Əhalini narazı salan xidmət sahələrindən biri də nəqliyyat sektoru, marşrut xətlərindəki özbaşınalıqlardır. Bu sektorda xəttə buraxılan avtobusların standartlara cavab verməməsindən tutmuş, sürücülərin qeyri-peşəkar davranışlarına qədər çoxsaylı problemlər müşahidə olunur. İctimai nəqliyyat sahəsindəki çatışmazlıqlarla bağlı mediada və sosial şəbəkələrdə dəfələrlə müzakirə açılsa da, nədənsə müsbətə doğru ciddi dəyişiklik müşahidə edilmir.

Daha acınacaqlı durum isə bölgələrdədir. Elə bu yazıdakı şikayət də paytaxtın təxminən 30 kilometrliyində yerləşən Sumqayıt şəhərinin ictimai nəqliyyat sektorundandır. Şəhərin Kotec qəsəbəsi – “Yaşıldərə” massivi marşruti üzrə hərəkət edən 10A saylı avtobusların iş prinsipi sərnişinlərin ciddi narazılığına səbəb olur. Açığı, bu marşrutdan bəhs edərkən “prinsip” sözündən istifadənin özü də yerinə düşmür. Çünki sözügedən avtobusların hazırkı fəaliyyəti demək olar ki, prinsipsizlik üzərində qurulub.

KONKRET.az-a müraciət edən Arif İsgəndərov adlı Sumqayıt sakini də adıçəkilən marşrutun daimi sərnişini kimi burada rastlaşdığı neqativlərdən danışıb.

Şikayətçinin sözlərinə görə, 10A marşrutu ilə bağlı sərnişinlərin narazılığı ilk növbədə avtobusların quruluşca əlverişsiz və narahat olmasıdır. Xəttə buraxılan çəhrayı avtobusların xüsusən ön giriş qapısından istifadə (əsasən də uşaqlar və qocalar üçün – red.) çox əziyyətlidir. Təəssüf ki, Kotec qəsəbəsi – “Yaşıldərə” massivi üzrə alternativ marşrut xətti olmadığından sərnişinlər məcburən bu əziyyətə qatlaşmalı olurlar. Təbii ki, sərnişinlərin üzləşdiyi belə fiziki əziyyət sürücülərin diqqətindən yayınmır və insanların minib-düşməkdə çətinlik çəkməsi onların da işini ağırlaşdırır. Təbii ki, bu məsələdə sözsüz ki, sürücülərin həll edə biləcəyi nəsə yoxdur. Yəni onların əlindən belə bir naqolay avtobusların xəttə buraxılmasına görə dillərinin altında deyinməkdən başqa bir iş gəlmir. Əslində biz də belə əlverişsiz avtobusların hansı səbəbdən ölkəyə gətirilməsinin səbəbini tapmaqda çətinlik çəkirik. Görünür, avtobusları alıb dövriyyəyə buraxanlar onun keyfiyyətindən çox, ucuzluğuna önəm veriblər.

Arif İsgəndərovun dediyinə görə, 10A marşrut xətti üzrə təxminən 20-yə yaxın avtobus işləyir. Onları idarə edən sürücülərin əksəriyyəti də sükan arxasına sanki öz öhdəliklərindən xəbərsiz halda, yəni təlimatlandırılmadan əyləşir. Vətəndaşın redaksiyaya təqdim etdiyi fotodan da görünür ki, avtobusu idarə edən sürücü peşə məsuliyyətindən xəbərsizdir. Sərnişin deyir ki, sözügedən marşrutda hər gün belə bir mənzərə ilə qarşılaşırlar. Bu avtobusun əksər sürücüləri bəzən hətta yolboyu 20-30 dəqiqə telefonla danışır, sükan arxasında tum çırtlayır, eyni xətdə işlədikləri digər sürücü həmkarları ilə intervala görə mübahisə edərək yollarda təhlükəli vəziyyət yaradırlar.

Vətəndaşın digər gileyi isə son zamanlar avtobuslar arasındakı intervalın xeyli artmasıdır. A.İgəndərov deyir ki, sürücülərə bununla bağlı irad bildirəndə belə cavab alıblar: “Avtobuslardan 7-8-i texniki baxımdan sıradan çıxdığına görə təmirə göndərilib. Təmir üçünsə ehtiyat hissələri yoxdur. Ona görə də hamısı qarajda ilişib-qalıb”.

Nəticədə avtobuslar arasındakı 6 dəqiqəlik interval 15-20 dəqiqəyə çatıb ki, bu da sürücülərlə sərnişinləri üz-üzə qoyub.

Əməkdaşımız şikayətlə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucovla əlaqə saxlayıb. Agentliyin sözçüsü məsələyə aydınlıq gətirərək bildirib ki, “10A nömrəli marşrut xəttində hazırda planlaşdırılan sayda – 14 ortatutumlu avtobusla sərnişindaşıma fəaliyyəti həyata keçirilir. Avtobusların iş qrafiki 6:15-dən 23:00-dək, marşrut xətti üzrə avtobuslararası interval isə 7 dəqiqə təşkil edir və avtobus sayında heç bir azalma müşahidə edilmir”.

T.Orucov əlavə edib ki, daşıyıcıya günün “pik” saatlarında avtobuslararası intervalın sərnişin axınına uyğun olaraq tənzimlənməsi tapşırığı verilib. Həmçinin, AYNA tərəfindən sərnişindaşınma imkanlarının artırılması üçün Sumqayıt şəhərində daşıma göstəricisi aşağı olan marşrutlara əlavə avtobuslar cəlb edilib. Şəhərdə nəqliyyatın əlçatanlığının təmin olunması məqsədilə 10A nömrəli avtobus marşrutu da daxil olmaqla 12 marşrut xəttinə əlavə avtobuslar buraxılıb”.

Lakin yazı çapa hazırlanan müddətdə apardığımız müşahidələrdən də belə məlum oldu ki, “Sumqayıt nəqliyyat – 1” MMC tərəfindən xəttə buraxılan marşrutun real fəaliyyəti ilə rəsmi məlumatlar heç də üst-üstə düşmür. Abtobusların gecə saat 23:00-a qədər işləməli olduğu halda, 21:00-22:00-a qədər çalışması da həmin xəttin tabeliyində olan MMC tərəfindən nəzarətsiz buraxılmasının daha bir göstəricisidir. Bu qədər nöqsana adıçəkilən şirkət tərəfindən illərdir, göz yumulması da bir sıra qaranlıq məqamlardan xəbər verir.

Bu arada onu da xatırladaq ki, “Sumqayıt nəqliyyat – 1” MMC Sumqayıt Şəhər İcra Hakimiyyətinin başçısı Zakir Fərəcovun bacısı oğlu Elgiz Fərəcova məxsusdur.

Deputatın oteli ilə “Azərcell”in çəkişməsi Lerikin bir hissəsini rabitəsiz qoyub
Millət vəkili İqbal Məmmədova məxsus olan və Lerikdə yerləşən “Relax” otellə “Azərcell” mobil operator arasında yaranan maliyyə mübahisəsi sözügedən rayonun bir hissəsini mobil rabitəsiz qoyub. Bu barədə məlumatı Azinforum.az-ın canlı yayımında müsahibə verən Kamil Cəfərov adlı vətəndaş verib. Onun sözlərinə görə, mobil operator “Relax”ın həyətində yerləşdirdiyi ötürücü qullənin icarə pulunu ödəmədiyi üçün onun enerjisini kəsib.

Azinforum.az həmin videomüsahibəni təqdim edir:

Naxçıvanlılar uzun illərdir ki, öz rəhbərlərinin fərqlənmək “xəstəliyindən” əziyyət çəkirlər. Naxçıvan Ali Məclisinin sabiq sədri Vasif Talıbov da bu “sindroma yoluxmuşdu”. Fərq odur ki, Talıbov muxtar respublika rəhbəri seçiləndən, təqribən, 10 il sonra “xəstələnmişdi”. Naxçıvanın muxtariyyət statusunu əlində bayraq edən Vasif Talıbov hər vəchlə Azərbaycanın əsas hissəsindən fərqlənməyə çalışırdı. Onun keçirdiyi tədbirlər, qəbul etdiyi qərarlar Bakıdan fərqlənirdi. Bununla bağlı çoxsaylı misallar deyə bilərik. Məsələn, koronavirusun tüğyan etdiyi dövrdə Azərbaycanın paytaxtında və bütün bölgələrində hər kəsdən maska taxmaq tələb edilirdi. Hətta Prezident İlham Əliyev də şəxsi nümunə göstərərək keçirdiyi tədbirlərdə maska taxırdı. Həmin dövrdə Azərbaycanda maska taxmayan yeganə rəhbər vəzifəli şəxs Vasif Talıbov idi. Talıbov Azərbaycanın əsas hissəsindən fərqlənərək Naxçıvanda heç kimi maska taxmağa məcbur etmədi. Naxçıvan Azərbaycanın yeganə bölgəsidir ki, orada maska taxmamağa görə heç kim cərimə olunmayıb. Vasif Talıbov mərkəzdə yaradılan dövlət orqanlarını Naxçıvanda fərqli formada təsis edir, aparılan struktur islahatlarını Bakıya uyğunlaşdırmırdı. Bu fərqlənmək “xəstəliyi” uzun illər müalicə olunmadığından metastaz verdi və sonda Talıbovun biabırçı şəkildə vəzifədən qovulması ilə nəticələndi.

Vasif Talıbovun istefasından sonra naxçıvanlılar hesab edirdi ki, bu fərqlənmək “sindromu” sağalacaq, muxtar respublikada hər şey Bakıdakı kimi olacaq. Ancaq ümidlər özünü doğrultmadı. Vasif Talıbovun “ənənələri” davam etdirildi, fərqlənmək “xəstəliyi” yenidən baş qaldırdı.

Həqiqətən də insanlar bunu dərk etməkdə çətinlik çəkir. Niyə belə olur? Axı mərkəzdən, siyasi hakimiyyətdən belə tələb olunmur! Naxçıvan niyə özünü Bakıdan və digər regionlardan fərqləndirməyə çalışır? Bu fərqlənmək arzusu və istəyi Naxçıvan əhalisinə problem yaradır, onları çətinə salır.

Bu günlərdə redaksiyamıza göndərilən iki fotoya baxandan sonra bu qənatə gəldik.

Rəqəmsal inkişaf və nəqliyyat naziri Rəşad Nəbiyevin Naxçıvanda vətəndaş qəbulu.


Azərbaycan Respublikasının rəqəmsal inkişaf və nəqliyyat naziri Rəşad Nəbiyev Naxçıvanda vətəndaş qəbulu keçirib. Diqqətli oxucumuz Rəşad Nəbiyevin və Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəflinin keçirdikləri vətəndaş qəbullarının fotolarını göndərib soruşur ki, Naxçıvanda Bakıdan fərqlənmək “sindromu” sağalmayıb?

Prezidentin səlahiyyətli nümayəndəsi Fuad Nəcəflinin Kəngərli rayonunda vətəndaş qəbulu.

Oxucumuz artıq Bakıdan yüksək vəzifəli şəxslərin gedib Naxçıvanda qəbullar keçirməsinə sevinir, muxtar respublikada hər şeyin paytaxtdakı kimi olmasını arzulayır.

Bu müraciətdən sonra Fuad Nəcəflinin və Azərbaycanın mərkəzi icra hakimiyyəti orqanları rəhbərlərinin Naxçıvanda keçirdiyi vətəndaş qəbullarının fotolarına baxdıq. Ölkəmizin mərkəzi icra hakimiyyəti orqanları rəhbərlərinin vətəndaş qəbullarının formatı, demək olar ki, eynidir. Naxçıvan isə Talıbov dövründəki “ənənəsinə” sadiq qalaraq bu formatı dəyişib və fərqlənib. Soruşa bilərsiniz ki, burda böyüdüləcək nə var ki! Biri qəbul zamanı stolu başqa cür, o biri ayrı formada qoyur. Biz də çoxları kimi düşünürdük. Amma oxucumuz bu məqama da aydınlıq gətirib. Deyir ki, əvvəla Azərbaycanın mərkəzi icra hakimiyyəti orqanlarının rəhbərlərindən fərqlənmək özünü ayrı bir dövlətin təmsilçisi kimi göstərmək istəyidir. Bununla demək istəyirlər ki, biz sizdən daha üstünük.

İkincisi, bu necə vətəndaş qəbuludur ki, şikayətçini hər kəsin yanında qəbul edirlər. Səlahiyyətli nümayəndə vətəndaşları qəbul edərkən rayonun icra başçısı, muxtar respublikanın bəzi mərkəzi icra hakimiyyəti orqanlarının rəhbərləri, rayonun müxtəlif idarə və təşkilatlarının rəhbərləri qəbul keçirilən zalda oturur. İndi bu vətəndaş hər kəsin içində öz dərdini, şikayətini Prezidentin səlahiyyətli nümayəndəsinə necə desin? İcra başçısından, nazirdən onların yanında səlahiyyətli nümayəndəyə necə şikayət etsin?

Üstəlik qəbulun formatı elə qurulub ki, vətəndaş ilk andan psixoloji gərginlik içində olur. Müttəhim kürsününə bənzər stulda, hər kəsin yanında vətəndaşın dərdini soruşsan, o, şikayətini olduğu kimi deyə bilməyəcək. Vətəndaşla fərdi qaydada danışmaq, onunla səmimi olmaq lazımdır ki, o, məmurlardan şikayətini ürəkaçıqlığı ilə deyə bilsin. Beləliklə, problemlər, narazılıqlar aradan qaldırılar, vətəndaş məmnunluğu təmin edilər. Elə bu məqamda daha bir ciddi sual meydana çıxır. Bu qəbulların formatı fərqlənmək üçün belə seçilib, yoxsa vətəndaşın problemlərinin həll edilməməsi üçün? Hər ikisi qəbuledilməzdir və Azərbaycan dövlətinin apardığı siyasətə ziddir. Dövlət heç kimin fərqlənməməsi, hər kəsin bərabər səviyyədə yaşaması və fəaliyyət göstərməsi, vətəndaş məmnunluğunun təmin edilməsi istiqamətində lazımi tədbirlər həyata keçirir. Naxçıvanda isə...

Azərbaycanın mərkəzi icra hakimiyyəti orqanları rəhbərlərinin Naxçıvanda vətəndaş qəbulu.



Fuad Nəcəflinin Ordubad rayonunda vətəndaş qəbulu.



Fuad Nəcəflinin Culfa rayonunda vətəndaş qəbulu.



TNS.az

Azərbaycanda tibbi təchizat sahəsində fəaliyyət göstərən “Azeri Med” Qapalı Səhmdar Cəmiyyəti (QSC) Milli Onkologiya Məkəzinin iki tenderinin qalibi seçilib.

Tenderlərdən biri şüa avadanlıqları və digər tibbi avadanlıqların cari təmiri, texniki xidmət, material ehtiyatları kimi tanınan hissələrinin, detallarının alınması və dəyişdirilməsi, digəri isə tibbi və digər avadanlıqların satın alınması ilə bağlı keçirilib.

Bu iki tender üzrə MOM-la “Azeri Med” QSC arasında bağlanan satınalma müqaviləsinin ümumi maliyyə dəyəri 7 119 243,84 AZN təşkil edir.

İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, “Azəri Med” QSC 2 iyul 2004-cü ildə qeydiyyata alınıb. Nizamnamə kapitalı 10 000 AZN-dir. Şirkətin hüquqi ünvanı Bakı şəhəri Nərimanov rayonu, Asif Məmmədov küçəsi, ev 30 F-də yerləşir. QSC-nin qanuni təmsilçisi Rəhimli Famil Vəli oğludur.

Araşdırmalarımız zamanı aydın olub ki, “Azəri Med” QSC 10 manatlıq nizamnamə kapitalı ilə MMC kimi yaradılıb. Daha sonra bu məbləğ 1020 AZN-ə, 2020-ci ildə isə 10 000 AZN-ə çatdırılıb.

2020-ci ildə isə şirkətin təşkilati hüquqi forması dəyişdirilib və “Azəri Med” QSC-yə çevrilib.

“Azəri Med” QSC-nin tibb sektorunda əsas oyunçulardan biri olması təsadüfi deyil. Məsələ burasındadır ki, bu şirkətin sahibi Milli Məclisdə təmsil olunur. Söhbət 9 saylı Binəqədi seçki dairəsindən mandat qazanan Kəmaləddin Qafarovdan gedir.

“Azəri Med” QSC-nin Kəmaləddin Qafarova məxsus olması barədə mediada kifayət qədər yazılıb. Qarşı tərəf bu iddiaları indiyə qədər təkzib etməyib.

“Azəri Med” QSC demək olar ki, vaxtaşırı MOM-un iri məbləğli tenderlərinin qalibi seçilir. Bu da təsadüfi deyil.

Kəmaləddin Qafarov 2014-2015-ci illərdə MOM-un direktor müavini vəzifəsində işləyib. O, deputat olmasına baxmayaraq indi də qeyri-rəsmi olsa da, MOM-da səalihiyyət sahibi hesab olunur.
Mənbə: Reportyor.info

Hər dəfə "Palmali" şirkətindən yazanda Mübariz Mənsimovun sosial şəbəkələrdəki trolları hücuma keçirlər.
Yenə elə olacağını bilirəm. Nə etmək olar, bunlar da evə çörəyi bu yolla aparırlar.
İstifadə olunmağı özlərinə yaraşdırırlarsa, nə mən, nə də kimsə başqası onları bundan sonra dəyişə bilməz.
Mübariz Mənsimov, onun şirkəti, gəmiləri, erməni iş adamı ilə münasibəti, cəmiyyətə sırıdığı xeyriyyəçi imici və s. və i.a. haqqında bir neçə dəfə yazmışam.
Dərhal da mənsimovçuların təzyiqlərinə məruz qalıram.
Xüsusən də onun İstanbulda fəaliyyət göstərən Hüseyn Cavid məktəbinə qarşı çirkin oyunları barədə məlumat verib məsələni ictimailəşdirmişəm.
İndi isə keçmiş gəmi aşpazının hazırda davam edən əməllərindən birini bildirim.
Mübariz Mənsimovun “Şəhid Adil İbrahimli” adını daşıyan tankeri var.
Bu tankerin bosmanı Nəsimi Şükürov işlədiyi şirkətin rəhbərliyinə məktub göndərib. Məktubun məzmunundan məlum olur ki, Şükürov Nəsimi Əliağa oğlu istehsalatda ciddi zədə alıb.

27 oktyabr 2023-cü il tarixində gəmidə baş verən qəza nəticəsində 82°C hərarətində kimyəvi yuyucu maddə onun üstünə tökülür. Nəsiminin bədəninin aşağı hissəsi,qolları yanır. İzmail şəhərindəki (Odessa,Ukrayna)xəstəxanalardan birinə çatdırılan Şükürov orada 20 gün (27.10.2023-16.11.2023) müalicə olunur. Amma xəstəxanadakı antisanitar şərait onun orqanizmini başqa xəstəliklərə yoluxdurur.
Nəsimi Şükürov sağlamlığının bərpası üçün1570 manat xərci çıxdığını bildirir. Kompensasiya almaq üçün üz tutduğu “Palmali” şirkəti isə ona cəmi 2500 manat təklif edir. Şikayətçi deyir ki, ona daha çox kompensasiya ödənilməlidir: “Əvvəla, hadisə şirkətlə bağladığım kontraktın bitməyinə 3 ay qalmış baş verib.



Deməli, sağlamlıq səbəbindən işləmədiyim 3 aylıq maaşımı da verməlidirlər. İkincisi, sığorta pulu da ödəməlidir.
Doğrusu, indi baxıram ki, şirkətlə bağladığım müqavilədə sığortanın barədə heç nə göstərilməyib.
Bu isə iş qanunvericiliyinə ziddir. Bundan əlavə, müalicə pulu da alacağım vəsaitə əlavə olunmalıdır.
Şirkət isə mənə müalicəmdən başqa sanki 900 manat “sus” pulu ödəmək istəyir”.
Bosman Nəsimi Şükürov deyir “Palmali” şirkətlər qrupunun sədri Mübariz Mənsimov həbsdə yatanda çoxu onu ondan üz döndərən vaxt mən işi atıb qaçmadım.
Amma indi bu sadiqliyinin qarşılğını görmədiyinə görə heyfsilənir:
“Belə dilənçi insanlarla həyatda ilk dəfə rastlaşıram. Başqa şirkətlər Ukraynaya gedən dənizçilərə həyati təhlükəsi olduğuna görə kompensasiya ödəyir.
Mən isə faktiki iş qəzası kecirmişəm, hər gün həyacan siqnalı çalınan İzmail şəhərində 20 gün xəstə yatmışam, bunlar isə mənə heç bir şey etmək istəmirlər”.

Hörmətli oxucular, bu da "xeyriyyəçi" Mübariz Mənsimovun tabeliyindəki əməkdaşına münasibəti.
Xəstənin pulunu kəsən işbaz işçisinin dar günündə özünün necə adam olduğunu nümayiş etdirir.
İnsanı istismar edib qədrini bilməyən birini bir daha tanıyın.
Sima Babayeva
TEREF: Xocanın Blogu
Səhifəmiz hamının fikirləri üçün açıqdır!

Əməliyyat da daxil olmaqla müayinə və qida kimi xərclər vətəndaş üçün ödənişsiz göstərilir.

2021-ci ilin aprelindən Azərbaycanda tibbi sığorta bütün ölkə ərazisində işə düşüb. Haradasa, 3 ildir ki, vətəndaşlar bir çox tibbi müayinə və müalicələri pulsuz almaq imkanı qazanıblar. Bundan başqa sığorta bir çox cərrahiyyə əməliyyatını da qarşılamalıdır.

Bəs, 3 ildir tətbiq olunan Tibbi sığorta xəstəxanalarda rüşvətin kökünü kəsə bilibmi?

Daha ətraflı Azadlıq Radiosunun materialında:

“Ödənişli Bakı-Quba yolunda sürət həddini göstərən yol nişanları sürücülərə xatırlatma məqsədilə qurulub. Kim istəyirsə artıq sürsün”.
BEY.AZ xəbər verir ki, bu sözləri AAYDA-nın idarə heyətinin sədri Saleh Məmmədov Baku TV-ə açıqlamasında deyib.
“Biz sürücülərə xəbərdarlıq üçün həmin nişanları quraşdırmışıq. Orada heç bir radar və nəzarət yoxdur. Sürət həddini 110 km/saat-dan yuxarı kim sürmək istəyirsə, sürsün”.






“Xəbər Xətti”

Azərbaycan Respublikasının Prezidenti İlham Əliyev 20 Yanvar faciəsinin ildönümü ilə əlaqədar sosial şəbəkə hesablarında paylaşım edib.

Dövlət başçısının paylaşımını təqdim edirik: