onu da qeyd ediblər ki, obyektin özünün bazar qiymətlərinə uyğun dəyərini hesablamaq üçün tədqiqat keçirməyiblər. Yalnız bərpa üçün lazım olan məbləğ hesablanıb.
Apelyasiya məhkəməsində söküntü ilə əlaqədar bir sıra şahidlər də dindirilib. Onlar bildiriblər ki, obyekti Ağsu Rayon İcra Hakimiyyətindən gələn göstəriş əsasında icra hakimiyyətinin özünün, həmçinin onun tabeliyində olan Mənzil-İstismar İdarəsi, Yaşıllaşdırma və Abadlaşdırma İdarəsinin işçiləri söküb.
Şəki Apelyasiya Məhkəməsi bu araşdırmalardan sonra Nüşabə Cəfərovanın şikayətini qismən təmin edib. Ekspertiza rəyinə əsaslanaraq, ona 23 min 630 manat ödənilməsinə qərar verib.
Söküntü ilə əlaqədar şahid ifadələrini nəzərə alıb, şikayətçiyə ödəniləcək vəsaitin Ağsu Rayon İcra Hakimiyyətindən tutulması qərara alınıb.
Şəki Apelyasiya Məhkəməsinin bu qərarı Nüşabə Cəfərovanı qane etməyib. O, Ali Məhkəməyə üz tutub. Eyni zamanda, icra hakimiyyəti də qərardan narazı qalıb və kassasiya şikayəti verib.
Ali Məhkəmə tərəflərdən heç birinin şikayətini təmin eləməyib – Şəki Apelyasiya Məhkəməsinin qərarını qüvvədə saxlayıb.
Mülkiyyət hüququnun bərpası üçün ölkədaxili bütün hüquqi vasitələrini tükəndirdiyini deyən Nüşabə Cəfərova Ali Məhkəmədən sonra Avropa İnsan Haqları Məhkəməsinə müraciət etmək niyyətindədir. O, əmindir ki, Avropa Məhkəməsi onun mülkiyyət hüququnun pozulduğunu təsdiqləyəcək və buna görə ona kompensasiya təyin olunacaq.
meydan tv
Teref. Xocanın Blogu
Səhifəmiz hamnın üzünə açıqdı
“Mənim körpə övladımla açıq şəkildə alver edirlər. Nə Allahdan, nə də qanunlardan qorxurlar. Cəmi 6 aylıq ikən əlimdən zorakılıqla alınan körpəmi geri qaytarmaq üçün 1 il 8 aydır ki, hüquq-mühafizə orqanlarının, məhkəmələrin qapılarında sürünürəm. Nə mənim bir ana kimi fəryadımı eşidən var, nə anasız buraxılan körpəmə yazığı gələn, nə də qanunlara əməl edən. Çarəsiz buraxılmışam, dövlətimdən kömək istəyirəm!”.
Bu fikirlər hazırda Qəbələ rayon Xırxatala kəndində yaşayan, 1 il 8 aya yaxındır ki, südəmər körpəsi əlindən alınan Səmədli Fəridə Vaqif qızının Azərbaycan Respublikasının Ali Məhkəməsinin sədri İnam Kərimova və Ədliyyə naziri Fikrət Məmmədova müraciətindən götürülüb.
Bu haqda məlumat verməzdən öncə xatırladaq ki, bu yaxınlarda saytımızda südəmər körpəsi əlindən alınan Səmədli Fəridə Vaqif qızının Azərbaycan Respublikasının Birinci vitse-prezidenti, Heydər Əliyev Fondunun Prezidenti Mehriban xanım Əliyevaya ünvanladığı müraciət dərc olunub. (bax:) Həmin müraciətdə F. Səmədli qarşılaşdığı təfsilatı ilə qeyd edib.
Fəridə Səmədlinin İnam Kərimov və Fikrət Məmmədova müraciətində də qeyd olunan həmin faktları oxucuları yormamaq üçün təkrar dərc etmirik. Tanış olmayanlar həmin müraciətə bu linkdən baxa bilərlər.
Qeyd edək ki, mütəmadi olaraq keçmiş həyat yoldaşı Elvin Səmədli və onun ailəsi tərəfindən ağır işgəncələrə məruz qaldığı üçün ayrılmağa qərar verən F. Səmədlinin həmin vaxt 6 aylıq olan körpəsi əlindən alınıb.
“Həmin vaxtdan artıq 1 il 8 aya yaxın müddət keçir ki, mən övladıma həsrət qalmışam. Nəinki onu görməyimə, hətta səsini duymağıma belə imkan vermirlər. Bir ana kimi işgəncələrin ən dəhşətlisini yaşayıram!”, – deyə F.Səmədli müraciətində bildirib.
Qeyd edək ki, bu 1 il 8 ayı F.Səmədli və ailəsi məhkəmə qapılarında keçiriblər. Bununla bağlı F. Səmədli müraciətində yazr:
“Keçmiş həyat yoldaşım Sabunçu rayonunda yaşamasına, hətta orada mağaza müdiri işləməsinə baxmayaraq başqa ərazidə qeydiyyatda olduğu əsas (bəlkə də bəhanə) gətirilərək müraciətimə baxılmasını bacara bildikləri qədər uzatdılar. Təbii ki, mənə övladımı əlimdən almaq üçün hər şeyi edəcəyini bildirən keçmiş həyat yoldaşımın qanunsuz və dolayı yollarla məhkəmələrə də müdaxiləsi nətəcində...
Sabunçu rayon Məhkəməsi xeyli müddət gözlədikdən sonra işə baxmayıb Qəbələ rayon Məhkəməsinə göndərdi. Qəbələ rayon Məhkəməsi 3 aya yaxın gözlədikdən sonra hazırlıq iclasında hakim işə baxa bilməyəcəyini bildirərək işi keçmiş həyat yoldaşımın qeydiyyatda olduğu Ağdam rayon Məhkəməsinə göndərdi.
Həmin vaxt məhz Birinci vitse-prezident, Heydər Əliyev Fondunun Prezidenti Mehriban xanım Əliyevaya müraciət etdikdən və onun tərəfdən müraciətim nəzarətə götürüldükdən sonra Ağdam rayon Məhkəməsində işə baxılmağa başlanıdı. Ancaq burda proses mümkün qədər uzadıldı. Qarşı tərəfin hətta qanunsuz vəsatətləri belə təmin olundu. Ən son tarixlərə təyin edilən məhkəmə proseslərinin yekununda Ağdam rayon Məhkəməsinin hakimi Rafiq Məmmədov övladım Yunus Səmədlinin ana kimi mənim himayəmə veriməsinə dair qətnamə çıxardı. Bundan sonra qarşı tərəf apellyasiya şikayəti verdi. Apellyasiya Məhkəməsi də qərarı qüvvədə saxladı. 2 ay da qarşı tərəfin Ali Məhkəməyə müraciət edə biləcəyi gözlənilərək, qərarın icraya yönəldilməsi gecikdirildi. Ancaq qarşı tərəf Ali Məhkəməyə müraciət etmədi.
Hörmətli İnam müəllim, hörmətli Fikrət müəllim!
Uzun ayrılıqdan sonra nəhayət övladıma qovuşacağımı gözlədiyim halda bu dəfə yeni bir problem yaratdılar. Belə ki, məhkəmə qərarının icrası üçün Ağdam rayon İcra Şöbəsinə müraciət etdik. Ordan keçmiş həyat yoldaşımın Sabunçu rayonunda yaşadığı əsas gətirilərək icra məktubununun Sabunçu İcra Şöbəsinə göndərildiyi bildirildi.
Dəfələrlə müraciət etdikdən sonra noyabr ayının əvvəlində Sabunçu rayon İcra Şöbəsinə işin icra məmuru Hafiz İsrafilovun nəzarətində olduğu bildirildi. Bu dəfə də icra məmuru məhkəmənin qərarını yerinə yetirə bilməyəciyini bəyan etdi. Ağdam rayon İcra Şöbəsindən onlara yalnız aliment qərarının icrasının təmin olunmasına dair məktub gəldiyini iddia edirlər. Ağdam rayon Məhkəməsinin 2 (103) -245/2023 saylı qətnamənin qət edirəm hissəsində “03.08.2021-ci il təvəllüdlü Səmədli Yunus Elvin oğlunun anası, iddiaçı Səmədli Fəridə Vaqif qızının himayəsinə verilsin” ifadəsi qeyd olunsa da, İcra Şöbəsi bunu icra etməkdən imtina edir. Sabunçu İcra Şöbəsinin icra məmuru Hafiz İsrafilov məhkəmənin bu qərarının övladımın mənə verilməsi üçün əsas yaratmadığını bildirir”.
F. Səmədli müraciətdə bildirir ki, Sabunçu İcra Şöbəsi əvvəlcə bu qərarı icra etməkdən imtina etməsinin səbəbini belə izah etmirdi: “Ağdam İcra Şöbəsindən onlara övladımın mənə alınıb verilməsinə dair məktub göndərmədiklərini iddia edir. Məsələni Ağdam İcra Şöbəsi ilə “həll etməyimizi” məsləhət bilirdilər.
Ancaq Birinci vitse-prezidentimiz hörmətli Mehriban xanım Əliyevaya müraciət etdikdən sonra Sabunçu İcra Şöbəsindən bizə bildirdilər ki, problemi yaradan Ağdam rayon Məhkəməsinin hakimi Rafiq Məmmədovdur. İddia edilir ki, hakim Rafiq Məmmədov qəsdən qətnaməni “03.08.2021-ci il təvəllüdlü Səmədli Yunus Elvin oğlunun anası, iddiaçı Səmədli Fəridə Vaqif qızının himayəsinə verilsin” kimi çıxarıb. Qətnamənin icrası üçün guya ora “atasından alınıb” sözü də yazılmalı imiş.
Sabunçu İcra Şöbəsindən o da bildirilir ki, bununla bağlı Ağdam rayon Məhkəməsinə izah vermək üçün müracət ediblər. Ancaq üzərindən 10 günə yaxın vaxt keçsə də, hər hansı bir cavab almayıblar. Bizə bildirilir ki, hakim Rafiq Məmmədov belə bir izahı verməkdən imtina edir. Deyir ki, qətnamə necə yazılıb, elə də icra olunmalıdır. Vəkilimizin bununla bağlı müraciətlərinə isə cavab verilmir.
Hörmətli Fikrət müəllim! Hörmətli İnam müəllim!
Biz sadə insanlarıq, hüquqi savadımız yoxdur! Ancaq vəkilimizin yazdığı iddia ərizəsində də övladımın keçmiş həyat yoldaşımdan alınaraq ana kimi mənim himayəmə verilməsi tələbi qoyulub. Hakimin çıxardığı qətnamədə də övladımın mənim himayəmə verilməsi əksini tapır.
Ancaq indi isə 2 dövlət orqanın təmsilçiləri məsuliyyəti bir-birinin üzərinə ataraq ana kimi mənim haqqımı və qanunlarımı pozurlar. Mən nə edim, Siz deyin?!
Dövləti təmsil edən, dövlətin adından qərar çıxaran insanlar bu cür söz oyunu ilə qanunları pozacaqsa, vətəndaş kimdən, hardan kömək istəsin?!
Hörmətli İnam müəllim, hörmətli Fikrət müəllim!
Keçmiş həyat yoldaşım mağaza müdiridir, maddi imkanları var. Açıq şəkildə deyir ki, hamını “razı salmışam”. Belə çıxır ki, mənim körpəmi alver predmetinə çeviriblər. Sizdən xahiş edirəm, məmim körpəmlə kimin, hansı orqanın - Sabunçu İcra Şöbəsinin,onun rəisinin, yoxsa Ağdam rayon Məhkəməsinin, hakimin alver etdiyinin araşdılmasına, günahkarların cəzalandırılmasına, məmim qanuni haqqımın təmin olunmasına kömək edəsiniz! Sizə bir ana kimi yalvarıram, müraciətimi şəxsi nəzarətinizə götürəsiniz, körpəmə ən qısa vaxtda qovuşmamı təmin edəsiniz!
Hörmətlə, Səmədli Fəridə Vaqif qızı (Tel: 051 535 17 93)”.
Qeyd edək ki, F.Səmədlinin müraciətindəki faktlar cinayət araşdırmasının başlaması üçün əsas sayıla bilər. Belə ki, ya dövlət adından çıxarılan qətnamə qəsdən yerinə yetirilmir, ya da hakim dövlət adından çıxardığı qətnamədə manipulyasiya edib. Bunun nəticəsində isə ana övladından məhrum edilir, hətta intihara sürüklənir.
Bu isə dövlət qurumlarından birinin və ya hər ikisinin səlahiyyətli şəxslərinin insan alverində iştirakı ehtimalını yaradır. Bu iddia əlbəttə, araşdırılmalıdır! Günahın Sabunçu İcra Şöbəsininin sədri Füzuli Hüseynovdamı, Ağdam rayon Məhkəməsinin hakimi Rafiq Məmmədovdamı və ya başqa birində olduğu ictimaiyyətə açıqlanmalıdır.
Çünki bu cür faktlar Prezident İlham Əliyevin tapşırığı ilə məhkəmə-hüquq sahəsində başlanan islahatlara inamsızlıq yaradır. Dünyanın heç bir yerində, hətta sivil hüquq normalarının olmadığı ölkələrdə belə körpəni anadan ayırmırlar. Azərbaycanda isə iki ilə yaxındır ki, ana əlindən alınan körpəsini geri ala bilmir. Məhkəmə-hüquq sahəsində çalışan vəzifəli şəxslərin də bu işdə rol oynaması isə dövlətin imicinə ağır zərbə vurur.
Azərbaycan ictimaiyyəti, qadınların və uşaqların hüquqlarını qoruyan təşkilatlar, Ombudsman və Ailə, Qadın və Uşaq Problemləri üzrə Dövlət Komitəsi bu məsələni nəzarətə götürməlidir. Ana intihar etdikdən sonra məsələni araşdırmağın mənası olmur.
Yəqin ki, Ali Məhkəmənin sədri İnam Kərimov və Ədliyyə naziri Fikrət Məmmədov da bu məsələni diqqətdən kənarda qoymayacaq.
Mövzunu diqəqətdə saxlamağa çalışacağıq.
R. Əliyev
“AzPolitika.info”
”Deməli, Azərbaycanda bir şəbəkə var (məhkəmə qərarı olmadığı üçün cinayətkar olub-olmadıqlarını deyə bilmərəm), müxtəlif ünvanlarda əcaib adlarla minlərlə şirkət qeydiyyata aldırıb.
Bu şirkətlərin əksəriyyətinin nə işlə məşğul olduqları bilinmir, amma qısa müddətdən sonra yaranan vergi borclarından belə başa düşülür ki, “böyük işlər” görürlər. Bəziləri isə dövlət satınalmalarında (tenderlərdə) qalib olurlar”.
Gununsesi.info bildirir ki, bunu araşdırmaçı Allahverdi Aydın üzə çıxarıb.
Onun yazdığına görə, bu ilin aprel-sentyabr aylarında (6 ay ərzində) həmin ünvanlardan birində – “Nizami rayonu, Məşədi Hilal Kazımov ev 40 m. 40”-da 213 şirkət qeydiyyata alınıb: “Bu ünvanda daha əvvəl də yüzlərlə şirkət qeydiyyata alınıb (fotolar rəydə).
Bu şirkətlərlə bağlı bəzi maraqlı və diqqət çəkən məqamlar:
– Həmin şirkətlərdən 3-nə Eminov Məhəmmədiyə Xəlil oğlu, 3-nə isə onun oğlu Eminov Eşqin Məhəmmədiyə oğlu “rəhbərlik edir”. Məhəmmədiyə Eminov 2017-ci ildə həyətində narkotik bitkilər əkdiyi üçün saxlanılıb (link rəydə).
– Məlikov Zamin Nəzərəli oğlu adlı başqa bir şəxs də 3 şirkətə “rəhbərlik edir” və bu şəxs də 2017-ci ildə oğurluq etdiyinə görə saxlanılıb (link rəydə).
– Başqa bir şəxs – Əfkari Eldar Məhərrəm oğlu da 3 şirkətə “rəhbərlik edir”. Amma, bu şəxs şirkətlər qeydiyyatdan keçəndə (08.05.2023) artıq həyatda olmayıb. Əfkari Eldarın meyiti 4 gün əvvəl (04.05.2023) evində asılmış vəziyyətdə taplıb (link rəydə).
Deyə bilərsiniz ki, keçmişdə oğru və narkoman olanların (ölülər istisnadır) şirkət rəhbəri olmasında qanunsuz nə var ki?
Məsələ burasındadır ki, həmin şəxslərin bir-çoxu adına şirkət açıldığından xəbəri olmur.
– Məsələn, Stanislav Yakushev adlı bir vətəndaş var. İnternat evində böyüyüb. Həbsdə olub. Bu şəbəkə onun da adına şirkətlər açıb və indi 1,5 milyon manat vergi borcu var (foto rəydə).
– Başqa bir şəxs Astara sakini Zaur Məhərrəm oğlu Sovqatov mətbuata açıqlama verib və bildirib ki, onun xəbəri olmadan adına 5 şirkət açılıb və vergi borcu yaranıb. Açıqlamadan 5 gün sonra meyitini meşədə asılmış vəziyyətdə tapıblar (link rəydə).
Bu cür onlarla, yüzlərlə nümunə var. Sosial şəbəkələrdə, mətbuatda istədiyiniz qədər məlumat tapa bilərsiniz.
İndi əsas sual budur ki, bu şirkətlər barəsində ortada bu qədər açıq şübhəli məqamlar olduğu halda niyə heç bir tədbir görülmür?”
Ekspert daha sonra sual edir:
Məni ən çox maraqladıran isə bu şirkətlərə kimin ad qoyduğudur. Minlərlə adı qoymaq üçün hansı alqoritmadan, hansı kompyuter proqramından istifadə edir, adların bir mənası varmı, yoxsa çinlilər kimi qab-qacağı yerə atır, çıxan səslərə uyğun ad qoyur…
Ölkədə hündürmərtəbəli binaların idarə olunması ilə bağlı uzun illərdir ki, problemlər var.
Belə ki, binaların bir çoxunun idarəetməsinə ya nəzarət yoxdur, ya da sakinlər bu idarəetmədən kənar qalırlar. Mənzil Məcəlləsində çoxmənzilli binanın ümumi əmlakının mülkiyyətçilərə məxsus olması, saxlanılması nəzərdə tutulsa da, qanunvericiliyin şərtlərinə MTK-lar tərəfindən əməl edilmir. Belə ki, binaların idarəetməsi şikayətlərə rəğmən, Mənzil Tikinti Korperativlərində qalır.
Nazirlər Kabineti “Çoxmənzilli binanın idarəedici təşkilatının seçilməsi üzrə açıq müsabiqə keçirilməsi Qaydası”nın təsdiq edilməsi haqqında” 1 iyul 2010-cu il tarixli qərarında dəyişiklik edib. Yeni qərara əsasən, bundan sonra çoxmənzilli binaların idarə olunmasında sahə mülkiyyətçiləri ilə yanaşı, kirayəçilər də iştirak edə biləcəklər.
Hüquqşünas Əkrəm Həsənov yaşadığı binada MTK-nı məhkəməyə verib və qalib gəlib. Lakin binanı tikən MTK məsələdən narazı qalaraq Apellyasiya Məhkəməsinə müraciət edib.
Ə.Həsənov Cebhe.info-ya bildirib ki, növbəti məhkəmə baxışı dekabr ayının 5 -də olacaq:
“Qələbə qazanacağıma tam əminəm. Birinci məhkəmədəki qələbədən sonra mənə müraciət edən bina sakinləri ilə yanaşı, vəkillər bu işdə onlara da kömək göstərməyimi istəyirlər. Əlbəttə, mən hər kəsə bu işdə kömək etməyə hazıram. Gərək hər kəs öz hüquqlarını bilsin və haqqını tələb eləsin”.
O qeyd edib ki, binanı tikən şirkətlər tikdikləri binadan çıxmaq istəmirlər:
“Sakinləri talayıb soyurlar və binaya da baxmırlar. Amma qanuna görə, bina sakinlərin idarəetməsində olmalıdır. Mənzil Məcəlləsinə görə, binanın ali orqanı mülkiyyətçilərinin ümumi yığıncağıdır və hətta idarəedici şərtlər, digər məsələlər də sakinlərin öz aralarında həll edilməlidir. Amma təəssüf ki, əksər binaları tikinti şirkətləri qanunsuz idarə edir.
Saxta yolla Mənzil Müştəri Cəmiyyəti yaradır və təəssüf ki, Ədliyyə Nazirliyində bunu təsdiqləyib qeydiyyatdan keçirirlər. Amma qanunla belə olmamalıdır. Mənzil Müştəri Cəmiyyətinin yaradılması üçün bütün sakinlərin imzası notarial qaydada təsdiq olunmalıdır. Bu, ən böyük problemlərdən biridir”.
Müsahibimiz həmçinin sakinlərin bu məsələyə yanaşmasından narazıdır:
“Sakinlər çox zaman birlik göstərə bilmirlər. Passivlik göstərir, qanunu bilmir, onlara təsir və təziqlər olduğuna görə çox zaman birlik ola bilmirlər. Ona görə yaxşı olardı ki, hansısa dövlət qurumu bu işlə məşğul olsun. Məsələn, İqtisadiyyat Nazirliyinin tabeliyindəki bir qurum bununla məşğul ola bilər”.
Nədənsə aidiyyatı qurumlar brokonyerlərə qarşı ciddi mübarizə aparmır…
Poliqon xəbər verir ki, bu barədə “Beyləqan xəbərləri” Facebook səhifəsində məlumat verilir. Məlumatı təqdim edirik:
“Əziz oxucular! Hazırda Beyləqan, Füzuli və İmişli rayonlarında fəaliyyət göstərən heyvan bazarında müxtəlif avtomobillərin arxasına yığılaraq satılan balıq məhsulları ilə bağlı sizə azda olsa məlumat verəcəm.
Apardığımız kiçik araşdırmada məlum oldu ki, Beyləqan, Füzuli və İmişli rayonlarında bazarlarda satılan balıq məhsullarının əksəriyyəti brokonyerlər tərəfindən “Ağ Göl” Milli Parkından qanunsuz ovlanan balıqlardır. Sazan. karp, naxa və durna balığı kimi balıqlar Ağ göldən kütləvi şəkildə tutularaq bazarlara müxtəlif qiymətlərə satılır.
Nədənsə “Ağ Göl” Milli Parkından gətirilən qanunsuz balıq satışı ilə məşğul olan şəxslərə qarşı heç bir aidiyyatı orqan tədbir görmür. Qanunsuz balıq ovu ilə məşğul olmağa görə isə Azərbaycan Cinayət Məcəlləsində bir neçə maddə (256, 257, 258) mövcuddur.
Bildirək ki, bu qədər qanunsuz balıq ovu “Ağ Göl” Milli Parkının rəhbərliyindən xəbərsiz olması heçdə inandırıcı deyil. Əraziyə cavabdeh olan digər bir qurum isə 9 saylı Regional Ekologiya və Təbii Sərvətlər İdarləsidir.
Aldığımız məlumata bir çox brokonyerlər “Ağ Göl” Milli Parkının və 9 saylı Regional Ekologiya və Təbii Sərvətlər İdarəsinin məsul şəxsləri ilə anlaşaraq rahat şəkildə balqı ovu ilə məşğul olurlar. Bu belə olmasaydı hər həftə yuxarıda adının çəkdiyimiz rayonların bazarlarına 1 tondan çox balıq məhsulu gətirilməzdi.
Bundan başqa Ağcabədi və Bərdə rayon bazarlarında da “Ağ Göl” Milli parkından tutulan qanunsuz balıqlar kütləvi satılır. Hələ Ağcabədi və Qarabağ kanalı ətrafında yerləşən restoranlara verilən balıqları belə saya salmırıq.
Məsələ ilə bağlı araşdırmamız davam edir”.
Haqq-Ədalət Partiyasının (HƏP) sədri Əli İnsanov Ali Məclisinin sədri Zəlimxan Məmmədlini partiyadan qovub.
Bu barədə Z.Məmmədli sosial şəbəkədə yaydığı videomüraciətdə bildirib. Qeyd edib ki, bununla bağlı qərar özünün iştirak etmədiyi İdarə Heyətinin 25 noyabr tarixili iclasında qəbul edilib.
Müraciətində o, HƏP üzv olarkən Əli İnsanovla necə anlaşdıqlarının detallarını açıqlayıb. Z.Məmmədli bildirib ki, son vaxtlar sədr partiyanı nizamnamədənkənar, özü bildiyi kimi idarə edib. “Bu yaxınlarda Rəyasət Heyətini buraxıb, Ali Məclis sədrinin müavinini partiyadan çıxarıb. Bu da zaman-zaman onun və digər üzvlərin ciddi narazlığına səbəb olub. “O qərara gəlib ki, Zəlimxanı sındırmaq lazımdır. Bütün sənədləri paylaşacam... Salam-kəlamı, çörəyi tapdalayıb, hüququ tapdalayıb, xəyanət edib. Cəsarətlə deyirəm, HƏP-də haqq-ədalət yoxdur, hüquq yoxdur. Bu gün yığışıb desələr adam öldürmək lazımdır, onun da qərarını ala bilər...”