Prokuror 7 jurnalistin hər birinə 11-12 il azadlıqdan məhrumetmə cəzası istədi
“AbzasMedia” işi üzrə həbsdə olan jurnalistlərin işi üzrə məhkəmə istintaqı başa çatıb. Mayın 20-də məhkəmədə prokuror çıxış edərək, 7 jurnalistə cəza istəyib.
Bizimyol.info xəbər verir ki, hakim Rasim Sadıxovun sədrliyilə keçirilən məhkəmə prisesində dövlət ittihamçısı qismində prokuror Rauf Malışov çıxış edib. O bildirib ki, jurnalistlərə qarşı irəli sürülmüş qanunsuz sahibkarlıq, cinayət yolu ilə əldə edilmiş əmlakın leqallaşdırılması, qaçaqmalçılıq, sənəd saxtakarlığı, vergidən yayınma ittihamları məhkəmədə sübuta yetirilib.

Prokuror təqsirləndirilən jurnalistlərdən “AbzasMedia” saytının həmtəsisçisi Ülvi Həsənovun 12 il, baş redaktor Sevinc Vaqifqızının (Abbasova) 11 il, direktor müavini Məhəmməd Kekalovun 11 il, jurnalistlər Elnarə Qasımova və Nərgiz Absalamovanın 11 il, Azadlıq radiosunun əməkdaşı Fərid Mehralızadə və “Turan” informasiya agentliyinin redaktoru Hafiz Babalının 12 il azadlıqdan məhrum edilməsini istəyib. Onlara əlavə cəza olaraq, 3 il də vəzifə tutmaq hüququndan məhrumetmə cəzası verilməsini təklif edib.

Prokurorla yanaşı, Dövlət Vergi Xidmətinin nümayəndəsi də çıxış edib. Nümayəndə mülki iddianın təmin olunmasını istəyib. Qeyd edək ki, “AbzasMedia”nın 64000 manat vergidən yayınması ilə əlaqədar mülki iddia qaldırılıb.

Prokurorun çıxışı ilə əlaqədar vəkillər müdafiə çıxışına hazırlaşmaq üçün vaxt istəyib. Hakim Rasim Sadıxov vəkillərə iyunun 10-na qədər vaxt verib.

Qeyd edək ki, 2023-cü il noyabrın 21-də “Abzas Media”nın direktoru Ülvi Həsənli, daha sonra baş redaktoru Sevinc Vaqifqızı, direktor müavini Məhəmməd Kekalov, dekabrın 1-də jurnalistlər Nərgiz Absalamova, dekabrın 13-də jHafiz Babalı, yanvarda Elnarə Qasımova, mayda isə Fərid Mehralızadə barəsində qrup halında qaçaqmalçılıq ittihamı ilə həbs qətimkan tədbiri seçilib.

Onlara qarşı Cinayət Məcəlləsinin 206.3.2-ci (qrup halında qaçaqmalçılıq) maddəsi ilə ittiham irəli sürülüb. Daha sonra əlavə maddələrlə yeni ittihamlar elan edilib.

Jurnalistlər bu ittihamları qəbul etmir, peşə fəaliyyətlərinə görə həbs olunduqlarını bildirirlər.